ကချင်လွတ်မြောက်ရေးအဖွဲ့ နှင့် အစိုးရ လာမည့် တနင်္လာနေ့ တွေ့ဆုံမည်

ဦးလာနန်၊ ကေအိုင်အို ဒုအထွေထွေအတွင်းရေးမှူး-၂။

ကချင်လွတ်မြောက်ရေးအဖွဲ့ (KIO)နှင့် အစိုးရပြည်ထောင်စုငြိမ်းချမ်းရေး ဖော်ဆောင်ရေးလုပ်ငန်းကော်မတီတို့ မတ်လ ၁၁ ရက်နေ့တွင် တရုတ်နိုင်ငံ ရွှေလီမြို့တွင် တွေ့ဆုံမည်ဖြစ်ကြောင်း KIO ပြောသည်။
ယခု ရွှေလီမြို့မှာ ထပ်မံတွေ့ဆုံမည့်ဆွေးနွေးပွဲတွင်  သတ်မှတ်ထားသည့် နှစ်ဖက် ကိုယ်စားလှယ်များမှ ဦးဆောင်သွားမည်ဖြစ်ပြီး မည်သူမည်ဝါဖြစ်သည်ကို ကြိုတင် တရားဝင် မပြောပြနိုင်သေးကြောင်း KIO ပြောရေးဆိုခွင့်ရှိသူ ဦးလာနန်ကပြောသည်။
ဒီတကြိမ် ထပ်မံတွေ့ဆုံဆွေးနွေးမှုတွင် ပြီးခဲ့သည့် ဖေဖေါ်ဝါရီလ ၄ ရက်နေ့ဆွေးနွေးသဘောတူထားသည့် အချက်များကို ပြန်လည်ဆွေးနွေးသွားမည်ဖြစ်ပြီး မည်သည့်အဆင့်ထိ အကောင်အထည်ဖော် ဆွေးနွေးသွားမည့်ကိစ္စသည် ပြန်လည်ဆွေးနွေးမှုရလဒ်ပေါ် မူတည်သွားမည်ဟု ဆိုသည်။
ကချင်လွတ်မြောက်ရေးအဖွဲ့ (KIO) နှင့် မြန်မာအစိုးရတို့ကြား ဆွေးနွေးမှုတွင် တရားဝင်နှင့် အလွတ်သဘောတွေ့ဆုံမှုများသည် စုစုပေါင်း ၁၂ ကြိမ်ခန့်ရှိပြီဖြစ်ပြီး KIO အနေဖြင့် နိုင်ငံရေးဆွေးနွေးမှုအဆင့် မရောက်မချင်း အကြိမ်ကြိမ် တွေ့ဆုံဆွေးနွေးသွားမည်ဖြစ်ကြောင်း ဦးလာနန် KNG ကချင်သတင်းဌာနသို့ပြောသည်။
“ဒီဟာက ပြသနာကြီးဖြစ်တဲ့အတွက် ဒီဟာကို တစ်ခါလောက်နဲ့ ဆွေးနွေးပြီး အဖြေကောင်းထွက်လာပြီး ပြေလည်သွားမယ်ဆိုတာတော့ မျှော်လင့်လို့မရဘူး။ နိုင်ငံရေးဆွေးနွေးတာပဲ အဓိကဖြစ်တဲ့ အတွက်ကြောင့် ကျနော်တို့က နိုင်ငံရေးဆွေးနွေးတဲ့ အဆင့်ကိုရောက်အောင်ဆိုရင်တော့ ဘယ်နှစ်ကြိမ်ဖြစ်ဖြစ် တွေ့ဆုံဆွေးနွေး သွားမှာပဲ။ အခုတွေ့ဆုံတိုင်းလည်း နိုင်ငံရေးဆွေးနွေးတဲ့ဘက်ကို ဦးတည်သွားဖို့ တွန်းအားပေးနေတယ်။ ဆွေးနွေးဖြစ်အောင်လည်း ကျနော်တို့ကြိုးစားနေတယ်။ ထိရောက်အောင်လည်း ကျနော်တို့လုပ်ယူရမယ့် အခြေအနေပဲ။ ဒီလိုမျိုးက KIO ပဲမဟုတ်ပဲနဲ့ နိုင်ငံတကာမှာရှိတဲ့ တိုင်းရင်းသားအားလုံး ပါ၀င်ပြီး စုပေါင်း ကြိုးစားမှပဲ ကျနော်တို့တိုင်းရင်းသားတွေအားလုံး လိုလားတဲ့ မျှော်လင့်နေတဲ့ နိုင်ငံရေးပန်းတိုက်ကို သွားရမှာဖြစ်တယ်။” ဟု ဦးလာနန်က KNG ကချင်သတင်းဌာနသို့ပြောသည်။
KIO နှင့် အစိုးရတို့သည် ပြီးခဲ့သည့် ဖေဖေါ်ဝါရီလ ၄ ရက်နေ့တွင် တရုတ်နိုင်ငံရွှေလီမြို့တွင်တွေ့ဆုံဆွေးနွေး ခဲ့ပြီး ၄င်းဆွေးနွေးပွဲတွင် နှစ်ဖက်ဆက်သွယ်ရေးလမ်းကြောင်းထားရှိရေးနှင့် နှစ်ဖက်စစ်ရေးတင်းမာမှုများ လျှော့ချနိုင်ရေးကို သဘောတူညီမှုရရှိခဲ့ပြီး ပူးတွဲကြေငြာချက် ထုတ်ပြန်ခဲ့သည်။
သို့သော် ကချင်ပြည်နယ်တွင်း အချို့နေရာများတွင် နှစ်ဖက်တပ်ဖွဲ့များ တိုက်ပွဲများ ဆက်လက်ဖြစ်ပွားနေဆဲ ဖြစ်ပြီး အစိုးရတပ်ဖွဲ့များမှ လူအင်အား၊ လက်နက်အင်အား၊ စားနပ်ရိက္ခာများ တိုးချ ပို့ဆောင်နေဆဲဖြစ်ကြောင်း KIA အရာရှိများပြောသည်။
အစိုးတပ်များသည် ကချင်ပြည်နယ်တွင် အင်အားတိုးချဲ့ထိုးစစ်ဆင်မှုများ ဆက်ရှိနေသောကြောင့် တိုက်များပြင်းထန်လာနိုင်ကြောင်း ရှေ့တန်းမှအရာရှိများသုံးသပ်နေသော်လည်း ထိုသို့ လှုပ်ရှားနေခြင်းကို စိုးရိမ်ဖွယ်ရာမရှိကြောင်း KIO ပြောရေးဆိုခွင့်ရှိသူ ဦးလာနန် ဆက်ပြောသည်။
“သူတို့ရောက်နိုင်တဲ့ နေရာတိုင်းမှာတော့ လူအင်အားလဲတာတို့ စစ်လက်နက်ဖြည့်တာတို့ လုပ်နေတယ်။ အဲဒါက သူတို့စစ်တပ်က လုပ်ရမယ့်အလုပ်ဖြစ်တယ်။ လုပ်ပါစေ ပြဿနာမရှိဘူး။ အဲဒါကို ကျနော်တို့ အပြစ်ရှာနေလို့လဲ မဖြစ်ဘူး။ သူတို့လည်း သူတို့လုပ်နိုင်သလောက်လုပ်မယ်။ သူတို့က စစ်ရေးဘက်မှာ စီစဉ်နေတဲ့အချိန် ကျနော်တို့ဘက်က နိုင်ငံရေးအရဆွေးနွေးဖို့ စီစဉ်နေတယ်။ အဲဒီအဆင့်ရောက်သွား အောင်လည်း ကျနော်တို့ ကြိုးစားသွားမယ်။ နိုင်ငံရေးဆွေးနွေးမဲ့ အဆင့်ကိုရောက်လာတဲ့အခါ နိုင်ငံရေးအရ ဖြေရှင်းသွားတဲ့အခါ စစ်ရေးအနေနဲ့ သူတို့ အခုစီစဉ်ထားတဲ့ လုပ်ငန်းတွေက အကျိုးမရှိတဲ့အလုပ် လုပ်တာပဲဖြစ်သွားလိမ့်မယ်။ အဲဒါကြောင့် စိုးရိမ်စရာမရှိဘူး။” ဟု ပြောသည်။
အစိုးရနှင့် ကချင်လွတ်မြောက်ရေးအဖွဲ့ (KIO) တို့သည် ပြီးခဲ့သည့် ဖေဖဝါရီလဆန်းက ဆွေးနွေးမှုအပြီး ဆက်လက်၍ ဖေဖေါ်ဝါရီလမကုန်မီ ထပ်မံဆွေးနွေးမည်ဖြစ်ကြောင်းကို သဘောတူညီထားခဲ့သော်လည်း အစိုးရတပ်ဖက်မှ ကချင်ပြည်နယ်နှင့် ရှမ်းပြည်မြောက်ပိုင်းရှိ KIA တပ်များသို့ အင်အားတိုးချဲ့ ထိုးစစ်ဆင်လာသောကြောင့် တွေ့ဆုံမှုများနှောင့်နှေးသွားခဲ့ပြီး ယခုလမှ ပြန်လည်တွေ့ဆုံနိုင်ခြင်းဖြစ်ကြောင်း KIO အရာရှိများပြောသည်။
ယခုချိန် တရုတ်မြန်မာနယ်စပ် ပန်ဝါဒေသတွင် ဖေဖဝါရီလကုန်ပိုင်းက အစိုးရတပ်နှင့် KIA တပါတ်ခန့် တိုက်ပွဲများပြင်းထန်စွာဖြစ်ပွားခဲ့ပြီး ဒေသခံများထွက်ပြေးတိမ်းရှောင်နေရာ ဆက်လက်၍လည်း အစိုးရတပ်များ လေယာဉ်များဖြင့် စားနှပ်ရိက္ခာများ အင်အင်များတိုးချနေသောကြောင့် တိုက်ပွဲများထပ်မံပြင်းထန်လာ နိုင်ကြောင်း ဒေသခံများပြောသည်။

