တရုတ်ပြည်ရောက် ကချင်ဒုက္ခသည်များကို `ထောက်ပံ့ကူညီရန်´ ကုလအသင့်ရှိ

မဇ္စျိမသတင်းဌာန။        ။ ကချင်ပြည်နယ်တွင်း အကြမ်းဖက်မှုများကြောင့် ဘေးလွတ်ရာသို့ ထွက်ပြေးခိုလှုံ ရောက်ရှိ လာသော မြန်မာနိုင်ငံသားများကို တရုတ်နိုင်ငံ၊ ယူနန်ပြည်နယ်မှ ပြန်လည် နှင်ထုတ်ခဲ့သည့်အတွက် “အထူး စိုးရိမ် ပူပန်မိ” ကြောင်း ကုလသမဂ္ဂ ဒုက္ခသည် အေဂျင်စီ UNHCR က ပြောဆိုလိုက်သည်။

“တိုက်ပွဲများကြောင့် ထွက်ပြေး ခိုလှုံလာကြသော ဒုက္ခသည်များကို ယာယီ အကာအကွယ်များ ပေးပါရန်၊ သူတို့၏ လူသားလိုအပ်ချက်များကို လေးစားပါရန်၊ လုံခြုံမှုနှင့် စားဝတ်နေရေးအတွက် အန္တရာယ်ရှိသည့် ဒေသများသို့ အတင်းအကြပ် ပြန်မပို့ပါရန် တရုတ်အစိုးရကို UNHCR က တိုက်တွန်းပါသည်” ဟု အဆိုပါရုံးမှ ပြောရေးဆိုခွင့်ရှိသူ အာဒရီယန်အက်ဒဝပ် (Adrian Edwards) က ဆွတ်ဇာလန်နိုင်ငံ၊ ဂျီနီဗာမြို့တွင် ပြုလုပ်သည့် သတင်းစာရှင်းလင်းပွဲ တွင် ပြောကြားခဲ့သည်။

“သူတို့၏ နေရင်းရပ်ရွာများတွင် တည်ငြိမ်သွားသည်အထိ အဆိုပါ ဒုက္ခသည်များအား ကူညီနိုင်ရန် တရုတ်နိုင်ငံကို
ထောက်ပံ့ကူညီရန် ကျွနု်ပ်တို့ အသင့်ရှိပါသည်” ဟုလည်း သူက ပြောသည်။

၂ဝ၁၁ ခုနှစ်မှစ၍ ကချင်လွတ်လပ်ရေးအဖွဲ့ KIO  နှင့် အစိုးရတပ်များအကြား တိုက်ပွဲများ ဖြစ်ပွါးလာကတည်းက ရှမ်းပြည်နယ်နှင့် ကချင်ပြည်နယ်တို့မှ နေအိမ်များကို စွန့်ခွါ ထွက်ပြေးလာသူ အရပ်သားပေါင်း ရ၅,ဝဝဝ ရှိပြီဟု UNHCR က ခန့်မှန်းထားပြီး နောက်ထပ်လည်း နေ့စဉ်ထွက်ပြေး ရောက်ရှိနေဆဲဖြစ်သည်။

ယမန်နှစ် ဇွန်လတွင် ဖြစ်ပွါးခဲ့သော တိုက်ပွဲများကြောင့် ထွက်ပြေးလာခဲ့သူများအနက် ကချင်ဒုက္ခသည် ၅,ဝဝဝ ခန့်သည် သြဂုတ်လလယ်ကတည်းက တရုတ်ပြည်မှ ပြန်သွားခဲ့ကြပြီး ယခုအခါ မြန်မာနယ်စပ်ရှိ ယာယီစခန်းများ တွင် နေထိုင်လျက်ရှိကြသည် ဟု အက်ဒဝပ် က ဆိုသည်။

၎င်းတို့ နေရင်းရပ်ရွာများတွင် တိုက်ပွဲများ ဖြစ်ပွားနေ၍ အဆိုပါပြန်သွားသူ ၃,၄ဝဝ ကျော်သည် မိမိတို့ရွာသို့ မပြန်ရဲ
ကြဘဲ ကချင်ပြည်နယ်အတွင်း ဖွင့်လှစ်ထားသည့် ပြည်တွင်း ရွှေ့ပြောင်း ဒုက္ခသည် စခန်းများတွင် ဆက်လက်
နေထိုင်နေကြရသည်ဟု အဆိုပါ ပြောရေးဆိုခွင့်ရှိသူက ပြောသည်။

“အစားအစာ၊ အိုးအိမ်၊ ဆေးဝါးနဲ့ အခြား ကယ်ဆယ်ရေး ပစ္စည်းတွေ သူတို့ အရေးတကြီး လိုအပ်နေပါတယ်" ဟု သူက ဆက်လက်ပြောကြားခဲ့သည်။

တရုတ်အာဏာပိုင်များကို ကြိမ်ဖန်များစွာ ပြောကြားခဲ့သော်လည်း နယ်စပ် တရုတ်ပြည် ဘက်အခြမ်းရှိ ကချင်အုပ်စု များထံ ယခုအထိ အကူအညီများ သွားရောက် ပေးအပ်ခြင်း မပြုနိုင်သေးဟု UNHCR က ဆိုသည်။

သို့သော် မကြာမှကမူ အကူအညီများ ပေးအပ်ရန်နှင့် ပြန်လာသူများအတွက် လိုအပ်ချက်များကို လေ့လာနိုင်ရန်
မြန်မာပြည်ဘက်အခြမ်းရှိ လွယ်ဂျယ်သို့ UNHCR က သွားရောက်နိုင်ခဲ့သည်။

တွေ့ဆုံမေးမြန်းခဲ့သူ အချို့၏ ပြောကြားချက်အရ တရုတ်အာဏာပိုင်များက ၎င်းတို့ ခိုလှုံရာ တဲများကို အတင်းဆွဲချ ဖျက်ဆီးခဲ့ကြောင်း၊ အရပ်ဝတ်ပုလိပ်များက သူတို့ကို ထရပ်ကားများပေါ်သို့ အတင်းမောင်းတင်ခဲ့ကြောင်း၊ သူတို့ ပစ္စည်းများကိုလည်း ဤသို့ပင်ကားပေါ်သို့ တင်ပေးလိုက်ကြောင်း၊ ထို့နောက် နယ်စပ်ဂိတ်သို့ မောင်းသွားခဲ့ကြသည် ဟု ဆိုကြသည်။

NGO တွင် လုပ်ကိုင်နေသော ဒေသခံဝန်ထမ်းများက အဖြစ်အပျက်များကို တွေ့မြင်ခဲ့ကြသည်။ မြန်မာပြည်ရှိ အနီးဆုံး ဒုက္ခသည် စခန်းများသို့ ထိုပြန်သွားသူများကို တင်ဆောင်သွားနိုင်ရန် ထရပ်ကားများလည်း စီစဉ်ပေးခဲ့ကြသည်ဟု အက်ဒဝပ် က ပြောသည်။ နောက်ထပ်လည်းလူများကို တရုတ်ပြည်မှ အတင်းပြန်ပို့လိမ့်မည်ဟု မျှော်လင့်ထားသည် ဟုလည်း UNHCR ပြောရေးဆိုခွင့်ရှိသူ အာဒရီယန် အက်ဒဝပ် က ပြောဆိုသွားသည်။

http://www.mizzimaburmese.com/news/regional/10103---a-.html

Posted in: ကချင်,စစ်ပြေးဒုက္ခသည်,နိုင်ငံတကာသဘောထား,သတင်း