ငြိမ်းချမ်းရေးကိစ္စ RCSS ကိုယ်စားလှယ်အဖွဲ့ မူစယ်မြို့ခံများနှင့် တွေ့မည်

အစိုးရနှင့် လက်မှတ်ထိုးထားသော ငြိမ်းချမ်းရေးအပေါ် သျှမ်းလူထု၏ သဘောထား သိရှိနိုင်ရန် သျှမ်းပြည် ပြန်လည်ထူ ထောင်ရေးကောင်စီ (RCSS)  ကိုယ်စားလှယ်အဖွဲ့သည် သျှမ်းပြည် (မြောက်ပိုင်း) မူစယ်မြို့၌ သျှမ်းပါတီများ ၊ ရပ်မိရပ်ဖ များနှင့် ယနေ့မွန်းလွဲ ၁ နာရီတွင် တွေ့ဆုံမည် ဖြစ်ကြောင်း သိရသည် ။

အောက်တိုဘာလ တာချီလိတ်တွေ့ဆုံပွဲက တွေ့ရသော ဗိုလ်မှူးချုပ်ပေါင်ခေး

အဆိုပါကိစ္စ တွေ့ဆုံဆွေးနွေးရန် မူစယ်မြို့ပေါ်ရှိ သျှမ်းနိုင်ငံရေးပါတီများ ၊ သျှမ်းစာပေနှင့် ယဉ်ကျေးမှုအဖွဲ့ဝင်များနှင့် ရပ်မိ ရပ်ဖများအား RCSS ၏ ငြိမ်းချမ်းရေး ကိုယ်စားလှယ်အဖွဲ့ ခေါင်း ဆောင် ဗိုလ်မှူးချုပ်ပေါင်ခေးဦးဆောင်သည့် အဖွဲ့မှ ဖိတ်ကြားထား ကြောင်း သျှမ်းစာပေနှင့် ယဉ်ကျေးမှုအဖွဲ့မှ တာဝန်ရှိသူ တစ်ဦးက သျှမ်းသံတော်ဆင့်သို့ ပြောသည် ။

“ဒီကနေ့ကျနော်တို့ ယဉ်ကျေးမှုရုံးမှာပဲ စဝ်ပေါင်ခေးဦးဆောင်တဲ့ အဖွဲ့က တွေ့ဆုံပွဲလုပ်မယ်။ ရပ်မိရပ်ဖတွေပါမယ် ။ သျှမ်းပါတီ နှစ်ခုပါမယ်။ ယဉ်ကျေးမှုအဖွဲ့ကပါမယ်။ နောက်ရပ်ကွက်အုပ်ချုပ် ရေးမှူးတွေကို လည်းဖိတ်ထားတယ် ။ လောလောဆယ် ဒီလောက်ပဲ ပြောလို့ရသေးတယ် ”  အဆိုပါ တာဝန်ရှိသူက ပြောသည် ။

ငြိမ်းချမ်းရေးကိစ္စ RCSS / SSA နှင့် အစိုးရတို့ နှစ်ဘက် လက်မှတ်ထိုးအပြီး RCSSမှ သျှမ်းပြည်အတွင်းရှိ ပြည်သူလူထုနှင့် တွေ့ဆုံခွင့်ရရန် အစိုးရထံ တင်ပြထားရာ ယခုအခါ  သျှမ်းလူထုနှင့်တွေ့ဆုံခွင့် ရရှိ၍ ၄င်းကိုယ်စားလှယ်အဖွဲ့ သျှမ်းပြည် (မြောက်ပိုင်း)သို့ ထွက်ခွာလာခြင်း ဖြစ်ပြီး သျှမ်းပြည် (မြောက်ပိုင်း) အတွင်းရှိ မြို့နယ်တိုင်းတွင် သျှမ်းလူထုနှင့် တွေ့ဆုံခဲ့ ကြောင်း သိရသည် ။
http://www.burmese.panglong.org/news/85-2008-08-01-03-14-40/3715--rcss---.html

အပြည့်အစုံသို့... »

