ဝန်ကြီး ဦးအောင်မင်း ဝီလျံဟိဂ် နဲ့တွေ့

 

ဝန်ကြီး ဦးအောင်မင်း ခေါင်းဆောင် တဲ့ ပြည်ထောင်စု ငြိမ်းချမ်းရေး ဖော်ဆောင်ရေး အဖွဲ့ဝင်တွေ ဧပြီလ ၁၆ ရက်က ဗြိတိသျှ နိုင်ငံခြားရေး ဝန်ကြီး ဝီလျံဟိဂ် နဲ့ လန်ဒန်က နိုင်ငံခြားရေးရုံး မှာ တွေ့ဆုံ ဆွေးနွေး ခဲ့ပါတယ်။

ဝန်ကြီး ဦးအောင်မင်း နဲ့ အဖွဲ့ ဗြိတိသျှ အစိုးရ ဖိတ်ကြားချက် အရ လန်ဒန်မြို့ ကို ရောက်လာတာ ဖြစ်ပြီး မြန်မာနိုင်ငံတွင်း နိုင်ငံရေး နဲ့ စီးပွားရေး တိုးတက် ပြောင်းလဲမှု တွေ ကို လာရောက်ရှင်းပြတဲ့ အကြောင်း၊ အခု ဧပြီလကုန် မှာ ဥရောပ သမဂ္ဂ ပိတ်ဆို့မှု အချို့ ဆိုင်းငံ့ထားတဲ့ အပေါ် ပြန်လည် သုံးသပ်မယ့် အချိန်ရောက် မှာမို့ ပိတ်ဆို့မှု တွေ ရှိသရွေ့ ကြိုးချည်ပြီး ပြေးရသလို ဖြစ်နေတယ်လို့ ဦးအောင်မင်းက ပြောပါတယ်။

ကချင် အရေး ဗြိတိသျှ အစိုးရ နဲ့ ဆွေးနွေးရာ မှာတော့ မကြာခင် ရက်ပိုင်း အတွင်း မြန်မာနိုင်ငံ ကို ပြန်လည် ရောက်ရှိတဲ့ အခါမှာ မြစ်ကြီးနားမှာ တွေ့ဆုံမယ့် အကြောင်း၊ အခု ဆိုရင် ကချင် ပြည်နယ် မှာ သေနတ်သံ ပင် မကြားရလို့ ဆွေးနွေးပွဲ အောင်မြင်မယ် လို့ ယုံကြည်ပုံ၊ ဥရောပ သမဂ္ဂ၊ ကုလသမဂ္ဂ၊ အမေရိကန် တို့ အနေ နဲ့ လေ့လာ စောင့်ကြည့်သူ အဖြစ် တက်ရောက်နိုင်ပေမယ့် ပါဝင် ဆွေးနွေးခွင့် မရှိပုံ တွေကို ဝန်ကြီး ဦးအောင်မင်း က ဘီဘီစီကို ရှင်းပြပါတယ်။
ကချင် လူမှုရေး အဖွဲ့က ပြောသလို အနောက်အုပ်စု ပါရင် တရုတ် က ကန့်ကွက် နိုင်သလား ဆိုတာ ကိုတော့ ပြည်တွင်း တိုင်းရင်းသား အရေး ဖြစ်လို့ အခြား နိုင်ငံတွေ ဆုံးဖြတ်ပိုင်ခွင့် မရှိဘူးလို့ ပြော ပါတယ်။
ဝ တိုင်းရင်းသားတွေ ဖက် က ခွဲထွက်ရေး အသံ ကြားရတဲ့ အပေါ်မှာ တော့ တိုင်းရင်းသား အဖွဲ့တိုင်း နဲ့ ဆွေးနွေးတဲ့ အခါမှာ အခြေခံ အချက် ကို ဆွေးနွေးပုံ၊ မြန်မာနိုင်ငံ က ခွဲမထွက်ရေး မှာ ဖွဲ့စည်းပုံ အခြေခံ ဥပဒေ နဲ့ သက်ဆိုင်နေတဲ့ အတွက် မကြိုက်တဲ့ အပိုင်း ပြင်ဆင်ရေး ကို လွှတ်တော် မှာ ကော်မရှင် ဖွဲ့ပြီး ဖြစ်လို့ လူက ရေးတဲ့ ဥပဒေ ကို လူက မကြိုက်ရင် ပြင်နိုင်ပုံတွေ ဝန်ကြီး ဦးအောင်မင်းက ဘီဘီစီ ကို ရှင်းပြပါတယ်။
ကနေ့ ငြိမ်းချမ်းရေး ဖော်ဆောင်ရေး အဖွဲ့ အိုင်ယာလန် ကို ရောက်နေပြီး ငြိမ်းချမ်းရေး ဖြစ်စဉ် တွေ လေ့လာရေး လို့ ဆိုပါတယ်။

 ဆက်စပ်သတင်းနဲ့ အစီအစဉ်များ

• မြန်မာ ငြိမ်းချမ်းရေး အဖွဲ့၀င်တွေ လန်ဒန်ရောက်
• ကချင်အရေး တရုတ်ကန့်ကွက်မှု မရှိကြောင်း ငြင်းဆို

http://www.bbc.co.uk/burmese/burma/2013/04/130416_uaungmin_fco.shtml

အပြည့်အစုံသို့... »

KIO နဲ့ အပစ်ရပ်နိုင်ဖို့ မြန်မာအာဏာပိုင်တွေ မျှော်လင့်

ကချင်ပြည်နယ် လိုင်ဇာ ကေအိုင်အေ စစ်သားတွေကို ရှေ့တန်းစစ်စခန်းတွင် တွေ့ရစဉ်။ (ဇန်နဝါရီ ၃၁၊ ၂၀၁၃)

ကိုသားညွှန့်ဦး, ဒေါ်ခင်စိုးဝင်း

10.03.2013 

KIO ကချင်လွတ်မြောက်ရေးအဖွဲ့နဲ့ မြန်မာအစိုးရအကြား တရုတ်နိုင်ငံ ရွှေလီမှာပြုလုပ်မယ့် ဒီကနေ့ ဆွေးနွေးပွဲဟာ ဒေသငြိမ်းချမ်းရေးအတွက် ဖြစ်မလာရင်တောင် နှစ်ဘက် အပစ်အခတ်ရပ်စဲရေးအဆင့်အထိ ဖြစ်လာဖို့ မြန်မာအာဏာပို်င်တွေက မျှော်လင့်ထားပါတယ်။ မနေ့ကတော့ KIO နဲ့ မြန်မာအစိုးရ ကိုယ်စားလှယ်အဖွဲ့ဟာ တရုတ်နိုင်ငံ ရွှေလီမြို့မှာ ကနဦး အလွတ်သဘော တွေ့ဆုံဆွေးနွေးမှုတွေ ရှိခဲ့တယ်လို့ သိရပါတယ်။ အဲဒီဆွေးနွေးပွဲကို ကိုယ်တိုင်သတင်းသွားရောက်ယူနေတဲ့ ဗွီအိုအေက ဒေါ်ခင်စိုးဝင်းကို ကိုသားညွန့်ဦးက ဆက်သွယ်မေးမြန်းထားပါတယ်။

ဒေါ်ခင်စိုးဝင်းခင်ဗျ၊ KIO နဲ့ မြန်မာအာဏာပိုင်တွေ အခု ရွှေလီမြို့မှာ တွေ့ကြတယ်။ တွေ့ကြတဲ့ အခါမှာ မနေ့ကတော့ အလွတ်သဘော တွေ့ဆုံတယ်လို့သိရပါတယ်ခင်ဗျ။ ဘာတွေများ ထူးထူးခြားခြား တွေ့ရပါလဲခင်ဗျ၊ ဒီတွေ့ဆုံပွဲမှာ။

“သူတို့ ဒီလိုမျိုးတွေ့တဲ့အခါမှာ မြန်မာဘက်ကလည်း ပြည်ထောင်စုအဆင့် ငြိမ်းချမ်းရေး ဖော်ဆောင်ရေးအဖွဲ့ကိုတော့ ၀န်ကြီး ဦးအောင်မင်းရယ်၊ မွေးမြူရေးဝန်ကြီး ဦးအုန်းမြင့်၊ ကချင်ပြည်နယ်ဝန်ကြီးချုပ်တို့က ဦးဆောင်ပါတယ်။ အဲဒီအထဲမှာ ထူးခြားတဲ့အချက်ကတော့ လက်တွေ့နယ်ပယ်မှာ တိုက်ပွဲတွေဖြစ်နေတယ်ဆိုတဲ့ နေရာတွေမှာ ကိုယ်တိုင် တာဝန်ရှိတဲ့သူတွေ ပါလာတာ တွေ့ရပါတယ်။ ကာကွယ်ရေးဝန်ကြီးဌာနက ဒုတိယဗိုလ်ချုပ်ကြီး မြင့်စိုး ပါလာတာတွေ့ရပါတယ်။ အရှေ့မြောက်တိုင်းက တိုင်းမှူး ဗိုလ်မှူးချုပ် အောင်စိုး၊ မြောက်ပိုင်းတိုင်း တိုင်းမှူး ဗိုလ်မှူးချုပ် ထွန်းထွန်းနောင်၊ ကချင်ပြည်နယ် လုံခြုံရေးနဲ့ နယ်စပ်ရေးရာဝန်ကြီး ဦးသန်းအောင်၊ ကာကွယ်ရေးဝန်ကြီးဌာန စစ်ဦးစီးမှူး ဗိုလ်မှူးကြီး ကျော်စိုးဝင်း စတဲ့ စစ်ဘက်အကြီးအကဲတွေ ပါလာတာ တွေ့ရပါတယ်။ အဲဒီလိုပဲ KIO ကိုယ်စားလှယ်ဘက်ကလည်း ဆရာကြီး ဦးစွန်လွတ်ဂံ က ဦးဆောင်တယ်လို့ဆိုပေမဲ့ အတူတွဲပြီးပါလာတဲ့ စစ်ဘက်ဆိုင်ရာပုဂ္ဂိုလ်တွေကတော့ ဗိုလ်ချုပ်ဂွမ်မော်၊ ဗိုလ်မှူးကြီး ဇော်ရော်၊ ဗိုလ်မှူးကြီး လထိုင်န၊ ဗိုလ်မှူးကြီး ခွန်နောင် ပါလာတာတွေ့ရပါတယ်။ အဲဒီတော့ ဒီတခေါက်ကတော့ ထူးခြားတယ်လို့ ပြောလို့ရတာက စစ်ဘက်ဆိုင်ရာ ကိုယ်စားလှယ်တွေ ကိုယ်တိုင် တက်တက်ကြွကြွ ပါ၀င်လာတာတွေ့ရပါတယ်။”

အခုက ပြီးခဲ့တဲ့ ဖေဖော်ဝါရီလ ၄ ရက်တုန်းကလည်း တကြိမ် ရွှေလီမှာ တွေ့ခဲ့ကြပြီးတော့ အခု ထပ်တွေ့ကြတယ်ဆိုတော့ ပြီးခဲ့တဲ့ ဖေဖော်ဝါရီ ၄ ရက်တုန်းက ဆွေးနွေးခဲ့တာတွေနဲ့ပတ်သက်လို့ ထူးထူးခြားခြားတွေ ဖြစ်မလာတဲ့အပေါ်မှာ အားမလိုအားမရသံတွေလည်း ကျနော်တို့ ကြားရပါတယ်ခင်ဗျ။ အခုဆွေးနွေးပွဲ ရလဒ် အလားအလာနဲ့ပတ်သက်လို့ရော ဒေါ်ခင်စိုးဝင်း ဘယ်လိုများ သုံးသပ်မိပါလဲ။

“မနေ့ကတုန်းက ကျမ ၀န်ကြီး ဦးအုန်းမြင့်နဲ့ တွေ့ဆုံမေးမြန်းခွင့်ရပါတယ်။ ၀န်ကြီးဦးအုန်းမြင့်ကတော့ ဒီနေ့ဆွေးနွေးပွဲကနေ ငြိမ်းချမ်းရေးလုံးဝရဖို့တော့ မပြောပေမဲ့ အပစ်အခတ် ရပ်စဲရေးအတွက် သဘောတူညီမှုရလိမ့်မယ်လို့ အပစ်အခတ် ရပ်စဲရေးအတွက် သဘောတူညီမှုရလိမ့်မယ်လို့ သူ မျှော်လင့်တယ်လို့ ပြောပါတယ်။ ငြိမ်းချမ်းရေး အကျိုးဆောင်အဖွဲ့ဘက်က ပြောတာကတော့ အမေးရှိပြီး အဖြေမရှိ ဖြစ်မှာစိုးတယ်လို့ စိုးရိမ်နေတာလည်း ရှိပါတယ်။ နောက် UNFC ကပြောတာက ကျတော့လည်း KNU လို အရင်တုန်းက အထီးကျန်လို ပစ်ထားခဲ့ပြီးတော့ အခု KIO အထီးကျန်ဖြစ်တာကို သူတို့မလိုလားဘူး။ အဲဒီတော့ မြန်မာအစိုးရဘက်ကနေပြီးတော့ စေတနာမှန်မှန် သဘောထားကြီးကြီးနဲ့ ဆောင်ရွက်ပါဆိုပြီး တိုက်တွန်းချင်တယ်လို့ မနေ့ကတော့ UNFC ကိုယ်စားလှယ်တွေက ပြောပါတယ်။”

UNFC ကိုယ်စားလှယ်တွေ တက်တယ်ဆိုတော့ UNFC က ဘယ် တိုင်းရင်းသား ကိုယ်စားလှယ်တွေ တက်ကြသလဲခင်ဗျ။

“အဲဒီ UNFC ကိုယ်စားလှယ်တွေ တက်တယ်ဆိုတဲ့အခြေအနေက ပြီးခဲ့တဲ့ ဖေဖော်ဝါရီလ တုန်းက တွေ့ခဲ့တဲ့ ပူးတွဲကြေညာချက်ထဲမှာ ပါတဲ့ အချက်တချက်ပေါ့နော်။ အဲဒါကို အကောင်အထည်ဖော်တဲ့သဘောပါ။ ပြီးခဲ့တဲ့ကြေညာချက်ထဲမှာက နှစ်ဘက် ဆက်သွယ်ရေးလမ်းကြောင်း ထားရှိဖို့ရယ်၊ နှစ်ဘက်စစ်ရေးတင်းမာမှုတွေ လျှော့ချနိုင် ဖို့ရယ်၊ နောက်တကြိမ် အစည်းအဝေး ဆွေးနွေးပွဲမှာ လေ့လာသူတွေအဖြစ်နဲ့ သက်သေအဖြစ် ပါ၀င်နိုင်မယ့်သူတွေကို အဖွဲ့အစည်းတွေကို ဖိတ်ခေါ်ဖို့ သူတို့ ဆွေးနွေးခဲ့ကြတယ်ပေါ့နော်။ ဒါကို သဘောတူခဲ့လို့မိုလို့ ဒီတခေါက်မှာ KIO ကနေပြီးတော့ UNFC အပါအဝင် တိုင်းရင်းသားလက်နက်ကိုင် အဖွဲ့အစည်းတွေကိုပါ ဖိတ်တာပါ။ အဲဒီမှာ UWSA ပေါ့နော်၊ ၀အဖွဲ့ကို ဖိတ်ထားပေမဲ့ ၀အဖွဲ့ကလာတာ မနေ့က မတွေ့ရပါဘူး။”

အဲဒါက သူတို့ဘာကြောင့်မလာနိုင်လဲလို့ သိရပါလဲ။

“ဒီမှာကတော့ ကောလာဟလတွေလည်း တော်တော်လေး ပျံ့နေပါတယ်။ ၀အဖွဲ့မလာရတာက မြန်မာအစိုးရက လက်မခံလို့ တရုတ်အိမ်ရှင်ဘက်ကလည်း ၀ကို မလာနဲ့တော့ဆိုပြီး ပြောတယ်ဆိုတဲ့ ကောလာဟလတွေ ရှိပါတယ်။ ကျမလည်း သေချာအောင်ဆိုပြီးတော့ အတည်ပြုချက် ရယူချင်တာနဲ့ မနေ့က UWSA က ပြောရေးဆိုခွင့်ရှိတဲ့ ဦးအောင်မြင့်ကို ကျမ တယ်လီဖုန်းဆက်ပြီး မေးလိုက်ပါတယ်။ ဦးအောင်မြင့်ကတော့ ငြင်းလည်းမငြင်းဘူး။ ဒါပေမဲ့ သူက အချက်နှစ်ချက်ကြောင့် မလာတာပါလို့ ကျမကို ရှင်းပြပါတယ်။ တချက်ကတော့ မပြေလည်မှုလေး တခု ရှိလို့ပါတဲ့။ နောက်တချက်ကတော့ စနေ၊ တနင်္ဂနွေနဲ့ ကြံုသွားတဲ့အတွက်ကြောင့်မိုလို့ သူတို့ တရားဝင်လာခွင့် စာရွက်စာတမ်းတွေလုပ်ဖို့ အခက်အခဲရှိလို့ ဖြစ်တယ်လို့ ဦးအောင်မြင့်ကတော့ ကျမကို ရှင်းပြပါတယ်။”

အခု ဆွေးနွေးပွဲ နောက်ပိုင်း KIO နဲ့ မြန်မာအာဏာပိုင်တွေ ဆွေးနွေးပွဲမှာ အဓိက တရုတ်နိုင်ငံဘက်က တရုတ်အာဏာပိုင်တွေက ကမကထလုပ်ပေးတယ်လို့ ကြားရပါတယ်။ အခု ဆွေးနွေးပွဲမှာရော တရုတ်နိုင်ငံရဲ့ အခန်းကဏ္ဍက ဘယ်လိုရှိပါလဲ။

“တရုတ်ဘက်ကနေပြီးတော့ ဟိုတလောကပဲ မြန်မာနိုင်ငံဆိုင်ရာ အထူးကိုယ်စားလှယ် ဆိုပြီးတော့ မစ္စတာ ဝေါင်း ဆိုတဲ့ ၀ါရင့်သံတမန်တယောက်ကို ခန့်လိုက်ပါတယ်။ အဲဒီ မစ္စတာ ဝေါင်း က ဒီနေ့ကျင်းပမယ့်ဆွေးနွေးပွဲကို သူကိုယ်တိုင်လာပြီးတော့ တက်မှာပါ။ မစ္စတာ ဝေါင်းက အရင်တုန်းက တရုတ်နိုင်ငံရဲ့ ဒုတိယနိုင်ငံခြားရေးဝန်ကြီးဟောင်း လည်း ဖြစ်ပါ တယ်။ နောက်ပြီးတော့ အာဆီယံအရေးနဲ့ ပတ်သက်ပြီးတော့လည်း တော်တော်လေးကို အတွေ့အကြံုရင့်ကျက်တဲ့ ပုဂ္ဂိုလ်တဦး ဖြစ်ပါတယ်။ အဲဒါကြောင့်မို့ သူ့ကို ရွေးပြီးတော့ မြန်မာ့ရေးမှာ ကြားဝင် ဖြန်ဖြေပေးတဲ့သဘောလို့လည်း သိရပါတယ်။”

KIO နဲ့ မြန်မာအစိုးရအကြား ဆွေးနွေးပွဲပြုလုပ်တဲ ရွှေလီကို သတင်းသွားရောက် ယူနေတဲ့ ဒေါ်ခင်စိုးဝင်းကို ကိုသားညွန့်ဦး ဒီမနက်ပဲ ဆက်သွယ်မေးမြန်းထားတာပါ။ အခု ဒီကနေ့ မနက်ပိုင်းမှာတော့ KIO နဲ့ မြန်မာအစိုးရအကြား တရားဝင်ဆွေးနွေးပွဲတွေ စတင်မှာဖြစ်ပါတယ်။ 

 

http://burmese.voanews.com/content/kio-peace-talk-03-10-13/1619000.html

အပြည့်အစုံသို့... »

ငြိမ်းချမ်းရေးအတွက် အစိုးရက မဆုတ်မနစ် ဆောင်ရွက်နေသည်ဟု သမ္မတ ဦးသိန်းစိန် ဘရပ်ဆဲလ်တွင် ပြောကြား

“ဒီမိုကရေစီရေး ပြုပြင်ပြောင်းလဲမှုနှင့် ကြာရှည်ခံသည့် ငြိမ်းချမ်းရေး ရရှိရန် အတွက် မြန်မာနိုင်ငံအနေဖြင့် မဆုတ်မနစ် အလုပ်လုပ်နေသည်” ဟု မြန်မာ သမ္မတ ဦးသိန်းစိန်က ဥရောပ ပါလီမန် နိုင်ငံခြားရေးရာ ဥက္ကဌအား ဘယ်လ်ဂျီယံ နိုင်ငံ ဘရပ်ဆဲလ်မြို့ရှိ ဥရောပ ပါလီမန်တွင် ဖေဖော်ဝါရီလ ၅ ရက်နေ့ ညနေက
ပြောကြားခဲ့သည်။

“ကျနော်တို့ဟာ ဒီလို ကြိုးပမ်း အားထုတ်မှုတွေကို ကျယ်ကျယ်ပြန့်ပြန့် ဖော်ဆောင်နေတဲ့ ဖွံ့ဖြိုးတိုးတက်ရေး၊ အလုပ်အကိုင်သစ်တွေ ဖန်တီးပေးရေး၊ ဝင်ငွေများ မြင့်မားလာစေရေး စတာတွေနဲ့ ချိတ်ဆက်လုပ်ကိုင် ရပါမယ်။ EU (ဥရောပ သမ္မဂ္ဂ) ကိုလည်း မြန်မာနိုင်ငံအပေါ်မှာ ချမှတ်ထားတဲ့ ပိတ်ဆို့ အရေးယူမှုအားလုံးကို အပြီးတိုင် ရုပ်သိမ်းပေးဖို့ မေတ္တာရပ်ခံခဲ့သလို တခြားနိုင်ငံတွေရဲ့ ပိတ်ဆို့ အရေးယူမှှုတွေကို ဖယ်ရှားနိုင်ရေး အတွက်လည်း တက်ကြွစွာ ပါဝင်ကူညီဖို့ တောင်းဆိုခဲ့ပါတယ်”ဟု သမ္မတ ဦးသိန်းစိန်က ဥရောပ ပါလီမန် အဖွဲ့ဝင်များကို ပြောခဲ့သည်။

မြန်မာ သမ္မတ ဦးသိန်းစိန်က သူ၏ အစိုးရ အဖွဲ့သည် ဒီမိုကရေစီရေး ပြုပြင်ပြောင်းလဲမှုများ လုပ်ဆောင်
နေသည်ဟု ချီးကျူးခဲ့ကာ၊ ထိုကဲ့သို့ ပြုပြင်ပြောင်းလဲမှုများကြောင့် မြန်မာနိုင်ငံတွင် အလုပ်သမား သမ္မဂ္ဂများ လည်း ဖွဲ့စည်းခွင့်ရလာခဲ့ပြီး၊ အဓမ္မ လုပ်အားပေးခိုင်းစေမှှုကိုလည်း တိုက်ဖျက်နေသည်ဟု ဆိုခဲ့သည်။

“ကျနော့် အနေနဲ့ ဥရောပ သမ္မဂ္ဂ ခေါင်းဆောင်တွေကို လေးလေးနက်နက် တောင်းဆိုချင်တာကတော့
မြန်မာနိုင်ငံအတွက် ကုန်သွယ်ရေး ဦးစားပေးမှှုတွေကို ပြန်လည်အတည်ပြုပေးဖို့ ဥရောပ သမ္မဂ္ဂ ကော်မရှင်ရဲ့ အဆိုပြုချက်ကို ဥရောပ သမ္မဂ္ဂ ခေါင်းဆောင်တွေ သဘောတူ လက်ခံပေးဖို့ တောင်းဆိုချင်ပါတယ်” ဟု သမ္မတ ဦးသိန်းစိန်က ဆိုသည်။

