KIA နှင့် ဖားကန့်အနီး နှစ်နေရာ တိုက်ပွဲတွင် မြန်မာစစ်သား ၆ ဦးကျ ၁၅ ဦးထိခိုက်

ကေအိုင်အေ ဖါးကန့် ပြည်သူ့စစ်တပ်ရင်း ဌာနချုပ်။

ကချင်ပြည်နယ် ကျောက်စိမ်းမှော်ဒေသ ဖားကန့်မြို့အဝင် ၅ မိုင်အကွာ နှစ်နေရာတွင် မြန်မာအစိုးရစစ်ကြောင်း နှင့် ကချင်လွတ်မြောက်ရေးတပ်ဖွဲ့ (KIA) တပ်ရင်း ၆ တပ်ဖွဲ့များကြား တစ်နာရီခြား ဖြစ်ပွားသောတိုက်ပွဲတွင် အစိုးရစစ်သား အနည်းဆုံး ၆ ဦးကျပြီး ၁၅ ဦး ဒဏ်ရာရရှိခဲ့ကြောင်း တပ်ရင်း ၆ KIA အရာရှိများ အတည်ပြုပြောသည်။
ဖားကန့် KIA ပြည်သူ့စစ်တပ်ရင်း (MHH) တပ်ခွဲ (၆)နှင့် မြန်မာစစ်တပ် ခမရ (၃၈၁၊ ၃၈၂၊ ၃၉၀) ပါ၀င်သော စုပေါင်းစစ်ကြောင်း အင်အား ၁၅၀ ကျော်သည်  ယမန်နေ့ အောက်တိုဘာလ ၉ ရက် နံနက် ရ နာရီတွင် နမ်တိန် (Nam Ting) အထက် ရှိ “ပစောက်ကွေ့” တွင် တိုက်ပွဲဖြစ်ပွားရာ အစိုးရတပ်မှ ၃ ယောက် သေဆုံးပြီး ရ ယောက်ဒဏ်ရာရရှိကြောင်း ရှေးတန်းမှ အရာရှိတဦး KNG ကချင်သတင်းဌာနသို့ပြောသည်။
“ခဏလေးပဲ ဖြစ်တယ်။ အစက ကျနော်တို့ သူတို့ထွက်လာမယ့်လမ်းမှာ စောင့်နေတာ။ သူတို့ထွက်မလာလို့ ကျနော်တို့ ပြန်လိုက်သွားတယ်။ “ပစောက်ကွေ့” မှာလိုက်မီတယ်။ သူတို့ဘက်ကလည်း အပြင်းအထန် ပစ်တယ်။ လက်နက်ကြီးတွေနဲ့လည်း ပစ်တယ်။ ဒါပေမယ့် ကျနော်တို့ ဘက်ဘာမှမဖြစ်ဘူး။”
 အဆိုပါ “ပစောက်ကွေ့” တွင် ပစ်ခတ်တိုက်ခိုက်သော တိုက်ပွဲတွင် အစိုးရတပ်ဗိုလ်ဗှူးတဦး ခြေထောက်ကျိုးသွားပြီး ဒုဗိုလ်မှူးလည်း ဒဏ်ရာပြင်းထန်စွာရရှိ ဒဏ်ရာရရှိကြောင်းသိရသည်။
“ပစောက်ကွေ့” သည် ဖားကန့် နှင့် ၅ မိုင်ကျော်အကွာတွင် ရှိပါသည်။
ထိုနေ့နံနက်တွင် ဆက်တိုက် မြန်မာအစိုးရတပ်ကို လေပင် နှင့် လောင်ခန် (လုံးခင်း) ကြားရှိ လယ်ကွင်း ကားလမ်းဘက်သို့ရောက်ရှိလာသော မြန်မာအစိုးရတပ်ဖွဲ့ကို KIA တပ်ရင်း (၆) မှ တပ်သားများ (remote) မိုင်း ၄ လုံးဖြင့် ဖောက်ခွဲလိုက်ရာ ၃ ဦးပြန်ကျပြီး ၈ ဦးဒဏ်ပြန်ရရှိကြောင်း ရှေ့တန်းမှ ဆိုသည်။
ယနေ့နံနက် မိုးမလင်းမီ ၃ နာရီခန့်တွင်လည်း ကေအိုင်အေ အထူးတပ်ဖွဲ့မှ အဆိုပါအစိုးရတပ်ဖွဲ့ကို နမ္မဖြစ် (Nam Mahpyit) နှင့် မော်ဝမ်း (Maw Wan) ကြားရှိ ဖားအီ (Hpa I) တွင် remote မိုင်း ၁၂ လုံးဖြင့် ဖောက်ခွဲတိုက်ခိုက်လိုက်ရာ အစိုးရတပ်မှ အများအပြားကျဆုံးနိုင်ကြောင်းပြောသည်။
“အဖွဲ့လိုက်တက်လာတာ အဲဒီအချိန် တစ်ခါထဲ မိုင်းတွေ ဆက်တိုက်မြည်သွားတယ်။ သူတို့ဘက်က သေတာ အများကြီးဖြစ်နိုင်တယ်။ ဘယ်နှစ်ယောက်သေတာက မိုးမလင်းခင်ဆိုတော့ အတိအကျမသိသေးဘူး။ ဒီမနက်အဲဒီနေရာ သွေးတွေအများကြီးအိုင်နေတယ်တဲ့။”

