KIO နဲ့ အစိုးရ မေလဆန်းတွင် ပြန်တွေ့ရန် ဦးအောင်မင်း ကမ်းလှမ်း

ချင်းမိုင်(မဇ္စျိမ)။   ။ ကချင်လွတ်လပ်ရေးအဖွဲ့ (KIO)နှင့် မေလဆန်းပိုင်းတွင် ပြန်လည်တွေ့ဆုံရန် အစိုးရ ငြိမ်းချမ်းရေး ဖော်ဆောင်ရေး လုပ်ငနး်ကော်မတီ ဒု-ဥက္ကဋ္ဌမှ ကမ်းလှမ်းစာ တင်ပြထားကြောင်း ငြိမ်းချမ်းရေး အကျိုးဆောင် ဦးလှမောင်ရွှေ က ပြောသည်။

ဝန်ကြီး ဦးအောင်မင်း က ၎င်း၏ ကမ်းလှမ်းစာကို မကြာမီက ပေးပို့ထားပြီး ဖြစ်ကြောင်း တနင်္လာနေ့ နံနက်ပိုင်းက
မြန်မာ ငြိမ်းချမ်းရေးစင်တာတွင် ပြောဆိုခဲ့သည်ဟု “KIO နဲ့ တွေ့ဖို့ကတော့ မနက်က ဝန်ကြီး ဦးအောင်မင်းက ရှင်းပြတာက သူ့အနေနဲ့ လွန်ခဲ့တဲ့ ရက်ပိုင်းက မေလ ပထမပတ် မြစ်ကြီးနားမှာ တွေ့ဆုံဆွေးနွေးဖို့အတွက် အဆိုပြုလွာ ပေးထားတယ်။ KIO အနေနဲ့တော့ သူတို့ တက်ရောက်တဲ့ observer (လေ့လာသူ) တွေ ကိစ္စတွေကို ညှိနှိုင်းပြီးရင်တော့ ဆောင်ရွက်နိုင်မယ်လို့ မျှော်လင့်ထားတယ်တဲ့” ဟု ဦးလှမောင်ရွှေ က မဇ္စျိမကို ပြောသည်။

သို့သော် ကချင်ငြိမ်းချမ်းရေး အကျိုးဆောင် ဦးဂွမ်ဂျာ အဆိုအရ ဝန်ကြီးဘက်မှ ကမ်းလှမ်းစာကို ဧပြီလ ၂၇ ရက်နေ့ထိ KIO ဘက်မှ လက်ခံမရရှိသေးဟု ဆိုသည်။

“ခုထိဘာမှ အကြောင်းမကြားလာသေးဘူး။ ဟိုတနေ့ နှစ်ရက်လောက်က ဝန်ကြီး ဦအောင်မင်းရဲ့ စာနဲ့ ပတ်သက်လို့ ကျနော် မေးကြည့်တော့ သူတို့ မရသေးဘူးလို့ ပြောတယ်။ ဒါကြောင့် ဒီည ပြန်မေးကြည့်မယ်လို့ လုပ်နေတယ်” ဟု မဇ္စိိျမကို ပြောသည်။

ပြန်လည်တွေ့ဆုံရန် ကိစ္စနှင့်ပတ်သက်၍ မဇ္စျိမက KIO ထံ မေးမြန်းရန် ဆက်သွယ်ခဲ့သော်လည်း တယ်လီဖုန်းလိုင်း များ ဆက်သွယ်၍ မရခဲ့ပေ။

ဝန်ကြီး ဦးအောင်မင်းမှာ အင်္ဂါနေ့တွင် စင်္ကာပူနိုင်ငံသို့ ဖိုရမ်တခု တက်ရောက်ရန်သွားရောက်မည် ဖြစ်ပြီး မေလ ၂ ရက်နေ့တွင်မှ မြန်မာနိုင်ငံသို့ ပြန်လည် ရောက်ရှိလာမည် ဖြစ်ကြောင်း သိရသည်။

ဧပြီလ ၆ ရက်နေ့က မြစ်ကြီးနားမြို့၌ တွေ့ဆုံရန် စီစဉ်ထားသော်လည်း လေ့လာသူများ တက်ရောက်ရန်ကိစ္စ ညှိနှိုင်းမရသေး၍ ဧပြီလ ၂၂ ရက်နေ့ နောက်ပိုင်းသို့ ပြန်လည် ရွှေ့ဆိုင်းခဲ့သည်ဟု ဦးလှမောင်ရွှေ က မကြာမီက မဇ္စျိမကို ပြောဆိုခဲ့သည်။

သို့သော် တချို့ ကချင်ငြိမ်းချမ်းရေး အကျိုးဆောင်များကမူ တရုတ်အစိုးရအနေဖြင့် အနောက်နိုင်ငံများမှ တက်ရောက်လေ့လာရန် ရှိသည်ကို သဘောမတူသဖြင့် တွေ့ဆုံမှု ရွှေ့ဆိုင်းလိုက်ရသည်ဟု သတင်းများတွင်
ဖော်ပြခဲ့ကြသည်။

မတ်လ ၁၁ ရက်နေ့က KIO နှင့် အစိုးရ ငြိမ်းချမ်းရေးကိုယ်စားလှယ်များ တရုတ်နိုင်ငံ၊ ရွှေလီမြို့တွင် နောက်ဆုံး
တွေ့ဆုံခဲ့ပြီး တလအတွင်း ပြန်လည် တွေ့ဆုံရန် သဘောတူညီခဲ့ကြသော်လည်း ကြန့်ကြာနေဆဲ ဖြစ်သည်။

http://www.mizzimaburmese.com/news/inside-burma/11454-kio------.html

အပြည့်အစုံသို့... »

KIO နဲ့ ရှေ့သီတင်းပတ်ထဲ ဆွေးနွေးဖို့ အစိုးရကမ်းလှမ်း

တိုင်းရင်းသား လက်နက်ကိုင် အဖွဲ့တခုဖြစ်တဲ့ ကချင်လွတ်မြောက်ရေးအဖွဲ့ KIO နဲ့ မြန်မာအစိုးရတို့ကြား နောက်တကြိမ် ဆွေးနွေးပွဲတွေ ကျင်းပဖို့ နှောင့်နှေးနေချိန်မှာပဲ ၂ ဘက်တပ်တွေကြား တိုက်ပွဲတွေလည်း ဆက်လက် ဖြစ်ပွားနေပါတယ်။

ငြိမ်းချမ်းရေး ဆွေးနွေးပွဲကိုတော့ ဒီလထဲ မြန်မာနိုင်ငံတွင်းမှာ ပထမဆုံးအကြိမ် ကျင်းပဖို့ စီစဉ်ထားပေမဲ့ အပြီးသတ် ညှိနှိုင်းလို့ မရသေးဘဲ ဖြစ်နေရတာပါ။ ကချင်လက်နက်ကိုင်အဖွဲ့နဲ့ ငြိမ်းချမ်းရေး ဆွေးနွေးပွဲ အလားအလာတွေကိုတော့ မဆုမွန် က တင်ပြထားပါတယ်။

ကချင်ပြည်နယ် မြစ်ကြီးနားမြို့မှာ KIO နဲ့ ဆွေးနွေးမယ့် အစီအစဉ်ကိုတော့ အစောဆုံး ရှေ့သီတင်းပတ်လောက်မှာဖြစ်ဖို့ မြန်မာအစိုးရ ကိုယ်စားလှယ်တွေဘက်က မျှော်လင့်ထားတာ ဖြစ်ပါတယ်။ အပြီးသတ် ညှိနှိုင်းစရာတချို့ ကျန်နေဆဲဖြစ်ပေမဲ့ ရှေ့တပတ်ထဲ တွေ့ဆုံနိုင်အောင် ငြိမ်းချမ်းရေး ကိုယ်စားလှယ်အဖွဲ့ ခေါင်းဆောင် ပြည်ထောင်စုဝန်ကြီး ဦးအောင်မင်း က KIO ကို ကမ်းလှမ်းထားတယ်လို့လည်း မြန်မာအစိုးရရဲ့ ငြိမ်းချမ်းရေး အကျိုးတော်ဆောင် ဦးလှမောင်ရွှေ က ပြောပါတယ်။

“၀န်ကြီး ဦးအောင်မင်းက ကျနော်တို့ကို peace center မှာ ရှင်းပြတာကတော့ သူ့အနေနဲ့ လွန်ခဲ့တဲ့ရက်ပိုင်းက ဆွေးနွေးပွဲ ထပ်မံလုပ်ဖို့ အဆိုပြုလွှာ ပို့ထားတယ်။ KIO ဘက်ကလည်း ညှိနှိုင်းစရာတချို့ ညှိနှိုင်းပြီးရင်တော့ လာမယ့်အပတ်ထဲမှာ ဆွေးနွေးပွဲ ဖြစ်နိုင်တယ်လို့ အလုပ်အဖွဲ့အားလုံးကို ရှင်းပြထားပါတယ်။ မြစ်ကြီးနားမှာ တွေ့ဆုံဆွေးနွေးနိုင်ဖို့တော့ အဆိုပြုလွှာ ပို့ထားပါတယ်။”

မြန်မာအစိုးရရဲ့ ကမ်းလှမ်းချက်နဲ့ ပတ်သက်လို့ KIO တာဝန်ရှိသူတွေရဲ့ သဘောထားကိုတော့ မသိရသေးပါဘူး။ တချိန်တည်းမှာပဲ အစောပိုင်းမှာတုန်းက ဒီလထဲ ကျင်းပဖို့ စီစဉ်ထားတဲ့ ဆွေးနွေးပွဲတွေ ကြန့်ကြာနေချိန်မှာပဲ KIO နဲ့ တိုက်ပွဲတွေလည်း ဖြစ်ပွားနေတာပါ။

ကချင်သတင်းစဉ်အယ်ဒီတာ ကိုနော်ဒင်းကတော့ ရှမ်းပြည်မြောက်ပိုင်း ပန်ဆိုင်း၊ မွန်းဂူးဒေသမှာ ဒီရက်ပိုင်းအတွင်း တိုက်ပွဲတွေဖြစ်နေတာလို့ ပြောပါတယ်။

“တနင်္ဂနွေနေ့ ညနေပိုင်းကစပြီး ရှမ်းပြည်မြောက်ပိုင်း ပန်ဆိုင်း၊ မွန်းဂူးဒေသမှာ ပြင်းထန်တဲ့ တိုက်ပွဲတွေ စပြီးတော့ ဖြစ်လာတာကို ကျနော်တို့ တွေ့ရတယ်။ မနေ့ကညနေပိုင်းကစပြီးတော့ပေါ့။ မွန်းဂူးဒေသဆိုတာကတော့ တိုက်ပွဲမဖြစ်တာ နည်းနည်းကြာပြီနော်။ မနေ့ညနေပိုင်းကနေစပြီးမှ တကယ်ပဲ ပြင်းထန်တဲ့ တိုက်ပွဲတွေ ဖြစ်လာပြီဆိုပြီးတော့ ကျနော်တို့ သိရတယ်။”

တိုက်ပွဲတွေ ဆက်လက်ဖြစ်ပွားနေတဲ့ ပြဿနာတွေကိုတော့ မြန်မာအစိုးရနဲ့ KIO ကြား ဆွေးနွေးပွဲတိုင်းလိုလိုမှာ အဓိကထား ဆွေးနွေးနေကြရတာပါ။ KIO ကတော့ သူတို့ ထိန်းချုပ်ရာ နယ်မြေတွေမှာ မြန်မာအစိုးရရဲ့ တပ်ဖွဲ့ဝင်တွေ တိုးမြှင့်ချထားရာက တိုက်ခိုက်မှုတွေ ဖြစ်နေရတာလို့ ပြောဆိုထားတာ ဖြစ်ပါတယ်။

ဒီလိုတိုက်ပွဲတွေ ဆက်လက်ဖြစ်ပွားနေသလို၊ ဆွေးနွေးပွဲတွေ သိသိသာသာ တိုးတက်မှု မရနိုင်ဘဲ ဖြစ်နေတဲ့အပေါ်မှာတော့ KIO က ပြီးခဲ့တဲ့အပတ်ထဲကပဲ လူထု အစည်းအဝေးပွဲတခု ပြုလုပ်ပြီး ပြောဆိုခဲ့တာပါ။ ၂ ဘက် စစ်တပ်က အဆင့်မြင့် ပုဂ္ဂိုလ်တွေပါ ပါ၀င်ခဲ့ကြတဲ့ တရုတ်နိုင်ငံ ရွှေလီမြို့က နောက်ဆုံးအကြိမ် ပြုလုပ်ခဲ့ တဲ့ ဆွေးနွေးပွဲအတွင်းမှာတော့ ငြိမ်းချမ်းရေးအတွက် ရှေ့ဆက် ဆွေးနွေးမှုတွေ လုပ်ဖို့ သဘောတူခဲ့ကြတာ ဖြစ်ပါတယ်။

အခုတကြိမ် ဆွေးနွေးပွဲမှာတော့ အရင်ကလို တရုတ်နိုင်ငံ တနိုင်ငံတည်းကသာမကပဲ နိုင်ငံတကာ အသိုင်းအဝိုင်းက အကဲခတ်တွေပါ ဖိတ်ကြားဖို့ စီစဉ်ထားတာ ဖြစ်ပါတယ်။ ဒီအတွက်လည်း နိုင်ငံတကာ ကိုယ်စားလှယ်တွေ သွားလာရေးနဲ့ မြန်မာအစိုးရရဲ့ ငြိမ်းချမ်းရေး ကိုယ်စားလှယ်အဖွဲ့ခေါင်းဆောင် ဦးအောင်မင်းရဲ့ မကြာသေးခင်က ပြည်ပခရီးစဉ်တွေကြောင့်လည်း အခုနောက်ဆုံး ဆွေးနွေးပွဲတွေကို ရပ်ဆိုင်းထားရတာ ဖြစ်တယ်လို့ ငြိမ်းချမ်းရေး အကျိုးဆောင် ဦးလှမောင်ရွှေ ကပြောပါတယ်။

“ကျနော်တို့ KIO အဖွဲ့အစည်းအနေနဲ့ သူတို့ တက်စေချင်တဲ့သူတချို့ပေ့ါနော် ကျနော်တို့ မြန်မာနှစ်သစ်ကူးပွဲတွေရယ်၊ နောက် ၀န်ကြီးဦးအောင်မင်းအနေနဲ့ ခရီးထွက်တာတွေရှိတော့ ဒီဟာကိုတော့ နှစ်ဘက်သဘောတူ ရွှေ့တဲ့သဘောပါပဲ။ သိပ်မကြာခင်မှာတော့ ဒီ KIO အဖွဲ့အစည်းဘက်ကလည်း သူတို့ တက်စေချင်တဲ့ လေ့လာအကဲခတ်သူတွေအတွက် ညှိနှိုင်းနေတာတွေ ရှိပါတယ်။ ကျနော်တို့လည်း ဒါကို စီစဉ်ဆောင်ရွက်နေတယ်လို့ပဲ ဒီလိုပဲ မှတ်ယူပါတယ်။ အဲ့တော့ လာမယ့်အပတ်အတွင်းမှာတော့ ဆွေးနွေးညှိနှိုင်းပွဲဖြစ်ဖို့အတွက်တော့ ညှိနှိုင်းစရာတချို့တော့ ရှိဦးမယ်ထင်ပါတယ်။”

အစိုးရနဲ့ ၁၇ နှစ်ကြာ အပစ်အခတ် ရပ်စဲရေး ပျက်ပြားခဲ့ပြီးနောက် ၂၀၁၁ ခုနှစ်ကတည်းကစလို့ မြန်မာစစ်တပ်နဲ့ KIO တို့ကြား တိုက်ပွဲတွေ တကျော့ပြန် ဖြစ်ပွားခဲ့တာပါ။ ဒီ့အတွက်လည်း ဒေသခံထောင်သောင်းချီပြီး ဘေးလွတ်ရာ ထွက်ပြေးခဲ့ကြရပါတယ်။

ပဋိပက္ခတွေဟာ ကချင်ပြည်နယ်တွင်းမှာ သာမက အိမ်နီးချင်း တရုတ်နိုင်ငံအထိ ရိုတ်ခတ်မှုတွေ ရှိလာခဲ့သလို၊ နိုင်ငံတကာ အသိုင်းအဝိုင်းက ၀ုိင်းဝန်းပြစ်တင် ဝေဖန်မှုတွေလည်း ထွက်ပေါ်လာရာက ၂ ဘက်အကြား တရားဝင် ဆွေးနွေးပွဲတွေကို စတင်ပြုလုပ်လာတာလည်း ဖြစ်ပါတယ်။

http://burmese.voanews.com/content/govt-offers-to-talk-with-kio/1650946.html

အပြည့်အစုံသို့... »

အပစ်အခတ် ရပ်စဲရေးကို စစ်ဗျူဟာတခု သဖွယ် အစိုးရ အသုံးချနေ

၂၀၁၃ ခုနှစ် မတ်လ ၁၁ ရက်နေ့က ကချင် KIO နှင့် အစိုးရ၏ ကိုယ်စားလှယ် တရုတ်ပြည် ရွှေလီမြို့၌ စစ်ပြေငြိမ်းရေး တွေ့ဆုံဆွေးနွေးစဉ် (ဓါတ်ပုံ - အင်တာနက်)

ကချင်လွတ်လပ်ရေး တပ်မတော် KIA တပ်ဖွဲ့နှင့် အစိုးရတပ်ဖွဲ တို့က ယမာန်နေ့တွင် ရှမ်းပြည်မြောက်ပိုင်း မူဆယ်ခရိုင် မွန်ဂူဒေသ ဂေါင်ဆွမ် ကျေးရွာအနီး၌ရင်ဆိုင် တိုက်ပွဲ ဖြစ်ပွားခဲ့ သည်ဟု KIA အရာရှိ တစ်ဦးက ပြောပါသည်။

“ ကျနော်တို့ KIA တပ်မဟာ (၄)က တပ်ရင်း ၃၈ တပ်ဖွဲ့တွေနဲ့ ရင်ဆိုင်တိုင်ပွဲ ဖြစ်ခဲ့တယ်။ အစိုးရတပ်ဖွဲ့တွေက နေ့တိုင်း လိုလို တပ်အင်အားတွေ တိုးလာနေတော့ ကျနော်တို့ နယ်မြေကို အကာအကွယ်ပေးတဲ့ အနေနဲ့ ရင်ဆိုင် တိုက်ခိုက်ရတာ ပါ။” ဟု ဆိုပါသည်။

 အဆိုပါ တိုက်ပွဲသည် ညနေ ၂ နာရီ မိနစ် ၂၀ တွင် အစိုးရ ခလရ ၂၄၂ တပ်ဖွဲ့တို့နှင့် ဖြစ်ပွားခဲ့ပြီ ထိခိုက်ဒဏ်ရာ ရရှိမှုများ မသိရှိရသေးပါ။

ရှမ်းပြည်မြောက်ပိုင်း KIA တပ်မဟာ ၄ ဧရိယာသည် အစိုးရ၏ စစ်ဆင်မှုကြောင့် တိုက်ပွဲများ ဆက်တိုက် ဖြစ်ပွားနေခဲ့ပါ သည်။ ဧပြီလ ၂၂ ရက်နေ့၌လည်း  KIA ၏ အမှတ် ၁၇ တပ်ရင်း စခန်းဖြစ်သော မနောဘွမ် စခန်းတွင် အစိုးရ ခလရ ၁၂၇ တပ်ဖွဲ့နှင့် နံနက် ၅ နာရီခွဲမှ မွန်လွဲ ၁ နာရီအထိ တိုက်ပွဲ ဖြစ်ပွားခဲ့သည်။

အလာတူ KIA တပ်မဟာ ၂၊ လက်အောက်ခံ အမှတ် ၁၄ တပ်ရင်း နယ်မြေတွင်လည်း ပြီးခဲ့သည့် ဧပြီလ ၂၆ ရက်နေ့တွင် ဧရာဝတီမြစ်ဆုံ ဖြစ်သည့် မေခ မလိခ မြစ်ဆုံ အနောက်ဘက၊် တနိုင်းမြို့နယ် အတွင်းရှိ KIA တပ်ဖွဲ့ နှင့် အမည်မသိရသေးသော အစိုးရတပ်ဖွဲ့တို့ ၄ နာရီခန့် ကြိုကြာ ကြိုကြာ တိုက်ပွဲဖြစ်ပွား ခဲ့ပါသည်။

ထိုနည်းတူ KIA တပ်မဟာ ၁ ၊ လက်အောက်ခံ အမှတ် ၁၀ တပ်ရင်း နှင့် အစိုးရ ခလရ ရ၄ တို့သည်လည်း ဤရက်ပိုင်း၌ ဧရာဝတီ မြစ်ဆုံ အထက်ပိုင်းရှိ  ပန်ဝါမြို့နယ် လောခေါင်ဒေသ  ချိတ်ဂျော်ရွာ အနီးတွင် ညနေ ၃ နာရီခွဲ အချိန်တွင် ပြင်း ထန်စွာတိုက်ပွဲ ဖြစ်ပွားခဲ့သည်။

၄င်းအပြင် ကချင်ပြည်နယ် ဗန်မော်ခရိုင်တွင်းရှိ KIA တပ်မဟာ ၃ ၊ လက်အောက်ခံ အမှတ် ၁၅ တပ်ရင်း ဒေသတွင်လည်း ပြီခဲ့သည့် ဧပြီလ ၂၃ ရက်နေ့၌  KIA တပ်ဖွဲ့သည် စစ်ဆင်လာသည့်  အစိုးရ ခမရ ၄၁၈ တပ်ဖွဲ့ကို  ခြုံခို တိုက်ခိုက်ခဲ့သည်ဟု ဆိုပါသည်။