ငြိမ်းချမ်းရေးအတွက် ယုံကြည်မှုတည်ဆောက်ခြင်းဆွေးနွေးပွဲတွင် သျှမ်းပြည်တပ်မတော် RCSS/SSA ၏မိန့်ခွန်း

ရက်စွဲ ၂၀၁၂ခုနှစ် နို၀င်ဘာလ (၂၅)ရက်

လေးစားအပ်ပါသော ငြိမ်းချမ်းရေးအတွက် ယုံကြည်မှုတည်ဆောက်ခြင်းညီလာခံသို့ တက်ရောက် အားပေးချီးမြင့်ကြသည့် ဒုတိယသမ္မတ ဒေါက်တာစိုင်းမောက်ခမ်း၊ နိုင်ငံတော်သမ္မတရုံးဝန်ကြီး ၀န်ကြီး ဦးအောင်မင်း၊ ၀န်ကြီးဦးစိုးသိန်းနှင့် တာဝန် ရှိလူကြီးမင်းများအားလုံးကို မင်္ဂလာပါလို့ နှုတ်ခွန်းဆက်သအပ်ပါသည်ခင်္ဗျား။

RCSS/SSA ၏မိန့်ခွန်းကိုဖတ်ကြားနေသော ဗိုလ်မှူးချုပ်ပေါင်ခေး

မူလက ကျနု်ပ်ကိုယ်တိုင် ဤညီလာခံကြီးကို တက်ရောက်မည်ဟု ရည်မှန်းထားသော်လည်း ကျနု်ပ်၏ ကျန်းမာရေးအခြေ အနေကြောင့် မတက်ရောက်နိုင်ခဲ့သည်ကို ခွင့်လွှတ်ပေးစေလိုပါ သည်။

ပြည်ထောင်စုကြီး ဖွံ့ဖြိုးတိုးတက်ရေး၊ တိုင်းရင်းသားများ ငြိမ်းချမ်းစွာအတူယှဉ်တွဲနေထိုင်ရေးအတွက် ပြည်ထောင်စု ပြုပြင်ပြောင်းလဲခြင်းနှင့် ပတ်သက်၍ မိမိတို့ သျှမ်းပြည်ပြန်လည်ထူထောင်ရေးကောင်စီ (RCSS)၏ အမြင်သဘော ထားများကို အချက် (၆) ချက်ဖြင့် တင်ပြလိုပါသည်။

၁။ ပြည်ထောင်စုကြီးကို (၈) ပြည်နယ်သို့မဟုတ် ပြည်နယ်နှင့်တိုင်း (၁၄)ခုပါ ပြည်ထောင်စုစစ်စစ်ဖြင့် တည်ဆောက်ပါက တိုင်းရင်းသားများအားလုံး လက်ခံမည်ဖြစ်ပါသည်။ မိမိတို့  RCSS  သည်လည်း ဖက်ဒရယ်မူကို လက်ခံပါသည်။ သို့သော် တိုင်းနှင့်ပြည်နယ်များကို ကိုယ်ပိုင်ပြဌာန်းခွင့်နှင့် ဒီမိုကရေစီနည်းကျသော လွတ်လပ်ခွင့်များအား ပေးအပ်ရပါမည်။ ပြည် နယ်နှင့်တိုင်းများ၏ ၀န်ကြီးချုပ် များကို ဗဟိုအစိုးရမှ ခန့်အပ်ခြင်းမျိုးမဟုတ်ဘဲ ပြည်သူလူထုမှ တိုက်ရိုက်ရွေးကောက် တင် မြှောက်ရပါမည်။ အုပ်ချုပ်ရေး၊ တရားစီရင်ရေး၊ ဥပဒေပြုရေးတွင်လည်း အာဏာများကို တိတိကျကျ ခွဲခြားပြဌာန်း ပေး ရပါမည်။ ပြည်နယ်နှင့်တိုင်းအစိုးရများမှ ဗဟိုအစိုးရ၏အာဏာများကို သတ်မှတ်ပေးရပါမည်၊ အာဏာမည်မျှပေးမည်ကို ပြည်သူများက အဆုံးအဖြတ်ပေးရပါမည်။ နိုင်ငံ တော်သမ္မတကိုလည်း ပြည်သူများမှ တိုက်ရိုက်ရွေးကောက် တင်မြှောက် ရပါမည်။

