Thursday, September 06, 2012
မြန်မာ့ငြိမ်းချမ်းရေးလေ့လာစောင့်ကြည့်မှု
စံခလပူရီ (မဇ္စျိမ) ။ ။ကရင် အမျိုးသား အစည်းအရုံးနှင့် အစိုးရတို့၏ ပြည်ထောင်စု အဆင့် တွေ့ဆုံပွဲ၌ အစိုးရ တပ်များ နေရာယူ တပ်စွဲထားသည့် တပ်တည် နေရာ သုံးရာနီးပါးရှိသည့်အနက် ကိုးဆယ်ခန့်ကို ရွှေ့ပြောင်း တပ်စိုက်
ပေးရန် တောင်းဆိုထားကြောင်း ကရင် အမျိုးသား အစည်းအရုံး ဒု-ဥက္ကဋ္ဌ ဒေးဗစ်သာကပေါ က ပြောသည်။
“တပ်မဟာ (၁) ကနေ (၇) အထိ အစိုးရ တပ်တွေ နေရာ (၃၀၀) နီးနီးလောက် တပ်စွဲ ထားတဲ့ အပေါ် နေရာ (၉၀) လောက် ရွှေ့ပေးဖို့ ကျွန်တော်တို့ တောင်းဆိုထားပါတယ်၊ သူတို့သဘောတူချင်ရင်လည်း တူမှာ ပေါ့လေ၊ တစ်ထိုင်တည်းနဲ့ ဆုံးဖြတ်လို့မရဘူး၊ သူတို့လည်း အထက်ကို တင်ပြရမယ်လေ” ကရင်မျိုးသား အစည်းအရုံး ဒု-ဥက္ကဋ္ဌ ဒေးဗစ် သာကပေါက မဇ္စျိမကို ပြောသည်။
ယခု ရွှေ့ပေးရန် တောင်းဆိုထားသည့် အစိုးရတပ်များမှာ တောင်ငူ၊ ညောင်လေးပင်၊ ကော့ကရိတ်၊ ဘားအံ၊ ဘိတ်ထားဝယ် ခရိုင်များတွင် ကရင်အမျိုးသား အစည်းအရုံး ထိန်းချုပ် နယ်မြေတွင်း၌ တည်ရှိသည့် အစိုးရတပ်
တည်စခန်းများ ဖြစ်သည်ဟု သိရှိရသည်။
“အဲဒီလို ရွှေ့ပေးဖို ့တောင်းဆိုထားတဲ့ တပ်တွေက ရွာတွေနားမှာ ရှိတယ်၊ သို့မဟုတ် ပြည်သူတွေ သွားလာတဲ့ လမ်းကြောင်းတွေပေါ်မှာ ရှိတယ်၊ ရွာတွေနဲ့ နီးတဲ့အခါ လယ်တွေ ယာတွေသိမ်း၊ လူ့အခွင့်အရေးတွေ ချိုးဖောက် အဲဒါတွေကြောင့်ပါ” ဟု ဒေးဗစ် သာကပေါက မဇ္စျိမကို ပြောသည်။
ထို့ပြင် အဆိုပါ အစိုးရ တပ်စခန်းများ အနီး၌ ထောင်ထားသည့် မိုင်းများလည်း ရှင်းလင်းပေးရန်လည်း တောင်းဆို ထားသည်ဟု သိရသည်။
အဆိုပါ တပ်များမှာ အစိုးရနှင့် ကရင်အမျိုးသား အစည်းအရုံးသို့ တိုက်ခိုက်နေကြသည့် ကာလအတွင်း ပြောက်ကျား နည်းဖြင့် တိုက်ခိုက်နိုင်ရန် မိမိတို့ထိန်းချုပ် နယ်မြေသို့ အဝင်ခံခဲ့ပြီး ထိုမှ တဆင့် အစိုးရ တပ်များက တပ်စခန်းများ
ဆောက်လုပ်ကာ နေရာယူ တပ်စွဲထားခြင်း ဖြစ်သည်ဟု ဆိုပါသည်။
