သျှမ်းတော်လှန်ရေးသမိုင်းဝင် မိုင်းလားတပ်ဖွဲ့ ဒုဉက္ကဌ ကွယ်လွန်

သျှမ်းပြည်တော်လှန်ရေး၌ တောက်လျှောက်ပါဝင်သည့် တော်လှန်ရေးသမိုင်းဝင် မိုင်းလားတပ်ဖွဲ့ ဒုဥက္ကဌ စဝ်ခွန်မြင့် အသက် ၈၆ နှစ်သည် ယမန်နေ့ ညနေပိုင်း က သက်ကြီးရောဂါဖြင့် မိုင်းလား မြို့နေအိမ်၌ ကွယ်လွန်ခဲ့ပြီဖြစ်ကြောင်းသိရသည်။

ကွယ်လွန်သူ စဝ်ခွန်မြင့် အသက် ၈၆ နှစ်

သျှမ်းပြည်တော်လှန်ရေးစတင်ကတည်းက ယနေ့အထိ ခေတ်အဆက်ဆက် ပါဝင်လှုပ်ရှားလာခဲ့သော အမျိုးသားဒီမိုကရက်တစ်မဟာမိတ်တပ်မတော် NDAA  မိုင်းလားတပ်ဖွဲ့၏အကြီးအကဲတဦးဖြစ်သည့် စဝ်ခွန်မြင့်သည် အဆုပ်ရောဂါ သက်ကြီးရောဂါတို့ဖြင့် မိုင်းလား မြို့ရှိ ၎င်းနေအိမ်တွင် အောက်တိုဘာ လ ၃၁ ညနေ ၄ နာရီ ၄၈ မိနစ်က ကွယ်လွန်ခြင်းဖြစ်ပြီး ကျန်ရှိရုပ် အလောင်းအား ယခုလ ၅  ရက် နေ့က သင်္ဂြိုဟ်မည်ဖြစ် ကြောင်း  မိုင်းလားတပ်ဖွဲ့သတင်း ရပ်ကွက် က ဆိုပါသည်။

“စဝ်ခွန်မြင့်ဟာအခုလက်ရှိ ကျနော်တို့ NDAA  ရဲ့ အတိုင်ပင်ခံလည်းဟုတ်တယ်၊ ဒု - ဥက္ကဌရာထူး တာဝန်လဲ ထမ်းဆောင်တယ်။ သာသနာရေးပိုင်းဆိုင်ရာလဲ သူဘဲ။ သူက သျှမ်းပြည် တော်လှန် ရေးစတင်တဲ့ နွံစစ်ဟန်တပ်ဖွဲ့ လက်ထက် ကတည်းက တော်လှန်ရေးနယ်ထဲဝင်ရောက် တာဝန်ထမ်း ခဲ့တဲ့ သက်တမ်းအရင့်ဆုံး ပုဂ္ဂိုလ်တဦးဖြစ်တယ်လို့လဲဆိုနိုင်ပါတယ်။ မိုင်းလားတပ်ဖွဲ့ထဲမှာလဲ အသက် အကြီးဆုံး ပုဂ္ဂိုလ်တဦးပေါ့” - ဟု တပ်ဖွဲ့ ဝင်တဦးက သျှမ်းသံတော်ဆင့်အားပြောပြသည်။

စဝ်ခွန်မြင့်သည် ကွန်မြူနစ်ပါတီ၏ပြည်သူ့တပ်မတော်တွင်ပါဝင်ခဲ့သော်လည်း လက်ျာဝါဒီ ယုံကြည် သူတဦးဖြစ်သည်ဟု ဆို၏။ သျှမ်းပြည်နိုင်ငံရေး စစ်ရေးဘက်၌ ထူးချွန်သူတဦးဖြစ်ပြီး နောက်လိုက် တပည့် တပမ်းများ၏ ချစ်ခင် ယုံကြည်လေးစားမှုကိုလည်း ခံယူရသူတဦး ဖြစ်သည်။

စဝ်ခွန်မြင့်သည် တရုတ်နိုင်ငံ ယူနန်ပြည်နယ် ဆစ်ဆောင်ပန်းနား ကိုယ်ပိုင်အုပ်ချုပ်ခွင့်ရဒေသ မုံးစယ့် မြို့နယ်ဇာတိဖြစ်ပြီး ဖခင်မှာ ယန်ကွမ်းထို  မိခင်မှာ နန်းကောင်ခမ်းဖြစ်သည်။ မွေးချင်း ၄ ယောက် (ကျား ၂ မ ၂ ) အနက် ဒုတိယသားကြီးဖြစ်သည်။ ၁၉၂၆ တွင်မွေးဖွားရာ အသက် ၅ နှစ် အရွယ် သျှမ်းပြည် အရှေ့ ပိုင်း မိုင်းယန်းမြို့နယ် ဝမ့်ဟော့တိုက်ရွာသို့ပြောင်းရွှေ့နေထိုင်ခဲ့ရာမှ ကွယ်လွန် ချိန်အထိ သျှမ်းပြည်တွင်း၌ပင်နေထိုင်ခဲ့သည်။

