တတိယ အကြိမ် ဆွေးနွေးပွဲ အတွက် KNU နှင့် အစိုးရတို့ အကြိုညှိနှိုင်း

ယနေ့ နံနက် ၁၀ နာရီ ခွဲမှ နေံလည် ၂ နာရီ အချိန်အထိ  အစိုးရ မီးရထား ၀န်ကြီး ဦးအောင်မင်း ဦးဆောင်သော ငြိမ်းချမ်း ရေးဖေါ်ဆောင်မှု ကိုယ်စားလှယ် အဖွဲ့သည် ကရင် အမျိုးသား အစည်းအရုံး ( KNU ) ခေါင်းဆောင်များနှင့် တတိယ အကြိမ် ငြိမ်းချမ်းရေး ဆွေးနွေးပွဲအတွက် အကြိုဆွေးနွေး ညှိနှိုင်းရန် ကရင်ပြည်နယ် မြဝတီမြို့တွင် တွေ့ဆုံ ခဲ့ကြသည်ဟု ဤဆွေးနွေးပွဲ အတွက် ပြောရေး ဆိုခွင့်ရှိသူ နော်မေဦးက ပြောပါသည်။
“ကျမတို့က နောက်ထပ် တွေ့ဆုံဖို့ က ဒီလထဲမှာပဲ ကရင်ပြည်နယ် ဖားအံမှာ ထပ်ပြီး ဆွေးနွေးမယ်။ အဲဒီတော့ ကျမတို့ ဘက်က ပြင်ဆင် ထားတာကို သူတို့ကို အရင်ပြောပြတယ် သူတို့ဘက် ကလည်း ကြိုပြီး သိထားရင် ပြင်ဆင်လို့ရအောင် ပါ။ ဒါကြောင့် နောက်ထပ် တွေ့ဆုံမှုအတွက် နှစ်ဖက်အဆင် ပြေချောမွေ့ရေးကို ညှိနှိုင်းတာဖြစ်တယ်လို့ ပြောရမှာပါ” သူက ပြောပါသည်။
ဤအကြိုဆွေးနွေးပွဲသည် အစိုးရနှင့် KNU ကြား တတိယ အကြိမ် ဆွေးနွေးပွဲအတွက် အောက်ပါအချက် (၂) ချက်ကို ညှိနှိုင်း ခဲ့ကြခြင်း ဖြစ်ပါသည်။
၁) ပြည်သူလူထု ဘဝ လုံခြုံမှုကို အာမခံ ရရှိရန်အတွက် ကျေးရွာနှင့် ပြည်သူလူထုကြားတွင် ရှိနေသော အစိုးရ တပ်များ ရုပ်သိမ်းပေးရန် နှင့် လျော့ချပေးရန်။
၂) ယခင် ဒုတိယ အကြိမ် တွေ့ဆုံစဉ်က ဆုံးဖြတ် ထားသည့်အတိုင်း နှစ်ဘက်တပ်များ လိုက်နာ ကျင့်သုံးရမည့် ကျင့်ဝတ် များကို တတိယအကြိမ် ဆွေးနွေးပွဲ၌ ထပ်မံ ဆွေးနွေးရန် အတွက် ပြင်ဆင်ထားရန် ဖြစ်သည်ဟု ဆိုပါသည်။
  “ရည်ရွယ်တာက အစိုးရတပ်တွေ ကျမတို့ လက်နက်ကိုင် တပ်တွေနဲ့ လက်နက်ကိုင် ပဋိပက္ခမဖြစ်အောင် ပြီးတော့ ပြည်သူလူထုတွေရဲ့ အခွင့်ရေးကို မထိပါးရလေအောင် အားမခံနိုင်ဖို့အတွက် လိုက်နာရမယ့် ကျင့်ဝတ်တွေ လိုပါတယ်။ ဒီအချက်တွေကို လာမယ့်ပွဲမှာ ဆွေးနွေးမယ်လို့တင်ပြတာပါ။  ဒါက ဒုတိယ အကြိမ် ဆွေးနွေးပွဲတုန်းက ရရှိထားတဲ့ သဘောတူညီချက် အပေါ်မှာပဲ ပြင်ဆင်ထားပြီးတော့ ဒါကိုပြန်လည် အသိပေးတာပါ။ ဒါမှဆွေး နွေးပွဲရက်ကတို မယ်လေ” ဟု ဆိုပါသည်။

နော်စီဖိုးရာစိန်နှင့် ဦးအောင်မင်းတို့ ထိုင်းနိုင်ငံ မဲဆောက်မြို့၌ တွေ့ဆုံစဉ်

ထို့အပြင် KNU ကရင် အမျိုးသား အစည်းရုံးသည်  လက်နက်ကိုင် တပ်ဖွဲ့ အချင်းချင်း ပဋိပက္ခဖြစ်လာသည့်အခါ ထိုပြသနာမျိုးကို မည်သို့ ကိုယ်တွယ် ဖြေရှင်းကြရမည့် နည်းလမ်းများကို တင်ပြပြီး ညှိနှိုင်း ဆွေးနွေး ခဲ့ပါသည်။ ထို့အတူ ပြည် တွင်း ပြည်ပ စီးပွားရေး ရင်းနှီးမြုပ်နှံမှုနှင့် ပတ်သတ်ပြီး လူထု ဘဝ လုံခြံုရေးကို အာမခံချက် မရှိသေးသည့် အချိန်တွင် စီးပွားရေး ရင်းနှီှးမြုပ်နှံမှု လုပ်သင့် မလုပ်သင့် အခြေအနေကိုလည်း ဆွေးနွေးခဲ့ပါသည်။
KNU သည် အပစ်ခတ် ရပ်စဲရေး ခိုင်မာမှု မရှိသေးသည့် ကာလ ပတ်လုံး ပြည်ထောင်စုအဆင့် နိုင်ငံရေးဆွေး နွေးမှုများ တက်လှမ်းနိုင်မည် မဟုတ် သေးဟုဆိုပါသည်။
ယခုကျင်းပသည့် အကြို ဆွေးနွေးပွဲတွင် မြန်မာ အစိုးရဘက်မှ ဦးအောင်မင်း၊ ဦးစိုးသိန်း၊ ဦးခင်ရီ၊ ကရင်ပြည်နယ် ၀န်ကြီးချုပ် ဦးဇော်မင်းတို့ ပါ၀င်ပြီး KNU ဘက်မှ အထွေထွေ အတွင်းရေးမှူး နော်စီဖိုးရာစိန်၊ နော်မေဦး၊ ပဒို သောသီဘွဲ၊ စောအောင်ဝင်းရွှေ တို့ ၄ ဦး တက်ရောက် ဆွေးနွေး ခဲ့ပါသည်။ KNU နှင့် အစိုးရတို့၏ တတိယအကြိမ် ဆွေးနွေးပွဲရက် ကို အချိန် အတိအကျ မသတ်မှတ် ရသေးသော်လည်း လာမည့် သြဂုတ်လ ၂၁ ရက်နေ့မှ ၂၃ ရက်နေ့ အထိဖြစ်နိုင် သည်ဟု ခန့်မှန်း ခဲ့ပါသည်။

http://www.phophtaw.org/burmese/index.php/news/local-news/1974-----knu---.html

Posted in: KNU,ကရင်,တွေ့ဆုံဆွေးနွေးမှု,သတင်း