ဤကဲ့သို့ KIA နှင့် အစိုးရတပ်ဖွဲ့ တို့ ရှမ်းပြည်မြောက်ပိုင်းတွင်  ဆက်တိုက် တိုက်ပွဲဖြစ်နေရခြင်းမှာ တိုင်းရင်းသား  တပ်ဖွဲ့ဝင် များအချင်းချင်း စစ်ကူမပေးနိုင်စေရန် ရည်ရွယ် တိုက်ခိုက်နေခြင်းလည်း ဖြစ်နိုင်ကြောင်း တအာင်း အမျိုးသား တပ်မတော် TNLA ပြောခွင့်ရ ဗိုလ်မှုုး တာဘုန်းကျော်က သုံးသပ်ပါသည်။

“ရှမ်းပြည် မြောက်ပိုင်းရှိ KIA တပ်မဟာ ၄၊ တပ်ရင်း ၉၊ ၁၇ ၊ ၃၈ နယ်မြေဒေသမှာ တိုက်ပွဲတွေ ဆက်တိုက် ဖြစ်ပွားနေခဲ့ တယ်။ ဒါက သူတို့က ကချင်ပြည်နယ်မှာ ရှိတဲ့  KIA ကို နောက် တကြိမ် တိုက်ခိုက်တဲ့ အခါ ကျနော်တို့ တပ်ပေါင်းစု တပ်ဖွဲ့ တွေ သွားရောက် စစ်ကူမပေးနိုင်ဖို့ ကြားခံ ပိုင်ခြား နေရာယူ တိုက်ခိုက်နေတယ် ဆိုတာ ထင်ရှာနေ တာဘဲ။” ဟု ဆိုပါ သည်။

အစိုးရ တပ်ဖွဲ့များသည် KIA အား စစ်ဆင်သည့် အချိန်အခါမျိုးတွင် KIA တပ်အား စစ်ကူမပေးနိုင်ရန် တအာင်း (ပလောင်) ၊ ရှမ်းတပ်ဖွဲ့များကို ဟန့်တားစစ်ဆင်ရေးများ ဆင်နွှဲခဲ့ပါသည်။ ထို့အတူ KIA လိုင်ဇာကို အပစ်ရပ်သည်နှင့် တအာင်း (ပလောင်) ၊ ရှမ်းတပ်ဖွဲ့များအား တိုးပြီးစစ်ဆင်လေတော့သည်။

အစိုးရ၏ အပစ်အခတ်ရပ်စဲရေး သဘောတူညီချက်သည်လည်း ငြိမ်းချမ်းမှု တည်ဆောက်ရန် မဟုတ်ဘဲ စစ်ဆင်ရေး၏ နည်းဗျူဟာ တခုအရ ကျင့်သုံးဖွယ်ရာ ဖြစ်နေပါသည်။ ဤသို့ကြောင့် အစိုးရ၏ ပြည်တွင်းငြိမ်းချမ်းမှု တည်ဆောက်ရေး ကြွေး ကြော်သံသည် စစ်ဗျူဟာ လိုအပ်ချက်အရ ကျင့်သုံးနေခြင်းသာ ဖြစ်ကြောင်း စစ်ရေး အကဲခတ်များက ဆိုပါသည်။ 

http://www.phophtawnews.org/burmese/index.php/news/internal-news/item/256-2013-04-30-03-33-07.html

အပြည့်အစုံသို့... »

အစိုးရနှင့် KIO ဆွေးနွေးရက်ရွှေ့၊ ဧပြီနှောင်းပိုင်းမှ ပြန်တွေ့နိုင်မည်

ရန်ကုန် (မဇ္စျိမ)။   ။ ပြည်ထောင်စုအစိုးရ ငြိမ်ချမ်းရေး ဖေါ်ဆောင်ရေး လုပ်ငန်းကော်မတီနှင့် ကချင်လွတ်လပ်ရေး အဖွဲ့ KIO တို့ ဧပြီလ ၆ ရက်နေ့တွင် မြစ်ကြီးနားမြို့၌ တွေ့ဆုံဆွေးနွေးရန် စီစဉ်ထားသော်လည်း တက်ရောက်မည့် သူများ အဆင်သင့် မဖြစ်သေး၍ ဧပြီလ ၂၂ ရက် နောက်ပိုင်းတွင်သာ တွေ့ဆုံရန် ရွှေ့ဆိုင်းလိုက်ရကြောင်း မြန်မာ ငြိမ်းချမ်းရေးစင်တာ MPC မှ ပြောသည်။

“အစိုးရနဲ့ KIO အဖွဲ့ နောက်ထပ် တွေ့ဆုံဆွေးနွေးနိုင်မယ့်ရက်က သင်္ကြန်အပြီး ဧပြီ ၂၂ ရက် နောက်ပိုင်း၊ ၂၅ ရက်ဝန်းကျင် လောက်မှာ ဖြစ်နိုင်မယ်လို့ ခန့်မှန်းပါတယ်” ဟု MPC မှ ဦိးလှမောင်ရွှေ က ပြောသည်။

နောက်ဆုံးအကြိမ် တွေ့ဆုံခဲ့သည့် မတ်လ ၁၁ ရက် ရွှေလီဆွေးနွေးပွဲတွင် ဧပြီ ၁၀ ရက်မတိုင်မီ နှစ်ဖက်တွေ့ဆုံရန် သဘောတူခဲ့ကြပြီး နှစ်ဘက်ညှိနှိုင်းကာ မြစ်ကြီးနားမြို့တွင် ဧပြီလ ၆ ရက်နေ့တွင် တွေ့ဆုံကြရန် သဘောတူ ထားခဲ့ကြသော်လည်း KIO ဘက်မှ ဖိတ်ကြားထားသူများ ထိုရက်တွင် စုံညီစွာ မတက်ရောက်နိုင်သေး၍
ရွှေ့ဆိုင်းလိုက်ရခြင်းဖြစ်ကြောင်း ဦးလှမောင်ရွှေက ဆက်ပြောသည်။

“KIO အဖွဲ့အနေနဲ့ ညီညွတ်သော တိုင်းရင်းသားများ ဖက်ဒရယ်ကောင်စီအဖွဲ့ (UNFC)နဲ့ UNFC မဟုတ်တဲ့ တိုင်းရင်းသား ကိုယ်စားလှယ် အဖွဲ့တွေကော၊ International Observer (နိုင်ငံတကာ လေ့လာသူ) အဖွဲ့တွေကို လည်း ဖိတ်ကြားတာ တွေ့ရတယ်။ ဒါပေမယ့် အချိန်တိုအတွင်းမှာ ဆောင်ရွက်တာ ဖြစ်တာကြောင့် International Observer အဖွဲ့တွေထဲက အချို့က ၆ ရက်နေ့ အမီ မတက်ရောက်နိုင်တဲ့အတွက် နှစ်ဖက် တွေ့ဆုံမှုကို
ရွှေ့ဆိုင်းလိုက်တာကို  ငြိမ်းချမ်းရေး ဖေါ်ဆောင်ရေး လုပ်ငန်းကော်မတီ ဒုတိယ ဥက္ကဋ္ဌ ဦးအောင်မင်းကို စာနဲ့ ဆက်သွယ် အကြောင်းလာပါတယ်” ဟု ပြောသည်။

သမ္မတ ဦးသိန်းစိန် အစိုးရအဖွဲ့မှ ငြိမ်ချမ်းရေး ဖေါ်ဆောင်ရေး ဗဟိုကော်မတီနှင့် လုပ်ငန်း ကော်မတီကို ၂၀၁၂ ခုနှစ်၊ မေလ ၂ ရက်တွင် စတင်ဖွဲ့စည်းပြီးနောက် ဗဟိုကော်မတီ ဒုတိယ ဥက္ကဋ္ဌ ဝန်ကြီး ဦးအောင်မင်း ဦးဆောင်၍ KIO နှင့် တွေ့ဆုံဆွေးနွေးမှုများ လုပ်ခဲ့ရာ ယခုတွေ့ဆုံပွဲ ဖြစ်မြောက်ခဲ့ပါက ပြည်တွင်းတွင် ပထမဆုံး တွေ့ဆုံမည့်
ဆွေးနွေးပွဲ ဖြစ်လာမည်ဟု နိုင်ငံရေး လေ့လာနေသူများက မှတ်ချက်ပြုသည်။

http://www.mizzimaburmese.com/news/inside-burma/11289--kio-.html

အပြည့်အစုံသို့... »

KIO နှင့် အစိုးရ ငြိမ်းကိုယ်စားလှယ်များ မြစ်ကြီးနားတွင် တွေ့မည်

ကချင်လွတ်လပ်ရေး အဖွဲ့ (KIO) နှင့် အစိုးရ ပြည်ထောင်စု အဆင့် ငြိမ်းချမ်းရေး အဖွဲ့တို့ ငြိမ်းချမ်းရေးအတွက် ပြည်တွင်းတွင် ပထမဆုံး အကြိမ်အဖြစ် မြစ်ကြီးနားမြို့၌ မကြာခင်ရက်ပိုင်းအတွင်း တွေ့ဆုံဆွေးနွေးမည်ဟု သတင်းရရှိသည်။
အစိုးရ ကိုယ်စားလှယ် အဖွဲ့က မြစ်ကြီးနားမြို့တွင် တွေ့ဆုံရန် အဆိုပြုခဲ့ပြီး လာမည့် တပတ်အတွင်း တွေ့ဆုံရန် KIO ခေါင်းဆောင်များကို ကမ်းလှမ်းခြင်း ဖြစ်ကြောင်း သိရသည်။
“ဒီလ ၁၀ ရက်နေ့ မတိုင်ခင် တွေ့ဖို့ သဘောထား ရှိတယ်။ ဒါပေမယ့် ဒီတရက် နှစ်ရက် အတောအတွင်းမှာလည်း အခြေအနေက အမျိုးမျိုး ပြောင်းလဲသွားနိုင်တယ်။ ဒါကြောင့် ရက်ကတော့ ၁၀ ရက် အတောအတွင်းလို့ ပဏာမအနေနဲ့ နားလည်ထားတာ ရှိတယ်” ဟု KIO အဖွဲ့မှ ပြောရေး ဆိုခွင့်ရှိသူ ဦးလနန်က ဧရာဝတီသို့ ပြောသည်။
တွေ့ဆုံဆွေးနွေးရာတွင် KIO ဘက်မှ သတ်မှတ်ထားသည့် စစ်ရေး၊ နိုင်ငံရေး ကိုယ်စားလှယ်အဖွဲ့ဝင်များ ပါဝင်မည်ဟု သိရသည်။
“အခြေအနေတွေ သုံးသပ်ရဦးမယ်။ နိုင်ငံတကာကနေပြီးတော့ လေ့လာသူအနေနဲ့ ဘယ်အဆင့်လောက်အထိ ပါ၀င်နိုင်သလဲ ဆိုတဲ့အပေါ်မှာလည်း မူတည်တယ်” ဟု ဦးလနန်က ပြောသည်။
ပြည်တွင်း၌ တွေ့ဆုံဆွေးနွေးရေး အတွက် ကမ်းလှမ်းစာကို မကြာသေးခင် ရက်ပိုင်းက KIO အဖွဲ့ ကိုယ်စားလှယ်များထံ ပေးပို့ထားရာ အစိုးရ ပြည်ထောင်စုအဆင့် ငြိမ်းချမ်းရေး ဖော်ဆောင်ရေးလုပ်ငန်း ကော်မတီ ဒု က္ကဌ ဝန်ကြီး ဦးအောင်မင်းက တရားဝင် အကြောင်းပြန်ကြားမည့်စာကို ယနေ့ နံနက်ပိုင်းအထိ စောင့်ဆိုင်နေကြောင်း ငြိမ်းချမ်းရေး အကျိုးဆောင် ဦးလှမောင်ရွှေက ပြောသည်။
“KIO နဲ့ ယုံကြည်မှု ထိုက်သင့်သလောက် ရှိလာပြီလို့ နားလည်တယ်၊ မှတ်ယူတယ်။ ဒီအတွက် ၀န်ကြီး ဦးအောင်မင်းက ပြည်တွင်းမှာ ဖိတ်တာ။ မူအားဖြင့်တော့ သဘောတူတယ်လို့ ကျနော်တို့ နားလည်တယ်။ ဒါပေမယ့် အသေးစိတ်ကိုတော့ ညှိနှိုင်းနေဆဲပါပဲ” ဟု ၎င်းက ဆိုသည်။
နှစ်ဖက် ကိုယ်စားလှယ်များ ဆွေးနွေးမည့် အကြောင်းအရာများကို လတ်တလော မသိရှိရသော်လည်း ပြီးခဲ့သည့် ဖေဖော်ဝါရီလ ၄ ရက်နေ့က တရုတ်-မြန်မာ နယ်စပ် ရွှေလီမြို့တွင် နောက်ဆုံး တွေ့ဆုံခဲ့စဉ် ဆွေးနွေးမှုများနှင့် စပ်လျဉ်း၍ ဆက်လုပ်ရန် သဘောတူညီခဲ့ကြောင်း သိရသည်။
နောက်ဆုံး တွေ့ဆုံခဲ့သည့် ရွှေလီမြို့ အစည်းအဝေးကို အစိုးရဘက်မှ ၀န်ကြီး ဦးအောင်မင်း ခေါင်းဆောင်၍ မွေးမြူရေးနှင့် ရေလုပ်ငန်း ဝန်ကြီးဌာန ပြည်ထောင်စု ဝန်ကြီး ဦးအုန်းမြင့်တို့ တက်ရောက်ပြီး KIO ဘက်မှ ဗဟို ငြိမ်းချမ်းရေး ဆွေးနွေးရေး အဖွဲ့ခေါင်းဆောင် ဦးဆွမ်လွတ်ဂမ်၊ ဗဟိုတရားရေးဌာန တာဝန်ခံ ဦးလဖိုင်လ၊ KIA ဒုတိယ စစ်ဦးစီးချုပ် ဗိုလ်ချုပ် ဂွန်မော်တို့ တက်ရောက်သည်။
ဝန်ကြီး ဦးအောင်မင်းနှင့် KIO ခေါင်းဆောင်များက ယင်းအစည်းအဝေးမှ သတောတူညီများကို ပူးတွဲ ကြေညာချက် တစောင် ထုတ်ပြန်ခဲ့သည်။
အဆိုပါ ပူးတွဲ ကြေညာချက်တွင် နှစ်ဦးနှစ်ဖက် ဆက်သွယ်ရေး လမ်းကြောင်းများ ထားရှိရေး၊ စစ်ရေး တင်းမာမှုများ လျှော့ချနိုင်ရေးနှင့် နောက်တကြိမ် ဆွေးနွေးပွဲတွင် လေ့လာသူများနှင့် သက်သေများအဖြစ် ပါဝင်နိုင်သည့် အဖွဲ့အစည်းများအား ဖိတ်ခေါ်ရေးတို့ ပါရှိသည်။
KIO ကိုယ်စားလှယ်များ တည်းခိုမည့် နေရာများကို ကြိုတင်ပြင်ထားပြီး လာမည့် မတ်လ ၅ ရက်နေ့ နံနက်တွင် ကုလသမဂ္ဂ အဖွဲ့အစည်းမှ ကိုယ်စားလှယ်တချို့က လိုင်ဇာမြို့အထိ သွားရောက် ကြိုမည်ဖြစ်ကြောင်း ကချင် ငြိမ်းချမ်းရေး အကျိုးဆောင် ဦးဆန်းအောင်က ပြောသည်။
ဆွေးနွေးပွဲကို မြစ်ကြီးနားမြို့ စီတာပူ ရက်ကွက်ရှိ မဂျွယ်ခန်းမတွင် ပြုလုပ်မည်ဖြစ်ကြောင်း၊ KIO ကိုယ်စားလှယ် ခေါင်းဆောင်များက ယခင် KIO ဆက်ဆံရေးရုံးတွင် တည်းခိုမည် ဖြစ်ကြောင်း သိရသည်။
ယင်းဆွေးနွေးပွဲသို့ KIO က အဖွဲ့ဝင်အဖြစ် ပါဝင်ထားသည့် ညီညွတ်သော တိုင်းရင်းသားလူမျိုးများ ဖယ်ဒရယ်ကောင်စီ (UNFC) မှ တိုင်းရင်းသား ကိုယ်စားလှယ်တချို့ကို ဖိတ်ကြားထားပြီး အစိုးရ ကိုယ်စားလှယ်များနှင့် အတူ ယုဇနရပ်ကွက် အတွင်းရှိ ဟိုတယ်တခုတွင် တည်းခိုမည် ဖြစ်ကြောင်း သိရသည်။
“ငြိမ်းချမ်းရေး အပြည့်အဝ ရပြီလို့ ပြောဖို့ စောပါသေးတယ်။ ဒါပေမယ့် မြစ်ကြီးနား မြို့ပေါ်မှာ လုပ်နိုင်တယ်ဆိုတာ ယုံကြည်မှု အတိုင်းအတာတခု ရသွားတယ်လို့ သုံးသပ်လို့ရပါတယ်” ဟု ဦးဆန်းအောင်က ပြောသည်။

http://burma.irrawaddy.org/archives/36994

အပြည့်အစုံသို့... »

KIO နှင့် အစိုးရ မြစ်ကြီးနားမှာ တွေ့ကြမည်

ချင်းမိုင်(မဇ္စျိမ)။   ။ ကချင်လွတ်လပ်ရေးအဖွဲ့ KIO နှင့် အစိုးရ ငြိမ်းချမ်းရေးအဖွဲ့တို့ ဧပြီလ ၆ ရက်နေ့တွင်
မြစ်ကြီးနားမြို့၌ တွေ့ဆုံမည်ဟု ကချင် ငြိမ်းချမ်းရေးအကျိုးဆောင် PCG မှ ဦးအင်စင်းဆန်အောင် က ပြောသည်။

စီတာပူရပ်ကွက်ရှိ ကချင်မနောကွင်း မဂျွယ် (Ma Joi) ခန်းမတွင် တွေ့ဆုံရန် သဘောတူထားသည်ဟု သိရသည်။

“နှစ်ဖက်စလုံး အဲဒီနေ့တွေ့ဖို့ စာကတော့ ထုတ်ပြန်ပြီ။ ၅ ရက်နေ့ KIO ကို သွားခေါ်မယ်။ တွေ့ဖို့ ရာခိုင်နှုန်း များတယ်။ ယုံကြည်မှု တည်ဆောက်တဲ့အနေနဲ့ အတိုင်းအတာ တခုထိတော့ ရောက်လာပြီ။ သဘောတူ လက်မှတ်ထိုးရေး ရောက်ဖို့က ဆွေးနွေးတဲ့အပေါ်မှာ မူတည်တယ်” ဟု ဦးအင်စင်းဆန်အောင် က ပြောသည်။

ဧပြီ ၅ ရက်နေ့တွင် KIO ကိုယ်စားလှယ်များအား PCG ကိုယ်စားလှယ်များနှင့် ကုလသမဂ္ဂ အတွင်းရေးမှူးချုပ်၏ အထူးကိုယ်စားလှယ် ဗီဂျေး နမ်ဘီးယား၏ လက်ထောက် တဦးတို့ ပါဝင်၍ လိုင်ဇာမြို့သို့ သွားရောက် ကြိုဆိုမည်ဟု ဆိုသည်။

ထိုတွေ့ဆုံပွဲအတွက် ကြိုတင်ပြင်ဆင်သည့်အနေဖြင့် တနှစ်ကျော်ကြာ ချိတ်ပိတ်ထားသော KIO ဆက်ဆံရေးရုံးနှင့် မနောကွင်း ပတ်ဝန်းကျင်အား ယမန်နေ့မှ စတင်၍ ပေါင်းမြက်များ ရှင်းလင်းနေသည်ဟု မြစ်ကြီးနားမြို့ခံ ဦးအင်စင်းဆန်အောင် က ပြောသည်။

ထိုသို့ တွေ့ဆုံရန် သဘောတူညီမှု ရထားသော်လည်း KIO ကိုယ်စားလှယ်များ၏ လုံခြုံရေးအတွက် အစိုးရဘက်မှ မည်မျှ တာဝန်ယူပေးမည်ကို တင်ပြထားဆဲ ဖြစ်၍ ၎င်းအပေါ်မှာ မူတည်၍ တွေ့ဆုံမည် ဖြစ်ကြောင်း KIO ၏ အရပ်ဘက်အရာရှိ ဦးဒွဲပီဆား က ပြောသည်။

“မြစ်ကြီးနားမှာ ပြန်တွေ့ဖို့ စီစဉ်နေတာတော့ ရှိတယ်။ ဒါပေမယ့် တခြားလုံခြံုရေးနဲ့ ပတ်သက်လို့ ညှိနှိုင်းစရာတွေ နည်းနည်း ရှိသေးတယ် ထင်တယ်။ လုံခြံုရေးနဲ့ ပတ်သက်လို့ သူတို့ ဘယ်လောက် အတိုင်းအတာထိ တာဝန်ယူ
ပေးနိုင်မလဲ၊ ဘယ်လို လက်တွေ့လုပ်မလဲဆိုတာ တင်ပြထားတာရှိတယ်။ အဲဒါအပေါ် မူတည်တယ်” ဟု မဇ္စျိမကို ပြောသည်။