၁၉၆၁  တွင် စဝ်ငါးခမ်းဦးဆောင်သော SNA သျှမ်းတပ်ဖွဲ့၌ ဝင်ရောက်အမှုထမ်းခဲ့သည်။ ထိုစဉ်က SNA ဌာနချုပ်ရုံးမှာ ထိုင်းနိုင်ငံ ချင်းရိုင်းခရိုင် မယ့်ဆိုင်မြို့ရှိ ဝမ့်ဟွေ့နမ့်ပုံတွင် တည်ရှိသည်ဟုဆိုပါသည်။

၁၉၇၁ စဝ်ငါးခမ်းကွယ်လွန်ပြီးနောက် ၁၉၇၁ တွင်  SNA အား SSA နှင့်ပေါင်းစည်းကာ SSA-E ဟူ၍ အမည်တွင်ခဲ့သည်။ ထိုစဉ်က စဝ်ခွန်မြင့်သည် တပ်ရင်းအမှတ် ၃ ၏ တပ်ရင်းမှူးဖြစ်ခဲ့သည်။  ၁၉၇၄ တွင် SSA-E မှ SPLA သျှမ်းပြည်သူ့လွတ်မြောက်ရေးတပ်မတော်ကိုဖွဲ့စည်းကာ  ဗကပ CPB နှင့်မဟာမိတ်ဖွဲ့ခဲ့သည်။ ၁၉၇၆ တွင် ဗကပ နှင့်ပူးပေါင်းခဲ့ရာ စဝ်ခွန်ဆာ၊ ခွန်လောင်ခမ်း ၊ စဝ်ခွန်မြင့် ကဲ့သို့ ခေါင်းဆောင်များ ပါသွားသဖြင့် ဗကပ အောက်၌ တပ်မဟာ ၇၆၈ ကို တည်ထောင်ခဲ့သည်။ ယခုအချိန် အဆိုပါတပ်မဟာမှာ တပ်မဟာ ၃၆၉ အမည်ဖြင့် ဆီလူး၌ အခြေစိုက်နေဆဲဲဖြစ်သည်။ စဝ်ခွန်မြင့်မှာလည်း အဆိုပါတပ်မဟာမှ အုပ်ချုပ်ရေးအပိုင်း၌ တာဝန်ယူခဲ့သည်။

စဝ်ခွန်မြင့်သည် ကွယ်လွန်ချိန်အထိ မိုင်းလားမြို့ မန့်တုန့်သူ ဇနီး နန်းခမ်းလျဲန်းနှင့်နေထိုင်သည်။ ၎င်း၏ သားသမီး ၁၆ ဦးအနက် တဦးဖြစ်သည့် စိုင်းယီ့မှာ မိုင်းလားတပ်ဖွဲ့အတွင်း ရဲတပ်ဖွဲ့ခေါင်းဆောင် အဖြစ်တာဝန်ထမ်းရွက်နေပါသည်။
http://www.burmese.panglong.org/news/96-2008-08-03-06-49-23/3611-2012-11-01-08-17-39.html

အပြည့်အစုံသို့... »

ကာချုပ်နှင့်အဖွဲ့ ‘ဝ’ နှင့် မိုင်းလားအား မူးယစ်ဆေးဝါးအဓိကထားဆွေးနွေး

တပ်မတော်ကာကွယ်ရေးဦးစီးချုပ် ဒုဗိုလ်ချုပ်မှူးကြီးမင်းအောင်လှိုင် ဦးဆောင်သောအဖွဲ့  ဝ နှင့် မိုင်းလား ခေါင်း ဆောင်များအား စနေနေ့က ကျိုင်းတုံ၌တွေ့ဆုံကာ မူးယစ်ဆေးဝါးကိစ္စ အဓိကထားဆွေးနွေးသွား ကြောင်း နီးစပ်သည့် အသိုင်းအဝိုင်းကပြောပါသည်။

ယမန်နှစ်က လားရှိုး၌ ကျင်းပသော UWSA နှင့်နေပြည်တော်အဖွဲ့၏ ပြည်ထောင်စုအဆင့် ငြိမ်းချမ်းရေးဆွေးနွေးပွဲ

“သီးသန့်လေယာဉ်နဲ့ လာတယ်။ ဒုဗိုလ်ချုပ်မှူးကြီးမင်းအောင်လှိုင်ဦးဆောင်တယ်။တိုင်းချုပ် ဒု ဗိုလ်ချုပ်ကြီး အောင်သန်းထွဋ် ရလခ၊ ရမခ နဲ့အတူ တြိဂံ တိုင်းမှူးလဲပါတယ်။ အစိုးရရဲ့ စစ်ခေါင်းဆောင်ပိုင်း အားလုံး ၉ ယောက် လာတယ်၊ အဓိက ကတော့ နိုင်ငံရေး စစ်ရေးဘက်သိပ်မပြောဘူး၊ မူးယစ်ယစ်ဆေးဝါး တိုက်ဖျက်ဖို့ အဓိက ပြောသွားတယ်” - ဟု ကျိုင်းတုံရှိ အပစ်ရပ် ကိုယ်စားလှယ်ရုံးအသိုင်းအဝိုင်းက ပြောပါသည်။

