မြန်မာပြည် မြောက်ပိုင်း စစ်ရေး အခြေအနေ ပိုမိုပြင်းထန် တင်းမာလာ

စံခလပူရီ (မဇ္စျိမ) ။       ။ မြန်မာနိုင်ငံတောင်ပိုင်းရှိ အပစ်ရပ် အဖွဲ့များ အစိုးရနှင့် ငြိမ်းချမ်းရေး တွေ့ဆုံ ဆွေးနွေးရန် အစီအစဉ်များ ချမှတ်ကာ ငြိမ်းချမ်းရေး ဖော်ဆောင်နေကြ သော်လည်း မြောက်ပိုင်း ဒေသရှိ စစ်ရေး အခြေအနေမှာ စိုးရိမ်စရာ အနေအထား၌ ရှိနေဆဲ ဖြစ်သည်။

ကချင်လွတ်လပ်ရေးအဖွဲ့ KIO တပ်မဟာ (၁) (ပန်းဝါ) ဌာနချုပ် စခန်းသို့ တနင်္လာနေ့ နံနက်ပိုင်း၌ အစိုးရတပ်မှ စခန်းသိမ်း တိုက်ပွဲ ဆင်နွှဲခဲ့သော်လည်း မသိမ်းပိုက် နိုင်ခဲ့ဘဲ ပြန်လည် ဆုတ်ခွာသွားကြသည်ဟု KIO အတွင်းရေးမှူး ဦးလနန် က ပြောသည်။

“ဒီနေ့ တိုက်ပွဲကတော့ ပြင်းထန်တယ်လို့ ပြောရမယ် ၂ နာရီလောက် အပြင်းအထန် တိုက်ပွဲ ဖြစ်တယ်။ အစိုးရတပ်က အလောင်း နှစ်လောင်း ကျနော်တို့ ရရှိတယ်။ အထိအခိုက် တော်တော် များတယ်။ သူတို့ ပြန်ဆုတ် သွားတယ်။ စခန်းကို
တော့ မသိမ်းနိုင်ခဲ့ပါဘူး” ဟု မဇ္စျိမကို ပြောသည်။

အစိုးရတပ်မှ ခလရ (၇၇) နှင့် ခလရ (၄၇) တပ်ရင်းများမှ အင်အား ၄ဝဝ ဝန်းကျင်ခန့်ဖြင့် စခန်းသိမ်း တိုက်ပွဲ ဆင်နွှဲခဲ့သည်ဟု ၎င်းက ဆိုသည်။

ပန်းဝါဒေသမှာ ကချင်ပြည်နယ် အရှေ့မြောက်ပိုင်းရှိ ချီဖွေမြို့နယ်၌ တည်ရှိပြီး တရုတ်နိုင်ငံ တန်ချွန်း နယ်စပ်ဒေသ နယ်ခြားမှတ်တိုင် (၆) အနီးတွင် တည်ရှိသည်။ ဤဒေသကို သြဂုတ်လ ၁၅ ရက်နေ့ ကတည်းက အစိုးရဘက်မှ ထိုးစစ် ဆင်လာခဲ့ရာ ယနေ့တွင် ဌာနချုပ်ကို ဝင်ရောက်၍ စခန်းသိမ်းတိုက်ပွဲ ဆင်နွှဲခဲ့ခြင်း ဖြစ်ကြောင်း သိရှိရသည်။

ဤဒေသသည် ပြည်ထောင်စု ငြိမ်းချမ်းရေး ဖော်ဆောင်မှု ကော်မီတီ ဒု-ဥက္ကဋ္ဌ ဦးအောင်မင်းနှင့် KIO တို့ အလွတ် သဘော ဆွေးနွေးစဉ် စစ်ပြေးဒုက္ခသည်များ ထားရှိနိုင်ရန်အတွက် စစ်မဲ့ဇုန် အဖြစ် ထားရှိရန် KIO မှ အဆိုပြုထားခဲ့
သော်လည်း အစိုးရမှ အကြောင်းပြန်ကြားခြင်း တစုံတရာ မရှိခဲ့ပေ။

