ပြည်ထောင်စု ငြိမ်းချမ်းရေး ဖော်ဆောင်ရေး လုပ်ငန်းကော်မတီနှင့် ချင်းအမျိုးသားတပ်ဦးတို့၏ ဒုတိယအကြိမ် တွေ့ဆုံညှိနှိုင်း ဆွေးနွေးပွဲကျင်းပ

ရန်ကုန် ဒီဇင်ဘာ ၁၀

ပြည်ထောင်စုငြိမ်းချမ်းရေး ဖော်ဆောင်ရေး လုပ်ငန်းကော်မတီနှင့် ချင်းအမျိုးသား တပ်ဦးတို့၏ ဒုတိယအကြိမ် တွေ့ဆုံညှိနှိုင်း ဆွေးနွေးပွဲကို ရန်ကုန်မြို့ ရွှေလီလမ်းရှိ Myanmar Peace Center ၌ ဒီဇင်ဘာ ၇ ရက်မှ ၉ ရက်အထိ နိုင်ငံတကာ အကဲခတ်လေ့လာသူ ပုဂ္ဂိုလ်များ ရှေ့မှောက်၌ ပြုလုပ်ပြီး ချင်းအမျိုးသားတပ်ဦးဘက်မှ အဆိုပြုသည့်အချက် (၃၁)ချက်အနက်မှ (၂၇)ချက်ကို သဘောတူညီမှု ရရှိခဲ့ကာ (၄)ချက်ကို မှတ်တမ်းတင်၍ ဆက်လက်ဆွေးနွေးရန် သဘောတူညီခဲ့ကြသည်။

နိုင်ငံတော်သမ္မတ၏ လမ်းညွှန်ချက်ဖြစ်သည့် အပစ်အခတ် ရပ်စဲရေး၊ နိုင်ငံရေး ဆွေးနွေးပွဲများ ပြုလုပ်ရေး၊ တိုင်းရင်းသားလူမျိုး အားလုံးပါဝင်သော ညီလာခံကြီးတစ်ရပ် ကျင်းပရေးဆိုသည့် အချက်သုံးချက် အပေါ်၌ အခြေခံ၍ အဓိက ဆွေးနွေးခဲ့ကြသည်။

ငြိမ်းချမ်းရေးဖော်ဆောင်ရေး လုပ်ငန်းကော်မတီနှင့် ချင်းအမျိုးသားတပ်ဦးတို့သည် ပြည်ထောင်စုစစ်စစ် တည်ဆောက်ရေးကို အန္တိမ ရည်မှန်းချက်အဖြစ် ထားရှိ၍ ပြည်ထောင်စုမပြိုကွဲရေး၊ တိုင်းရင်းသား စည်းလုံး ညီညွတ်မှု မပြိုကွဲရေး၊ အချုပ်အခြာအာဏာ တည်တံ့ခိုင်မြဲရေးတို့အပြင် ဒီမိုကရေစီထွန်ကားရေး၊ တန်းတူညီမျှရေးနှင့် ကိုယ်ပိုင်ပြဋ္ဌာန်းခွင့်တို့ အာမခံချက်ပေးနိုင်သည့် အချက်များကို အခြေခံမူများအဖြစ် ထပ်လောင်း အတည်ပြုကြသည်။

ဒီဇင်ဘာ ၉ ရက်တွင် အပြီးသတ် လက်မှတ်ရေးထိုးခဲ့သည့် အချက်(၂၇) ချက်တွင် ချင်းအမျိုးသားရေး ဆိုင်ရာ သဘောတူညီချက်များအဖြစ် ချင်းအမျိုးသားနေ့ သတ်မှတ်ရေး၊ ချင်းပြည်နယ်နေ့ သတ်မှတ်ရေး တို့ကို ဆက်လက်ဆောင်ရွက်ရန် သဘောတူညီခဲ့ကြသည်။

ထို့ပြင် အမျိုးသားပြန်လည်သင့်မြတ်ရေး၊ လူ့အခွင့်အရေးနှင့် သဘာဝ ပတ်ဝန်းကျင် ထိန်းသိမ်းရေး၊ စစ်ရေးဆိုင်ရာ ကိစ္စများနှင့် ချင်းပြည်နယ် ဖွံ့ဖြိုး တိုးတက်မှု ကိစ္စရပ်များနှင့် လူမှုရေးနှင့် ယဉ်ကျေးမှု ဆိုင်ရာ ကိစ္စရပ်များတွင် ပြည်ထောင်စုအစိုးရ၊ ပြည်နယ်အစိုးရနှင့် ချင်းအမျိုးသား တပ်ဦးတို့ ပူးပေါင်း ဆောင်ရွက်ကြရန်လည်း သဘောတူညီခဲ့ကြသည်။

တစ်နိုင်ငံလုံး အတိုင်းအတာဖြင့် အပစ်အခတ်ရပ်စဲရေး ဆွေးနွေးရာတွင် ကချင်ပြည်နယ် ကိစ္စကိုလည်း ထည့်သွင်း ဆွေးနွေးခဲ့ကြပြီး ပြည်ထောင်စုအစိုးရ အနေဖြင့် ကချင်ပြည်နယ်တွင် အပစ်အခတ် ရပ်စဲရေးနှင့် ငြိမ်းချမ်းရေးများ ရရှိရန် အလေးအနက် ထားရှိကြောင်း ချင်းအမျိုးသားတပ်ဦး အထွေထွေ အတွင်းရေးမှူးချုပ် Pu Zing Cung က သတင်းစာရှင်းလင်းပွဲတွင် ထုတ်ဖော်ပြောဆိုခဲ့သည်။

ပြည်ထောင်စု ငြိမ်းချမ်းရေးဖော်ဆောင်ရေး လုပ်ငန်းကော်မတီနှင့် ချင်းအမျိုးသားတပ်ဦးတို့၏ ဒုတိယအကြိမ် တွေ့ဆုံဆွေးနွေးပွဲသို့ နိုင်ငံရေးပါတီများ၊ ပညာရှင်များနှင့် နိုင်ငံတကာမှ လေ့လာသူ များလည်း တက်ရောက် လေ့လာခဲ့ကြပြီး သဘောတူလက်မှတ် ရေးထိုးခြင်းနှင့် သတင်းစာရှင်းလင်းပွဲ များသည် ဒီဇင်ဘာလ ၉ရက် မွန်းလွဲ ၁နာရီတွင် အောင်မြင်စွာပြီးဆုံးခဲ့ကြောင်း သတင်းရရှိသည်။

http://www.ministryofinformation.gov.mm/index.php/reference/peace/1637-2012-12-11-04-35-32.html

Posted in: CNF,CNFတွေ့ဆုံဆွေးနွေးမှု,ချင်း,တွေ့ဆုံဆွေးနွေးမှု,သတင်း