http://kachinnews.com/burmese/news/1041-%E1%80%80%E1%80%81%E1%80%BA%E1%80%84%E1%80%B9%E1%80%9C%E1%80%BC%E1%80%90%E1%80%B9%E1%80%B1%E1%80%BB%E1%80%99%E1%80%AC%E1%80%80%E1%80%B9%E1%80%B1%E1%80%9B%E1%80%B8%E1%80%A1%E1%80%96%E1%80%BC%E1%80%B2%E1%82%94-%E1%82%8F%E1%80%BD%E1%80%84%E1%80%B9%E1%80%B7-%E1%80%A1%E1%80%85%E1%80%AD%E1%80%AF%E1%80%B8%E1%80%9B-%E1%80%9C%E1%80%AC%E1%80%99%E1%80%8A%E1%80%B9%E1%80%B7-%E1%80%90%E1%80%94%E1%80%9C%E1%81%A4%E1%80%AC%E1%80%B1%E1%80%94%E1%82%94-%E1%80%B1%E1%80%90%E1%80%BC%E1%82%95%E1%80%86%E1%80%AF%E1%80%B6%E1%80%99%E1%80%8A%E1%80%B9.html

Posted in: ကချင်,ကချင်တွေ့ဆုံဆွေးနွေးမှု,တွေ့ဆုံဆွေးနွေးမှု,သတင်း