စက်တင်္ဘာ ၆ ရက် မွန်းလွဲ ၁၂:၃၀ နာရီ က သျှမ်းပြည်အရှေ့ပိုင်း ကျိုင်းတုံမြို့၌ ဗိုလ်ချုပ်ကြီးမင်းအောင်လှိုင် နှင့်အတူ လားရှိုး၊ ခိုလမ် နှင့် ကျိုင်းတုံမှ စစ်တိုင်းမှူးတို့ ပါဝင်သောအဖွဲ့က UWSA ဝ တပ်ဖွဲ့ ဒု ဥက္ကဌ ရှောက် မင်လျှံ၊ ကျောက် ကော်အန်း၊ လီဂျူးလျဲ့ ခေါ် ဦးအောင်မြင့် ၊ ၁၄:၀၀ နာရီတွင် NDAA-ESS မိုင်းလားတပ်ဖွဲ့ မှ ဥက္ကဌ စိုင်းလင်း၊ ဒုဉက္ကဌ ဆန်းပေ နှင့် ခွန်ဆန်လူ တို့က တွေ့ဆုံဆွေးနွေးကြသည်ဟု ဆိုသည်။

“ဒုဗိုလ်ချုပ်မှူးကြီးမင်းအောင်လှိုင်ကနေပြီးတော့ ‘အခုကျနော်တို့တိုင်းပြည်မှာမူးယစ်ဆေးဝါး အရမ်းပေါများ နေတယ်။ ထိုင်း၊ တရုတ်နှင့် အမေရိကန်တွေတောင်မေးမြန်းလာတယ်ဆိုတော့၊ ခင်ဗျားတိုအပစ်ရပ် နယ်မြေတွေလဲ ၂၀၁၅ မှာ မူးယစ်ဆေးဝါးမရှိစေချင်တော့ဘူး၊ ခင်ဗျားတို့နာမည်ပျက်ရင်လဲ၊ ကျနော်တို့ နာမည် အဖျက်ခံရတာနဲ့ အတူတူဘဲ’ စတာတွေပြောတယ်” - ဟု ဝ  ၊ မိုင်းလား ခေါင်းဆောင်ပိုင်းနှင့် နီးစပ်သူတဦးကပြောပါသည်။

မြန်မာအစိုးရသည် ပြည်ထဲရေးဝန်ကြီးဌာနဝန်ကြီး နှင့် CCDAC မူးယစ်ဆေးဝါးတိုက်ဖျက်ရေးဗဟိုကော်မတီ ဥက္ကဌ ဒုတိယဗိုလ်ချုပ်ကြီးကိုကိုကလည်း ‘၂၀၁၄ အပြီးလုပ် ဆောင်မည့် မြန်မာနိုင်ငံမူးယစ် ဆေးဝါးတိုက် ဖျက်ရေး စီမံကိန်းအား ၂၀၁၉ အထိ စီမံကိန်းနှစ်ဆက်တိုးထား သည်ဟု  ပြောကြောင်း’ -  ၆ ရက်နေ့ထုတ်အစိုးရပိုင် သတင်းစာ၌ ရေးသား၏။

ထို့အတူ အာဆီယံနိုင်ငံ အတွင်း မူးယစ်ဆေးဝါး ပပျောက်ရန် မြန်မာနိုင်ငံအပေါ်မူတည်ကြောင်း၊ မြန်မာအစိုး ရ၏ မူးယစ်ဆေးဝါးပပျောက်ရေးစီမံကိန်းပြောင်းလဲမှုကြောင့် အာဆီယံမူးယစ်ကင်းစင်ရေးလည်း ၂၀၁၅ မှ၂၀၂၀ သို့ ရွှေ့သွား ဖွယ်ရှိ ကြောင်း သျှမ်းပြည်မူးယစ်ဆေးဝါးစောင့်ကြည့်ရေးအဖွဲ့ခေါင်းဆောင် ဦးခွန်စိုင်းကပြောပါသည်။

ဂျူလိုင် ၁၁-၁၅ အထိ တပ်ဖွဲ့ညီလာခံမှ ဆုံးဖြတ်ချက်အရ ‘စိုက်ပျိုးခြင်း၊ ချက်လုပ်ခြင်း၊ သယ်ယူပို့ဆောင်ခြင်း၊ ရောင်းဝယ်ခြင်း၊ သုံးစွဲခြင်း လုံး၀မရှိရ ဆိုသည့်ဝန်ခံကတိအား အိမ်တိုင်း လက်မှတ်ရေးထိုးခိုင်း သည့်နောက် မူးယစ်ဆေးဝါးနှင့် ပတ်သက်ဆက်နွယ်သူ ၃၀၀ ကျော်အား ထိန်းချုပ်ထားပြီးချထားသော စည်းမျဉ်းဥပဒေ အရ တရားစီရင်သွားမည်ဖြစ်ကြောင်း မိုင်းလားအရှိ တဦးကလည်းပြောပါသည်။
http://www.burmese.panglong.org/news/92-2008-08-03-06-48-25/3551-2012-10-08-09-48-57.html

အပြည့်အစုံသို့... »

“၀” ၊ မိုင်းလား အဖွဲ့များ နှင့် ကာချုပ် တွေ့ဆုံ

ကာကွယ်ရေးဦးစီးချုပ် ဒု ဗိုလ်ချုပ်မှူးကြီး မင်းအောင်လှိုင် (ဓာတ်ပုံ – ဧရာဝတီ)

