အပြင်းထန်ဆုံး စစ်ဆင်ရေးအတွက် KIA ပြင်ဆင်နေ

အစိုးရသည် ကချင်ပြည် လွတ်လပ်ရေး အဖွဲ့၏ လိုင်ဇာစစ်ဌာနချုပ်ကို အလုံးအရင်းနှင့် စစ်ဆင်ရန် ပြင်ဆင်နေပြီး ဖြစ်ကြောင်း KIA စစ်သတင်းနှင့် နီးစပ်သော စစ်ကြောင်း အရာရှိတဦးက ဆိုပါသည်။
“စစ်ရေးအခြေအနေက အစိုးရတပ်ဘက်က လှုပ်ရှားမှုတွေ ပြင်ဆင်မှုတွေ တအားလှုပ်လာနေတယ်။ မြစ်ကြီးနားမှာကော ဗန်မော်မှာကော တွေ့နေရ ကြားနေရတာ ရှိပါတယ်။ ရဟတ်ယာဉ်ကလဲ ဒီနေ့မှာ တက်လိုက်ဆင်းလိုက် လုပ်နေကြတယ်။ မြစ်ကြီးနားကနေ ဒေ့ါဖုန်းယန်းဖက်ကိုပေါ့။ တကယ်လို့ လဂျားယန် တိုက် ပွဲက လူနာတွေသယ်ရင်တောင် တရက်ထဲနဲ့ ပြီး တဲ့ကိစ္စပါ အခုတော့ (၄) ရက်ရှိပြီးဆိုတော့ အဲဒါမဖြစ်နိုင်ဘူးပေါ့။ အခုတော့ အဲဒီလိုမဟုတ်ဘူး။ အရန်တပ်တွေကို လည်း ရွှေ့နေတယ်လေ” ဟု ဆိုပါသည်။
မြစ်ကြီးနားမြို့ ဒေါ့ဖုန်းယန်မြို့သို့လည်း ရဟတ်ယာဉ်များ ခေါက်တုန့်ခေါက်ပြန် တက်ဆင်းနေသည်ဟု ဆိုပါသည်။ ထို့အတူ ဒေါ့ဖုန်းယန်မြို့ ခန်းကိုင်တောင်မှ အမှတ် (၃၇၀) အမြောက်တပ်ရင်းသည်လည်း လိုင်ဇာမြို့သို့ ၁၀၅ မမဟော်ဝစ်ဇာဖြင့် ည ၁၂ နာရီမှာ တကြိမ် နှင့် ယနေ့မနက် (၉) နာရီ၌ တကြိမ် ပစ်ခတ်ခဲ့ပြီး အမြဲတမ်းလိုလိုလည်း ပစ်ခတ်နေခဲ့ပါသည်။
ဒီဇင်ဘာ (၁၄) ရက်နေ့၌ဖြစ်သော လဂျားယန်တိုက်ပွဲသည် အစိုးရဖက်မှ ထိခိုက်ကျဆုံးမှု များစွာဖြင့် ဆုတ်ခွာခဲ့ရသော်လည်း ယခု စစ်ဆင်လာမည့် ထိုးစစ်သည် အဆပေါင်းများစွာ အင်အားများလာဖွယ် ရှိသည်ဟု တွက်ဆထားပါသည်။ အစိုးရသည် လဂျားယန် စစ်ဆင်ရေး၌ အင်အား (၄၀၀) ခန့် အသုံးပြုခဲ့ပါသည်။
အစိုးရသည် မြစ်ကြီးနားနှင့် ဗန်းမော်မြို့တို့၌ အရန်အင်အားအဖြစ် စုထားသော တပ်မ (၃၃) နှင့် အနောက်မြောက်တိုင်း တပ် များမှတပ်ရင်း (၁၀) ရင်းခန့်ရှိနေပါသည်။ ဤအင်အားများကိုလည်း ရဟတ်ယာဉ်များဖြင့် ယနေ့မနက်ပိုင်းမှစပြီး အခေါက် ခေါက်အခါခါ ဒေါ့ဖုန်းယန်မြို့ဖက်သို့ သယ်ဆောင်နေခဲ့သည်ဟု အဆိုပါ KIA စစ်အရာရှိကဆိုပါသည်။

စစ်ရေးလေ့ကျင့်မှု အပြည့်ရှိနေသော KIA တပ်မတော် (ဓါတ်ပုံ KIA)

ထို့အပြင် လာမည့် စစ်ဆင်ရေးတွင် ရဟတ်ယာဉ်များကိုပါ ပန်ဝါ စစ်ဆင်ရေးထက် ပိုမိုအသုံးပြုလာဖွယ်ရှိ နေသည်ဟု KIA ဖက်မှ တွက်ဆထားကြောင်း ဆိုပါသည်။
ထို့အပြင် အစိုးရသည် မိမိတို့ အသုံချနေသော မီဒီယာများကိုပါ ပြင်ဆင်လာပါသည်။ ယနေ့ထုတ် ၄င်းတို့၏ မီဒီယာများတွင် ဖါးကန့်ဒေသရှိ မိုးကောင်း ရဲစခန်း တစ်ခုဖြစ်သော ကာမိုင်းရဲစခန်း အတိုက်ခံရသည့် သတင်းကို ပြည်တွင်းထုတ် ၄င်းတို့ မီဒီယာ အတော်များများက စတင်ရေးလာကြပါသည်။ ဤလက္ခဏာသည် ရှေ့လာမည့် KIA စစ်ဆင်ရေးတွင် လက်သုံးမီဒီ ယာများပါ ၀ိုင်းပြီး ၀ါဒဖြန့်ရန် စတင် အသုံးပြုလာဖွယ် ရှိနေပါသည်။
ဤသို့ကြောင့် KIA သည် အစိုးရပြင်ဆင်ထားသမျှကို တုန့်ပြန်နိုင်ရန် ABSDF ကျောင်းသားတပ်များနှင့်အတူ ရင်ဆိုင်ရန် အသင့်ပြင်ဆင်ထားပြီး ဖြစ်သည်ဟု ဆိုပါသည်။
စစ်ရေးအကဲခတ်များကမူ အစိုးရသည် KIAကို အပိုင်းလိုက် ချေမှုန်းရန် အားစမ်းခဲ့ပြီးဖြစ်သည်ဟု ဆိုပါသည်။ ထို့အပြင် အခြား တပ်မဟာများမှ KIA တပ်များ ၄င်းဗဟိုသို့ စစ်ကူမပို့နိုင်ရန်လည်း လိုအပ်သောတပ်ဖွဲ့များဖြင့် ရံထားခဲ့ပြီးဖြစ်သည်ဟု ဆိုပါသည်။ ဤအချိန်မျိုး၌ KIAသည် မိမိတို့၏ အရန်တပ်များကို အချိန်မှီ ရရှိရန်အတွက် ပြင်ဆင်ထားသင့်သည်ဟု ဆိုပါ သည်။ 

 http://www.phophtaw.org/burmese/index.php/news/local-news/2534--kia-.html

Posted in: ကချင်,ကချင်စစ်ဆင်ရေး,သတင်း