ကေအန်ယူနဲ့ အစိုးရ ငြိမ်းချမ်းရေးဖော်ဆောင်ရေးအဖွဲ့တွေ့ဆုံ

ကရင်အမျိုးသားအစည်းအရုံးနဲ့ ပြည်ထောင်စု ငြိမ်းချမ်းရေး ဖော်ဆောင်မှု လုပ်ငန်းကော်မတီ ဒု-ဥက္ကဋ္ဌ မီးရထားဝန်ကြီးဦးအောင်မင်းတို့အဖွဲ့ ဒီကနေ့ ကရင်ပြည်နယ် မြဝတီမြို့မှာ တွေ့ဆုံ ဆွေးနွေးခဲ့ကြပါတယ်။

မြဝတီမြို့ရှိ ခမရ ၂၇၅ ရုံးမှာ တွေ့ဆုံခဲ့ကြတာဖြစ်ပြီး လာမယ့် ဩဂုတ်လ တတိယအပတ်မှာ အစိုးရနဲ့ ကေအန်ယူတို့ တတိယအကြိမ်တွေ့ဆုံဆွေးနွေးဖို့ အကြို ညိနှိုင်းဆွေးနွေးတာလို့ ကေအန်ယူ ငြိမ်းချမ်းရေးကော်မတီအဖွဲ့ရဲ့ ပြောခွင့်ရသူ နော်မေဦးက ပြောပါတယ်။

“တတိယအကြိမ် ဆွေးနွေးပွဲအတွက်ကို ဒုတိယအကြိမ် ဆွေးနွေးတဲ့ အချက်အလက်တွေ အပေါ်မှာပဲ ပြန်လည်ပြင်ဆင်တာတွေရှိတယ်။ အဓိက တပ်ရုပ်သိမ်းရေးကိစ္စ၊ ပြည်သူလူထုဘဝလုံခြုံဖို့ အာမခံနိုင်ဖို့ဆိုတဲ့နေရာမှာ နည်းလမ်းတခုဖြစ်တဲ့ ကျေးရွာတွေကြားမှာ အများအပြားရှိနေတဲ့ တပ်တွေပြန်လျှော့ချဖို့၊ ရုပ်သိမ်းဖို့ ကိစ္စတွေ ဆွေးနွေးဖို့ရှိတယ်။ နောက်တခုက လက်နက်ကိုင် နှစ်ဦးနှစ်ဖက်က လိုက်နာရမယ့် စည်းကမ်းတွေကို အကျယ်တဝင့် ဆွေးနွေးမှာ ဖြစ်ပါတယ်။”

တတိယအကြိမ် ဆွေးနွေးပွဲကို ကရင်ပြည်နယ် ဘားအံမြို့မှာ ပြုလုပ်မှာဖြစ်ပြီး ဩဂုတ်လ တတိယ အပတ်ကို ရွေးချယ်ထားတယ်လို့ သူက ဆက်ပြောပါတယ်။

ဒီနေ့မနက် ၁၁ နာရီခွဲကနေ ၂ နာရီခွဲအထိ တွေ့ဆုံမှုမှာ အစိုးရဘက်က ရထားဝန်ကြီး ဦးအောင်မင်း၊ လူဝင်မှုကြီးကြပ်ရေးဝန်ကြီး ဦးခင်ရီ၊ စက်မှုဝန်ကြီး ဦးစိုးသိန်း၊ ကရင်ပြည်နယ်ဝန်ကြီးချုပ် ဦးဇော်မင်း အပါအဝင် ရ ဦး တက်ရောက်ခဲ့ပြီး ကေအန်ယူဘက်ကတော့ အထွေထွေအတွင်းရေးမှူး နော်စီဖိုးရာစိန် ဦးဆောင်ပြီး အဖွဲ့ဝင် ၆ ဦး တက်ရောက်ဆွေးနွေးခဲ့ကြပါတယ်။

နှစ်ပေါင်း ၆၀ ကျော်ကြာ လက်နက်စွဲကိုင်တိုက်ခိုက်ခဲ့တဲ့ ကေအန်ယူနဲ ့အစိုးရ အကြား ဇန်နဝါရီလဆန်းပိုင်းက ပထမအကြိမ် တွေ့ဆုံရာမှာ  အပစ်အခတ် ရပ်ထားဖို့ နှစ်ဖက် ပဏာမ သဘောတူညီခဲ့ပါတယ်။

မတ် ၄ ရက်နေ့ကနေ ၁၁ ရက်နေ့မှာ ကေအန်ယူအဖွဲ့ဟာ မြန်မာပြည်တွင်း သွားပြီး ပြည်ထောင်စုအဆင့် ငြိမ်းချမ်းရေးဆွေးနွေးပွဲပြုလုပ်ခဲ့ရာမှာ ပဲခူးတိုင်း ကျောက်ကြီးမြို့နဲ့ တနသာင်္ရီတိုင်း မြိတ်မြို့တို့မှာ ဆက်ဆံရေးရုံး ဖွင့်လှစ့်နိုင်ခဲ့ပါတယ်။

ဒီနောက်ပိုင်းမှာတော့ နှစ်ဖက်တပ်တွေ ပြန်လည်နေရာချထားရေးကိစ္စတွေကို ဆွေးနွေးသွားမှာဖြစ်ပါတယ်။ ဦးအောင်မင်းနဲ့ ၀န်ကြီးအဖွဲ့ဟာ ကေအန်ယူနဲ့ တွေ့ဆုံဆွေးနွေးပြီး မဲဆောက်မှာရှိတဲ့ မယ်တော်ဆေးခန်းကို ခဏ ၀င်ရောက်လည်ပတ် အားပေးခဲ့ပါတယ်။

http://burmese.dvb.no/archives/28844

Posted in: KNU,ကရင်,တွေ့ဆုံဆွေးနွေးမှု