ဒု ဗိုလ်ချုပ်မှူးကြီး မင်းအောင်လှိုင် ကာကွယ်ရေးဦးစီးချုပ် တာဝန်ယူပြီးနောက် ပထမဆုံးအကြိမ်အဖြစ် တရုတ်နယ်စပ်အခြေစိုက် အပစ်ရပ်အဖွဲ့များဖြစ်သည့် ၀ပြည်သွေးစည်ညီညွတ်ရေး အဖွဲ့ (UWSA)၊ မိုင်းလားအခြေစိုက် အမျိုးသားဒီမိုကရေစီ မဟာမိတ်တပ်မတော် (NDAA) ခေါင်းဆောင်များနှင့် ရှမ်းပြည် အရှေ့ ပိုင်း ကျိုင်းတုံ အခြေစိုက် တြိဂံတိုင်းစစ်ဌာနချုပ်တွင် ပြီးခဲသည့်စနေနေ့က  တွေ့ဆုံဆွေးနွေးသည်။
UWSA အဖွဲ့ ဒု ဥက္ကဋ္ဌ ရှောက်မီလျံ၊ NDAA အဖွဲ့ ဥက္ကဋ္ဌ ဦးစိုင်းလင်းတို့နှင့် တွေ့ဆုံဆွေးနွေးခြင်းဖြစ်ပြီး၊ မည်သည့် အကြောင်းအရာများ ဆွေးနွေးသည်ကိုမူ ထုတ်ပြန်ကြေညာခြင်းမရှိပေ။
“ပြဿာနာ ကြီးကြီးမားမားရှိလို့ တွေ့ဆုံတာမဟုတ်ပါဘူး၊ နယ်မြေ အတွင်းမှာဖြစ်ပေါ်နေတဲ့ လတ်တလော အခြေအနေလေးတွေကို ပြောကြမှာပါ”ဟု UWSA အဖွဲ့၏ ဗဟိုကော်မတီဝင်တဦးဖြစ်သူ ဦးဘွမ်တိန်းက ဧရာဝတီကို ပြောဆိုသည်။
ယခင် စစ်အစိုးရလက်ထက် အပစ်ရပ် တိုင်းရင်းသားလက်နက်ကိုင်အဖွဲ့ များအား နယ်ခြားစောင့်တပ်ဖွဲ့များအဖြစ် ပြောင်းလဲရန် ကြိုးစားရာ တဖက်နှင့် တဖက်တင်းမာမှုများ ဖြစ်ပွားခဲ့ပြီး အဆိုပါအဖွဲ့များနှင့် ဆက်ဆံရေး တန်းသွားခဲ့သော်လည်း သမ္မတဦးသိန်းစိန် အစိုးရလက်ထက် ပြီးခဲ့သည့်နှစ် စက်တင်ဘာလအတွင်း က ပဏာ မငြိမ်းချမ်းရေး သဘောတူညီချက်များ အောက်ခြေတပ်မှူးများအဆင့် ဆွေးနွေးပွဲများမှတဆင့် ရယူနိုင်ခဲ့သည်။
ထိုသဘောတူညီချက်များတွင် ဆက်ဆံရေးရုံးများကို မြို့ကြီးများတွင် ပြန်လည်ဖွင့်လှစ်ရန်၊ နှစ်ဘက်တပ်ဖွဲ့များ လက်ရှိ အခြေ အနေအတိုင်း ဆက်ရှိနေရန်၊ လက်နက်ကိုင် တပ်ဖွဲ့များ အစိုးရနယ်မြေများသို့ လာရောက်လျှင် ကြိုတင်အကြောင်းကြားရန်နှင့် ငြိမ်းချမ်းရေး ဆွေးနွေးရာတွင် တူညီသည့် ဘုံအချက်များကိုသာ ဆွေးနွေးပြီး ပဋိပက္ခဖြစ်မည့် အငြင်းပွားဖွယ်အချက်များကို ရှောင် ရန်၊  နှစ်ဖက်တင်းမာမှု ဖြစ်ပွားစဉ်က ၀နယ်မြေမှ ထွက်ခွာသွားသည့် အစိုးရဝန်ထမ်းများကို ပြန်လည်လက်ခံရန် စသည့်အချက် များ ပါ၀င်သည်။
ဒု ဗိုလ်ချုပ်မှူးကြီး မင်းအောင်လှိုင်နှင့် ၀ လက်နက်ကိုင်တပ်ဖွဲ့ (UWSA)တို့ တွေ့ဆုံမှုသည်  မြန်မာတပ်မ တော်နှင့် ကချင်လွတ်လပ် ရေး တပ်ဖွဲ့ (KIA)တို့ တိုက်ပွဲများ ဖြစ်ပွားချိန်နှင့်လည်း တိုက်ဆိုင်နေသည်။
တရုတ်မြန်မာနယ်စပ်ရှိ စစ်ရေး၊ နိုင်ငံရေး အကဲခတ် ဦးအောင်ကျော်ဇောက“တရုတ်နယ်စပ်က တိုင်းရင်းသားတွေက တရုတ်နဲ့ အရမ်းနီးစပ်သလို၊ လက်ရှိ ၀တပ်ဖွဲ့ အနေအထားအရလည်း မြန်မာတပ်ကတိုက်ဖို့ မလွယ်သေးဘူး၊ ဒါကြောင့် သတိကြီးကြီးနဲ့ ကိုင်တွယ်နေတဲ့ပုံပဲ”ဟု ဆိုသည်။
တရုတ်နယ်စပ်အခြေစိုက် တိုင်းရင်းသားများအရေးသည် တရုတ်အစိုးရအပေါ်တွင်လည်း မူတည်ပြီး၊ အစိုးရသစ် လက်ထက်တွင် အမေရိကန်နှင့် အနီးကပ်ဆက်ဆံလာ ခြင်း၊ မြစ်ဆုံရေကာတာစီမံကိန်းကို ရုတ်သိမ်းခဲ့ခြင်းတို့သည်တရုတ်- မြန်မာဆက်ဆံရေးကို ထိခိုက်နိုင် ကြောင်း၊ ထိုကြောင့် တရုတ်အစိုးရက တိုင်းရငး်သားများကို ကျောထောက်နောက်ခံပြန်လည် ပြုလာနိုင်ကြောင်း ဦးအောင် ကျော်ဇောက သုံးသပ်သည်။
ဒု ဗိုလ်ချုပ်မှူးကြီး မင်းအောင်လှိုင်သည် တိုင်းရင်းသားအရေးနှင့် ပတ်သက်လျှင် ပြတ်ပြတ်သားသား ကိုင်တွယ်သူတဦးဟု အများက ပြောဆိုကြ သော်လည်း စစ်တပ်ပိုင် မြဝတီသတင်းဌာနမှ ဖော်ပြ သည့် ဓာတ်ပုံများ၌မူ ၀တိုင်းရင်းသားခေါင်းဆောင် ရှောက်မီလျံ နှင့် ရင်းနှီးစွာ ဖက်လှဲတကင်း နှုတ်ဆက်နေသည်ကို တွေ့ရသည်။
ကြိဂံတိုင်းစစ်ဌာနချုပ်တွင် တိုင်းမှူးအဖြစ်တာဝန်ယူခဲ့သူ ဒု ဗိုလ်ချုပ်မှူးကြီး မင်းအောင်လှိုင်သည် ဒေသတွင်းရှိ တပ်ရင်းတပ်ဖွဲ့များ ၏အနေ အထား စစ်ရေးလေ့ကျင့်မှုများကိုလည်း သွားရောက်စစ်ဆေးခဲ့သေးသည်။