“အကောက်ခွန်တွေနဲ့ အကန့်အသတ်တွေကို ဖယ်ရှားပေးခြင်းနဲ့ Generalized System of Preferences (GSP) ကို ပြန်လည် အတည်ပြုပေးခြင်းအားဖြင့် မြန်မာ့ပို့ကုန်တွေဟာ ဥရောပစျေးကွက်မှာ ယှဉ်ပြိုင်နိုင်စွမ်း တိုးမြင့်လာမှာ ဖြစ်ကာ ပို့ကုန်အထူးပြု စီးပွါးရေးနဲ့ စက်မှုဖွံ့ဖြိုးရေး မဟာဗျူဟာတွေကို အထောက်အကူ
ဖြစ်စေမှာပါ။ ဥရောပသမ္မဂ္ဂ စျေးကွက်ထဲမှာ ကုန်သွယ်ရေး ဦးစားပေးခံရမှု ရရှိမယ််ဆိုရင် မြန်မာနိုင်ငံ အတွင်းမှာ အလုပ်အကိုင်တွေ ပိုမို ဖန်တီးပေးနိုင်မှာ ဖြစ်ပြီး၊ ထုတ်လုပ်မှှုတွေလည်း မြင့်တက်လာမှာ
ဖြစ်တဲ့အပြင် ပို့ကုန်ကနေ ရရှိမယ့် ဝင်ငွေလည်း တိုးတက်မြင့်မားလာဖွယ် ရှိပါတယ်” ဟု သမ္မတ ဦးသိန်းစိန်က ပြောခဲ့သည်။

မြန်မာနိုင်ငံအတွင်း နိုင်ငံတကာ ရင်းနှီးမြှုပ်နှံမှု ကဏ္ဍနှင့် ပတ်သတ်၍လည်း မြန်မာနိုင်ငံအနေဖြင့် နိုင်ငံခြား တိုက်ရိုက် ရင်းနှီးမြှုပ်နှံမှု ဥပဒေသစ်ကို အကောင်အထည်ဖော် ဆောင်ရွက်နေကြောင်း သမ္မတက ပြောကြားခဲ့ ကာ ထိုဥပဒေသစ်တွင် ပိုမို ပွင့်လင်းမြင်သာကာ တာဝန်ယူမှု ရှိသော၊ သဘာဝ ကျသော၊ ကြိုတင်၍ တွက်ဆနိုင်သော လုပ်ထုံးလုပ်နည်းများ ပါဝင်လိမ့်မည်ဟု ဆိုသည်။

 ထို့နောက်တွင် သမ္မတသည် မြန်မာနိုင်ငံတွင် ဖြစ်ပွါးခဲ့သည့် စစ်ပွဲများအကြောင်း ပြောဆိုခဲ့ပြီး မြန်မာအစိုးရ အနေဖြင့် တရားမျှတ၍ ကြာရှည်ခံသည့်ငြိမ်းချမ်းရေး ရရှိရန် ကြိုးပမ်းနေသည်ဟု ထပ်လောင်းပြောဆိုခဲ့သည်။

 မြန်မာနိုင်ငံတွင် ၁၉၄၈ခုနှစ် လွတ်လပ်ရေး ရရှိပြီးကတည်းက လက်နက်ကိုင် ပဋိပက္ခများ ဖြစ်ပေါ်ခဲ့သည်ဟု သမ္မတက ဆိုခဲ့ပြီး “ပဋိပက္ခတွေ အဆုံးသတ်ရပါမယ်။ ကျနော်တို့ အနေနဲ့ ညှိနှိုင်းပြီး နိုင်ငံရေးအဖြေ တခုကို ရှာဖွေရပါမယ်။ ကျနော့် အစိုးရဟာ အဲဒီ့ရည်မှန်းချက် ရရှိဖို့အတွက် အစွမ်းကုန် ကြိုးပမ်းနေပါတယ်။ လွန်ခဲ့တဲ့ ၁၈လ အတွင်းမှာ အစိုးရဟာ ၁၀ ဖွဲ့ထက် မနည်းတဲ့ တိုင်းရင်းသားလက်နက်ကိုင်တွေနဲ့ အပစ်အခတ်ရပ်စဲရေး စာချုပ်တွေ ချုပ်ဆိုနိုင်ခဲ့ပါတယ်။ အခုဆိုရင် နောက်ဆုံးကျန်နေပြီး အဓိက တိုင်းရင်းသား လက်နက်ကိုင် အဖွဲ့လည်းဖြစ်တဲ့ ကချင်လွတ်မြောက်ရေးအဖွဲ့ (KIO) နဲ့ သဘောတူညီချက် တခု ရရှိဖို့ ကျနော်တို့ရဲ့ အားထုတ်မှှုတွေကို နှစ်ဆ မြှင့်တင်ပါတော့မယ်” ဟု သမ္မတက ပြောခဲ့သည်။

 ကာလရှည်ကြာစွာ ဖြစ်ပေါ်နေခဲ့သည့် မကျေနပ်ချက်များကို ကိုင်တွယ် ဖြေရှင်းနိုင်ရေးအတွက် မြန်မာအစိုးရ အနေဖြင့် နည်းလမ်းများ ရှာဖွေရမည် ဖြစ်ကာ ဆွေးနွေး ညှိနှိုင်း ဆောင်ရွက်ခြင်းဖြင့် အားလုံးပါဝင်သည့်
မြန်မာ့ လူ့အဖွဲ့အစည်းသစ် တရပ်ကို တည်ဆောက်ရမည် ဖြစ်ကြောင်း ပြောကြားရင် သမ္မတ ဦးသိန်းစိန်က သူ၏ မိန့်ခွန်းကို နိဂုံးချုပ်ခဲ့သည်။

http://www.mizzimaburmese.com/news/regional/11078-2013-03-07-12-40-33.html

အပြည့်အစုံသို့... »

ပန်ဝါနှင့် ချီဖွေ-လောခေါင်ဒေသသို့ အစိုးရတပ်များ ရဟတ်ယာဉ်ဖြင့် စစ်ရေးလှုပ်ရှားလာ

ချီဖွေ-လောခေါင် ဒေသတွင်အခြေစိုက်တဲ့ မြန်မာအစိုးရ နယ်ခြားစောင့်တပ်ဖွဲ့ (ယခင် NDA-K)။

ကချင်လွတ်မြောက်ရေးတပ်ဖွဲ့ (KIA)၏ တပ်မဟာ (၁) တပ်ရင်း (၁၀) နယ်မြေ ချီဖွေ-လောခေါင် နှင့် ပန်ဝါဒေသတွင် အစိုးရတပ်ဖွဲ့သည် ရဟတ်ယာဉ်များနေ့စဉ်အသုံးပြု၍ စစ်ရေးလှုပ်ရှားနေကြောင်း ဒေသခံများမှသိရသည်။
အစိုးရတပ်သည် ပန်ဝါ (Pangwa)နှင့် လုပီ (Lupi) စခန်းသို့ ရဟတ်ယာဉ် များဖြင့် စစ်လက်နက်အင်အားများ တိုးချလာခြင်းဖြစ်ပြီး မတ်လ ၃ ရက်နေ့မှစ၍  ရဟတ်ယာဉ်အသုံးပြုမှု ပိုစိပ်လာသည်ဟု မျက်မြင်ဒေသခံများပြောသည်။
ရဟတ်ယာဉ်များဖြင့် ဖျားနာသူများ နှင့် ရိက္ခာ၊ အင်အားများကို ပို့ဆောင်နေသည်ဟု ယူဆရပြီး ထိုသို့နေ့စဉ်အစိုးရတပ်များသည် KIA တပ်နှင့်အနီးဆုံးသို့ ချဉ်းကပ်လှုပ်ရှားလာသောကြောင့် တိုက်ပွဲဖြစ်ပွားလာနိုင်ကြောင်း ထိုနယ်မြေတွင်ရှိသော KIA တပ်ဖက်မှလည်း ပြောဆိုသည်။
“လေယာဉ် ၁ စင်းပဲဆိုရင်တော့ လူနာသယ်ယူတယ် လို့ထင်တယ်။ သူတို့ ပစ်မယ်ဆိုရင်တော့ လေယာဉ်အနည်းဆုံး ၂ စင်းနဲ့လာတာ အချင်းချင်း ကာကွယ်ပေးဖို့အတွက်ပေါ့။ ကျနော်တို့ကတော့ ကျနော်သို့ဘက်မလာရင်တော့မပစ်ဘူး။ ကျနော်တို့က ဗဟိုညွှန်ကြားချက်နဲ့ သူတို့ရှိတဲ့နေရာကို ရှာပြီးသွားမပစ်ဘူး။ ဒါပေမဲ့ သူတို့ဘက်က ကျနော်တို့ရှိတဲ့နေရာကို အနီးဆုံးတိုးချဲ့လာတယ်။ ဒါကြောင့်အချိန်မရွေး ပစ်ခတ်လာနိုင်တယ်။ ဆွေးနွေးတဲ့သူတွေ ဆွေးနွေးနေချိန် ပစ်ခတ်တဲ့သူတွေလည်း ပစ်နေမဲ့သဘော။” ဟုရှေ့တန်းမှအရာရှိပြောသည်။
ပန်ဝါအထက်မှတ်တိုင် (၆) အထက်တွင် ဇန်နဝါရီလကုန်ပိုင်းမှစ၍ ယခုချိန်အတွင်း တိုက်ပွဲများ ငြိမ်သက်နေသော်လည်း လောခေါင်၊ စုစည်း၊ မျှော်ဂျော်၊ ဒန်ညော်၊ ဆော့လော်၊ အင်မိုင်ခခူး နေရာများတွင် ဖေဖော်ဝါရီလ ၂၃ ရက်မှ ၂၇ ရက်ထိ (ခလရ ၂၆၀၊ ၂၉ ၊ ၆၇) နယ်ခြား စောင့်တပ်များနှင့် ပြည်သူ့စစ်များ အင်အား ၃၀၀ ကျော် ထိုးစစ်ဆင်နေခြင်းကြောင့် တိုက်ပွဲများဖြစ်ပွားခဲ့ပြီး ယခုချိန်နှစ်ဘက်မှ တင်းမာနေဆဲဖြစ်ကြောင်းသိရသည်။
“ဇန်နဝါရီလ ၁၈၊ ၁၉ ရွှေလီမြို့ငြိမ်းချမ်းရေးဆွေးနွေးနေတဲ့ချိန် KIA တပ်မဟာ (၄) တပ်ရင်း ၈ နယ်မြေကို နောက်ဆုတ်လိုက်ရတယ်။ အခုလည်း ဟိုတလောက လေယာဉ်နဲ့ အပြင်းထန်ဆုံး တိုက်တဲ့နေရာ ကျနော်တို့ post တစ်ခုကို ယခုရက်ပိုင်း ဇန်နဝါရီ ၁၉ ရက်ကနေ မပစ်ခတ်ပဲနဲ့ တဖြည်းဖြည်း ညဘက် တိုးတိုးလာတယ်။ အခုပေ ၂၀ လောက်ပဲဝေးတော့တယ်။ အဲလိုတိုးတိုးလာတော့ နေ့ဘက် ညဘက် အချိန်မရွေး ပစ်လာနိုင်တယ်။” ဟု KIA အရာရှိပြောသည်။
အစိုးရနှင့် KIO နှစ်ဖက် ငြိမ်းချမ်းရေးကိုယ်စားလှယ်များ ရွှေလီမြို့တွင် လာမည့် မတ်လ ၁၁ ရက်နေ့တွင် ထပ်မံတွေ့ဆုံဆွေးနွေးသွားမည်ဖြစ်သော်လည်း ကချင်ပြည်နယ်တွင်း ထိုးစစ်များနှင့် စစ်ရေးဆက်လက်တင်းမာနေခြင်းဖြစ်သည်။

http://kachinnews.com/burmese/news/1043-%E1%80%95%E1%80%94%E1%80%B9%E1%81%80%E1%80%AB%E1%82%8F%E1%80%BD%E1%80%84%E1%80%B9%E1%80%B7-%E1%80%81%E1%80%BA%E1%80%AE%E1%80%B1%E1%80%96%E1%80%BC-%E1%80%B1%E1%80%9C%E1%80%AC%E1%80%B1%E1%80%81%E1%80%AB%E1%80%84%E1%80%B9%E1%80%B1%E1%80%92%E1%80%9E%E1%80%9E%E1%80%AF%E1%80%AD%E1%82%94-%E1%80%A1%E1%80%85%E1%80%AD%E1%80%AF%E1%80%B8%E1%80%9B%E1%80%90%E1%80%95%E1%80%B9%E1%80%99%E1%80%BA%E1%80%AC%E1%80%B8-%E1%80%9B%E1%80%9F%E1%80%90%E1%80%B9%E1%80%9A%E1%80%AC%E1%80%A5%E1%80%B9%E1%80%BB%E1%80%96%E1%80%84%E1%80%B9%E1%80%B7-%E1%80%85%E1%80%85%E1%80%B9%E1%80%B1%E1%80%9B%E1%80%B8%E1%80%9C%E1%82%88%E1%80%95%E1%80%B9%E1%80%9B%E1%80%BD%E1%80%AC%E1%80%B8%E1%80%9C%E1%80%AC.html

အပြည့်အစုံသို့... »

နိုင်ငံရေး ဆွေးနွေးမှုများ အဆင့်သုံးဆင့်ဖြင့် လုပ်ဆောင်သွားမည်

ချင်းမိုင်(မဇ္စျိမ)။   ။ သမ္မတ ဦးသိန်းစိန် အစိုးရ၏ ပြည်ထောင်စု ငြိမ်းချမ်းရေး ဖော်ဆောင်ရေး လုပ်ငန်း
ကော်မတီအနေနှင့် တိုင်းရင်းသား လက်နက်ကိုင်အဖွဲ့အစည်းများနှင့် နိုင်ငံရေး ဆွေးနွေးမှုများကို အဆင့် သုံးဆင့်ဖြင့် လုပ်ဆောင်သွားမည် ဖြစ်ကြောင်း ငြိမ်းချမ်းရေး အကျိုးဆောင် တဦးဖြစ်သူ ဦးညိုအုန်းမြင့် က ပြောသည်။

“ဝန်ကြီး ဦးအောင်မင်းပြောတာက တဖွဲ့ချင်းအနေနဲ့လည်း တွေ့သွားမယ်။ ဒေသဆိုင်အဖွဲ့တွေနဲ့ တွေ့သွားမယ်။ တိုင်းရင်းသား အားလုံး ပါဝင်တဲ့ အဖွဲ့တွေနဲ့လည်း နိုင်ငံရေးအရ ဆွေးနွေးသွားမယ်လို့ ဆွေးနွေးပါတယ်” ဟု မဇ္စျိမကို ပြောသည်။

သမ္မတရုံးဝန်ကြီး ဦးအောင်မင်းက အပစ်အခတ် ရပ်စဲထားသည့် တိုင်းရင်းသားအဖွဲ့အစည်းများနှင့် တဖွဲ့ချင်း
ဆွေးနွေးရန်၊ ဒေသအလိုက် လက်နက်ကိုင် အဖွဲ့အစည်းများနှင့် တွေ့ဆုံဆွေးနွေးရန်နှင့် ညီညွတ်သော တိုင်းရင်းသား လူမျိုးများကောင်စီ UNFC ကဲ့သို့ တိုင်းရင်းသား စုပေါင်းအဖွဲ့များနှင့် တွေ့ဆုံဆွေးနွေးသွားရန် ဟူ၍ အဆင့်သုံးဆင့်ဖြင့် လုပ်ဆောင်သွားမည်ဟု ပြောဆိုခဲ့ခြင်း ဖြစ်သည်။

ဖေဖော်ဝါရီလ ၂၀ ရက်နေ့တွင်လည်း ပြည်ထောင်စု ငြိမ်းချမ်းရေး ဖော်ဆောင်ရေး လုပ်ငန်းကော်မတီ ကိုယ်စားလှယ်များနှင့် UNFC ကိုယ်စားလှယ်များ ထိုင်းနိုင်ငံ ချင်းမိုင်မြို့တွင် ထပ်မံ တွေ့ဆုံကြဦးမည်
ဖြစ်သည်။

ဝန်ကြီး ဦးအောင်မင်း၊ လူဝင်မှုကြီးကြပ်ရေး ဝန်ကြီး ဦးခင်ရီ၊ မွေးမြူရေးဝန်ကြီး ဦးအုန်းမြင့်၊ ဒုတိယ ရှေ့နေချုပ် ဦးထွန်းထွန်းဦးနှင့် မြန်မာငြိမ်းချမ်းရေးစင်တာ (MPC) မှ အဖွဲ့ဝင်များ အပါအဝင် ၁၆ ယောက် တက်ရောက် မည် ဖြစ်ကြောင်း ဦးညိုအုန်းမြင့် က ဆိုသည်။

“အဓိကတော့ လက်နက်ကိုင် အင်အားစုတွေနဲ့ စပြီးတော့ နိုင်ငံရေးအရ ရှေ့ကို ဘယ်လိုသွားကြမလဲ။
ပြည်နယ်တွေနဲ့ ပြည်ထောင်စုနဲ့ ဘယ်လို ဆက်သွယ်လုပ်ကြမလဲဆိုတာက Framework (မူဘောင်) တခုပဲ ဖြစ်ပါတယ်။ UNFC ကလည်း ဒီအဆင့်ထဲမှာ ပါနေတာပေါ့” ဟု ပြောသည်။

၂၀၁၂ ခုနှစ် နိုဝင်ဘာလ ၉ ရက်နေ့ကလည်း ဝန်ကြီး ဦးအောင်မင်း ဦးဆောင်သည့်အဖွဲ့နှင့် UNFC ကိုယ်စားလှယ်များ ချင်းမိုင်မြို့တွင်ပင် အလွတ်သဘော ပထမဆုံးအကြိမ် တွေ့ဆုံခဲ့ပြီး ယခု တွေ့ဆုံမှုသည် ဒုတိယအကြိမ်မြောက် တွေ့ဆုံခြင်း ဖြစ်သည်။

ကချင်လွတ်လပ်ရေးအဖွဲ့ KIO နှင့် အစိုးရ တပ်တို့အကြား တိုက်ပွဲများ ပြင်းထန်လာသည့် နောက်ပိုင်း UNFC
ှနှင့် အစိုးရ ငြိမ်းချမ်းရေးကော်မတီတို့ တွေ့ဆုံမှု ရပ်ဆိုင်းထားရာမှ ယခုပြန်လည် တွေ့ဆုံကြမည် ဖြစ်သည်။

http://www.mizzimaburmese.com/news/inside-burma/10980-2013-02-18-12-35-19.html

အပြည့်အစုံသို့... »

