ကယန်းပြည်သစ်ပါတီ ၄၈ နှစ်မြောက် မွေးနေ့ အခမ်းအနားကျင်းပ

ရှမ်းပြည်တောင်ပိုင်း ဖယ်ခုံမြို့နယ် ဆီးဘူးကျေးရွာအနီးတွင် ကယန်းပြည်သစ်ပါတီ၏ ၄၈ နှစ်ပြည့်ပါတီမွေးနေ့အခမ်းအနားကို ကျင်းပပြုလုပ်ကြတယ်လို့ သိရပါတယ်။
ကယန်းပြည်သစ်ပါတီမှ တွဲဖက်အတွင်းရေးမှူး ဦးစောလွင်က “ဒီနေ့က ကယန်ပြည်သစ်ထူထောင်တာ ၄၈ နှစ်ပြည့်တဲ့နေ့ ဖြစ်ပါတယ်။ အဲဒီလို ပြည်သူလူထုဘက်ကနေ အစဉ်အလာတစိုက် ရပ်တည်လာခဲ့တဲ့ အတွေ့အကြုံကို ပါတီဝင်တွေ ပါတီဝင်အသစ်တွေ သိရှိအောင်ဆိုတဲ့ ရည်ရွယ်ချက်နဲ့ အခမ်းအနားကို ကျင်းပရခြင်းဖြစ်တယ်” လို့ ပြောပါတယ်။
၁၉၆၄ ခုနှစ် သြဂုတ်လ ၈ ရက်နေ့ကစပြီး ကွယ်လွန်သွားပြီဖြစ်တဲ့ ဥက္ကဌဗိုလ်ပျန်၊ တွဲဖက်အတွင်းရေးမှူး ဦးရွှေအေးတို့ကနေပြီး ကယန်းပြည်သစ်ပါတီကို ဖယ်ခုံမြို့နယ် ဖလိုင်ရွာမှာ စတင်ဖွဲ့စည်းခဲ့တာဖြစ်ပါတယ်။ ဒါကြောင့် သြဂုတ်လ ၈ ရက်နေ့ကျရောက်တဲ့ အချိန်တိုင်းမှာ ကယန်းပြည်သစ်ပါတီအဖွဲ့ဝင်တို့က နှစ်စဉ်နှစ်တိုင်း ယခုလိုမွေးနေ့အခမ်းအနားကျင်းပကြတာဖြစ်ပါတယ်။

ကယန်းပြည်သစ်ပါတီအလံ

ကယန်းအမျိုးသားတွေအားလုံးကို အခြေခံတဲ့ ကယန်းပြည်သစ်ပါတီက လူထုကမွေးဖွားလာတဲ့ ပါတီဖြစ်တဲ့အတွက် လူထုတွေရဲ့ အခက်အခဲတွေကို ဦးဆောင်ပြီး တာဝန်ယူဖြေရှင်းရမည့် တာဝန်ရှိတယ်လို့ ကယန်းမျိုးဆက်သစ်လူငယ် အတွင်းရေးမှူးအဖွဲ့ဝင် အားသန်းက ပြောပါတယ်။ ကယန်းမျိုးဆက်သစ်လူငယ် အားသန်းက “နိုင်ငံရေးအရ ဦးဆောင်တဲ့နေရာမှာ လူထုတွေရဲ့ လိုအပ်ချက်တွေ အခက်အခဲတွေအားလုံး သူတို့ဖြေရှင်းရမည့်တာဝန်ရှိပါတယ်။ ဒါကသမိုင်းပေးတာဝန်လို့မြင်ပါတယ်။ ပါတီဝင်တွေကလုပ်ရတော့မယ်။ တဆက်တည်းမှာဘဲ လူထုက တသွေးတည်းတသားတည်းဖြစ်အောင် တော့အများကြီး ကြိုးစားပြီးမှ လျှောက်လှမ်းရအုံးမယ်လို့မြင်ပါတယ်” လို့ ပြောပါတယ်။
ကယန်းပြည်သစ်ပါတီရဲ့ လက်ရှိရပ်တည်နေတဲ့ အနေအထားကတော့ အစိုးရနဲ့ ပစ်ခတ်ရပ်စဲရေး ပြုလုပ်ထားတဲ့ အဖွဲ့အစည်းဖြစ်ပါတယ်။ ဖယ်ခုံမြို့နယ်မှာကျင်းပတဲ့ ပါတီမွေးနေ့အခမ်းအနားမှာတော့ ကယန်းပြည်သစ်ပါတီက ခေါင်းဆောင်တွေ ပါတီဝင်တွေ ကယန်းပြည်သစ်တပ်မတော်က တပ်ဗိုလ် တပ်မှူးတွေ တပ်သားတွေနဲ့ ပြည်သူလူထု ခန့်မှန်းခြေ လူအင်အား ၃၀၀ ကျော် တက်ရောက်ခဲ့ကြတယ်လို့ သိရပါတယ်။

http://www.ktimes.org/index.php/rokstoriesnews/292-2012-08-09-15-19-06

Posted in: ကယန်း,တိုင်းရင်းသားရေးရာ