ကရင်နီမျိုးနွယ်စု တိုင်းရင်းသားရိုးရာ အကပြိုင်ပွဲ ကျင်းပမည်

ကရင်နီတိုင်းရင်းသား မျိုးနွယ်စုတွေရဲ့ ရိုးရာယဉ်ကျေးမှုအကများကို လာမည့် စက်တင်ဘာလအတွင်း လွိုင်ကော်မြို့တော် ခန်းမ၌  ပြိုင်ပွဲများ ကျင်းပပြုလုပ်သွားမည့် အစီအစဉ်ရှိတယ်လို့ ပြည်နယ်အစိုးရမှ ဗမာတိုင်းရင်းသား ရေးရာဝန်ကြီး ဦးစိန်ဦးက ပြောပါတယ်။  

ဝန်ကြီးဦးစိန်ဦးက “တိုင်းရင်းသား မျိုးနွယ်စုတွေနဲ့ပတ်သက်ပြီးတော့ ဒီလိုမျိုးပြိုင်ပွဲတွေ ဖျော်ဖြေတာတွေကို ကျနော်တို့ တောက်လျှောက် အဆင့်မြင့်ဖြစ်အောင် လုပ်တာပေါ့။ ကျနော်တို့မှာလည်း နှစ်စဉ်ကျင်းပလေ့ရှိတဲ့အတွက် ဒီပြိုင်ပွဲအတွက်လည်း ကျနော်တို့ အကောင်းဆုံးဖြစ်အောင် ကျနော်တို့ ဗဟိုမှာကိုလည်း တင်ဆက်နိုင်ဖို့ကိုလည်း စီစဉ်နေတယ်”လို့ ပြောပါတယ်။

စက်တင်ဘာလ ၁၅ ရက်၊ ၁၆ ရက်အတွင်း တိုင်းရင်းသားမျိုးနွယ်စု ၉ မျိုးဖြစ်ကြတဲ့ ကယား၊ ကယန်း(ဂေခို)၊ ကယန်း(လထ/ဇယိမ်း)၊ ကယန်း(ပဒေါင်)၊ ကယန်း(ဂေဘား)၊ ကယော၊ ယင်းဘော်၊ ယင်းတလဲနှင့် မနုမနောတို့မှ ရိုးရာဝတ်စုံတွေနဲ့ ၂ ရက်ခန့် ကျင်းပပြုလုပ်သွားမယ် ဖြစ်တယ်လို့ သိရပါတယ်။

ပြိုင်ပွဲမှာ ပြည်နယ်အဆင့် ပထမ၊ ဒုတိယ၊ တတိယဆုအနေဖြင့် ဆုချီးမြင့်မှာဖြစ်ပြီး အကောင်းဆုံး တင်ဆက်ပြသသွားသည့် တိုင်းရင်းသားအဖွဲ့ကို ၂၀၁၂ ခုနှစ် အောက်တိုဘာလ ၁၆ ရက်နေ့ နေပြည်တော်တွင် ကျင်းပမည့် မြန်မာတိုင်းရင်းသားတို့၏ ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲမှာ သွားရောက်ယှဉ်ပြိုင် တင်ဆက်ရမှာဖြစ်ပါတယ်။

သြဂုတ်လ ရ ရက်နေ့ နေပြည်တော်မှာ ဒုတိယ သမ္မတ ဒေါက်တာစိုင်းမောက်ခမ်း၊ ပြည်ထောင်စုဝန်ကြီးများ၊ တိုင်းဒေသကြီးနှင့် ပြည်နယ်ဝန်ကြီးချုပ်များ၊ ဒုတိယဝန်ကြီးများ၊ ဌာနဆိုင်ရာ အကြီးအကဲများ အစည်းအဝေးကို ကယားပြည်နယ်မှ တက်ရောက်ခဲ့သည့် ရှေးဟောင်း သုတေတန အမျိုးသားပြတိုက်နှင့် စာကြည့်တိုက်ဦးစီးဌာနမှ လက်ထောက်ညွန်ကြားရေးမှူး ဒေါ်တင်ချမ်းမြင့်က ယခုလိုရှင်းပြသွားပါတယ်။

"ရှားပါးတဲ့လူမျိုးတွေ ဥပမာ ဟိုယာတွေဘက်က ကယောလူမျိုးတွေ တွေ့စေချင်တာပေါ့နော်။ ခေတ်ဟောင်းကယားတွေ နည်းနည်း ရှားပါးတဲ့လူမျိုးကို အရင်လွှတ်မှာပေါ့ ဘာဖြစ်လဲဆိုတော့ နောက်နှစ်တွေလဲ နှစ်တိုင်းလုပ်သွားမှာလေး ပြည်နယ်တိုင်းတခုစီကို ရ၅ သိန်းပံ့ပိုးမယ်လို့ အစည်းအဝေးမှာ ပြောထားတယ်လေး” လို့ ပြောပါတယ်။  

ပါဝင်ယှဉ်ပြိုင်မည့် မြို့နယ် (၇) မြို့နယ်အသီးသီးမှာရှိတဲ့ စာပေယဉ်ကျေးမှု ကော်မတီအဖွဲ့တွေ ရိုးရာယဉ်ကျေးမှုအဖွဲ့တွေက သြဂုတ်လ ကုန်အထိ နောက်ဆုံးထား စာရင်းပေးသွင်း နိုင်တယ်လို့ သိရပါတယ်။ ပြိုင်ပွဲကို စာရင်းပေးသွင်းမှုအပေါ် မူတည်ပြီး ယှဉ်ပြိုင်မည်အဖွဲ့များလျှင် များသလို ၂ ရက်မှ ၃ ရက်အထိ ပြုလုပ်သွာမှာဖြစ်တယ်လို့ သိရပါတယ်။

ကယားတိုင်းရင်းသား မျိုးနွယ်စုတွေ ရိုးရာအကတွေနဲ့ နေပြည်တော်မှာသွားရောက် ယှဉ်ပြိုင်တဲ့အခါမှာ ပြည်နယ်အတွက်အကောင်းဆုံး ကိုယ်စားပြုနိုင်အောင် ကြိုးစားသွားမယ်လို့ ဝန်ကြီးဦးစိန်ဦးက ပြောပါတယ်။

“ကယားတိုင်းရင်းသား မျိုးနွယ်စုတွေရဲ့ အကတွေကို တောက်လျှောက်ဖော်ထုတ်ခဲ့တာ ဆိုတော့ ဒီကယားဒေးဆိုတာဟာမျိုးက အတွေ့အကြုံ ကောင်းကောင်းရနေပြီ အခုလည်းပြိုင်ပွဲကို အကောင်းဆုံးလုပ်မယ်။ ဗဟိုမှာသွားပြီးတော့ တခြားပြည်နယ်တိုင်းရှေ့မှာ တင်ပြတဲ့ အခါမှာလည်း ကယားကို အကောင်းဆုံးကိုယ်စားပြုနိုင်တဲ့ အကဖြစ်အောင် ကျနော်တို့လုပ်မယ်” လို့ ဝန်ကြီးဦးစိန်ဦးက ပြောပါတယ်။

http://www.ktimes.org/index.php/rokstoriesnews/299-2012-08-18-04-55-35

Posted in: ကရင်နီ,ဒေသအခြေအနေ,သတင်း