(ဦးလာနန်း) က ယနေ့ မနက်ပိုင်းတွင် ရွှေဟင်္သာ သတင်းဌာနအား ထုတ်ဖော် ပြောကြားခဲ့ပါ သည်။
“ဒီလိုပါ ဇူလိုင်လမှာ ပြန်တွေ့ကြဖို့ ဦးအောင်မင်းက ပြီးခဲ့တဲ့ ဇွန်လ (၂၀) ရက်နေ့မှာ ကမ်းလှမ်းခဲ့တယ်။ သူတို့က ဗန်းမော်မှာ တွေ့ခိုင်းတယ်။ ကျနော်တို့က လွယ်ဂျယ်မြို့အနီးက မိုင်ဂျာယန်မှာတွေ့ဖို့ အဆိုပြုတယ်။ တကယ်တော့ အဲဒီ ချိန်းထားတဲ့ အချိန်တွေဟာ တိုက်ပွဲတွေက အဆက်မပြတ်နဲ့ အပြင်းအထန်ဖြစ်နေတယ်လေ။ ဒါကြောင့် တွေ့ဆုံဖို့ ခက်နေတယ်။ ပြီးတော့ တခါ ဒီရက်ပိုင်းလေးမှာဘဲ အစိုးရဖက်က ထပ်မံ လူလွှတ်ပြန်တယ်။ သူတို့က မူဆယ်မှာတွေ့ဖို့ ချိန်းပါတယ်။ ဒါလည်းဘဲ မဖြစ်နိုင်ဘူး။ အဲဒီနေရာမှာ စခန်းသိမ်းတိုက်ပွဲ စစ်ဆင်ရေးတွေ လုပ်နေတယ်လေ ၊ ဒါကြောင့် မတွေ့နိုင်တာပါ” ဟု ဦးလာနန်း က ဆိုပါသည်။
KIA သည် တိုက်ပွဲပြင်းထန်မှု အခြေအနေကို အကြောင်းပြု ပြီး အစိုးရ ချိန်းဆိုသော နေရာသို့ မသွားနိုင်သလို အစိုးရ က လည်း တိုက်ပွဲပြင်းထန်သော နေရာကိုသာ ရွေးပြီး ချိန်းဆိုနေသလိုဖြစ်နေပါသည်။ ဤသို့ကြောင့် အစိုးရ၏ငြိမ်းချမ်းရေး အဖွဲ့သည် ကိုယ်စားလှယ် စေလွှတ်ပြီး ပြီးခဲ့သည့် ဇူလိုင်လ (၁၃) ရက်နေ့တွင် မူဆယ်မြို့၌ စတုတ္တအကြိမ် တွေ့ဆုံဆွေးနွေး ရန် ထပ်မံ ကမ်းလှမ်းလိုက်ပါသည်။ သို့သော်KIA က ထိုနေရာမဖြစ်နိုင်သဖြင့် တရုတ်နိုင်ငံ ရွှေလီမြို့၌ တွေ့ဆုံကြရန် ဇူလိုင်လ (၁၇) ရက်နေ့တွင် ထပ်မံ အဆိုပြု လိုက်ခြင်းဖြစ်ပါသည်။
KIA သည် အစိုးရတပ်များအနေနှင့် စစ်ဆင်ရေး ရပ်စဲပြီး တပ်ဖွဲ့များ ကချင်ပြည် လွတ်မြောက်ရေးဒေသမှ ဆုတ်ခွာပေးပါက အ ပစ်အခတ် ရပ်စဲရေးကို လက်မှတ် ရေးထိုးမည်ဟု အဆိုပြုထားပါသည်။ သို့သော် အစိုးရက အပစ်အခတ်ရပ်စဲရေးရပြီးမှ တပ်ဖွဲ့များ ဆုတ်ခွာရေးကို ထပ်မံဆွေးနွေးသွားမည်ဟု KIA အား အသိပေးထားပါသည်။
အစိုးရသည် သူတို့၏ သဘော တူညီချက်များကို တမင် ဖေါက်ဖျက်တတ်သဖြင့် KIA မှ လက်မခံနိုင်ခြင်းဖြစ်သည်ဟု ဆိုပါ သည်။ သာဓကအားဖြင့် အစိုးရသည် လက်ရှိ၌ အပစ်ရပ်ထားသော ရှမ်းပြည် တိုးတက်ရေး ပါတီနှင့် လည်းကောင်း၊ ရှမ်းပြည် ပြန်လည် ထူထောင်ရေး ကောင်စီနှင့်လည်းကောင်း သူတို့ပေးထားသော ဂတိကို တမင် ဖေါက်ဖျက်နေခြင်း ဖြစ်သည်ဟု UNFC က ဆိုပါသည်။