မတ်လ ၁၁ ရက်နေ့က တရုတ်နိုင်ငံ၊ ရွှေလီမြို့တွင် နှစ်ဖက် တွေ့ဆုံစဉ် စစ်မှန်သော နိုင်ငံရေးဆွေးနွေးမှုများ တနိုင်ငံလုံး အတိုင်းအတာ ကျင်းပနိုင်ရန်အတွက် တဆင့်ပြီးတဆင့် ညှိနှိုင်းဆောင်ရွက်ရေးနှင့် နှစ်ဖက် ပိုမိုနီးကပ်စွာ ညှိနှိုင်းဆောင်ရွက်နိုင်ရန်၊ စောင့်ကြပ်ရေး ရုံးများကို လိုအပ်သလို ထားရှိသွားရန်တို့ အပါအဝင် ပူးတွဲကြေညာချက် ထုတ်ပြန်ခဲ့သည်။

ကချင်နှင့် ရှမ်းပြည်နယ်အတွင်း အစိုးရတပ် လှုပ်ရှားမှုများရှိလာကာ ရှမ်းပြည်နယ်မြောက်ပိုင်း KIO ၏ တပ်မဟာ ၄ နယ်မြေနှင့် တပ်မဟာ ၂ လက်အောက်ခံ တပ်ရင်း ၅ နယ်မြေများတွင် ပြီးခဲ့သည့် ရက်ပိုင်းက တိုက်ပွဲ ဖြစ်ပွားခဲ့သည် ဟု သိရသည်။

ယမန်နေ့က မြစ်ကြီးနားနှင့် မိုးကောင်း ကားလမ်းအတိုင်း အစိုးရ စစ်ယာဉ်တန်း ကားစီးရေ ၄၀ ကျော်ဖြင့် ဖားကန့်မြို့သို့ စစ်သားအင်အား ၅၀၀ ကျော်ခန့် ရောက်ရှိလာသည်ဟု KIO ၏ တပ်မဟာ ၂ လက်အောက်ခံ တပ်ရင်း ၆ တပ်ရင်းမှူး ဒု-ဗိုလ်မှူး ဇော်ဒွဲက ပြောသည်။

“သူတို့တာက တပ်အပြောင်းအရွှေ့လုပ်တယ်လို့ ပြောတယ်။ ဒါပေမယ့် ဒီကတပ်တွေ ပြန်ဆင်းသွားတာက မတွေ့ရဘူး။ ကျနော်တို့ ဒီလမှာ ပြန်ဆွေးနွေးမယ်လို့ ပြောနေတဲ့ အချိန် တပ်ပြောင်းတာ မဟုတ်ဘဲ ထပ်တိုးလာတာက မကောင်းဘူး။ တပ်တိုးတယ် ဆိုရင်တော့ တိုက်ပွဲက ပြန်ဖြစ်မယ် ဆိုတဲ့ သဘောပဲ” ဟု မဇ္စျိမကို ပြောသည်။

အစိုးရ၏ တပ်မ ၁၀၁ လက်အောက်ခံ တပ်ဖွဲ့များက နေ့စဉ် ဖားကန့် မှော်စီဆာဘက်မှ ရေမဆေးကျောက်ရှာသူများ ခိုလှုံနေသော တဲများ၊ နေအိမ်များကို မီးရှို့ဖျက်ဆီးခြင်းနှင့် ခြိန်းခြောက်မှုများ ပြုလုပ်နေသည်ဟု ၎င်းက ပြောသည်။

http://www.mizzimaburmese.com/news/inside-burma/11271-kio----.html

အပြည့်အစုံသို့... »

အစိုးရနှင့် KIO ထပ်မံတွေ့ဆုံမည့် ကိစ္စ အဆင်သင့် မဖြစ်သေး

မြန်မာအစိုးရ နဲ့ KIO ကိုယ်စားလှယ်များ။

ကချင်လွတ်မြောက်ရေးအဖွဲ့(KIO)နှင့် ပြည်ထောင်စု ငြိမ်းချမ်းရေးဖော်ဆောင်ရေး လုပ်ငန်းကော်မတီများ ဧပြီလ ၁၀ ရက်မတိုင်ခင် ပြန်လည်တွေ့ဆုံရန် ပြောဆိုထားသော်လည်း တွေ့ဆုံမည့်ကိစ္စကို ယခုချိန်ထိ အဆင်သင့် မဖြစ်သေးကြောင်း KIO ကပြောသည်။
KIO နှင့် အစိုးရ မတ်လ ၁၁ တရုတ်နိုင်ငံ ရွှေလီမြို့ တွေ့ဆုံဆွေးနွေးစဉ် ထိုသို့သဘောတူထားခြင်းဖြစ်သော်လည်း ညှိနှိုင်းစရာများရှိနေသေးသောကြောင့်ဖြစ်သည်ဟု KIO ပြောရေးဆိုခွင့်ရှိသူ ဒု-အထွေထွေအတွင်းရေးမှူး-၂ ဆလန်ကဘား လာနန် ကပြောသည်။
 “ဒီဧပြီလ ၁၀ ရက်အတောအတွင်း သင်္ကြန်မတိုင်ခင်မှာ တွေ့ရအောင်ဆိုပြီး သူတို့အနေနဲ့ပြောတာတော့ ဟုတ်တယ်။ ဒါပေမဲ့ အခုချိန်ထိတော့ ရက်အတိအကျမသတ်မှတ်သေးဘူး။ ဘယ်မှာတွေ့မယ်ဆိုတဲ့နေရာလည်း မဆုံးဖြတ်ရသေးဘူး။ တခြားဆွေးနွေးတိုင်ပင်စရာ တွေရှိသေးတဲ့အတွက်ကြောင့် အခုချိန်ထိ ဘာမှ မဆုံးဖြတ်ရသေးဘူး”
တွေ့ဆုံမှုများကို ညှိနှိုင်းဆောင်ရွက်နေချိန်တွင် အစိုးရဘက်မှ နယ်မြေရှင်းလင်းရေးဆိုသည့် ခေါင်းစဉ်ဖြင့် စစ်ဆင်ရေးလှုပ်ရှားမှုများ ဆက်လက်ပြုလုပ်နေသောကြောင့် မမျှော်လင့်ပဲ တိုက်ပွဲများ ဖြစ်ပွားလာသည်ဟု ဆလန်ကဘား လာနန် ကပြောသည်။
“သူတို့က စစ်အင်အားလျှော့သွားတာမရှိဘူး။ အလှဲအလှယ်လုပ်တာနဲ့ လူသစ်လာတိုးချထားတာတွေက ဆက်တိုက်ကိုလုပ်နေတယ်။ KIA စခန်းတွေနဲ့ ၁ မိုင်လောက်ပဲဝေးတဲ့နေရာကနေ တစ်နေ့ကို နည်းနည်း ရွှေ့ရွှေ့ပြီးတော့ နေရာယူပြီး လာနေသွားတယ်။ ဒီလိုမျိုး လှုပ်ရှားတာတွေရှိတဲ့အတွက်ကြောင့် ဘယ်လိုမှ ရှောင်လွှဲမရလို့ ပစ်ခတ်တာတွေဖြစ်လာတယ်။ အဲလိုမျိုးဖြစ်တာတွေရဲ့ ပြသနာ အစက သူတို့အစိုးရတပ်ဖွဲ့တွေ ဆက်ပြီးလှုပ်ရှားနေတယ်။ သူတို့ ခေါင်းစဉ်က နယ်မြေရှင်လင်းရေးဆိုတာဟုတ်တယ်။ ဒါပေမဲ့ တစ်ဖက်မှာတော့ အဲဒါက စစ်ဆင်ရေးလှုပ်ရှားမှုဖြစ်တယ်။ အဲဒါကြောင့် မျှော်လင့်မထားတဲ့နေရာတွေမှာ မမျှော်လင့်ပဲ ပစ်ခတ်တာ တွေဖြစ်လာတယ်”
ထို့ပြင်ဆွေးနွေးမှုတဖက်တွင် အစိုးရတပ်မှ KIO ထိန်းချုပ်နယ််မြေများတွင် လမ်းဖောက်လုပ်နေသည်ဟုဆိုကာ လှုပ်ရှားမှုများကိုတွေ့ရှိရပြီး အဆိုပါကိစ္စသည် ယခုအခြေအနေအရ ထိုသို့ပြုလုပ်ရန်မသင့်တော်ကြောင်း ပြည်ထောင်စု ငြိမ်းချမ်းရေးဖော်ဆောင်ရေး လုပ်ငန်းကော်မတီထံ အကြောင်းကြားထားပြီးလည်းဖြစ်သည်ဟု ဦးလာနန်က ဆက်ဆိုသည်။
“သူတို့ဘက်က အရင်က လမ်းမကောင်းတဲ့နေရာမှာ စစ်တပ်ကနေ လမ်းဖွင့်ဖို့ စီစဉ်တာတွေရှိတယ်။ သူတို့ဆက်သွယ်ရေးလေနော်။ စစ်ပြန်ဖြစ်လာရင်ဆိုပြီးလုပ်တာလား ဘယ်အချိန်အတွက်လဲ။ အဲဒါက လုပ်လို့မဖြစ်ဘူး။ မလုပ်သင့်ဘူး။ ဒီလို ရှေ့တန်းနေရာတွေမှာ အရမ်းစိုးရိမ်ရတဲ့အချိန်မှာ စစ်တပ်ကနေပြီး စစ်ဆင်ရေးလှုပ်ရှားမှုတွေမှာ အကျိုးရှိအောင် အသုံးချဖို့အတွက် လမ်းဖောက်တာမျိုးတွေ မလုပ်ရင်ကောင်းတယ်။ အဲလိုမျိုး ရပ်ထားရင်ကောင်းတယ်ဆိုပြီး ကျနော်တို့ စာနဲ့အကြောင်းကြားထားပြီးသားဟုတ်တယ်။ အဲဒီမှာ သူတို့ဆက်ပြီး လုပ်လာမယ်ဆိုရင်တော့ သူတို့လုပ်လာတဲ့အပေါ်မှာ လိုက်ပြီး တိုက်ပွဲက ရှောင်လို့မရတဲ့ အခြေအနေဖြစ်လာမယ်”
ကချင်လွတ်မြောက်ရေးအဖွဲ့(KIO) နှင့် မြန်မာအစိုးရတို့သည် ပြီးခဲ့သည့် မတ်လ (၁၁-၁၂) တွင် တရုတ်နိုင်ငံရွှေလီမြို့ တွေ့ဆုံဆွေးနွေးခဲ့ပြီးနောက် နှစ်ဖက်တပ်များ ယနေ့ထိ တိုက်ပွဲ ရ ကြိမ်ထက်မနည်း ဖြစ်ပွားခဲ့သည်ဟု ဆိုသည်။
အဆိုပါ ရွှေလီဆွေးနွေးမှုတွင် အစိုးရနှင့် KIO သည် စစ်ရေးလျှော့လာရေး နှစ်ဖက် တပ်ပိုင်းဆိုင်ရာ အောက်ခြေတပ်ဖွဲ့များအထိ ညှိနှိုင်းမှုရရှိအောင် ညွန်ကြားသွားရန် သဘောတူခဲ့ကြခြင်းဖြစ်သည်။
သို့သော် ယခုချိန်ထိ ရှမ်းပြည်မြောက်ပိုင်း KIA တပ်မဟာ ၄ နယ်မြေနှင့် ပန်ဝါဘက်တို့တွင် အစိုးရနှင့် KIA ကြား တိုက်ပွဲများဆက်တိုက်ဆိုသလို ဖြစ်ပွားနေခြင်းဖြစ်သည်။

http://kachinnews.com/burmese/news/1068-%E1%80%A1%E1%80%85%E1%80%AD%E1%80%AF%E1%80%B8%E1%80%9B%E1%82%8F%E1%80%BD%E1%80%84%E1%80%B9%E1%80%B7-kio-%E1%80%91%E1%80%95%E1%80%B9%E1%80%99%E1%80%B6%E1%80%B1%E1%80%90%E1%80%BC%E1%82%95%E1%80%86%E1%80%AF%E1%80%B6%E1%80%99%E1%80%8A%E1%80%B9%E1%80%B7-%E1%80%80%E1%80%AD%E1%80%85%E1%81%A5-%E1%80%A1%E1%80%86%E1%80%84%E1%80%B9%E1%80%9E%E1%80%84%E1%80%B9%E1%80%B7-%E1%80%99%E1%80%BB%E1%80%96%E1%80%85%E1%80%B9%E1%80%B1%E1%80%9E%E1%80%B8.html

အပြည့်အစုံသို့... »

SSA မြောက်ပိုင်းနဲ့ အစိုးရ ငြိမ်းကိုယ်စားလှယ်များ လားရှိုးတွင် တွေ့မည်

ရှမ်းပြည်တပ်မတော် မြောက်ပိုင်း (SSA-N) နှင့် ပြည်ထောင်စု ငြိမ်းချမ်းရေး ဖော်ဆောင်ရေး အဖွဲ့ဝင်တချို့ မနက်ဖြန် လားရှိုးမြို့တွင် တွေ့ဆုံဆွေးနွေးကြမည် ဖြစ်ကြောင်း သတင်းရရှိသည်။ အဆိုပါ တွေ့ဆုံပွဲတွင် လတ်တလော ရှမ်းပြည်နယ်မြောက်ပိုင်း တန့်ယန်းမြို့နယ်နှင့် လားရှိုး မြို့နယ်တို့တွင် အစိုးရ စစ်တပ်နှင့် SSA-N တို့ ဖြစ်ပွားနေသည့် တိုက်ပွဲကိစ္စများကို အဓိကထား ဆွေးနွေးသွားမည်ဟု သိရသည်။ လတ်တလောတွင် တန့်ယန်းမြို့နယ်နှင့် လားရှိုးမြို့နယ်တို့၌ အစိုးရ စစ်တပ်က နယ်မြေ စိုးမိုးရေးအတွက် နေရာ ဖယ်ခိုင်းမှုကြောင့် နှစ်ဖက်တပ်များ တိုက်ပွဲများ ဖြစ်ပွားနေကြောင်းလည်း သိရသည်။ အစိုးရ နယ်မြေရှင်းလင်းရန် ပစ်မှတ်ထား တောင်းဆိုနေသော ယင်းနေရာများသည် SSA-N နှင့် ‘ဝ’ ပြည် သွေးစည်းညီညွတ်ရေး တပ်မတော် တို့၏ စစ်ရေး အရ နှစ်ဖက်မဟာမိတ် ဆက်ဆံရေး ပင်မလမ်းကြောင်း ဖြစ်သကဲ့သို့ ခနောက်စိမ်း၊ သစ်နှင့် တခြားဒေသ ထွက်ကုန်များကိုလည်း တရုတ်နိုင်ငံဘက်သို့ ကုန်သွယ်ကူးသန်းသည့် လမ်းကြောင်းလည်း ဖြစ်သည်။

http://burma.irrawaddy.org/archives/36891

အပြည့်အစုံသို့... »

အစိုးရနှင့် အပစ်ရပ် ဆွေးနွေးနိုင်ရေး ညှိနှိုင်းမှု ပလောင်အဖွဲ့ အဖြေ မရသေး

ပလောင် ပြည်နယ် လွတ်မြောက်ရေး တပ်ဦး (PSLF) နှင့် အစိုးရ ကိုယ်စားလှယ် တို့အကြား ပထမဆုံး အကြိမ် အပစ်အခတ်ရပ်စဲရေး ဆွေးနွေးပွဲ ပြုလုပ်နိုင်ရန် ဝန်ကြီး ဦးအောင်မင်း မှ တာဝန်ပေးအပ်ထားသည့် ကိုယ်စားလှယ်များနှင့် ညှိနှိုင်းဆွေးနွေးမှုများ ပြုလုပ်လျက် ရှိသော်လည်း ဆုံးဖြတ်ချက် မချမှတ် နိုင်သေးကြောင်း PSLF အထွေထွေအတွင်းရေးမှူး ဗိုလ်မှူး မိုင်ဘုန်းကျော်မှ ပြောသည်။

“ဦးအောင်မင်း တာဝန် ပေးထားတဲ့ ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီက လူတွေနဲ့ ဆွေးနွေးညှိနှိုင်း
နေတာပါ၊ နာမည် ထုတ်ပြောဖို့တော့ ခက်ပါသေးတယ်၊ အဓိက ကတော့ တွေ့ကြမယ့် နေရက် အချိန်တွေ၊
နေရာတွေကို ညှိနေတာပါ၊ အခုချိန် ထိတော့ ဘာမှ ရေရေရာရာ သဘောတူတာတော့ မရှိသေးပါဘူး” ဟု ဗိုလ်မှူး မိုင်ဘုန်းကျော်မှ မဇ္စျိမအား ပြောသည်။

ဖေဖော်ဝါရီ လကုန်မှစ၍ ဖုန်း၊ အွန်လိုင်း စနစ်တို့ဖြင့်  နှစ်ဖက် တွေ့ဆုံ ဆွေးနွေး နိုင်ရေးကို ညှိနှိုင်း ခဲ့ကြကာ လူချင်း တွေ့ဆုံ ညှိနှိုင်းမှု မပြုလုပ် ရသေးဟု ဆိုသည်။

လက်ရှိ အခြေအနေ၌ ပလောင် (တအောင်း) ဒေသ ဘက်တွင် အစိုးရ၏ စစ်ကြောင်း လှုပ်ရှားမှု များကြောင့် ထိတွေ့ ရင်ဆိုင် တိုက်ပွဲများ ဖြစ်ပွားလျက် ရှိသည်။

 မတ်လ (၂၂) ရက်နေ့ ညနေ (၅) နာရီ တွင် အင်အား (၁၀၀) ကျော်ရှိသော အစိုးရ ခမရ (၅၀၂) စစ်ကြောင်းသည် ကွတ်ခိုင် မြို့နယ်ရှိ နမ့်လိတ် တောင်ကြော၌ အခြေ စိုက်နေသည့် တအာင်း အမျိုးသား လွတ်မြောက်ရေး တပ်မတော် T.N.L.A တပ်ရင်း (၁ဝ၁) မှ တပ်ခွဲ (၁) ၊ K.I.A တပ်ရင်း (၈) ပူးပေါင်း တပ်ဖွဲ့ များနှင့် တစ်နာ ရီကျော် တိုက်ပွဲ ဖြစ်ပွားခဲ့သည်။

ထိုသို့ ထိုးစစ်ဆင် လှုပ်ရှား လာသည့်  လုပ်ရပ်ကိုကန့်ကွက် ရှုံ့ချကြောင်း ပလောင် ပြည်နယ် လွတ်မြောက်ရေး တပ်ဦး (PSLF) မှ မတ် (၂၂) ရက်နေ့ ရက်စွဲဖြင့် ထုတ်ပြန်ချက် တစ်စောင် ထုတ်ပြန် ခဲ့သည်။

မန်တုံမြို့တွင် ကျင်းပရန် ရှိသည့် ရွှေဖီလက်ဖက်ရာသီနှင့် တအောင်းစာပေနှင့်ယဉ်ကျေးမှု ညီလာခံ ပွဲတော်အတွက် အခြေစိုက် ပျောက်ကြား စခန်းတွင်သာ နေရာယူကြရန်နှင့် စစ်ရေးလှုပ်ရှားမှုကို ရပ်စဲ ထိန်းသိမ်းထားရန် ညှိနှိုင်း ဆောင်ရွက်ခဲ့ကြောင်း ထုတ်ပြန်ချက်တွင် ဖော်ပြထားသည်။

ထိုသို့သော စစ်ရေး အခြေအနေ များကြောင့်လည်း တွေ့ဆုံ ဆွေးနွေးမည့် နေရာကို ပြည်ပ တစ်နေရာ၌ သတ်မှတ် ပေးရန် ပလောင် အဖွဲ့မှ တင်ပြ ထားပြီး အစိုးရ အဖွဲ့ဘက်မှ ပြည်တွင်းကို အဆိုပြု ထားပါသည်။

“ညှိနှိုင်းလို့ မရသေးတာကတော့ ပြောဖို့တော့ခက်ပါတယ်၊ သူတို့ဘက်က အလုပ်တွေ တအားတွေ ရှုပ်နေလို့လား၊ သို့မဟုတ် ကျွန်တော် တို့ကိုပဲ အသိအမှတ် မပြု တာလား၊ နေရာတွေ အချိန်တွေ ဒီလိုပဲ ညှိတာပေါ့၊ တစ်နေ့မဟုတ် တစ်နေ့တော့ တွေ့ရ မှာပေါ့လေ” ဟု PSLF အထွေထွေ အတွင်းရေးမှူး မိုင်ဘုန်းကျော်မှ မဇ္စျိမအား ပြောကြား ခဲ့သည်။

အမြန်ဆုံး တွေ့ဆုံ ဆွေးနွေးမှု ပြုနိုင်ရန် ပလောင်ပြည်နယ် လွတ်မြောက်ရေး တပ်ဦးဘက်မှ မျှော်မှန်းထားကာ အစိုးရ၏ပလောင်(တအောင်း) ဒေသဖက်၌ စစ်ရေးလှုပ်ရှားမှုများ လုပ်ဆောင်နေခြင်းများသည်လည်း အစိုးရဘက်မှ ပြင်ဆင်မှု တစုံတရာဖြစ်မည်ဟု ခန့်မှန်းကြောင်း ဗိုလ်မှူး မိုင်ဘုန်းကျော်မှ ဆက်ပြောသည်။ 

http://www.mizzimaburmese.com/news/inside-burma/11206-2013-03-26-15-28-56.html

 

အပြည့်အစုံသို့... »