၂။ ၂၀၀၈ အခြေခံဥပဒေ ပြင်ဆင်ရေးအတွက် တိုင်းရင်းသား လက်နက်ကိုင်အဖွဲ့အစည်းများနှင့် လူပုဂ္ဂိုလ် များကို အခွင့် အရေးများ ပေးသင့်ပါသည်။ ခုနှစ်ဆယ့်ငါးရာခိုင်နှုန်းနှင့် အခြေခံဥပဒေပြင်ဆင်ရေးကို လမ်းပိတ်မထားသင့်ပါ။ အားလုံး လက်ခံနိုင်သည့် အခြေခံဥပဒေဖြစ်မှသာ ဒီမိုကရေစီနိုင်ငံအသွင် ပေါ်မည်ဖြစ်ပါသည်။ အတင်းအကြပ် ဒီမိုကရေစီကို မလို လားပါ။ ဖွဲ့စည်းပုံ အခြေခံဥပဒေကို ပြင်ဆင် ရာ၌ လက်နက်ကိုင်တိုင်းရင်းသား အစုအဖွဲ့များအား ပါလီမန်ပြင်ပတွင် လွတ် လပ်စွာပြင်ဆင်ခွင့် ပေးရန် လိုအပ်ပါသည်။

၃။ တိုင်းရင်းသားလက်နက်ကိုင်တပ်များကို သက်ဆိုင်ရာပြည်နယ်အလိုက် လုံခြုံရေးတပ်ဖွဲ့အဖြစ်ထားရှိ ရမည်ဖြစ်ပါသည်။ နိုင်ငံခြားမှ တိုက်ခိုက်လာပါက စုပေါင်းကာကွယ်နိုင်ရေးအတွက် တိုင်းရင်းသား တပ်များအား ပြည်ထောင်စုတပ်မတော်တွင် ပါ၀င်ခွင့်ပေးရပါမည်။ လက်ရှိတပ်မတော်ကို အားလုံး လက်ခံနိုင်သည့် တပ်မတော်ဖြစ်အောင် ပြုပြင်ရပါမည်။ တပ်မတော် သည် နိုင်ငံရေးနှင့် ဖွံ့ဖြိုးရေး လုပ်ငန်းများတွင် ၀င်မစွက်ဖက်ဘဲ နိုင်ငံတော် ကာကွယ်ရေးနှင့် နိုင်ငံတော်တည်တံ့ခိုင်မြဲ ရေးကိုသာ ဆောင်ရွက်ရပါမည်။

၄။ သဘာဝအရင်းအမြစ်ဖြစ်သည့် သယံဇာတများကို သက်ဆိုင်ရာ ပြည်နယ်နှင့်တိုင်းအစိုးရများအလိုက် လွတ်လပ်စွာ စီမံခန့်ခွဲပိုင်ခွင့်၊ ကုန်သွယ်ပိုင်ခွင့်နှင့် အကျိုးခံစားခွင့် အပြည့်အဝရှိစေရမည်။ ပြည်နယ် နှင့်တိုင်းများမှ အခွန်အကောက် များအပေါ်တွင် ပြည်ထောင်စုအစိုးရရံပုံငွေသို့ အချိုးကျ ညှိနှိုင်း၍ ထည့်ဝင်ရမည်။

၅။ သက်ဆိုင်ရာပြည်နယ်နှင့်တိုင်းများတွင် မှီတင်းနေထိုင်ကြသည့် တိုင်းရင်းသားမျိုးနွယ်စုများ၏ ဘာသာ စကား၊ စာပေ၊ ယဉ်ကျေးမှု၊ ရိုးရာဓလေ့များနှင့် ပိုင်ဆိုင်မှုများကို ဥပဒေပြဌာန်းပြီး ကာကွယ်စောင့်ရှောက် ပေးရပါမည်။

