ပလောင် ဒေသ၌လည်း စစ်ဆင်ရေး တိုးများလာဖွယ်ရှိ

ရှမ်းပြည် မြောက်ပိုင်းရှိ တအာင်း အမျိုးသား လွတ်မြောက်ရေး တပ်ဖွဲ့ (TNLA ) လှုပ်ရှားရာ ဒေသတွင် တိုက်ပွဲ ငယ်လေးများ ခပ်စိပ်စိပ် ဖြစ်ပွား လာနေပြီး ပြင်းထန်လာဖွယ် ရှိနေသည်ဟု TNLA ပြောခွင့်ရှိသူ ဗိုလ်မှူးတာဘုန်းကျော် က ပြောပါသည်။
“တိုက်ပွဲ မဖြစ်တာ (၅) ရက်လောက် ငြိမ်နေရာကနေ ဆက်တိုက်ဖြစ်လာခဲ့တပါ။ ပျောက်ကျား ပွဲလေးတွေပါ။ ဒီနေ့မှာ လည်း ကွပ်ခိုင်နဲ့ မိုင်ပေါကြားက ပန်းခတ်ပေါင် ဖက်မှာ တကြိမ်နဲ့ နမ်းဆန်းမြို့နယ်က ပန်လုံ ကျေးရွာဖက်မှာ တကြိမ် ပစ် ခတ်ကြပါတယ်။ ၊ တနေ့ကလည်း ၂ ကြိမ်ဖြစ်တယ်။ ဒီတော့ သဘောက သူတို့ ဘက်က လှုပ်ရှားလာရင် ကျနော်တို့ ဘက် က ပျောက်ကျားနဲ့ ပစ်မယ်ဆိုတဲ့ အစီအစဉ်ပါ။ ဒါပေမဲ့ သူတို့ကလည်း စစ်အင်အားကို တဖြည်းဖြည်းနဲ့ တိုးချဲ့ ချထားလာ နေတယ်။  ကျနော်တို့ကို တိုက်ဖို့ လိုက်လံ နေရာယူ နေတာဖြစ်ပါတယ်။” ဟု ဆိုပါသည်။
နမ့်ဆန်မြို့နယ်တွင် ခလရ (၁၃၀)၊ ခလရ (၁၄၄)၊ ခလရ (၁၁၅)နဲ့ ခမရ (၅၀၁) တပ်ဖွဲ့တို့က လှုပ်ရှားနေပါသည်။ ထို့ပြင် မန်တုံမြို့နယ်၌ ခမရ (၅၀၂) အပါ၀င်၊ ခလရ (၂၃)၊ အောင်လံ အခြေစိုက် ခလရ (၇၁)၊ မန္တလေး အခြေစိုက် ခလရ (၉၅) တပ်ဖွဲ့များ လှုပ်ရှားနေပါသည်။ ဤတပ်ရင်းများ၏ ရှေ့တန်း ထွက်အင်အားသည် တပ်ရင်းတရင်းလျှင် အင်အား (၁၀၀) ကျော်သာ ရှိပါသည်။ TNLA အခြေချရာ ဒေသ၌ အစိုးရ တပ်ရင်းပေါင်း (၁၆) ရင်းခန့် လှုပ်ရှား နေသည်ဟု ပလောင် တို့က ဆိုပါသည်။
စစ်ရေးအရ လှုပ်ရှား ရာတွင်လည်း အစိုးရ တပ်ဖွဲ့တို့သည် စစ်ကြောင်း လှုပ်ရှားမှု ပုံစံထက် ပျောက်ကျား တပ်ဖွဲ့ ပုံစံဖြင့် လှုပ်ရှား လာပါသည်။ လိုအပ်ပါက အရပ်ဝတ်ဖြင့် ပုံမှားရိုက်ပြီး နယ်မြေအခြေအနေများ လေ့လာလျှက်ရှိကြောင်း ဗိုလ်မှူး တာ ဘုန်းကျော်က ဆိုပါသည်။
ပြီးခဲ့သည့် နိုဝင်ဘာာ ၂၂ ရက်နေ့တွင် အစိုးရတပ်ဖွဲ့ တို့သည် စစ်ကား အစီး (၅၀) ဖြင့် လားရှိုးမြို့ အခြေစိုက် အရှေ့မြောက် ပိုင်းတိုင်း စစ်ဌာနချုပ်မှ မူဆယ်မြို့ ၁၀၅ မိုင် (ကုန်သွယ်ရေးဇုံ) ဘက်သို့ ချီတက် ခဲ့ပါသည်။
နိုဝင်ဘာ (၂၄) ရက်နေ့တွင် ကြူကုတ် ပန်ဆိုင်းဘက်သို့ စစ်ကား (၅) စီးဖြင့် ထွက်ခွာ သွားခဲ့သလို၊ နမ့်ခမ်းမြို့ဘက်သို့ လည်း စစ်ကား (၅) စီးနှင့် အမြောက်တင် တင့်ကား (၁) စီး ရောက်ရှိ လာပါသည်။
နိုဝင်ဘာလ ၂၅ ရက်နေ့၌ နမ့်ဆန်မြို့ဘက်သို့ စစ်ကား (၇) စီး ရောက်ရှိလာပြီး ဖြန့်ခွဲနေသော တပ်ဖွဲ့များ၏ တပ်ရင်း များကိုမူ မသိရှိရသေးသည်ဟု ပလောင်ဖက်က ဆိုပါသည်။
“အစိုးရ တပ်ဖွဲ့ရဲ့ နည်းဗျူဟာ ကတော့ တိုက်ပွဲတွေ ဆင်ဖို့ နယ်မြေလေ့လာ နေတဲ့သဘော ဖြစ်ပါတယ် ဒီအကြောင်းကို ကျ နော်တို့ ဖမ်းဆီး ရရှိထားတဲ့ အစိုးရ တပ်သားတွေရဲ့ ပြောပြချက်အရ သိရပါတယ်။ အဲဒီ အစိုးရ တပ်သားတွေဟာ ပြီးခဲ့တဲ့ နိုဝင်ဘာ လကုန်ပိုင်းက ကျနော်တို့ မန်တုံမြို့နယ်မှာ ရှိတဲ့ တပ်ရင်း (၃၆၇) က (၅) ယောက် ဖမ်းဆီး ရမိထားပါတယ်။ ဒီသတင်း ကိုသူတို့ ရဲ့ ထွက်ဆိုချက်အရ သိရတာပါ။” ဟု TNLA ဗိုလ်မှူးက ဆိုပါသည်။

