ငြိမ်းချမ်းရေးဆွေးနွေးပွဲ အမြန်လုပ်ဖို့ ကချင်ဒေသခံတွေလိုလား

ကချင်လွတ်မြောက်ရေးအဖွဲ့ KIO နဲ့ မြန်မာအစိုးရ ငြိမ်းချမ်းရေး ကိုယ်စားလှယ်တွေ တွေ့ဆုံဆွေးနွေးဖို့ တိတိကျကျ ရက်သတ်မှတ်နိုင်ခြင်း မရှိသေးတဲ့အပေါ်  နယ်မြေ မငြိမ်သက်မှုကြောင့် ဒုက္ခရောက်နေရတဲ့ ကချင်ပြည်သူလူထုက ငြိမ်းချမ်းရေး ဆွေးနွေးပွဲတွေ အမြန်ဆုံးဖြစ်ပေါ်ဖို့ တောင်းဆိုနေကြပါတယ်။ မိုးရာသီ နီးလာပြီဖြစ်တဲ့အတွက် ဒုက္ခသည်စခန်းတွေမှာ ထွက်ပြေးခိုလှုံနေရတဲ့ ကချင်စစ်ပြေး ဒုက္ခသည်တွေအတွက်လည်း နေစရာ အခက်အခဲနဲ့ လူသားချင်း စာနာမှုဆိုင်ရာ အရေးပေါ် အကူအညီတွေ အရေးတကြီး လိုအပ်နေချိန်လည်း ဖြစ်ပါတယ်။ အပြည့်အစုံကို မဆုမွန်က တင်ပြပေးထားပါတယ်။

မြန်မာနိုင်ငံမြောက်ပိုင်း ကချင်ပြည်နယ်တွင်းက တိုက်ပွဲတွေ ရပ်စဲနိုင်ဖို့အရေး ငြိမ်းချမ်းရေး တွေ့ဆုံဆွေးနွေးကြဖို့ ပထမဆုံးအကြိမ် KIO ထိန်းချုပ်နယ်မြေဖြစ်တဲ့ ကချင်ပြည်နယ် မြစ်ကြီးနားမြို့မှာ တွေ့ဆုံကြဖို့ စီစဉ်နေကြတာ ဖြစ်ပါတယ်။

အရင်ငြိမ်းချမ်းရေး ဆွေးနွေးပွဲတွေတုန်းကတော့  တရုတ်အစိုးရရဲ့ စီစဉ်မှုနဲ့ တရုတ်ပြည်နယ် ရွှေလီမြို့မှာ ပြုလုပ်ခဲ့ပေမဲ့ ပြည်တွင်းမှာ ငြိမ်းချမ်းရေးဆွေးနွေးဖို့ စီစဉ်တာကတော့ ဒါပထမဆုံးအကြိမ်လည်း ဖြစ်ပါတယ်။ ဒါပေမဲ့လည်း အခုအချိန်အထိ ငြိမ်းချမ်းရေး ဆွေးနွေးပွဲတွေ ပြုလုပ်နိုင်ဖို့ နှစ်ဘက်စလုံးက ရက်အတိအကျ မသတ်မှတ်နိုင်သေးတဲ့အပေါ် ကချင်အရေး လှုပ်ရှားသူတွေနဲ့ ဒေသခံ ကချင်ပြည်သူလူထုက စိုးရိမ်မှုတွေ ရှိနေပါတယ်။ ဒါကြောင့်မို့လို့ ပြည်သူလူထုကို သက်သေထားတဲ့ ငြိမ်းချမ်းရေး ဆွေးနွေးပွဲတွေ အမြန်ဆုံး ဖြစ်ပေါ်စေချင်ပါတယ်လို့ ကချင်ပြည်သူ့လွှတ်တော် ကိုယ်စားလှယ် ဒေါ်ဒွဲဘူ က ဗွီအိုအေ မြန်မာပိုင်းကို ပြောပါတယ်။

