တရုတ်အစိုးရ ဖိအားကြောင့် စစ်ပြေးဒုက္ခသည်များ စတင်ပြောင်းရွှေ့နေ

ချင်းမိုင်(မဇ္စျိမ) ။       ။ တရုတ်အာဏာပိုင်များ၏ စေခိုင်းချက်အရ တရုတ်နိုင်ငံ နောင်တောင်းခရိုင်၊ ရွှေလီမြို့နယ် အတွင်း ခိုလှုံနေသော ကချင်စစ်ပြေးဒုက္ခသည်များမှာ ကချင်လွတ်လပ်ရေးအဖွဲ့ KIO နယ်မြေအတွင်းသို့ စတင်၍
ပြောင်းရွှေ့နေပြီ ဖြစ်ကြောင်း ဒုက္ခသည် စခန်းတာဝန်ခံများက ပြောသည်။

နောင်တောင်းခရိုင်အတွင်း ဒုက္ခသည်စခန်း ခြောက်ခုမှ လူဦးရေ ၄,ဝဝဝ ကျော် ရှိရာ ပထမဆုံး အသုတ်အဖြစ် အိမ်ထောင်စု ၁၅ဝ ကျော်မှ လူ ၆ဝဝ ကျော်မှာ KIO ၏ တပ်မဟာ ၃ နယ်မြေ လနာဇွပ် Lana Zup ဒုက္ခသည်စခန်းသို့ ဗုဒ္ဓဟူးနေ့တွင် စတင်ပြောင်းရွှေ့နေခြင်း ဖြစ်သည်။

ဒုက္ခသည်များ ပြောင်းရွှေ့သည့် မှတ်တမ်းရိုက်ကူးရန် ကင်မရာ ကိုင်ဆောင်ခွင့်ကို တရုတ်အာဏာပိုင်များက တားမြစ် ထားသလို ပြောင်းရွှေ့နေကြဆဲမှာပင် စခန်းများကို ဖျက်ဆီးခြင်းများ ပြုလုပ်နေသဖြင့် ဒုက္ခနှစ်ကြိမ် ခံရသလို ခံစားရ သည်ဟု စခန်းတာဝန်ခံ တဦးဖြစ်သူ ဒေါ်မရန်လုလု က ပြောသည်။

“တရုတ် စစ်သားရော၊ ရဲရော အရမ်းများတယ်။ လူတောင် မထွက်သေးခင် သွပ်မိုးတွေ အကုန် ခွာလိုက်ပြီ။ လမ်းဘေး က ငှားနေတဲ့ လူတွေတောင် ပေးမနေတော့ဘူး။ အကုန်လုုံးကို မောင်းထုတ်နေတယ်။ စခန်းတွေ အကုန်လုံး လိုက်ဖျက်
နေတယ်။ ဓါတ်ပုံ ကင်မရာလည်း ကိုင်လို့ မရဘူး။ ကားတော့ ငှားပေးတယ်” ဟု မဇ္စျိမကို ပြောသည်။

၎င်းက ဆက်လက်ပြီး “သူတို့ နိုင်ငံကနေ မောင်းထုတ်လို့ ပြန်တာကို ခုလို ကျမတို့ကို လူလို သူလို မဟုတ်ဘဲ မောင်းနေ တယ်ဆိုတော့ လူ့အခွင့်အရေး ချိုးဖောက်ခံရသလိုပဲ။ ကျမတို့လည်း နေချင်လို့ နေတာမှ မဟုတ်တာ။ ကျမတို့က
သေနတ် ကျည်ဆံကြောက်လို့ ကိုယ့်အိုးအိမ်တွေ ပစ်ထားပြီး ဒုက္ခသည်လို လာနေတာ။ နေခွင့် ရခဲ့တာကိုတော့
ကျေးဇူးတင်ပါတယ်။ အစိုးရတခု ဖြစ်ပြီးတော့ အဲဒီလောက် လုပ်ရက်တယ်။ သူတို့ စိတ်ထဲမှာ လူသားချင်းစာနာ စိတ်တော့ ရှိကြရဲလား” ဟု ခံစားပြောဆိုသည်။

ထိုစခန်းအတွင်းရှိ ဒုက္ခသည်များအား မြန်မာနိုင်ငံအတွင်းသို့ ပြောင်းရွှေ့ကြရန် ဇူလိုင်လ ၂ဝ ရက်နေ့ကတည်းက တရုတ်အာဏာပိုင်များက ပြောဆိုထားပြီးဖြစ်သည်။

ထိုဒုက္ခသည်စခန်းတွင် မူလတန်းကျောင်း ဖွင့်လစ်ထားပြီး ကျောင်းသူကျောင်းသားပေါင်း ၈၆၈ ဦး ရှိနေကာ ကလေးများ ပညာရေး ထိခိုက်မည်စိုး၍ ဒုက္ခသည်များက လနာ့ဇွပ်သို့ မပြောင်းရွှေ့လိုကြခြင်း ဖြစ်သည်။

ယခု ပြောင်းရွှေ့လာသည့် နေရာသည် ယခင် တရုတ်လူမျိုးများ ဖဲဝိုင်းအဖြစ် အသုံးပြုရန် ဆောက်လုပ်ထားသည့် အဆောက်အအုံနှင့် ဟိုတယ်ဟောင်း တိုက်တန်းများတွင် နေထိုင်နေရမည် ဖြစ်ပြီး အဓိက မီးဖိုချောင်၊ အိမ်သာများကို
ဆောက်လုပ်ရန် လိုအပ်နေကြောင်း သိရသည်။

