SSA နှင့် အစိုးရတပ် ဓားစာခံချင်း ဖလှယ်သော်လည်း ရွာသားတချို့ မလွတ်သေး

စံခလပူရီ (မဇ္စျိမ) ။       ။ ဒေသခံ ရွာသားများကို အစိုးရတပ်က ဖမ်းဆီးမှုကြောင့် အစိုးရတပ်သားများကို ရှမ်းပြည် တပ်မတော် (မြောက်ပိုင်း) ဟု လူသိများသည့် SSPP/SSA က အပြန်အလှန် ဖမ်းဆီးခဲ့ပြီး တနင်္လာနေ့တွင်
ပြန်လွှတ်ပေးလိုက်သော်လည်း ရွာသားများကို ပြန်လွှတ်ပေးခြင်း မရှိသေးကြောင်း SSA ဘက်က ပြောသည်။

“ရမခ တိုင်းရုံးကနေ ပြန်လွှတ်ပေးဖို့ ကျနော်တို့ကို တောင်းလာတယ်။ ရွာသားတွေကို လွှတ်ပေးရင် မြန်မာစစ်ဗိုလ် ကိုလည်း ပြန်လွှတ်ပေးမယ်။ သူတို့လူကို ကျနော်တို့ လူကြီးတွေ ကိုယ်တိုင် လားရှိုးကို ပြန်ပို့ပေးလိုက်ပြီ။ အဲတာက တနင်္လာနေ့ဗျ။ ဒါပေမယ့် လူထုကိုတော့ ပြန်မလွှတ်သေးဘူး” ဟု အမည်မဖော်လိုသည့် SSPP/SSA အရာရှိ တဦးက ပြောသည်။

သြဂုတ်လ နှောင်းပိုင်းမှ စ၍ ရှမ်းပြည်နယ် မြောက်ပိုင်း၊ နမ္မတူမြို့နယ် မန်စံ ကျေးရွာအုပ်စုနှင့် နမ့်တောင်ကုန်း
ကျေးရွာအုပ်စုမှ ဒေသခံကျေးရွာ ရွာသား ၁ဝ ယောက်ကျော်ကို SSA ၏ အမာခံများဟု စွပ်စွဲကာ အစိုးရတပ်က ရိုက်နှက်ဖမ်းဆီးခဲ့ပြီး ၎င်းတို့အနက် လေးဦးကို ဆက်လက်ထိန်းသိမ်းထားဆဲ ဖြစ်သည်ဟု ဆိုသည်။

ထိုရွာသားများကို ပြန်လွှတ်ပေးရန်အတွက် သြဂုတ်လ ၃၁ ရက်နေ့တွင် အစိုးရတပ် ခမရ (၃၂၂) မှ ဗိုလ်ကြီး သက်စိုးနှင့် တပ်သားတဦးကို SSA က ဖမ်းဆီးခဲ့ပြီး အစိုးရတပ်ဘက်ကလည်း လားရှိုးရှိ SSA ဆက်ဆံရေးရုံးမှ ကိုယ်စားလှယ် နှစ်ဦးကို ရမခ တိုင်းရုံးသို့ ခေါ်ယူထိန်းသိမ်းထားခဲ့သည်။ ထိုကဲ့သို့ နှစ်ဖက်တပ်တိုင်ရာ အပြန်အလှန် ဖမ်းဆီးထားမှုများကို နှစ်ဖက် ပြန်လည် လဲလှယ်လွှတ်ပေးခဲ့ကြသော်လည်း ရွာသား လေးဦးမှာမူ လွတ်မြောက်လာ
ခြင်း မရှိသေးပေ။

လွတ်မြောက်ခြင်း မရှိသည့် ရွာသား လေးဦးအနက် မန်စံကျေးရွာအုပ်စုမှ ပိန်းလုံရွာသား စိုင်းလနှင့် နာကေးရွာသား စိုင်းအိုက်တင်း တို့ နှစ်ဦးမှာ သတင်းများ ပျောက်ဆုံးနေပြီး နောင်အော့်ရွာသား စိုင်းကမ်နှင့် ပိန်းထွန်ရွာသား စိုးကျော်အေး ကို လားရှိုးမြို့ အမှတ် (၁) ရဲစခန်းတွင် ဖမ်းဆီးထားကြောင်း SSA နှင့် နီးစပ်သည့် နမ္မတူ ဒေသခံ တဦးက ပြောသည်။