“လွန်ခဲ့တဲ့ ၆ ရက်နေ့ စနေနေ့မှာ ဆွေးနွေးဖို့ လုပ်ထားတာပေါ့နော်။ ဒါပေမဲ့ အဲ့ဒီနေ့ကတော့ မဆွေးနွေးဖြစ်ဘူး။ ကြားနေမယ့် သက်သေတွေ မရောက်လို့လို့ ပြောပါတယ်။ ကျမအနေနဲ့ကတော့ ဘာပဲပြောပြော KIA အနေနဲ့လည်း အရင် တပ်မတော်နဲ့တုန်းက တိုက်ခိုက်ခဲ့တုန်းကလည်း ဘယ်သူမှ ပါ၀င်ခဲ့တာမရှိဘူး။ ဘယ်နိုင်ငံကမှ ကူညီခဲ့တာ မရှိဘူး။ ကိုယ့်ဟာကိုယ်ပဲ ဆောင်ရွက်ခဲ့တယ်။ အခု တွေ့ဆုံဆွေးနွေးပွဲတွေလည်း ဘာပဲပြောပြော ပြည်သူလူထုကို သက်သေထားပြီးမှ ဆောင်ရွက်ရင် ပိုပြီးမှ ကောင်းမယ်လို့ ကျမကတော့ မြင်ပါတယ်။ တခြားနိုင်ငံတကာက လာရောက်ပြီး နားထောင်မယ်ဆိုတာလည်း ကောင်းပါတယ်။ ဒါပေမဲ့ သူတို့မရောက်လို့ ကျမတို့ရဲ့ ဆွေးနွေးပွဲ မလုပ်နိုင်ဘူးဆိုတာကတော့ ပြည်သူလူထုနဲ့ ကျမတို့ ဒုက္ခသည်တွေအတွက် အင်မတန် နစ်နာပါတယ်။ ဘာလို့လဲဆိုတော့ လူထုကလည်း ဒီငြိမ်းချမ်းရေး ဆွေးနွေးပွဲကို အမြန်ဆုံး ဖြစ်စေချင်ပါတယ်။ အဲ့ဒီမှာ မဖြစ်တော့ဘူးဆိုတော့ ကျမတို့အစ ပြည်သူလူထုအားလုံးက စိတ်အားလျော့သွားရှိပါတယ်။ ကျမတို့ ပြည်သူလူထုတရပ်လုံးကို သက်သေထားပြီးမှ ဆွေးနွေးစေချင်ပါတယ်။ ဒါကတော့ နှစ်ဘက်စလုံးကို တိုက်တွန်းတာပါ။”

ကချင်အဖွဲ့တွေနဲ့ ငြိမ်းချမ်းရေး ကိုယ်စားလှယ်တွေ တွေ့ဆုံဆွေးနွေးကြတဲ့အခါ စစ်မှန်တဲ့ငြိမ်းချမ်းရေး၊ လုံးဝအပစ်အခတ် ရပ်ဆဲနိုင်ရေးအပါအဝင် ဒုက္ခသည်တွေအတွက် အရေးအတကြီး လိုအပ်နေတဲ့ အခက်အခဲတွေ စိတ်ပိုင်းဆိုင်ရာ ပြန်လည် ထူထောင်ရေးအပါအဝင် မိမိတိုရဲ့ နေအိမ်တွေကို စိတ်ချလုံခြုံစွာ ပြန်ပြီးတော့ နေထိုင်ရေးနဲ့ လိုအပ်တဲ့ ကျန်းမာရေး စောင့်ရှောက်မှုတွေနဲ့အတူ ပညာရေး၊ စီးပွားရေး ပြန်ပြီးတော့ လုပ်ကိုင်နိုင်ဖို့ အလုပ်အကိုင် ဖန်တီးပေးနိုင်ဖို့ အကူအညီတွေကို အဓိကဆွေးနွေးစေချင်တယ်လို့လည်း ကချင်လွှတ်တော်အမတ် ဒေါ်ဒွဲဘူ က ပြောပါတယ်။

“KIA KIO နဲ့ အစိုးရအဖွဲ့တို့ ဆွေးနွေးတဲ့အခါ အဓိကကတော့ ဒီဒုက္ခသည်ကိစ္စတွေလည်း စဉ်းစားပေးဖို့ လိုအပ်တာပေါ့နော်။ သူတို့က အခုအချိန်ထိ နေရပ်ဆီ မပြန်နိုင်ဘူးဆိုတာ အပစ်အခတ်ရပ်ဆိုင်းရေး လက်မှတ်မထိုးသေးတဲ့အတွက် ဖြစ်တယ်။ အဲ့တော့ အပစ်အခတ် ရပ်ဆိုင်းရေး လက်မှတ်ရေးထိုးပြီးဆိုရင်တော့ မိသားစုအားလုံး ကိုယ့်ရွာကိုယ် ပြန်နိုင်တော့ရင် ဒါ အကောင်းဆုံးပါပဲ။”

