Monday, March 11, 2013
မြန်မာ့ငြိမ်းချမ်းရေးလေ့လာစောင့်ကြည့်မှု
မြန်မာအစိုးရ ငြိမ်းချမ်းရေး ဖော်ဆောင်ရေး ကော်မတီနဲ့ ကချင်လွတ်မြောက်ရေးအဖွဲ့ KIO တို့အကြား တရုတ်နိုင်ငံ ရွှေလီမြို့မှာ ဒီလအတွင်း ပြုလုပ်တဲ့ ဒုတိယအကျော့ တွေ့ဆုံဆွေးနွေးပွဲ မနေ့က ပြီးဆုံးသွားပေမဲ့ ငြိမ်းချမ်းရေးအတွက် အပြီးသတ် လက်မှတ်ရေးထိုးနိုင်တဲ့အဆင့်ထိတော့ သဘောတူညီချက် မရခဲ့ကြပါဘူး။
စစ်မှန်တဲ့ နိုင်ငံရေး ဆွေးနွေးပွဲတွေ ကျင်းပနိုင်ရေး ခိုင်မာတဲ့ အပစ်အခတ် ရပ်စဲရေးရတဲ့အထိ ဆက်လက် တွေ့ဆုံ ဆွေးနွေးဖို့နဲ့ ပဋိပက္ခဖြစ်နေတဲ့ နေရာတွေကို နှစ်ဘက် စောင့်ကြည့်ရေး အတွက်တော့ သဘောတူညီခဲ့ကြပါတယ်။ ဒီဆွေးနွေးပွဲ အသေးစိတ်ကိုတော့ ကိုယ်တိုင် သွားရောက် သတင်းယူခဲ့တဲ့ ဗွီအိုအေဝိုင်းတော်သူ ဒေါ်ခင်စိုးဝင်း က ဆွေးနွေးပွဲ ကျင်းပ ရာ ရွှေလီမြို့ကနေ သတင်းပေးပို့ထားပါတယ်။
ပြည်ထောင်စုအဆင့် ငြိမ်းချမ်းရေး ဖော်ဆောင်မှု ကိုယ်စားလှယ်နဲ့ KIO ကချင်လွတ်မြောက်ရေး အဖွဲ့ ကိုယ်စားလှယ်တွေကြားမှာ ဒီကနေ့ ငြိမ်းချမ်းရေး ဆွေးနွေးပွဲ စတင်ကျင်းပပါတယ်။ စတင် ကျင်းပတဲ့အချိန်ကတော့ မနက် ၉ နာရီလောက်ကဖြစ်ပြီးတော့ အခု လက်မှတ် တကယ်ရေး ထိုးနိုင်ခဲ့တဲ့ အချိန်ကတော့ ည ၁၂ နာရီ မိနစ် ၄၀ ဖြစ်ပါတယ်။
သဘောတူညီခဲ့တဲ့ အချက်ကတော့ ခိုင်မာတဲ့ အပစ်အခတ်ရပ်စဲရေးကို ဆောင်ရွက်နိုင်သည်အထိ ဆက်လက်ပြီးတော့ အကောင်အထည် ဖော်သွားဖို့ သဘောတူညီမှု ရရှိခဲ့ကြပါတယ်ရှင်။
သမ္မတရုံးဝန်ကြီး ဦးအောင်မင်း ဦးဆောင်တဲ့ ပြည်ထောင်စုအဆင့် ငြိမ်းချမ်းရေး ဖော်ဆောင်ရေး လုပ်ငန်းကော်မတီအဖွဲ့မှာ လိုက်ပါလာတဲ့ ဒုတိယဗိုလ်ချုပ်ကြီး မြင့်စိုး က ငြိမ်းချမ်းရေး ဆွေးနွေးပွဲ ရလဒ်နဲ့ပတ်သက်ပြီး အခုလို ပြောပါတယ်။