ပအိုဝ့် ငြိမ်းချမ်းရေးဆွေးနွေးပွဲ

ပြည်ထောင်စု ငြိမ်းချမ်းရေး ဖော်ဆောင်ရေး ကော်မတီ ပြည်ထောင်စု ၀န်ကြီး ဦးအောင်မင်း အပါအဝင် ၀န်ကြီး(၄)ဦးအဖွဲ့နဲ့ ပအိုဝ့်အမျိုးသား လွတ်မြောက်ရေး အဖွဲ့ချုပ် ဥက္ကဌ ဗိုလ်မှူးကြီး ခွန်ဥက္ကာ ဦးဆောင်တဲ့ အဖွဲ့တို့ မတ်လ ၂၃ ရက်နေ့က ရန်ကုန်မြို့ ငြိမ်းချမ်းရေးစင်တာမှာ ဒုတိယအကြိမ် ပြည်ထောင်စုအဆင့် တွေ့ဆုံဆွေးနွေးပွဲ ကျင်းပပြုလုပ်နေတာပါ။
နံနက် ၉ နာရီကနေ စတင်ပြီး ပြုလုပ်ခဲ့တဲ့ ဒီဆွေးနွေးပွဲမှာ နှစ်ဖက်တာဝန်ရှိလူကြီးတွေ အပြန်အလှန် ဆွေးနွေး သွားခဲ့ကြပါတယ်။
အဲဒီဆွေးနွေးပွဲအပြီးမှာ အပစ်အခတ်ရပ်စဲရေး ၊ code of conduct / မူးယစ်ဆေးဝါးတိုက်ဖြတ်ရေးနှင့် အစားထိုး သီးနှံကဏ္ဍ ၊ပအို့ဝ် အမျိုးသား လွတ်မြောက်ရေးအဖွဲ့ချုပ်က လက်ရှိပြုလုပ်နေတဲ့ စီးပွားရေး လုပ်ငန်းတွေကို သက်ဆိုင်ရာ အစိုးရဌာနတွေနဲ့ နှစ်ဖက် သဘောတူလုပ်ဆောင်ရန် ဆိုတဲ့အချက်တွေအပါအဝင် အချက် ၉ ချက်ကို နှစ်ဖက် သဘောတူလက်မှတ်ရေးထိုးခဲ့ကြတယ်လို့ သိရပါတယ်။
ပြည်ထောင်စု ငြိမ်းချမ်းရေး ဖော်ဆောင်ရေးကော်မတီအဖွဲ့နဲ့ ပအိုဝ့်အမျိုးသားလွတ်မြောက်ရေးအဖွဲ့ချုပ်တို့ဟာ ပြီးခဲ့တဲ့ ၂၀၁၂ ခုနှစ် သြဂုတ်လ ၂၅ ရက်နေ့ကလည်း ပထမအကြိမ်အဖြစ် တွေ့ဆုံခဲ့ကြပါသေးတယ်။
အဲဒီတွေ့ဆုံပွဲမှာလည်း နှစ်ဖက် အပစ်အခတ်ရပ်စဲရေးအတွက် ပဏာမအဖြစ် သဘောတူ ညီလက်မှတ် ရေးထိုး ခဲ့ကြပြီး ဒုတိယအကြိမ်အဖြစ် ပြည်ထောင်စုအဆင့် ဆွေးနွေးပွဲ ထပ်မံပြုလုပ်ဖို့ သဘောတူညီခဲ့ကြတာ ဖြစ်ပါ တယ်။

 http://www.burmavjmedia.net/?p=20082

အပြည့်အစုံသို့... »

ဦးအောင်မင်းနှင့် PNLO ရန်ကုန်မြို့မှာ ဆွေးနွေးမည်

ချင်းမိုင်(မဇ္စျိမ)။   ။ အပစ်အခတ် ရပ်စဲဖြစ်ပြီးသော ပအိုဝ်းအမျိုးသား လွတ်မြောက်ရေး အဖွဲ့ PNLO နှင့် အစိုးရ ငြိမ်းချမ်းရေးအဖွဲ့တို့ မတ်လ ၂၂ နှင့် ၂၃ ရက်နေ့များတွင် ပြည်ထောင်စုအဆင့် ငြိမ်းချမ်းရေး ဆွေးနွေးမည် ဖြစ်သည်။

ရန်ကုန်မြို့ရှိ ငြိမ်းချမ်းရေးစင်တာတွင် ငြိမ်းချမ်းရေးဖော်ဆောင်ရေးလုပ်ငန်းကော်မတီ ဒု-ဥက္ကဋ္ဌ ဦးအောင်မင်း ဦးဆောင်သော ကိုယ်စားလှယ်များနှင့် PNLO ဥက္ကဋ္ဌ ဗိုလ်မှူးကြီး ခွန်ဥက္ကာ ပါဝင်သော ကိုယ်စားလှယ်အဖွဲ့တို့
ဆွေးနွေးမည်ဟု ဗိုလ်မှူးကြီး က ပြောသည်။

“ကျနော်တို့ ပြည်ထောင်စုအဆင့် တွေ့ဖို့ ရှိတယ်။ ဦးကြီး ဦးအောင်မင်းဆီက ဖိတ်စာရောက်လာလို့ ကျနော်တို့ ထွက်လာတာ။ သူတို့ အစိုးရဘက်က လာကြိုတယ်။ ခု သထုံရောက်ပြီ။ မနက်ဖြန် ရန်ကုန်ဝင်မယ်။ ကိုယ်စားလှယ် ၁၅ ယောက် တက်မယ်။ ၅ ယောက်က ရန်ကုန်မှာ ရောက်နေပြီ” ဟု PNLO ဥက္ကဋ္ဌ က မဇ္စျိမကို ပြောသည်။

ထိုဆွေးနွေးပွဲအတွက် ပြင်ဆင်မှုများ ပြုလုပ်နေရသဖြင့် ယနေ့ လားရှိူးမြို့တွင် စတင်ကျင်းပနေသော ရှမ်းနှင့်ကယား ပါတီအဖွဲ့အစည်းများ ညီလာခံသို့ တက်ရောက်နိုင်ခြင်း မရှိကြောင်း သူက မဇ္စျိမကို ပြောသည်။

PNLO သည် အစိုးရ ငြိမ်းချမ်းရေးအဖွဲ့နှင့် ထိုင်းနိုင်ငံတွင် အလွတ်သဘော နှစ်ကြိမ် တွေ့ဆုံပြီးနောက် ၂၀၁၂ ခုနှစ်၊ သြဂုတ်လ ၂၅ ရက်နေ့က ပြည်နယ်အဆင့် ပထမဆုံးအကြိမ် အပစ်အခတ် ရပ်စဲရေးသဘောတူ လက်မှတ်ရေးထိုးခဲ့ သည်။

သဘောတူညီချက်အရ PNLO ၏ ဆက်ဆံရေးရုံးများကို ရှမ်းပြည်နယ်ရှိ တောင်ကြီး၊ မောက်မယ်နှင့် ဆီဆိုင်မြို့များတွင် ဖွင့်လှစ်ရန် သဘောတူခဲ့ပြီး မွန်ပြည်နယ်ရှိ သထုံမြို့တွင် ဆက်ဆံရေးရုံး ဖွင့်လှစ်ရန် ဆွေးနွေးပွဲတွင် ညှိနှိုင်းသွားရန် ရှိသည်။

ထို့ပြင် အပစ်အခတ် ရပ်စဲမှု ခိုင်မာရေး၊ နှစ်ဖက် တပ်ဖွဲ့ဝင်များ လိုက်နာရမည့် စည်းကမ်းချက်များ သတ်မှတ်နိုင်ရေး၊ ဆက်ဆံရေးရုံး လုပ်ငန်း လည်ပတ်နိုင်ရန်အတွက် ကူညီပံ့ပိုးရေး၊ PNLO/PNLA တပ်ဖွဲ့ဝင်များ၏ တပ်တည်နေရာ ညှိနှိုင်းရေး၊ မူးယစ်ဆေးဝါး တိုက်ဖျက်ရေးတွင် ပူးပေါင်းဆောင်ရွက်ရေး စသည်တို့ကို ဆွေးနွေးရန် သဘောတူ ထားကြပြီး ဖြစ်သည်။

PNLO ကို ၂၀၀၉ ခုနှစ်၊ ဒီဇင်ဘာလတွင် ပြုလုပ်သည့် ပအိုဝ်း အမျိုးသား ညီလာခံမှ စတင် ဖွဲ့စည်းခဲ့ပြီး ရှမ်းပြည်နယ်နှင့် ကယားပြည်နယ် နယ်စပ်တွင် လှုပ်ရှားလျက် ရှိကာ လက်နက်ကိုင် တပ်ဖွဲ့ဝင် အင်အား ၂၀၀ ကျော် ရှိကြောင်း သိရသည်။ ထို့အပြင် တိုင်းရင်းသား တန်းအခွင့်အရေး အတွက် ဖွဲ့စည်းထားသော လက်နက်ကိုင်အဖွဲ့ ၁၁ ဖွဲ့ပါ ညီညွတ်သော တိုင်းရင်းသားလူမျိုးများကောင်စီ UNFC တွင် အဖွဲ့ဝင် ဖြစ်သည်။

http://www.mizzimaburmese.com/news/inside-burma/11162--pnlo--.html

အပြည့်အစုံသို့... »

ငြိမ်းချမ်းရေး ဆွေးနွေးပွဲအတွက် ငွေကြေးအကူအညီ ပြည်ပမှ ယူနေရ

ငြိမ်းချမ်းရေး ဆွေးနွေးပွဲများတွက် နေပြည်တော်အစိုးရမှ ဘက်ဂျက် ထုတ်ပေးခြင်း မရှိသည့်အတွက် လိုအပ်သည့် အကူညီများကို ဆွေးနွေးပွဲကျင်းပရာ အိမ်ရှင်နိုင်ငံများမှ ယူနေရကြောင်း သိရသည်။
ယင်းသို့ ပြည်ပ အကူညီများ ယူဆောင်နေရသည့် အတွက် ငြိမ်းချမ်းရေး ဆွေးနွေးပွဲများတွင် တခါတရံ အိမ်ရှင်နိုင်ငံများ၏ စွက်ဖက်ခြင်းများ ခံနေရကြောင်း ငြိမ်းချမ်းရေး ဆွေးနွေးသူတချို့က သုံးသပ်ပြောဆိုလျှက် ရှိသည်။
မတ်လ ၁၁ ရက်နေ့က ကျင်းပသည့် တတိယအကြိမ် ပြည်ထောင်စုအဆင့် ကချင်ပြည်နယ် ငြိမ်းချမ်းရေးဆွေးနွေးပွဲကို တရုတ်နိုင်ငံ၏ အစီစဉ်နှင့် တရုတ်ပြည် ရွှေလီမြို့တွင် ကျင်းပပြုလုပ်ခဲ့ရာ ယင်းဆွေးနွေးပွဲတွင် တရုတ်နိုင်ငံ၏ ၀င်ရောက် စွက်ဖက်မှုကြောင့် ငြိမ်းချမ်းရေးဆွေးနွေးပွဲအချိန် ကြန့်ကြာခဲ့ရကြောင်း ယင်းဆွေးနွေးပွဲသို့ တက်ရောက်သူများက ပြောဆို ခဲ့သည်။
ငြိမ်းချမ်းရေး ဆွေးနွေးပွဲအတွက် နေပြည်တော် အစိုးရဘက်မှ ဘက်ဂျက် လျာထားချက် မရှိကြောင်း၊ သမ္မတကြီး အနေဖြင့် ငြိမ်းချမ်းရေး ရချင်သည့် ပုဂ္ဂိုလ်မှန်လျှင် ငြိမ်းချမ်းရေးအတွက် နိုင်ငံတော် ဘက်ဂျက်ကို ချထားပေးရမည်ဖြစ်ကြောင်း၊ ငြိမ်းချမ်းရေးသည် ပြည်တွင်းပြဿနာ၊ ညီအစ်ကို အချင်းချင်း ရန်ဖြစ်ချင်းဟုသာ ပြောပြီး စရိတ်ကို ပြည်တွင်းက မထုတ်ဘဲ ပြည်ပ အကူအညီယူနေခြင်းမှာ မဖြစ်သင့်ကြောင်း၊ ပြည်ပမှ ထည့်ဝင်သူများအနေဖြင့် ၎င်းတို့ ငွေကြေး ပါဝင်သောကြောင့် ဝင်ရောက် စွက်ဖက်လိုကြကြောင်း တိုင်းရင်းသားလူမျိုးများ ဖက်ဒရယ်ကောင်စီ (UNFC) မှ တွဲဘက် အထွေထွေ အတွင်းရေးမှူး ၂ ဗိုလ်မှူးကြီး ခွန်ဥက္ကာ ပြောသည်။
“နေပြည်တော် အစိုးရအနေနဲ့ ပြည်တွင်းမှာလည်း လုပ်ချင်တယ်၊ ဘက်ဂျက်လည်း လုံလုံလောက်လောက် ရှိမယ်ဆိုရင် ဘယ်သူ ၀င်စွက်ဖက်တာမှ ခံနေစရာ မလိုတော့ဘူး။ အခုတော့ သမ္မတက ငြိမ်းချမ်းရေး ဖော်ဆောင်ချင်တယ်လည်း ပြောတယ်၊ ဘက်ဂျက်လည်း မထုတ်ပြန်ဘူးဆိုတော့ စဉ်းစားစရာ ဖြစ်နေပါတယ်” ဟု သူက ဆိုသည်။
သို့ရာတွင်  Myanmar Peace Centerမှ ငြိမ်းချမ်းရေး အကျိုးတော်ဆောင် ဦးလှမောင်ရွှေကမူ နိုင်ငံတော် ဘက်ဂျက်အနေဖြင့် လျာထားခြင်း ရှိမရှိကို သေသေချာချာ မသိရှိကြောင်း၊ ၎င်းတို့ ကိုယ်တိုင် ယင်းကိစ္စကို မရှင်းလင်းကြောင်း၊ သမ္မတရုံးကသာ အဓိက ကိုင်တွယ်နေခြင်းဖြစ်ကြောင်း ဧရာဝတီကို ပြောသည်။
မတ်လ ၁၁ ရက်နေ့က ကျင်းပသည့် ရွှေလီဆွေးနွေးပွဲတွင် ဆွေးနွေးချိန် ကြာမြင့်လာသည့်အတွက် အစိုးရနှင့် ကချင် လွတ်လပ်ရေး တပ်မတော် (KIA) ဘက်မှ ရက်ကူးကာ ဆွေးနွေးချင်သော်လည်း တရုတ်ဘက်မှ ဖိအား ပေးခဲ့သည့်အတွက် ညသန်းခေါင်ယံကျော်သည့် အချိန်အထိ ဆွေးနွေးခဲ့ရကြောင်း သိရသည်။ ဆွေးနွေးပွဲကို မြန်မာစံတော်ချိန် နံနက် ၉ နာရီတွင် စတင်ခဲ့ပြီး ည ၁၂ နာရီကျော်မှသာ ဆွေးနွေးချိန် ပြီးဆုံးခဲ့သည်။
ထို့အပြင် ငြိမ်းချမ်းရေးနှင့် ပတ်သက်သည့် ထုတ်ပြန်ချက်တွင်လည်း တရုတ်နိုင်ငံကို ကျေးဇူးတင်ကြောင်း ထည့်သွင်းခိုင်းရာ ယင်းအချက်ကို ပါ၀င်သင့်၊ မသင့် ဆွေးနွေးတိုင်ပင်နေရသည့်အတွက် အချိန်ပိုမို ကြာမြင့်ခဲ့ကြောင်း သိရသည်။
ဆွေးနွေးချိန်နှင့် စဉ်းစားဆုံးဖြတ်ချိန်ကို တရုတ်ဘက်မှ ဖိအားပေးသည့် အတွက် ဆွေးနွေးပွဲ စားပွဲဝိုင်းမှ KIA ဒုတိယ စစ်ဦးစီးချုပ် ဗိုလ်ချုပ် ဂွမ်မော် ရုတ်တရက် ထထွက်သွားခဲ့ပြီး ၁ နာရီကျော်အကြာ မြန်မာစံတော်ချိန် ည ၁၁ နာရီမှ ဆွေးနွေးပွဲ စားပွဲဝိုင်းသို့ ပြန်လည် ရောက်ရှိလာခဲ့သည်။
တရုတ်အစိုးရ၏ ငြိမ်းချမ်းရေးဆွေးနွေးပွဲ ပါ၀င် ပတ်သက်မှု ရှိမရှိနှင့် ပတ်သက်၍ ဗိုလ်ချုပ်ဂွမ်မော်အား ဧရာဝတီက  မေးမြန်းခဲ့ရာ “တရုတ်အနေနဲ့ ပါ၀င် ပတ်သက်တာတော့ မရှိပါဘူး။ ဒါပေမယ့် သူတို့နဲ့ ပြန်ညှိတဲ့ အပိုင်းလေးတွေတော့ ရှိပါတယ်။ စာချုပ်မှာ ပါ၀င်ပြီး လက်မှတ်ထိုးမလား၊ မထိုးဘူးလား ဆိုတာမျိုးတွေပေါ့။ တရုတ်နိုင်ငံ အစိုးရက ကျနော်တို့ကို နေရေး ထိုင်ရေး စားရေး သောက်ရေးနဲ့ သွားရေးလာရေး အကုန်လုံး တာဝန်ယူပေးထားပါတယ်” ဟု ပြန်လည် ဖြေကြား ခဲ့သည်။
ယင်းနေ့ ည ၁၁ နာရီခွဲ အချိန်တွင် ငြိမ်းချမ်းရေးဆွေးနွေးပွဲ၏ ရလဒ်အဖြစ် အပစ်အခတ် ရပ်စဲရေးအပါ၀င် တခြားသော အချက် ၅ ချက်ကို သဘောတူညီမှု ရရှိခဲ့ကာ ထုတ်ပြန်ခဲ့သည်။
ငြိမ်းချမ်းရေး ဆွေးနွေးပွဲ၏ ရလဒ် အနေဖြင့် ပဏာမ အပစ်အခတ် ရပ်ဆဲရေး အဆင့်ရထားပြီ ဖြစ်သော်လည်း ခိုင်မာသည့် အပစ်အခတ် ရပ်ဆဲမှု အဆင့်အထိ မရောက်ရှိသေးကြောင်း သိရသည်။
“ပဏာမ အပစ်အခတ် ရပ်စဲရေးဆိုတာက ရန်လိုမှုတွေနဲ့ ပြစ်ဒဏ်တွေ မရှိတော့ဘူး။ ဒါပေမယ့် ပဏာမအဆင့်မှာ ရှိနေတဲ့ ရှေ့တန်းတပ်တွေ၊ ပြည်သူလူထု အနှောင့်အယှက်ဖြစ်မယ့် နေရာတွေ၊ တပ်မတော် နေရာ ယူထားတာတွေ၊ ရွာသူရွာသားတွေ မနေရဲတဲ့ စခန်းတွေ ပြန်ရွှေ့ပေးဖို့တွက် ၂ ဘက် စလုံးက လုပ်ဆောင်ရမယ်။ အပစ်ရပ် အဖွဲ့အစည်းတွေ အနေနဲ့ ပဏာမ အပစ်ရပ်တာနဲ့ ငြိမ်းချမ်းရေးရတာမျိုး မဟုတ်ပါဘူး။ ပဏာမ အပစ်ရပ်တာနဲ့ တပ်ပိုင်းဆိုင်ရာ အကောင်အထည် ဖော်မှသာ ခိုင်မာတဲ့ အပစ်အခတ် ရပ်စဲဲရေး ရောက်လာမှာပါ” ဟု  ဗိုလ်မှူးကြီး ခွန်ဥက္ကာက ဆိုသည်။
ကချင်ပြည်နယ် ငြိမ်းချမ်းရေး ဆွေးနွေးပွဲသို့ တက်ရောက်လာသည့် အဘက်ဘက်မှ ခေါင်းဆောင်များ၏ လုံခြုံရေးဆိုင်ရာ ကိစ္စ အရေးကြီးသည့် အတွက် ဆွေးနွေးသည့် နေရာ အခက်အခဲ ရှိခဲ့ကြောင်း ကြားသိရသည်။
“UNFC အနေနဲ့ တွေ့ရမယ်ဆိုရင် ထိုင်းနိုင်ငံ ချင်းမိုင်မြို့ကိုပဲ ရွေးသွားမှာပါ။ အဓိက ပြဿနာက ဘယ်သူ ကြားဝင် စီစဉ် ပေးသလဲ ဆိုတာပါပဲ။ အခုပွဲမှာ တရုတ်တွေက ကမကထ လုပ်တာဆိုတော့ ကျနော်တို့ လိုချင်တဲ့ အဓိက လူတွေ ခေါ်လို့ မရဘူး။ UK၊ US၊ UN က ကိုယ်စားလှယ်တွေကို ခေါ်လို့မရဘူး ဖြစ်နေတယ်။ အဲဒီလို ပုဂ္ဂိုလ်တွေ ခေါ်ချင်တယ်ဆိုရင် အပြင် ထွက်မှ ဖြစ်မှာပါ” ဟု ဗိုလ်မှူးကြီး ခွန်ဥက္ကာက ပြောသည်။
ဧပြီလတွင် ကျင်းပမည့် ဆွေးနွေးပွဲကို ပြည်တွင်းတွင်သာ ကျင်းပနိုင်ရန် ကြိုးစားသွားမည် ဖြစ်ကြောင်း ဦးလှမောင်ရွှေက ဆိုသည်။
“ခိုင်မာတဲ့ အပစ်အခတ် ရပ်စဲရေး သဘောတူညီချက် ရတယ်ဆိုရင် ကျနော်တို့က ပြည်တွင်းမှာ ဆွေးနွေးလည်း လက်ခံ နိုင်ပါတယ်” ဟု ဗိုလ်ချုပ်ဂွမ်မော်က ပြောသည်။
ပြည်တွင်းတွင် ငြိမ်းချမ်းရေး ဆွေးနွေးပွဲ လုပ်ဆောင်ရန် ခက်ခဲနေကြောင်း၊ ပြည်တွင်းတွင် ခေါင်းဆောင်များ သွားလာနိုင်ရန် ခရီးစဉ် တခုစာ အတွက် သမ္မတရုံး၏ ကင်းလွတ်ခွင့် အမိန့်စာဖြင့် သွားလာနေကြရကြောင်း၊ သို့ရာတွင် နယ်စပ်ပြန်ရောက်၍ အဆိုပါ စာ မရှိတော့ပါက မတရားအသင်း ဥပဒေဖြင့် အကျုံးဝင်သွားကြောင်း၊ ငြိမ်းချမ်းရေး ဆွေးနွေးပွဲ တခုစာသာ ကင်းလွတ်ခွင့် ရခြင်း ဖြစ်ကြောင်း ဗိုလ်မှူးကြီး ခွန်ဥက္ကာက ရှင်းပြသည်။
“တည့်တဲ့အချိန်ဆိုရင် ပြဿနာ မရှိဘူး။ မတည့်တဲ့ အချိန်ဆိုရင် မတရားအသင်းနဲ့ ဆက်သွယ်တယ် ဆိုပြီး ဖမ်းတော့တာပဲ။ တခေါက်စာ ကင်းလွတ်ခွင့်ရတာ ဂုဏ်သိက္ခာအတွက် အားနည်းတယ်လို့ ခံစားရတယ်။ လုံခြုံမှုလည်း တကယ်မရှိဘူး။ အဲဒါကြောင့် အထွေထွေ လွတ်ငြိမ်းချမ်းသာခွင့် မဟုတ်ရင်တောင်မှ ငြိမ်းချမ်းရေးအတွက် သွားလာနေတဲ့ လူတွေရဲ့ စာရင်းကို သေချာပြုစုပြီး ၁ နှစ်တန်သည်၊ ၆ လ တန်သည် လွတ်ငြိမ်းချမ်းသာခွင့် ပေးသင့်တယ်လို့ မြင်တယ်” ဟု သူက ဆိုသည်။
ကချင်ပြည်နယ် ငြိမ်းချမ်းရေးအတွက် ဆွေးနွေးသည့် နေရာ အလွန် အရေးကြီးကြောင်း၊ ဆွေးနွေးသည့် အဖွဲ့နှစ်ဘက်စလုံးကို မည်သည့်ဘက်ကမှ ဖိအားပေးခြင်းမျိုး မရှိဘဲ လွတ်လွတ်လပ်လပ် ဆွေးနွေးခွင့် ပြုသင့်ကြောင်း၊ တစုံတရာက ဖိအားပေးလျှင် လွတ်လပ်သည့် ဆွေးနွေးပွဲ ထွက်ပေါ်လာမည် မဟုတ်သည့်အတွက် ဆွေးနွေးသည့် နေရာကို အဓိက စဉ်းစားရန် လိုအပ်ကြောင်း ၎င်းက ဆက်ပြောသည်။
တရုတ်ပြည် ရွှေလီမြို့တွင် ကျင်းပပြုလုပ်သည့် ကချင် ငြိမ်းချမ်းရေး ဆွေးနွေးပွဲသို့ “၀” တိုင်းရင်းသား ကိုယ်စားလှယ်များကို တရုတ်နိုင်ငံ အစိုးရ လက်မခံခဲ့သည့် အတွက် တက်ရောက်ခဲ့ခြင်း မရှိကြောင်း သိရသည်။
ထို့အပြင် ကချင်ပြည်နယ် ငြိမ်းချမ်းရေး ဆွေးနွေးပွဲသို့ သတင်း လာယူသော မြန်မာမီဒီယာ သတင်းထောက် များကို ၀င်ရောက်မှတ်တမ်းတင်ခွင့် မပေးခဲ့သော်လည်း တရုတ်မီဒီယာ သတင်းထောက်များကိုမူ ဓာတ်ပုံရိုက်ခွင့်နှင့် မှတ်တမ်းတင်ခွင့်များ ပေးခဲ့သည်။
တရုတ်နိုင်ငံသည် ယခုငြိမ်းချမ်းရေး ဆွေးနွေးပွဲ ဖြစ်မြောက်ရန်အတွက် အိမ်ရှင်နိုင်ငံအဖြစ် ကူညီ ဆောင်ရွက်ခဲ့သော်လည်း ငြိမ်းချမ်းရေး ဆွေးနွေးပွဲ စားပွဲဝိုင်းတွင် လေ့လာသူအဖြစ်သာ တက်ရောက်ခဲ့ခြင်း ဖြစ်ကြောင်း ပြောဆိုသည်ဟု သိရသည်။
ရွှေလီမြို့တွင် ကျင်းပသော တတိယအကြိမ် ကချင်ပြည်နယ် ငြိမ်းချမ်းရေး ဆွေးနွေးပွဲသို့ မြန်မာအစိုးရဘက်မှ ဦးအောင်မင်း (ပြည်ထောင်စု ၀န်ကြီး၊ နိုင်ငံတော်သမ္မတရုံး)၊ ဦးအုန်းမြင့် (ပြည်ထောင်စုဝန်ကြီး၊ မွေးမြူရေးနှင့် ရေလုပ်ငန်းဝန်ကြီးဌာန)၊ ဦးလဂျွန်ငန်ဆိုင်း (၀န်ကြီးချုပ်၊ ကချင်ပြည်နယ်အစိုးရအဖွဲ့)၊ ဒုတိယဗိုလ်ချုပ်ကြီး မြင့်စိုး (ကာကွယ်ရေးဝန်ကြီးဌာန) အပါအဝင် တခြားသော ဗိုလ်မှူးကြီးများနှင့် အကြံပေး အဖွဲ့ဝင် စုစုပေါင်း ၁၂ ဦး၊ KIO/ KIA ဗဟို ကိုယ်စားလှယ်အဖွဲ့မှ ဦးဆွမ်လွတ်ဂမ် ခေါင်းဆောင် သော အဖွဲ့ဝင် ၁၁ ဦးနှင့် SSPP/SSA အဖွဲ့မှ တက်ရောက် လေ့လာသူ ၂ ဦး၊ RCSS/ SSA မှ လေ့လာသူ ၂ ဦး UWSP အဖွဲ့မှ တက်ရောက်လေ့လာသူ ၃ ဦး၊ NDAA အဖွဲ့မှ တက်ရောက်လေ့လာသူ ၂ ဦးတို့ တက်ရောက်ခဲ့ပြီး  SSA အဖွဲ့ဝင်များအနေဖြင့် လေးကြိမ်မြောက် တွေ့ဆုံဆွေးနွေးပွဲတွင်လည်း လေ့လာသူအဖြစ် တက်ရောက်သွားမည် ဖြစ်ကြောင်း သိရသည်