ဤသို့ကြောင့် KIA သည် အစိုးရ ကမ်းလှမ်းသော နေရာ၌ တွေ့ဆုံဆွေးနွေးရန် မဖြစ်နိုင်ကြောင်း အမြဲတမ်း ပယ်ချနေရပြီး၊ အေးဆေး တည်ငြိမ်သော နေရာကို ရွေးချယ်ခြင်း ဖြစ်သည်ဟု ပြောရေးဆိုခွင့်ရှိသူက ဆိုပါသည်။
UNHCR အဖွဲ့ကလည်း အစိုးရ၏ အကူအညီဖြင့် ကချင် ဒုက္ခသည်များကို ကူညီရန် ပြီးခဲ့သည့် ဧပြီလက ဆောင်ရွက်ခဲ့ဘူး ပါသည်။ သို့သော် အစိုးရ၏ အစီစဉ်သည် ဒုက္ခသည်ထံ ထိရောက်သော အကူအညီများ မပို့နိုင်ခဲ့ပေ။ ဤသို့ကြောင့် UNHCR သည် ပြီးခဲ့သည့် ရက်ပိုင်းက KIA ကိုယ်စားလှယ်နှင့် တွေ့ဆုံပြီး ထိရောက်သော အကူအညီပေးရေး နည်းလမ်းများ ကို ဆွေး နွေးတိုင်ပင်ခဲ့ပါသည်။
ဤကဲ့သို့ ထိရောက်သော နည်းလမ်းများရပြီးသည်နှင့် မြန်မာနိုင်ငံဆိုင်ရာ အမေရိကန် သံရုံးကလည်း ကချင်ဒုက္ခသည်အား ဒေါ်လာ (၃) သန်း ကူညီမည်ဟု သတင်းစာ ရှင်းလင်းပွဲများ ကျင်းပပြီး ကြေညာခဲ့ပါသည်။ ဤသည်အစိုးရ၏ အားနည်းမှုကို ဖေါ်ပြနေသည်ဟု ဝေဖန်သူများက ထောက်ပြပါသည်။
ဤသို့ကြောင့် အစိုးရသည် KIA နှင့် အပစ်အခတ်ရပ်စဲရေး တကယ်လိုလားနေသည့် သဘောထားမရှိဟု သံတမန်များကပါ ဝေဖန်နေကြပါသည်။ အစိုးရ၏ ၀ါဒဖြန့်မှုကို တုန့်ပြန်ရန် KIA ကလည်း အစိုးရ၏ ငြိမ်းချမ်းရေး ဖော်ဆောင်ရေး လုပ်ငန်း ကော်မတီနှင့် ငြိမ်းချမ်းရေး ဆွေးနွေးပွဲများ အမြဲတမ်း တံခါးဖွင့်ပေးထားသည်ဟု ပြောကြားထားပါသည်။
KIA နှင့်အစိုးရတို့သည် ၂၀၁၁ ခုနှစ် ဇွန်လကတည်းက အပစ်အခတ် ရပ်စဲထားရာမှ အစိုးရက ဂတိဖျက်ပြီး စတင်တိုက်ခိုက် လာခဲ့ပါသည်။ ယနေ့အထိ ကချင်ပြည်နယ်အတွင်း ဖြစ်ပွားနေသော စစ်ပွဲများ အရှိန်လျှော့ကျ လာခြင်း မရှိသေးဘဲ တရားဝင် တွေ့ဆုံဆွေးနွေးပွဲကို (၂) ကြိမ်တိုင် ကျင်းပနိုင်ခဲ့သည့်အပြင်၊ အလွတ်သဘော တွေ့ဆုံပွဲပါ (၃) ကြိမ် ဆွေးနွေးခဲ့သော် လည်း ယနေ့အထိ ပြေလည်ခြင်း မရှိသေးပေ။ ဤအတောတွင်း KIA နှင့် အစိုးရတို့၏ ၂၀၁၂ ခုနှစ် ဇွန်လမှ ယနေ့အထိ ကာလအတွင်း တိုက်ပွဲပေါင်း (၂၀၀) ခန့် ဖြစ်ပွားခဲ့သည်ဟု ကချင်ဖက်က ဆိုပါသည်။