ကချင်ပြည်နယ် ငြိမ်းချမ်းရေး ရောင်ခြည်သန်းတော့မည် ဦးသိန်းစိန် ပြော

အစိုးရ စစ်တပ်နှင့် ကချင်လွတ်လပ်ရေး တပ်မတော်(KIA) တို့အကြား တိုက်ပွဲများဖြစ်ပွားသည့် ကချင်ပြည်နယ်၌ သေနတ်သံများရပ်စဲပြီး ငြိမ်းချမ်းရေးရောင်ခြည်သန်းတော့မည်ဖြစ်ကြောင်း ယမန်နေ့က နေပြည်တော်တွင် ကျင်းပသော ၆၆ နှစ်မြောက် ပြည် ထောင်စုနေ့ အခမ်းအနား၌ သမ္မတ ဦးသိန်းစိန် က ပြောဆိုလိုက်သည်။
“တိုင်းရင်းသား လက်နက်ကိုင် ၁၀ ဖွဲ့နှင့် အပစ်အခတ် ရပ်စဲနိုင်ခဲ့ပြီး KIA တဖွဲ့နှင့်သာ ဆွေးနွေး နေဆဲအဖြစ် ကျန်ရှိနေ ကြောင်း၊ ယခုနှစ် ဖေဖော်ဝါရီ ၄ ရက်က ကျင်းပခဲ့သည့် ရွှေလီ ဆွေးနွေးပွဲတွင် ရလဒ်ကောင်းများ ရရှိ ခဲ့သည့်အတွက် မကြာမီ ကချင်ပြည် နယ်၌ ငြိမ်းချမ်းရေး ရောင်ခြည်သန်းလာတော့မည် ဖြစ်ကြောင်း၊ KIA နှင့် ငြိမ်းချမ်းရေး ရရှိပါက ၁၉၄၈ ခုနှစ် နောက်ပိုင်း မြန်မာ တနိုင်ငံလုံး၌ ပထမဆုံးအကြိမ် သေနတ်သံများ ရပ်စဲပြီး ငြိမ်းချမ်းရေး ရရှိပြီဟု သမိုင်းမှတ်တမ်း တင်နိုင်တော့မည် ဖြစ်ကြောင်း”ဟု ဦးသိန်းစိန် က ပြောသည်။
ပြည်ထောင်စုနေ့ အခမ်းအနားသို့ တက်ရောက်လာကြသည့် တိုင်းဒေသကြီးနှင့် ပြည်နယ်များမှ တိုင်းရင်းသား လူမျိုးရေးရာ ၀န်ကြီးများ နှင့် တွေ့ဆုံပွဲတွင် ထိုသို့ ပြောဆိုလိုက်ခြင်း ဖြစ်သည်။
နှစ်ဘက်တိုက်ပွဲများဖြစ်ပွားနေသည့်ကြားက ယခုလ ၄ ရက်နေ့တွင် ကချင်လွတ်လပ်ရေးအဖွဲ့ (KIO) နှင့် အစိုးရ ပြည်ထောင်စု ငြိမ်းချမ်းရေး ဖော်ဆောင်ရေးအဖွဲ့တို့ တရုတ်-မြန်မာ နယ်စပ် ရွှေလီမြို့ရှိ Jin Cheng Hotel တွင် အလွတ်သဘော တွေ့ဆုံ ဆွေးနွေးခဲ့ကြပြီး နှစ်ဘက်ခိုင်မာသည့် စစ်ပြေငြိမ်းရေးကို အလျှင်အမြန် အကောင်အထည် ဖော်နိုင်ရန် သဘောတူညီကြကြောင်း တွေ့ဆုံပွဲအပြီးတွင် ပူးတွဲကြေညာချက် ထုတ်ပြန်ခဲ့ကြသည်။
ထို့အပြင် နှစ်ဦးနှစ်ဖက် ဆက်သွယ်ရေးလမ်းကြောင်းများ ထားရှိရေး၊ စစ်ရေးတင်းမာမှုများ လျှော့ချနိုင်ရေးနှင့် နောက်တကြိမ် ဆွေးနွေးပွဲ တွင် လေ့လာသူများနှင့် သက်သေများအဖြစ် ပါဝင်နိုင်သည့် အဖွဲ့အစည်းများအား ဖိတ်ခေါ်ရေး စသည်တို့ကိုလည်း သဘောတူညီခဲ့ကြသည်။
KIO နှင့် အစိုးရတို့ ယခုလကုန်ပိုင်းတွင် ထပ်မံဆွေးနွေးကြမည်ဖြစ်ကြောင်း တွေ့ဆုံမည့်နေရာ၊ ဆွေးနွေးမည့် အကြောင်း အရာများကို အတိအကျ ထုတ်ပြန်နိုင်ခြင်းမရှိသေးသော်လည်း ယင်းတွေ့ဆုံမည့်ဆွေးနွေးပွဲတွင် အစိုးရဘက်က စစ်ဘက်ဆိုင်ရာ အကြီး အကဲ တချို့ တက်ရောက်မည်ဖြစ်ကြောင်း အစိုးရ ငြိမ်းချမ်းရေး အကျိုးဆောင် ဦးလှမောင်ရွှေ က ဧရာဝတီသို့ ပြောသည်။
“မနက်က ဝန်ကြီးဦးအောင်မင်း ရှင်းပြတာကတော့ နောက်တခေါက် KIO နဲ့ဆွေးနွေးတဲ့အခါ တပ်က အရာရှိကြီး တချို့ပါမယ် လို့ ပြောတယ်၊ KIO ဘက်ကတော့ မသိသေးဘူး”ဟု က ဆိုသည်။
ယခုလ ၄ ရက်နေ့က ရွှေလီ ဆွေးနွေးပွဲသည် မျှော်လင့်ထားသည်ထက် အဆင်ပြေခဲ့ကြောင်း ယင်းနောက် တိုက်ပွဲများလည်း သိသိသာသာ လျော့ကျသွားကြောင်း ဦးလှမောင်ရွှေက ဆက်ပြောသည်။
KIO ၏ ယနေ့ ရက်စွဲဖြင့် ထုတ်ပြန်သည့် အချက် ၉ ချက်ပါ ပြည်သူလူထုသို့ အသိပေး ကြေညာချက်တွင်လည်း စစ်မှန်သော ငြိမ်းချမ်းရေး ရရှိနိုင်ရန် နှင့် တိုင်းရင်းသားများ အားလုံးအတွက် တန်းတူ ညီမျှမှု၊ ကိုယ်ပိုင် ပြဌာန်းခွင့်များကို စားပွဲဝိုင်းတွင် တွေ့ဆုံဆွေးနွေး၍ အဖြေရှာမည် ဖြစ်သည်ဟု ပါရှိသည်။
ကချင်ပြည်နယ်အတွင်း ငြိမ်းချမ်းရေး အမြန်ရရှိရန် ရည်ရွယ်၍ တပ်မတော်သည် နိုင်ငံတော် သမ္မတရုံး၏ ၂၀၁၁ ခုနှစ် ဒီဇင်ဘာ ၁၁ ရက် ရက်စွဲပါ ညွှန်ကြားချက်နှင့် ပြည်ထောင်စု အစိုးရအဖွဲ့၏ သတင်းထုတ်ပြန်ကြေညာချက် (၃/၂၀၁၃) ပါအတိုင်း မိမိကို ကာကွယ်ခြင်းမှ အပ ပစ်ခတ်တိုက်ခိုက်မှု မပြုရန် အလေးထားလိုက်နာဆောင်ရွက်လျက်ရှိကြောင်း ကာကွယ်ရေး ဝန်ကြီးဌာန ကို ကိုးကား၍ ယနေ့ထုတ် မြန်မာ့အလင်း သတင်းစာကလည်း ဖော်ပြထားသည်။
တနင်္လာနေ့မွန်းလွဲပိုင်းက ဖားကန့်မြို့နယ်၊ ဂျာရားယန် ကျေးရွာအနီး KIA တပ်ရင်း ၆ မှ ဗိုလ်ကြီး လဒွဲ ဦးဆောင်သည့် ၁၀ ဦးပါအဖွဲ့နှင့် နယ်မြေစိုးမိုးရေး ဆောင်ရွက်နေသည့် တပ်မတော်စစ်ကြောင်းတို့ တွေ့ဆုံခဲ့ရာ ဗိုလ််ကြီးလဒွဲ အဖွဲ့မှ အစိုးရ စစ်ကြောင်းအား လာရောက်နှုတ်ဆက်ခဲ့ပြီး ထွက်ခွာသွားကြောင်း၊ တပ်မတော် အနေဖြင့် ယခုလ ရွှေလီဆွေးနွေးပွဲအပြီး နှစ်ဘက် ပစ်ခတ်မှုများ မဖြစ်ပွားစေရေး ထိန်းသိမ်း လုပ်ဆောင်လျက်ရှိကြောင်းလည်း မြန်မာ့အလင်းက ဆိုသည်။
ယင်းသို့ တွေ့ဆုံမှုများ အပါအဝင် နှစ်ဘက် နောက်ထပ်တွေ့ဆုံဆွေးနွေးရေး အခြေအနေများ၊ နယ်မြေအတွင်း နှစ်ဘက် ဆက်ဆံ ရေး အခြေအနေများ သိနိုင်ရန် ဧရာဝတီက KIO/KIA အဖွဲ့ တာဝန်ရှိသူများကို ဆက်သွယ်ခဲ့သော်လည်း မရရှိခဲ့ပေ။
သို့သော် ကချင်ပြည်နယ်အတွင်း နှစ်ဘက်တိုက်ပွဲများသိသိသာသာ ကျဆင်းသွားပြီး ပစ်ခတ်မှုများ မဖြစ်စေရန် ထိန်းသိမ်းမှုများပင် ရှိကြောင်း ဒေသတွင်း အခြေအနေများကို စောင့်ကြည့်နေသည့် ကချင်ငြိမ်းချမ်းရေး ဆွေးနွေးရေး အကျိုးဆောင် အဖွဲ့ (PCG) မှ ဦးဆန်းအောင်က ဧရာဝတီသို့ ပြောသည်။
“ဒီတခါကတော့ တိုက်ပွဲတွေ တကယ်လျော့ကျ သွားတာတွေ့ရတယ်၊ သွားရင်းလာရင်း ထိပ်တိုက်တွေ့တာတွေ ရှောင်ပေးတာမျိုးတို့ ပြီးတော့ အမြဲတမ်းနီးကပ်နေတဲ့ ဟာမျိုးမှာ မင်းတို့လည်း မပစ်နဲ့ ငါတို့လည်း မပစ်ဘူးဆိုပြီး ဟိုဘက် ဒီဘက် လှမ်းအော်ပြောကြ တာတို့ အဲဒါမျိုးလေးတွေတော့ ရှိကြတယ်လို့ပြောတယ်”ဟု ဦးဆန်းအောင် က ပြောဆိုသည်။

http://burma.irrawaddy.org/archives/33815

အပြည့်အစုံသို့... »

ပြန်ကြားရေးသတင်း၊ KIO ကြေညာချက်နှင့် ဒု-ဝန်ကြီး သဘောထား

ချင်းမိုင်(မဇ္စျိမ)။   ။ ကချင်ပြည်နယ်တွင်း တိုက်ပွဲများအပေါ် အစိုးရ ပြန်ကြားရေးဝန်ကြီးဌာန၏ သတင်းထုတ်ပြန်
ချက်များနှင့် ပတ်သက်၍ ကချင်လွတ်လပ်ရေးအဖွဲ့ KIO က ဖေဖော်ဝါရီလ ၁ ရက်နေ့တွင် ကြေညာချက်တစောင် ထုတ်ပြန် တုန့်ပြန်လိုက်သည်။

“ပြည်ထောင်စုသမ္မတ မြန်မာနိုင်ငံတော်အစိုးရ သတင်းထုတ်ပြန်ရေးအဖွဲ့နှင့် ကာကွယ်ရေး ဝန်ကြီးဌာနတို့၏ သတင်းထုတ်ပြန်ချက်များတွင် KIO အား တဖက်သတ် အပြစ်ပုံချထားသည်ကို တွေ့ရှိရသည်” ဟု ထုတ်ပြန်ချက်
တွင် ဖော်ပြထားသည်။

၎င်းတို့အနေနှင့် သဘောထား တင်းမာမှုများကို ရှောင်လွှဲလို၍ တိုက်ပွဲ သတင်းများအား ထုတ်ပြန်ခြင်း မရှိခဲ့
သော်လည်း အစိုးရဘက်မှ သတင်းထုတ်ပြန်ချက်များသည် KIO အပေါ်သာ အပြစ်ပုံချထားသည်ဟု အဆိုပါ ထုတ်ပြန်ချက်တွင် ပါရှိသည်။

သမ္မတ ဦးသိန်းစိန်၏ ပြောရေးဆိုခွင့် ရှိသူလည်းဖြစ်၊ ပြန်ကြားရေး ဒု-ဝန်ကြီးလည်း ဖြစ်သည့် ဦးရဲထွဋ် ကမူ နှစ်ဖက် ပဋိပက္ခစတင်ဖြစ်ပွားချိန်က ပိုမိုတင်းမာမလာစေရန် အစိုးရဘက်မှ သတင်းထုတ်ပြန်ခြင်း မရှိခဲ့သော်လည်း အစိုးရတပ် ရဲဘော်များ ကျဆုံး၊ ဒဏ်ရာရသည့်ပုံများနှင့် ဖမ်းဆီးရမိသည့် ရဲဘော်များ၏ ပုံများကို KIO ဘက်မှ စတင်ကာ အင်တာနက် စာမျက်နှာတွင် တင်ခဲ့ခြင်းသာ ဖြစ်သည်ဟု ဆိုသည်။

“ကျနော်တို့ ဒီကနေ့ ဒီအချိန်ထိ KIA အလောင်းတွေ အများကြီး ရခဲ့တာတောင် ကျဆုံးသွားတဲ့ လူတွေရဲ့ မိသားစုတွေကို စာနာသောအားဖြင့် လည်းကောင်း၊ စာနယ်ဇင်း ကျင့်ဝတ်အရ လည်းကောင်း အဲဒီပုံတွေ လုံးဝ ထုတ်ပြန်တာ မရှိဘူး” ဟု မဇ္စျိမကို ပြောသည်။

ဇန်နဝါရီလ ၁၈ ရက်နေ့က အစိုးရ၏ သတင်းထုတ်ပြန်ချက်တွင် “တပ်မတော်သည် ငြိမ်းချမ်းရေး စကားဝိုင်းမှ တစ်ဆင့် မိမိတပ်စခန်းများကို ရွှေ့ပြောင်းပေးရန် ဆုံးဖြတ်ထားခဲ့သော်လည်း တစ်ဖက် လက်နက်ကိုင် အဖွဲ့အစည်း
ဖြစ်သည့် KIO/KIA မှ လာ ရောက်ခြင်း မရှိဘဲ နိုင်ငံတော် အစိုးရမှ ကမ်းလှမ်းချက်ကို ပယ်ချခဲ့ခြင်းနှင့် ရွှေလီ
ဆွေးနွေးပွဲကို ပျက်ပြားစေခဲ့ခြင်း စသည့် အကြောင်းအချက်များသည် ယခုတိုက်ပွဲများကို ဖိတ်ခေါ်သကဲ့သို့ ဖြစ်လာစေသည်” ဟု ဖော်ပြခဲ့သည်။ 

၂၀၁၂ ခုနှစ်၊ အောက်တိုဘာလ ၃၀ ရက်နေ့က တွေ့ဆုံဆွေးနွေးပွဲတွင် တပ်ပိုင်းဆိုင်ရာများ ဆွေးနွေးရန် အဆုံးအဖြတ်ပေးမည့် ကာကွယ်ရေးဝန်ကြီးဌာန အထူးစစ်ဆင်ရေးမှူး ဒုတိယ ဗိုလ်ချုပ် မြင့်စိုး မူဆယ်မြို့ထိ လိုက်ပါခဲ့သော်လည်း KIO ဘက်မှ ဒု-စစ်ဦးစီးချုပ် ဗိုလ်မှူးချုပ် ဂွမ်မော် တက်ရောက်မလာ၍ တပ်ပိုင်းဆိုင်ရာကိစ္စ မဆွေးနွေးနိုင်ခဲ့ကြောင်း ဦးရဲထွဋ် က ပြောသည်။

“ဒါ သူတို့ မလာတဲ့အတွက်ကြောင့်မလို့ ကျနော်တို့ ဘက်က မဆွေးနွေးနိုင်ဘူး။ မဆွေးနွေးနိုင်တဲ့ အတွက်ကြောင့်၊ အဲဒီ တပ်ပိုင်းဆုုိင်ရာကိစ္စတွေ မဖြေရှင်းနိုင်တဲ့ အတွက်ကြောင့် မကြာမီက ဖြစ်ပွားခဲ့တဲ့ လဂျားယန်ဒေသ တိုက်ပွဲ
တွေ ဖြစ်ခဲ့တာ ဖြစ်ပါတယ်” ဟု သူက မဇ္စျိမကို ပြောသည်။

သို့သော် ယနေ့ထုတ် KIO ၏ ထုတ်ပြန်ချက်အပေါ် ကြိုဆိုနိုင်သည်များရှိပြီး နိုင်ငံရေး ပြဿနာများကို ဆွေးနွေး
ခြင်းဖြင့် အဖြေရှာနိုင်မည်ဟု ယုံကြည်ကြောင်းဆိုသည့် အချက်များသည်လည်း အစိုးရနှင့် တပ်မတော်၏ သဘောထားများဖြစ်၍ ကြိုဆိုကြောင်း ဦးရဲထွဋ် က ၎င်း၏ ဖေ့စ်ဘွတ်တွင် ရေးသားထားသည်။

ငြိမ်းချမ်းရေးအတွက် ကူညီနိုင်မည့် အဖွဲ့များနှင့် နိုင်ငံများအား အကူအညီ တောင်းခံမည်ဖြစ်ပြီး အစိုးရတပ်ဘက်မှ ထိုးစစ်ဆင်ခြင်း ရပ်ဆိုင်းသွားပါက KIO ကလည်း ပြဿနာဖြစ်ပွားနိုင်မည့် စစ်ရေးလှုပ်ရှားမှုများကို ပြုလုပ်မည် မဟုတ်ကြောင်း ကြေညာချက်တွင် ပါရှိသည်။

“ဒီအချက်များဟာ နိုင်ငံတော် အစိုးရနဲ့ တပ်မတော်က ယခင်ကတည်းက ထုတ်ပြန်ကြေညာပြီး ကြိုးပမ်းဆောင်ရွက်
နေတဲ့အချက် များဖြစ်တဲ့အတွက် ကေအိုင်အိုဘက်က အလားတူ ထုတ်ပြန်ကြေညာမှုအပေါ် ကြိုဆိုပါတယ်” ဟု ဦးရဲထွဋ် က တုန့်ပြန်ရေးသားထားသည်။

ထို့ပြင် ဇန်နဝါရီလ ၂၉ ရက်နေ့က ဖားကန့်မြို့နယ်၊ လုံးခင်းနှင့် မှော်စီဇာကျေးရွာများ ကြားတွင် လုံခြုံရေးတပ်ဖွဲ့များ
က ဒေသခံ ရွာသားများထံမှ ရွှေနှင့် မိုဘိုင်းဖုန်းများ သိမ်းယူနေသည်ဟု ရေဒီယိုသတင်း တခုတွင် ဖော်ပြထားမှုနှင့် ပတ်သက်၍ စုံစမ်းစစ်ဆေးမှုများ ပြုလုပ်နေပြီး စစ်ဆေးတွေ့ရှိပါက ထိရောက်စွာ အရေးယူမည်ဟုလည်း ဦးရဲထွဋ်က မဇ္စျိမကို ပြောဆိုသွားသည်။

ကြေညာချက်ပါ သဘောထားများကို အသေးစိတ်သိနိုင်ရန်အတွက် KIO တာဝန်ရှိသူများထံသို့ မဇ္စျိမက ဆက်သွယ်
ခဲ့သော်လည်း အဆက်အသွယ် မရရှိနိုင်ခဲ့ပေ။

http://www.mizzimaburmese.com/news/inside-burma/10896--kio-----.html

အပြည့်အစုံသို့... »

အစိုးရ သတင်းစာ စစ်သတင်း ဓာတ်ပုံမှားယွင်း

ကချင်စစ်ပွဲအတွင်း ကေအိုင်အေ တိုက်ခိုက်မှုနဲ့ ပတ်သက်တဲ့ ဓာတ်ပုံကို အစိုးရ သတင်းစာတွေက မှားယွင်းအသုံးပြုခဲ့ပါတယ်။

အဲဒီ ဖြစ်ရပ်နဲ့ ပတ်သက်ပြီး အစိုးရဘက်က တောင်းပန်ပါတယ်။
ဇန်နဝါရီလ ၂၈ ရက်နေ့က အင်္ဂလိပ် မြန်မာ နှစ်ဘာသာနဲ့ ထုတ်ဝေတဲ့ မြန်မာ့အလင်း သတင်းစာ နဲ့ ကြေးမုံ စတဲ့ နိုင်ငံပိုင် သတင်းစာ သုံးစောင်စလုံးမှာ ကချင်ပြည်နယ် ကေအိုင်အေ မိုင်းခွဲ တိုက်ခိုက်မှုဖြစ်စဉ် သတင်း ပါရှိပါတယ်။
အဲဒီ သတင်းနဲ့အတူ ပူးတွဲဖော်ပြထားတဲ့ ဓာတ်ပုံကို ကေအိုင်အေရဲ့ အကြမ်းဖက် တိုက်ခိုက်မှုကြောင့် အပြစ်မဲ့ ဆိုင်ကယ်စီး ပြည်သူ တဦးသေဆုံးခဲ့ရတယ် ဆိုတဲ့ စာသားနဲ့ တကွ သတင်းစာတွေက ဖော်ပြထားပါတယ်။
ဒါပေမယ့် အဲဒိ ဓာတ်ပုံဟာ ၂ဝ၁၂ ဒီဇင်ဘာ ၂၅ ရက် ခရစ္စမတ်နေ့က Air Bagan လေယာဉ် ပျက်ကျမှုကြောင့် မီးလောင် ပျက်စီးတဲ့ ဆိုင်ကယ် ဓာတ်ပုံ ဖြစ်နေလို့ ပြည်သူ သန်းပေါင်းများစွာကို သတင်းမှား ပေးတာ ဖြစ်ကြောင်း မြန်မာတိုင်းမ်စ် ဂျာနယ်က ဖော်ပြပါတယ်။
ဓာတ်ပုံ မှားယွင်း သုံးစွဲခဲ့ကြောင်း ပြန်ကြားရေး ဒုဝန်ကြီး ဦးရဲထွဋ်ရဲ့ လူမှုဝက်ဆိုက် Facebook မှာ ဝန်ခံထားပြီး ဓာတ်ပုံ မှားယွင်း ဖော်ပြခဲ့လို့ တောင်းပန်ပေမယ့် သတင်းကတော့ မှန်ကန်ကြောင်း ဒုဝန်ကြီးက ရေးပါတယ်။
ဒါပေမယ့် အလွန်အရေးကြီးတဲ့ ကေအိုင်အေ တိုက်ခိုက်မှုနဲ့ ပတ်သက်ပြီး မှားယွင်းခဲ့တာ ဖြစ်တဲ့အတွက် အစိုးရ သတင်းစာတွေအ ပေါ် ပြည်သူတွေ အယုံအကြည် နည်းလာမှာကို စိုးရိမ်တယ်လို့ ဦးရဲထွဋ်က ရေးသား ပါတယ်။

http://www.bbc.co.uk/burmese/burma/2013/01/130130_kachinnewsphoto.shtml

အပြည့်အစုံသို့... »

ထိုးစစ်တွေရပ်စဲဖို့ ဆန္ဒရှိကြောင်း ကာကွယ်ရေးဝန်ကြီးဌာနက ကြေညာ

ကချင်ပြည်နယ်မှာ တစ်နှစ်ခွဲကျော်ကြာ ဖြစ်ပွားနေတဲ့ အစိုးရနဲ့ ကေအိုင်အေ တပ်တွေအကြား ထိုးစစ်တွေရပ်စဲဖို့နဲ့ ထာဝရ ငြိမ်းချမ်းရေး ဆက်လက်တည်ဆောက်သွားဖို့အတွက် အထူးလိုလားကြောင်း ကာကွယ်ရေးဝန်ကြီးဌာနက ဒီကနေ့ ထုတ်ပြန်ကြေညာလိုက်ပါတယ်။

AFP

၂၀၁၂ ခုနှစ် မတ်လ ၂၇ ရက်က နေပြည်တော်တွင် ကျင်းပသည့် ၆၇ ကြိမ်မြောက် တပ်မတော်နေ့ စစ်ရေးပြအခမ်းအနား၌ ကာကွယ်ရေးဦးစီးချုပ် ဗိုလ်ချုပ်ကြီး မင်းအောင်လှိုင် စစ်ကြောင်းများအား စစ်ဆေးနေစဉ်။

ဒါဟာ ကချင်ပဋိပက္ခနဲ့ ပတ်သက်ပြီး ကာကွယ်ရေးဝန်ကြီးဌာနက ပထမဦးဆုံးအကြိမ် ထုတ်ပြန်လိုက်တာပါ။
အဲဒီ့သဘောထားထုတ်ပြန်ချက်ကို အပေါင်းလက္ခဏာဆောင်လို့ ကြိုဆိုတယ်လို့ ကေအိုင်အေ တပ်ရင်း (၆) တပ်ရင်းမှူး ဒုတိယဗိုလ်မှူးကြီး အင်ခွန်ဇော်ဒွဲ က RFA က တဆင့် အခုလို တုံ့ပြန်လိုက်ပါတယ်။
“ဒါမျိုးထုတ်ပြန်လာတယ် ဆိုကတည်းကတော့ အကောင်းဘက်မှာ ရည်ညွှန်းပြီးတော့ ထုတ်ပြန်တယ်လို့ ယူဆတယ်၊ ဒီမနက်ဖြန် သဘက်ခါဆိုရင် ကျနော်တို့ ကေအိုင်အို အနေနဲ့လည်း ထုတ်ပြန်ကြေညာချက်တစ်ခု ရောက်လာမယ်လို့ယူဆတယ်၊ ဘာဖြစ်လို့လဲဆိုရင် တပ်မတော်က ဒီလိုမျိုးထုတ်ပြန်တယ်ဆိုလို့ရှိရင် ကျနော်တို့ဘက်ကလည်း မထုတ်ပြန်နိုင်စရာ အကြောင်းတော့မရှိပါဘူး၊ အခုလို ပွင့်ပွင့်လင်းလင်း လုပ်တဲ့အတွက်ကြောင့်မို့ ကျနော်တို့တော့ အားလုံးကြိုဆိုပါတယ်၊ ဘာပဲဖြစ်ဖြစ် အကောင်းဘက်မှာ အပေါင်းလက္ခဏာဆောင်ဖို့ များပါတယ်ဆိုတဲ့ အပိုင်းကို ကျနော်ကလက်ခံပါတယ်”
ဒီကနေ့ ကာကွယ်ရေးဝန်ကြီးဌာနရဲ့ ထုတ်ပြန်ချက်ထဲမှာ အစိုးရတပ်မတော်အနေနဲ့ မိမိကိုယ်ကို ခုခံကာကွယ်တာမျိုးမှအပ ပစ်ခတ်တိုက်ခိုက်တာတွေ မပြုလုပ်ပဲ သမ္မတဦးသိန်းစိန်ရဲ့ ညွှန်ကြားချက်တိုင်း တိတိကျကျ လိုက်နာမယ်လို့လည်း ဖော်ပြထားပါတယ်။

http://www.rfa.org/burmese/news/ministry-defense-order-stop-war-01292013103426.html

အပြည့်အစုံသို့... »

တပ်မတော်က ခုခံစစ်သာ တိုက််နေတယ်ဆိုတာကို KIO ကန့်ကွက်

အစိုးရတပ်ဖွဲ့များအနေနဲ့ KIO ကို ထိုးစစ်ဆင်ခြင်း မပြုဘဲ မိမိကိုယ် ခုခံကာကွယ်ရေးအတွက် သာ ဆောင်ရွက်နေတယ်လို့ သမ္မတရုံး ပြောခွင့်ရ ပုဂ္ဂိုလ် ဦးရဲထွဋ်ရဲ့ ပြောဆိုချက် ကို KIO ကချင် လွတ်မြောက်ရေးအဖွဲ့က ကန့်ကွက်လိုက်ပါတယ်။