http://burma.irrawaddy.org/archives/35821

အပြည့်အစုံသို့... »

စစ်မှန်တဲ့ ပြည်တွင်းငြိမ်းချမ်းရေးအတွက်

ဒီတပတ် မြန်မာ့ဒီမိုကရေစီရေးရာကဏ္ဍမှာ တရုတ်နိုင်ငံ ရွှေလီမြို ့မှာ ကချင်ပြည်နယ်ငြိမ်းချမ်းရေးအတွက် မြန်မာအစိုးရနဲ့ ကချင်တိုင်းရင်းသားအဖွဲ့တို့ကြားက ဆွေးနွေးပွဲအခြေအနေကို ဒေါ်ခင်စိုးဝင်း က ညီညွှတ်သော တိုင်းရင်းသားကောင်စီ UNFC (United Nationalities Federal Council) တွဲဖက်အထွေထွေ အတွင်းရေးမှုးနှင့် ပအို့ဝ်အမျိုးသား လွတ်မြောက်ရေးအဖွဲ့ ခေါင်းဆောင် ဗိုလ်မှူးကြီး ခွန်ဥက္ကာ ကို တွေ့ဆုံမေးမြန်း ဆွေးနွေးတင်ပြထားပါတယ်။

ဒေါ်ခင်စိုးဝင်း ။ ။ မင်္ဂလာပါရှင်။ မတ်လ (၁၁) ရက်နေ့က ကျင်းပပြုလုပ်သွားခဲ့တဲ့ ပြည်ထောင်စုငြိမ်းချမ်းရေး ဖော်ဆောင်ရေးကော်မတီနဲ့ KIO/KIA အဖွဲ့ ကိုယ်စားလှယ်တွေကြား ငြိမ်းချမ်းရေးဆွေးနွေးပွဲကို KIO အဖွဲ့ရဲ ့ ဖိတ်ကြားချက်နဲ့ လေ့လာသူအဖြစ်နဲ့ သက်သေအဖြစ် တက်ရောက်ခဲ့တဲ့ UNFC ညီညွှတ်သော တိုင်းရင်းသားကောင်စီ ဖယ်ဒရယ်ကောင်စီရဲ ့ တွဲဖက်အထွေထွေအတွင်းရေးမှူး (၂) ဗိုလ်မှူးကြီးခွန်ဥက္ကာနဲ့ ရွှေလီမြို ့မှာ ကျမ တွေ့ဆုံမေးမြန်းခွင့် ရရှိခဲ့ပါတယ်။
ဒီဆွေးနွေးပွဲမှာ အိမ်ရှင်တရုတ်နိုင်ငံရဲ ့ ဝင်ရောက်စွက်ဖက်မှုကြောင့် ပူးတွဲကြေညာချက်ထုတ်တဲ့နေရာမှာ ကြန့်ကြာခဲ့ရတယ်လို့ ကြားသိရပါတယ်။ တရုတ်နိုင်ငံရဲ ့ ကိုယ်စားလှယ်က ဘယ်လိုများ ပါဝင်ပတ်သက်ခဲ့လို့ပါသလဲရှင်။

ခွန်ဥက္ကာ ။ ။ မကြိုက်ဘူး။ တချို ့စာလုံးတွေ ပြင်ပေးပါ။ တချို ့ စာလုံးတွေ ဘာဖြစ်သင့်တယ်ဆိုပြီးတော့ ဝင်ရောက်အကြံပေးတယ်။ ရိုးရိုးပြောရင်တော့။ ဒါပေမဲ့ စွက်ဖက်တဲ့သဘောမျိုး - intervene များတဲ့အခါကြတော့ အဲဒီအပေါ်မှာ နှစ်ဖက်စလုံးတော့ သိပ်စိတ်မကောင်းကြဘူး။ သို့သော်လဲပဲ တချို ့ကိစ္စတွေမှာ ကိုယ့်ဟာကိုယ်ဆုံးဖြတ်၊ ကိုယ်ဟာကိုယ် သဘောတူ လုပ်ရမယ့်ဟာတွေကရှိတယ်။ ဒါကြောင့် ကျနော်တို့က ဒါဆိုရင် ဒီအိမ်ရှင်မှာတော့ လာမိပြီးဆိုတော့ ပြင်ပေးလိုက်။ တချို ့စကားလုံးတွေ၊ တချို ့ထွက်လာတဲ့ဟာတွေ။ သို့သော် ကိုယ့်အထဲမှာ တကယ်ရရှိတဲ့ဟာတွေကိုတော့ ဆက်ကိုင်ထား၊ အလုပ်ဆက်လုပ် အဲဒီလိုပဲ။ ဒါကြောင့် အခုထွက်ထားတဲ့ just statement အထဲမှာ မပါတဲ့ တချို ့အရေးကြီးတဲ့အချက်တွေကို ကျနော်တို့က အလုပ်ဆက်လုပ်ဖို့တော့ ချန်ထားလိုက်မယ်။ ဒါက အိမ်ရှင်ပြဿနာ၊ အကြံပေးတဲ့အတွက် ကျနော်တို့က လုပ်လိုက်တယ်။ ဒါကြောင့် statement ထဲမှာမပါဘဲနဲ့ ပိုပြီးတော့ နက်နက်ရှိုင်းရှိုင်း အတူလုပ်ရမယ့်အလုပ်တွေကို ကျနော်တို့ ဆက်လုပ်သွားမယ့် သဘောတော့ ကျနော် တွေ့ရတယ်။

ဒေါ်ခင်စိုးဝင်း ။ ။ အခုလို သူများနိုင်ငံမှာလာပြီး ဆွေးနွေးတဲ့အခါကြတော့ အိမ်ရှင်ရဲ ့ စွက်ဖက်မှု ခံရတာပေါ့။ အဲဒီတော့ ကိုယ့်ရဲ ့ပြည်တွင်းမှာပဲ တဖတ်နဲ့တဖတ် နားလည်းမှုတွေ၊ ယုံကြည်မှုတွေနဲ့ မျက်နှာချင်းဆိုင်ပြီးတော့ ဆွေးနွေးမှုတွေ မဖြစ်နိုင်ဘူးလားရှင်။

ခွန်ဥက္ကာ ။ ။ ခေါ်တယ်လို့ ပြောတာနဲ့ ကျနော်တို့က legal protection ကို တင်မှာပဲ။ ချင်းမိုင်မှာလည်း ကျနော်တို့ တင်ခဲ့ဘူးတယ်။ Legal protection လုပ်ပါ။ အဲဒါ မလုပ်ရင် ကျနော်တို့ အဲဒါကို လုပ်လို့မရဘူး။ International မှာ ကြည့်လို့ရှိရင် ပြည်တွင်းမှာ legal protection မလုပ်နိုင်ရင် ပြည်ပမှာပဲ တွေ့ကြတယ်။ ကျနော်တို့ Philippines ပွဲဆိုရင်လည်း မလေးရှားမှာပဲ ဆွေးနွေးတယ်။ အင်ဒိုနီးရှားပွဲဆိုရင်လည်း ကမ္ဘာလှည့်ပြီးတော့ ဆွေးနွေးတယ်။ သီရိလင်္ကာမှာလည်း ခြောက်ခါလောက် ဆွေးနွေးတယ်။ အဲဒါလည်း နိုင်ငံခြားမှာပဲ ဆွေးနွေးတယ်။ သူ့ပြည်တွင်းမှာ မဆွေးနွေးဘူး။ ပြည်တွင်းဆွေးနွေးခြင်းအားဖြင့် ဖိအား၊ indirect သို့မဟုတ် direct ဖိအားရှိနေတော့ အဲဒီ ဖိအားအောက်မှာ ဆွေးနွေးတာလည်း လွတ်လပ်တဲ့သဘောထားကတော့ ပြောင်းလဲလာမှာ မဟုတ်ဘူး။ ဒါကြောင့် လွတ်လပ်တဲ့၊ မှီခိုကင်းတဲ့ နေရာမှာ ဆွေးနွေးခြင်းက ထွက်လာတဲ့ သဘောတူညီချက်တွေက ပိုပြီးတော့ စစ်စစ်မှန်မှန်၊ တရားမျှတမှု ရှိတယ်လို့ အဲဒီလို ကျနော် သုံးသပ်တယ်။ အဲဒါကြောင့် venue လို့ခေါ်တဲ့ ဆွေးနွေးတဲ့နေရာလည်း အင်မတန် အရေးကြီးတယ်။ ပြည်တွင်းကို မပြောသေးတာ အဲဒါကြောင့်။  

ဒေါ်ခင်စိုးဝင်း ။ ။ တရုတ်နိုင်ငံရဲ ့ အခန်းကဏ္ဍကတော့ နယ်နိမိတ်ချင်းလည်း ထိဆက်နေတဲ့ အိမ်နီးချင်းနိုင်ငံလည်းဖြစ်တယ်ဆိုတော့ တိုက်ရိုက်ပတ်သက်တယ်လို့ ပြောလို့ရပါတယ်။ နောက် EU ဥရောပသမဂ္ဂအဖွဲ့ဝင် နိုင်ငံတချို ့ - ဥပမာ နော်ဝေ၊ ဂျပန်နိုင်ငံ။ အဲဒီနိုင်ငံတွေကလည်း မြန်မာနိုင်ငံအမျိုးသား ပြန်လည်သင့်မြတ်ရေးကို ဦးတည်တဲ့ ငြိမ်းချမ်းရေးလုပ်ငန်းစဉ်တွေကို ရန်ပုံငွေတွေနဲ့ ပံ့ပိုးနေတာကို တွေ့ရပါတယ်။ UNFC ကိုရော အဲဒီလိုမျိုး ပံ့ပိုးပေးတာ ရှိပါသလားရှင်။

ခွန်ဥက္ကာ ။ ။ ကျနော်တို့အနေနဲ့တော့ လောလောဆယ် တရားဝင်။ ကျနော်တို့ UNFC နဲ့ MOU လက်မှတ်ထိုးပြီးတော့ ပူးပေါင်းဆောင်ရွက်နေတာ ဂျပန် ရှိတယ်။ Nippon Foundation ကတော့ ကျနော်တို့ရဲ ့ လုပ်ငန်းတွေမှာ ပူးပေါင်းဆောင်ရွက်ဖို့ လက်မှတ်ထိုးထားတဲ့ ဒီတဖွဲ့တော့ ရှိပါတယ်။ ဒီတဖွဲ့ကတော့ ကျနော်တို့ အစည်းအဝေးတွေ၊ ခရီးစဉ်တွေ၊ တိုင်ပင်နှီးနှောတာတွေကိုတော့ အကူအညီပေးနေပါတယ်။ သို့တည်းမဟုတ် ဂျပန်ကို ဖိတ်ခေါ်ပြီးတော့ အစည်းအဝေး လုပ်ဖို့ပေးနိုင်ပါတယ်။ သို့သော် ကျနော်တို့ ကြည့်သလောက်တော့ နော်ဝေတို့၊ တခြား Europe က အထောက်အပံ့တွေကတော့ မြန်မာ Peace Center ကို အဓိကထားပြီးတော့ သွားတယ်လို့ သိရတယ်။ သို့သော်လည်း အခုအချိန်အထိ ယုံကြည်စိတ်ချရမယ့် အခြေအနေမျိုး၊ ကတိပေးထားတဲ့အတိုင်း ကူညီပေးထားမယ့် amount အရေအတွက်ကို ကူညီတာတော့ တခါမှ မရှိသေးဘူး။

ဒေါ်ခင်စိုးဝင်း ။ ။ နိုင်ငံတကာကနေ အခုလိုမျိုး မြန်မာနိုင်ငံရဲ ့ ငြိမ်းချမ်းရေးလမ်းစဉ်အတွက် ရန်ပုံငွေတွေ ပံ့ပိုးပေးနေတယ်ဆိုတော့ လောလောဆယ် မြန်မာအစိုးရအနေနဲ့က ဘယ်လောက်အတိုင်းအတာအထိ ရန်ပုံငွေတွေ ခွဲဝေချထားပေးတယ်လို့ သိရပါသလဲရှင့်။

ခွန်ဥက္ကာ ။ ။ နေပြည်တော်အစိုးရဘက်က တပြားမှ မထုတ်ဘူး။ သူ့ရဲ ့ budget တခုလုံးမှာ ငြိမ်းချမ်းရေးလုပ်ငန်းအတွက် budget ဘယ်လောက်ရာထားတယ်ဆိုတာ မရှိဘူး။ ဒါကို သူတို့ကိုယ်တိုင်လည်း ဝန်ခံတာမရှိဘူး။ ဒါကြောင့် သမ္မတကြီးက ငြိမ်းချမ်းရေး တကယ်လိုချင်တယ်။ တကယ့် ငြိမ်းချမ်းချင်တယ် ပုဂ္ဂိုလ်ကြီးပါ။ ဒီမှာလည်း တပ်မတော်အရာရှိကြီးတွေ ပြောတယ်။ တပ်မတော်လည်း ငြိမ်းချမ်းရေး အင်မတန်လိုချင်တယ်။ အဲဒီ ပြောဆိုချက်ကို အထောက်အကူဖြစ်တဲ့ဟာက နိုင်ငံတော် budget ချပေးရမှာပေါ့။ နိုင်ငံတော်က budget မရှိဘဲနဲ့ ငြိမ်းချမ်းရေး လိုချင်တယ်ဆိုရင်။ နိုင်ငံတကာ budget နဲ့ပဲ ငြိမ်းချမ်းရေးလုပ်မှာ။ ပြောတော့လည်း ငြိမ်းချမ်းရေးက ပြည်တွင်းပြဿနာ၊ ညီအကိုတွေ ရန်ဖြစ်တယ်။ စရိတ်က အထဲက မထုတ်ဘဲနဲ့ အပြင်ကပဲ မျှော်လင့်တယ်။ အပြင်ကထဲတဲ့ လူတွေက သူလည်းပါချင်တာပေါ့။ သူကူညီပေးရင် သူလည်းပါချင်တာပေါ့။ ဒီမှာလိုပေါ့ အကယ်လို့ ကျနော်တို့ကို အကူအညီပေး၊ နေရာထိုင်ခင်းပေးရင် သူလည်းပါချင်တာပေါ့။ ဒါက သူထုံစံ။ ဒါကြောင့် ပြည်တွင်းမှာလည်း လုပ်ချင်တယ်။ Budget လည်း လုံလုံလောက်လောက် ရှိတယ်ဆိုရင် ကျနော်တို့အနေနဲ့ ဘယ်သူ့စွက်ဖက်မှုကို မခံဘဲနဲ့ လုပ်လို့ရတယ်။ အခုတော့ budget လုံးဝမထည့်ဘူးဆိုတော့ အဲဒါလည်း တော်တော်စဉ်းစားစရာပါ။ ဘာကြောင့်လဲ နိုင်ငံတော် budget မထုတ်သလဲ ဒီကိစ္စမှာ။ အဲဒါလဲ စဉ်းစားစရာ ရှိပါတယ်။

ဒေါ်ခင်စိုးဝင်း ။ ။ ဒေသတွင်း နိုင်ငံတွေဖြစ်တဲ့ အာဆီယံနိုင်ငံတွေကရော မြန်မာနိုင်ငံရဲ ့ ငြိမ်းချမ်းရေးလုပ်ငန်းစဉ်မှာ ဘယ်လိုအခန်းကဏ္ဍကနေ ပါဝင်နိုင်တယ်လို့ သုံးသပ်လို့ ရပါသလဲရှင့်။

