ကယန်းဒေသခွဲများ စုစည်းနိုင်ဖို့ နိုင်ငံရေးအဖွဲ့အစည်း အားလုံးနှင့်ကြိုးစားမည်

တိုင်းနှင့်ပြည်နယ်လေးနေရာတွင် နေထိုင်ကြသည့် ကယန်းလူမျိုးများ ပြန်လည်စုစည်းနိုင်ရေးနှင့် ကိုယ်ပိုင်အုပ်ချုပ်ခွင့် ကယန်းဒေသ ပေါ်ထွန်းလာရေးအတွက် နိုင်ငံရေးအဖွဲ့အစည်း အားလုံးနဲ့ ကြိုးစားဆောင်ရွက်သွားမယ်လို့ ကယန်းပြည်သစ်ပါတီမှ တွဲဖက်အတွင်းရေးမှူး ဦးစောလွင်က ပြောပါတယ်။

ကယန်းတိုင်းရင်းသားလူမျိုး (ဓါတ်ပုံ-ကေတီ)

ဦးစောလွင်က “ကျနော်တို့က ဒီလို တိုင်းနဲ့ပြည်နယ် လေးခုမှာ အစိတ်စိတ်အမွှာမွှာ ခွဲထုတ်ခံရတဲ့ကယန်းဒေသတွေကို ပြန်လည် စုစည်းပြီးတော့ ကယန်း ကိုယ်ပိုင်အုပ်ချုပ်ခွင့်ရ ဒေသ တခုကို လိုချင်တာဖြစ်ပါတယ်။ ကယန်းကိုယ်ပိုင် အုပ်ချုပ်ခွင့်ရ ဒေသကို ကျနော်တို့က ကယားပြည်နယ် အစိတ်အပိုင်း တခုအဖြစ်ကို ထည့်ဆွဲစေ ချင်တာလဲ ဖြစ်ပါတယ်” လို့ပြောပါတယ်။ နယ်ချဲ့ အင်္ဂလိပ်ကျူးကျော်တိုက်ခိုက်ပြီးနောက်မှာ ကယန်းတိုင်းရင်းသားတွေကို သွေးကွဲတဲ့အနေနဲ့ ဖိနိမ့်တဲ့အနေနဲ့ အနောက်ကရင်နီနယ်ထဲမှာ တဆက်တစပ်တည်း တစုတစည်းတည်း ရှိတဲ့ ကယန်းဒေသကို ရှမ်းပြည်နယ်၊ ကရင်နီပြည်နယ်၊ ကရင်ပြည်နယ်၊ မန္တလေးတိုင်း နယ်စွန်နယ်ဖြားနယ်အဖြစ်နဲ့ ခွဲထုတ်လိုက်တာဖြစ်ပါတယ်။
ကယန်းဒေသ ကိုယ်ပိုင်အုပ်ချုပ်ခွင့်ရဖို့အတွက် အမျိုးသားညီလာခံ ကျင်းပစဉ်အခါမှာလည်း ကယန်းတိုင်းရင်းသားခေါင်းဆောင်တွေ တင်ပြတောင်းဆိုခဲ့ပါတယ်။
သို့သော်လည်း စစ်အစိုးရဘက်ကနေပြီး ထည့်သွင်းဆွေးနွေးသွားခြင်းမရှိခဲ့ဘူးလို့ သိရပါတယ်။
ကယန်းမျိုးဆက်သစ်လူငယ် အတွင်းရေးမှူးအဖွဲ့ဝင် အားသန်းက “ပစ်ခတ်ရပ်စဲရေးယူထားတဲ့ ၁၃ ဖွဲ့ကနေပေါင်းပြီး ခေါင်းဆောင်တွေ တင်သွင်းခဲ့တဲ့ စာတမ်းတွေလည်းရှိတယ်။ နဝတ၊ နအဖတို့က ဒီတောင်းဆိုချက်တွေကို တစုံတရာ အကြောင်းကြားတာမရှိဘဲ မှတ်တမ်းတင်ထားတယ် ဆိုတာလောက်ပဲ ပြောခဲ့ပါတယ်။ ဆွေးနွေးတာတွေ မလုပ်ဘဲနဲ့ မှတ်တမ်းအဖြစ်ဘဲသူတို့လုပ်တာပေါ့။ သူတို့ တောင်းဆိုချက်တွေ ဘာမှ အရာမရောက်တဲ့သဘောပါဘဲ။ ညီလာခံမှာ အထမမြောက်ခဲ့ပါဘူး” လို့ ပြောပါတယ်။
ကယန်းတိုင်းရင်းမျိုးနွယ်စုတွေဟာ ကရင်နီပြည်နယ်ဘက်မှာတော့ ဒီးမော့ဆိုမြို့နယ် အနောက်ဘက်ခြမ်း ဖယ်ခုံမြို့နယ်ဆက်စပ်သည့်ဒေသ၊ ကရင်ပြည်နယ်ဘက်မှာတော့ သံတောင်မြို့နယ် မြောက်ဘက်ခြမ်းဒေသ၊ ရှမ်းပြည်နယ်ဘက်မှာတော့ မိုးဗြဲ ဖယ်ခုံမြို့နယ်ဒေသနှင့် မန္တလေးတိုင်းဘက်မှာကတော့ ပျဉ်းမနားမြို့နယ် လယ်ဝေး အရှေ့ပျဉ်းမနား တောင်တန်းဒေသဘက်ခြမ်းတွေမှာ အများဆုံးနေထိုင်ကြတာဖြစ်ပါတယ်။

http://www.ktimes.org/index.php/rokstoriesnews/293-2012-08-09-15-32-42

Posted in: ကယန်း,သတင်း,အခြား