အစိုးရနှင့်တွေ့ဆုံဆွေးနွေးခဲ့သော KIO ကိုယ်စားလှယ်များကို လိုင်ဇာလူထု ၂၀၀၀ ကျော် ကြိုဆို

ကချင်ပြည်နယ်တွင်း ပဋိပက္ခဖြစ်ပွားမှုနှင့်ပတ်သက်၍ မြန်မာအစိုးရနှင့် တွေ့ဆုံဆွေးနွေးရာမှပြန်လာကြသော ကချင်လွတ်မြောက်ရေးအဖွဲ့ (KIO) ကိုယ်စားလှယ်အဖွဲ့များကို လိုင်ဇာရှိ ပြည်သူလူထုများက ယမန်နေ့ညနေတွင် နယ်စပ်တံတား တစ်လျှောက်ဝမ်းသာအားရကြိုဆိုခဲ့ကြသည်။
KIOမှ ဦးဆွမ်လွတ်ဂမ် ဦးဆောင်သော ငြိမ်းချမ်းရေးဆွေးနွေးမှု ကိုယ်စားလှယ်အဖွဲ့များအား တရုတ်နယ်စပ် လိုင်ဇာ တံတားမှ ဒေသခံပြည်သူလူထု ၂၀၀၀ ကျော် ကြိုဆိုခဲ့ခြင်းဖြစ်သည်။
အစိုးရနှင့် ဆွေးနွေးမှု (၁၃) ကြိမ်မြောက်တွေ့ဆွေးဆုံးနွေးမှုတွင် လူထုများက ပထမအကြိမ် ကြိုဆိုလိုက်ခြင်းဖြစ်ပြီး နိုင်ငံ့အတွက် အားထုတ်၍ဆွေးနွေးခဲ့ကြသည့် KIO အရာရှိများအပေါ် ပြည်သူများအနေဖြင့် ဝမ်းမြောက်ဝမ်းသာ တန်ဖိုးထားခြင်းဖြစ်သည်ဟု ကြိုဆိုခဲ့သည့် လိုင်ဇာ အသင်းတော် သိက္ခာတော်ရ ဆရာဂွန်ဆိုင်း KNG ကချင်သတင်းဌာနသို့ပြောသည်။
“ပြီးခဲ့တဲ့ချိန်တွေမှာ မကြိုဆိုခဲ့ဘူး။ ခါတိုင်းက ဆလန်ကဘာတွေက အသင်းတော်ဆရာတွေထံ ဆုတောင်းပြီး သွားလိုက်တယ်။ ပြန်လာရင်လည်း ဆုတောင်းပြီး ကိုယ့်ရုံးကိုယ်ပြန်တယ်။ ဒါမဲ့ ဒီတခေါက်က ဆုတောင်းပြီးသွားလိုက်တယ်။ ပြန်လာတဲ့ချိန်မှာ ရလဒ်ကို ပြည်သူတွေလည်း သိချင်တဲ့အတွက်ကြောင့် ကြိုဆိုခြင်းဖြစ်တယ်။”
ထိုသို့ကြိုဆိုပြီးနောက် ဒေသခံပြည်သူလူထုများနှင့်အတူ လိုင်ဇာအထက်တန်းကျောင်းတွင်တွေ့ဆုံခဲ့ပြီး ဆွေးနွေးပွဲ၌ သဘောတူညီချက်၊ ကြေညာချက်များနှင့်ပတ်သက်၍ ပြောဆိုခဲ့ပြီး ဖေဖော်ဝါရီ ၄ ရက်နေ့ ရွှေလီ ဆွေးနွေးပွဲတွင် ပူတွဲကြေညာထားသည့်ထုတ်ပြန်ချက်ကို ဆက်လက် အတည်ပြု၍ ညွှန်ကြား သွားမည်ဖြစ်ကြောင်း ဗိုလ်ချုပ် ဂွမ်မော်မှ လူထုများကို ရှင်းပြခဲ့ကြောင်းဒေသခံများပြောသည်။
“နောက်ထပ်လည်း ကြိုဆိုအုံးမယ်။ ဘာလို့လဲဆိုတော့ ခုခေတ်ကပြည်သူတွေကို ကြေညာရမယ့် ခေတ်ဖြစ်နေပြီလေ။ သူတို့ဘဲဆွေးနွေးပြီး မီဒီယာမှာကြေညာရုံနဲ့ မထိရောက်နိုင်ဘူး။ ခု ဆွေးနွေးမှုတွေကို ပြည်သူတွေထံပြန်လည် ရှင်းလင်းတာ အရမ်းကောင်းပါတယ်” ဟု ဆရာဂွန်ဆိုင်း ပြောသည်။
ဗဟိုဌာချုပ်အတွင်းရှိ ဒုက္ခသည်စခန်းမှလူထုများနှင့် ဒေသခံများသည် ကချင်ရိုးရာဝတ်စုံများဝတ်ဆင်ကာ ဌာနဆိုင်ရာအသီးသီးမှလည်း လာရောက်၍ ကိုယ်စားလှယ်များကို လက်ဆွဲနှုတ်ဆက်ကာ ကချင်ရိုးရာအတီးအမှုတ်ဗုံများ ဖြင့်ကြိုဆိုခဲ့ရာ ကိုယ်စားလှယ်များကလည်း ၀မ်ပန်းတသာဖြစ်ခဲ့ကြောင်း သိရသည်။
အစိုးရ ပြည်ထောင်စု ငြိမ်းချမ်းရေးဖော်ဆောင်ရေးလုပ်ငန်းကော်မတီနှင့် KIO အဖွဲ့သည် တရုတ်ပြည်သူ့သမ္မတနိုင်ငံရွှေလီမြို့တွင် ဖေဖဝါရီလ ၁၁ မှ ၁၂ ရက်နေ့ထိ ၂ နှစ်ရက်ကြာ တွေ့ဆုံဆွေးနွေးခဲ့ရာတွင် စစ်မှန်သော နိုင်ငံရေး ဆွေးနွေးမှုများ တစ်နိုင်ငံလုံး အတိုင်းအတာ ကျင်းပနိုင်ရန်အတွက် လိုအပ်သည်များကို တစ်ဆင့်ပြီး တစ်ဆင့် ဆက်လက် ညှိနှိုင်း ဆောင်ရွက် သွားကြမည်ဖြစ်၍ အပြန်အလှန် နားလည်မှု၊ လေးစားမှု၊ ယုံကြည်မှုများကို အခြေခံပြီး ခိုင်မာသော အပစ်အခတ် ရပ်ဆိုင်းရေး ရရှိသည်အထိ ဆောင်ရွက်ရန် သဘောတူညီခဲ့ကြသည်။
ဆက်လက်၍လည်း ပြဿနာ ဖြစ်ပွားနိုင်သော ဒေသများရှိ နှစ်ဖက် တပ်ဖွဲ့များ ဆိုင်ရာ ကိစ္စများကို ဆက်လက်၍ ညှိနှိုင်း ဆောင်ရွက်သွားကာ လိုအပ်သည့် ညွှန်ကြားချက် အမိန့်များကို နှစ်ဖက်တပ်များ သက်ဆိုင်ရာ အောက်ခြေ တပ်ဖွဲ့များအထိ ရောက်ရှိအောင် ညွှန်ကြားသွားရန် နှစ်ဖက်သဘောတူညီခဲ့ကြသည်။
ဒီတစ်ကြိမ် ဆွေးနွေးမှုတွင် အစိုးရဖက်မှ ဒုတိယ ဗိုလ်ချုပ်ကြီး မြင့်စိုး အပါအဝင် KIO ဖက်မှ KIA ဒု-စစ်ဦးစီးချုပ် ဗိုလ်ချုပ်ဂွန်မော်တို့ နှစ်ဖက် စစ်တပ် ခေါင်းဆောင်များတက်ရောက်ခဲ့ခြင်းဖြစ်သည်။
အစိုးတပ်များသည် ကချင်ပြည်နယ်တွင် အင်အားတိုးချဲ့များနှင့် ထိုးစစ်ဆင်မှုများ ရှိနေဆဲဖြစ်သောကြောင့် တိုက်များပြင်းထန်လာနိုင်ကြောင်း ရှေ့တန်းမှအရာရှိများသုံးသပ်နေသော်လည်း  စိုးရိမ်ဖွယ်ရာမရှိသေးကြောင်း KIO ပြောရေးဆိုခွင့်ရှိသူ ဦးလာနန် KNG ကချင်သတင်းဌာသို့ ပြောခဲ့သည်။