ခွန်ဥက္ကာ ။ ။ အင်ဒိုနီးရှားနိုင်ငံတနိုင်ငံတော့ ရှိမယ်။ ကျနော်တို့ကိုလည်း ဖိတ်ပါတယ်။ အင်ဒိုနီးရှားအစိုးရက ဖိတ်တယ်။ သူတို့ဆီမှာ အစည်းအဝေးလာလုပ်ဖို့။ သူတို့လည်း နေရာပေးပါတယ်။ သို့သော် အပြင်ကိုထွက်ဖို့ သိပ်စိုးရိမ်တယ်။ ပြည်တွင်းခေါင်းဆောင်တွေက အပြင်ကို မထွက်ချင်ဘူး။ အပြင်ကိုထွက်လို့ရှိရင် ပြည်တွင်းမှာ ရထားတဲ့အရှိန်အဝါ လျော့သွားမှာကို ကြောက်တယ်။ အပြင်ရောက်ရင် ပြည်တွင်းမှာ အရှိန်နဲ့အဝါနဲ့ တိုင်းမှူး၊ ဗိုလ်ချုပ်ကြီးအရှိန်ရှိတယ်။

ဒေါ်ခင်စိုးဝင်း ။ ။ အခု ဒီဆွေးနွေးပွဲမှာ MPC – Myanmar Peace Center မြန်မာ့ငြိမ်းချမ်းရေးစင်တာက ကိုယ်စားလှယ်တွေလည်း ပါဝင်နေတာကို တွေ့ရပါတယ်။ အဲဒီတော့ ဒီ MPC ရဲ ့ အခန်းကဏ္ဍနဲ့ လုပ်ဆောင်ချက်တွေအပေါ်မှာ UNFC အနေနဲ့ အားရကျေနပ်မှု ရှိပါသလား။

ခွန်ဥက္ကာ ။ ။ သူတို့ရဲ ့ တရားဝင်မှုက တဝက်တပျက်ပဲ။ တိုင်းပြည်တပြည်ရဲ ့ တရားဝင်လမ်းကြောင်းပြောရင် လွှတ်တော်ကိုဖြတ်ရတယ်။ စုံစမ်းရေးကော်မရှင်တခု - ဘာလေးပဲပြောပြော အစိုးရကဖွဲ့တဲ့ ကော်မရှင်တရပ်က၊ အစုအဖွဲ့တရပ်က သူ့ရဲ ့ လုပ်ပိုင်ခွင့်နဲ့ သူ့ရဲ ့ လွှတ်တော်ကိုတင်တယ်။ ပြဌာန်းဥပဒေအနေနဲ့တင်တော့ လွှတ်တော်က အတည်ပြုလိုက်ရင် ပိုခိုင်တယ်။ အခု MPC law ကို ကျနော်ကြည့်တော့ သမ္မတကြီးရဲ ့ အထူး ဒီဂရီ အထူးအမိန့်နဲ့ ဖွဲ့စည်းထားတာဖြစ်တယ်။ ဦးအောင်မင်းပါတဲ့ ဝန်ကြီး (၉) ပါးပါတဲ့ ကြီးကြပ်ဖို့၊ အဲဒီအောက်မှာ ဝန်ထမ်းတွေခန့်တယ်။ ဒါရိုက်တာတွေ ခန့်တယ်။ အားလုံးက လခစားဝန်ထမ်းတွေ ဖြစ်တယ်။ အဲဒီလစာ လည်ပတ်စရိတ်တွေကိုတော့ နော်ဝေ က ပေးတယ်။ အဲဒီလိုင်းလောက်မှာပဲ ရှိတယ်။

လွှတ်တော်က အတည်ပြုထားတဲ့ အစုအဖွဲ့မဟုတ်သေးဘူး။ လွှတ်တော်သည်ပင် အခုထိတိုင် MPC ကို မေးခွန်းထုတ်နေတယ်။ MPC က ဘာလဲပေါ့။ လွှတ်တော်က အဲဒီလို မေးခွန်းထုတ်နေတော့ တပ်က ပိုဆိုးတာပေါ့။ တပ်က MPC ဘာလုပ်နေသလဲ။ တို့တပ်ကိစ္စ ဘာဝင်ပြောသလဲ။ သူတို့တပ်တွေ ဆုတ်တယ်တက်တယ်ဆိုတာကို MPC က ဝေဖန်မိရင် MPC ကိုပါ တပ်ကစိတ်ဆိုးတာ။ ဘာဖြစ်လို့လဲဆိုတော့ MPC က တပ်မတော် နဲ့ လွှတ်တော်ကို သူကပြန် challenge လုပ်နေတာ။ သူတို့က အစိုးရတခုတည်း၊ သမ္မတကြီးတယောက်တည်းရဲ ့ ဝိတ်နဲ့ သွားနေတာ။ Run နေတဲ့အခါကြတော့ ပထမပိုင်းမှာတော့ သူက အကျိုးဆောင်၊ ကြားနေ ဟိုဖက်လည်းမပါဘူး၊ ဒီဖက်လည်းမပါဘူး။ ကြားနေ အကျိုးဆောင်။ အဲဒီလိုမျိုး ပြထားတယ်။ … International, observers တို့ကိုပြထားတယ်။ လုပ်ရင်လုပ်ရင်နဲ့ မပြနိုင်တော့ဘူး။ မပြနိုင်တော့ ဘက်တဖက်ပါသွားတယ်။ ပါသွားတယ်ဆိုတော့ အခုဆိုရင် MPC ဆိုရင် ကရင်တောင် သူတို့အစိုးရ ငြိမ်းချမ်းရေးဖော်ဆောင်ရေးအဖွဲ့ အဖွဲ့ဝင်အဖြစ် အကုန်လုံးထည့်လိုက်တယ်။ တဖတ်ကိုပဲ ပြောရတော့မယ်။ အရင်တုန်းက တဖတ်ကမဟုတ်ဘူး။ ကြားမှာနေသလိုလို လုပ်နေတယ်။ အခုတော့ ရှင်းသွားတယ်။ MPC ငြိမ်းချမ်းရေးဆွေးနွေးရေးအဖွဲ့မှာ အဖွဲ့ဝင်အဖြစ် တရားဝင်နံမည်ထည့်ထားတယ်။ MPC က လူတွေအားလုံး ထည့်ထားတယ်။ ထည့်လိုက်တော့ အခုတော့ ငြိမ်းချမ်းရေးဆွေးနွေးပွဲ အစိုးရအဖွဲ့ထဲမှာ အဖွဲ့ဝင်အဖြစ်။

ဒေါ်ခင်စိုးဝင်း ။ ။ တိုင်းရင်းသားလက်နက်ကိုင်အဖွဲ့တွေနဲ့ မြန်မာအစိုးရကိုယ်စားလှယ်တွေ ငြိမ်းချမ်းရေးဆွေးနွေးပွဲ လုပ်ကြတယ်။ ဆွေးနွေးပွဲတွေပြီးတော့ ပူးတွဲကြေညာချက်တွေ ထုတ်တယ်။ အပစ်အခတ်ရပ်စဲရေး သဘောတူညီကြတယ် စသဖြင့်။ အဲဒီ ဆွေးနွေးပွဲတွေလည်း ပြီးသွားရော ကရင်ပြည်နယ်မှာ တိုက်နေပြန်ပြီ၊ ကချင်ပြည်နယ်မှာ စစ်ရှိန်တွေမြှင့်ပြီးတော့ စစ်အင်အားတွေ တိုးချဲ ့နေတယ်လို့ ကြားနေရပြန်ပြီ၊ နောက် ရှမ်းနဲ့လည်း တိုက်နေတုန်းပဲဆိုတဲ့ သတင်းတွေက လူထုကြားမှာ ပြန့်နှံနေတာပါ။ အဲဒီတော့ ဒီသဘောတူညီမှုတွေနဲ့ ပတ်သက်လို့ အတွေ့အကြုံအရ နည်းနည်းလောက် ရှင်းပြပေးပါလား။

ခွန်ဥက္ကာ ။ ။ ပမာဏဆိုပြီး လုပ်လိုက်ရင်လည်း ပမာဏလို့ လူတွေက သိတာမဟုတ်ဘူး။ ကေအိုင်အို လက်မှတ်ထိုးလိုက်တာနဲ့ ငြိမ်းချမ်းရေးရသွားပြီ။ တောင်ပိုင်းလည်းရပြီ၊ မြောက်ပိုင်းလည်းရပြီ။ Investment တွေ လာလို့ သွားဖိတ်လိုက်တာ။ အဲဒါကို လိုချင်တာ။ အဲဒီတော့ agreement အဆင့်ကို ဟိုဘက်ကတော့ တော်တော်တောင်းတယ်။ ကေအိုင်အို က မပေးနိုင်တာက agreement ကို တည့်တည့်မဟုတ်ဘဲနဲ့ အလွဲသုံးစား လုပ်သွားရင် မကောင်းဘူးလို့ အဲဒီလိုမြင်တယ်။ ဒါကြောင့် တကယ့်ကို ယုံကြည်စိတ်ချရတဲ့ အပစ်အခတ်ရပ်စဲရေးအဆင့် ရောက်သွားမယ်ဆိုရင် (၁) စစ်မှန်တဲ့ နိုင်ငံရေးဆွေးနွေးပွဲ ပေါ်လာရင်တော့ ဒီ agreement က မခက်ဘူး။ ဟိုဟာတွေကို လက်ဆုတ်လက်ကိုင် မပြနိုင်သေးဘဲနဲ့ agreement ပဲဆိုရင် ဒီမှာပဲ အနိုင်ပိုင်းပြီးတော့ ဟိုဘက်ကို မသွားဘူးကွာ။ အဲဒီလို နေလိုက်မှာကိုလည်း စိုးရိမ်တယ်။

တကယ်ပဲ ၁၇ နှစ် နေခဲ့တာပဲ။ ဟိုအရင်တုန်းက ချုပ်ထားတာတောင် မဖျက်သေးဘူး။ မဖျက်သေးတော့ ဘာကြောင့် ဆက်ထိုးဖို့ လိုသလဲ။ ဒါကို ဆက်မတိုက်ရုံနဲ့ ရပ်သွားတာပဲ။ ပြီးရင် နိုင်ငံရေး ဆွေးနွေးပွဲတင်လိုက်။ နိုင်ငံရေးဆွေးနွေးပွဲလိုင်း တကယ်တက်လာမယ်ဆိုရင် အပစ်အခတ်ရပ်စဲရေးက ယုံကြည်စိတ်ချရတဲ့အဆင့် ရောက်သွားမှာပါ။ စားပွဲပေါ် အားလုံး မျက်နှာစုံညီ တွေ့နေကြပြီလေ။ ရင်းရင်းနှီနှီ တဆင့်ပြီးတဆင့် ဒီတိုင်းပြည်အတွက် nation building ပျက်စီးနေတဲ့ဟာ၊ ယိုးယွင်းနေတဲ့ဟာကို ပြန်လည်ထူးထောင်ဖို့ လုပ်ကြပြီဆိုရင် အဲဒီအချိန်မှာ ဒါဟာ ပစ်တာရပ်တာတော့ နားသွားမှာပဲ။ နောက် nationwide ceasefire လိုဟာမျိုး အစိုးရက ဒိုင်ခံပြီးတော့ လူသိနတ်ကြား ကမ္ဘာသိ ကြေညာလိုက်လည်း သွားတိုက်လို့ မရတော့ဘူး။ အခုကတော့ အဲဒါတွေ မရှိတော့ လိုအပ်လို့ တိုက်သလို။ လိုအပ်လို့ တိုက်တာလည်း ကချင်မှာ နည်းနည်းနားတာနဲ့ ရှမ်းပြည်မြောက်ပိုင်းကို သွားတိုက်တယ်။ ရှမ်းပြည်မြောက်ပိုင်းကို တိုက်ဖို့ လူ ရှစ်ထောင် ပို့ထားတယ်။

ဒေါ်ခင်စိုးဝင်း ။ ။ ဗိုလ်မှူးကြီး ခွန်ဥက္ကာ ကို ကျေးဇူးအများကြီး တင်ပါတယ်ရှင်။

http://burmese.voanews.com/content/burma-democracy-forum-peace-talk-with-kachin/1623361.html

အပြည့်အစုံသို့... »

အစိုးရနှင့် KIO တွေ့ဆုံဆွေးနွေးမှုအပြီး တိုက်ပွဲစ

မြန်မာစစ်သား၂ဦး၊ရှမ်းပြည်အရှေ့မြောက်ပိုင်း။

မြန်မာအစိုးရနှင့် ကချင်လွတ်မြောက်ရေးအဖွဲ့ (KIO) တွေ့ဆုံဆွေးနွေးပြီး တစ်ရက်အကြာ ရှမ်းပြည်နယ်မြောက်ပိုင်း KIO အောက် ကချင်လွတ်မြောက်ရေးတပ်ဖွဲ့ (KIA) တပ်မဟာ (၄) နယ်မြေတွင် နှစ်ဖက်တပ်ကြား ၂ နာရီကြာ ပြင်းထန်သောတိုက်ပွဲတခုဖြစ်ပွားခဲ့ကြောင်း သိရသည်။
တွေ့ဆုံဆွေးနွေးပွဲစသောနေ့မှစ၍ အဆိုပါ အစိုးရတပ်များက ထိုးစစ်ဆင်လာခြင်းဖြစ်ပြီး မတ်လ ၁၃ ရက်နေ့တွင်မူ ၄င်းကွတ်ခိုင်အခြေစိုက် အစိုးရတပ်ဖွဲ့ ခလရ (၂၄၁) တပ်ဖွဲ့များ နှင့် KIA တပ်မဟာ (၄) လက်အောက်ခံ ဗိုလ်ကြီး ဖောင်ဒါဒွတ် (Hpauda Dut) ဦးဆောင်သော ဇိုင်းလဒတ် (Zai Ladat) တပ်ဖွဲ့ (၃၀၁) တပ်ဖွဲ့တို့ ၁၀ နာရီမှ ၁၂ နာရီခွဲထိ အပြန်အလှန်ပစ်ခတ်ခဲ့ခြင်းဖြစ်သည်ဟု တပ်မဟာ (၄) မှ အမည်မဖော်လိုသူ အထက်ပိုင်း KIA အရာရှိတစ်ဦးကပြောသည်။
“အဲဒီအစိုးရတပ်ဖွဲ့တွေက ကျနော်တို့တပ်ဖွဲ့တွေ ဂျာကြိုင်ယန် မှာနေနေတာသိတော့ ရွှေလီမှာ ဆွေးနွေးနေတဲ့နေ့ ၁၁ ရက်နေ့မှာပဲ ကျနော်တို့နေတဲ့နေရာကို ဆင်းလာတယ်။ သူတို့ဆင်းလာတော့ ကျနော်တို့ဖက်က ရှောင်လိုက်တာ။ ပြီးတော့ ကျနော်တို့အဖွဲ့က ကတုန်းခဆန် (Kadung Hka San)မှာ ပြန်သွားနေတယ်။ အဲဒီမှာလည်း အစိုးရတွေ ပြန်လိုက်လာတော့ ကျနော်တို့လည်း မပစ်ချင်လို့ ဟူးဖြတ်မန်ပိန်း ဆိုတဲ့နေရာမှာ ပြန်ရွှေ့သွားတယ်။ သူတို့လည်း လမ်းမကြီးလမ်းမဟုတ်ပဲနဲ့ တောလမ်းပြန်လိုက် လာတော့ အဲဒီရွာအနီးမှာ ထိပ်တိုက်တွေ့ပြီး ပစ်ခတ်ကြတာ။ ကျနော်တို့ဘယ်ကိုသွားရင် သူတို့လည်း လိုက်တယ်။”
တိုက်ပွဲဖြစ်ပွားရာနေရာသည် တပ်မဟာ (၄) လက်အောက် တပ်ရင်း (၉) နယ်မြေ ဟူးဖြတ်မန်ပိန်း (Hu Hpyet Man Pying) ကျေးရွာအနီးတွင်ဖြစ်ပြီး အစိုးရနှင့် KIA နှစ်ဖက် အင်အား ၆၀ ခန့်စီဖြင့် ရင်ဆိုင်တိုက်ပွဲဖြစ်ပွားခဲ့ရာ အစိုးရဘက်မှ ၆ ဦးသေဆုံးကာ ၁၃ ဦးဒဏ်ရာရရှိခဲ့ကြောင်း KIA အရာရှိပြောဆိုခဲ့သော်လည်း သီးခြားအတည်ပြုမှုမရရှိခဲ့ပေ။
အစိုးရနှင့် KIO သည် တွေ့ဆုံဆွေးနွေးမှုတွင် နှစ်ဖက် တပ်ပိုင်းဆိုင်ရာ အောက်ခြေတပ်ဖွဲ့များအထိ ညှိနှိုင်းမှုရရှိအောင် ညွန်ကြားသွားရန် သဘောတူခဲ့ကြသည်။
သို့သော် ဆွေးနွေးမှုများပြုလုပ်နေချိန်အတွင်း အစိုးရတပ်ဖွဲ့များမှ တပ်ရင်း (၉) နယ်မြေ ဟူးဖြတ်အနီး ကြောင်မြန် (Chyau Myan) ကျေးရွာတွင် စစ်ကြောင်းတစ်ခုနှင့် ဗီမာ(Bi Ma)အနီး နောင်အိန်ယန် (Nawng Ing Yang) တွင် စစ်ကြောင်းတစ်ခုချထားနှင့်ပြီးဖြစ်သည်ဟု အဆိုပါ KIA အရာရှိကဆိုသည်။
“အစိုးရတပ်တွေက နေရာတိုင်းမှာ လူအင်အားဖြည့်တာတွေ ရိက္ခာပို့တာတွေလုပ်နေတယ်။ နေရာတကာ ထိုးစစ်ဆင်နေတယ်။ ကျနော်တို့ရှောင်ပေးလိုက်လို့ သေနတ်သံမကြားတာပဲ။ ဆွေးနွေးလည်း ဆွေးနွေးနေတယ်။ သေနတ်သံမမြည်တဲ့ အချိန်မှာ သူတို့က ကျနော်တို့ရဲ့ အရေးကြီးတဲ့နေရာတွေကို လိုက်ယူနေတဲ့သဘောပေါ့။”
အစိုးရဘက်မှ ထိုသို့ထိုးစစ်ဆင်လာသော်လည်း KIA ဌာနချုပ်မှ ၎င်းတို့ဘက်မှ ပစ်ခတ်မှုမရှိလျှင် ပစ်ခတ်မှုမပြုလုပ်ရန် ညွန်ကြားထားကြောင်း သိရသည်။
ဆွေးနွေးမှုအပြီးဆက်လက်ဖြစ်ပွားလာသော တိုက်ပွဲသည်အရှိန်ပြင်းထန်သည်ဟု ပြောဆိုနိုင်ပြီး နောက်ထပ်လည်းတင်းမာနေဆဲဖြစ်ကြောင်းပြောသည်။
အစိုးရဖက်မှာလည်း အဆိုပါစစ်အင်အားတိုးချထိုးစစ်ဆင်နေသည်ဟု ပြောဆိုမှုနှင့်ပတ်သက်၍ မြောက်ပိုင်းတိုင်းစစ်ဌာနချုပ် ဗိုလ်မှူးချုပ် ထွန်းထွန်းနောင်က မတ်လ ၁၁ ရက်နေ့က ဧရာဝတီသတင်းဌာနသို့ အောက်ပါအတိုင်း တုံ့ပြန်ထားသည်ကိုတွေ့ရသည်။
 “ကျနော်တို့ဘက်က စစ်အင်အား တိုးတယ်ဆိုတာ လောလောဆယ် မရှိသေးပါဘူး။ တပ်ဘက်က တစုံတရာ ပစ်ခတ်မှု မလုပ်သေးဘူး။ စစ်တိုက်တယ်ဆိုတာ ဘယ်သူမှားတယ် မှန်တယ်ဆိုပြီး နှစ်ဖက်လုံးကို ပြောလို့မရပါဘူး။ ကချင်ဘက်မှာလည်း စစ်အင်အားတိုးတယ်ဆိုတာ မရှိပါဘူး။ ရှမ်းမြောက်ဘက်ကိုလည်း စစ်အင်အား တိုးထားတယ်ဆိုတာ မရှိသေးပါဘူး။ ဒါကို တိတိကျကျ မသိဘဲ ဝေဖန်ချက်အနေနဲ့ ထွက်လာတာ ဖြစ်ပါလိမ့်မယ်။”
အစိုးတပ်များသည် ကချင်ပြည်နယ်တွင် အင်အားတိုးချဲ့မှုများနှင့် ထိုးစစ်ဆင်မှုများ ရှိနေဆဲဖြစ်သော်လည်း KIO ဘက်မှ နိုင်ငံရေးဆွေးနွေးမှုအဆင့်ကိုဆက်လက် ဦးစားပေး ဆွေးနွေးသွားမည်ဖြစ်ကြောင်း KIO ပြောရေးဆိုခွင့်ရှိသူ ဦးလာနန် KNG ကချင်သတင်းဌာနသို့ ပြောခဲ့သည်။
ကချင်ပြည်နယ်ပဋိပက္ခဆက်ဖြစ်ပွားနေချိန် ငြိမ်းချမ်းရေး လိုလားသူအုပ်စုများကလည်း မန္တလေးနှင့် မြင်းခြံမြို့မှ လမ်းလျှောက်ဆန္ဒထုတ်ဖော်ကာ လိုင်ဇာမြို့သို့ ရောက်ရှိနေပြီး ပြည်သူလူထု ၅၀၀ ခန့်က သူတို့ကို ရိုးရာဝတ်စုံများ၊ မောင်းများဖြင့်တီးခတ်၍ ကြိုဆိုခဲ့ကြောင်း ကချင်လွတ်မြောက်ရေးအဖွဲ့ ကြိုဆိုရေးကော်မတီဝင် အမျိုးသမီးအဖွဲ့မှ ဆရာမ ဆိုင်းတောင် (Seng Tawng) ကပြောသည်။
ကိုသန့်ဇင်က “ကချင်ပြည်နယ်ရဲ့ ဒီလိုမျိုးတိုက်ပွဲဖြစ်နေတာကို ကျနော်တို့အနေနဲ့ အရမ်းစိတ်ထိခိုက်တယ်။ ကချင်ဆိုရင်လည်း ကျနော်တို့တိုင်းရင်းသားတွေပဲ။ အဲဒါကြောင့် ကျနော်တို့ ကူညီနိုင်တာက ဒီခြေကိုအရင်းခံပြီး လမ်းလျှောက်တက်လာတာကို နင်တို့ကိုကျနော်တို့ကူညီတာဖြစ်တယ်” ဟု ပြောဆိုခဲ့ကြောင်း ဆရာမကပြောသည်။
ထို့အတူ ပြီးခဲ့သည့်ရက်ပိုင်းတွင်လည်း ရွှေလီဆွေးနွေးပွဲမှ ပြန်လာကြသော KIO ကိုယ်စားလှယ်များကို ကချင်လူထုများက နယ်စပ်တလျှောက် လူထု ၂၀၀၀ ကျော်သည် သီချင်းများဖြင့် ၀မ်းမြောက်စွာ ကြိုဆိုလက်ဆွဲနှုတ်ဆက်ခဲ့ကြသည်။
ယခုချိန် ငြိမ်းချမ်းရေးလိုလားသည့် လူထုများက အစိုးရ ပြည်ထောင်စု ငြိမ်းချမ်းရေးဖော်ဆောင်ရေးလုပ်ငန်းကော်မတီနှင့် KIO အဖွဲ့များ တရုတ်နိုင်ငံ ရွှေလီမြို့ ဖေဖေါ်ဝါရီလ ၁၁ ရက်နေ့ တွေ့ဆုံဆွေးနွေးပွဲအပြီး နှစ်ဖက်ဆွေးနွေးမှုမှရလဒ်များကိုစောင့်ကြည့်နေချိန် ယခုတိုက်ပွဲသည် ပထမဆုံးကြီမ်ဖြစ်ပွားလာသော တိုက်ပွဲဖြစ်သည်။