အခုအချိန်မှာ ကချင်ပြည်နယ်ထဲက တိုက်ပွဲတွေကြောင့် နယ်မြေ မအေးချမ်းသေးတဲ့အတွက် အိုးအိမ်စွန့်ခွာ ထွက်ပြေးခဲ့ရတဲ့ ကချင်ပြည်သူလူထုအနေနဲ့ မိုးရာသီကာလမှာ နေစရာ အခက်အခဲများစွာ ကြံုနေရပြီး ကလေးတွေအတွက် ကျမ်းမာရေး စောင့်ရှောက်မှုနဲ့ ဒုက္ခသည်တွေအတွက် လူသားချင်းစာနာမှု အကူအညီတွေ အရေးတကြီး လိုအပ်နေတယ်လို့  မြစ်ကြီးနားဒေသခံ ကချင်အမျိုးသမီးကြီးဖြစ်တဲ့ ဒေါ်ဂျာအောင်က ပြောပါတယ်။

“ပန်ဝါဘက် နယ်စွန်နယ်ဖျားဘက်တွေမှာ အစိုးရတပ်တွေက KIA စခန်းတွေကို ရွှေ့ပြီးမှ သူတို့စခန်းတွေကို သိမ်းပိုက်တာတွေ အဲ့ဒါတွေ ကြားတယ်လေ။ လိုအပ်တာကတော့ အကုန်လုံး လိုအပ်တာပဲလေ။ စားဝတ်နေရေးတွေ အကုန်လုံး လိုတာပေါ့။ သူတို့က အများအားဖြင့်တော့ အစားအသောက်တွေ၊ အဝတ်တွေ လိုမှာပေါ့လေ။ ဘုရားရှိခိုးကျောင်းမှာဆိုရင်တော့ အသင်းတော်မှာဆိုရင်တော့ အဝတ်အစားတွေ ပြောကြတယ်လေ။ ကလေးတွေက အဝတ်အစားတွေ အများအားဖြင့် လိုအပ်တာပေါ့။”

အခုအချိန်အခါမှာတော့ ကချင်ဒုက္ခသည်တွေအတွက် ကချင်အရေးလှုပ်ရှားသူတွေနဲ့ ပြည်တွင်းအလှူရှင်တွေ ပူးပေါင်း ကူညီဆောင်ရွက်နေကြပြီး ဒုက္ခသည်တွေအတွက် မိုးတွင်းကာလမှာ  နေစရာအခက်အခဲတွေနဲ့ ရင်ဆိုင်နေရတယ်လို့ ဒေါ်ဒွဲဘူ က ဆိုပါတယ်။

“မိုးတွင်းရောက်လာရင်တော့ တော်တော်လေး ခက်ခဲမှာပေါ့နော်။ နေတာထိုင်တာရော၊ စားတာသောက်တာရော၊ အမိုးအကာတွေ မလုံနိုင်ဘူးပေါ့။ ဒုက္ခသည်တွေ ဒီမိုးတွင်းမှာတော့ လုံခြံုတဲ့နေရာမှာဖြစ်ဖြစ် ဒါမှမဟုတ် ကိုယ့်နေရပ်ဆီ ပြန်နိုင်တဲ့အထိ လုပ်ပေးနိုင်ရင်တော့ ပိုကောင်းမယ်လို့ ကျမ အဲ့လိုပဲ မျှော်လင့်ပါတယ်။”

KIO နဲ့ မြန်မာစစ်တပ်တို့ တိုက်ပွဲတွေဖြစ်ပွားနေတာကြောင့် တရုတ်-မြန်မာနယ်စပ်အပါအဝင် ကချင်ပြည်နယ်တွင်း ကချင်လက်နက်ကိုင်တွေ ထိန်းချုပ်ရာနယ်မြေနဲ့ အစိုးရထိန်းချုပ်ရာ နယ်မြေတွေက ဒုက္ခသည်စခန်းတွေမှာ စစ်ပြေးဒုက္ခသည်ဦးရေဟာ တစ်သိန်းကျော်ရှိနေပြီဖြစ်ပြီး၊ အခုလို နှစ်ဘက် တွေ့ဆုံမှုတွေလုပ်ဖို့ ပြင်ဆင်နေကြချိန်မှာဘဲ ပြီးခဲ့တဲ့ မတ်လလယ်ပိုင်းတုန်းက ကချင်တပ်တွေနဲ့ အစိုးရတပ်တွေကြား ကချင်ပြည်နယ် ပန်ဝါဒေသနဲ့ ရှမ်းပြည်နယ်မြောက်ပိုင်းဘက်မှာ တိုက်ပွဲတွေ ပြန်ဖြစ်ပွားခဲ့ပြီး နယ်မြေ လုံခြံုရေးအခြေအနေဟာ တည်ငြိမ်မှု မရှိသေးဘူးလို့လည်း ဒေသခံတွေက ပြောပါတယ်။

http://burmese.voanews.com/content/kachin-talks-postpone/1636839.html

Posted in: ကချင်,ကချင်တွေ့ဆုံဆွေးနွေးမှု,သတင်း