Photo: AFP

တောနယ်ဒေသတခုတွင် တိုက်ကင်းလှည့်နေသော စစ်အစိုးရတပ်ဖွဲ့တစ်ဖွဲ့ကို တွေ့ရစဉ်

အစိုးရတပ်ဖွဲ့တွေဟာ အမိန့်နာခံသူတွေဖြစ်ပြီး KIA တပ်ဖွဲ့တွေကို ထိုးစစ်ဆင်ခြင်းမပြုဖို့ အမိန့်ကိုပေးထားတာကို နာခံနေကြောင်း မိမိကိုယ်မိမိ ကာကွယ်ရေးအတွက် တိုက်နေတာဖြစ်တယ်လို့ မနေ့က အင်တာဗျူးတစ်ခုမှာ သမ္မတရုံးပြောရေးဆိုခွင့်ရှိသူ ဦးရဲထွဋ် က ပြောခဲ့ပါတယ်။
ဒီပြောဆိုချက်နဲ့ပတ်သက်ပြီး KIO က ကန့်ကွက်လိုက်တာပါ။
ဒ့ါအပြင် KIO ပြောခွင့်ရပုဂ္ဂိုလ် ဦးလာနန်း က အစိုးရတပ်များက အခုလက်ရှိ ထိုးစစ်ဆင်နေတဲ့ ခါရာဘိုတောင်ကုန်းအပါအဝင် လဂျားယန်ဒေသက ရ၇၁ တောင်ကုန်း၊ ဂျာမန်ကုန်း ဆွန်ရမ်ဘုံ စတဲ့ သိမ်းပိုက်လိုက်တဲ့ တောင်ကုန်းတွေဟာ KIA တပ်ဖွဲ့တွေ အစဉ်အဆက် တပ်စွဲထားတဲ့ တောင်ကုန်းတွေဖြစ်ပြီး အစိုးရတပ်တွေက ထိုးစစ်ဆင်တိုက်ခိုက်ပြီး သိမ်းပိုက်ထားတာဖြစ်တယ်လို့ ပြောဆိုပါတယ်။
KIO ပြောခွင့်ရပုဂ္ဂိုလ် ဦးလာနန်းကို RFA အဖွဲ့သား ဦးတင်အောင်ခိုင်က မေးမြန်းထားတာ နားဆင်နိုင်ပါတယ်။

http://www.rfa.org/burmese/news/kio-army-defence-naglet-01252013094115.html

	အသံဖိုင်နားဆင်ရန်
	အသံဖိုင်ရယူရန်

အပြည့်အစုံသို့... »

အစိုးရတပ်က ပစ္စည်းလု၊ သတ်ဖြတ်မှုများရှိနေသည်ဟု ကျေးရွာသားများပြော

ချင်းမိုင်(မဇ္စျိမ)။     ။ မြန်မာအစိုးရ စစ်တပ်များက ဖားကန့်မြို့နယ် လုံးခင်းကျေးရွာအုပ်စု ဆန်ခါကျေးရွာရှိ ဒေသခံ
ကျေးရွာသားများ၏ နေအိမ်အား ဖျက်ဆီး၍ ရွှေ၊ ငွေများအား ယူကာ ဒေသခံတချို့ သတ်ဖြတ်ခံရမှုများ ရှိနေသည်
ဟု အဆိုပါ ဒေသခံ များက ပြောသည်။

ဇန်နဝါရီလ ၂၃ရက်နေ့  နံနက်ပိုင်းတွင် ဆန်ခါကျေးရွာတွင် ဗိုလ်မှူး စိုင်းခမ်းလိတ်ဝင်း ဦးစီးသော ခလရ ၄၃၇ တပ်ဖွဲ့ မှအင်အား ၄၀ ခန့်သည် အဆိုပါ ကျေးရွာရှိ ဒေသခံများကို စခန်းကုန်းသို့ ဖမ်းဆီးထားပြီး ကျေးရွာထဲရှိ သော့ခတ်
ထားသော “သော်ဇင်” ခွေ အငှား ဆိုင်ကို ဖွင့်၍ ၃၀၀ ကျပ်သား တန်ဖိုးရှိ ရွှေပစ္စည်းများနှင့် ငွေများ အပြင် အခြား
နေအိမ်များမှ ငွေများကိုလည်း လုယူခဲ့သည်ဟု ဆန်ခါကျေးရွာသား တဦးက ပြောသည်။

“သူခိုး  ဓါးမြလို လုပ်နေကြတယ်။ မနေ့ မနက်ပိုင်းက ရွာသားတွေ အားလုံးကို သူတို့ ဂိတ်မှာ ဖမ်းထားပြီးတော့ သူတို့က တအိမ်ပြီး တအိမ် သော့ခတ်ထားတဲ့ အိမ်တွေလည်း ဖျက်ပြီးဖွင့်ပြီး သူတို့လိုချင်တာတွေ ယူသွားတယ်။ အုပ်ချုပ်ရေးမှူး အိမ်တောင် မကျန်ဘူး၊ တခြားအိမ်မှာလည်း ကျောက်စိမ်း လက်ကောက်တွေ တခြားပစ္စည်းတွေ အများကြီး ယူသွားကြတယ်”ဟု ၎င်းရွာသားက မဇ္စျိမကို ပြောသည်။

ရွာသား ဦးအန်းနော်အောင် ဆိုသူ၏ နေအိမ်တွင် ခေါင်းအုံး အောက်၌ သိမ်းထားသည့် ကျပ်ငွေ ၈ သိန်းနှင့် နန်းအိ ဆိုသူထံမှ ဖုန်းကဒ်၊ ငွေနှင့် အခြားပစ္စည်းများ၊ကို လုယူသွားသည်ဟု ၎င်းက ဆက်ပြောသည်။ မနက်ပိုင်းက ဖမ်းဆီးထားသော ထိုရွာသားများကို ညနေ ၄ နာရီတွင် ပြန်လည် လွှတ်ပေးခဲ့သည်ဟု ထိုဒေသခံက ပြောသည်။

ယခုလ ၁၈ ရက်နေ့ကလည်း ၄င်းတပ်ဖွဲ့များက ခရီးသွားဒေသခံ အမျိုးသမီး တဦး အပါအဝင် လူခုနှစ်ဦးတို့ကို မည်သည့်အကြောင်းအရင်းကြောင့် ဖမ်းဆီးသည်ဟု မသိရသော်လည်း ယင်းတို့အား စခန်းကုန်းသို့ ခေါ်ဆောင်၍ ပစ်သတ်ခဲ့သည်ဟု ထိုဒေသခံများထံမှ သိရသည်။

“အဲဒီလူ ခုနှစ်ဦးကို လူသတ်သမားတွေလို အနီရောင်ပိတ်စနဲ့ မျက်စိပိတ်ပြီး ရွာလယ်ခေါင်ကနေ ခေါ်ပြီး စခန်းကုန်း
ပေါ်မှာ ဗုံးနဲ့ပစ် သတ်လိုက်တယ်။ ခုထိ သူတို့ စီးလာတဲ့ကားက ခုထိ ဘုန်းကြီးကျောင်းနားမှာ ရပ်ထားတယ်။ ရွာသား
တွေက တော်တော်ကြောက်နေကြတယ်။ မနေ့က ပစ္စည်းပြန်လာယူသွားတယ်”ဟု အခြားဆန်ခါ ဒေသခံ တဦးက
ပြောသည်။

အလားတူ ယခုလ ၁၇ ရက်နေ့တွင် ဒေသခံ အယောက် ၃၀ ကျော်ကို ဖမ်းဆီးထားရာမှ ကျေးရွာ ဥက္ကဌနှင့် ရွာလူကြီးများ အာမခံဖြင့် ပြန်လည် လွတ်ပေးခဲ့သော်လည်း ၎င်းခုနှစ်ဦးမှာ ယနေ့ထိ ပြန်လည် လွတ်မြောက်လာခြင်း မရှိဘဲ သတ်ဖြတ်ခြင်း ခံလိုက်ရသည်ဟု ဒေသခံများက ပြောဆိုသည်။

ထိုဆန်ခါကျေးရွာတွင် အိမ်ခြေ ၂၀၀ ကျော်ရှိပြီး အစိုးရနှင့် KIA အကြား တိုက်ပွဲကြောင့် လုံးခင်းကျေးရွာအုပ်စုရှိ ခရစ်ယန်ဘုရားကျောင်းများသို့ ထွက်ပြေး ခိုလှုံနေခဲ့ကြသည်မှာ ရက်သတ္တပတ်ကြာမြင့်လာပြီ ဖြစ်ကြောင်း ဒေသခံ များက ပြောသည်။

အစိုးရ သတင်းစာများတွင် ဖားကန့်မြို့နယ်အတွင်း KIA စစ်သားများ နေအိမ်များတွင် လုယက် မီးရှို့ဖျက်ဆီးနေမှုများ
ရှိသည်ဟု သတင်းထုတ်ပြန်နေခြင်းမှာ KIA စစ်သားများ မဟုတ်ဘဲ အစိုးရ စစ်တပ်ဘက်မှ လုပ်ဆောင်ခြင်းသာ
ဖြစ်သည်ဟု အမျိုးသားဒီမိုကရေစီအင်အားစု NDF ပါတီမှ ဒေါ်ဘောက်ဂျာက ပြောသည်။

“ဖားကန့်မြို့မှာ KIA တွေက ရှောင်ပေးထားတယ်။ အစိုးရ စစ်တပ်တွေက နေရာယူထားတယ်။ သော့ခတ်ထားတဲ့ အိမ်တွေကို ဖောက်ပြီး ပစ္စည်းတွေ ယူတယ်။ ရွှေတွေ ယူတယ်။ ဖားကန့် တမြို့လုံး လိုလို လုပ်နေတယ်။ တချို့အိမ် ဆိုရင် မီးရှို့ခဲ့တယ်။ ကုမ္ပဏီ တချို့မှာဆိုရင်လည်း ကျောက်စိမ်းတွေ သူတို့ လိုချင်တာတွေ ယူပြီး မီးရှို့ထားတာတွေ ရှိတယ်။ အဲဒါက စစ်တပ်က လုပ်တာပါ။ အဲဒါက KIA က ရှို့ပါတယ်ဆိုပြီး သတင်းစာတွေမှာ ပါတာ တွေ့ရလို့” ဟု သူက မဇ္စျိမကို ပြောသည်။

၎င်းဆန်ခါကျေးရွာအတွင်း KIA ၏ တပ်မဟာ ၂ လက်အောက်ခံ တပ်ရင်း ၆ ၏ တပ်ခွဲ ၃ အခြေစိုက် လှုပ်ရှားခဲ့
သော်လည်း ယခု ဇန်နဝါရီလ ၁၇ ရက်နေ့က အစိုးရဘက်မှ အင်အား အလုံးအရင်းနှင့် ထိုးစစ်ဆင် တိုက်ခိုက်လာ
ခြင်းကြောင့် KIA တပ်ဖွဲ့များ ရှောင်တိမ်းလိုက်ရသည်ဟု တပ်ရင်းမှူး ဒု-ဗိုလ်မှူးကြီး ဇော်ဒွဲက ပြောသည်။

ထို့ပြင် ယမန်နေ့က အစိုးရ စစ်ကြောင်း သုံးကြောင်းဖြင့် ဂွေခါကျေးရွာအနီး KIA တပ်ခွဲ ၉ အခြေစိုက်ရာ ကုန်းပေါ်
သို့ ထိုးစစ် ဆင်လာသဖြင့် နှစ်ဖက် ထိပ်တိုက် ပြင်းပြင်းထန်ထန် တိုက်ပွဲ ဖြစ်ပွားခဲ့ကာ ဒေသခံ လူ သုံးဦးသေဆုံးပြီး သုံးဦး ဒဏ်ရာရရှိခဲ့သည်ဟု KIA တပ်ရင်း ၆ တပ်ရင်းမှူး ဒု-ဗိုလ်မှူးကြီး ဇော်ဒွဲက ပြောသည်။

“မနေ့ကတော့ ဂွေခါဘက် ၆နာရီခွဲကနေ ည ၄ နာရီထိ ထိပ်တိုက် သူတို့က စစ်ကြောင်း ၃ ခုတက်လာတယ်။ ဆိုင်းတောင် ရွာဟောင်းလမ်း၊ ဂွေခါလမ်းဘက်ကနေ လာတယ်။ ဒီတခြားလမ်းကြောင်းတိုကနေ ကျနော်တို့ နေတဲ့ ကုန်းကို တက်လာလို့ တိုက်ပွဲ တော်တော်ပြင်းထန်တယ်”ဟု သူက မဇ္စျိမကို ပြောသည်။

ယနေ့ ကြာသာပတေးနေ့ နံနက်ပိုင်းတွင် ဖားကန့်မြို့နယ်အတွင်း အစိုးရဘက်မှ လက်နက်ကြီးဖြင့် ပစ်ခတ်မှုသာရှိပြီး ထိပ်တိုက် တိုက်ပွဲ ဖြစ်ပွားမှုမရှိသေးကြောင်း သူက ဆက်ပြောသည်။ 

http://www.mizzimaburmese.com/news/inside-burma/10840-2013-01-24-12-58-48.html

အပြည့်အစုံသို့... »

ငြိမ်းချမ်းရေး လမ်းလျှောက်သူတွေကို ဒေသခံအာဏာပိုင်တွေ နှောင့်ယှက်

ကချင်ပြည်နယ်က စစ်ပွဲတွေ ရပ်ဆိုင်းရေးအတွက် ရန်ကုန်မြို့ကနေ KIO ဌာနချုပ်ရှိတဲ့ တရုတ်-မြန်မာနယ်စပ်က လိုင်ဇာမြို့ကို လမ်းလျှောက်ချီတက်ကြတဲ့ ငြိမ်းချမ်းရေးလိုလားသူ ၅၀ ကျော်ဟာ ဒီကနေ့မှာတော့ ပဲခူးမြို့ကနေ ဒိုက်ဦးမြို့အထိ ရောက်ရှိနေပါတယ်။

ခရီးစဉ်တလျှောက်မှာ သူတို့တည်းခိုဖို့ ပြင်ဆင်ကြတဲ့နေရာတွေကို တည်းခိုခွင့်မရအောင် ဒေသခံ အာဏာပိုင်တွေဖက်က ဖိအားပေးတာမျိုးတွေ ရှိတယ်လို့ ငြိမ်းချမ်းရေးခရီးစဉ် လမ်းလျှောက်ရာမှာပါဝင်တဲ့ ကိုရန်နိုင်ထွန်းက RFA ကို ပြောပါတယ်။

ငြိမ်းချမ်းရေးအတွက် ရည်မှန်းချက်ထားပြီး လမ်းလျှောက်သူတွေဟာ မနက်ဖြန် မနက်အစောပိုင်းမှာ ဒိုက်ဦးမြို့က ဒေသခံတွေနဲ့ ပူးပေါင်းပြီး ငြိမ်းချမ်းရေးကျောက်တိုင် စိုက်ထူဖို့ ရှိပါတယ်။

ဒါ့အပြင် ရန်ကုန်မှာရှိတဲ့ နာရေးကူညီမှုအသင်းကလည်း ငြိမ်းချမ်းရေးလမ်းလျှောက်သူတွေအတွက် ဆေးဝါး၊ အသုံးအဆောင်နဲ့ ငွေကျပ် ၁ဝ သိန်းတို့ကို လှူဒါန်းကြသလို လမ်းတလျှောက်မှာရှိတဲ့ မြို့တွေက ဒေသခံတွေကလည်း စားနပ်ရိက္ခာနဲ့ နေရာထိုင်ခင်း စီစဉ်ပေးခဲ့ကြပါတယ်။

ငြိမ်းချမ်းရေးလမ်းလျှောက်သူတွေဟာ ကြိုတင်ခွင့်ပြုချက် ရယူခဲ့ခြင်းမရှိတာကြောင့် မြို့နယ် ၈ မြို့နယ်က ရဲစခန်း တာဝန်ရှိသူတွေက တရားစွဲဆိုထားတယ်လို့လည်း သိရပါတယ်။

မိုင်ပေါင်း ၈၀၀ ကျော် လမ်းလျှောက်ပွဲကို ဇန်နဝါရီလ ၂၁ ရက်နေ့ မနက်ပိုင်းက စတင်ပြီး ရန်ကုန်မြို့တော်ခန်းမရှေ့ကနေ စတင်ထွက်ခွာခဲ့ကြတာ ဖြစ်ပါတယ်။

http://drlunswe.blogspot.com/2013/01/blog-post_25.html

RFA (2013-01-24)

အပြည့်အစုံသို့... »

ကချင်စစ်ပြေးဒုက္ခသည် အမျိုးသမီးတွေကို ဒေါ်အောင်ဆန်းစုကြည် အားပေးစကားပြော

အမျိုးသားဒီမိုကရေစီအဖွဲ့ချုပ် ဥက္ကဌ ဒေါ်အောင်ဆန်းစုကြည် က ကချင်ပြည်နယ် စစ်ဘေးရှောင် ဒုက္ခသည်စခန်းက အမျိုးသမီးတွေ အနေနဲ့ ပြဿနာတွေကို အတူတကွ လက်တွဲဖြေရှင်းသွားကြဖို့နဲ့ အနာဂတ်မျှော်လင့်ချက်တွေကို လက်မလွှတ်ကြဖို့ အားပေးစကား ပြောကြား လိုက်ပါတယ်။

RFA

ကချင်ပြည်နယ်အတွင်း ဖြစ်ပွားနေသည့် တိုက်ပွဲများကြောင့် တရုတ်-မြန်မာနယ်စပ် လိုင်ဇာမြို့ကို ဝင်ရောက် ခိုလှုံလာသော မြန်မာနိုင်ငံသား တချို့၏ ၂၀၁၁ ခုနှစ် ဇွန်လ ၂၀ ရက်က မှတ်တမ်းပုံ ဖြစ်ပါသည်။

ပြည်တွင်း သတင်းမီဒီယာသမားအဖွဲ့ဟာ ကချင်ပြည်နယ်က စစ်ပြေးရှောင်ဒုက္ခသည်တွေ အထူးသဖြင့် အမျိုးသမီးတွေရဲ့ ဘဝအခြေအနေ ရည်မှန်းချက်တွေကို တင်ပြနိုင်ဖို့အတွက် သွားရောက်လေ့လာကြရာမှာ ဒေါ်အောင်ဆန်းစုကြည်က သူတို့နဲ့အတူ သတင်းစကားပါးလိုက်တာ ဖြစ်ပါတယ်။
ရသအလင်းမီဒီယာအုပ်စုက တရုတ်မြန်မာနယ်စပ် မန်ဝိန်းကြီးဒေသကို မနေ့ကသွားရောက်ခဲ့ပြီး ဒီနေ့မှာတော့ မိုင်ဂျာယန်နဲ့ လိုင်ဇာဒေသအနီးက စစ်ဘေးဒုက္ခသည်စခန်းတွေက ဒုက္ခသည်အမျိုးသမီးနဲ့ ကလေးတွေကို သွားရောက်တွေ့ဆုံမေးမြန်းနေပြီး  မီဒီယာတွေမှာ ဖေါ်ပြနိုင်ဖို့ လုပ်ဆောင်နေတာဖြစ်တယ်လို့ အဲဒီအဖွဲ့ကို ဦးဆောင်သူတစ်ယောက်ဖြစ်တဲ့ မမွန်မွန်မြတ်က RFA ကို ပြောပြပါတယ်။

စစ်ပွဲတွေရဲ့ အနိဌာရုံတွေကို အများဆုံးခံစားရတာ အမျိုးသမီးနဲ့ ကလေးငယ်တွေ ဖြစ်တာကြောင့် ငြိမ်းချမ်းရေးဖြစ်စဉ်တွေမှာ အမျိုးသမီးတွေက ပိုပြီးတော့ ပါ၀င်နိုင်ဖို့လိုတဲ့အကြောင်း၊ ဒေါ်အောင်ဆနး်စုကြည် က အခုလို ပြောလိုက်တာပါ။  

“နောင်ကြီးလာမဲ့ကလေးတွေဟာ ငြိမ်းချမ်းရေးကို တန်ဖိုးထားတတ်အောင် ငြိမ်းချမ်းရေးကို ချစ်မြတ်နိုးအောင်လို့ သင်ပေးသွားရမှာက မိခင်များရဲ့တာဝန်ဖြစ်ပါတယ် အဲဒါကြောင့်မို့ လက်တွေ့ကျကျဒီကိစ္စကိုလုပ်ပါ၊ ဒါတော့ရေရှည်အတွက် လုပ်ငန်းတစ်ခုဖြစ်ပါတယ်၊ ချက်ချင်းလက်ငင်းမှာတော့ အမျိုးသမီးများစုစည်းပြီးတော့ ကိုယ်တတ်နိုင်သမျှ အမျိုးသမီးများခံနိုင်ရည်ရှိအောင် ပြဿနာတွေကို အတူပူးပေါင်းဆောင်ရွက်ခြင်းအားဖြင့် ကျော်လွှားနိုင်အောင်လို့ ကြိုးစားကြပါ၊ အခုခေတ်မှာဆိုရင် ကမ္ဘာကြီးက အမျိုးသမီးတွေဘက်က ရပ်တည်ချင်တဲ့စိတ် အများကြီးရှိလာပါတယ်၊ အမျိုးသမီးတွေရဲ့ ဒုက္ခတွေကိုလဲ အသိအမှတ်ပြုလာကြပါတယ်၊ ဒါကြောင့်မို့လို့ စိတ်အားမငယ်ကြပါနဲ့၊ မျှော်လင့်ချက်ကို လက်မလွှတ်ကြပါနဲ့”

ဒါ့အပြင် ဒေါ်အောင်ဆနး်စုကြည်က ကချင်ပြည်နယ်က စစ်ပြေးဒုက္ခသည် အမျိုးသမီးတွေကို အားပေးစကား ပြောရုံတင်မကပဲ အခုလို ဆုမွန်ကောင်း ပို့သလိုက်ပါသေးတယ်။

“အခုခေတ်မှာ တကမ္ဘာလုံးက အမျိုးသမီးတွေရဲ့ ဒုက္ခတွေကို အသိအမှတ်ပြုပါတယ်၊ အမျိုးသမီးတွေဘက်က ရပ်တည်ချင်တဲ့စိတ်တွေရှိပါတယ်၊ ဒါကြောင့်မို့ ကျမတို့အားလုံးဟာ ကိုယ့်ရဲ့အင်အားတွေကို တနေ့နဲ့တနေ့ ပိုပြီးတော့တိုးတက်အောင်လို့ အတူတူကြိုးပမ်းသွားရမှာပါ၊ ကျမတို့အနေနဲ့လဲ ကချင်ပြည်နယ်မှာရှိတဲ့ အမျိုးသမီးတွေအနေနဲ့ အမြဲပဲ ဆက်ပြီးနီးနီးကပ်ကပ် ငြိမ်းချမ်းရေးရဖို့အတွက် တတ်နိုင်တဲ့ဘက်ကနေ လုပ်သွားပါ့မယ်လို့ နိဂုံးချုပ်ပါတယ်၊ အားလုံးကျန်းကျန်းမာမာ ချမး်ချမ်းသာသာနဲ့ ဒုက္ခမျိုးစုံပြဿနာမျိုးစုံကို ကျော်လွှားနိုင်ပါစေလို့ ဆုမွန်ကောင်းတောင်းလိုက်ပါတယ်”

ဒေါ်အောင်ဆန်းစုကြည်ရဲ့ အားပေးစကားနဲ့ ဆုတောင်းစကားတွေကို ဒုက္ခသည်တွေက ကြားသိရတဲ့အခါ  အင်မတန်ဝမ်းသာကြကြောင်း၊ အမြန်ဆုံးအိမ်ပြန်နိုင်အောင် လုပ်ပေးပါဆိုတဲ့အကြောင်း၊ ဒေါ်အောင်ဆန်းစုကြည်ကိုလဲ ကချင်ပြည်နယ်အတွင်း ငြိမ်းချမ်းရေးရရှိဖို့ အားကိုးပါတယ်ဆိုတဲ့အကြောင်း တုံ့ပြန်ပြောဆိုကြတယ်လို့လည်း ကချင်စစ်ပြေးဒုက္ခသည်စခန်းတွေမှာ သတင်းရယူနေတဲ့ ရသအလင်း မီဒီယာအဖွဲ့ ခေါင်းဆောင်တစ်ဦးဖြစ်တဲ့ မမွန်မွန်မြတ် က RFA ကို ပြောပါတယ်။
ရသအလင်းမီဒီယာ အုပ်စုမှာ ထိုင်းနိုင်ငံအခြေစိုက် ဧရာဝတီသတင်းဌာနနဲ့ ၊ မြန်မာတိုင်းဂျာနယ် က သတင်းထောက်တွေလဲ ပါ၀င်ပြီး မီဒီယာတွေမှာဖော်ပြနိုင်အောင်  ဒုက္ခသည်စခန်းတွေကို သွားရောက် ကွင်းဆင်းမေးမြန်းခဲ့တာ ဒုတိယအကြိမ်ဖြစ်ပါတယ်။

http://www.rfa.org/burmese/news/dassk-kachin-refugee-01222013091016.html

အပြည့်အစုံသို့... »