ဖားကန့်ဒေသအတွင်း သြဂုတ်လနှင့် စက်တင်ဘာလတွင်း KIA နှင့် တိုက်ပွဲတွင် စာရင်းရထားသမျှ မြန်မာအစိုးရတပ် ကျဆုံးသူ ၂၁၁ ဦး ရှိပြီး ဒဏ်ရာရရှိသူ ၃၆ ဦးဖြစ်ကြောင်း KIA တပ်ရင်း (၆) တပ်ရင်းမှူး ဒု ဗိုလ်မှူးကြီး အင်ခွမ်ဇော်ဒွဲ (Lt-Col. Nhkum Zau Doi) မှ ဒေသခံများအား အတည်ပြုပြောဆိုခဲ့သည်။
ကျောက်စိမ်းတူးဖော်မှုများ ဧရာမစီမံကိန်းတည်ရှိရာ ဖားကန့်ဒေသတွင် အစိုးရစစ်တပ်နှင့် KIA ကြား သြဂုတ်လကုန်ပိုင်းမှစ၍ တိုက်ပွဲများ ပြင်းထန်စွာဖြစ်ပွားခဲ့ပြီး ပြီးခဲ့သည့်လလယ်ပိုင်းတွင်မူ တိုက်ပွဲများ ငြိမ်သက်နေချိန် ယခုလအစောပိုင်းမှပြန်လည်ဖြစ်ပွားနေခြင်းဖြစ်သည်။

http://kachinnews.com/burmese/news/972-kia-%E1%82%8F%E1%80%BD%E1%80%84%E1%80%B9%E1%80%B7-%E1%80%96%E1%80%AC%E1%80%B8%E1%80%80%E1%80%94%E1%80%B9%E1%82%94%E1%80%A1%E1%80%94%E1%80%AE%E1%80%B8-%E1%82%8F%E1%80%BD%E1%80%85%E1%80%B9%E1%80%B1%E1%80%94%E1%80%9B%E1%80%AC-%E1%80%90%E1%80%AD%E1%80%AF%E1%80%80%E1%80%B9%E1%80%95%E1%80%BC%E1%80%B2%E1%80%90%E1%80%BC%E1%80%84%E1%80%B9-%E1%80%BB%E1%80%99%E1%80%94%E1%80%B9%E1%80%99%E1%80%AC%E1%80%85%E1%80%85%E1%80%B9%E1%80%9E%E1%80%AC%E1%80%B8-%E1%81%86-%E1%80%A5%E1%80%AE%E1%80%B8%E1%80%80%E1%80%BA-%E1%81%81%E1%81%85-%E1%80%A5%E1%80%AE%E1%80%B8%E1%80%91%E1%80%AD%E1%80%81%E1%80%AD%E1%80%AF%E1%80%80%E1%80%B9.html

Posted in: ကချင်,ကချင်စစ်ဆင်ရေး,စစ်ဆင်ရေး,သတင်း