KIA အရပ်သားတပ်ဖွဲ့မှ အစိုးရခြေမြန်တပ်ကို မိုင်းဖြင့်တိုက်ခိုက်ခဲ့ရာ ၂၀ ကျော်ကျ

MHH ခေါ် KIO အရပ်သားတပ်ဖွဲ့ တပ်ရင်း၊ ဖါးကန့်မြို့နယ်။

ကချင်ပြည်နယ် မြစ်ကြီးနား ဒေါ့ဖုန်းယန်မြို့နယ်အတွင်းလှုပ်ရှားလာသော အစိုးရတပ်ခြေမြန်တပ်ရင်းနှင့် ကချင်လွတ်မြောက်ရေးတပ်ဖွဲ့ KIA ကြားတိုက်ပွဲဖြစ်ပွားရာ KIA မှ မိုင်းဖောက်ခွဲတိုက်ခိုက်မှုကြောင့် အစိုးရဖက်မှ ၂၀ ဦး ကျော် သေဆုံးခဲ့ကြောင်း သိရသည်။
ယမန်နေ့ နေ့ခင်း ၂ နာရီချိန် ဒေါ့ဖုန်းယန်မြို့နယ် ရှမ်းရွာအနီး မိုင်ခုတ် (Mai Hkuk) တွင်လှုပ်ရှားလာသောအစိုးရ ခြေမြန်တပ်ရင်းနှင့် တိုက်ခိုက်မှုတွင် KIA တပ်ရင်း (၂၄)မှ မိုင်းဖြင့် ၄ ကြိမ် ဖောက်ခွဲတိုက်ခိုက်လိုက်ရာ အစိုးရတပ်မှ အနည်းဆုံး ၁၅ ဦးအထက် သေဆုံးခဲ့ခြင်းဖြစ်ကြောင်း ရှေ့တန်းမှသိရသည်။
“အင်အား ၁၀၀ ကျော်တယ်။ ခမရ (၃၇၀) တပ်စခန်း အနီးရောက်လာချိန် မိုင်းနဲ့အနီးကပ် ပစ်လိုက်တယ်။ အဲဒီချိန်မှာတွေ့လိုက်တာ ဘယ်နှစ်ယောက်မြုပ်တာမမြုပ်တာတော့ ကျွန်တော်တို့သွားမကြည့်သေးဘူး။” ဟုဆိုသည်။
ယမန်နေ့ အစောပိုင်း ရ နာရီချိန်တွင် အဆိုပါ အစိုးရခြေမြန်တပ် တပ်ရင်းကို မြစ်ကြီးနား-ဒေါ့ဖုန်းယန်မြို့နယ်ရှိ မုန်မူ (Mung Mu) နှင့် တာဆိုင်း (Da Seng)မှ ဗန်းမော်ဘက်သို့ ဆင်းလာချိန် KIO တပ်မဟာ (၅) အောက် တပ်ရင်း (၂၄) အရပ်သားတပ်ဖွဲ့ (MHM) မှ  မိုင်း ၃ ကြိမ်ဖောက်ခွဲ တိုက်ခိုက်ခဲ့ရာ အစိုးရတပ်သား ရ ဦးသေဆုံးခဲ့ကြောင်း သိရသည်။
“ဒီအဖွဲ့ကိုစောင့်နေတာ ဘယ်လို ဝင်သွားလိုက်တာ မတွေ့လိုက်ဘူး။ အပြန်ကျမှ ကျွန်တော်တို့နဲ့ ထိပ်တိုက်ပြန်တွေ့ပြီး ခုခံ ပစ်ခတ်ခဲ့တာ။” ဟုဆိုသည်။
ရင်ဆိုင်တိုက်ပွဲများသည် နိုဝင်ဘာ ၁၃ ရက် နေ့တွင် ဒေါ့ဖုန်းယန်မြို့နယ် တာဆိုင်း (Da Seng) နှင့် နောင်ဖာ (Nawng Hpa) ကြား အင်အား ၁၅၀ ကျော်သည့် မြန်မာအစိုးရတပ်နှင့် တပ်မဟာ (၅)အောက် တပ်ရင်း (၂၄) တို့သည် ၂၅ မိနစ်ကြာ တိုက်ပွဲဖြစ်ပွားခဲ့သည်။
ထိုပစ်ခတ်မှုတွင် အစိုးရတပ်မှ သေဆုံးဒဏ်ရာရရှိမှုမသိရှိသော်လည်း ကချင်လွတ်မြောက်ရေးတပ်ဖွဲ့  KIA မှ တဦး ဒဏ်ရာရခဲ့ကြောင်းသိရသည်။
မြစ်ကြီးနား-ကန်ပိုင်တီလမ်း ဆဒုံးရေတံခွန်အနီး တပ်မဟာ (၅) အောက် တပ်ရင်း (၃) နယ်မြေ တိန်ရော့ (Ting Raw Kawng) တွင် အင်အား ၁၀၀ ကျော်ရှိသည့် အစိုးရတပ် ခမရ (၄၁၅) တပ်နှင့် KIA တပ်မား ၂၅ မိနစ်ကြာ တိုက်ပွဲဖြစ်ပွားခဲ့ရာတွင်  အစိုးရတပ်မှ ၄ ဦးသေဆုံးခဲ့ကြောင်းသိရသည်။
KIA ကချင်လွတ်မြောက်ရေးတပ်ဖွဲ့မှ ပြောက်ကျားစနစ်ဖြင့် တိုက်ခိုက်ခဲ့ခြင်းကြောင့် ထိခိုက်ဒဏ်ရာ ရသူမရှိကြောင်း ရှေ့တန်းမှ အရာရှိတဦးပြောသည်။ အစိုးရတပ်ဖက်မှသေဆုံးမှု များနိုင်သော်လည်း သေဆုံးထိခိုက်ဒဏ်ရာရမှုစာရင်းအတိအကျ မသိရပေ။
ထိုအစိုးရတပ်သည် ကချင်ပြည်နယ် တရုတ်နယ်စပ် ကန်ပိုင်တီ၊ ပန်ဝါဘက်သို့ စစ်အင်အားတိုးချဲ့ရန် ဆဒုံးတွင် ရေတံခွန် တံတားပြုလုပ်ရာတွင် လမ်းလုံခြုံရေးယူနေသော အစိုးရတပ်ဖွဲ့ဖြစ်ကြောင်းသိရသည်။
ယခုချိန် ကချင်ပြည်နယ်ဖက်သို့ အစိုးရတပ်များသည် အင်အားအလုံးရင်းဖြင့် နေ့စဉ် စစ်အင်အားတိုးချဲ့ လာသောကြောင့် တိုက်ပွဲများဆက်တိုက်ဖြစ်ပွားနေပြီး အစိုးရထိုးစစ်ဆင်မှုကြောင့် တိုက်ပွဲများသည် ပိုမိုတင်းမာလာနိုင်သည့် အခြေအနေဖြစ်ကြောင်း ဒေသခံများလည်းသုံးသပ်နေကြသည်။