၆။ နိုင်ငံရေးဆွေးနွေးပွဲကို အမြန်ဆုံးကျင်းပပေးရပါမည်။ နိုင်ငံရေးဆွေးနွေးရာတွင် လုံခြုံမှု၊ လွတ်လပ်စွာ ပြောဆိုမှု၊ တန်း တူမှု၊ တဦးအပေါ်တဦးယုံကြည်စိတ်ချမှုနှင့် အသိအမှတ်ပြုမှု စသည့်အချက်များ ရှိရပါမည်။ အထင်အမြင်မှားခြင်း၊ အထက် စီးယူခြင်းများကို ရှောင်ကြဉ်ရပါမည်။ နိုင်ငံရေးဆွေးနွေးပွဲ အောင်မြင်သည်အထိ နှစ်ဦးနှစ်ဘက် အပစ်အခတ် ရပ်စဲထားရ ပါမည်။ တိုက်ပွဲများ ဖြစ်ပွါးခြင်းကို လုံးဝရှောင်ကြဉ်ရပါမည်။

နိဂုံးချုပ်အနေနှင့် စိတ်သဘောထားကျယ်ပြန့်လှသည့် နိုင်ငံတော်သမ္မတကြီး ဦးသိန်းစိန်နှင့် ညီလာခံသို့ တက်ရောက် လာကြသည့် လူကြီးမင်းများအားလုံးကို ကျေးဇူးဥပကာရ အထူးတင်အပ်ပါသည်။ အားလုံးတွေ့ဆုံဆွေးနွေးပြီး နိုင်ငံတော် ဖွံ့ဖြိုးစည်ပင်ဝပြောတိုးတက်ရေးအတွက် အတူတကွ ပူးပေါင်းဆောင် ရွက်နိုင်ပါစေဟု ဆုမွန်တောင်းအပ်ပါသည်။

ချစ်ကြည်လေးစားစွာဖြင့်
ဒုတိယဗိုလ်ချုပ်ကြီး ယွက်စစ်
ဥက္ကဌ
သျှမ်းပြည်ပြန်လည်ထူထောင်ရေးကောင်စီ

အပြည့်အစုံသို့... »

အပစ်အခတ်ရပ်စဲရေး သဘောတူညီမှု မလိုက်နာလျှင် ငြိမ်းချမ်းရေး ပျက်နိုင်

ရှမ်းခေါင်းဆောင်များနှင့် ဦးအောင်မင်းအဖွဲ့ ဓာတ်ပုံ တွဲရိုက်ကြစဉ် (ဓာတ်ပုံ – မေငယ်)