http://burma.irrawaddy.org/archives/22288

အပြည့်အစုံသို့... »

အဖွင့်စာမျက်နှာ ပြည်ထောင်စုအဆင့် ငြိမ်းချမ်းရေးဖော်ဆောင်ရေးအဖွဲ့ လုပ်ငန်းကော်မတီ ဥက္ကဋ္ဌ ဒုတိယသမ္မတ ဒေါက်တာစိုင်းမောက်ခမ်း အထူးဒေသ (၄) မိုင်းလားအဖွဲ့ ဒုတိယ ဥက္ကဋ္ဌ နှင့် အဖွဲ့အား လက်ခံတွေ့ဆုံ

Mon, 09/17/2012 - 18:33

နေပြည်တော် စက်တင်ဘာ ၁၇

ပြည်ထောင်စုအဆင့် ငြိမ်းချမ်းရေး ဖော်ဆောင်ရေးအဖွဲ့လုပ်ငန်း ကော်မတီ ဥက္ကဋ္ဌ ဒုတိယသမ္မတ ဒေါက်တာစိုင်းမောက်ခမ်းသည် စက်တင်ဘာ (၁၆) ရက် ညပိုင်းတွင် ရှမ်းပြည်နယ် (အရှေ့ပိုင်း)၊ ကျိုင်းတုံမြို့ ရွှေတြိဂံရိပ်သာ ဧည့်ခန်းမ၌ အထူး ဒေသ (၄) မိုင်းလားအဖွဲ့ ဒုတိယဥက္ကဋ္ဌနှင့် အဖွဲ့ဝင်များအား လက်ခံတွေ့ဆုံသည်။

ထိုသို့ တွေ့ဆုံရာတွင် ဒုတိယသမ္မတနှင့်အတူ ရှမ်းပြည်နယ်ဝန်ကြီးချုပ် ဦးစဝ်အောင်မြတ်၊ တြိဂံဒေသတိုင်း စစ်ဌာနချုပ်၊ တိုင်းမှူး ဗိုလ်ချုပ် သန်းထွန်းဦး၊ ပြည်ထဲရေးဝန်ကြီးဌာန ဒုတိယဝန်ကြီး ဗိုလ်မှူးချုပ် ကျော်ဇံမြင့်၊ နယ်စပ်ရေးရာဝန်ကြီးဌာန ဒုတိယဝန်ကြီး ဗိုလ်ချုပ် ဇော်ဝင်းနှင့် ဌာနဆိုင်ရာ အကြီးအကဲများ တက်ရောက်ကြပြီး အထူးဒေသ(၄) မိုင်းလား အဖွဲ့ ငြိမ်းချမ်းရေးနှင့် စည်းလုံးရေးကော်မတီ ဒုတိယဥက္ကဋ္ဌများဖြစ်ကြသည့် ဦးစံပေ့၊ ဦးစံလူ၊ ဦးထိန်လင်းနှင့် အဖွဲ့ဝင်များ တက်ရောက်ကြသည်။