http://kachinnews.com/burmese/news/997-kia-%E1%80%A1%E1%80%9B%E1%80%95%E1%80%B9%E1%80%9E%E1%80%AC%E1%80%B8%E1%80%90%E1%80%95%E1%80%B9%E1%80%96%E1%80%BC%E1%80%B2%E1%82%94%E1%80%99%E1%80%BD-%E1%80%A1%E1%80%85%E1%80%AD%E1%80%AF%E1%80%B8%E1%80%9B%E1%80%B1%E1%80%BB%E1%80%81%E1%80%BB%E1%80%99%E1%80%94%E1%80%B9%E1%80%90%E1%80%95%E1%80%B9%E1%80%80%E1%80%AD%E1%80%AF-%E1%80%99%E1%80%AD%E1%80%AF%E1%80%84%E1%80%B9%E1%80%B8%E1%80%BB%E1%80%96%E1%80%84%E1%80%B9%E1%80%B7%E1%80%90%E1%80%AD%E1%80%AF%E1%80%80%E1%80%B9%E1%80%81%E1%80%AD%E1%80%AF%E1%80%80%E1%80%B9%E1%80%81%E1%80%B2%E1%80%B7%E1%80%9B%E1%80%AC-%E1%81%82%E1%81%80-%E1%80%B1%E1%80%80%E1%80%BA%E1%80%AC%E1%80%B9%E1%80%80%E1%80%BA.html

Posted in: ကချင်,ကချင်စစ်ဆင်ရေး,စစ်ဆင်ရေး,သတင်း