အစိုးရ တပ်မတော်အနေဖြင့် အပစ်အခတ်ရပ်စဲရေး သဘောတူညီမှုများကို လိုက်နာခြင်းမရှိပါက ငြိမ်းချမ်းရေး ပျက်ပြယ်သွားနိုင် သည်ဟု ရှမ်းပြည် ပြန်လည်ထူထောင်ရေး ကောင်စီ/ရှမ်းပြည် တပ်မတော် (RCSS/SSA) က ယမန်နေ့တွင် ပြောဆိုလိုက်သည်။
အစိုးရနှင့် ရှမ်းပြည် တပ်မတော် တောင်ပိုင်း(SSA-S) တို့ အပစ်အခတ်ရပ်စဲရေး လက်မှတ်ရေးထိုးထားသည်မှာ တနှစ်ပြည့် နီးပါးရှိ ချိ န် အထိ တိုက်ပွဲပေါင်း ၅၀ကျော် ဖြစ်ပွားခဲ့ကြောင်းလည်း RCSS/SSA ပြည်ထောင်စု အဆင့် ငြိမ်းချမ်းရေး ဖော်ဆောင်ရေး ကော် မတီမှ ဦးစဝ်ပေါင်ခေး က ပြောကြားလိုက်ခြင်း ဖြစ်သည်။
ရန်ကုန်မြို့ တော်ဝင် နှင်းဆီခန်းမ၌ နိုဝင်ဘာ ၂၆ ရက်က ကျင်းပသည့် ငြိမ်းချမ်းရေး အတွက် ယုံကြည်မှု တည်ဆောက်ခြင်း ဆွေးနွေးပွဲ တွင် ထိုသို့ ပြောကြားခြင်း ဖြစ်သည်။
“ငြိမ်းချမ်းရေးကို တည်ဆောက်နေတဲ့ အချိန်မှာ နှစ်ဘက်က အပြန်အလှန် သဘောတူညီမှုကို မလိုက်နာရင် မလိုလားအပ်တဲ့ နှစ် ဘက် တိုက်ပွဲတွေဖြစ်နိုင်တယ်။ ပြီးတော့ ယုံကြည်မှုတည်ဆောက်တဲ့နေရာမှာလည်း အခက်အခဲကြုံတွေ့နိုင်တယ်။ ငြိမ်းချမ်းရေး ကိုလည်း ပျက်ပြယ်နိုင်တယ်”ဟု ဦးစဝ်ပေါင်ခေးက ပြောဆိုသည်။
ပြည်သူလူထုနှင့် အဖွဲ့အစည်းများအသီးသီး လွတ်လပ်စွာအကြံပြုဆွေးနွေးနိုင်မှသာလျှင် ဒီမိုကရေစီနည်းကျကာ ထာဝရ တည်တံ့ ခိုင်မြဲသည့် ငြိမ်းချမ်းရေး တည်ဆောက်နိုင်ရန် အဖြေများရရှိနိုင်မည်ဖြစ်ပြီး ငြိမ်းချမ်းရေး တည်ဆောက်ရာတွင်လည်း ပိုမို အဓိပ္ပာယ် ရှိလိမ့်မည် ဖြစ်ကြောင်းလည်း ၎င်းက ထည့်သွင်း ပြောဆိုသွားသည်။
ရှမ်းအမျိုးသားဒီမိုကရေစီ အဖွဲ့ချုပ် (SNLD) ဥက္ကဌ ဦးခွန်ထွန်းဦးကလည်း“ငြိမ်းချမ်းရေး လိုလားတဲ့ ရှမ်းပြည်သူတွေစုဝေးပြီး ကျင်း ပတဲ့ ပွဲဖြစ်သွားတဲ့အတွက် ၀မ်းသာပါတယ်။ လက်ရှိ မြန်မာနိုင်ငံ ကြံုတွေ့နေရတဲ့ တိုင်းရင်းသားပြဿနာ အဓိကဖြစ်နေတယ်။ ပြဿနာတွေပြေလည်ဖို့ ဆိုရင် စစ်မှန်တဲ့ ဖက်ဒရယ် ပြည်ထောင်စု တည်ထောင်ဖို့ တန်းတူညီမျှဖို့ စစ်မှန်တဲ့ပြည်ထောင်စုဖြစ်ဖို့ လို အပ်တယ်။ အချင်းချင်း ယုံကြည်မှုရှိဖို့လည်း လိုအပ်တဲ့အတွက် ဒီအခမ်းအနားကိုပြုလုပ်ရတာပါ”ဟု ပြောကြားသည်။
ယခု ကျင်းပသည့် ညီလာခံမှ စ၍ ရှမ်းပြည်နယ် တခုလုံး ငြိမ်းချမ်းရေးရရှိစေရန် နှင့် ပြည်ထောင်စု တဝန်း ငြိမ်းချမ်းရေးအတွက် ညှိနှိုင်း ဆွေးနွေးတို်င်ပင်ကြရမည်ဟုလည်း ဆိုသည်။