တပ်မတော်က ငြိမ်းချမ်းရေးလိုလားသည်ကို သက်သေထူလိုက်ပြီဖြစ်ကြောင်း သမ္မတ ပြော

ကချင်လွတ်မြောက်ရေး တပ်မတော် (KIA) ၏ လိုင်ဇာဌာနချုပ်ကို အပြီးတိုင် ခြေမှုန်း သိမ်းယူမှု မပြုခြင်းက အစိုးရ တပ်မတော် အနေဖြင့် ငြိမ်းချမ်းရေး လိုလားသည်ကို သက်သေထူလိုက်ခြင်းပင် ဖြစ်ကြောင်း သမ္မတ ဦးသိန်းစိန်က ပြောကြားလိုက်သည်။
ဇန်နဝါရီ ၂၀ ရက်နေ့က ရန်ကုန်တိုင်းဒေသကြီး လွှတ်တော်အဆောက်အအုံတွင် သမ္မတနှင့် အရပ်ဘက် လူမှု အဖွဲ့အစည်းများ  ပထမဆုံးအကြိမ် တွေ့ဆုံစဉ် နှုတ်ခွန်းဆက် အမှာစကား ပြောကြားခိုက် သမ္မတက အထက်ပါအတိုင်း ပြောကြားလိုက်ခြင်း ဖြစ်သည်။
“KIO၊ KIA ရဲ့ လိုင်ဇာဌာနချုပ်ဟာ ကျနော်တို့ တပ်တွေနဲ့ လက်တကမ်းအကွာမှာပဲ ရှိနေပါတယ်။ ဒါပေမယ့် KIO၊ KIA ရဲ့ လိုင်ဇာ ဌာနချုပ်ကို အပြီးတိုင်ခြေမှုန်းသိမ်းယူခြင်း မပြုလုပ်ဖို့ အမိန့်ပေးထားပြီး ဖြစ်ပါတယ်။ ဒါဟာ ကျနော်တို့ တပ်မတော်ရဲ့ ငြိမ်းချမ်းရေး လိုလားတယ် ဆိုတဲ့အချက်ကို အမှန်တကယ်ဖြစ်ကြောင်း သက်သေထူခြင်းပဲ ဖြစ်ပါတယ်” ဟု သမ္မတ ဦးသိန်းစိန်က ပြောသည်။
ကချင်လွတ်မြောက်ရေး အဖွဲ့ (KIO)၊ KIA နှင့် ပဋိပက္ခ ပြန်လည် ဖြစ်ခဲ့စဉ်ကတည်းက စတင်၍ ငြိမ်းချမ်းရေး လမ်းကြောင်းပေါ် ပြန်ရောက်ရန် စဉ်ဆက်မပြတ်ကြိုးခဲ့ကြောင်း၊ လွန်ခဲ့သည့် ၁ နှစ်ကျော် ကာလတွင် ဖြစ်ပွားခဲ့သည့် ဖြစ်စဉ်များတွင် နှစ်ဘက်စလုံးက ဆုံးရှုံးနစ်နာခဲ့သည့် အသက်အိုးအိမ် စည်းစိမ်များအားလုံးကို နိုင်ငံတော်၏ ဆုံးရှုံးမှုဟုသာ ယူဆကြောင်း ဦးသိန်းစိန်က ဆိုသည်။
“ဒီဆုံးရှုံးမှုတွေ ရပ်တံ့နိုင်ဖို့ စားပွဲဝိုင်းမှာ ဆွေးနွေးအဖြေရှာတဲ့ နည်းကလွဲလို့ တခြားနည်းလမ်း မရှိတဲ့အတွက် ငြိမ်းချမ်းရေး စားပွဲဝိုင်းကို ရောက်လာဖို့အတွက် အစဉ်တစိုက် တိုက်တွန်းရခြင်း ဖြစ်ပါတယ်” ဟု သူက ဆက်ပြောသည်။
ယခုကဲ့သို့ KIO ကို အပစ်အခတ်ရပ်စဲရေးအတွက် ဖိတ်ခေါ်ရခြင်းမှာ တပြည်လုံး အတိုင်းအတာနှင့် အပစ်အခတ် ရပ်စဲရေး ရရှိရန်အတွက် ထပ်မံဖိတ်ခေါ်ရခြင်း ဖြစ်ကြောင်း၊ တိုင်းရင်းသား အဖွဲ့အစည်းများ တောင်းဆိုထားသည့် တပြည်လုံး အတိုင်းအတာနှင့် အပစ်အခတ် ရပ်စဲရေးဆိုသည်မှာ လက်ရှိအစိုးရ တာဝန်ယူသည့်နေ့မှ စတင် တောင်းဆိုခြင်း ဖြစ်သည်ဟု ထပ်လောင်း အတည်ပြုလိုကြောင်း သမ္မတက ဆိုသည်။
“ပြည်တွင်းငြိမ်းချမ်းရေးကို ဆေးမှီးတိုနဲ့ ကုသတဲ့ ချဉ်းကပ်မှုမျိုးမဟုတ်ဘဲ ရေရှည်တည်တံ့တဲ့ ငြိမ်းချမ်းရေးမျိုးရရှိဖို့ ရည်မှန်းချက် ထားရှိပါတယ်။ ရေရှည်တည်တံ့တဲ့ ငြိမ်းချမ်းရေး တည်ဆောက်ရာမှာ နိုင်ငံရဲ့ အချုပ်အခြာအာဏာကို မထိခိုက် စေဘဲ ပြည်ထောင်စုမပြိုကွဲရေးဆိုတဲ့ အခြေခံမူရဲ့ အောက်မှာ တိုင်းရင်းသားတွေရဲ့ အခွင့်အရေး တန်းတူညီမျှမှုကို ထည့်သွင်းစဉ်းစားရပါမယ်” ဟု ၎င်းက ပြောသည်။
ရေရှည်တည်တံ့သည့် ငြိမ်းချမ်းရေးမှ သွေဖည်မသွားဘဲ စားပွဲပေါ်တွင် ဆွေးနွေးသည့်နည်းဖြင့် အဖြေရှာသွားမည်ဟုလည်း သူက ဆိုသည်။
“ငြိမ်းချမ်းရေးဖြစ်စဉ်ဆိုတာ ခေါင်းဆောင်နှစ်ဦး လက်ဆွဲနှုတ်ဆက်ရုံ၊ လက်မှတ်ထိုးရုံနဲ့ မလုံလောက်ပါဘူး။ ငြိမ်းချမ်းရေး ဖြစ်စဉ် အောင်မြင်ဖို့ လူထုပါဝင်ဖို့လိုပါတယ်” ဟု သမ္မတက ပြောသည်။
ဆက်လက်၍ သမ္မတ ဦးသိန်းစိန်က ခေါင်းဆောင်များ၏ ဆွေးနွေးမှုများကို လူထုသိရှိစေရန် အရပ်ဘက် လူမှုအဖွဲ့အစည်းများ၏ အခန်းကဏ္ဍ အရေးကြီးကြောင်း၊ အရပ်ဘက် လူမှု အဖွဲ့အစည်းများအနေနှင့် ငြိမ်းချမ်းရေး ဖြစ်စဉ်များတွင် ပါဝင်နိုင်ရေးအတွက် ပြင်ဆင်နေကြောင်း၊ ငြိမ်းချမ်းရေး ဖြစ်စဉ်များအတွက် အရပ်ဘက် အဖွဲ့အစည်း များ၏ အသံများကို နားထောင်သွားမည် ဖြစ်ကြောင်း ပြောခဲ့သည်။
အရပ်ဘက် လူမှု အဖွဲ့အစည်းတခု ဖြစ်သော ငြိမ်းအဖွဲ့မှ ဒေါ်နန်းရော်က လဂျားရန်ဒေသ ထိုးစစ်ဆင်မှု ရပ်ဆိုင်းသည့် ကိစ္စကို ဝမ်းမြောက်သော်လည်း တခြားဒေသများတွင် အပစ်အခတ် မရပ်တံ့မည်ကို စိုးရိမ်သည်ဟု ယင်း အခမ်းအနားတွင် ပြောခဲ့သည်။
“အပြန်အလှန် တောင်ကုန်သိမ်းဖို့ တိုက်ပွဲတွေ ဖြစ်ရာမှာ ပြည်သူတွေ ဒီလောက်တော့ မနစ်နာသင့်ဘူး။ နိုင်ငံ့ ဘဏ္ဍာ၊ ပြည်သူ့ ဘဏ္ဍာကို စစ်စရိတ် မဖြစ်စေချင်ဘူး” ဟု သူက ဆိုသည်။
၂၀၁၁ ခုနှစ် နိုဝင်ဘာလက ပြန်လည်စတင်ခဲ့သည့် KIA နှင့် အစိုးရတပ်မတော်တို့ ဖြစ်ပွားခဲ့သည့် တိုက်ပွဲ အရေအတွက် စုစုပေါင်း ၁၀၉၅ ကြိမ် ရှိပြီဖြစ်ကြောင်း သိရသည်။
“၁၇ တာ တည်ဆောက်ပြုပြင်ခဲ့သမျှ တွေဟာ တနှစ်ခွဲအတွင်းမှာ အားလုံး ပျက်စီးကုန်တယ်။ ပြုပြင်ပြောင်းလဲရေး လုပ်ဖို့အတွက် ဒေသတွင်း တည်ငြိမ်အေးချမ်းဖို့ လိုပါတယ်” ဟု ဒေါ်နန်းရော်က ပြောသည်။
ပြည်သူရွေးချယ်သည့် သမ္မတ ဖြစ်သောကြောင့် ပြည်သူအားလုံးအတွက်၊ ကချင်ပြည်သူများ အတွက် မဖြစ်မနေ ဆောင်ရွက်မည်ဟု ယုံကြည်ကြောင်းလည်း သူက တင်ပြသွားသည်။
ငြိမ်းအဖွဲ့မှ ဒေါက်တာ Sa Boi Jum ကလည်း ငြိမ်းချမ်းရေး ရရှိရန် ဆောင်ရွက်ရာတွင် လက်တွေ့ကျကျ လုပ်ဆောင်ရန် လိုအပ်ကြောင်း၊ မြန်မာ့တပ်မတော်က လိုင်ဇာတဝိုက်တွင် ဇန်နဝါရီ ၂၀ ရက်နေ့ မနက်အထိ ထိုးစစ်ဆင်ဆဲ ဖြစ်ကြောင်း၊ သမ္မတ၏ အမိန့်ကို စစ်တပ်က မနာခံဟု ယူဆကြောင်း ဧရာဝတီကို ပြောသည်။
အဆိုပါ အခမ်းအနားသို့ အရပ်ဘက် လူမှုအဖွဲ့အစည်း ၉၀ ကျော်တက်ရောက်ခဲ့ပြီး၊ ကချင်ဒေသ ပဋိပက္ခ ကိစ္စ အပါအဝင် ဝန်ကြီးဌာနများနှင့် ဆက်ဆံရာတွင် တွေ့ကြုံရသည့် အခက်အခဲများ၊ အရပ်ဘက် လူမှု အဖွဲ့အစည်းများ တွေ့ကြံုနေရသည့် ကိစ္စ အဝဝများကို ဆွေးနွေးတင်ပြ ပြောဆိုခဲ့သည်။
သမ္မတ ဦးသိန်းစိန်က နိဂုံးချုပ် မိန့်ခွန်း ပြန်လည် ပြောကြားရာတွင် အရပ်ဘက် လူမှု အဖွဲ့အစည်းများ၏ တင်ပြဆွေးနွေး ချက်များထဲမှ တချို့ ကိစ္စရပ်များမှာ နိုင်ငံတော်အနေဖြင့် လုပ်ဆောင်ပေးရမည့် လုပ်ငန်းတာဝန်များဖြစ်ကြောင်း၊ နောက်ပိုင်း အရပ်ဘက် လူမှုအဖွဲ့အစည်းများနှင့် ဆွေးနွေးပွဲ ပြုလုပ်ရာတွင် အခမ်းအနား ပုံသဏ္ဍန် မလုပ်တော့ဘဲ ဆွေးနွေးကာ အမြင်ချင်း ဖလှယ်သည့် ပုံစံဖြင့် လုပ်ဆောင်သွားလိုကြောင်း၊ အရပ်ဘက် လူမှု အဖွဲ့အစည်းများအား လိုအပ်သည့် အကူအညီများ ပေးသွားရန် လိုအပ်ကြောင်း၊ တလှေတည်းစီး၊ တခရီးတည်း သွားနေသူများ ဖြစ်သောကြောင့် သက်ဆိုင်ရာ ဝန်ကြီးဌာနများနှင့် ဆွေးနွေးဆောင်ရွက်နိုင်ရန် စီစဉ်ပေးသွားမည်ဖြစ်ကြောင်း ပြောဆိုသည်။
“ပြည်တွင်း ငြိမ်းချမ်းရေး ကိစ္စက အမှန်တကယ်လိုအပ်နေတယ်။ တိုင်းပြည်တည်ငြိမ်အေးချမ်းရေး၊ တိုင်းပြည်ဖွံ့ဖြိုး တိုးတက်ရေး ကိစ္စတွေအတွက် အရပ်ဘက် လူမှု အဖွဲ့အစည်းတွေနဲ့ ပူးပေါင်းလုပ်ဆောင်သွားမှာ ဖြစ်တယ်” ဟု သမ္မတက ပြောသည်။

http://burma.irrawaddy.org/archives/31444

အပြည့်အစုံသို့... »

လိုင်ဇာကို ဆက်မတိုက်ဘူးလို့ သမ္မတ ပြော

အစိုးရစစ်တပ်အနေနဲ့ ကချင်လွတ်မြောက်ရေးအဖွဲ့ KIO ရဲ့ ဌာနချုပ်ဖြစ်တဲ့ လိုင်ဇာကို ဆက်ပြီးတော့ ထိုးစစ်ဆင် တိုက်ခိုက်မှာမဟုတ်ဘူးလို့ သမ္မတဦးသိန်းစိန်က ပြောလိုက်ပါတယ်။ အရပ်ဘက် လူမှုအဖွဲ့အစည်းတွေနဲ့ ရန်ကုန်မြို့ မှာ ဒီကနေ့ တွေ့ဆုံချိန်အတွင်း သမ္မတဦးသိန်းစိိန်က အဲဒီလို ပြောခဲ့တာပါ။ အရပ်ဘက် လူမှုအဖွဲ့အစည်းတွေရဲ့ အခန်းကဏ္ဍ ကို နိုင်ငံတော်သမ္မတ တယောက်အနေနဲ့ အသိအမှတ်ပြုပြီးတော့ အစိုးရအဖွဲ့အနေနဲ့လည်း အရပ်ဘက် လူမှုအဖွဲ့အစည်းတွေနဲ့ နောက်ပိုင်းမှာ လက်တွဲလုပ်ဆောင်လာအောင် စီစဉ်သွားမယ်လို့ အဖွဲ့အစည်း ၈၀ ကျော်နဲ့ တွေ့ဆုံပွဲမှာ သမ္မတ ဦးသိန်းစိန်က ပြောခဲ့ပါတယ်။ အပြည့်အစုံကိုတော့ တွေ့ဆုံပွဲမှာ ကိုယ်တိုင်သွားပြီးသတင်းယူခဲ့တဲ့ ဗွီအိုအေရဲ့ ရန်ကုန်အခြေစိုက် သတင်းထောက် ကိုအောင်ရဲမောင်မောင်က သတင်းပေးပို့ထားပါတယ်။

အစိုးရစစ်တပ်အနေနဲ့ ကချင်လွတ်မြောက်ရေးအဖွဲ့ KIO ရဲ့ ဌာနချုပ်ဖြစ်တဲ့ လိုင်ဇာကို ဆက်ပြီးတော့ ထိုးစစ်ဆင် တိုက်ခိုက်မှာမဟုတ်ဘူးလို့ သမ္မတဦးသိန်းစိန်က ပြောလိုက်ပါတယ်။ အရပ်ဘက် လူမှုအဖွဲ့အစည်းတွေနဲ့ ရန်ကုန်မြို့ မှာ ဒီကနေ့ တွေ့ဆုံချိန်အတွင်း သမ္မတဦးသိန်းစိိန်က အဲဒီလို ပြောခဲ့တာပါ။ အရပ်ဘက် လူမှုအဖွဲ့အစည်းတွေရဲ့ အခန်းကဏ္ဍ ကို နိုင်ငံတော်သမ္မတ တယောက်အနေနဲ့ အသိအမှတ်ပြုပြီးတော့ အစိုးရအဖွဲ့အနေနဲ့လည်း အရပ်ဘက် လူမှုအဖွဲ့အစည်းတွေနဲ့ နောက်ပိုင်းမှာ လက်တွဲလုပ်ဆောင်လာအောင် စီစဉ်သွားမယ်လို့ အဖွဲ့အစည်း ၈၀ ကျော်နဲ့ တွေ့ဆုံပွဲမှာ သမ္မတ ဦးသိန်းစိန်က ပြောခဲ့ပါတယ်။ အပြည့်အစုံကိုတော့ တွေ့ဆုံပွဲမှာ ကိုယ်တိုင်သွားပြီးသတင်းယူခဲ့တဲ့ ဗွီအိုအေရဲ့ ရန်ကုန်အခြေစိုက် သတင်းထောက် ကိုအောင်ရဲမောင်မောင်က သတင်းပေးပို့ထားပါတယ်။

နိုင်ငံတော် သမ္မတ ဦးသိန်းစိန်က ကချင် ပြည်နယ်ကို ထိုးစစ်ဆင်တာတွေ ရပ်ပြီလို့ ပြောပြီး တရက်အကြာ ရန်ကုန်မြို့မှာ ဒီကနေ့ အရပ်ဘက် လူမှု အဖွဲ့အစည်းတွေနဲ့ တွေ့ဆုံတဲ့ပွဲမှာ KIO ဗဟိုဌာနချုပ် ရှိရာလိုင်ဇာကို ထပ်မံ ထိုးစစ်ဆင်တာတွေ လုပ်တော့မှာမဟုတ်ဘူးလို့ အတည်ပြု ပြောကြားလာပါတယ်။

“KIA/KIO ရဲ့ လိုင်ဇာဌာနချုပ်ဟာ ကျနော်တို့ တပ်တွေနဲ့ လက်တကမ်းအကွာမှာ ရှိပါတယ်။ ဒီ KIA/KIO ရဲ့ လိုင်ဇာဌာနချုပ်ကို အပြီးတိုင် ချေမုန်း သိမ်းယူခြင်း မပြုလုပ်ဖို့ အမိန့်ပေးထားပြီး ဖြစ်ပါတယ်။ ဒါဟာ ကျနော်တို့ တပ်မတော်ရဲ့ ငြိမ်းချမ်းရေး လိုလားတယ်ဆိုတဲ့အချက်ကို သက်သေထူခြင်းပဲ ဖြစ်ပါတယ်။ ကျနော်တို့အနေနဲ့ စစ်မှန်တဲ့ ငြိမ်းချမ်းရေး ရရှိတဲ့အထိ ဆက်လက် ဆောင်ရွက်သွားမှာဖြစ်ပြီး လက်ရှိအချိန်မှာ KIO/KIA ကလွဲလို့ ကျန်အဖွဲ့ ၁၀ ဖွဲ့နဲ့ အပစ်အခတ် ရပ်စဲရေး လက်မှတ် ရေးထိုးပြီး ဖြစ်ပါတယ်။”

ကချင်ပြည်နယ်အတွင်းမှာ ဖြစ်ပွားနေတဲ့ စစ်အရှိန်တွေကို လျှော့ချဖို့ တပ်မတော်ကို သမ္မတ က အမိန့်ပေးပြီးဖြစ်ကြောင်းနဲ့ နောက်ပိုင်းမှာ ထိုးစစ် ဆင်တာတွေ မရှိနိုင်တော့ဘူး လို့လည်း သမ္မတက ထပ်လောင်း ပြောခဲ့ပါသေးတယ်။

မနေ့က နေပြည်တော်မှာကျင်းပတဲ့ မြန်မာနိုင်ငံ ဖွံ့ဖြိုးတိုးတက်မှု ပူးပေါင်း ဆောင်ရွက်ရေး ဖိုရမ်မှာ မိန့်ခွန်းပြောကြားစဉ်တုန်း ကလည်း သမ္မတတယောက်အနေနဲ့ KIO/KIA ကို ငြိမ်းချမ်းရေး ကမ်းလှမ်းထားပြီလို့လည်း ပြောခဲ့ပါသေးတယ်။

နိုင်ငံတော် သမ္မတ က ပြည်တွင်းမှာရှိနေတဲ့ အရပ်ဘက် လူမှု အဖွဲ့အစည်းတွေရဲ့ အခန်းကဏ္ဍဟာ လက်ရှိ နိုင်ငံတည်ဆောက်ရေး ကဏ္ဍမှာ အလွန်အရေးပါနေပြီးတော့ သမ္မတ အနေနဲ့ အရပ်ဘက် လူမှု အခြေပြု အဖွဲ့အစည်းတွေရဲ့ ဆောက်ရွက်ချက်တွေ ကို အသိအမှတ်ပြုတယ်လို့ လည်း ပြောကြားခဲ့ပါတယ်။

နိုင်ငံတော် သမ္မတကို အရပ်ဘက် လူမှု အဖွဲ့အစည်းတွေက သူတို့ရဲ့ ရပ်တည်ရေးကိစ္စ နဲ့ မှတ်ပုံတင်နိုင်ရေး ကိစ္စတွေကိုလည်း ဒီကနေ့ တွေ့ဆုံပွဲမှာ တင်ပြခဲ့ကြပြီး အရပ်ဘက် လူမှု အဖွဲ့အစည်းတွေရဲ့ တရားဝင် မှတ်ပုံတင် ရရှိရေး အခြေအနေဟာလည်း အခက်အခဲတွေ ရှိနေသေးတယ်လို့ ပြောကြားသွားခဲ့ကြပါတယ်။

နိုင်ငံတော် သမ္မတ က လက်ရှိ လူမှု အဖွဲ့အစည်းတွေနဲ့ ဒီတကြိမ် တွေ့ဆုံမှုဟာ ပထမဆုံးအကြိမ် တွေ့ဆုံတာ ဖြစ်ပြီး နောက်ပိုင်းမှာလည်း အခုလိုမျိုး တွေ့ဆုံမှုတွေ ပြုလုပ်သွားဖို့ ရှိပြီး အခမ်းအနား ဆန်ဆန် မဟုတ်ဘဲ သက်ဆိုင်ရာ ပြည်ထောက်စု အစိုးရ၊ ဒါမှမဟုတ် ပြည်နယ် အစိုးရတွေက အရပ်ဘက် လူမှု အဖွဲ့အစည်းတွေနဲ့ အတူတကွ တွေ့ဆုံနိုင်အောင် ပြုလုပ်ပေးသွားဖို့ ရှိတယ်လို့လည်း သမ္မတ ဦးသိန်းစိန်က ပြောသွားပါတယ်။