ရှေးဦးစွာ ဒုတိယသမ္မတ ဒေါက်တာစိုင်းမောက်ခမ်းက အထူးဒေသ(၄) မိုင်းလား အဖွဲ့ ဒုတိယ ဥက္ကဋ္ဌနှင့် အဖွဲ့ဝင်များအား ရင်းရင်းနှီးနှီး နှုတ်ဆက်သည်။

ယင်းနောက် ဒုတိယသမ္မတအား အထူးဒေသ(၄) မိုင်းလားအဖွဲ့မှ တစ်ဦးချင်း ပြန်လည် မိတ်ဆက်သည်။

ထို့နောက် ပြည်ထောင်စုအဆင့် ငြိမ်းချမ်းရေး ဖော်ဆောင်ရေးအဖွဲ့လုပ်ငန်းကော်မတီ ဥက္ကဋ္ဌ ဒုတိယသမ္မတ ဒေါက်တာစိုင်းမောက်ခမ်းက အဖွင့်အမှာစကားပြောကြားရာတွင် ရှေးဦးစွာ မိမိတို့အဖွဲ့ ကျိုင်းတုံသို့ ရောက်ရှိရခြင်းမှာ ပြီးခဲ့သည့် လအတွင်း မိုးများစွာ ရွာသွန်းမှုကြောင့် ဧရာဝတီတိုင်းဒေသကြီး၊ ပဲခူးတိုင်းဒေသကြီးနှင့် ရန်ကုန်တိုင်းဒေသကြီးတို့တွင် ရေကြီး ရေလျှံမှု အများဆုံးဖြစ်ခဲ့ပြီး၊ ရှမ်းပြည်နယ် (မြောက်ပိုင်း) နှင့် (အရှေ့ပိုင်း) မိုင်းလား ဒေသတို့တွင်လည်း ရေကြီးရေလျှံပြီး အသက်အန္တရာယ်ဆုံးရှုံးမှုများကြောင့် ကူညီ ထောက်ပံ့ ပေးနိုင်ရန် လာရောက်ခြင်း ဖြစ်ကြောင်း။

နိုင်ငံအောက်ပိုင်းဒေသများသို့ နိုင်ငံတော်သမ္မတမှ သွားရောက်၍ ရေဘေးသင့် ပြည်သူများအား အားပေးကူညီထောက်ပံ့ခဲ့ပြီး ရှမ်းပြည်နယ်သို့ မိမိအနေဖြင့် ကူညီထောက်ပံ့ရန် လာရောက်ရခြင်း ဖြစ်ပါကြောင်း၊ ယမန်နေ့က လားရှိုးမြို့နှင် သိန်းနီမြို့တို့တွင် ရေဘေးသင့် ပြည်သူများနှင့် တွေ့ဆုံ၍ ကူညီထောက်ပံ့ပေးခဲ့ပြီး မိုင်းလားဒေသတွင်လည်း အလားတူ ထောက်ပံ့နိုင်ရန် ငြိမ်းချမ်းရေး ဖော်ဆောင်ရေးလုပ်ငန်း ဆက်လက် တိုးတက်နေမှု အခြေအနေနှင့် ရှမ်းပြည်နယ် (အရှေ့ပိုင်း) တွင် လိုအပ်သော အခြားလူမှုရေး လိုအပ်ချက်များ ဖြည့်ဆည်းပေးနိုင်ရန် ရောက်လာရခြင်း ဖြစ်ပါကြောင်း။

ဧရာဝတီတိုင်းဒေသကြီးတွင် ရေကြီးနစ်မြှုပ်မှုကြောင့် လယ်မြေဧကသိန်းနှင့်ချီ၍ ဆုံးရှုံးခဲ့ရပြီး မိုင်းလားဒေသတွင်လည်း ပျက်စီးဆုံးရှုံးခဲ့သည်ကို သိရှိရကြောင်း၊ မိုင်းလား အထူး ဒေသအဖွဲ့မှ တင်ပြရန် ရှိသော အခက်အခဲများကို မိမိအနေဖြင့် အတတ်နိုင်ဆုံး ဆောင်ရွက် ပေးသွားမည်ဖြစ်ပြီး အချို့ရေရှည်ဆောင်ရွက်ရမည့် ကိစ္စရပ်များကို ဆက်လက်၍ ညှိနှိုင်း ဆောင်ရွက်ပေးသွားမည် ဖြစ်ကြောင်း ပြောကြားသည်။

ထို့နောက် အထူးဒေသ(၄) မိုင်းလားအဖွဲ့ ငြိမ်းချမ်ရေးနှင့် စည်းလုံးရေးကော်မတီ ဒုတိယ ဥက္ကဋ္ဌ ဦးစံပေ့က မိမိတို့အဖွဲ့ ယခုလို ဒုတိယသမ္မတနှင့် တွေ့ဆုံခွင့်ရသည့်အတွက် များစွာ ဝမ်းမြောက် ဂုဏ်ယူမိပါကြောင်း၊ နိုင်ငံတော်မှ ထောက်ပံ့ငွေနှင့် ပစ္စည်းများ အစဉ် ထောက်ပံ့ နေမှုအတွက်လည်း ကျေးဇူးတင်ရှိပါကြောင်းနှင့် အထူးဒေသ (၄) မိုင်းလားအဖွဲ့၏ လိုအပ်ချက်များအား ဆွေးနွေးတင်ပြသည်။