ယင်း ညီလာခံသို့ တက်ရောက်လာသည့် ပြည်ထောင်စု ငြိမ်းချမ်းရေး ကော်မတီ ဒုတိယ ဥက္ကဌ ဦးအောင်မင်း ကလည်း သမ္မတ ဦးသိန်းစိန် ပြောသည့်အတိုင်း အခြေခံမူဖြစ်သည့် ပြည်တွင်းငြိမ်းချမ်းရေး မရှိဘဲ ဒီမိုကရေစီစနစ်ကို ထူထောင်နိုင်မည် မဟုတ်ကြောင်း၊ ဒီမိုကရေစီမရှိဘဲ ပြည်တွင်းငြိမ်းချမ်းရေးကို မဖော်ဆောာင်နိုင်ကြောင်း ပြောကြားသွားသည်။
“ငြိမ်းချမ်းရေးအတွက် ယုံကြည်မှုအောက်မှာပဲဆွေးနွေး ယုံကြည်မှုကို တည်ဆောက်မယ်ဆိုရင် သံသယ မာန်မာန တွေချပြီး တော့ ဆွေးနွေးဖို့ လိုအပ်ပါတယ်။ ရှမ်းတိုင်းရင်းသား အချင်းချင်းယုံကြည်မှု တည်ဆောက်နိုင်မှ ကျန်တိုင်းရင်းသားတွေလည်း တည် ဆောက် မယ်။ ပြီးတော့ ဒုတိယ အဆင့်ကိုတက်ရောက်နိုင်မယ်”ဟု ရှမ်းတိုင်းရင်းသားများ ဒီမိုကရေစီပါတီ(SNDP) တွဲဖက်အတွင်းရေးမှူး ဦးစိုင်မောင်တင် ကလည်း ပြောဆိုသည်။
အဆိုပါဆွေးနွေးပွဲတွင် အစိုးရနှင့် လက်နက်ကိုင် အဖွဲ့အစည်းများ၊ နိုင်ငံရေးပါတီများအကြား ယုံကြည်မှု တည်ဆောက်ရေး၊ စီးပွားရေး၊ နိုင်ငံရေး ရှုထောင့်အမြင်နှင့် မူးယစ်ဆေးဝါးတိုက်ဖျက်ရေး၊ ကျန်းမာရေး၊ လူထုအခြေပြု အဖွဲ့များ၏ ငြိမ်းချမ်းရေး ဖော်ဆောင် ရာတွင် ပါဝင်နိုင်မည့် နည်းလမ်းများ စသည်တို့ကို အဓိကထား ဆွေးနွေးသွားသည်။
ထို ညီလာခံသို့ ဒုတိယ သမ္မတ ဒေါက်တာ စိုင်းမောက်ခမ်း တက်ရောက်လာခြင်း မရှိကြောင်း၊ သမ္မတရုံးဝန်ကြီးများ ဖြစ်သည့် ဦးအောင်မင်း၊ ဦးစိုးသိန်း၊ အစိုးရနှင့် ငြိမ်းချမ်းရေး သဘောတူညီထားသည့် ရှမ်းလက်နက်ကိုင် ၄ ဖွဲ့၊ ရှမ်းနိုင်ငံရေးပါတီ ၃ ခု၊
ရှမ်း စာပေနှင့် ယဉ်ကျေးမှုကော်မတီ၊ ရှမ်းလူမှုအဖွဲ့အစည်း စုစုပေါင်း ၁၂ ဖွဲ့နှင့် ပြည်ပ ပညာရှင်များနှင့် ကိုယ်စားလှယ်များ တက်ရောက် လာကြောင်း သိရသည်။
၂၀၁၂ ခုနှစ် မေလ ၁၉ ရက်နေ့တွင် အစိုးရနှင့် SSA-S တို့ အပစ်အခတ် ရပ်စဲရေးနှင့် ငြိမ်းချမ်းရေး ဆွေးနွေးရေး သဘောတူညီချက် ၁၂ ချက် လက်မှတ်ရေးထိုးခဲ့ကြပြီးနောက် ရက်ပိုင်းအတွင်း တိုက်ပွဲများ ပြန်လည် ဖြစ်ပွားမှုအတွက် အစိုးရ စစ်တပ်မှ ဒုတိယ တပ်မတော် ကာကွယ်ရေး ဦးစီးချုပ် ဗိုလ်ချုပ်ကြီးစိုးဝင်းက SSA-S သို့ တရားဝင် တောင်းပန်ခဲ့သည်။