အဆိုပါ ကရင်အမျိုးသား အစည်းအရုံးနှင့် အစိုးရတို့၏ ပြည်ထောင်စုအဆင့် ကိုယ်စားလှယ်များ ဆွေးနွေးပွဲကို စက်တင်ဘာ (၃) ရက်နေ့မှ (၅) ရက်နေ့အထိ ဘားအံမြို့ရှိ ဇွဲကပင် ဟိုတယ်၌ ပြုလုပ်ခဲ့သည်။
၎င်းဆွေးနွေးပွဲသို့ သမ္မတရုံး ဝန်ကြီးသစ်များ ဖြစ်ကြသော ဦးအောင်မင်းနှင့် ဦးစိုးသိန်း၊ လူဝင်မှု ကြီးကြပ်ရေး ဝန်ကြီး ဦးခင်ရီ၊ သစ်တော ဝန်ကြီး တင်အောင်၊ အရှေ့တောင်တိုင်း စစ်တိုင်းမှူး ဗိုလ်ချုပ် ခင်မောင်ဝင်းနှင့် ပြည်နယ်အစိုးရ အဖွဲ့များလည်း တက်ရောက်ခဲ့ကြသည်။ KNU ဘက်မှ အထွေထွေ အတွင်းရေးမှူး နော်စီဖိုးရာစိန် ဦးဆောင်သော ကိုယ်စားလှယ် အဖွဲ့တို့ တက်ရောက် ခဲ့ကြသည်။
ပြည်ထောင်စုအဆင့် အပစ်အခတ် ရပ်စဲရေး ခိုင်မာရန် အတွက် နှစ်ဘက်တပ်များ၏ တပ်နေရာ ချထားရေးမှာ အဓိက ကျသည့် အကြောင်းရင်း တစ်ရပ် ဖြစ်သည် ဟုလည်း ဒေးဗစ် သာကပေါက ပြောပါသည်။
“တပ်ရွှေ့ဖို့ကို သူတို့သဘောတူရင် နေ့ချင်းညချင်း ပြီးတာပဲ၊ ဟိုတပ်ရွှေ့ ဒီတပ်ရွှေ့ ဘယ်လောက်ကြာမှာလဲ၊ တစ်ပတ် နှစ်ပတ်ပေါ့။ မလုပ်ချင်ရင်တော့ ကြာနေမှာပေါ့၊ အဲဒီလို ဖြစ်လာရင် ထပ်ဆွေးနွေးရမှာပေါ့၊ ဘာလို့မလုပ် ချင်တာလဲလို့” ဟု ဒေးဗစ် သာကပေါက ပြောသည်။
ယခု စက်တင်ဘာလ (၃) ရက်နေ့မှ (၅) ရက်နေ့အထိ ဘားအံမြို့ ဇွဲကပင် ဟိုတယ်၌ ပြုလုပ်သည့် ပြည်ထောင်စု အဆင့် ကိုယ်စားလှယ်များနှင့် ဆွေးနွေးပွဲတွင်မူ နှစ်ဖက် တပ်များ လိုက်နာသင့်သော ကျင့်ဝတ် များအပေါ် အစိုးရနှင့် သဘောတူ လက်မှတ်ရေးထိုး နိုင်ခဲ့သည်ဟု သိရပါသည်။
KNU သည် အချက် ၄ ချက် အခြေခံဖြင့် ၂၀၁၂ ခုနှစ်၊ ဇန်နဝါရီလ ၁၂ ရက်နေ့က ဘားအံမြို့ ဇွဲကပင်ဟိုတယ်
ဆွေးနွေးပွဲ ၌ အပစ်အခတ် ရပ်စဲရေး သဘောတူညီချက် စာချုပ်ကို ပြည်နယ် အစိုးရနှင့် ချုပ်ဆိုခဲ့ပြီး ဖြစ်သည်
http://www.mizzimaburmese.com/news/inside-burma/10041----knu-.html
Posted in: KNU,တွေ့ဆုံဆွေးနွေးမှု,သတင်း
