KNU ၏ ၁၅ ကြိမ်မြောက် ကွန်ဂရက် မကြာခင် ပြီးဆုံး

ကရင်အမျိုးသားအစည်းအရုံး (KNU) သည် ကရင့်အမျိုးသား အာဇာနည်ခေါင်းဆောင် စောဘဦးကြီး၏လမ်းစဉ် (၄) ရပ် အတိုင်း အပြောင်းအလဲမရှိ ဆက်လက်ကျင့်သုံးသွားမည်ဟု (၁၅) ကြိမ်မြောက် ကွန်ဂရက်မှ ဆုံးဖြတ်လိုက်ကြောင်း ကွန်ဂရက်ကိုတက် ရောက်နေသည့် ကိုယ်စားလှယ်တဦးက ဆိုပါသည်။
“ စောဘဦးကြီး လမ်းစဉ်နဲ့ဘဲသွားမယ်။ အပြောင်းအလဲမရှိပါဘူး။ အခုဖြစ်နေတာက စည်းလုံးညီညွတ်ရေး ပြသနာတွေ ပါ။ ဒါကိုပြန်လည်စုစည်းပြီး စည်းလုံးညီညွတ်မှု ခိုင်မာအောင် လုပ်တာဖြစ်ပါတယ်။ အခုတော့အဆင်ပြေသွားပါပြီး။ ဗိုလ်ချုပ်ကြီးမူးတူး ဆေးဖိုးကိုယ်တိုင်လည်း ပါတီဥက္ကဌ ဖြစ်နေပြီးဆိုတော့ အခြေအနေက ပုံမှန်ဖြစ်သွား ပါလိမ့်မယ်။” ဆိုပါသည်။
KNU ကွန်ဂရက်သည် ပြီးခဲ့သည့်နိုဝင်ဘာလ ၂၆ ရက်နေ့တွင် ကရင်ပြည်နယ် လှိုင်းဘွဲ့မြို့နယ်ရှိ ကရင်အမျိုးသား လွတ်မြောက်ရေးတပ်မတော် (KNLA) လေးဝါးစခန်း၌ ကျင်းပရာ ကိုယ်စားလှယ်ပေါင်း (၁၇၀) ကျော်ဖြင့် တလနီးပါးကြာ ကျင်းပနေခဲ့ပါသည်။
KNU သည် အစိုးရနှင့် အပစ်အခတ်ရပ်စဲရေးကို ခိုင်မာအောင်ဆက်လက် ဆောင်ရွက်သွားမည်ဖြစ်ကြောင်း၊ တချိန်ထဲ ၌နိုင်ငံရေးအရ တွေ့ဆုံဆွေးနွေးရေးကိုလည်း စည်းလုံးညီညွတ်သော တိုင်းရင်းသားများ ဖက်ဒရယ်ကောင်စီ (UNFC) ၏မူအား အခြေပြု၍ တဖွဲ့ချင်းဆွေးနွေးသွားမည် ဖြစ်သလို စုပေါင်းလည်းဆွေး နွေးသွားမည်ဟု ကွန်ဂရက်က ဆုံးဖြတ် ထားကြောင်း ဆိုပါသည်။
ကရင့်ပြည်သူများအနေဖြင့် အစိုးရနှင့် အပစ်အခတ်ရပ်စဲရေး ပြုလုပ်ရာတွင် ပွင့်လင်းမြင်သာသည့် ခိုင်မာမှုကိုပြသရန် လိုလားလျက်ရှိပါသည်။ နို်င်ငံရေးအရ ဆွေးနွေးရာတွင်လည်း အချိန်ကါလအပိုင်းအခြားများ အတိအကျကိုသတ်မှတ် ပြီး ဆွေးနွေးသွားရန် လိုအပ်သည်ဟု အဆိုပြုနေကြပါသည်။
 

KNU ခေါင်းဆောင်များနှင့် သမ္မတတွေ့ဆုံစဉ်

ဤလမ်းစဉ် ဆုံးဖြတ်များဖြင့် ကွန်ဂရက်သည် အောက်ပါပုဂ္ဂိုလ်များဖြင့် အသစ်ပြန်လည်ရွေးချယ်ခဲ့ကြပါသည်။ KNU ဥက္ကဌအဖြစ် ဗိုလ်ချုပ်ကြီး မူတူးစေးဖိုး၊ ဒုဥက္ကဌ နော်စီဖိုးရာစိန်၊ အထွေထွေအတွင်းရေးမှူးသစ်အဖြစ် ပဒိုကွယ်ထူးဝင်း (တပ်မဟာ ၄ ဒေသထားဝယ်ခရိုင် ဥက္ကဋ္ဌ) ၊ တွဲဖက်အတွင်းရေးမှူး (၁) ပဒို သောသီဘွဲ နှင့် တွဲဖက်အတွင်းရေးမှူး (၂) အဖြစ် ပဒိုမန်းမန်းတို့ကို ရွေးချယ်ခဲ့ကြပါသည်။
KNU အမြဲတမ်း ဗဟိုကော်မတီဝင် ၃၁ ဦးကိုမူ လောလောဆယ်မရွေးချယ်ရသေးဘဲ ရပ်ထားခဲ့သည်ဟု ညီလာခံကို တက်ရောက်နေသော ကိုယ်စားလှယ်ကဆိုပါသည်။ ကွန်ဂရက်ကိုလည်း ခရစ်စမတ်မတိုင်ခင် အဆုံးသတ်မည်ဟုဆိုပါ သည်။
KNU ကို ၁၉၄၇ ခုနှစ် ဖေဖော်ဝါရီလ ၅ ရက်နေ့တွင် စတင်ဖွဲ့စည်းခဲ့ပြီး ပထမဆုံး ဥက္ကဋ္ဌမှာ စောစံဖိုးသင် ဖြစ်ပါသည်။ KNU သည် ၁၉၄၉ ခုနှစ်တွင် လက်နက်ကိုင် လမ်းစဉ်ကို စတင်ကျင့်သုံးခဲ့ပြီး ပြီးခဲ့သည့် ၂၀၁၂ ခုနှစ် ဇန်နဝါရီလ ၁၂ ရက်နေ့တွင် ပြည်နယ်အဆင့် အစိုးရအဖွဲ့နှင့် အပစ်အခတ်ရပ်စဲရေးအတွက် ပထမဆုံးအကြိမ် သဘောတူလက်မှတ် ရေးထိုးခဲ့ကြပါသည်။ ယင်းသဘောတူညီချက်များအတိုင်း ပဲခူးတိုင်းကျောက်ကြီးမြို့နယ်၊ တနင်္သာရီတိုင်း ထားဝယ်မြို့ နယ်၊ ကရင်ပြည်နယ် ကြာအင်းဆိပ်ကြီးမြို့နယ် ဘုရားသုံးဆူမြို့၊ မြဝတီမြို့နယ်နှင့် ဖါးအံမြို့တို့တွင် ဆက်ဆံရေးရုံး ဖွင့်လှစ်ထားပြီး ဖြစ် ပါသည်။

http://www.phophtaw.org/burmese/index.php/news/local-news/2546-knu-.html

Posted in: ကရင်,ကရင်တွေ့ဆုံဆွေးနွေးမှု,တွေ့ဆုံဆွေးနွေးမှု,သတင်း