“ဒါကို အစိုးရပိုင်းကလည်း အရပ်ဘက် အဖွဲ့အစည်းတွေ၊ state holders တွေ၊ ဒါတွေကို အကူအညီတွေ ပေးဖို့ ကျနော်တို့ လိုအပ်သလို အရပ်ဘက်အဖွဲ့အစည်းတွေနဲ့ တခြား အဖွဲ့အစည်းတွေကလည်း အစိုးရရဲ့ လုပ်ဆောင်ချက်တွေကို ၀ိုင်းပြီးတော့ အကူအညီပေးဖို့၊ ကူညီထောက်ပံ့ပေးဖို့၊ ၀ိုင်းရံပြီးတော့ ဆောင်ရွက်ပေးသွားဖို့ ဒါ ကျနော်တို့ လိုအပ်ချက် ဖြစ်ပါတယ်။ ပြောကြမယ်ဆိုရင်တော့ ကျနော်တို့တွေက ခုနကလို တလှေတည်းစီးပြီးတော့ တခရီးတည်းသွားနေတဲ့ အဖွဲ့အစည်းတွေ၊ တလှေတည်းစီးပြီးတော့ တခရီးတည်းသွားနေတဲ့ ပုဂ္ဂိုလ်တွေ ဖြစ်တယ်။ အဲဒီတော့ ကျနော်တို့ တိုင်းပြည် ဖွံ့ဖြိုးတိုးတက်ရေးကို ကျနော်တို့ အစိုးရချည်းပဲ လုပ်နေလို့ မရဘူး။ အခုလိုပဲ အရပ်ဘက် အဖွဲ့အစည်းတွေ၊ တခြား NGO တွေ၊ တခြား လူမှုရေးအဖွဲ့အစည်းတွေ၊ စသည်အားဖြင့် state holders တွေ အားလုံး ကျနော်တို့ ပူးပေါင်းပြီးတော့ လုပ်သွားမှပဲ အောင်မြင်မယ် ဆိုပြီးတော့ ပြောချင်ပါတယ်။”

လက်ရှိ ပြည်တွင်း အရပ်ဘက် အဖွဲ့အစည်း ၈၀ ကျော်ဟာ နိုင်ငံတော် သမ္မတနဲ့ တွေ့ဆုံပွဲကို တက်ရောက်ခဲ့ ကြပြီး အခုလို တက်ရောက်လာတဲ့ အဖွဲ့အစည်းတွေထဲမှာ အများစုကတော့ မှတ်ပုံတင် မရှိသေးတဲ့ အဖွဲ့အစည်းတွေက များနေတာကို တွေ့ရပါတယ်။

နိုင်ငံတော် သမ္မတ ဦးသိန်းစိန်က အခုလို အရပ်ဘက် လူမှု အဖွဲ့အစည်းတွေရဲ့ ရှေ့ဆက်သွားရမယ့် အခြေအနေတွေကို နားထောင်ပြီး တွေ့ဆုံခွင့် ရရှိခဲ့တဲ့အပေါ်မှာ ဗမာနိုင်ငံလုံးဆိုင်ရာ ကျောင်းသား သမဂ္ဂက မဖြိုးဖြိုးအောင်က သူ့ရဲ့အမြင်ကို အခုလို ပြောပြပါတယ်။

“တကယ်စကားပြောခွင့် ရတဲ့သူ ၁၂ ယောက်လောက် ရှိတယ်။ ၁၂ ယောက်မှာလည်း ၆ ယောက်လောက်က အစိုးရနဲ့ ဆက်စပ်ပြီး လုပ်နေတဲ့ အဖွဲ့အစည်းတွေက ဖြစ်နေတော့ ကျမတို့က ဒီကိစ္စတွေမှာ အားမရပါဘူးရှင့်။ ဒီနေ့ တွေ့ဆုံ ဆွေးနွေးတဲ့ပွဲကို ကျမ အနေနဲ့ ပွင့်ပွင့်လင်းလင်း ပြောရင် လုံးဝ အားမရပါဘူးရှင့်။”

ဒီကနေ့ တွေ့ဆုံပွဲကို အစိုးရ ၀န်ကြီး ပိုင်းတွေထဲက ပြည်ထောင်စု ၀န်ကြီးတွေဖြစ်တဲ့ ဦးစိုးသိန်း၊ ဦးအောင်မင်း၊ ဦးခင်ရီ၊ ဦးဝင်းမြင့် တို့ တက်ရောက်ခဲ့ကြပါတယ်။ နိုင်ငံတော်သမ္မတနဲ့ အရပ်ဘက်အဖွဲ့အစည်းတွေ တွေ့ဆုံပွဲမှာ အချို့ အဖွဲ့အစည်းတွေက နိုင်ငံတော်သမ္မတကို သူတို့ရဲ့ အခက်အခက်တွေနဲ့ တိုင်းပြည်မှာ တကယ်ဖြစ်နေတဲ့ ဖြစ်ရပ်တွေကို တင်ပြခွင့် မရရှိခဲ့လို့ အများစုကလည်း စိတ်ပျက်တယ်လို့ ပြောခဲ့တာတွေ ရှိပါတယ်။

http://burmese.voanews.com/content/president-kachin-01-20-13/1587446.html

အပြည့်အစုံသို့... »

ငြိမ်းချမ်းရေးလုပ်ငန်းစဉ်တွေမှာ အရပ်ဖက် လူ့အဖွဲ့အစည်းတွေပါဝင်ကြဖို့ သမ္မတ တိုက်တွန်း

အရပ်ဖက်လူ့အဖွဲ့အစည်းတွေ အနေနဲ့ ငြိမ်းချမ်းရေး ဖော်ဆောင်တဲ့ လုပ်ငန်းစဉ်တွေမှာ အစိုးရနဲ့ ပူးပေါင်းပါဝင်ကြဖို့ သမ္မတဦးသိန်းစိန်က ဒီကနေ့ ဇန်နဝါရီလ ၂၀ ရက်နေ့မှာ တိုက်တွန်း ပြောလိုက်ပါတယ်။

Photo : RFA/Kyaw Zaw Win

နိုင်ငံတော် သမ္မတ ဦးသိန်းစိန်နဲ့ အရပ်ဖက် လူ့အဖွဲ့စည်းများ ရန်ကုန်တိုင်းဒေသကြီး လွှတ်တော်မှာ ဇန်နဝါရီလ ၂၀ ရက်နေ့က တွေ့ဆုံစဉ်

ရန်ကုန်တိုင်းဒေသကြီး အစိုးရအဖွဲ့ရုံးမှာ ဒီကနေ့ ညနေပိုင်းက ကျင်းပတဲ့ သမ္မတဦးသိန်းစိန်နဲ့ အရပ်ဖက်အခြေပြုလူမှုအဖွဲ့အစည်း စုစုပေါင်း (၈၆) ဖွဲ့ နဲ့ တွေ့ဆုံတဲ့ အခမ်းအနားမှာ ငြိမ်းချမ်းရေး လုပ်ငန်းစဉ်တွေမှာ လူထုနဲ့ အရပ်ဖက်လူ့အစည်းတွေရဲ့ အခန်းကဏ္ဍဟာ အရေးပါတယ်လို့ သမ္မတဦးသိန်းစိန်က ပြောခဲ့ပါတယ်။
" ငြိမ်းချမ်းရေး ဖြစ်စဉ်အောင်မြင်ဖို့ဆိုတာ လူထုကလည်း ပါဝင်ဖို့လိုပါတယ်၊ ခေါင်းဆောင်တွေရဲ့ သဘောတူညီမှု၊ နားလည်မှုတွေကို လူထုဆီရောက်အောင် ပေးပို့နိုင်အဖို့အတွက် အရပ်ဖက်လူ့ အဖွဲ့အစည်းတွေရဲ့ အခန်းကဏ္ဍကလည်း အင်မတန်မှ အရေးကြီးပါတယ်၊ မိမိတို့ အစိုးရအဖွဲ့အနေနဲ့ အရပ်ဖက်လူ့အဖွဲ့အစည်းတွေ ငြိမ်းချမ်းရေးဖြစ်စဉ်မှာ ပါဝင်လာနိုင်ဖို့ ဆောင်ရွက်နေပါတယ်။"
ဒါ့အပြင် နိုင်ငံတည်ဆောက်ရေး၊ အမျိုးသားပြန်လည် စည်းလုံးညီညွတ်ရေးနဲ့ ငြိမ်းချမ်းရေး လုပ်ငန်းစဉ်တွေမှာ အစိုးရနဲ့ အရပ်ဖက်လူ့အဖွဲ့အစည်းတွေနဲ့ ပူးပေါင်းဖို့ သမ္မတဦးသိန်းစိန်က ဖိတ်ခေါ်လိုက်ပါတယ်။
" အရပ်ဖက်လူ့အဖွဲ့အစည်းတွေရဲ့ ပါဝင်မှုကို ယခုထက်ပိုပြီး ပူးပေါင်းပါဝင်ဖို့ကိုလည်း တိုက်တွန်းပြောကြားလိုပါတယ်၊ ကျွန်တော်တို့ အားလုံး ငြိမ်းချမ်းရေးလုပ်ငန်းစဉ်တွေမှာ တူညီတာတွေကို ပူးပေါင်းဆောင်ရွက်ကြဖို့ ဖိတ်ခေါ်တာဖြစ်ပါတယ်။"
အဲ့ဒီအခမ်းအနားမှာ ငြိမ်းဖောင်ဒေးရှင်း၊ မြန်မာနိုင်ငံ အမျိုးသမီး စွမ်းဆောင်ရှင်များအသင်း၊ ငြိမ်းချမ်းရေးစက်ဝန်း၊ ငြိမ်းချမ်းရေးကွန်ရက် စတဲ့အဖွဲ့အစည်းတွေက ကချင်ပြည်နယ်မှာ ဖြစ်ပွားနေတဲ့ စစ်ပွဲအကြောင်းတွေ၊ မြန်မာနိုင်ငံအတွင်းမှာ ဖြစ်ပေါ်နေတဲ့ လူမှုရေး အခက်အခဲတွေ၊ အစိုးရအနေနဲ့ အရပ်ဖက်လူ့အဖွဲ့အစည်းတွေကို လူမှုရေးလုပ်ငန်းစဉ်တွေမှာ ပိုပြီး နေရာပေးဖို့ စတဲ့ အချက်တွေကို တင်ပြဆွေးနွေးခဲ့ပြီး လူပုဂ္ဂိုလ်(၂၀၀)ခန့် တက်ရောက်ခဲ့ပါတယ်။

http://www.rfa.org/burmese/news/kio-government-reply-01202013095421.html/peace-process-invite-civil-society-01202013103046.html

အပြည့်အစုံသို့... »

လိုင်ဇာကို မသိမ်းဘူးလို့ မြန်မာ သမ္မတ ပြောကြား

 

ကချင် လွတ်လပ်ရေးအဖွဲ့ ကေအိုင်အို ဌာနချုပ် ရှိရာ လိုင်ဇာကို သိမ်းယူမှာ မဟုတ်ဘူးလို့ သမ္မတ ဦးသိန်းစိန်က အန်ဂျီအို အရပ်ဖက် အဖွဲ့တွေနဲ့ တွေ့ဆုံပွဲမှာ ပြောကြားလိုက် ပါတယ်။

အစိုးရတပ် တွေဟာ လိုင်ဇာ အနီး လက်တကမ်း အကွာမှာ ရှိနေ ပေမယ့် ဝင်ရောက် သိမ်းပိုက် မှုတွေ မလုပ်ဖို့ အမိန့် ပေးထား ကြောင်း၊ ဒါကို ကြည့်ရင် အစိုးရဟာ ငြိမ်းချမ်းရေးကို လိုလားတယ် ဆိုတာ ဖေါ်ပြ နေတယ်လို့ သမ္မတက ပြောကြားသွား ပါတယ်။

အစိုးရ မဟုတ်တဲ့ အန်ဂျီအို အရပ်ဖက် အဖွဲ့ အစည်း ၈၀ ကျော်နဲ့ ရန်ကုန်မြို့ တိုင်းဒေသကြီး လွှတ်တော် အဆောက် အအုံမှာ တနင်္ဂနွေနေ့က တွေ့ဆုံ ခဲ့ရာမှာ သမ္မတ က အခုလို ထည့်သွင်း ပြောကြား သွားတာ ဖြစ်ပြီး၊ ကေအိုင်အို ကို ငြိမ်းချမ်းရေး ကမ်းလှမ်း ထားတဲ့ အကြောင်းလည်း သူက ပြောသွားပါတယ်။
အန်ဂျီအိုတွေ ပြောတဲ့ အလှည့် မှာတော့ ငြိမ်းဖောင်ဒေးရှင်း အဖွဲ့က ဒေါ်နန်းရော်က ကချင်ဒေသ တချို့မှာ ထိုးစစ် ရပ်လိုက် တယ်ဆိုတဲ့ ကြေညာချက်နဲ့ ပတ်သက် ပြီး သမ္မတ အနေနဲ့ မဖြစ် မနေ တာဝန်ခံ ဆောင်ရွက် ပေးဖို့ ရဲရဲ ဝံ့ဝံ့ ဆွေးနွေး သွားခဲ့ ပါတယ်။
အစိုးရနဲ့ ကေအိုင်အို၊ ကေအိုင်အေ အကြား တိုက်ပွဲတွေကြောင့် စစ်သည်တွေ၊ ပြည်သူ လူထုတွေ သေကျေ ဒုက္ခ ရောက်ရပုံ ကိုလည်း ဒေါ်နန်းရော်က ပြောကြားသွား ပါတယ်။
နိုင်ငံတကာက လှူ ဒါန်းတဲ့ ရန်ပုံငွေတွေကို မြန်မာ အန်ဂျီအိုတွေ တိုက်ရိုက် မရဘဲ ကုလသမဂ္ဂ ဆီက တဆင့်သာ လက်ခံ နေရတဲ့ ကိစ္စကို ပြင်နိုင် အောင် အစိုးရက ဆောင်ရွက်ပေးဖို့ ဆွေးနွေး တာမျိုးလည်း ရှိခဲ့ပါတယ်။
အောင်ဖောင် ဒေးရှင်းနဲ့ နာရေး ကူညီမှု အသင်းကို ထူထောင်ခဲ့သူ တဦး ဖြစ်တဲ့ ဒေါ်သန်းမြင့်အောင် ကတော့ လူထု ကြားမှာ ရှိနေတဲ့ အန်ဂျီအို တွေရဲ့ လုပ်ငန်းတွေ ချောမွေ့အောင် ကူညီဖို့ ပြောခဲ့ ပါတယ်။ ဒါ့အပြင် သွေးလှူရှင် အသင်းဖွဲ့ဖို့ ငွေငါးသိန်း မှတ်ပုံတင်ကြေး ပေးရတာမျိုး ဟာလည်း မဖြစ်သင့် ဘူးလို့ သူက ပြောပါ တယ်။
တွေ့ဆုံပွဲ အဆုံးမှာတော့ သမ္မတက အန်ဂျီအို တွေရဲ့တင်ပြချက် တွေဟာ လုပ်ပေးရမယ့် ကိစ္စတွေ ဖြစ်သလို လုပ်ပေး နိုင်မယ့် ကိစ္စတွေလည်း ဖြစ်တယ်လို့ ပြောသွားခဲ့ ပါတယ်။
နောင်အခါမှာ အန်ဂျီအိုတွေနဲ့ ဆက်သွယ်ရ လွယ်ကူအောင် focal point လို့ခေါ်တဲ့ လူပုဂ္ဂိုလ် ဒါမှမဟုတ် အဖွဲ့ အစည်းတွေ ထားရှိ ပေးဖို့ ဆောင်ရွက်မှာ ဖြစ်သလို၊ အန်ဂျီအို တွေနဲ့ အပြန် အလှန် ဆွေးနွေး နိုင်မယ့် ဖိုရမ်တွေလည်း ကျင်းပသွားဖို့ ဆောင်ရွက်မယ့် အကြောင်း သမ္မတ ဦးသိန်းစိန်က ပြောသွားခဲ့ ပါတယ်။

http://www.bbc.co.uk/burmese/burma/2013/01/130120_thein_sein_civil_societies.shtml

အပြည့်အစုံသို့... »

သမ္မတဦးသိန်းစိန်က ငြိမ်းချမ်းရေးဆွေးနွေးရန် ကေအိုင်အေကို ဖိတ်ခေါ်

သမ္မတဦးသိန်းစိန်က ကချင်လွတ်မြောက်ရေးတပ်မတော်(ကေအိုင်အေ)နှင့် အစိုးရအကြား ငြိမ်းချမ်းရေးဆောင်ရွက်ရန် ဆွေးနွေးလိုကြောင်း ယနေ့ တရားဝင်ဖိတ်ခေါ်ကမ်းလှမ်းလိုက်သည်။
နေပြည်တော်ရှိ MICC ခန်းမတွင် ယနေ့ မနက် ၉ နာရီက ကျင်းပသော ပထမအကြိမ်မြန်မာနိုင်ငံဖွံ့ဖြိုးတိုးတက်မှုဖိုရမ် အစည်းအဝေးဖွင့်ပွဲ အခမ်းအနား မိန့်ခွန်းပြောကြားစဉ် သမ္မတဦးသိန်းစိန်က ကချင်ကေအိုင်အေအဖွဲ့နှင့် ငြိမ်းချမ်းရေးဆွေးနွေးရန် ဖိတ်ခေါ်ပါကြောင်း ထည့်သွင်းပြောကြားသွားခြင်းဖြစ်သည်။
သမ္မတဦးသိန်းစိန်က တပ်မတော်က ဆောင်ရွက်လျက်ရှိသော စစ်ရေးလှုပ်ရှားမှုများကို ရပ်ဆိုင်းရန် ၎င်းအနေဖြင့် အမိန့်ပေးလိုက်ပြီဖြစ်ပြီး ကေအိုင်အေအနေနှင့်လည်း စစ်ရေးလှုပ်ရှားမှုများ ရပ်ဆိုင်းထားရန် လိုအပ်ကြောင်း၊ ၎င်းအနေဖြင့် ငြိမ်းချမ်းရေးရရှိသည်အထိ ဆောင်ရွက်ရန် ဆုံးဖြတ်ထားပြီးဖြစ်ကြောင်း ဦးသိန်းစိန်က ပြောသည်။
“အလျဉ်းသင့်လို့ ကေအိုင်အေအဖွဲ့နဲ့ ငြိမ်းချမ်းရေးကိစ္စကို ပြောပြလိုပါတယ်။ စစ်မှန်တဲ့ ငြိမ်းချမ်းရေး ရရှိသည်အထိ ကျနော်အနေနဲ့ ဆောင်ရွက်မှာဖြစ်ပါတယ်။ ကေအိုင်အိုကိုလည်း ငြိမ်းချမ်းရေးဆောင်ရွက်ဖို့ ဆက်လက်ကမ်းလှမ်း ထားပြီး ယခုလည်း ဒီနေရာကနေ ထပ်မံဖိတ်ခေါ်လိုက်ပါတယ်။ မကြာမီ ငြိမ်းချမ်းရေးကို လက်ကမ်းလာနိုင်မယ်လို့ ယုံကြည်ထားပါတယ်။ ယခုအခါ တပ်မတော်က အကန့်အသတ်နဲ့ ဆောင်ရွက်နေတဲ့ စစ်ရေးဆောင်ရွက်မှုများရပ်ဆိုင်းဖို့ ကျနော်အနေနဲ့ အမိန့်ပေးထားပြီးဖြစ်ပါတယ်။ တဖက်ကလည်း အလားတူ ရပ်ဆိုင်းပေးထားဖို့လိုအပ်ပါတယ်” ဟု ဦးသိန်းစိန်က ဆက်လက်ပြောသည်။
အစိုးရနှင့်အပစ်အခတ်ရပ်စဲထားသော လက်နက်ကိုင်အဖွဲ့၁၀ ဖွဲ့နှင့် နိုင်ငံရေးဆွေးနွေးမှုများကို ယခုနှစ် နှစ်ဆန်းပိုင်းတွင် စတင်ပြုလုပ်မည်ဟု ဦးသိန်းစိန်က ဆိုသည်။
“ကေအိုင်အိုကလွဲပြီး ကျန်တဲ့အဖွဲ့ ၁၀ ဖွဲ့နဲ့ အပစ်အခတ်ရပ်စဲရေး လက်မှတ်ရေးထိုးပြီး Political dialogue ကိစ္စတွေကို ၂၀၁၃ နှစ်ဦးပို်င်းမှာ စပြီး ဆောင်ရွက်ဖို့ ပြင်ဆင်နေပါတယ်” ဟု သမ္မတ ဦးသိန်းစိန်က ဆက်လက် ပြောသည်။
၁၈ လကြာဖြစ်ပွားလျက်ရှိသော ကေအိုင်အေနှင့် အစိုးရတပ်များအကြား တိုက်ပွဲများကြောင့် လူဦးရေ တသိန်း နီးပါး အိုးအိမ်များစွန့်ခွာထွက်ပြေးနေကြရကြောင်း ကချင်လူမှုအဖွဲ့အစည်းများ၏ ထုတ်ပြန်ချက်အရ သိရှိရသည်။
ယမန်နေ့ကလည်း ပြည်သူ့လွှတ်တော်၊ အမျိုးသားလွှတ်တော်တို့ကလည်း ကေအိုင်အေနှင့်အစိုးရအကြား တိုက်ပွဲများရပ်ဆိုင်းပြီး ငြိမ်းချမ်းရေးဆွေးနွေးရန် နှစ်ဖက်စလုံးကို တိုက်တွန်းကြောင်း ကြေညာချက်များ ထုတ်ပြန်ခဲ့ကြသည်။
မြန်မာအစိုးရသတင်းထုတ်ပြန်ရေးအဖွဲ့ကလည်း ကချင်ပြည်နယ် လဂျားယန်ဒေသတွင် တပ်မတော်အနေဖြင့် နယ်မြေရှင်းလင်းမှုများဆောင်ရွက်ပြီးစီးသည့်အတွက် စစ်ရေးလှုပ်ရှားမှုများကို ယနေ့ မနက် စတင်ရပ်ဆိုင်းထားမည်ဖြစ်ကြောင်း ယမန်နေ့က ထုတ်ပြန်ကြေညာသွားသည်။

http://burma.irrawaddy.org/archives/31392

အပြည့်အစုံသို့... »

ကချင်တိုက်ပွဲ အစိုးရ နဲ့ KIA ပြန်လှန်စွပ်စွဲ

ကချင်ပြည်နယ် ဖားကန့်မြို့မှာရှိတဲ့ ရဲစခန်းတခုကို KIA ကချင်လွတ်မြောက်ရေး တပ်ဖွဲ့တွေက ၀င်ရောက် တိုက်ခိုက်ခဲ့တဲ့ အတွက် ရဲတပ်ဖွဲ့ဝင် ၂ ဦး သေဆုံးသွားတယ်လို့ သမ္မတ ပြောခွင့်ရပုဂ္ဂိုလ် ဦးရဲထွဋ်က ပြောပါတယ်။ ဒါပေမဲ့ ကချင်ပြည်နယ် လဂျားယန်ဘက်ကို မြန်မာစစ်တပ်က ဒီကနေ့အထိ ထိုးစစ်ဆင် တိုက်ခိုက်မှုတွေ ပြုလုပ်နေတုန်းပဲလို့ ABSDF မြောက်ပိုင်းတပ်ဖွဲ့ဝင်တွေက ပြောပါတယ်။ ကချင်ပြည်နယ်အတွင်းက နောက်ဆုံး အခြေအနေတွေနဲ့ ပတ်သက်ပြီး အခုလို အပြန်အလှန် စွပ်စွဲမှုတွေ ရှိတဲ့အကြောင်း ဇော်ဝင်းလှိုင်က စုစည်း တင်ပြပေးထားပါတယ်။

