PNLO ဥက္ကဋ္ဌ အနားယူ၍ လူငယ်များဖြင့် အစားထိုးလို

ချင်းမိုင်(မဇ္စျိမ)။     ။ ပအိုဝ်းအမျိုးသား လွတ်မြောက်ရေး အဖွဲ့ချုပ် PNLO ဥက္ကဋ္ဌ ဦးခွန်ဥက္ကာသည် လက်ရှိ တာဝန်မှ အနားယူရန် ဆန္ဒရှိသည်ဟု နှစ်သစ်ကူး သဝဏ်လွှာတွင် ဖော်ပြထားသည်။

PNLO ၏ ဖွဲ့စည်းပုံအရ သုံးနှစ်တကြိမ် ဥက္ကဋ္ဌ တာဝန်ထမ်းဆောင်သည့် သက်တမ်း ပြည့်ခြင်းနှင့် ဒီမိုကရေစီ နည်းအရ ရွေးချယ်ပြီး လူငယ်လူရွယ်များ ပါဝင်လာနိုင်ရန် ရည်ရွယ်၍ ဥက္ကဋ္ဌ တာဝန်မှ အနားယူရန် စဉ်းစားခြင်း ဖြစ်သည်ဟု ဗိုလ်မှူးကြီး ခွန်ဥက္ကာ က ပြောသည်။

“လူငယ်တွေကို လမ်းဖွင့်ပေးတာ၊ လူငယ်တွေ အရည်အချင်းရှိတဲ့ လူတွေ လုပ်သင့်တယ်။ ရာသက်ပန် ဥက္ကဋ္ဌတွေ မဖြစ်သင့်ဘူး။ အဲဒါကြောင့် ရွေးချယ်စရာလမ်း ပေးတဲ့အနေနဲ့ ကျနော်တို့က အခွင့်အလမ်းတွေ ဖိတ်ခေါ်ထားတာပါ။ လူငယ်တွေ များများပါ လာအောင်ပါ” ဟု မဇ္စျိမကို ပြောသည်။

တော်လှန်ရေးသက်တမ်း ၄၂ နှစ်ရှိ ဗိုလ်မှူးကြီး ခွန်ဥက္ကာမှာ အသက် ၆၇ နှစ်ရှိပြီး “ကျန်းမာရေးကောင်းသည် ဟု မဆိုသာတော့အတွက် လာမည့် ညီလာခံအတွင်း အနားယူခွင့်တောင်းရန် စဉ်းစားထားပါသည်” ဟု ၎င်း၏ သဝဏ်လွှာတွင် ပါရှိသည်။

သူသည် ၁၉၇၂ ခုနှစ် မတ်လ ၁၀ ရက်နေ့မှ စတင်၍ လက်နက်ကိုင် ပအိုဝ်းတော်လှန်ရေးထဲသို့ ရဲဘော်ဘဝဖြင့် စတင် ဝင်ရောက်ခဲ့ခြင်း ဖြစ်သည်။

ယခင် ပအိုဝ်းပြည်သူ့လွတ်မြောက်ရေးအဖွဲ့ PPLO တွင် ဥက္ကဋ္ဌ တာဝန်ကို ၁၀ နှစ်ခန့်ကြာ ထမ်းဆောင်ခဲ့ပြီး PNLO တွင် ၂၀၀၉ ခုနှစ်မှ စတင်၍ ဥက္ကဋ္ဌ တာဝန်ကို ဆက်လက် ထမ်းဆောင်ခဲ့သည်ဟု ဆိုသည်။

ဧပြီလ ၂၈ မှ ၃၀ ရက်နေ့ထိ သုံးရက်ကြာ ထိုင်းနိုင်ငံ၊ မဲဟောင်ဆောင်ဒေသတွင် ကျင်းပမည့် PNLO ညီလာခံတွင် နိုင်ငံရေး၊ စစ်ရေး၊ နိုင်ငံခြားရေးနှင့် မဟာမိတ်ရေးရာ စသည့်ကဏ္ဍများတွင် အတွေ့အကြုံ ရင့်ကျက်ပြည့်ဝသော ခေါင်းဆောင်များ အစားထိုးရရှိပါက အနားယူမည်ဟု ခွန်ဥက္ကာက ဆိုသည်။