ယင်းနောက် အထူးဒေသ (၄) မိုင်းလားအဖွဲ့ ငြိမ်းချမ်းရေးနှင့် စည်းလုံးရေးကော်မတီ အတွင်းရေးမှူ ဦးခမ်းမောင်က ယခင် နိုင်ငံသားစိစစ်ရေးကတ်ပြား ပြုလုပ်ပြီး မရရှိသေးသည့် ပြည်သူများကို ဆက်လက် ထုတ်ပေးစေလိုပါကြောင်း၊ မပြုလုပ်ရသေးသူ များကိုလည်း ပြုလုပ်ပေးစေလိုပါကြောင်း။

လမ်းများတည်ဆောက်ရာတွင် လိုအပ်သည့် ကတ္တရာများကို နိုင်ငံတော်မှ ပံ့ပိုးပေးစေလို ပါကြောင်း၊ ဝေးလံပြီး ဆင်းရဲနွမ်းပါးသည့် တောင်ပေါ်ဒေသများတွင် ကျန်းမာရေး ကာကွယ် စောင့်ရှောက်ကုသမှုပိုင်းတွင် ဆရာဝန်နှင့် ဆေးဝါးများ လုံလောက်မှု မရှိ၍ နိုင်ငံတော်မှ ဖြည့်ဆည်း ကူညီပံ့ပိုးပေးရန်နှင့် လက်ရှိဆေးရုံနှင့် ဆေးပေးခန်းများတွင် ဆေးရုံသုံး ကိရိယာများ ပြည့်စုံမှု မရှိပါသဖြင့် နိုင်ငံတော်မှ ကူညီပံ့ပိုး ပေးစေလိုပါကြောင်း တင်ပြသည်။

ထို့နောက် အထူးဒေသ (၄) မိုင်းလားအဖွဲ့ အုပ်ချုပ်ရေးကော်မတီ ရေအားလျှပ်စစ် ဌာနမှူး ဦးလှသောင်းက မိုင်းဝရေအားလျှပ်စစ် စက်ရုံစီမံကိန်း လုပ်ငန်းဆောင်ရွက် ပြီးစီးမှုနှင့် ဆက်လက် တည်ဆောက် အကောင်အထည်ဖော်နေမှုများကို ရှင်းလင်း တင်ပြသည်။

ဆက်လက်၍ နယ်စပ်ရေးရာဝန်ကြီးဌာန ဒုတိယဝန်ကြီး  ဗိုလ်ချုပ်ဇော်ဝင်းက ငြိမ်းချမ်းရေး သဘောတူညီချက်များအရ ကျိုင်းတုံမြို့တွင် မိုင်းလားအဖွဲ့က ဆက်ဆံရေးရုံး ဖွင့်ပြီး ဖြစ်သကဲ့သို့ မိုင်းလားတွင်လည်း နယ်စပ်ဒေသနှင့် တိုင်းရင်းသားလူမျိုးများ ဖွံ့ဖြိုး တိုးတက်ရေး ဦးစီးဌာနမှ ဆက်ဆံရေးရုံး ဖွင့်လှစ်ခဲ့ပြီး ဝန်ထမ်းများလည်း ရောက်ရှိ တာဝန် ထမ်းဆောင်လျက် ရှိပါကြောင်း၊ မိုင်းလားဒေသအဖွဲ့မှ အခြားနယ်မြေဒေသများသို့ သတ္တု တူးဖော်ခွင့်ပေးရန်အတွက် ကုမ္ပဏီ အမြန်ဖွဲ့စည်းသွားရန် လိုအပ်ပါကြောင်း၊ ထောက်ပံ့ ငွေနှင့် ဆန်များကိုလည်း ထောက်ပံ့ပေးလျက် ရှိပါကြောင်း၊ ပညာရေး အခက်အခဲ ဆရာ၊ ဆရာမ ဖြည့်တင်းလာရခြင်းမှာလည်း ပြည်နယ်အင်အားမှ ဖြည့်တင်းသွားပေးခြင်းဖြစ်ပြီး အဆိုပါ ဝန်ထမ်းများကိုလည်း မိုင်းလားဒေသတွင် နေပျော်စေရေးအတွက် ကူညီဆောင်ရွက်ပေးရန် လိုကြောင်း၊ တင်ပြထားသော ကတ္တရာ ရရှိရေးအတွက် ဆောက်လုပ်ရေး ဝန်ကြီး ဌာနနှင့် ညှိနှိုင်း ဆောင်ရွက် ပေးသွားမည်ဖြစ်ကြောင်းနှင့် မိုင်းဝနှင့် ကျိုင်းခမ်း ဓါတ်အား ထုတ်လုပ်ရေးကိစ္စကို စာဖြင့် တင်ပြရန် လိုအပ်ပါကြောင်းဖြင့် ပြန်လည် ရှင်းလင်း ဆွေးနွေး ပြောကြားသည်။

ယင်းနောက် ဒုတိယဝန်ကြီး ဗိုလ်ချုပ်ဇော်ဝင်းက အထူးဒေသ (၄) မိုင်းလားအဖွဲ့သို့ ထောက်ပံ့ငွေများ ပေးအပ်သည်။