“စိုင်းကျော်အေး လက်ကိုင်ဖုန်းမှာ SSA အရာရှိတချို့ရဲ့ နာမည်တွေ သိမ်းထားတဲ့အတွက် သူပုန်နဲ့ ဆက်သွယ်တယ် ဆိုပြီး ၁၇/၁ နဲ့ စွဲထားတယ်။ စိုင်းလ နဲ့ စိုင်းအိုက်တင်း နှစ်ယောက်က သေလား ရှင်လား မသိဘူး။ ပျောက်နေတာ ဘာသတင်းမှ မကြားရတော့ဘူး” ဟု သူက ပြောသည်။

ဒေသခံများမှာ ဘာသာစကား အခက်အခဲနှင့် လက်နက်ကိုင် တပ်ဖွဲ့များကို ကြောက်လန့်ခြင်း တို့ကြောင့် မျက်နှာ အမူအယာ ပျက်ရာမှ သူပုန်နှင့် ဆက်သွယ်သည်ဟု မဟုတ်မမှန် စွပ်စွဲခံရခြင်းများလည်း ရှိသည်ဟု ဒေသခံများက
ပြောသည်။

အစိုးရနှင့် SSPP/SSA တို့ အပစ်အခတ် ရပ်စဲထားသော်လည်း ဒေသခံများကို ပုဒ်မ ၁၇/၁ မတရားအသင်းနှင့် ဆက်သွယ်သည်ဟု စွပ်စွဲခြင်းမှာ ငြိမ်းချမ်းရေးအတွက် တိုးတက်သည့် အလားအလာ မဟုတ်ကြောင်း နမ္မတူမြို့နယ်၊ မန်စံ ကျေးရွာအုပ်စု အုပ်ချုပ်ရေးအဖွဲ့ဝင် စိုင်းလိတ်က ပြောသည်။

“ကျနော်တို့ ရွာသားတွေက လက်နက်ကိုင် တပ်ဖွဲ့ဆိုရင် ဘယ်ကလာလာ အကုန် ကြောက်နေရတုန်းပဲ။ အစိုးရတပ် ဆို ပိုကြောက်ရတယ်။ ပြည်သူလူထုအပေါ် ဆက်ဆံတဲ့ ပုံစံကတော့ အရင်က ကျနော်တို့ တောသူတောင်သားတွေ ကြုံတွေ့ရတဲ့ ပုံစံအတိုင်းပဲ သိပ်ပြီးတော့ ထူးထူးခြားခြား ပြောင်းလဲလာတာ မမြင်ဘူး” ဟု သူက ဆက်ပြောသည်။

ဇန်နဝါရီလ ၁၇ ရက်နေ့ အပစ်အခတ် ရပ်စဲပြီးချိန်မှ စ၍ သဘောတူ လက်မှတ် ရေးထိုးထားသည့်အတိုင်း အစိုးရ ဘက်မှ မလိုက်နာသည့်အတွက် နှစ်ဘက်တပ်ဖွဲ့အကြား တိုက်ပွဲပေါင်း ၃ဝ ခန့် ဖြစ်ပွားခဲ့သည်ဟု SSA ဘက်က
ပြောသည်။

SSPP/SSA အနေနှင့် အစိုးရနှင့် ရယူထားသည့် အပစ်အခတ် ရပ်စဲရေး သဘောတူညီချက်များ မပျက်ပြားစေလို သည့်အတွက် လွန်ခဲ့သော နှစ်ပေါင်း ၂ဝ ကျော်က ၎င်းတို့ အခြေချခဲ့သည့် ရှေ့တန်း တပ်စခန်းအချို့ကိုလည်း အစိုးရ၏ တောင်းဆိုမှုကြောင့် နှစ်ကြိမ်တိုင် ဆုတ်ခွာပေးခဲ့သည်ဟု ဆိုသည်။

http://www.mizzimaburmese.com/news/inside-burma/10104-ssa------.html

Posted in: SSPP/SSA,စစ်ဆင်ရေး,သတင်း,သျှမ်း