မြန်မာအစိုးရဘက်က ကချင်ပြည်နယ် လဂျားယန်ဒေသကို ထိုးစစ်ဆင် တိုက်ခိုက်နေတာတွေ ဇန်နဝါရီလ ၁၉ ရက်နေ့မှာ ရပ်တန့်မယ်လို့ ကြေညာချက် ထုတ်ပြန်အပြီးမှာ တိုက်ပွဲတွေ ထပ်မံဖြစ်ပွားနေတဲ့အကြောင်း နှစ်ဘက် အပြန်အလှန် စွပ်စွဲ ပြောဆိုမှုတွေ ထွက်လာတာပါ။

စနေနေ့ မနက်အစောပိုင်းမှာ KIA ကချင်လွတ်မြောက်ရေးတပ်ဖွဲ့တွေက ဖားကန့်မြို့ပေါ်မှာရှိတဲ့ ရဲစခန်းတခုကို ၀င်ရောက် စီးနင်း တိုက်ခိုက်ခဲ့တာကြောင့် ရဲတပ်ဖွဲ့ဝင် ၂ ဦး သေဆုံးခဲ့သလို ဗန်းမော်ဘက်မှာ ဖြစ်ပွားခဲ့တဲ့ တိုက်ခိုက်မှုကြောင့်လည်း လူအတော်များများ ထိခိုက်ဒဏ်ရာ ရခဲ့တယ်လို့ သမ္မတ ဦးသိန်းစိန်ရဲ့ ပြောခွင့်ရပုဂ္ဂိုလ်လည်းဖြစ်၊ ပြန်ကြားရေးဝန်ကြီးဌာန ဒုတိယဝန်ကြီးလည်းဖြစ်တဲ့ ဦးရဲထွဋ်က ဗွီအိုအေကို ပြောပါတယ်။

“ဒီနေ့မနက် ၄ နာရီခွဲ ကျော်ကျော်လောက်မှာ ဖားကန့်မြို့နယ်၊ ကာမိုင်း မြို့နယ်ခွဲ ရဲစခန်းကို KIA အင်အား ၁၀၀ လောက် ဆိုက်ပါတယ်။ ရ နာရီ ၄၅ မှာတော့ ကျနော်တို့ ရဲစခန်းက ရဲတပ်ဖွဲ့ဝင်တွေ ဆုတ်ပေးလိုက်ရပါတယ်။ KIA အဖွဲ့တွေကတော့ ၉ နာရီ ၄၅ မှာ စခန်းကို မီးရှို့ပြီးတော့ ပြန်ထွက် သွားပါတယ်။ အဲဒီ တိုက်ခိုက်မှုမှာ ရဲတပ်ဖွဲ့က ရဲတပ်သား ၂ ယောက် ကျဆုံးပါတယ်။ ၅ ယောက် ဒဏ်ရာ ရပါတယ်။”

KIA ဘက်ကရော အကျအဆုံး ရှိပါလား။ -

“အဲဒါတော့ ကျနော်တို့ မသိပါဘူးခင်ဗျာ။ ဟိုမှာတော့ မကျန်ခဲ့ဘူး။ ရရင်တော့ သူတို့ဟာသူတို့ သယ်သွားမှာပေါ့။ ရဲစခန်းနဲ့ လူနေအိမ်တချို့ မီးလောင်သွားပါတယ်။ နောက်တခုက ဒီနေ့မနက် ၁၀ နာရီ ၄၅ မိနစ်မှာပါ။ ဗန်းမော်-လွယ်ဂျယ် ကားလမ်း မိုင်နိုင် (၂၇) မှာ ဗန်းမော်ကနေ လွယ်ဂျယ်ကိုလာတဲ ခရီးသည်တင် ဗန်ကား ၂ စီးနဲ့ ဟိုင်းလက်ကား ၁ စီးကို မိုင်းခွဲ တိုက်ခိုက် ခံရပါတယ်။ အမျိုးသား ၁၈ ဦး၊ အမျိုးသမီး ၄ ဦး ဒဏ်ရာ ရပါတယ်။ အားလုံး အရပ်သားတွေ ချည်းပါပဲ။”

လုံခြုံရေးအတွက် လိုအပ်တဲ့ ကန့်သတ် ရည်မှန်းချက်တွေကို ရရှိပြီး ဖြစ်တဲ့အတွက် ၂၀၁၃ ခုနှစ်၊ ဇန်နဝါရီလ ၁၉ ရက် မနက် ၆  နာရီက စတင်ပြီး လဂျားယန် ဒေသက နယ်မြေရှင်းလင်းမှု စစ်ဆင်ရေးတွေကို ရပ်ဆိုင်းမှာ ဖြစ်တဲ့ကြောင်း အစိုးရသတင်းထုတ်ပြန်ရေးအဖွဲ့က ဇန်နဝါရီ ၁၈ ရက်နေ့မှာ ကြေညာချက် ထုတ်ပြန်ခဲ့တာပါ။

ဒါ့အပြင် အစိုးရတပ်ဖွဲ့တွေ အနေနဲ့ ကိုယ့်ကိုယ်ကို ကာကွယ်ရန်မှအပ စတင် ထိုးစစ်ဆင် တိုက်ခိုက်မှု မပြုလုပ်ဖို့လည်း သမ္မတက ညွန်ကြားချက် ထုတ်ပြန်ထားတယ်လို့ အဲဒီ ကြေညာချက်မှာ ဖော်ပြ ထားတဲ့အကြောင်း ဦးရဲထွဋ်က ပြောပါတယ်။

“ကျနော်တို့က ပြောသလိုပဲဗျ။ ကျနော်တို့တပ်ကို လာမပစ်သရွေ့၊ ကျနော်တို့ စတင် ပစ်ခတ်တာ လုံးဝ မလုပ်ပါဘူး။ အဲဒီမှာဖြစ်တဲ့ တိုက်ပွဲတွေကလည်း သူတို့က လာပစ်ရင်တော့ ကျနော်တို့က ခုခံပစ်တာတော့ ရှိနိုင်တာပေါ့ဗျာ။ တကယ်ကျတော့ စပြီးတော့ ကျနော်တို့ဘက်က ရပ်ဆိုင်းပြီးနောက်မှာ တိုက်ခိုက်တာ KIA အဖွဲ့က ဖြစ်ပါတယ်။ ဖားကန့်မှာ ရဲစခန်းတခုကို ၀င်စီးသွားပါတယ်။ လွယ်ဂျယ်လမ်းမှာ ကားမိုင်းဗုံးခွဲ တိုက်ခိုက်လို့ အရပ်သား ၂၂ ယောက် ဒဏ်ရာရတာဖြစ်ပါတယ်။ အရှင်းကြီးပါပဲ၊ အစကတည်းက ကျနော်တို့က သမ္မတကြီး ထုတ်ကတည်းကိုက ကချင်ပြည်နယ်နဲ့ဖြစ်တဲ့ ပဋိပက္ခတင် မဟုတ်ပါဘူး။ ရှမ်းပြည်မြောက်ပိုင်း ကွပ်ခိုင် ဒေသတွေမှာပါ အပါအဝင် တပ်မတော်က မိမိကိုယ်မိမိ ခုခံကာကွယ်ရန်မှအပ ပစ်ခတ်တိုက်ခိုက်မှုများ မလုပ်ရန်လို့ နဂိုကတည်းက ပြောထားပြီးသားပါ။ ဒီကြေညာချက်မှာလည်း လဂျားယန်ကို သီးခြား ရည်ညွန်း ပြောတာကတော့ လဂျားယန်မှာ အခုတလော တိုက်ပွဲတွေ ပြင်းထန်နေတဲ့အတွက်ကြောင့်မိုလို့ ကျနော်တို့က လဂျားယန်မှာဖြစ်တဲ့ နယ်မြေရှင်းလင်းမှုဟာကို သီးခြား ရည်ညွန်းပြီးတော့ ပြောတာပါ။”

မြန်မာအစိုးရဘက်က အဲဒီလို ကြေညာချက်၊ အမိန့်တွေ ထုတ်ပြန်ထားပေမဲ့လည်း အပစ်ရပ်မယ်လို့ ပြောထားတဲ့ ၁၉ ရက်နေ့ မနက်ပိုင်းမှာ မြန်မာစစ်တပ်ဘက်က ထိုးစစ်ဆင် တိုက်ခိုက်မှုတွေ ဆက်လက် ပြုလုပ်နေသေးတဲ့ အကြောင်း KIA တပ်ဖွဲ့တွေနဲ့ ပူးတွဲ ပါ၀င်တိုက်ခိုက်နေတဲ့ ABSDF မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး မြောက်ပိုင်းနယ်မြေက နိုင်ငံရေးတာဝန်ခံ ရဲဘော် ကျော်ကျော်က ဗွီအိုအေကို ပြောပါတယ်။

“ခုနကပဲ တိုက်ပွဲဖြစ်နေတယ်။ ၁၁ နာရီနဲ့ ၃၅ မိနစ်လောက်က။ အခု မြန်မာ့တပ်မတော်က စပြီး စဖောက်တာပေါ့နော်။ ကြည်းကြောင်းတွေကို စဖောက်နေတယ်။ သူတို့ကတော့ အင်အားကတော့ အလုံးအရင်းနဲ့ သုံးနေတာပဲလေ။ သူတို့က လက်နက်ကြီးနဲ့ လှမ်းပစ်ပြီးတော့ ထုံးစံအတိုင်းပဲပေါ့၊ လက်နက်ငယ်နဲ့ အောက်က ပြန်ပစ်တာပေါ့။ KIA က အခုလောလောဆယ် ရှိတဲ့နေရာမှာပဲ ပြန်ပြီးတော့ ရှေ့တက်မလာအောင် တိုးမလာအောင် ကန့်ထားတာ။ ကန့်ထားတဲ့အနေအထားပေါ့ဗျာ။ လေကြောင်းအကူကတော့ ဒီနေ့ ဘာမှ မကြားရသေးဘူး။”

ဇန်နဝါရီ ၁၈ ရက်၊ သောကြာနေ့ကလည်း ဒီဒေသမှာ တိုက်ပွဲတွေ တနေကုန်နီးပါး ဖြစ်ပွားခဲ့တယ်လို့ ရဲဘော်ကျော်ကျော်က ပြောပါတယ်။ တဘက်မှာ အခုလို တိုက်ပွဲတွေ ဖြစ်ပွားနေတဲ့ တချိန်တည်းမှာပဲ မြန်မာစစ်တပ်ဘက်က တပ်ဖွဲ့တွေ တဖြည်းဖြည်းနဲ့ တိုးလာနေတာကို တွေ့ရတဲ့ အတွက် အထက်က အမိန့်ထုတ်ပြန်ထားတာနဲ့ အောက်ခြေ တပ်ဖွဲ့တွေရဲ့ လုပ်ရပ် ကွာခြားနေတယ်လို့လည်း ရဲဘော် ကျော်ကျော်က ပြောပါတယ်။

မြန်မာအစိုးရဘက်ကတော့ KIO ကချင်လွတ်မြောက်ရေးအဖွဲ့နဲ့ တွေ့ဆုံဆွေးနွေး မှုတွေ ဖြစ်ပေါ်နိုင်အောင် ဆက်လက် လုပ်ဆောင်နေတယ်လို့ သမ္မတ ပြောခွင့်ရပုဂ္ဂိုလ် ဦးရဲထွဋ်က ပြောပါတယ်။

“ကျနော်တို့ကတော့ ဒါတွေ မကြေညာခင်ကလည်း ကျနော်တို့ ငြိမ်းချမ်းရေး ဖော်ဆောင်ရေးအဖွဲ့က ဆက်ပြီးတော့ ကမ်းလှမ်းထားပါတယ်။ အခုလည်း ကျနော်တို့ မကြာခင်မှာ ကမ်းလှမ်းမှု ကျနော်တို့ ထပ်ပြီးတော့ လုပ်မှာပါ။ ဒီနေ့လောက်တောင်မှ ကျနော်တို့ လုပ်ဖြစ်မလား မသိသေးဘူး။”

အစိုးရတပ်ဖွဲ့တွေအနေနဲ့ ကချင်ပြည်နယ် လဂျားယန်ဒေသတွေတင် သာမကပဲ ရှမ်းပြည်နယ်အပါအဝင် တခြား တိုက်ပွဲဖြစ်ပွားနေတဲ့ ဒေသတွေအားလုံးမှာ ထိုးစစ်ဆင် တိုက်ခိုက်မှုတွေ ရပ်တန့်ထားဖို့ ညွှန်ကြားချက် ထုတ်ပြန်ထားတယ်လို့ ဦးရဲထွဋ်က ပြောပါတယ်။

ကချင်ပြည်နယ်အတွင်း ဖြစ်ပွားနေတဲ့ တိုက်ပွဲတွေကြောင့် ဒေသခံ ပြည်သူ အများအပြား အသက်ဆုံးရှုံးခဲ့ရပြီး ဖြစ်သလို သောင်းနဲ့ချီတဲ့ အပြစ်မဲ့ ပြည်သူတွေလည်း အိုးအိမ်စွန့်ခွာ ထွက်ပြေးနေကြရတာ ဖြစ်ပါတယ်။

http://burmese.voanews.com/content/kachin-fighting-01-19-134/1587076.html

အပြည့်အစုံသို့... »

ဦးသိန်းစိန်အစိုးရက ကချင်ပြည်နယ်အတွင်း စစ်ဆင်ရေး ရပ်ဆိုင်းမည့် ထုတ်ပြန်ချက်အပေါ် သုံးသပ်ချက်

၂၀၁၃ ခုနှစ် ဇန်နဝါရီလ ၁၉ ရက် နံနက် ၆ နာရီမှ စတင်ပြီး နယ်မြေရှင်းလင်းစစ်ဆင်ရေးများကို ရပ်ဆိုင်းမည်ဖြစ်ကြောင်း ဦးသိန်းစိန်အစိုးရ၏ ထုတ်ပြန်ချက်နှင့် စပ်လျှဉ်း၍ အောက်ပါအတိုင်း သုံးသပ်ပါသည်။

(၁) စစ်အစိုးရ၏ တပ်များသည် ကေအိုင်အေ တပ်များအား ကြီးကြီးမားမား စတင်ထိုးစစ်ဆင်သည့် ၂၀၁၂ ခုနှစ် ဒီဇင်္ဘာလ (၁၄) ရက်နေ့မှစ၍ ၂၀၁၃ခုနှစ် ဇန်နဝါရီလ (၁၈) ရက်နေ့အထိ ရက်ပေါင်း ၃၃ ရက်မျှတွင် ကျဆုံး၊ ဒဏ်ရာရ၊ ထိခိုက် ဘဝနစ်နာ ပျက်စီးသွားကြရသော ရဲဘော်များ၏ အရေအတွက်မှာ ထောင်ဂဏန်းချီမျှ ရှိသည်ဟု သိရသည်။ တိုက်လေယာဉ်များ၊ စစ်ရဟတ်ယဉ်များ၊ ၁၂၀ နှင့် ၁၀၅ မီလီမီတာ အမြှောက်ကြီးများကိုပါ အသုံးပြု၍ ပြည်တွင်းစစ်သမိုင်း၌ အချိန်တိုအတွင်း အပြင်းထန်ဆုုံး တိုက်ခိုက်ခဲ့ရသဖြင့် ခန့်မှန်းတွက်ချက်မှုများအရ အမေရိကန်ဒေါ်လာ သန်းတရာကျော်မျှ ကုန်ကျခဲ့ရသည်။ ရရှိသည့် အကျိုးအမြတ်မှာ ပထဝီအရ ပွိုင့် (၇၇၁) အပါအဝင် လဂျားယန်တဝိုက်ရှိ တောင်ကုန်းအချို့မျှသာ ဖြစ်သည်။

(၂) အဆမတန်ကြီးမားလှသော စစ်လက်နက်အင်အားနှင့် လူအင်အားများကို အသုံးပြု၍ တိုက်ခိုက်ခဲ့သော်လည်း ကေအိုင်အို၊ ကေအိုင်အိုတခုလုံးကို အပြုတ်တိုက်နိုင်ရန်ဝေးစွ၊ ကချင်ပြည်နယ် ဒေသကြီးတခုလုံးကို လုံးဝ ချုုပ်ကိုင်နိုင်ရန် အိပ်မက်၍ပင်မရ၊ ပထဝီနယ်မြေအချို့မျှကိုသာ တိုးချဲ့သိမ်းပိုက်ထိမ်းချုပ်နိုင်ကြောင်း ထင်ရှားသည်။ စစ်ရေးသဘောသက်သက်အရ ကြည့်လျှင်ပင် စစ်အစိုးရအတွက် အရှံုးအမြတ် လုံးဝပင် မကာမိသော စစ်ပွဲဖြစ်သည်။ အရှံုးကြီး ရှံုးခဲ့သော စစ်ပွဲဖြစ်သည်။ တပြည်လုံးလူထုကြီးတရပ်လုံးအတွက် ပညာရေး၊ ကျမ္မာရေး အတွက်သုံးရမည့် ငွေများ အလဟသ ဖြစ်ခဲ့ရသည်။ မသေသင့်သော အောက်ခြေတပ်မတော်သားများ၊ ပေးသည့် အမိန့်အတိုင်း နာခံ တိုက်ပွဲဝင်ပေးခဲ့ရသည့် တပ်မတော်သားများ မလိုအပ်ဘဲ ဘဝနစ်နာ ပျက်စီးဆုံးရှံုးခဲ့ရသည်။ ယင်းအတွက် သမတ ဦးသိန်းစိန် နှင့် ကာချုပ် မင်းအောင်လှိုင်တို့ ထိပ်ဆုံးတွင် တာဝန်ရှိသည်။ ၄င်းတို့အနေဖြင့် လူထုအကျိုးစီးပွားကို ထောက်ထားလျှက် ပြည်တွင်းငြိမ်းချမ်းရေးကို မည်သို့တည်ဆောက်သင့်ကြောင်း ပြန်လည်သုံးသပ်သင့်ပြီဖြစ်သည်။

(၃) အစိုးရ၏ ထုတ်ပြန်ချက်တခုလုံးကို ခြံုကြည့်လျှင် အောက်ပါအတိုင်း သုံးသပ်မိသည်။

(က) စစ်ရေးနှင့်စပ်လျှဉ်း၍ ဖြစ်သမျှကိစ္စအားလုံးကို ကေအိုင်အို၊ ကေအိုင်အေအပေါ်သို့ အပြစ်ပုံချထားသည်။ သူခိုးက လူဟစ်သလို ဖြစ်နေသည်။ ပင်လုံစာချုပ်မတိုင်ခင်က သူ့ဖာသာ လွတ်လပ်စွာ ရပ်တည်ခဲ့သော ကချင်ပြည်၊ ပင်လုံစာချုပ်အရ ကိုုယ်ပို်င်အုပ်ချုပ်ခွင့်ရှိသော ကချင်ပြည်ကို ကချင်လူထုသဘောဆန္ဒနှင် ့ဆန့်ကျင်ကာ အတင်းဝင်ရောက် ကျူးကျော်တိုက်ခိုက်နေပါလျှက် ကိုယ့်ကိုယ်ကိုခုခံကာ ကွယ်သည်ဟု အကြောင်းပြခြင်းမှာ အဓိပ္ပါယ်မရှိ။ ဥပဒေအရ တရားမဝင်။

(ခ) အပုဒ် (ရ) တွင် ဖေါ်ပြထားသော “နောင်တွေ့ဆုံ ဆွေးနွေးမှုများတွင် KIO/KIA လက်နက်ကိုင်အဖွဲ့မှ တပ်ပိုင်းဆိုင်ရာများကို အဆုံးအဖြတ်ပေးနိုင်သည့် ပုဂ္ဂိုလ်များက တပ်မတော်နှင့် တွေ့ဆုံဆွေးနွေးညှိနှိုင်းရန် လိုအပ်သည်။” ဟု ဖေါ်ပြထားခြင်းမှာ ခြိမ်းခြောက်သည့် သဘောဆောင်သည်။ လွတ်လပ်သောအဖွဲ့အစည်းဖြစ်သည့် ကေအိုင်အို၏ အဖွဲ့အစည်းအတွင်း ဆုံးဖြတ်ပိုင်ခွင့်ကို ၀င်ရောက်လွှမ်းမိုးရာရောက်သည်။ သမိုင်းကြောင်းအရကြည့်လျှင် ကချင်လူထုများ၏ သဘာဝသည် ခြိမ်းခြောက်၊ အနိုင်ကျင့်မှုများကို မကြိုက်လက်မခံကြ၊ ယခုလက်တွေ့တိုက်ပွဲဝင်ရာတွင်လည်း ရွတ်ရွတ်ချွန်ချွန်ပြန်လည်ခုခံကြသည်ကို ယနေ့ မြန်မာ့တပ်မတော်ခေါင်းဆောင်များ နားလည်သင့်၊ တန်ဘိုးထားသင့်သည်။ ပြည်ထောင်စု တည်ဆောက်မှုကို ခြိမ်းခြောက် အကြပ်ကိုင်သည့်နည်းဖြင့် မချဉ်းကပ်သင့်။

(၄) ကေအိုင်အိုက ဖက်ဒရယ်ပြည်ထောင်စုကို အခြေခံသည့် နိုင်ငံရေးလုပ်ငန်းစဉ်များ လုပ်ဆောင်ရန် နိုင်ငံရေးအရ တောင်းဆိုသည့်အပေါ် မတန်တဆကြီးမားလှသော စစ်အင်အားကို အသုံးပြု၍ စစ်အစိုးရက စစ်ဆင်နွှဲခဲ့ခြင်းဖြစ်သည်။ ဤသည်မှာ မတရားသောစစ်ဖြစ်သည်။ မတရားသော စစ်ကို ဆန့်ကျင်သည့် လူထုလှုပ်ရှားမှုများ ပြည်တွင်းမှာရော နိုင်ငံတကာမှာပါ ပေါ်လာခဲ့သည်။ စစ်လေယာဉ်များသုံး၍ တိုက်ခိုက်ခြင်း၊ အမြှောက်ကြီးများနှင့် ပစ်သဖြင့် အရပ်သားလူထုများ သေဆုံးဒဏ်ရာရခြင်းများ ဖြစ်ပေါ်လာသောအခါ နိုင်ငံတကာဖိအားများ ကျရောက်လာခဲ့သည်။ ကချင်လွတ်မြောက်ရေးတပ်မတော်သားများက ကြံ့ကြံ့ခံ ခုခံတိုက်ပွဲဝင်၊ စစ်အစိုးရဘက်မှ အဆုံးအရှံုးများများပြား၊ အစိုးရ၏ ထိုးစစ်ကို ဆန့်ကျင်သည့် လူထုလှုပ်ရှားမှုများ တစတစ အားကောင်းလာ၊ အပစ်အခတ်ရပ်စဲရေး လုပ်ထားခဲ့ကြသည့် အခြားတိုင်းရင်းသား လက်နက်ကိုင်အဖွဲ့အစည်းများကလည်း ကန့်ကွက်လာ၊ နိုင်ငံတကာဖိအားများလည်း သက်ရောက်လာ၊ သူ့နယ်မြေအတွင်း လက်နက်ကြီးများကျရောက်ခြင်းကြောင့် တရုတ်အစိုးရ၏ ဖိအားလည်း ကျရောက်လာ၊ စသည်တို့ ပေါင်းဆုံသွားခြင်းကြောင့် ထိုးစစ်ရပ်ရန် ဆုံးဖြတ်လိုက်ခြင်းဟု သုံးသပ်သည်။