http://burma.irrawaddy.org/archives/26560

အပြည့်အစုံသို့... »

RCSS/SSA နှင့် မြန်မာအစိုးရ မူးယစ်ဆေးဝါးကိစ္စ ထပ်မံဆွေးနွေးမည်

ယခုလအတွင်း သျှမ်းပြည်တပ်မတော် နှင့် မြန်မာအစိုးရကိုယ်စားလှယ်တို့ ငြိမ်းချမ်းရေးဖော်ဆောင် ရေးလုပ်ငန်းကော် မတီတို့ တတိယအကြိမ် ပြည်ထောင်စုအဆင့်ဆွေးနွေးပွဲ၌ မူးယစ်ဆေးဝါးတိုက်ဖျက်ရေးအတွက် အဓိကထား ဆွေးနွေးသွား မည်ဟု RCSS သတင်းရပ်ကွက်ကဆိုပါသည်။

သျှမ်းပြည်တပ်မတော် နှင့် မြန်မာအစိုးရကိုယ်စားလှယ်တို့ ယခုနှစ်မေလ ကျိုင်းတုံ၌တွေ့ဆုံဆွေးနွေးစဉ်

“ ဘိန်းအစားထိုးသီးနှံစိုက်ပျိုးရေးစီမံကိန်း အကြောင်းပါမယ်။ ဆေးဖြတ်ရုံကိစ္စ၊ မူးယစ်ဆေးဝါး ရောင်း ဝယ်မှု တားဆီးနှိမ် နင်းရေးကိစ္စ၊ မူးယစ်ဆေးဝါးနဲ့ပတ်သက်ပြီး အသိပညာ ပေးရေးကိစ္စ၊ မူးယစ်တိုက် ဖျက်ရေး အတွက်ဆက်ဆံရေးရုံးဖွင့်ဖို့ စတာတွေပါဝင်တယ်” ဟု အမည်မဖော်လိုသည့် RCSS ၏ ငြိမ်း ချမ်းရေး ဖော်ဆောင်ရေးကော်မတီဝင်တဦးကပြောသည်။

ယခုအကြိမ်တွင်မူ မူးယစ်ဆေးဝါးပပျောက်ရေးစီမံကိန်းအတွက် ဘိန်းအစားထိုးသီးနှံ ရှေ့ပြေးစီမံကိန်း (Pilot Project) အဓိက ဆွေးမည်ဖြစ်သည့်အတွက် UNODC ကိုယ်စားလှယ်လည်း ပါဝင်တက်ရောက်မည်ဖြစ်ကြောင်း ပြောပါသည်။ 

မူးယစ်ဆေးဝါးတိုက်ဖျက်ရေးလုပ်ငန်းအား သျှမ်းပြည်တောင်ပိုင်း ၃ မြို့နယ် အတွင်း အကောင်အထည်ဖော်ရန်သွား မည်ဟုဆို၏။ လက်တွေ့အောင်မြင်ပါက ထပ်မံတိုးချဲ့သွားမည်ဟုလည်း ပြောပါသည်။

“မူးယစ်တိုက်ဖျက်ရေးစီမံကိန်းအပြင် ထပ်ပြီးဆွေးနွေးရမှာက အများကြီးကျန်သေးတယ်။ အစိုးရနဲ့ ကျနော်တို့ ကြားမှာ လည်း နားလည်မှု တည်ဆောက်ဖို့ ယုံကြည်မှုတည်ဆောက်ဖို့ အချက်ဟာ အဓိကဆွေးနွေးရမယ့်အထဲမှာပါဝင်နေတယ်။ ကျနော်တို့ဟာ အစိုးရကိုစင်ပြိုင်ဖို့မဟုတ်ပါဘူး။ အစိုးရကို ပံ့ပိုးဖို့ဘဲ။ ဒါကိုနားလည် စေချင်တယ်။ ကျနော်တို့ထိန်းချုပ် နယ်မြေတွေထဲမှာ လှုပ်ရှားသွားလာဖို့အတွက် တိုက်ပွဲတွေ မဖြစ်အောင် ၂ ဦး ၂ ဖက် ထိန်းထိန်းသိမ်းသိမ်းနေသွား နိုင် အောင်စတာတွေလဲပါတယ်။” ဟု ဥက္ကဌ ဒုဗိုလ်ချုပ်ကြီးယွက်စစ််က ဆိုပါသည်။