အစိုးရမှ KIO အား စစ်ဆင်နေသည့် ထိုးစစ်အား “ရွှေပြည်သာ” စစ်ဆင်ရေးဟု နာမည် ပေးထားကာ ၎င်းစစ်ဆင်ရေး အတွက် အစိုးရ မြောက်ပိုင်းတိုင်း စစ်ဌာနချုပ်မှ တပ်ရင်း ၄၆ ရင်း၊ အရှေ့မြောက်တိုင်း စစ်ဌာနချုပ်မှ တပ်ရင်း ၄၂ ရင်း၊ တပ်မ (၈၈) မှ ရှစ်ရင်း၊ တပ်မ (၉၉) မှ ခြောက်ရင်း၊ တပ်မ (၄၄) မှ လေးရင်း၊ အမြောက်တပ်များ၊ ဆက်သွယ်ရေး တပ်များ၊ ထောက်ပို့တပ်များ ဆေးတပ်များနှင့် လေကြောင်း ပစ်ကူ တပ်များ ပါဝင်ပြီး စုစုပေါင်း အင်အားမှာ တသောင်း
ကျော်ခန့် ရှိကြောင်း KIA အတွင်းရေးမှူး ဦးလနန်က မဇ္စျိမကို ပြောသည်။

ထို့အပြင် တပ်မ (၆၆)၊ တပ်မ (၇၇) နှင့် တပ်မ (၁ဝ၁) တပ်များ ကိုလည်း အရန်တပ်များ အဖြစ် မြစ်ကြီးနားနှင့် ဗန်းမော် မြို့များတွင် နေရာချထားလျက် ရှိသည်။

ဤတပ်များဖြင့် လိုင်ဇာ KIO ဗဟိုဝန်းကျင်ကို ဝိုင်းထားကာ KIA တပ်၏ နေရာ ငါးနေရာဖြစ်သည့် ကချင်ပြည်နယ် အရှေ့မြောက်ပိုင်းမှ KIA တပ်ရင်း (၃) နယ်မြေနှင့် တပ်မဟာ (၁) နယ်မြေများ (ပန်းဝါဒေသ)၊ KIA တပ်မဟာ(၃) ဌာနချုပ် နယ်မြေ (လွယ်ဂျယ် - မိုင်ဂျာယန် ဒေသ)၊ KIAဗဟိုယာယီဌာနချုပ် လိုင်ဇာဒေသ၊ KIA တပ်မဟာ (၅) ဌာနချုပ်နယ်မြေ တာပိန်-ဘွမ်ဆင်ဒေသနှင့် KIA တပ်မဟာ (၄) တပ်ရင်း (၈) နယ်မြေရှမ်းပြည် မြောက်ပိုင်းဒေသ တို့အား ချိန်ရွယ် နေရာယူထားသည်ဟု KIO မှ ပြောသည်။

အလားတူ SSPP ၏ ဝမ်ဟိုင်း ဌာနချုပ် အားလည်း အစိုးရတပ်မှ အင်အား ၁,ဝဝဝ ခန့်က အင်အားဖြည့်၍ နေရာယူရေး စစ်ဗျူဟာဖြင့် တပ်စွဲထားကြောင်း SSPP ၏ ပြောခွင့်ရ ဗိုလ်မှူးကြီး ဖိန်ဖ က ပြောသည်။

“ကျနော်တို့ရဲ့ ဝမ်ဟိုင်း ဗဟိုဌာနချုပ်ကို လူအင်အား တထောင်ကျော်လောက်နဲ့ ဝိုင်းထားပါတယ်။ နှစ်ပတ် ရှိပါပြီ၊ ပိတ်ဆို့ထားတာ။ ကျနော်တို့ စီးပွားရေး လမ်းကြောင််း၊ ဆက်သွယ်ရေး လမ်းကြောင်းတွေကို ဖြတ်နိုင်အောင်၊ မလှုပ်နိုင်အောင် အဲဒီသဘောနဲ့ ဝိုင်းထားတာ ဖြစ်တယ်” ဟု မဇ္စျိမကို ပြောသည်။