http://kachinnews.com/burmese/news/1048-%E1%80%A1%E1%80%85%E1%80%AD%E1%80%AF%E1%80%B8%E1%80%9B%E1%82%8F%E1%80%BD%E1%80%84%E1%80%B9%E1%80%B7-kio-%E1%80%B1%E1%80%90%E1%80%BC%E1%82%95%E1%80%86%E1%80%AF%E1%80%B6%E1%80%B1%E1%80%86%E1%80%BC%E1%80%B8%E1%80%B1%E1%82%8F%E1%80%BC%E1%80%B8%E1%80%99%E1%82%88%E1%80%A1%E1%80%BB%E1%80%95%E1%80%AE%E1%80%B8-%E1%80%90%E1%80%AD%E1%80%AF%E1%80%80%E1%80%B9%E1%80%95%E1%80%BC%E1%80%B2%E1%80%85.html

အပြည့်အစုံသို့... »

အစိုးရနှင့် KIO အကြား ငြိမ်းချမ်းရေး ဆွေးနွေးပွဲကို ကုလ အတွင်းရေးမှူးချုပ် ကြိုဆို

ကုလသမဂ္ဂ အတွင်းရေးမှူးချုပ် ဘန်ကီမွန်း က မြန်မာ အစိုးရ၏ ငြိမ်းချမ်းရေး ဖော်ဆောင်ရေး ကော်မတီနှင့် ကချင်လွတ်မြောက်ရေးအဖွဲ့ (KIO) တို့အကြား မတ်လ ၁၁ ရက်နေ့က တရုတ်နိုင်ငံ၊ ရွှေလီမြို့တွင် ကျင်းပခဲ့သည့်
ဆွေးနွေးပွဲအား ကြိုဆိုကြောင်း မတ်လ ၁၄ ရက်နေ့က ကြေညာချက်တရပ် ထုတ်ပြန်လိုက်သည်။

“အစိုးရနှင့် KIO အား အပစ်အခတ် ရပ်စဲရေး သဘောတူညီချက် ရရှိရန်နှင့် လွတ်လပ်ရေး ရရှိပြီးသည့် အချိန်မှစ၍
မြန်မာနိုင်ငံ တဝှမ်းလုံး ပထမဆုံးအကြိမ် ငြိမ်းချမ်းရေးရရှိနိုင်ရန်် အလို့ငှာ မျှတ၍ စစ်မှန်ကာ ကြာရှည်ခံမည့် အဖြေ တခု ထုတ်နိုင်ရေးအတွက် ကြိုးပမ်းမှုများကို ပိုမို အရှိန်အဟုန်မြှင့် ဆောင်ရွက်ကြရန် ကုလသမဂ္ဂ အတွင်းရေးမှူး ချုပ်က အားပေး တိုက်တွန်းလို်က်ပါသည်” ဟု ကြေညာချက်ထဲတွင် ရေးသားထားသည်။

KIO ကိုယ်စားလှယ်များနှင့် အစိုးရ၏ ငြိမ်းချမ်းရေး ဆွေးနွေးရေးအဖွဲ့တို့သည် တနင်္လာနေ့ နံနက်ပိုင်းနှင့် ညပိုင်း သန်းခေါင်ကျော်ချိန်အထိ ဆွေးနွေးခဲ့ကြသော်လည်း အပစ်အခတ်ရပ်စဲရေး သဘောတူညီချက်ကိုမူ လက်မှတ်ရေးထိုးနိုင်ခဲ့ခြင်း မရှိသေးဘဲ ဧပြီလ ၁၀ ရက်နေ့ မတိုင်မီ အတွင်း နှစ်ဖက်ပြန်လည် တွေ့ဆုံ
ဆွေးနွေးရန် သဘောတူခဲ့ကြသည် ဟု ဆွေးနွေးပွဲအပြီး ပူးတွဲ ကြေညာချက်တွင် ဖော်ပြထားသည်။

“အတွင်းရေးမှူးချုပ် အနေဖြင့် ထိုငြိမ်းချမ်းရေးဆွေးနွေးပွဲ ဖြစ်မြောက်ရေးအတွက် နှစ်ဘက်လုံး၏ ကြိုးပမ်း အားထုတ်မှုကို ကြိုဆိုပါသည်” ဟု မစ္စတာ ဘန်ကီမွန်း၏ ကြေညာချက်တွင် ပါရှိသည်။

ကုလသမဂ္ဂမှ ပေးအပ်သည့် အကူအညီများသည် လိုအပ်သူများထံသို့ ဆက်လက် ရောက်ရှိသွားလိမ့်မည်ဟု
မျှော်လင့်ကြောင်းလည်း ဘန်ကီမွန်းက ဆိုသည်။

ဖေဖော်ဝါရီလ ၁၇ ရက်နေ့မှ ၂၁ ရက်နေ့အတွင်းတွင် အမိုးအကာများ၊ စောင်များ၊ ခြင်ထောင်များ၊ ချက်ပြုတ်ရေး ပစ္စည်းများနှင့် အဝတ်များ စသည့် ပစ္စည်များ တင်ဆောင်လာသည့် ၁၀ စီး ပါဝင်သော ကုလသမဂ္ဂ မော်တော် ယာဉ်တန်းသည် ဖားကန့်ဒေသသို့ သွားရောက်ခဲ့ပြီး ဒုက္ခသည် ၂,၀၀၀ ကျော်အတွက် ထိုပစ္စည်းများကို
ပေးအပ်ခဲ့သည်။

ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) ၏ ပြောရေးဆိုခွင့်ရှိသူ တဦး ဖြစ်သည့် Adrian Edwards က မတ်လ ၁ ရက်နေ့က ဆွစ်ဇာလန် နိုင်ငံ၊ ဂျီနီဗာမြို့တွင် သတင်းထောက်များအား
ပြောကြားခဲ့ရာတွင် မြန်မာအစိုးရက ထိုဒေသသို့ ဝင်ရောက်ခွင့် ပြုခဲ့သဖြင့် သွားရောက်ကာ အကူအညီများ
ပေးအပ်နိုင်ခြင်းဖြစ်သည်ဟု ဆိုသည်။

၂၀၁၂ ခုနှစ်၊ ဇန်နဝါရီလ နောက်ပိုင်းတွင် ကုလသမဂ္ဂ အနေဖြင့် အကူအညီများ ပေးအပ်ရန် ဖားကန့်ဒေသသို့ ပထမဆုံး အကြိမ် သွားရောက်နိုင်ခဲ့ခြင်းလည်း ဖြစ်သည်။

၂၀၁၁ ခုနှစ်၊ ဇွန်လတွင် အစိုးရက KIO နှင့် ၁၇ နှစ် ကြာမြင့်ခဲ့သည့် အပစ်အခတ်ရပ်စဲရေး သဘောတူညီချက်ကို ချိုးဖောက်ခဲ့ပြီးနောက် တိုက်ပွဲများ ဖြစ်ပွါးခဲ့ရာ စုစုပေါင်း လူ ၁၀၀,၀၀၀ ခန့် အိမ်ယာများကို စွန့်ခွာ၍ ထွက်ပြေး ခဲ့ကြရသည်။

http://www.mizzimaburmese.com/news/inside-burma/11138--kio-.html

အပြည့်အစုံသို့... »

ငြိမ်းချမ်းရေး ဆွေးနွေးပွဲ အတွေ့အကြုံ KIO ရှင်းလင်း

ငြိမ်းချမ်းရေး ဖော်ဆောင်ရေး လုပ်ငန်းကော်မတီနှင့် KIO အဖွဲ့တို့ မတ် ၁၁၊ ၁၂ ရက်များတွင် တရုတ်နိုင်ငံ ရွှေလီမြို့၌ ဆွေးနွေးခဲ့ကြပြီး၊ ယင်း ဆွေးနွေးပွဲ အတွေ့အကြုံများကို KIO ဗိုလ်ချုပ်ဂွန်မော်နှင့် ကိုယ်စားလှယ်အဖွဲ့က လိုင်ဇာမြို့ရှိ ကချင်ပြည်သူတို့အား ရှင်းလင်းတင်ပြ ခဲ့ကြောင်း သိရသည်။
လိုင်ဇာမြို့တော်ဝန်က အခမ်းအနားမှူးလုပ်ပြီး ကေအိုင်အို ဒုတိယ အထွေထွေအတွင်းရေးမှူး လက်ရှိ ကေအိုင်အိုရဲ့ ပြောရေးဆိုခွင့် ရှိသူ ဦးလနန်၊ ကေအိုင်အို ကိုယ်စားလှယ် အဖွဲ့ခေါင်းဆောင် ဦးဆွမ်လွတ်ဂမ်၊ ဆွေးနွေးပွဲ တက်ရောက်ခဲ့သည့် ဗိုလ်ချုပ်ဂွန်မော်တို့က ပြည်သူတွေကို ပြန်လည်တင်ခြင်း ဖြစ်သည်။
“ဗဟိုကော်မတီမှာ မတင်ပြခင် အခုလို ပြည်သူပြည်သားတွေကို အရင်တင်ပြတာ ဖြစ်ပါတယ်” ဟု ယင်း ဆွေးနွေးပွဲတွင် ဗို်လ်ချုပ်ဂွန်မော်က ပြောသည်။
မတ်လ ၁၂ ရက်နေ့ အစည်းအဝေးပွဲမှ ပြန်ရောက်လာသည့်  ကေအိုင်အို ကိုယ်စားလှယ်များအား ကချင် ပြည်သူများ၊ ကျန်းမာရေးဌာန၊ ပညာရေးဌာန၊ စစ်ဘက် အရပ်ဘက် ဆိုင်ရာ အဖွဲ့များက သိုက်သိုက်ဝန်းဝန်း ကြိုဆိုကြပြီး နေ့လည် ၂ နာရီခန့် အချိန် လိုင်ဇာ အထက်တန်းကျောင်း ကျောင်းခန်းမဆောင်တွင် ပြုလုပ်သည့် စည်းဝေးပွဲ၌ ငြိမ်းချမ်းရေး ဆွေးနွေးပွဲတွင် ထည့်သွင်း ဆွေးနွေးချက်များ၊ သဘောတူညီချက်များ၊ လိုက်လျောပေးရသည့် အချက်များကို တင်ပြသည်။
“မြန်မာအစိုးရနဲ့ တိုက်ပွဲဖြစ်တဲ့ အချိန်ကနေ ခုချိန်ထိ ဆွေးနွေးလာတဲ့အခါမှ ဒီတခေါက်က နည်းနည်းထူးပါတယ်။ ဘာတွေ ထူးတာလဲဆိုတော့ အရင်တုန်းက နောက်နားမှာပဲ ထိုင်တဲ့ Myanmar Peace Centre က ခုတော့ ရှေ့တက်ပြီး အများကြီး နေရာယူလာတာ တွေ့ရပါတယ်။ နောက်ပြီးတော့ အဖွဲ့တွေ အများကြီး ပါတဲ့အတွက် အကြံပေးချက်တွေ အများကြီး ရပါ တယ်” လို့ ဦးဆွမ်လွတ်ဂမ်က ပြောသည်။
“ကျနော်တို့ အနေနဲ့လည်း အလုံးစုံ မဆုံးဖြတ်နိုင်ပါဘူး၊ ခုက နိုင်ငံရေး ဆွေးနွေးမယ် ဆိုရင် စဉ်းစားစရာတွေကို ကျနော်တို့က သယ်လာပြီ၊ စဉ်းစားရမယ့် တာဝန်တွေ ရှိလာပြီ ပြည်သူအားလုံး ၀ုိင်း စဉ်းစား ဆုံးဖြတ်ပြီး ရှေ့ကို လှမ်းကြရအောင်” ဟု ၎င်းက ပြည်သူများအား တိုက်တွန်းသည်။
ဗိုလ်ချုပ်ဂွန်မော်က ဆွေးနွေးပွဲတွင် ပါ၀င်သည့် တရုတ်၏ ကဏ္ဍ၊ လူအများ မေးခွန်းထုတ်နေသည့် အပစ်အခတ်ရပ်စဲရေး အကြောင်းတွေကို အဓိကထားရှင်းပြသည်။
“အစောပိုင်း ဆွေးနွေးပွဲတွေမှာ ကျနော်တို့ဘက်က ပြောတာရှိတယ်။ သက်သေ အနေနဲ့ နိုင်ငံကြီးတွေပါရမယ်။ UN ကို တင်ပြထားတယ်။ အမေရိကန်ပါရမယ်။ အိမ်နီးချင်းဖြစ်တဲ့ တရုတ်ပါရမယ်။ ပြီးတော့ ကျနော်တို့ သမိုင်းကြောင်းကို သိတဲ့ ပြောခွင့်ရှိတဲ့ UK လည်းပါရမယ် ဆိုပြီး ပြောတာရှိတယ်။ ဘယ်သူမှ မတုန့်ပြန်ခင်မှာ တရုတ်က အရင်တုန့်ပြန်တာ ဖြစ်ပါ တယ်။ ခွဲလို့ မရတဲ့ မေ့ထားလို့ မရတဲ့ အိမ်နီးချင်း တရုတ်က သူပါမယ် လို့တောင်မပြောတော့ဘူး မြန်မာဘက်ကိုလည်း ခေါ် ကျနော်တို့ကိုလည်း ခေါ်ပြီး တခါတည်းတွေ့ပေးတာပါ” ဟု ၎င်းက ပြောသည်။
ယခုဆွေးနွေးပွဲသည်  လူမသိ သူမသိ ပြုလုပ်ခဲ့သည့် ဆွေးနွေးပွဲ မဟုတ်ကြောင်း၊ နားထောင်ပေးသူများ၊ သုံးသပ်ပေးသူများ၊ သက်သေ ပုဂ္ဂိုလ်များ ရှိနေပြီဖြစ်ကြောင်း ၎င်းက ဆက်ပြောသည်။
ကချင်-မြန်မာ ငြိမ်းချမ်းရေး ဆွေးနွေးပွဲသို့ တရုတ်သံရုံးမှ သံအမတ်နှင့်ဇနီး၊ ယူနန်ပြည်နယ် နိုင်ငံခြားဆက်ဆံရေးဌာနမှ တာဝန်ရှိ သူများ၊ တရုတ်နိုင်ငံ အာရှရေးရာ အထူးသံတမန် နိုင်ငံခြားရေး ဒုဝန်ကြီး ဟောင်း အသက်် ရ၁ နှစ်အရွယ်ရှိ ၀မ်ယင်းဖန် တို့ တက်ရောက် ခဲ့ကြကြောင်း သိရသည်။
ဆွေးနွေးပွဲတွင် အပစ်အခတ်ရပ်စဲရေး ခိုင်မာဖို့ စောင့်ကြည့်သည့် အခါမှာ နိုင်ငံတကာက ပါရမည် ဟူသည့် စကားရပ်ကို ၀မ်ယင်ဖန်းက လုံးဝမနှစ်သက် သဖြင့် ကြေညာချက်၌  မပါရခြင်းဖြစ်ကြောင်း ဗိုလ်ချုပ်ဂွန်မော်က ရှင်းပြသည်။
“နယ်စပ်တလျောက်ကို အနောက်နိုင်ငံသားတွေ ရောက်လာမှာကိုတော့ တရုတ်က မလိုလားဘူးဆိုတာ ကတော့ တရုတ် အနေနဲ့ စိုးရိမ်တဲ့ သဘောရှိပါတယ်” ဟု ၎င်းက ပြောသည်။
အပစ်ရပ်ကိစ္စနဲ့ ပတ်သက်ပြီး ဗိုလ်ချုပ်ဂွန်မော်က “အပစ်ရပ်တဲ့ အဆင့်ထိသွားမယ်၊ ဒါပေမဲ့ကြားထဲမှာ ကြိုတင် သဘောတူရမယ့် အချက်တွေအများကြီး လုပ်ရဦးမယ် ပထမဆုံး အနေနဲ့ နိုင်ငံရေး ဆွေးနွေးပွဲလုပ်ဖို့ သဘောတူရမယ်၊ စောင့်ကြည့် သက်သေတွေရှိရမယ်၊ နောက်ပြီးတော့ မိမိကိုယ်ကိုခုံခံခြင်းမှ အပ ဆိုတဲ့ စကားလုံးမျိုးတွေ၊ တခြား အသေးစိတ် အချက်အလက်တွေ အများကြီးကို ပြင်ဆင်ပြီးမှ အပစ်ရပ်တဲ့အထိ သွားမယ်လို့ ပြောတာပါ။ အခု သတင်းဌာန တွေက ရေးကြတဲ့ အခါ အမှတ်မမှားအောင် ကြိုတင် ပြောပြတာဖြစ်ပါတယ်” ဟု ပြောသည်။
၎င်းက ဆက်လက်၍  “ကျနော်တို့နဲ့ ဆွေးနွေးတဲ့သူတွေက လက်ရှိစစ်မြေပြင်မှာ ကျနော်တို့နဲ့ တိုက်ခိုက်နေတဲ့သူတွေ ဖြစ်ပါတယ်။ မပခ တိုင်းမှူး၊ ရမခ တိုင်းမှူး၊ သူတို့အပေါ်က ကထစ မှူးပါတယ်၊ နောက် ကာကွယ်ရေးဝန်ကြီးဌာနက ကိုယ်စားလှယ်က ၂၀၀၉  BGF ကိစ္စနဲ့ တော်တော််လေး အကျိတ်အနယ် ဆွေးနွေးဖူးခဲ့သူ ဖြစ်ပါတယ်”ဟု ရှင်းပြသည်။
နောက်ပြီး KIO အနေဖြင့် နှစ် ၅၀ လုံးလုံး စည်းဝေးပွဲ၊ ဆွေးနွေးပွဲအတွေ့အကြုံတွေ ကောင်းကောင်းရှိကြောင်း၊ ငြိမ်းချမ်းရေး ဆွေးနွေးပွဲတွင် ကိုယ်စားလှယ်များ ပြုံးရွှင်စွာဖြင့် ဆွေးနွေးခဲ့ကြောင်း သိရသည်။
ငြိမ်းချမ်းရေး ဆွေးနွေးပွဲများကို ယခုနှစ် ဖေဖော်ဝါရီ ၄ ၊ မတ် ၁၁၊ ၁၂ တို့တွင် တွေ့ဆုံ ဆွေးနွေးခဲ့ပြီး၊ နောက်တကြိမ် ဆွေးနွေးမှုကို ၂၀၁၃ ခုနှစ် ဧပြီ ၁၀ မတိုင်မီ ကျင်းပ သွားမည်ဖြစ်ကြောင်းလည်း သိရသည်။

http://burma.irrawaddy.org/archives/35548

အပြည့်အစုံသို့... »

ပြည်ထောင်စု ငြိမ်းချမ်းရေး ဖော်ဆောင်ရေးလုပ်ငန်း ကော်မတီနှင့် KIO ကိုယ်စားလှယ် အဖွဲ့တို့ တွေ့ဆုံ ဆွေးနွေး

နေပြည်တော် မတ် ၁၂

ပြည်ထောင်စုငြိမ်းချမ်းရေး ဖော်ဆောင်ရေးလုပ်ငန်းကော်မတီနှင့် KIO  ကိုယ်စားလှယ် အဖွဲ့တို့သည် မတ် ၁၁ရက်နှင့် ၁၂ ရက်တို့တွင် တရုတ်ပြည်သူ့သမ္မတနိုင်ငံ ရွှေလီမြို့၌ တွေ့ဆုံ ဆွေးနွေးခဲ့ကြသည်။

