ပင်လုံစိတ်ဓါတ်အလှူ

ကျော်သူ (နာရေးကူညီမှုအသင်း – ရန်ကုန်)
နို၀င်ဘာ ၄၊ ၂၀၁၂

 

၂ဝ၁၂ ခုနှစ်၊ သီတင်းကျွတ်လဆုတ် (၂) ရက်၊ နိုဝင်ဘာလ (၁) ရက်နေ့တွင် နာရေးကူညီမှုအသင်း (ရန်ကုန်) သို့ မွန်ပြည်နယ်၊ သံဖြူဇရပ်မြို့ တွင်ရှိသော “ဟိတကာရီ” ဖောင်ဒေးရှင်းမှ ကချင်ဒုက္ခသည်များအတွက် အလှူငွေကျပ် ၁၇၈ဝဝဝိ/- (တစ်သိန်းခုနှစ်သောင်းရှစ်ထောင်ကျပ်)တိတိအား နေ့လည် (၂း၃ဝ) အချိန်တွင် လာရောက်လှူဒါန်းသွားခဲ့သည်။ နာရေးကူညီမှုအသင်း (ရန်ကုန်) သို့ “ဟိတကာရီ” ဖောင် ဒေးရှင်းမှ ဆရာတော် တလဂုဏ်သုည (အရှင်ဓမ္မပိယ) ဓမ္မဝိဟာရနှင့် ဒကာ (၂) ဦးတို့ရောက်ရှိလာပြီး အလှူငွေအားလှူဒါန်းခဲ့သည်။ “ဟိတကာရီ”ဖောင်ဒေးရှင်းသည် သံဖြူဇရပ်မြို့၊ မွန်ပြည်နယ်တွင်တည်ရှိပြီး ကယ်ဆယ်ရေးလုပ်ငန်းများ၊ ကျန်းမာရေးလုပ်ငန်းများ၊ ပညာ ရေးလုပ်ငန်းများ၊ လူမှုရေးလုပ်ငန်းများ၊ ဘာသာရေးလုပ်ငန်းများကိုစွမ်းဆောင်ပေးနေသော အဖွဲ့တစ်ဖွဲ့ဖြစ်သည်။ “ဟိတကာရီ” ဆရာတော် မှ နာရေးကူညီမှုအသင်း (ရန်ကုန်) ၏ ရုံးတွင်းသို့ လိုက်လံလေ့လာကြည့်ရှုစဉ် ဧည့်ကြိုကော်မတီဝင် ကိုကျော်ဘိုဘိုအား “ဦးပဥ္ဇင်းတို့က ဇီဝိတဒါန မျက်စိဆေးရုံဖွင့်ဖို့ရှိတယ်။ ဒီနှစ်ကုန် ၂ဝ၁၃ ဇန်နဝါရီလ လောက်တော့ဖြစ်မယ်။ နာရေးကူညီမှုအသင်း (ရန်ကုန်) ကနေ မျက်စိ ဆေးရုံအတွက် လိုအပ်တာတွေကိုလည်းလေ့လာသွားပါတယ်” ဟုပြောကြားခဲ့ပြီး “ဟိတကာရီ” ဖောင်ဒေးရှင်းမှ ပြန်ကြားရေးတာဝန်ခံ ဦး ကြည်စိုးမှလည်း နာရေးကူညီမှုအသင်း (ရန်ကုန်) ၌ ဖွင့်လှစ်သင်ကြားနေသည့် မြန်မာနိုင်ငံလုံးဆိုင်ရာ ပရဟိတစွမ်းရည်မြှင့် သင်တန်း များအား မိမိတို့အဖွဲ့မှလည်း လာရောက်၍တက်ရောက်ကြမည်ဖြစ်ကြောင်း၊ မိမိတို့နယ်တွင်လည်း မျက်စိဆေးရုံဖွင့်မည်ဖြစ်သောကြောင့် လိုအပ်သောအချက်အလက်များအတွက် နာရေးကူညီမှုအသင်း (ရန်ကုန်) ၏ သုခကုသိုလ်ဖြစ်မျက်စိဆေးရုံအား လေ့လာသွားပါကြောင်း အုပ်ချုပ်ရေးမှူး ဒေါ်ဧရာမောင်မောင်အား ပြောကြားခဲ့သည်။

“အများကောင်းစားရေး အကျိုးစီးပွားအား ပြုကျင့်ဆောင်ရွက်လေ့ရှိသူ”ဟု အဓိပ္ပာယ်ဖွင့်ဆိုနိုင်သော “ဟိတကာရီ” ဖောင်ဒေးရှင်းအဖွဲ့၏ လှူဒါန်းကူညီမှုသည် တိုင်းရင်းသားစည်းလုံးညီညွတ်မှုအား သရုပ်ဖော်ခြင်းဖြစ်သော၊ လူမျိုးဘာသာမခွဲခြားဘဲ လူသားချင်းစာနာထောက် ထားသော စိတ်ဓါတ်ဖြင့် ကချင်ပြည်နယ်ရှိ စစ်ဘေးဒုက္ခသည် ကချင်လူမျိုးတို့အတွက် မွန်ပြည်နယ်၊ ကရင်ပြည်နယ်မှ တိုင်းရင်း သားညီ အစ်ကို မောင်နှမများမှ လှူဒါန်းကူညီမှုပြုခြင်းသည် နောင်အနာဂတ် မြန်မာနိုင်ငံတော်အတွက် ငြိမ်းချမ်းသာယာ၊ စည်းလုံးညီညွတ်မှုတို့ကို ဖြစ်စေမည့် အတိတ်နိမိတ်ဖြစ်သောကြောင့် ယင်းလှူဒါန်းခြင်း အစီအစဉ်အား ပင်လုံစိတ်ဓါတ်ကောင်းမှုအလှူဟု ခေါ်ဆိုလိုက်ရပါသည်။

http://moemaka.com/?p=28755

Posted in: ကချင်,ကချင်စစ်ပြေးဒုက္ခသည်,စစ်ပြေးဒုက္ခသည်,သတင်း