Wednesday, August 29, 2012
မြန်မာ့ငြိမ်းချမ်းရေးလေ့လာစောင့်ကြည့်မှု
ဖားကန့်မြို့နယ်တွင်း အစိုးရနှင့် ကချင်လွတ်မြောက်ရေးတပ်ဖွဲ့ တိုက်ပွဲများသည် ဆက်လက်ပြင်းထန်နေပြီး ယမန်နေ့ သြဂုတ် ၂၇ ရက် ညနေ့တွင် ဖားကန့်ဒေသ မောမော်ဘွမ် (Maw Mau Bum) ဘက်သို့ ချီတက်လာသော မြန်မာအစိုးရတပ်ကို ကချင်လွတ်မြောက်ရေးတပ်ဖွဲ့ (KIA) မှ ပစ်ခတ်တိုက်ခဲ့ရာ မြန်မာအစိုးရတပ်မှ သေဆုံးမှုရှိခဲ့ကြောင်းသိရသည်။
“အလောင်းတွေက အများကြီးဘဲ သေနတ်တွေနဲ့ ပုံနေကြတယ်။ ဒဏ်ရာရတဲ့သူတွေကို ဖားကန့်ဆေးရုံကိုပို့တယ်။ ဆေးရုံရောက်ရောက်ချင်း ၁၈ ယောက်လောက်သေဆုံးသွားတယ်” ဟု မျက်မြင်တဦး KNG ကချင်သတင်းဌာန သို့ပြောသည်။
ထို့အတူ ယမန်နေ့ နံနက် ၈ နာရီခွဲမှ ညနေ ၅ နာရီထိ မြန်မာအစိုးရတပ်ပေါင်းစုတပ်ဖွဲ့နှင့် ကချင်လွတ်မြောက်ရေးတပ်ဖွဲ့ (KIA) တို့ ဆိုင်းဂျာဘွမ် (Seng Ja Bum) နှင့် ဂွေခါမှော် (Gwi Hka Maw) ကြား တိုက်ပွဲများဖြစ်ပွားခဲ့ရာတွင် လက်နက်ကြီးလက်နက်ငယ်များနှင့် ပစ်ခတ်ခဲ့ကြပြီး အစိုးရတပ်မှ အမြောက်အများ သေဆုံးမှုရှိကြောင်း သိရသည်။
KIA ဘက်မှ သေဆုံးမှု ထိခိုက် ဒဏ်ရာရရှိမှု မရှိကြောင်း KIA အရာရှိတဦးပြောသည်။ သို့သော် လတ်တလော တိုက်ပွဲအတွင်း အစိုးရဖက်မှ ကျဆုံးမှုများနေကြောင်း KIO ဖက်မှ ပြောဆိုသော်လည်း နှစ်ဖက်တပ်များ၏ ကျဆုံးမှုနှင့်ပတ်သက်၍ အတိအကျ အတည်ပြုချက်ကိုမူ မသိရသေးပေ။
နှစ်ဖက်တပ်များ၏ လှုပ်ရှားမှုများကို တွေ့မြင်အကဲခြင်းအားဖြင့် တိုက်ပွဲများသည် ဆက်လက်ပြင်းထန် လာနိုင်ဖွယ်ရှိသောကြောင့် ဒေသခံများသည် ၄င်းတို့လုံခြုံရေးအတွက် စိုးရိမ်ပူပန်နေကြကြောင်း သိရှိရသည်။
http://kachinnews.com/burmese/news/923-%E1%80%96%E1%80%AC%E1%80%B8%E1%80%80%E1%80%94%E1%80%B9%E1%82%94%E1%80%B1%E1%80%92%E1%80%9E%E1%80%90%E1%80%BC%E1%80%84%E1%80%B9%E1%80%B8-kia-%E1%82%8F%E1%80%BD%E1%80%84%E1%80%B9%E1%80%B7%E1%80%90%E1%80%AD%E1%80%AF%E1%80%80%E1%80%B9%E1%80%95%E1%80%BC%E1%80%B2%E1%80%90%E1%80%BC%E1%80%84%E1%80%B9-%E1%80%A1%E1%80%85%E1%80%AD%E1%80%AF%E1%80%B8%E1%80%9B%E1%80%96%E1%80%80%E1%80%B9-%E1%80%80%E1%80%BA%E1%80%86%E1%80%AF%E1%80%B6%E1%80%B8%E1%80%99%E1%82%88%E1%80%99%E1%80%BA%E1%80%AC%E1%80%B8.html
Posted in: ကချင်,စစ်ဆင်ရေး,သတင်း
