KNU ခေါင်းဆောင်များ ပြန်လည်စည်းလုံးရန် ကြိုးပမ်းနေ

ကရင်ပြည်နယ် ဖာပွန်ခရိုင် တွင် ၂၀၀၉ ခု သြဂုတ်လ ၁၂ ရက်က ကျင်းပသော ကရင့် အာဇာနည်နေ့ အခမ်းအနား၌ KNLA တပ်မဟာ ၅ တပ်ဖွဲ့ဝင်များ စစ်ရေးပြနေစဉ် (ဓာတ်ပုံ – စောရန်နိုင် / ဧရာဝတီ)

ကရင် အမျိုးသား အစည်း အရုံး (KNU) အဖွဲ့မှ ခေါင်းဆောင်များ အချင်းချင်း ပြန်လည်စည်းလုံး ညီညွတ်မှုရရှိရန် ယခုရက်ပိုင်း တွင် ကြိုးပမ်း နေကြသည်။
ပြီးခဲ့သည့် လကုန်ပိုင်းက ကရင်ပြည်နယ် ဘားအံမြို့တွင် ဗဟိုအဆင့် ဆက်ဆံရေးရုံး ဖွင့်လှစ်သည့် ကိစ္စနှင့် ပတ်သက်ပြီး KNU ခေါင်းဆောင်များကြား သဘောထား အမြင် ကွဲလွဲမှုများ ပေါ်ပေါက်ခဲ့ခြင်း ဖြစ်သည်။
“အဲဒီ အပေါ်မှာ ဗိုလ်ချုပ် မူတူးစေးဖိုးကတော့ ပြီးခဲ့တာတွေကို သင်ပုန်းချေကြပြီးတော့ ညီညီညာညာ ဆက်လက် ချီတက်သွား ကြ စို့ ဆိုတဲ့ခံယူချက် ရှိတယ်”ဟု KNU ဘားအံ ခရိုင် ဥက္ကဋ္ဌ ဖဒို စောအောင်မော်အေး က ဧရာဝတီသို့ ပြောသည်။
ကရင်အမျိုးသား လွတ်မြောက်ရေး တပ်မတော်(KNLA) စစ်ဦးစီးချုပ် ဗိုလ်ချုပ်ကြီး မူတူးစေးဖိုးနှင့် KNU ဗဟို အဖွဲ့တို့ ပြန်လည် စည်းလုံးညီညွတ်မှု ရရှိရန် ကြိုးပမ်းနေခြင်း ဖြစ်ကြောင်းလည်း ၎င်းက ဆိုသည်။
KNLA တပ်မဟာ ၅ နယ်စပ်တနေရာတွင် မကြာခင်ရက်ပိုင်း၌ KNUအဖွဲ့ ခေါင်းဆောင်များ တွေ့ဆုံရန် စီစဉ်ထားပြီး တပ်မဟာ ၅ ၊ တပ်မဟာ ၃ ခေါင်းဆောင်များ အပါအဝင် ထားဝယ်ခရိုင် ဥက္ကဌ ဖဒို ကွယ်ထူးဝင်း နှင့် ဗိုလ်မှူး တူးတူးလေးတို့လည်း သွားရောက် မည် ဖြစ်ကြောင်း သိရသည်။
“ဘယ်လို မှားသလဲ၊ တဘက်က အမြင်ကတော့ လာဘ်စားမှုတို့၊ ခြစားမှုတို့ စွပ်စွဲထားတယ်”ဟု ဖဒို စောအောင်မော်အေးက ပြော ဆိုသည်။ ထိုစွပ်စွဲချက်များအပေါ် ဗိုလ်ချုပ်ကြီး မူတူးစေးဖိုးတို့ ဘက်က ပြန်လည်ဖြေရှင်းရန် အဆင်သင့်ရှိကြောင်း ပြောဆိုသည် ဟု လည်း သိရသည်။
ကရင်လူထု အခြေပြု အဖွဲ့အစည်း များကလည်း အချင်းချင်း ပြန်လည်စုစည်း ညီညွတ်စေလိုသည်ဟု KNU ခေါင်းဆောင်များ ထံ သွား ရောက် အသိပေးခဲ့ကြောင်း ယမန်နေ့က ကရင်သတင်းစဉ်(KIC) အင်တာနက် စာမျက်နှာတွင် ဖော်ပြထားသည်။
ဘားအံမြို့တွင် ဗဟိုအဆင့် ဆက်ဆံရေးရုံး ဖွင့်လှစ်မည့် ကိစ္စနှင့် ပတ်သက်ပြီး KNU အနေ နှင့် ဆောက်ရွက်ခြင်း မဟုတ်သည့်အပြင် KNLA ဗဟို စစ်ဌာနချုပ်၏ အစီအစဉ်လည်း မဟုတ်၍ KNU ဗဟိုမှ တစုံတရာ မသိရကြောင်း KNU ဗဟို က ထုတ်ပြန်ခဲ့သည်။
ထိုကဲ့သို့ ထုတ်ပြန်ပြီး နောက်ပိုင်း ဗိုလ်ချုပ်ကြီး မူတူးစေးဖိုး အပါအဝင် ဗဟို တရားရေး ဌာန ဖဒို ဒေးဗစ်ထောနှင့် လူမှုဝန်ထမ်းနှင့် ကယ်ဆယ်ရေးဌာန တာဝန်ခံ ပဒိုရောဂျာခင် တို့ကို KNU ဗဟိုက တာဝန်မှ ရပ်စဲခဲ့သည်။
တာဝန်မှ ရပ်စဲလိုက်ကြောင်း ထုတ်ပြန်ခဲ့သည့် အမိန့်စာကိုလည်း KNU ဗဟို အလုပ်အမှုဆောင် ၁၁ ဦးထံ ပေးပို့ထားကြောင်း သိရ သည်။
ဘားအံ KNU ဆက်ဆံရေးရုံး ဖွင့်ပွဲသို့ ပြည်ထောင်စု အဆင့်ငြိမ်းချမ်းရေး ဖော်ဆောင်ရေး လုပ်ငန်းကော်မတီ ဒု ဥက္ကဌ ဦးအောင်မင်း လည်း တက်ရောက်ခဲ့သည်။
ထို ဆက်ဆံရေးရုံး ဖွင့်လှစ်ရန် အတွက် စစ်ဦးစီးချုပ် ဗိုလ်ချုပ်ကြီး မူတူးစေးဖိုးက တပ်မဟာ ခေါင်းဆောင်တချို့ကို ဦးဆောင်၍ KNU ဗဟိုကော်မတီ ၀င်များနှင့် တိုင်ပင် ဆွေးနွေးခြင်း မရှိဘဲ သွားရောက်ခဲ့ကြောင်း KNU ဗဟိုက ပြောဆိုသည်။
KNLA တပ်ဖွဲ့ သည် KNU ၏ ဌာန ၁၄ ခုရှိသည့်အနက် ကရင်အမျိုးသား ကာကွယ်ရေး ဌာန အုပ်ချုပ်မှုနှင့် ဦးဆောင်မှုအောက်တွင် ရှိသော အဖွဲ့တခု ဖြစ်သည်။
KNU ခေါင်းဆောင်များအကြား ယင်းသို့ သဘောထား ကွဲလွဲမှုနှင့် ပတ်သက်ပြီး မကြာမီ ရက်ပိုင်းအတွင်း သတင်းစာ ရှင်းလင်းပွဲ တရပ် ကျင်းပရန် ရှိကြောင်း သိရသည်။

http://burma.irrawaddy.org/archives/22423

Posted in: KNU,ပဋိပက္ခ,သတင်း