ကလေးများ ပညာသင်ကြားရေးအတွက် ဖဲဝိုင်းအဆောက်အအုံနှင့် မီးဖိုချောင်အဖြစ် ဆောက်လုပ်ထားသော အဆောက်အအုံအား အကန့်လိုက် ပြုလုပ်ကာ မနက် တကြိမ်၊ ည တကြိမ် စာသင်ကြားပေးသွားမည် ဖြစ်ကြောင်း သိရသည်။

ဒုက္ခသည်များထဲမှ အိမ်ထောင်စု ၁ဝဝ ကျော်မှာ ဝေးလံလှသည့် ဤလနာ့ဇွပ်သို့ မပြောင်းရွှေ့လိုသဖြင့် မိမိဒေသ မန်ဝင်းကြီးသို့ အင်္ဂါနေ့က ပြောင်းရွှေ့သွားကြပြီဟု သိရသည်။

လက်ရှိ မိုးရာသီဖြစ်၍ ကလေးငယ်များ ဝမ်းသွားခြင်း၊ နာစေး၊ ချောင်းဆိုး အနည်းအကျဉ်းဖြစ်ပြီး သက်ကြီးများ အားနည်း၍ ဗီတာမင် အားဆေးများ သောက်သုံးရန် လိုအပ်နေသည်ဟု လနာ့ဇွပ် စခန်းတွင် ဆေးကုသ ပေးနေသည် ဆရာဝန်တဦးက ပြောသည်။

အစိုးရနှင့် KIO တို့ တိုက်ပွဲစတင်ဖြစ်ပွားချိန်မှစ၍ ၄င်းလနာ့ဇွပ် ဒုက္ခသည်စခန်းတွင် ဒုက္ခသည်ပေါင်း ၁,၄ဝဝ ရှိနေပြီး လက်ရှိ ၆ဝဝ ကျော် ထပ်မံ ရောက်ရှိလာခြင်းဖြစ်သည်။ နောက်နေ့တွင်လည်း ဒုက္ခသည်များ ထပ်မံ ပြောင်းရွှေ့ လာကြမည် ဖြစ်သည်။

သြဂုတ်လ ၁၉ ရက်နေ့ကလည်း ဖားကန့်မြို့နယ် KIA တပ်ရင်း ၆ လက်အောက်ခံ တပ်များနှင့် မြန်မာအစိုးရ နမခ လက်အောက်ခံ တပ်မ ၃၃ တပ်ဖွဲ့များအကြား တင်းမာမှုများ ရှိခဲ့သဖြင့် တိုက်ပွဲဖြစ်ပွားမည်ကို စိုးရိမ်ကာ မှော်မောင်း ဘွမ်၊ လမောင်ကုန်း၊ မှော်ဝမ်းကြီး၊ မှော်ဝမ်းကလေးနှင့် သူဌေးချောင်းများမှ ဒေသခံ ၁,ဝဝဝ နီးပါးမှာ ဖားကန့်မြို့ပေါ်ရှိ ကချင်ခရစ်ယာန် ဘုရားကျောင်းများသို့ လာရောက် ခိုလှုံနေရသည်ဟု အမျိုးသားဒီမိုကရေစီအဖွဲ့ချုပ် NLD ကိုယ်စားလှယ်လောင်း ဦးဒရှီလဆိုင်း က ပြောသည်။

“တင်္ဂနွေနေ့က KIO နဲ့ အစိုးရတို့ ထိပ်တိုက် ပစ်ခတ်တော့မလိုလို ပြည်သူတွေက ထိတ်လန့်ပြီးတော အစိုးရတပ် မူလရှိတာက ၄ဝ လောက် ရှိတယ်။ ဒါပေမယ့် စစ်ကိုင်း မုံရွာတပ်တွေက အင်အား နှစ်ထောင်လောက် ပြန်ရောက် တယ်လို့ လူတွေက ပြောနေကြလို့ တိုက်ပွဲဖြစ်မှာ ကြောက်လို့၊ KIO ကနေ ဒေသခံတွေ ဒုက္ခရောက်မှာစိုးလို့ ဖားကန့်ကို ခဏရှောင်ပေးဖို့ ပြောလို့ ကက်သလစ်၊ နှစ်ခြင်းဘုရားကျောင်းတွေမှာ ခိုလှုံနေတယ်” ဟု မဇ္စျိမကို ပြောသည်။

သို့သော် ယနေ့ထိ ပစ်ခတ် တိုက်ခိုက်ခြင်း မရှိသေးဘဲ တည်ငြိမ်လျက်ရှိသည်ဟုလည်း ၎င်းက ပြောသည်။

KIO နှင့် အစိုးရတို့ နှစ်ဖက်တိုက်ပွဲကြောင့် အိုးအိမ်စွန့်ခွာ ထွက်ပြေးတိမ်းရှောင်နေရသူ စစ်ပြေးဒုက္ခသည် စုစုပေါင်း ၈ဝ,ဝဝဝ ကျော် ရှိနေပြီ ဖြစ်သည်။ နှစ်ဖက် စစ်ရေးကိစ္စနှင့် ပတ်သက်၍ နှစ်ဖက် စစ်ပိုင်းဆိုင်ရာ ခေါင်းဆောင်များ
တွေ့ဆုံမည် ဖြစ်၍ ထပ်မံ တွေ့ဆုံမည့်နေရာ သဘောတူညီမှု မရသေးဘဲ ဖြစ်နေသည်။

http://www.mizzimaburmese.com/news/inside-burma/9928-2012-08-22-13-31-02.html

Posted in: ကချင်,စစ်ပြေးဒုက္ခသည်,သတင်း