မိုင်းရှူး မြို့နယ် အတွင်းရှိ ဟိုင်းပါ ဒေသ၊ ကတိုးဆိပ်သို့ SSPP တပ်များ ဆုတ်ပေးရန် အစိုးရဘက်မှ တောင်းဆိုခဲ့ပြီး SSPP မှ မဆုတ်ပေးနိုင်ဟု အကြောင်းပြန်ခဲ့ပြီးနောက် မိုင်းအော့ ဒေသ၌ SSPP နှင့် အစိုးရတို့ အကြား ဇူလိုင်လဆန်း၌ တိုက်ပွဲများ အပြင်းအထန် ဖြစ်ပွားခဲ့ကြသေးသည်။

သြဂုတ်လဆန်းပိုင်းတွင် အဆိုပါ မိုင်းအော့ ဒေသ၌ တိုက်ပွဲများ ငြိမ်သက်ခဲ့သော်လည်း လှုပ်ရှား စစ်ကြောင်းများအား ဝမ်ဟိုင်း ဌာနချုပ်သို့ နေရာယူရေးစစ် ဆင်နွှဲရန် အင်အား ဖြည့်ထားခြင်း ဖြစ်သည်ဟု SSPP မှ ဆိုသည်။

“သူတို့က နိုင်ငံရေးအရ ဆွေးနွေး ချင်တယ်၊ ဖြေရှင်းချင်တယ်ဆိုရင် အကျပ်ကိုင်တဲ့ သဘော ဒီလိုမျိုးလုပ်တာ မဖြစ်သင့်ဘူး။ သူတို့က နိုင်ငံရေးအရ ဆွေးနွေးဖို့ ဆန္ဒများ မရှိတော့ဘူးလား ဆိုတဲ့ မေးခွန်းတွေ မေးစရာ ရှိတယ်။ နိုင်ငံရေးကို ဆွေးနွေးချင်တယ် ဆိုရင် ဒါတွေကို မလုပ်သင့် မလုပ်ထိုက်ဘူးလို့ ထင်ပါတယ်” ဟု ဗိုလ်မှူးကြီး ဖိန်ဖ က ပြောသည်။

အစိုးရနှင့် ရရှိထားသည့် အပစ်အခတ် ရပ်စဲရေးအား SSPP မှ ပြန်လည် သုံးသပ်ရန် ရှိသည်ဟု ပြောသည်။ ဗဟို ဆုံးဖြတ်ချက်အတိုင်း သတ်မှတ်နယ်မြေများကို ကျူးကျော် ဝင်ရောက်လာပါက ပြန်လည် ပစ်ခတ်ဖွယ် အနေအထား ရှိကြောင်း ၎င်းက ဆိုသည်။

ဇန်နဝါရီလ ၂၈ ရက်နေ့က အပစ်အခတ်ရပ်စဲရေး လက်မှတ်ရေးထိုးခဲ့သော ဗိုလ်ချုပ် ဆေထင် ခေါင်းသော SSPP အဖွဲ့သည် ဇွန်လ ၂ဝ ရက်နေ့၌ အစိုးရ၏ ပြည်ထောင်စု အဆင့်ငြိမ်းချမ်းရေး ဖော်ဆောင်ရေးအဖွဲ့နှင့် တွေ့ဆုံ
ဆွေးနွေးရန် စီစဉ်ထားသော်လည်း ရခိုင်ပြည်နယ် အရေးကို အကြောင်းပြပြီး အစီစဉ်ကို အစိုးရက ပယ်ဖျက် လိုက်သည်ဟု ဆိုသည်။

SSPP သည် အစိုးရနှင့်အပစ်အခတ် ရပ်စဲရေး  သဘောတူညီချက် ရရှိပြီး နောက်ပိုင်း၌ တိုက်ပွဲပေါင်း ၃ဝ ကျော် ဖြစ်ပွား ခဲ့ပြီး ဖြစ်သည်။

http://www.mizzimaburmese.com/news/inside-burma/9915-2012-08-20-13-56-50.html

Posted in: ကချင်,စစ်ဆင်ရေး,သတင်း