ယခုလက်ရှိ RCSS ၏ ငြိမ်းချမ်းရေးလုပ်ငန်းစဉ်အပေါ်  အစိုးရသာမက ပြည်သူလူထုလည်း နားမလည်သေးကြောင်း၊ တခြား အဖွဲ့အစည်းတွေမဆိုထားနှင့် မိမိတပ်တွင်းမှာပင် နားလည်မှု လွှဲမှားမှု ရှိနေသေးကြောင်း အဆိုပါကော်မတီဝင်က ပြောသည်။

နေရာနှင့် ရက်အတိအကျကိုထုတ်ဖော်ပြောကြားခြင်းမရှိသေးသော်လည်း  သျှမ်းပြည် တပ် မတော် RCSS/SSA မှ ငြိမ်းချမ်းရေးကိုယ်စားလှယ် ဗိုလ်မှူးချုပ်ပေါင်ခေး ဦးဆောင်သည့်အဖွဲ့၊ ဗိုလ်မှူးကြီးစိုင်းဟန်နှင့် စဝ်အွတ်ကျေးဆီး တို့ပါဝင်မည်ဖြစ်ကြောင်း၊ မြန်မာအစိုးရဘက်ကမူငြိမ်းချမ်းရေးဖော်ဆောင် ရေးလုပ်ငန်းကော်မတီဒုဥက္ကဌ ၂ ဦးအောင်မင်း၊ ပြည်ထဲရေးဝန်ကြီးဌာန ဒုဝန်ကြီး ဗိုလ်မှူးချုပ်ကျော်ဇံမြင့် နှင့် မြန်မာနိုင်ငံရဲတပ်ဖွဲ့ ရဲချုပ် ဗိုလ်မှူးချုပ် ကျော်ကျော်ထွန်း တို့ ပါဝင်မည်ဖြစ်ကြောင်း ကြားသိထားသည်ဟုဆိုပါသည်။

ယခုလ ၅ ရက်နေ့ ပြည်ထဲရေးဝန်ကြီး ဒုဗိုလ်ချုပ်ကြီးကိုကိုက မြန်မာနိုင်ငံ မူးယစ်ဆေးဝါးပပျောက်ရေးစီမံကိန်းကို ၂၀၁၄ မှ ၂၀၁၉ သို့ ထပ်မံပြောင်းရွှေ့လိုက်ကြောင်း ကြေငြာပြီးနောက်ပိုင်း ယခုကဲ့သို့ RCSS/SSA နှင့်မြန်မာအစိုးရတို့ထပ်မံတွေ့ဆုံ ဆွေးနွေးရန်ဖြစ်ပေါ်လာခြင်းဖြစ်သည်။

ယခုနှစ် မေလ ၁၉ ရက် ကျိုင်းတုံမြို့၌ သျှမ်းပြည်တပ်မတော်  RCSS/SSA နှင့် မြန်မာအစိုးရတို့ ပြည်ထောင်စုအဆင့် ဒုတိယအကြိမ်တွေ့ဆုံဆွေးနွေးကာ လက်မှတ်ရေးထိုးခဲ့ကြသော သဘောတူညီချက် ၁၂ ချက်တွင် ပထမအချက်ဖြစ်သော RCSS/SSA ၏မူးယစ်ဆေးဝါးပပျောက်ရေး ၆ နှစ်စီမံကိန်းကို “ ဝမ်းမြောက်ဝမ်းသာကြိုဆိုကြောင်း” နှင့် “ နိုင်ငံတော်အကြီးအကဲ” ထံပူးပေါင်းဆောင်ရွက်ရေးအတွက် တင်ပြသွားမည်ဟု ပါရှိပါသည်။
http://www.burmese.panglong.org/news/85-2008-08-01-03-14-40/3588-rcssssa----.html

အပြည့်အစုံသို့... »