TNLA တအာင်း အမျိုးသား လွတ်မြောက်ရေး တပ်မတော်

ထို့အပြင် ရှမ်းမြောက်ပိုင်းရှိ ကျောက်မဲ၊ မိုးမိတ်၊ နမ့်ဆန်၊ မန်တုံ၊ ကွတ်ခိုင်၊ မူဆယ်နှင့် ကြူကုတ်ပန်ဆိုင်း မြို့နယ်ဖက်၌ လည်း စစ်ဆင်ရေး တိုးမြှင့် ရှိသည်ဟု အဖမ်းခံ ရထားရသော သုံ့ပန်းများက ဆိုထားခဲ့ပါသည်။
ဤဒေသသည် TNLA အပြင် ကချင် လွတ်လပ်ရေး တပ်မတော် KIA နှင့် ရှမ်းပြည် တိုးတက်ရေး ပါတီ တပ်မတော် SSA တို့ လည်း ဒေသ အလိုက် တစ်ဖွဲ့ချင်း လှုပ်ရှားနေကြသဖြင့် တိုက်ပွဲများ ပြင်းထန် လာဖွယ် ရှိသည်ဟု ပလောင်တို့က ဆိုပါသည်။ 

http://www.phophtaw.org/burmese/index.php/news/local-news/2486-2012-12-07-09-28-03.html

Posted in: စစ်ဆင်ရေး,တအောင်း,တအောင်းစစ်ဆင်ရေး,သတင်း,သျှမ်း,အခြား