Monday, October 22, 2012
မြန်မာ့ငြိမ်းချမ်းရေးလေ့လာစောင့်ကြည့်မှု
ဦးဘရန်ရှောင်မှာ မြစ်ကြီးနားမြို့ ဂျန်မိုင်ကောင်နှစ်ခြင်းအသင်းတော် ဘုရားကျောင်းတွင် ခိုလှုံနေစဉ် ဇွန်လ ၁၇ ရက်နေ့က ဖောက်ခွဲမှုဖြင့် စွပ်စွဲ၍ ဖမ်းဆီးခံခဲ့ရကာ နောက်ပိုင်းတွင် မတရားသင်း ဆက်သွယ်မှု ပုဒ်မ ၁၇(၁)ဖြင့် စွဲချက်တင်လိုက်ခြင်း ဖြစ်သည်။
“သူ့ကို ၂ဝဝ၄ ကနေ ၂ဝ၁၁ ထိ KIO ဝန်ထမ်းလုပ်တယ်၊ အပြစ်ရှိတယ်ဆိုပြီး စွဲချက်တင်ပြီး ဖြေရှင်းဖို့ အမိန့်ချလိုက် တယ်။ စရဖတွေ ထွက်ဆိုချက်ကိုပဲ အတည်ပြုလိုက်တဲ့ သဘောပဲ” ဟု အကျိုးဆောင်ရှေ့နေ ဦးမာခါးက ပြောသည်။
လေးလကြာ ဖမ်းဆီး ထိန်းသိန်းခံထားရသူ ဦးဘရန်ရှောင်သည် KIO ဝန်ထမ်းမဟုတ်ဘဲ ချုပ်နှောင်ခံနေရခြင်းမှာ
ကျေနပ်စရာ မရှိကြောင်း ၎င်းက မဇ္စျိမကို ဆက်ပြောသည်။
“စိတ်ညစ်စရာပါ။ အပြစ်မရှိတဲ့လူကို အချိန်အကြာကြီး ဖမ်းထားတယ်။ ခု စွဲချက် တင်လိုက်ရင် ဖြေရှင်းနေရတာက အချိန်ပိုကြာတယ်။ မတရား ခံစားနေရတယ်။ လူပင်ပန်း၊ စိတ်ပင်ပန်း လုပ်ခိုင်းနေတယ်။ ကျေနပ်စရာ လုံးဝ မရှိပါဘူး” ဟု ရှေ့နေ ဦးမာခါးက ပြောသည်။
ဦးဘရန်ရှောင် လွတ်မြောက်လာမည်ဟု မျှော်လင့်ချက်ဖြင့် ယနေ့ တရားရုံးသို့ ဘာသာရေး အသင်းတော်
ခေါင်းဆောင်များ ၂ဝ ဦးခန့် လာရောက် စောင့်မျှော်နေခဲ့သော်လည်း စိတ်ပျက်စွာဖြင့် ပြန်သွားခဲ့ကြသည်ဟု ဆိုသည်။
အောက်တိုဘာလ ၂၉ ရက်နေ့တွင် အမှုအား ဆက်လက် စစ်ဆေးမည် ဖြစ်ကြောင်း သိရသည်။
မတရားအသင်း ဆက်သွယ်မှုနှင့် ဖောက်ခွဲမှုတို့ဖြင့် စွပ်စွဲ၍ ဖမ်းဆီးခံရသူ တချို့၏ အမှုများကို လိုက်ပါ ဆောင်ရွက်
ပေးနေသည့် ရှေ့နေကြီး ဦးမာခါး မှာ အမျိုးသား ဒီမိုကရေစီ အင်အားစုပါတီ NDF မှ နုတ်ထွက်ခွင့်ပြုရန် ပြည်နယ်
ရွေးကောက်ပွဲ ကော်မရှင်အဖွဲ့ခွဲထံ တနလာင်္နေ့က စာတင်လိုက်သည်။
မတ်လ ၂ဝ ရက်နေ့က ပါတီမှ နုတ်ထွက်ကြောင်း NDF ရန်ကုန်ရုံးချုပ်သို့ စာသင်ခဲ့သော်လည်း ယနေ့ထိ တရားဝင် စာပြန်လာခြင်း မရှိသေး၍ ယခုကဲ့သို့ ပြည်နယ်ကော်မရှင်သို့ စာတင်လိုက်ခြင်း ဖြစ်သည်။
“NDF ပါတီမှ မဟုတ်တော့ဘူးဆိုတာကို အများပြည်သူ သိစေချင်တယ်။ တချို့လူတွေက မသိလို့ ကျနော်ကို NDF ပါတီဝင်ပဲ ထင်နေကြတယ်။ ကျနော့် ကိုယ်ရေးကိုယ်တာ ကိစ္စကြောင့် နုတ်ထွက် ထားတယ်။ ကျနော် ဒီပါတီဝင် မဟုတ်တော့ဘူးဆိုတာ ကော်မရှင်ကို စာတင်လိုက်တယ်” ဟု ရှေ့နေ ဦးမာခါးက ပြောသည်။
ဦးမာခါးသည် NDF ဗဟိုဦးစီးအဖွဲ့ဝင် ကချင်ပြည်နယ် အတွင်းရေးမှူးတာဝန်ကို ထမ်းဆောင်ခဲ့ပြီး သူ့နုတ်ထွက်စာ လက်ခံကြောင်း ဗဟိုဦးစီးကော်မတီ၏ တတိယအကြိမ် အစည်းအဝေးတွင် ဆုံးဖြတ် အတည်ပြုပြီးသွားပြီးဖြစ်၍ သက်ဆိုင်ရာ ပြည်နယ်၏ ကော်မရှင်အဖွဲ့ခွဲမှသာ အကြောင်းကြားရမည် ဖြစ်ကြောင်း NDF ပါတီ ဥက္ကဋ္ဌ ဦးခင်မောင်ဆွေ က ပြောသည်။
http://www.mizzimaburmese.com/news/inside-burma/10298-kio-----.html
Posted in: ကချင်,သတင်း