(၅) မည်သို့ပင်ဖြစ်စေ၊ ၂၀၁၃ ခုနှစ် ဇန်နဝါရီလ ၁၉ ရက် နံက်ခြောက်နာရီမှ စတင်ပြီး နယ်မြေရှင်းလင်းစစ်ဆင်ရေးများကို ရပ်ဆိုင်းလိုက်ခြင်းမှာမူ အပြုသဘောဘက်ကို ဦးတည်စေနိုင်မည့် ခြေလှမ်းဟု မှတ်ယူနိုင်ပါမည်။ တကယ်တန်း အပြုသဘောဘက်ကို ဦးတည်မတည် ဆိုသည်မှာ ဦးသိန်းစိန် ဆက်လှမ်းမည့် နိုင်ငံရေးခြေလှမ်းနှင့် ဆိုင်ပါမည်။ ဘာမှန်းမသိသော နိုင်ငံရေးဆွေးနွေးပွဲ ဟူသည်များဖြင့် နှစ်ပေါင်းမြောက်များစွာ အချိန်ဆွဲထားသည့်အချိန်တွင် စစ်အစိုးရက ၂၀၀၈ ဖွဲ့စည်းပုံကို ဆက်လက်အသက်သွင်း ခိုင်မာအောင်လုပ်သွားနိုင်မည့် အနေအထားကို ကေအိုင်အိုက စိုးရိမ်ပုံရသည်။

(၆) ပြည်တွင်းငြိမ်းချမ်းရေးကို စစ်မှန်စွာတည်ဆောက်လိုပါက ဦးသိန်းစိန်အစိုးရအနေဖြင့် ဖက်ဒရယ်ပြည်ထောင်စု တည်ဆောက်ခွင့်ရစမည့် နိုင်ငံရေးလုပ်ငန်းစဉ်များ လုပ်ဆောင်သွားမည်ဖြစ်ကြောင်း အတိအလင်းကြေငြာလျှက် နိုင်ငံရေးဆွေးနွေးပွဲများ တက်ရောက်လာရန် ဖိတ်ခေါ်သင့်သည်၊ ကေအိုင်အိုက တင်သွင်းလာမည့် နိုင်ငံရေးတောင်းဆိုချက်များကို လက်ခံစဉ်းစားသင့်သည်ဟု သုံးသပ်သည်။

(၇) အဓိကအားဖြင့် စစ်ဘေးဒုက္ခသည်များ၏ ဘဝကို ထိထိရောက်ရောက် ပြန်လည်ကုစားပေးရန်ဖြစ်သည်။ ၁၉၉၄ အပစ်အခတ်ရပ်စဲရေးကို စတင်ချိုးဖေါက် တိုက်ခိုက်သူမှာ အစိုးရဘက်မှဖြစ်သည်။ အစိုးရတပ်များက မီးတင်ရှို့ခဲ့သဖြင့် မီးလောင်ပျက်စီး ဆုံးရှံုးသွားခဲ့သည့် လူထု၏ နေအိမ်များကို ပြန်လည်ဆောက်လုပ်ပေးရန်၊ ဆုံးရှံုးသွားခဲ့သည့် ပစ္စည်းများအတွက် လျော်ကြေးပေးရန်၊ နေအိမ်များ၊ ဆေးပေးခန်းများ၊ ဘုရားရှိခိုးကျောင်းများအား မီးရှို့ဖျက်ဆီးခြင်းမှာ စစ်ရာဇဝတ်မှု ကျူးလွန်ရာရောက်သဖြင့် ပြစ်မှုကျူးလွန်ခဲ့သူများကို ဖေါ်ထုတ်ပြီး အရပ်ဘက်ဆိုင်ရာ တရားရုံးတွင် ရုံးတင် တရားစွဲဆို အပြစ်ပေးရန် လိုအပ်သည်။

(၈) အစိုးရဆိုလျှင် လူထု၏ လုံခြံုမှုကို တာဝန်ယူရမြဲဖြစ်သည်။ ဤသည်မှာ တကမ္ဘာလုံးရှိ အစိုးရအားလုံး မည်သည့်အစိုးရမျှ မငြင်းနိင်သော အနိမ့်ဆုံးတာဝန် ဖြစ်သည်။ ဇန်နဝါရီလ (၁၄) ရက်နေ့တွင် လိုင်ဇာမြို့ပေါ်သို့ လက်နက်ကြီးများ ကျရောက်ပြီး အရပ်သားလူထုများ သေကြေဒဏ်ရာရခဲ့ကြသည်။ ယင်းအတွက် ဦးသိန်းစိန် အစိုးရတွင် လုံးဝတာဝန်ရှိသည်။ ၄င်းတို့စစ်တပ်မှ ပစ်ခြင်းမဟုတ်ဟု ဘူးကွယ်ရုံမျှနှင့် မလုံလောက်။ အခြားမည်သည့် အဖွဲ့အစည်းက ပစ်ကြောင်းလည်း အစိုးရက မဖေါ်ထုတ်နိုင်။ စစ်လေယာဉ်ဖြင့် ထိုးစစ်ဆင်တိုက်ခိုက်ခဲ့ပါလျှက် ရိက္ခာပို့တာပါ ငြင်းခဲ့ပြီး နောက်ပိုင်းကျမှ ထိုးစစ်ဆင်တိုက်ခိုက်တာပါ ဟူ၍ အစိုးရက ဗြောင်လိမ်ခဲ့သည့် သာဓက ရှိသည်။ လက်နက်ကြီးများဖြင့် ပစ်ခတ်သည်မှာ အစိုးရတပ်မှလွဲ၍ အခြားမရှိ။ သေဆုံးသွားခဲ့သူ လူတဦးလျှင် အနည်းဆုံး အမေရိကန် ဒေါ်လာငွေ တသိန်းထက် မနည်းသော လျော်ကြေးငွေ ပေးအပ်ရန် အစိုးရတွင် တာဝန်ရှိသည်။

(၉) ကချင်ပြည်နယ်အတွင်း ကေအိုင်အေ ထိမ်းချုပ်ထားရာနေရာများတွင် ရောက်ရှိခိုလှုံနေကြသော စစ်ဘေးဒုက္ခသည်ဦးရေမှာ ခုနှစ်သောင်းကျော်မျှ ရှိသည်ဟု သိရသည်။ ကုလသမဂ္ဂအပါအဝင် နိုင်ငံတကာအဖွဲ့အစည်းများက ၄င်းတို့အတွက် ရိက္ခာဆေးဝါးများ၊ အခြားလိုအပ်သော လူမှုရေးအကူအညီများ ပေးအပ်ရန်ကြိုးပမ်းသည်ကို ဦးသိန်းစိန်အစိုးရက လူသားချင်း စာနာစိတ်ကင်းမဲ့စွာ ပိတ်ဆို့ထားခဲ့သည်။ ဤသည်မှာ မြန်မာနိုင်ငံက လက်မှတ်ရေး ထိုးအတည်ပြုထားသော ၁၉၄၉ ခုနှစ် ဂျီနီဗာကွန်ဗင်းရှင်း (Geneva Convention relative to the Protection of Civilian Persons in Time of War) ပုဒ်မ ၂၃ ကို ချိုးဖေါက်၍ နိုင်ငံတကာပြစ်မှုကြီး ကျူးလွန်ခြင်းဖြစ်သည်။ နိုင်ငံတကာပြစ်မှုဆိုင်ရာ တရားရုံး ရောမဥပဒေ (Rome Statue of the International Criminal Court) ၏ ပုဒ်မ (၈) စစ်ရာဇဝတ်မှု ဆိုင်ရာ ပြဌာန်းချက် ပုဒ်မခွဲ (၂) အပုဒ် (၂၅) ကို ချိုးဖေါက်ကျူးလွန်ရာရောက်သည်။ ကချင်ပြည်နယ်တခုလုံးအတွင်းရှိ စစ်ဘေးဒုက္ခသည်များ အားလုံးအား ပေးအပ်မည့် လူသားချင်းစာနာထောက်ထားသည့် အကူအညီမှန်သမျှ ချက်ခြင်းရရှိကြစေရန် ဦးသိန်းစိန်အစိုးရက အမြန်ဆုံး ဆောင်ရွက်ရန် တောင်းဆိုသည်။

အောင်ထူး (ရှေ့နေ) (မဟာဝိဇ္ဇာ၊ လူ့အခွင့်အရေး)
၂၀၁၃ ခုနှစ် ဇန်နဝါရီလ ၁၈ ရက်

---------------------------------------------------------------------------------

ပြည်ထောင်စုသမ္မတမြန်မာနိုင်ငံတော် သတင်းထုတ်ပြန်ရေးအဖွဲ့
သတင်းထုတ်ပြန်ချက် (၃/၂၀၁၃) ၁၃၇၄ ခုနှစ် ၊ ပြာသိုလဆန်း ရ ရက် (၂၀၁၃ ခုနှစ် ၊ ဇန်နဝါရီလ ၁၈ ရက်)

၁။ ကချင်ပြည်နယ်၊ လဂျားယန်ဒေသတွင် KIO/KIA လက်နက်ကိုင်တပ်ဖွဲ့များက လဂျားယန် တပ်မတော်စခန်းအား ၂၀၁၂ ခုနှစ် မတ်လမှစတင်ပြီး ဝန်းရံပိတ်ဆို့ထားခြင်း၊ လဂျားယန်စခန်းသို့ ရိက္ခာပို့ဆောင်သည့် တပ်မတော်စစ်ကြောင်းများကို ချံုခိုတိုက်ခိုက်ခြင်း၊ မြစ်ကြီးနား-ဗန်းမော် ပြည်ထောင်စုလမ်းမကြီးကို အများပြည်သူများ အသုံးမပြုနိုင်အောင် ပိတ်ဆို့ထားခြင်း၊ တံတားများကို မိုင်းခွဲဖျက်ဆီးခြင်းများအား ပြုလုပ်ခဲ့သည့်အတွက် ၂၀၁၂ ခုနှစ်၊ ဒီဇင်ဘာလ ၂၇ ရက်မှ စတင်၍ ပွိုင့် ရ၇၁ တောင်ကုန်း အပါအဝင် လဂျားယန်ဒေသရှိ KIO/ KIA ခြေကုတ်စခန်းများအား တပ်မတော်စစ်ကြောင်းများမှ ရှင်းလင်းတိုက်ခိုက်မှုများ ပြုလုပ်ခဲ့ရသည်။

၂။ ၂၀၁၁ ခုနှစ် ဇွန်လ၌ တပ်မတော်နှင့် KIO/KIA ကြား တိုက်ခိုက်မှုများ ပြန်လည်ဖြစ်ပွားချိန်မှစပြီး တပ်မတော်အနေဖြင့် နိုင်ငံတော်သမ္မတ၏ ညွှန်ကြားချက်အတိုင်း မိမိကိုယ်မိမိ ခုခံကာကွယ်နိုင်ရန်အတွက်သာ ပစ်ခတ်မှုများ ပြုလုပ်ခဲ့သည်။ သို့သော် KIO/KIA လက်နက်ကိုင်တပ်ဖွဲ့များအနေဖြင့် လဂျားယန်စခန်းရှိ တပ်မတော်သားများထံသို့ ရိက္ခာပို့ဆောင်သည့် တပ်မတော် စစ်ကြောင်းများကို သုံးကြိမ် ချံုခိုတိုက်ခိုက်ခဲ့သည့်အတွက် တပ်မတော်သား(၃၅)ဦး ကျဆုံးကာ (၁၉ဝ)ဦး ဒဏ်ရာရရှိခဲ့သည်။ အဆိုပါ လဂျားယန်စခန်းမှာ ၁၉၉၄ ခုနှစ် အပစ်အခတ် ရပ်စဲရေးမတိုင်မီ (KIO/KIA တို့၏ လိုင်ဇာစခန်းမရှိမီ) ကပင် တပ်မတော်က အခြေစိုက်၍ နယ်မြေလုံခြံုရေး ဆောင်ရွက်ခဲ့သည့် စခန်းဖြစ်ပြီး ထိုစခန်းသို့ ရိက္ခာများ ပို့ဆောင်မည်ဖြစ်ကြောင်းကိုလည်း KIO/KIA အဖွဲ့သို့ ကြိုတင်အသိပေးပြီးမှ ဆောင်ရွက်ခဲ့သည့်တိုင် KIO/KIA အဖွဲ့က ကြားဖြတ်တိုက်ခိုက်ခဲ့ခြင်းဖြစ်သည်။ ထိုကဲ့သို့ ရိက္ခာပို့ဆောင်နိုင်ခြင်း မရှိသည့်အတွက် စခန်းအတွင်းရှိ တပ်မတော်သား စစ်သည်များအနေဖြင့် စားနပ်ရိက္ခာများ ပြတ်လပ်ပြီး အသက်အန္တရာယ် စိုးရိမ်ရသည့် အခြေအနေကို ရောက်ရှိလာသောကြောင့် စစ်သည်များ အသက်ဆုံးးမှုမှ ကာကွယ်နိုင်ရန်အတွက် အထက်ပါနယ်မြေ ရှင်းလင်းမှုများကို တပ်မတော်က မလွဲမရှောင်သာ ဆောင်ရွက်ခဲ့ရခြင်း ဖြစ်သည်။

၃။ လေကြောင်းပစ်ကူ ရယူခဲ့ရခြင်းမှာလည်း KIO/KIA တပ်စခန်း ပစ်မှတ်များကိုသာ တိတိကျကျ ထိမှန် ချေမှုန်းနိုင်ရန်နှင့် စစ်ပွဲနှင့်မသက်ဆိုင်သော အရပ်သားပစ်မှတ်များကို ရှောင်လွဲလိုသောကြောင့်ဖြစ်သည်။ KIO/ KIA တပ်များသည် လဂျားယန်စခန်းအား အပြင်မှ သံဆူးကြိုးခတ်၍ အဆက်အသွယ် ဖြတ်တောက်ထားသောကြောင့် တပ်စခန်းအတွင်းရှိ တပ်မတော်သားစစ်သည်များအတွက် ရိက္ခာပို့ရန်၊ စစ်ရေးအရ တိုက်ခိုက်ရန်သာ ရှိသဖြင့် မလုပ်မဖြစ် လုပ်ခဲ့ရခြင်းဖြစ်သည်။ တပ်မတော်သည် ငြိမ်းချမ်းရေးစကားဝိုင်းမှတစ်ဆင့် မိမိတပ်စခန်းများကို ရွှေ့ပြောင်းပေးရန် ဆုံးဖြတ်ထားခဲ့သော်လည်း တစ်ဘက်လက်နက်ကိုင် အဖွဲ့အစည်းဖြစ်သည့် KIO/KIA မှ လာရောက်ခြင်းမရှိဘဲ နိုင်ငံတော်အစိုးရမှ ကမ်းလှမ်းချက်ကို ပယ်ချခဲ့ခြင်းနှင့် ရွှေလီဆွေးနွေးပွဲကို ပျက်ပြားစေခဲ့ခြင်း စသည့် အကြောင်းအချက်များသည် ယခုတိုက်ပွဲများကို ဖိတ်ခေါ်သကဲ့သို့ ဖြစ်လာစေသည်။

၄။ ယခုအခါ တပ်မတော်အနေဖြင့် လဂျားယန်စခန်းရှိ စစ်သည်များ လုံခြံုရေးနှင့် မြစ်ကြီးနား-ဗန်းမော် ပြည်ထောင်စုလမ်းမကြီး လုံခြံုရေးအတွက် လိုအပ်သည့် ကန့်သတ်ရည်မှန်းချက်များကို ရရှိပြီးဖြစ်သောကြောင့် ၂၀၁၃ ခုနှစ်၊ ဇန်နဝါရီလ ၁၉ ရက် ၀၆းဝဝ နာရီမှ စတင်ပြီး လဂျားယန်ဒေသရှိ နယ်မြေရှင်းလင်းမှု စစ်ဆင်ရေးများကို ရပ်ဆိုင်းမည်ဖြစ်ကြောင်း သိရှိရသည်။

၅။ တပ်မတော်အနေဖြင့် နိုင်ငံတော် သမ္မတ၏ ညွှန်ကြားချက်ဖြစ်သည့် မိမိကိုယ်မိမိ ခုခံကာကွယ်ရန်မှအပ ပစ်ခတ်တိုက်ခိုက်မှုများ မပြုလုပ်ရန် ဆိုသည့်အချက်ကို တိကျစွာ လိုက်နာသွားမည်ဖြစ်ကြောင်း တပ်မတော်ကာကွယ်ရေးဦးစီးချုပ်က ထပ်မံအတည်ပြု ပြောကြားသည်။ သို့သော် လက်နက်ကိုင် ပဋိပက္ခတစ်ခုတွင် တင်းမာမှု အရှိန်လျော့ကျစေရန်အတွက် နှစ်ဘက်လုံးက တိုက်ခိုက်မှုများကို ရပ်ဆိုင်းထားရန် လိုအပ်မည်ဖြစ်သည်။ ထို့ကြောင့် KIO/KIA အနေဖြင့်လည်း တပ်မတော်တပ်ဖွဲ့များကို စတင်တိုက်ခိုက်မှုမပြုရေး လက်အောက်တပ်ဖွဲ့များကို ညွှန်ကြားကြပ်မတ်သွားရန် တိုက်တွန်းသည်။ ပြီးခဲ့သော ဖြစ်စဉ်များကို ပြန်လည် လေ့လာပါက မိမိကိုယ်ကို ခုခံကာကွယ်ရုံမှအပ ချီတက် ထိုးစစ်ဆင် တိုက်ခိုက်ခြင်း မပြုရန် နိုင်ငံတော်သမ္မတရုံး၏ ညွှန်ကြားချက် ရရှိခဲ့သည့် ၂၀၁၁ ခုနှစ်၊ ဒီဇင်ဘာလ ၁၀ ရက်မှ ၂၀၁၃ ခုနှစ်၊ ဇန်နဝါရီလ ၁၅ ရက် အထိ KIO/KIA အဖွဲ့အနေဖြင့် လမ်းတံတား ဖောက်ခွဲဖျက်ဆီးမှု (၁၂၂)ကြိမ်၊ မိမိတပ်စခန်းများအား လာရောက်ငေ့်ယှက်ပစ်ခတ်ခြင်း (၆၄) ကြိမ်၊ အရပ်သားများ မိုင်းနင်းမိခြင်း (၃ဝ)ကြိမ်၊ လုယက် ဖျက်ဆီးခြင်း (၆ဝ)ကြိမ်၊ လူသစ် စုဆောင်းခြင်းနှင့် အဓမ္မဖမ်းဆီးခြင်း (၂၈) ကြိမ်ရှိခဲ့ပြီး မိမိတပ်များနှင့် ထိတွေ့မှုပေါင်း (၁ဝ၉၅) ကြိမ် ဖြစ်ပွားခဲ့ကာ ၎င်းဖြစ်စဉ်များတွင် အရာရှိစစ်သည် အများအပြား ကျဆုံးခြင်း၊ ဒဏ်ရာရခြင်းများ ရှိခဲ့သည်။

၆။ ထို့ပြင် ကချင်ပြည်နယ်အတွင်း ပြန်လည်ဖြစ်ပွားလာသည့် တိုက်ပွဲများကြောင့် ဒုက္ခရောက်နေရသည့် ပြည်သူများကို စာနာထောက်ထားသောအားဖြင့် အများပြည်သူ အသုံးပြုနေသည့် ကားလမ်း၊ ရထားလမ်းများကို ပိတ်ဆို့ခြင်း၊ မိုင်းခွဲတိုက်ခိုက်ခြင်းများ မပြုလုပ်ရန်လည်း လိုအပ်မည်ဖြစ်သည်။ လက်ရှိအချိန်တွင် KIO/KIA လက်နက်ကိုင်အဖွဲ့များက မန္တလေး-မြစ်ကြီးနား ရထားလမ်းတွင် မိုင်းခွဲတိုက်ခိုက်မှု (၅၆) ကြိမ်၊ မြစ်ကြီးနား-ဆွမ်ပရာဘွမ် ပူတာအိုလမ်းတွင် မိုင်းခွဲ တိုက်ခိုက်မှု (၁၅) ကြိမ်၊ မြစ်ကြီးနား- ဗန်းမော် ကားလမ်းတွင် မိုင်းခွဲတိုက်ခိုက်မှု (၄၂) ကြိမ် ပြုလုပ်ခဲ့သည့်အတွက် ပြည်သူများ ထိခိုက်ဒဏ်ရာရ အသက်ဆုံးရှုံးမှုများရှိသကဲ့သို့ လမ်းပန်းဆက်သွယ်ရေးများလည်း ပြတ်တောက်ခဲ့ရသည်။ ထိုကဲ့သို့ တိုက်ခိုက်မှုများကြောင့် ကချင်ပြည်နယ်တွင် ကုန်စျေးနှုန်းများ ကြီးမြင့်လာခဲ့ပြီး အထူးသဖြင့် ပူတာအိုဒေသရှိ ပြည်သူများ အနေဖြင့် စားနပ်ရိက္ခာ ရှားပါးမှုနှင့် ရင်ဆိုင်နေရသဖြင့် တပ်မတော်လေယာဉ်များနှင့်ပါ ရိက္ခာများ ကူညီပို့ဆောင်ပေးလျက် ရှိသည်။ တပ်မတော်အနေဖြင့် အရပ်ဘက်ပစ်မှတ်များကို လုံးဝတိုက်ခိုက်ခြင်းမပြုရန် ညွှန်ကြားထားပြီးဖြစ်သဖြင့် KIO/KIA လက်နက်ကိုင်အဖွဲ့အနေဖြင့်လည်း အများပြည်သူ သွားလာနေသည့် ရထားလမ်း၊ ကားလမ်းများကို နှောင့်ယှက် တိုက်ခိုက်နေခြင်းများအား ရပ်ဆိုင်းရန် လိုအပ်မည်ဖြစ်သည်။ သို့မှသာ လက်နက်ကိုင်တိုက်ခိုက်မှုများ အရှိန်လျော့ကျလာသည့်နှင့်အမျှ ဒေသခံပြည်သူများအတွက် စီးပွားရေး၊ လူမှုရေး အကူအညီများနှင့် ပြန်လည်ထူထောင်ရေးလုပ်ငန်းများကို ပိုမိုဆောင်ရွက်ပေးနိုင်မည်ဖြစ်သည်။

၇။ နိုင်ငံတော်အစိုးရသည် အမျိုးသားပြန်လည်စည်းလုံးညီညွတ်ရေးနှင့် တိုင်းရင်းသားစည်းလုံးညီညွတ်ရေးတို့အတွက် တိုင်းရင်းသားလက်နက်ကိုင် အဖွဲ့အစည်းအားလုံးနှင့် ထာဝရငြိမ်းချမ်းရေး တည်ဆောက်နိုင်အောင် အပစ်အခတ်ရပ်စဲရေးမှတစ်ဆင့် ခိုင်မာသည့် နိုင်ငံရေးဆွေးနွေးမှုများကို ဆက်လက်လုပ်ဆောင်သွားမည်ဖြစ်သည်။ KIO/KIA နှင့်လည်း ငြိမ်းချမ်းရေးဆွေးနွေးမှုများ ဆက်လက်ပြုလုပ်မည်ဖြစ်သည်။ နောင်တွေ့ဆုံ ဆွေးနွေးမှုများတွင် KIO/KIA လက်နက်ကိုင်အဖွဲ့မှ တပ်ပိုင်းဆိုင်ရာများကို အဆုံးအဖြတ်ပေးနိုင်သည့် ပုဂ္ဂိုလ်များက တပ်မတော်နှင့် တွေ့ဆုံဆွေးနွေး ညှိနှိုင်းရန် လိုအပ်သည်။

၈။ နိုင်ငံတော်အစိုးရသည် ကချင်ပြည်နယ်အတွင်း ငြိမ်းချမ်းရေးနှင့် တိုင်းရင်းသားစည်းလုံးညီညွတ်ရေးကို တည်ဆောက်နိုင်ရန်အတွက် KIO/KIA အပါအဝင် တိုင်းရင်းသားပြည်သူအားလုံးနှင့် လက်တွဲဆောင်ရွက်သွားရန် အသင့်ရှိကြောင်း သတင်းထုတ်ပြန်အပ်ပါသည်။ 

http://drlunswe.blogspot.com/2013/01/blog-post_3278.html

အပြည့်အစုံသို့... »