ထိုညီလာခံသို့ ပြည်တွင်း ပြည်ပမှ ပအိုဝ့်း နိုင်ငံရေးအင်အားစုများ၊ အမျိုးသမီးနှင့် လူငယ်များ၊ လူထုလူ့ အဖွဲ့အစည်းများမှ ကိုယ်စားလှယ်များ၊ လေ့လာသူများ တက်ရောက်ရန် ဖိတ်ကြားထားပြီး အဖွဲ့၏ ဥက္ကဋ္ဌကို မဲခွဲရွေးချယ်မည်ဟု ဗိုလ်မှူးကြီး ခွန်ဥက္ကာ က ပြောသည်။

“ကျနော်တို့ရဲ့တဖွဲ့ချင်း မသွားတော့ဘဲ ပအိုဝ်းအမျိုးသားတွေရဲ့ ရှေ့ရေး၊ ပြည်တွင်းမှာရှိတဲ့ အင်အားစုတွေနဲ့ တခြား ကျောင်းသားလူငယ်တွေ ဘယ်လို ပူးပေါင်းဆောင်ရွက်မလဲဆိုတာတွေ၊ အထူးသဖြင့် ဒုက္ခသည် စခန်းမှာရှိတဲ့ ပအိုဝ့်းပြည်သူလူထုတွေရဲ့ ပညာရေး၊ ကျန်းမာရေး၊ အခြေခံ စိုက်ပျိုးရေးတွေကို ဂျပန် အကူအညီနဲ့ အကောင်အထည် ဖော်ဖို့ ကျနော်တို့ စီမံကိန်းကို အောင်မြင်အောင် အဓိက စဉ်းစားမှာ
ဖြစ်တယ်” ဟု ပြောသည်။

မြန်မာနိုင်ငံ စစ်ဒဏ်သင့် တိုင်းရင်းသားဒေသများအတွက် ဂျပန်နိုင်ငံမှ ဒုတိယအကြိမ် အကူအညီများကို ရရှိရန် PNLO သည်လည်း ဇူလိုင်လတွင် အဆိုပြုလွှာ ရေးသားတင်သွင်းရန် ရှိသည်။

ဦးခွန်ဥက္ကာ၏ ဥက္ကဋ္ဌ သက်တမ်း သုံးနှစ်ကာလတွင် ရှမ်းပြည်နယ်အစိုးရနှင့် အပစ်အခတ် ရပ်စဲရေး လက်မှတ်ရေးထိုးနိုင်ခဲ့ခြင်း၊ ပြည်ထောင်စုအဆင့် သဘောတူညီချက်များ ရရှိခြင်းကြောင့် မြေပေါ်ပအိုဝ်း အင်အားစုနှင့် ပြန်လည် ပေါင်းစည်းမိခြင်းသည် တိုးတက်မှုတရပ်အဖြစ် ၎င်းက ရှုမြင်ထားသည်။

PNLO အနေဖြင့် မတ်လအတွင်းက ပြည်ထောင်စုအဆင့် ဆွေးနွေးပွဲပြီးနောက် တောင်ကြီးမြို့တွင် ကျင်းပ
သော ၆၄ ကြိမ်မြောက် ပအိုဝ်းအမျိုးသားနေ့ အခမ်းအနားသို့ တက်ရောက်ခွင့် ရခဲ့သဖြင့် ပအိုဝ်းအမျိုးသား အဖွဲ့ချုပ် PNO ဥက္ကဋ္ဌ ခွန်စံလွင်နှင့် နာယက ဖာဖြားတန် အောင်ခမ်းထီတို့နှင့် တွေ့ဆုံခွင့် ရရှိခဲ့ကာ တပ်ပိုင်းဆိုင်ရာကိစ္စရပ် အပါအဝင် ပအိုဝ်းအမျိုးသားတို့၏ အနာဂါတ်အရေးတို့ကို ဆွေးနွေးခဲ့သည် ဟု ဆိုသည်။

၁၉၉၁ ခုနှစ်တွင် နဝတ စစ်အစိုးရခေတ် ဗိုလ်ချုပ်ခင်ညွန့် သြဇာထက်စဉ်က ဦးအောင်ခမ်းထီက အပစ်အခတ် ရပ်စဲရေးကို လက်ခံခဲ့သော်လည်း ခွန်ဥက္ကာက လက်မခံဘဲ လမ်းခွဲခဲ့သည်။ ယခုကဲ့သို့ ပအိုဝ်း နိုင်ငံရေး လှုပ်ရှားမှုအတွင်း ညီညွတ်ရေး တဆင့်တိုး တည်ဆောက်နိုင်ခဲ့ခြင်းအပေါ် ခွန်ဥက္ကာက အားရကျေနပ်မှု ရရှိသည်ဟု ဆိုသည်။

http://www.mizzimaburmese.com/news/inside-burma/11362-pnlo-.html

Posted in: PNLO,သတင်း