“အဓိက ဒီနေ့ရဲ့ ရလဒ်ကတော့ အပစ်အခတ်ရပ်စဲရေး၊ ခိုင်မာတဲ့ အပစ်အခတ် ရပ်စဲရေး ဆက်လက် ဆောင်ရွက်မယ်ဆိုတာကို နှစ်ဦးနှစ်ဘက် သဘောတူညီချက် ရတာဟာ ဒီကနေ့ ဆွေးနွေးပွဲရဲ့ အဓိက ရလဒ်ပါပဲ။ ဒါပေမဲ့ လတ်တလောကတော့ ကျနော်တို့က နှစ်ဘက် အပစ်အခတ် ရပ်စဲရေး ဦးတည်ပြီးတော့မှ ဆောင်ရွက်တာဖြစ်တော့ ဘယ်နေရာတွေမှာ အရေးကြီးတဲ့ ရှေ့တန်းနေရာတွေကို ဦးစားပေးပြီးတော့ ဒီကနေ့ ဆောင်ရွက်မှာပါ။ ဒီထက်တဆင့် တဖြေးဖြေးနဲ့ တက်လာတဲ့အခါကျရင်တော့ နောက်ပိုင်းကျရင်တော့ ဆက်ဆံရေးရုံးလိုဟာမျိုးတို့ ဒါတွေကတော့ နောက်ပိုင်းမှာ ဆက်လက်ဖြစ်လာမယ့် ဟာတွေပါ။”
KIO ကချင်လွတ်မြောက်ရေးအဖွဲ့ ကိုယ်စားလှယ် ဗိုလ်ချုပ်ဂွန်မော် ကတော့ နိုင်ငံရေး ဆွေးနွေး ပွဲတွေ လုပ်နိုင်တဲ့အထိ ကြိုးစားသွားမယ်လို့ အခုလို မှတ်ချက်ပေးပါတယ်။
“အရေးကြီးတဲ့အချက်ကတော့ နိုင်ငံရေး ဆွေးနွေးပွဲတွေ ဖြစ်လာတဲ့အထိ လုပ်သွားမယ်။ ပြီးတော့ ခိုင်မာတဲ့ အပစ်အခတ် ရပ်စဲရေး သဘောတူညီချက် ရတဲ့အထိ ဆက်လက် ဆောင်ရွက်သွားမယ် ဆိုတဲ့ အချက်က အရေးကြီးပါတယ်။ ဒီနှစ်ချက်ပါပဲ အရေးကြီးတာက”
မတ်လ ၁၁ ရက်နေ့ တနင်္လာနေ့မှာ တရုတ်နိုင်ငံက အိမ်ရှင်အဖြစ် လက်ခံ ကျင်းပတဲ့ ဆွေးနွေးပွဲ မှာ နှစ်ဘက် အချိန်ယူပြီး အသေးစိတ် ညှိနှိုင်းခဲ့ရတာတွေ ရှိပါတယ်။ အောက်ခြေတပ်ဖွဲ့တွေအထိ ညွှန်ကြားချက်တွေ ရောက်ရှိနိုင်ဖို့ ဆောင်ရွက်ရေးနဲ့ ပဋိပက္ခဖြစ်ပွားနေတဲ့ ရှေ့တန်းစစ်မြေပြင်တွေ မှာ ကွင်းဆင်းလေ့လာ စောင့်ကြည့်နိုင်ရေးအတွက် နှစ်ဘက် အနီးကပ် ဆောင်ရွက်နိုင်ဖို့ ညှိနှိုင်းစောင့်ကြပ်ရေးရုံးတွေ ထားရှိနိုင်ဖို့ကိုလည်း သဘောတူခဲ့ကြပါတယ်။
ဒီနေ့ ဆွေးနွေးပွဲမှာတော့ နှစ်ဘက်ကိုယ်စားလှယ်အဖွဲ့တွေ ရင်းရင်းနှီးနှီးနဲ့ ဆွေးနွေးသွား တာ တွေ့ရပါတယ်။ နောက်တကြိမ် ဆွေးနွေးမယ့် အစည်းအဝေးကိုတော့ ဧပြီလ ၁၀ ရက်နေ့ မတိုင်ခင်မှာ ဆွေးနွေးသွားဖို့ စီစဉ်ထားတယ်လို့ သိရပါတယ်ရှင်။
http://burmese.voanews.com/content/kio-and-govt-meeting-unsuccessful/1619765.html
Posted in: ကချင်,ကချင်တွေ့ဆုံဆွေးနွေးမှု,တွေ့ဆုံဆွေးနွေးမှု,သတင်း