တွေ့ဆုံဆွေးနွေးပွဲသို့ ပြည်ထောင်စု ငြိမ်းချမ်းရေး ဖော်ဆောင်ရေးလုပ်ငန်းကော်မတီ ဒုတိယဥက္ကဋ္ဌ ပြည်ထောင်စုဝန်ကြီး ဦးအောင်မင်းဦးဆောင်၍ ဒုတိယဗိုလ်ချုပ်ကြီးမြင့်စိုး အပါအဝင် ကိုယ်စားလှယ်အဖွဲ့၊ KIO  အမြဲတမ်း ဗဟိုကော်မတီဝင် ဦးဆွမ်လွတ်ဂမ် ဦးဆောင်သော KIO  ကိုယ်စားလှယ်အဖွဲ့၊ ညီညွှတ်သော တိုင်းရင်းသားလူမျိုးများ ဖက်ဒရယ်ကောင်စီ (UNFC) မှ ကိုယ်စားလှယ်လေးဦး ၊ SSPP မှ ကိုယ်စားလှယ် နှစ်ဦး၊ RCSS မှ ကိုယ်စားလှယ်နှစ်ဦး၊ NDAA မှ ကိုယ်စားလှယ်နှစ်ဦး၊ ငြိမ်းချမ်းရေး ဆွေးနွေးရေး အကျိုးဆောင်အဖွဲ့ (PCG) မှ ကိုယ်စားလှယ် လေးဦးနှင့် လေ့လာသူများအဖြစ် တရုတ် ပြည်သူ့သမ္မတနိုင်ငံ နိုင်ငံခြားရေးဝန်ကြီးဌာနမှ သံမှူးကြီး Mr.Wang Zongying နှင့် နှစ်ဦးတို့ တက်ရောက်ခဲ့ကြသည်။

တွေ့ဆုံဆွေးနွေးပွဲတွင်  အချက် (၄) ချက်ပါ ပူးတွဲကြေညာချက်တစ်ရပ်ကို နှစ်ဖက် သဘောတူ ထုတ်ပြန်ခဲ့ကြသည်။ အဆိုပါ ပူးတွဲကြေညာချက် အပြည့်အစုံမှာ အောက်ပါ အတိုင်း ဖြစ်ပါသည်-

ပူးတွဲကြေညာချက်

၁။	ပြည်ထောင်စု ငြိမ်းချမ်းရေး ဖော်ဆောင်ရေး လုပ်ငန်းကော်မတီ ဒုတိယဥက္ကဋ္ဌ ပြည်ထောင်စုဝန်ကြီး ဦးအောင်မင်း ဦးဆောင်၍ ဒုတိယဗိုလ်ချုပ်ကြီးမြင့်စိုး အပါအဝင် ကိုယ်စားလှယ်အဖွဲ့နှင့် ကေအိုင်အို အမြဲတမ်း ဗဟိုကော်မတီဝင် ဦးဆွမ်လွတ်ဂမ် ဦးဆောင်သော ကေအိုင်အို ကိုယ်စားလှယ်အဖွဲ့တို့သည် ၂ဝ၁၃ ခုနှစ် မတ်လ(၁၁၊ ၁၂) ရက်နေ့များတွင် တရုတ်ပြည်သူ့သမ္မတနိုင်ငံ ရွှေလီမြို့၌ တွေ့ဆုံဆွေးနွေးခဲ့ကြ ပါသည်။
၂။	တွေ့ဆုံဆွေးနွေးပွဲသို့ ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ (UNFC) မှ ကိုယ်စားလှယ်(၄)ဦး၊ SSPP  မှ ကိုယ်စားလှယ်(၂)ဦး၊ RCSS  မှ ကိုယ်စားလှယ်(၂)ဦး၊ NDAA  မှ ကိုယ်စားလှယ်(၂)ဦး၊ ငြိမ်းချမ်းရေး ဆွေးနွေးရေး အကျိုးဆောင်အဖွဲ့ (PCG ) မှ ကိုယ်စားလှယ်(၄)ဦးနှင့် လေ့လာသူများအဖြစ် တရုတ်ပြည်သူ့သမ္မတနိုင်ငံ နိုင်ငံခြားရေးဝန်ကြီးဌာနမှ သံမှူးကြီး Mr.Wang Zongying နှင့် (၂)ဦးတို့ တက်ရောက်ခဲ့ကြပါသည်။
၃။	နှစ်ဖက်ကိုယ်စားလှယ်အဖွဲ့သည် ပွင့်လင်းရင်းနှီးစွာ ဆွေးနွေးခဲ့ကြပြီး အောက်ဖော်ပြပါ အချက်များကို သဘော တူညီကြ ပါသည်။
	(က)	စစ်မှန်သော နိုင်ငံရေးဆွေးနွေးပွဲများကို စတင်နိုင်ရေးအတွက် အပြန်အလှန် နားလည်မှု၊ လေးစားမှု၊ ယုံကြည်မှုများကို အခြေခံပြီး ခိုင်မာသော အပစ်အခတ် ရပ်ဆိုင်းရေး ရရှိသည်အထိ ဆောင်ရွက်ရန် သဘော တူညီသည်။
	(ခ)	၂၀၁၃ ခုနှစ် ဖေဖော်ဝါရီလ ၄ ရက်နေ့ တွေ့ဆုံပွဲမှ ရလဒ်အဖြစ် တိုက်ပွဲများကို လျှော့ချနိုင်ခဲ့သည်ဖြစ်ရာ ဆက်လက်၍လည်း ပြဿနာ ဖြစ်ပွားနိုင်သော ဒေသများရှိ နှစ်ဖက်တပ်ဖွဲ့များ ဆိုင်ရာကိစ္စများကို ဆက်လက်၍ ညှိနှိုင်း ဆောင်ရွက်သွားမည်။ လိုအပ်သည့် ညွှန်ကြားချက် အမိန့်များကို နှစ်ဖက်တပ်များ သက်ဆိုင်ရာ အောက်ခြေ တပ်ဖွဲ့များ အထိ ရောက်ရှိအောင် ညွှန်ကြားသွားရန် သဘောတူသည်။
	(ဂ)	ပဋိပက္ခ ဖြစ်ပွားသော ရှေ့တန်းစစ်မြေပြင်များကို ကွင်းဆင်းလေ့လာ စောင့်ကြည့်နိုင်ရေးအတွက်နှင့် နှစ်ဘက်ပိုမို နီးကပ်စွာ ညှိနှိုင်း ဆောင်ရွက် နိုင်ရန်အတွက်  ညှိနှိုင်း စောင့်ကြပ်ရေး ရုံးများကို  နှစ်ဖက် ညှိနှိုင်း၍ လိုအပ် သလို ထားရှိ သွားရန် သဘောတူသည်။
	(ဃ)	၂ဝ၁၃ ခုနှစ် ဖေဖော်ဝါရီလ ၄ ရက်နေ့ အစည်းအဝေးတွင် သဘော တူညီခဲ့ကြသည်များနှင့် ၂ဝ၁၃ ခုနှစ် မတ်လ (၁၁၊၁၂) ရက်နေ့ အစည်းအဝေးတွင် သဘောတူညီခဲ့ကြသည်များကို ဆက်လက်၍ အကောင် အထည်ဖော် ဆောင်ရွက်သွားရန် သဘောတူသည်။
	(င)	နောက်တစ်ကြိမ် ဆွေးနွေးမှုကို ၂၀၁၃ ဧပြီလ ၁၀ ရက်နေ့ မတိုင်မီ ကျင်းပ သွားရန် သဘောတူသည်။
၄။	စစ်မှန်သော နိုင်ငံရေးဆွေးနွေးမှုများ တစ်နိုင်ငံလုံး အတိုင်းအတာ ကျင်းပနိုင်ရန် အတွက် လိုအပ်သည်များကို တစ်ဆင့်ပြီးတစ်ဆင့် ဆက်လက် ညှိနှိုင်း ဆောင်ရွက် သွားကြမည် ဖြစ်ပါသည်။

၂ဝ၁၃ ခုနှစ်၊ မတ်လ ၁၂ရက် ရွှေလီမြို့။

ထိုကဲ့သို့ အပစ်အခတ်ရပ်ဆိုင်းရေး လုပ်ငန်းစဉ်များကို စတင်ဆောင်ရွက်နိုင်ပြီ ဖြစ်သဖြင့် နိုင်ငံတော်အစိုးရ အနေဖြင့် ကချင်ပြည်နယ်အတွင်း ဖွံ့ဖြိုးရေးလုပ်ငန်းစဉ်များနှင့် ပြန်လည် ထူထောင်ရေး လုပ်ငန်းစဉ်များကို အရှိန်အဟုန်မြှင့် ဆက်လက်အကောင်အထည်ဖော် ဆောင်ရွက်ပေးသွားမည်ဖြစ်ကြောင်း သတင်းရရှိသည်။

http://www.president-office.gov.mm/issues/peace/id-2813

အပြည့်အစုံသို့... »

KIO နှင့် အစိုးရ အပစ်ရပ်ရေး သဘောမတူနိုင်သေး၊ တလအတွင်း ပြန်ဆွေးနွေးမည်

ချင်းမိုင်(မဇ္စျိမ)။   ။ ကချင်လွတ်လပ်ရေးအဖွဲ့ KIO နှင့် အစိုးရ ငြိမ်းချမ်းရေး ဆွေးနွေးရေးအဖွဲ့တို့ တနင်္လာနေ့ နံနက်ပိုင်းနှင့် ညပိုင်း သန်းခေါင်ကျော်ချိန်ထိ ဆွေးနွေးခဲ့ရာတွင် အပစ်အခတ်ရပ်စဲရေး သဘောတူညီချက်ကိုမူ လက်မှတ်ရေးထိုးနိုင်ခဲ့ခြင်း မရှိသေးဘဲ တလအတွင်း နှစ်ဖက်ပြန်လည် တွေ့ဆုံဆွေးနွေးရန် သဘောတူ ခဲ့ကြသည်။

အစိုးရ၏ ငြိမ်းချမ်းရေးဆွေးနွေးရေး ကိုယ်စားလှယ်အဖွဲ့နှင့် ကချင်လွတ်လပ်ရေးအဖွဲ့ ကိုယ်စားလှယ်များ တရုတ်နိုင်ငံ၊ ရွှေလီမြို့တွင် ၂၀၁၃ ခုနှစ်၊ မတ်လ ၁၁ ရက်နေ့က တွေ့ဆုံဆွေးနွေးနေကြစဉ်။ (ဓာတ်ပုံ - Hla Mg Shwe / Facebook)

တရုတ်နိုင်ငံ၊ ရွှေလီမြို့တွင် မတ်လ ၁၁ ရက်နေ့ နံနက်ပိုင်းက စတင်ခဲ့သည့် ဆွေးနွေးပွဲတွင် အစိုးရဘက်မှ အပစ်အခတ်ရပ်စဲရေး လက်မှတ်ထိုးရန် တင်ပြချက်များကို KIO ကိုယ်စားလှယ်များက ၎င်းတို့ဗဟိုသို့ တင်ပြစောင့် ဆိုင်းနေ၍ ဆွေးနွေးပွဲကို နေ့လည်ပိုင်းတွင် ရပ်နားပြီး ညပိုင်း ၉ နာရီကျော်မှ ဆက်လက်ဆွေးနွေးခဲ့ရာ ဧပြီလ ၁၀ ရက်မတိုင်မီ ပြန်လည် တွေ့ဆုံဆွေးနွေးကြရန် နှစ်ဖက် ပူးတွဲ သဘောတူညီချက်ကို ထုတ်ပြန်ခဲ့ခြင်း ဖြစ်သည်။

“သူတို့လိုချင်တာနဲ့ ကျနော်တို့လိုချင်တာနဲ့ မတူဘူး။ သူတို့ လိုချင်တာက အပစ်အခတ် ရပ်စဲရေး လက်မှတ်ထိုး မယ်ဆိုတာ အဓိကတင်ပြတယ်။ ကျနော်တို့က အတွေ့အကြုံရှိတော ့မထူးသေးဘူး။ လက်မှတ်ထိုးနိုင်လောက်တဲ့ အခြေအနေထိ ဆက်လက် ဆွေးနွေးမယ်၊ ကျနော်တို့က တထိုင်တည်းနဲ့ ဖြေရှင်းလို့မရဘူး။ တဆင့်ပြီး တဆင့် တက်သွားဖို့ပဲ။ နောက်တခါ ထပ်ဆွေးနွေးဖို့ဘဲ သဘောတူတယ်”ဟု KIO မှ အရပ်ဘက်အရာရှိ ဦးဒွဲပီဆားက
ပြောသည်။

ပူးတွဲ ထုတ်ပြန်ချက်တွင် ပဋိပက္ခ ဖြစ်ပွားသော ရှေ့တန်း စစ်ပြေပြင်များကို ကွင်းဆင်းလေ့လာ စောင့်ကြည့်ရန်နှင့်
နှစ်ဖက် ပိုမို နီးကပ်စွာ ညှိနှိုင်းဆောင်ရွက်နိုင်ရန် ညှိနှိုင်း စောင့်ကြပ်ရေး ရုံးများကို နှစ်ဖက် ညှိနှိုင်း၍ လိုအပ်သလို ထားရှိသွားရန် သဘောတူခဲ့သည်။

ထို့ပြင် ပြဿနာ ဖြစ်ပွားနိုင်သော ဒေသများရှိ နှစ်ဖက် တပ်ဖွဲ့များဆိုင်ရာကိစ္စများကို ဆက်လက်၍ ညှိနှိုင်း
ဆောင်ရွက်သွား၍ လိုအပ်သည့် ညွန်ကြားချက် အမိန့်များကို နှစ်ဖက်တပ်များ သက်ဆိုင်ရာ အောက်ခြေ တပ်ဖွဲ့များအထိ ရောက်ရှိအောင် ညွန်ကြားသွားရန် သဘောတူချက်တွင် ပါရှိသည်။

စစ်မှန်သော နိုင်ငံရေး ဆွေးနွေးမှုများ တနိုင်ငံလုံး အတိုင်းအတာ ကျင်းပနိုင်ရန်အတွက် လိုအပ်သည်များကို တဆင့်ပြီး တဆင့် ဆက်လက် ညှိနှိုင်းဆောင်ရွက်သွားကြမည်ဟု ယမန်နေ့ ထုတ်ပြန်ချက်တွင် ဖော်ပြထားသည်။

ပြည်ထောင်စု ငြိမ်းချမ်းရေးဖော်ဆောင်ရေး လုပ်ငန်း ကော်မတီ ဒုဥက္ကဋ္ဌ ဝန်ကြီး ဦးအောင်မင်း ဦးဆောင်၍ ဒုဗိုလ်ချုပ်ကြီး မြင့်စိုးတို့ အပါအဝင် အစိုးရဘက်မှ ကိုယ်စားလှယ်အဖွဲ့နှင့် KIO ဘက်မှ ဗဟိုကော်မတီဝင် ဦးဆွမ်လွတ်ဂမ် ဦးဆောင်၍ ဒု-စစ်ဦးစီးချုပ် ဗိုလ်မှူးချုပ် ဂွမ်မော်တို့ အပါအဝင် ကိုယ်စားလှယ်များ တက်ရောက်ခဲ့ကြသည်။

ငြိမ်းချမ်းရေးအကျိုးဆောင် PCG မှ ကိုယ်စားလှယ် ၄ ဦး တက်ရောက်ခဲ့သည်။

တရုတ်နိုင်ငံ နိုင်ငံခြားရေး ဝန်ကြီးဌာမှ သံမှူးကြီး Mr Wang Zongying နှင့် နှစ်ဦး၊ ညီညွတ်သော တိုင်းရင်းသား လူမျိုးများ ဖက်ဒရယ် ကောင်စီ UNFC မှ လေးဦး၊ SSPP မှ နှစ်ဦး၊ RCSS မှ နှစ်ဦး၊ NDAA မှ နှစ်ဦးတို့လည်း
ဆွေးနွေးပွဲတွင် ပါဝင်သဖြင့် အောင်မြင်မှု တခုအနေဖြင့် ရှုမြင်ကြောင်း ဦးဒွဲပီဆား က ပြောသည်။

၂၀၁၂ ခုနှစ်၊ မေလက ဝန်ကြီး ဦးအောင်မင်း ဦးဆောင်သောအဖွဲနှင့် KIO တို့ တွေ့ဆုံ ဆွေးနွေးမှုမှာ ယမန်နေ့ထိ ၅ ကြိမ်မြောက် ဆွေးနွေးမှုတွင် နှစ်ဖက်လုံး ပွင့်ပွင့်လင်းလင်း၊ ရင်းရင်းနှီးနှီး ဆွေးနွေးသည်ကို တွေ့မြင်ရသဖြင့် အားရကျေနပ်ကြောင်း ငြိမ်းချမ်းရေးအကျိုးဆောင် ဦးလှမောင်ရွှေ က မဇ္စျိမကို ပြောသည်။

“ဒီတကြိမ်ကတော့ ပူးတွဲကြေညာချက်လို့ ပြောပေမယ့် သေချာဖတ်ကြည့်ရင်တော့ သဘောတူချက်ပါပဲ။
ပြည်သူတွေ အားလုံးအတွက် အစည်းအဝေး မှတ်တမ်းအနေနဲ့ ထုတ်ပြန်ချက်ကို လက်မှတ်ထိုးကြတယ်။ နှစ်ဖက်
ခေါင်းဆောင်တွေ၊ တပ်ဖက်ဆိုင်ရာ အရာရှိတွေ ပါတယ်။ UNFC တွေလည်း သက်သေအနေနဲ့ လက်မှတ် ထိုးတယ်။ ဒါဟာ သဘောတူညီချက်ပဲ။ ၁၀ လတာ ကာလအတွင်းမှာ ပထမဦးဆုံး လက်မှတ်ရေးထိုးနိုင်တယ် ပိုပြီးခိုင်မာတဲ့ အချက်လို့ ပြောလို့ရတယ်။ ၁၀ လအတွင်း အအောင်မြင်ဆုံးလို့ ပြောရမယ်” ဟု သုံးသပ်
ပြောကြားသည်။

http://www.mizzimaburmese.com/news/inside-burma/11108-kio------.html

အပြည့်အစုံသို့... »

ကေအိုင်အိုနဲ့ အစိုးရ ပူးတွဲ ကြေညာချက် ထုတ်ပြန်

 

ကချင် လွတ်မြောက်ရေး အဖွဲ့ (ကေအိုင်အို) နဲ့ အစိုးရ ငြိမ်းချမ်းရေး ဖေါ် ဆောင်ရေး လုပ်ငန်း အဖွဲ့ တို့ ငြိမ်းချမ်းရေး အတွက် ဆက်လက် လုပ်ဆောင်ဖို့ အင်္ဂါနေ့ မှာ ပူးတွဲ ကြေညာချက် တစ်စောင် ထုတ်ပြန်ခဲ့ ပါတယ်။

ကြေညာချက် ထဲမှာ စစ်မှန်တဲ့ နိုင်ငံရေး ဆွေးနွေး ပွဲတွေ ဖြစ်ဖို့၊ ခိုင်မာတဲ့ အပစ်ခတ် ရပ်စဲရေး အတွက် ဆက်လက် ဆောင်ရွက်ဖို့နဲ့ တိုက်ပွဲတွေ မဖြစ်တော့အောင် နှစ်ဖက် စလုံးက အောက်ခြေ အဆင့် အထိ ညွှန်ကြားချက်တွေ အမိန့်တွေ ထုတ်ပြန် သွားဖို့ ကို သဘောတူ ခဲ့ပါတယ်။
တိုက်ပွဲ ဖြစ်နိုင်တဲ့ ရှေ့တန်း စစ်မြေပြင် များကို ကွင်းဆင်း လေ့လာ စောင့်ကြည့် နိုင်ရေးနဲ့ ညှိနှိုင်း ဆောင်ရွက် နိုင်ရေး အတွက် စောင့်ကြည့်ရေး ရုံးတွေ ထားဖို့ ကိုလည်း သဘောတူခဲ့ ပါတယ်။ နောက် တကြိမ် ဆွေးနွေးပွဲကို လာမယ့် ဧပြီလ ၁ဝ ရက်နေ့ မတိုင်မီ ကျင်းပမယ် လို့လည်း ပူးတွဲ ကြေညာခဲ့ ပါတယ်။
ငြိမ်းချမ်းရေး အတွက် နှစ်ဘက် ဆွေးနွေးမှု တွေကို တရုတ် နိုင်ငံ ရွှေလီမြို့မှာ တနင်္လာနေ့က ပြုလုပ်ခဲ့ ပြီးနောက် အခုလို ကြေညာချက် ထုတ်ပြန် လိုက်တာ လည်း ဖြစ်ပါတယ်။
အခု ပူးတွဲ ကြေညာချက် အပေါ် ပြည်သူ့ လွှတ်တော် တိုင်းရင်းသား ရေးရာနဲ့ ပြည်တွင်း ငြိမ်းချမ်းရေး ဖေါ်ဆောင်မှု ကော်မတီ အတွင်းရေးမှူး ဒေါ်ဒွဲဘူက ကြိုဆို လိုက် ပါတယ်။

http://www.bbc.co.uk/burmese/burma/2013/03/130312_kio_gov_joint_statement.shtml

အပြည့်အစုံသို့... »

ရွှေလီမြို့က KIO နဲ့ အစိုးရ တွေ့ဆုံပွဲ

အပြည့်အစုံသို့... »