နိုင်ငံရေးဆွေးနွေးမှု မအောင်မြင်သရွေ့ အပစ်ရပ်ခြင်းမလုပ်ဟု KNO ပြော

ပြည်ပအခြေစိုက် အကြီးဆုံး ကချင်အမျိုးသား အစည်းအရုံး (KNO) သည် ကချင်လွတ်မြောက်ရေးအဖွဲ့ (KIO) နှင့် သဘောတူထားသည်နှင့်အညီ  မြန်မာအစိုးရနှင့် နိုင်ငံရေးဆွေးနွေးညှိနှိုင်းမှု မအောင်မြင်သရွေ့ အပစ်ခတ်ရပ် ဆဲ ငြိမ်းချမ်းရေးပြုလုပ်မည် မဟုတ်ကြောင်း ပြောလိုက်သည်။
ကချင်အမျိုးသားအစည်းအရုံး (Kachin National Organization) သည် စက်တင်ဘာ ၁၄ ရက်စွဲဖြင့် အချက် (၅) ချက်ပါသော ကြေညာချက် ထုတ်ပြန်လိုက်ခြင်းဖြစ်သည်။
ထိုကြေညာချက်ထုတ်ပြန်ခြင်းသည် KNO ၏ ပေါ်လစီ သဘောထားကို ကချင်လူထုအားလုံး သိရှိအောင် ထုတ်ပြန်လိုက်ခြင်းဖြစ်သည်ဟု KNO ဥက္ကဋ္ဌ ဒူဝါဘောမ်ဝမ် လရော် (Duwa Bawmwang Laraw) က ပြောသည်။
“KNO ရဲ့ ပေါ်လစီကို ကချင်လူထုအားလုံး သိစေချင်တယ်။ ဘာကြောင့်လည်းဆိုရင် အခု သူများတွေ ငြိမ်းချမ်းရေးယူလိုက်တာ အမျိုးမျိုးရှိခဲ့တာတွေကြောင့် KNO အနေနဲ့လည်း ကချင်လွတ်မြောက်ရေးအဖွဲ့ KIO နဲ့အတူ KIO တို့ရပ်သလိုပဲ ရပ်တယ်ဆိုတာကို ကချင်လူထုလည်း သိအောင် ဇဝေဇဝါမဖြစ်အောင် ထုတ်လိုက်တာ” ဟု ဒူဝါဘောမ်ဝမ် လရော် (Duwa Bawmwang Laraw) က ပြောသည်။
ကြေညာချက်တွင် ကချင်အမျိုးသား အစည်းအရုံး (KNO) အနေဖြင့် အစိုးရနှင့် ငြိမ်းချမ်းရေး အချက် ၈ ချက်ဖြင့် ဆွေးနွေးရာတွင် လုံးဝမပါ၀င်ကြောင်း၊ ကချင်ပြည်နယ်ကိုယ်ပိုင်အချုပ်အခြာအာဏာ ရရှိသည့် အချိန်ထိ ကချင် လူမျိုးများကို လမ်းပြဦးဆောင်သွားမည်ဖြစ်ကြောင်း စသည့်အချက်များပါရှိသည်။
ကချင်အမျိုးသား အစည်းအရုံး (KNO)ကို ကချင်တိုင်းရင်းသားအရေး နိုင်ငံတကာတွင် ဆောင်ရွက်ရန် ဟူသော ရည်ရွယ်ချက်ဖြင့် ၁၉၉၉ ခုနှစ်က ထူထောင်ခဲ့သော်လည်း နောက်ပိုင်းတွင် KIO နှင့် KNO အကြား သဘော ထားများ ယှဉ်ပြိုင်သလို ဖြစ်လာခဲ့ရာမှ ပြီးခဲ့သည့် ၂ဝ၁၁ ခုနှစ် ဇန်နဝါနရီလက ထိပ်ပိုင်းခေါင်းဆောင်များ တွေ့ဆုံကာ မတူညီသည့် သဘောကွဲလွဲမှုများ မရှိစေရန် သဘောထားပြန်လည်ညှိနှိုင်းကာ သဘောတူ လက်မှတ်ရေးထိုးခဲ့ခြင်းဖြစ်သည်။
ထို့နောက် ၂၀၁၁ ဇွန်လမှစကာ အစိုးရတပ်နှင့် KIO တပ်အကြား တိုက်ပွဲများ နေ့စဉ်လို ဖြစ်ပွားနေစဉ် ၂၀၁၂ ဇွန်လပိုင်းတွင် KIO နှင့် ပြည်ပ အခြေစိုက် ကချင်အမျိုးသားအစည်းအရုံး KNO တို့ ပူးတွဲ လုပ်ဆောင်သွားရန် လိုင်ဇာဌာနချုပ်တွင် နှစ်ရက်ကြာ တွေ့ဆုံ ဆွေးနွေးခဲ့ကြပြီးနောက် KNO ၏ United Kachinland Army (UKA) တပ်ဖွဲ့ကို ရုတ်သိမ်းလိုက်ပြီး KIA တပ်ဖွဲ့နှင့်အတူ ပူးပေါင်းဖွဲ့စည်းလိုက်ခြင်းဖြစ်သည်။
KNO ကို ကချင်ကျောက်စိမ်းလုပ်ငန်းရှင်တစ်ဦးဖြစ်သူ ဒူဝါဘောမ်ဝမ် လရော် (Bawmwang Laraw) က ထိုင်းနိုင်ငံ ချင်းမိုင်မြို့တွင် စတင်ဖွဲ့စည်းခဲ့ခြင်းဖြစ်ပြီး အဖွဲ့ဝင်များမှာ အမေရိကန်၊ ဂျပန်၊ သြစတြေးလျ၊ ဒိန်းမတ်၊ မလေးရှား၊ အိန္ဒိယ၊ ကနေဒါ၊ ဗြိတိန်၊ နော်ဝေ၊ ဆွီဒင်၊ တရုတ်နှင့် ထိုင်း စသည့် နိုင်ငံများတွင် ရှိသည်။

 http://kachinnews.com/burmese/news/945-%E1%82%8F%E1%80%AD%E1%80%AF%E1%80%84%E1%80%B9%E1%80%84%E1%80%B6%E1%80%B1%E1%80%9B%E1%80%B8%E1%80%B1%E1%80%86%E1%80%BC%E1%80%B8%E1%80%B1%E1%82%8F%E1%80%BC%E1%80%B8%E1%80%99%E1%82%88-%E1%80%99%E1%80%B1%E1%80%A1%E1%80%AC%E1%80%84%E1%80%B9%E1%80%BB%E1%80%99%E1%80%84%E1%80%B9%E1%80%9E%E1%80%B1%E1%80%9B%E1%80%BC%E1%82%95-%E1%80%A1%E1%80%95%E1%80%85%E1%80%B9%E1%80%9B%E1%80%95%E1%80%B9%E1%80%BB%E1%80%81%E1%80%84%E1%80%B9%E1%80%B8%E1%80%99%E1%80%9C%E1%80%AF%E1%80%95%E1%80%B9%E1%80%9F%E1%80%AF-kno-%E1%80%B1%E1%80%BB%E1%80%95%E1%80%AC.html

Posted in: ကချင်,ကချင်တွေ့ဆုံဆွေးနွေးမှု,တွေ့ဆုံဆွေးနွေးမှု,သတင်း