မြန်မာအစိုးရတပ် ပစ်ခတ်သော လက်နက်ကြီးကြောင့် ဖားကန့် ပြည်သူ ၃ ဦး ဒဏ်ရာရ

ဆိုင်းဂျာဘွမ် တောင်ပေါ်မှ ကေအိုင်အေ တပ်ရင်း ၆ စစ်သား နှစ်ဦး။ ဓါတ်ပုံ - KNG ကချင်သတင်းဌာန

မြန်မာအစိုးရတပ်သည် ကချင်ပြည်နယ် ကျောက်စိမ်း ထွက်ရှိရာဒေသ ဖားကန့်မြို့တွင် ယမန်နေ့ နိုဝင်ဘာ၂ ရက်နေ့က ၁ နာရီမှ ၃ နာရီချိန်ထိ ဖားကန့်ဗျူဟာကုန်းမှ အမြောက်များဖြင့် ပစ်ခတ်ခဲ့သောကြောင့် အင်ဘားလခ (Nba La Hka) ရွာသို့ ကျရောက်ပေါက်ကွဲခဲ့ပြီး ဒေသခံ ပြည်သူ ၃ ဦး ဒဏ်ရာရရှိခဲ့ကြောင်းသိရသည်။
အင်ဘားလခ ကျေးရွာသို့ အမြောက်ဆံ ၂ ခု ကျရောက်ပေါက်ကွဲပြီး ကချင်အမျိုးသား ညီအစ်ကို ၂ ဦးနှင့် ရှမ်းအမျိုးသား ၁ ဦး တို့ ထိခိုက်ဒဏ်ရာရရှိကာ ဖားကန့်ပြည်သူ့ဆေးရုံတွင် ကုသမှုခံယူနေကြောင်း သိရသည်။
မြန်မာအစိုးရတပ်သည် ဖားကန့်ဗျူဟာကုန်းနှင့် မြောက်ဖြူမှော် ၂ နေရာမှ အမြောက်များဖြင့် ၅ ကြိမ် ထက်မနည်း ပစ်ခတ်ခဲ့ကြောင်း KIA အရာရှိတစ်ဦး KNG ကချင်သတင်းဌာနသို့ ပြောသည်။
“ဗျူဟာကုန်းကနေ ၂ ခု ၂ ခု ပစ်တယ်။ မြောက်ဖြူ ၂ နေရာကပစ်တာ ဗျူဟာကုန်းက လက်နက်ကြီး ၂ ခုနဲ့ ပစ်တယ်။ ၄ ခု စီ နဲ့ပစ်တာ ဟိုဘက်ပစ်လိုက် ဒီဘက်ပစ်လိုက်လုပ်နေတယ်။” ဟု ရှေ့တန်းမှ KIA အရာရှိတဦး KNG ကချင်သတင်းဌာနသို့ပြောသည်။
မြောက်ဖြူတွင်ရှိသော မြန်မာအစိုးရခြေလျင်တပ်ရင်းသည် ဆိုင်းဂျာဘွမ် (Seng Ja Bum)နှင့် လမောင်ကောင် (Lamawng Kawng) တောင် များသို့ပစ်ခတ်ပြီး ဖားကန့်ဗျူဟာကုန်းတွင်ရှိသော အမြောက်တပ်သည် မှော်မော်ဘွမ် (Mawmau Bum) ကုန်းသို့ပစ်ခတ်ရာတွင် မှော်မော်လယန် (Mawmau Layang) အထက်ရှိ အင်ဘားလခ (Nba La Hka) ကျေးရွာသို့ ကျရောက်ပေါက်ခဲ့ခြင်းဖြစ်သည်။
မြန်မာအစိုးရတပ်သည် ကချင်လွတ်မြောက်ရေးတပ်ဖွဲ့ (KIA) များရှိသည့် လမောင်ကောင် (Lamawng Kawng)၊ ဆိုင်းဂျာဘွမ် (Seng Ja Bum)နှင့် မှော်မော်ဘွမ် (Mawmau Bum) ကျေးရွာများသို့ ၂ နေရာမှ အမြောက် ၁၀၅  နှင့်  ၁၂၀ မမ ဖြင့် ပစ်ခတ်ခဲ့ခြင်းဖြစ်ကြောင်းသိရသည်။
အဆိုပါမြန်မာအစိုးရအမြောက်တပ်သည် သြဂုတ် ၂၉ ဝေအောင်ကမ္ဘာကုမ္ပဏီ ပေါက်ကွဲခဲ့ပြီးချိန်မှ ရောက်ရှိလာခြင်းဖြစ်သည်။ အစိုးရတပ်ဖက်မှ အမြောက်ကြီးများဖြင့် ပစ်ခတ်ခဲ့သော်လည်း ကချင်လွတ်မြောက်ရေးတပ်ဖွဲ့ (KIA)မှ ပြန်လည်ပစ်ခတ်ခြင်း မရှိကြောင်းပြောသည်။
မြန်မာအစိုးရတပ်သည် ကချင်လွတ်မြောက်ရေးတပ်ဖွဲ့ (KIA) နယ်မြေ ကျောက်စိမ်းကောင်းထွက်ရှိသည့် ဆိုင်းဂျာဘွမ် (Seng Ja Bum)နှင့် လမောင်ကောင် (Lamawng Kawng) နယ်မြေများကို သိမ်းပိုက်ရန် ရည်ရွယ်ချက်ဖြင့် ပစ်ခတ်ခြင်းဖြစ်နိုင်ကြောင်း ဒေသခံများသုံးသပ်နေပါသည်။

http://kachinnews.com/burmese/news/987-%E1%80%BB%E1%80%99%E1%80%94%E1%80%B9%E1%80%99%E1%80%AC%E1%80%A1%E1%80%85%E1%80%AD%E1%80%AF%E1%80%B8%E1%80%9B%E1%80%90%E1%80%95%E1%80%B9-%E1%80%95%E1%80%85%E1%80%B9%E1%80%81%E1%80%90%E1%80%B9%E1%80%B1%E1%80%9E%E1%80%AC-%E1%80%9C%E1%80%80%E1%80%B9%E1%80%94%E1%80%80%E1%80%B9%E1%81%BE%E1%80%80%E1%80%AE%E1%80%B8%E1%80%B1%E1%81%BE%E1%80%80%E1%80%AC%E1%80%84%E1%80%B9%E1%80%B7-%E1%80%96%E1%80%AC%E1%80%B8%E1%80%80%E1%80%94%E1%80%B9%E1%82%94-%E1%80%BB%E1%80%95%E1%80%8A%E1%80%B9%E1%80%9E%E1%80%B0-%E1%81%83-%E1%80%A5%E1%80%AE%E1%80%B8-%E1%80%92%E1%80%8F%E1%80%B9%E1%80%9B%E1%80%AC%E1%80%9B.html

Posted in: ကချင်,ကချင်စစ်ဆင်ရေး,ကချင်ဒေသ,စစ်ဆင်ရေး,သတင်း