ထို့နောက် ဒုတိယသမ္မတ ဒေါက်တာစိုင်းမောက်ခမ်းက နိဂုံးချုပ် အမှာစကားပြောကြားရာတွင် ယခုတင်ပြချက်များအပေါ် လုပ်ပေးနိုင်သည်များကို ဆောင်ရွက်ပေးသွားမှာ ဖြစ်ကြောင်း၊ မှတ်ပုံတင်ကိစ္စကို လူဝင်မှုကြီးကြပ်ရေးနှင့် ပြည်သူ့အင်အား ဦးစီးဌာနမှလည်း စီမံချက်ဖြင့် ပြုလုပ်ပေးလျက်ရှိသဖြင့် အချိန်ကျပါက မိုင်းလားဒေသသို့ ဆောင်ရွက်ပေး သွားမှာ ဖြစ်ကြောင်း။

သစ်တင်ပို့မှုတွင် အလုံးလိုက်တင်ပို့ခြင်းထက် တန်ဖိုးမြင့် အချောထည်ပြုလုပ်ပြီး ပို့ပါက အမြတ်စွန်းများများရရှိပြီး မိမိဒေသအတွက် ပိုမို၍ အကျိုးဖြစ်ထွန်းစေမှာ ဖြစ်ကြောင်း၊ ခုတ်လဲပြီးပါက ပြန်လည် စိုက်ပျိုးရန်လိုကြောင်း၊ သို့မဟုတ်ပါက သစ်တော ပြုန်းတီးမှု ဖြစ်ပြီး သဘာဝဘေးအန္တရာယ်များ ဖြစ်ပေါ်စေနိုင်ကြောင်း။

အလားတူ သတ္တုထွက်ပစ္စည်းများကိုလည်း အချောထည် ပြုလုပ်ပြီးမှ ပို့စေချင်ကြောင်း။

နိုင်ငံတော်အစိုးရအနေဖြင့် စီးပွားရေး လုပ်ငန်းကိစ္စရပ်များတွင် ငြိမ်းချမ်းရေးအဖွဲ့ အားလုံး တန်းတူရည်တူဖြစ်စေရန်အတွက် တရားဝင်ကုမ္ပဏီထူထောင်၍ ဆောင်ရွက်ရန် လိုကြောင်း၊ ဥပဒေနှင့် အညီ လုပ်စေချင်ကြောင်း၊ လိုအပ်၍ ငွေချေးပါကလည်း ဥပဒေနှင့်အညီ ချေးယူ နိုင်အောင် ဆောင်ရွက်ပေးနိုင်ပါကြောင်း။

မိမိတို့အနေဖြင့် နိုင်ငံရေး တည်ငြိမ်အေးချမ်းအောင်၊ လက်နက်ကိုင် အဖွဲ့အစည်းများ ကိုလည်း တည်ငြိမ်အေးချမ်းအောင် ဦးစားပေး ဆောင်ရွက်နေကြောင်း၊ နိုင်ငံရေး တည်ငြိမ်မှု ရှိမှသာ စီးပွားရေး တိုးတက်အောင် ဆောင်ရွက်နိုင်မှာဖြစ်ပြီး စီးပွားရေး ဖွံ့ဖြိုး တိုးတက်မှု ရှိမှသာလျှင် လူမှုရေး၊ ပညာရေး၊ ကျန်းမာရေး အစရှိသည့် ကဏ္ဍပေါင်းစုံကို ပိုမို ကောင်းမွန် တိုးတက်အောင် လုပ်ကိုင် ဆောင်ရွက်ပေးနိုင်မှာ ဖြစ်ကြောင်း။

ထို့ကြောင့် နိုင်ငံတော်အစိုးရအနေဖြင့် နိုင်ငံဖွံ့ဖြိုးတိုးတက်ရေး လုပ်ငန်းစဉ် ဒုတိယအဆင့် ဖြစ်သည့် စီးပွားရေးပြုပြင်ပြောင်းလဲရေး လုပ်ငန်းစီမံကိန်းများကို ဆောင်ရွက်လျက် ရှိကြောင်း၊ ယခုတင်ပြချက်များကိုလည် နယ်စပ်ရေးရာဝန်ကြီးဌာနမှတစ်ဆင့် ဆက်လက် ဆွေးနွေးလုပ်ကိုင် ဆောင်ရွက်ပေးသွားမှာ ဖြစ်ကြောင်းဖြင့် ပြောကြားသည်။

တွေ့ဆုံပွဲအပြီးတွင် ပြည်ထောင်စုအဆင့် ငြိမ်းချမ်းရေးဖော်ဆောင်ရေးအဖွဲ့လုပ်ငန်း ကော်မတီ ဥက္ကဋ္ဌ ဒုတိယသမ္မတ ဒေါက်တာစိုင်းမောက်ခမ်းနှင့် အဖွဲ့ဝင်များသည် အထူး ဒေသ (၄) မိုင်းလားအဖွဲ့ ဒုတိယဥက္ကဋ္ဌများနှင့် အဖွဲ့ဝင်များနှင့်အတူ စုပေါင်း၍ မှတ်တမ်း ဓါတ်ပုံရိုက်ကြသည်။

http://www.president-office.gov.mm/briefing-room/news/2012/09/17/id-1382

အပြည့်အစုံသို့... »