Sunday, July 29, 2012
မြန်မာ့ငြိမ်းချမ်းရေးလေ့လာစောင့်ကြည့်မှု
တိုင်းရင်းသားလက်နက်ကိုင် အဖွဲ့ ၁၁ ဖွဲ့ စုပေါင်းဖွဲ့စည်းထားသည့် UNFC မှ ငြိမ်းချမ်းရေး ကိစ္စများအတွက် ဆက်လက်ဆွေးနွေးရာတွင် ရထားပို့ဆောင်ရေးဝန်ကြီးဌာန ပြည်ထောင်စုဝန်ကြီး ဦးအောင်မင်းဦးဆောင်သည့် ပြည်ထောင်စုအဆင့် ငြိမ်းချမ်းရေး ဖော်ဆောင်မှုအဖွဲ့ဖြင့်သာ ဆက်လက်ဆွေးနွေးမည်ဟု ထုတ်ပြန်ကြောင်း သိရှိရသည်။
ပြည်ထောင်စုအဆင့် ငြိမ်းချမ်းရေး ဖော်ဆောင်မှုအဖွဲ့မှာ ၂ ဖွဲ့ရှိပြီး အဖွဲ့(၁)မှာ ဦးအောင်သောင်း ဦးဆောင်ပြီး အဖွဲ့(၂)မှာ ရထားပို့ဆောင်ရေးဝန်ကြီးဌာန ပြည်ထောင်စုဝန်ကြီး ဦးအောင်မင်း ဦးဆောင်ကာ ဆောင်ရွက်လျက်ရှိကြောင်း သိရသည်။
UNFC မှ ယခုအခါ ဦးအောင်မင်းဦးဆောင်သည့် ငြိမ်းချမ်းရေး ဖော်ဆောင်မှုအဖွဲ့ဖြင့် ဆက်လက်ဆွေးနွေးမည်ဆိုသည့် အချက်ပါသော ထုတ်ပြန်ချက်တစ်ရပ် ထုတ်ပြန်ထားကြောင်း ဧပြီ ၂၉ ရက်နေ့က နေပြည်တော် စက်မှုဝန်ကြီးဌာန အစည်းအဝေးခန်းမတွင် ကျင်းပသည့် မီဒီယာများနှင့် တွေ့ဆုံပွဲတွင် ရထားပို့ဆောင်ရေးဝန်ကြီးဌာန ပြည်ထောင်စုဝန်ကြီး ဦးအောင်မင်းက ပြောကြားခဲ့ပါသည်။
ရထားပို့ဆောင်ရေးဝန်ကြီးဌာန ပြည်ထောင်စုဝန်ကြီး ဦးအောင်မင်းက''UNFC က အစည်းအဝေး လုပ်ပါတယ်။ UNFC ဆိုတာ တိုင်းရင်းသား လက်နက်ကိုင် အဖွဲ့ ၁၁ ဖွဲ့ ပေါင်းစပ်ပြီး ဖွဲ့စည်းထားတဲ့ အဖွဲ့အစည်း ဖြစ်ပါတယ်။ လွန်ခဲ့တဲ့တစ်ပတ်က ထိုင်းနိုင်ငံ တစ်ဖက်ကမ်းမှာ သူတို့ အစည်းအဝေး လုပ်တယ်။ အဲဒီကနေ ဆုံးဖြတ်ချက်တွေ အများကြီး ထွက်လာတယ်။ အဲဒီအထဲက နံပါတ်တစ် ဆုံးဖြတ်ချက်က အပစ်အခတ် ရပ်စဲရေး ကိစ္စရပ်များကို ဦးအောင်မင်းနှင့်သာ ဆက်လက်ဆွေးနွေးမည်ဆိုတဲ့ အချက်တစ်ချက် ပါပါတယ်။ ကျွန်တော်တို့က အဆင့် ၃ ဆင့်နဲ့ လုပ်တယ်။ ပထမအဆင့်က အပစ်အခတ် ရပ်ဆဲရေး၊ ဒုတိယ အဆင့်က Political Dialogue၊ တတိယ အားလုံးပါ၀င်တဲ့ အစည်းအဝေးကြီး လုပ်မယ်။ ပြီးတော့မှ တူတာမတူတာတွေ ညှိပြီး ထာဝရငြိမ်းချမ်းရေးအတွက် လက်မှတ်ထိုးမယ်ဆိုပြီး ဖြစ်ပါတယ်။ အဲဒီလို အဆင့် ၃ ဆင့် နဲ့လုပ်တာကို လက်ခံမယ်၊ ကျွန်တော်လုပ်တဲ့ ပုံစံအတိုင်း လုပ်မယ်ဆိုရင် ကျွန်တော်လက်ခံပေးမယ်၊ ကျွန်တော်လာပေးမယ်၊ ကြိုးစားပေးမယ်လို့ ပြောလိုက်ပါတယ်''ဟု မီဒီယာတွေ့ဆုံပွဲတွင် ပြောကြားခဲ့ပါသည်။
လက်ရှိတွင် တိုင်းရင်းသား လက်နက်ကိုင်အဖွဲ့များနှင့် ငြိမ်းချမ်းရေး ဖော်ဆောင်မှုအတွက် ဆွေးနွေး လုပ်ဆောင်ရာတွင် ဦးအောင်သောင်း ဦးဆောင်သည့် ပြည်ထောင်စုအဆင့် ငြိမ်းချမ်းရေးဖော်ဆောင်မှုအဖွဲ့(၁) ဖြင့် KIA အဖွဲ့မှာ ဆွေးနွေးပြီး ကျန်တိုင်းရင်းသား လက်နက်ကိုင်အဖွဲ့ ၁၀ ဖွဲ့မှာ ဦးအောင်မင်း ဦးအောင်သည့် ပြည်ထောင်စုဆင့် ငြိမ်းချမ်းရေးဖော်ဆောင်မှုအဖွဲ့(၂)ဖြင့် ဆွေးနွေးလုပ်ဆောင်ခဲ့ပြီး အပစ်အခတ် ရပ်ဆဲရေးအပါအဝင် ငြိမ်းချမ်းရေး ဖော်ဆောင်မှုအတွက် ကြီးကြီးမားမား ဆွေးနွေးရန်မှာ KIA အဖွဲ့တစ်ဖွဲ့သာ ကျန်ရှိတော့ကြောင်း သိရသည်။
''တိုင်းပြည်က တာဝန်ပေးရင်တော့ ကျွန်တော် ၀င်ရမှာပေါ့။ သူတို့ သဘောက ၀င်စေချင်တဲ့ သဘောဖြစ်တယ်။ ကျွန်တော်တို့က ရိုးသားမှု၊ ယုံကြည်မှုကို တည်ဆောက်ပြီး ဆွေးနွေးပါတယ်''ဟု ရထားပို့ဆောင်ရေးဝန်ကြီးဌာန ပြည်ထောင်စုဝန်ကြီး ဦးအောင်မင်းက ဆက်လက် ပြောကြားခဲ့ပါသည်။
http://news-eleven.com/index.php?option=com_content&view=article&id=13353%3A-unfc-&Itemid=118
Posted in: UNFC,တွေ့ဆုံဆွေးနွေးမှု