http://kachinnews.com/burmese/news/1046-%E1%80%A1%E1%80%85%E1%80%AD%E1%80%AF%E1%80%B8%E1%80%9B%E1%82%8F%E1%80%BD%E1%80%84%E1%80%B9%E1%80%B7%E1%80%B1%E1%80%90%E1%80%BC%E1%82%95%E1%80%86%E1%80%AF%E1%80%B6%E1%80%B1%E1%80%86%E1%80%BC%E1%80%B8%E1%80%B1%E1%82%8F%E1%80%BC%E1%80%B8%E1%80%81%E1%80%B2%E1%80%B7%E1%80%B1%E1%80%9E%E1%80%AC-kio-%E1%80%80%E1%80%AF%E1%80%AD%E1%80%9A%E1%80%B9%E1%80%85%E1%80%AC%E1%80%B8%E1%80%9C%E1%80%BD%E1%80%9A%E1%80%B9%E1%80%99%E1%80%BA%E1%80%AC%E1%80%B8%E1%80%80%E1%80%AD%E1%80%AF-%E1%80%9C%E1%80%AD%E1%80%AF%E1%80%84%E1%80%B9%E1%80%87%E1%80%AC%E1%80%9C%E1%80%B0%E1%80%91%E1%80%AF-%E1%81%82%E1%81%80%E1%81%80%E1%81%80-%E1%80%B1%E1%80%80%E1%80%BA%E1%80%AC%E1%80%B9-%E1%81%BE%E1%80%80%E1%80%AD%E1%80%B3%E1%80%86%E1%80%AD%E1%80%AF.html

Posted in: ငြိမ်းချမ်းရေးလှုပ်ရှားမှု,သတင်း