တိုင်းပြည်ငြိမ်းချမ်းရေးအတွက် သျှမ်းလူငယ်များ စစ်တမ်းကောက်

စစ်မှန်သောငြိမ်းချမ်းရေးရဖို့ သျှမ်းညီလာခံ၌တင်ပြဆွေးနွေးနိုင်ရန် သျှမ်းပြည်နယ်၊ ကချင်ပြည်နယ်၊ စစ်ကိုင်းတိုင်း၊ မန္တလေး၊ ပဲခူး နှင့် ရန်ကုန်တိုင်းဒေသကြီးအပြင် ထိုင်းနိုင်ငံချင်းမိုင် နှင့် ဘန်ကောက်ရောက် သျှမ်းလူမျိုးများကြား သျှမ်းလူငယ်များက စစ်တမ်း ကောက်ယူနေသည်ဟု ကြားသိရပါသည်။

“အခုလုပ်မည့်အစည်းအဝေးက သျှမ်းတွေကြီးဘဲ ဆိုတော့ အခုကောက်မဲ့ စစ်တမ်းကလဲ သျှမ်းလူမျိုးတွေကြားထဲမှာဘဲ ကောက်ယူ မှာ။ ဒီလ ၁၈ ရက်နေ့ နောက်ဆုံးထားပြီး စုစည်းမယ်လို့စီစဉ်ထားတယ်။ ပြီးရင်ရလာတဲ့အချက် အလက်တွေကို အစည်းအဝေးမှာ တင်ပြ မယ်။ လူကြီး တွေအတွက် ဆွေးနွေးဆုံးဖြတ်ဖို့ အထောက်အကူ ဖြစ်ဖို့လေ” - ဟု မန္တလေးရောက် လူငယ်စိုင်းဇင့်က ပြောပါသည်။

စစ်တမ်းကောက်ရာမှာ နိုင်ငံရေးကဏ္ဍ၊ သျှမ်းပြည်အတွင်း လက်နက်ကိုင် တပ်ဖွဲ့ကဏ္ဍ၊ လူဦးရေ နှင့် အမျိုးသားမှတ်ပုံတင် ကဏ္ဍ၊ ပညာရေးကဏ္ဍ၊ မူးယစ်ဆေးဝါးကဏ္ဍ၊ သျှမ်းစကားမပြောတတ်တဲ့ သျှမ်းအမျိုးသားများ ကဏ္ဍ၊ စီးပွားရေး ကဏ္ဍ၊ ဘာသာရေး ဆိုင်ရာ ကဏ္ဍအပါအဝင် မေးခွန်းပေါင်း ၄၇ ခု ပါ၀င်မေးမြန်းနေသည်ဟုသိရပါသည်။

“အဓိက ကတော့ ကျနော်တို့ တွေ တစ်သံတည်းထွက်နိုင်ရင်   တခြားတိုင်းရင်းသားတွေနဲ့လဲ စည်းလုံးမှုရနိုင်မယ်။ အဲဒါကြောင့် ရန်ကုန်မှာ ကျင်းပမယ့်အစည်း အဝေးမှာ အချိန်မကုန်ဘဲ ရှုဒေါင့်ပေါင်းစုံ ဆွေးနွေးနိုင်အောင် ကျနော် တို့ ပြည်တွင်း ပြည်ပလူငယ်မခွဲခြားဘဲ တမျိုးသားလုံးအတွက် အလုပ်လုပ်နေတာဘဲဖြစ်တယ်။ ကျနော်တို့လဲ အစည်းအဝေး ခေါ်မယ်။ ရှိတဲ့အချက်တွေချပြမယ် ဆွေးနွေးမယ်။ ရန်ကုန်အစည်းအဝေးသွားဖို့ ပြင်ဆင်မယ်”- ဟု ချင်းမိုင်ရောက် လူငယ် တဦးဖြစ်သည့် စိုင်းဆိုင်က ပြောပါသည်။

နိုဝင်ဘာ ၂၆ ရက် နေ့မှစ၍ သုံးရက်ကြာကျင်းပမည့် အဆိုပါ သျှမ်းညီလာခံမှာ သျှမ်းအမျိုးသား ဒုတိယသမ္မတ ဒေါက်တာ စိုင်းမောက်ခမ်း၊ နိုင်ငံတော် သမ္မတရုံးက၀န်ကြီးများဖြစ်သော ဦးအောင်မင်း၊ ဦးစိုးသိန်း တို့ တက်ရောက်မည်  ဟုကြားသိရပါ သည်။

သျှမ်းအသိုင်းအဝိုင်းမှ  ကျားဖြူပါတီ ခေါ် သျှမ်းတိုင်းရင်း သားများ ဒီမိုကရက် တစ်ပါတီ SNDP မှ စဝ်ဆိုင်မိဏ်း၊ ကျားခေါင်း ခေါ် သျှမ်းတိုင်း ရင်းသား များ ဒီမိုကရေစီအဖွဲ့ချုပ် SNLD မှ ခွန်ထွန်းဦး၊ သျှမ်းပြည်တပ်မတော် မြောက်ပိုင်းတပ်ဖွဲ့ဟု လူသိ များသည့် SSPP/SSA နာယက ဗိုလ်ချုပ်ဆေထဲန်၊ သျှမ်းပြည်တပ်မတော် တောင်ပိုင်းဟု လူသိများသည့် RCSS/SSA မှ ငြိမ်းချမ်း ရေးကော်မတီ ခေါင်းဆောင် ဗိုလ်မှူးချုပ်ပေါင်ခေး၊ သျှမ်းနီအမျိုးသား တိုးတက် ရေးပါတီ (TNDP) မှ ကိုယ်စားလှယ်၊ ပြည်ပက သျှမ်းခေါင်းဆောင်များ၊ မြိုနယ်အဆင့်က ကိုယ်စားလှယ်များ၊ တသီးပုဂ္ဂလပါ၀င်မည့်ပုဂ္ဂိုလ်များ၊ လူမှုအသိုင်းအဝိုင်းမှ ကိုယ်စား လှယ်များ တဖွဲ့လျှင်အနည်းဆုံး နှစ်ယောက် တက်ရောက်မည်ဟု ကြားသိရပါသည်။

မေးခွန်းများ ရယူရန်-
 http://www.burmese.panglong.org/news/85-2008-08-01-03-14-40/3653-2012-11-15-09-08-33.html

Posted in: သတင်း,သျှမ်း