ကြည်းတပ်ကို လေတပ်က အကြိမ်ကြိမ်ပစ်ကူ ပေးနေရ

ကချင်လွတ်မြောက်ရေး တပ်မတော် (KIA) ဌာနချုပ်လိုင်ဇာကို ထိုးစစ်ဆင်နေသည့် အစိုးရကြည်းတပ်ဖွဲ့များအား လေတပ် တိုက်လေယာဉ်များက အကြိမ်ကြိမ် ပစ်ကူပေး နေရသည်ဟု KIA ပြောခွင့်ရသူ ဦးလာနန်း က ဆိုပါသည်။

“ဒီလိုဗျ။ အလုံးအရင်းနဲ့ တက်လာတယ်။ သူတို့တပ်တွေကို ပိတ်ပြီး တိုက်တော့ လေကြောင်းအကူ ပေးရတဲ့ သဘော ပါဘဲ။ တိုက်ပွဲဖြစ်တဲ့ နေရာကတော့ မြစ်ကြီးနား - လိုင်ဇာ လမ်းပိုင်းမှာ ဂန်တောင်ယန်မှာ တစ်ပွဲ- ဘန်ဒေါင် -နန်ယာရဲ့ အရှေ့ ဘက် ဂန်ဒေါင်ဒုကျေးရွာ ဘက်မှာဖြစ်တယ်။ တိုက်ပွဲကြီး၂ ပွဲ ပေ့ါဗျာ။ နေ့လည်တစ်နာရီ ကျော်ကျော်မှာဖြစ်တယ်။ သူတို့က တိုက်လေယာဉ်နဲ့ ပစ်ခတ် နေပေမဲ့ ကျနော်တို့ဘက်က ထိခိုက်တာမျိုး မရှိဘူး ခင်ဗျ။” ဟု ဆိုပါသည်။
အစိုးရတပ်များသည် ယမန်နေ့ နေ့လည်တွင် လေတပ်မှ ဗုံးကျဲ ချထားသော နေရာများကို အမြောက်တပ်၏ အကာအကွယ်ဖြင့် ကြည်းတပ်များက နေရာဝင်ယူ ထားပါသည်။ ဤသို့ကြောင့် အမြောက်တပ်မှ ယနေ့အထိ တနေ့လုံး ပစ်ကူ ပေးနေခြင်း ဖြစ်ပါသည်။
KIA သည် ဗန်းမော်- လိုင်ဇာ လမ်းကြောင်းမှ လဂျားယန် နေရာကို ဗုံးကျဲပြီး နေရာဝင်ယူထားသော တပ်ဖွဲ့များအပြင် မြစ်ကြီးနား လိုင်ဇာလမ်းကြောင်းနှင့် စတန်ပါ - လိုင်ဇာ လမ်းကြောင်းများရှိ အစိုးရတပ်များကိုပါ တန်ပြန်တိုက်ခိုက်နေ ခြင်းဖြစ်ပါသည်။ အစိုးရတပ်ဖွဲ့များသည် အထိနာပြီး ရှေ့တိုး၍ မရသဖြင့် လေကြောင်းအကူ ယူရခြင်းဖြစ်သည်ဟု KIA က ယူဆပါသည်။

သို့သော် ယနေ့ ဗုံးကျဲလိုက်သော တိုက်ခိုက်မှုများသည် ယမန်နေ့ကလို ရမ်းရမ်းတန်းတန်း ဗုံးကျဲမှုမျိုး မဟုတ်ဘဲ ထိန်းထိန်းသိမ်းသိမ်းနှင့် ဗုံးကျဲခဲ့ရခြင်း ဖြစ်ဟန်တူ ပါသည်။ အကြောင်းမှာ နှစ်ဖက်တပ်များ နီးကပ်နေသဖြင့် ဗုံးကျဲမှုများ ထိန်းသိမ်းရာမှ ထိရောက်မှု မရှိခဲ့ခြင်း ဖြစ်ဖွယ် ရှိပါသည်။
ဤကဲ့သို့ ထိရောက်မှုမရှိသော အခြေအနေကြောင့် ယမာန်နေ့ကမှ မြစ်ကြီးနားကို ရထားလုံးစင်းဖြင့် ရောက်လာသော အစိုးရတပ်ဖွဲ့ တပ်မ ၁၀၁ မှ စစ်ကူများသည် ယနေ့တွင် ဂန်ဒေါင်ယန်ကို ရောက်ရှိလာခဲ့သည်ဟု KIA က ဆိုပါသည်။
“မနေ့က သူတို့ လေယာဉ်နဲ့ ပစ်ရှင်းခိုင်းထားတယ်။ အဲဒီနေရာမှာ သူတို့ စစ်ကြောင်းတွေ ဝင်လာတယ်။ အလွယ်တကူ ဝင်လာ တာပေါ့ဗျာ။ သူတို့ နေရာယူ ထားပြီး မနေ့ ညနေမှာ စပြီးတော့ မြေပြင်တိုက်ပွဲ စဖြစ်တယ်။ ဒီနေ့မနက်လဲ ဖြစ် တယ်။ ကျနော်တို့ တပ်ဖွဲ့တွေက နောက်ကနေ ဝိုင်ပြီးတော့ ပိတ်ဆို့လိုက်တဲ့ အခါမှာ ဒီလဂျားယန် ဘက်မှာ သူတို့ စစ်ကြောင်းတွေ ပိတ်မိကုန်တယ်။ အဲတာကြောင့် သူတို့ လေယာဉ်နဲ့ နေ့လယ်မှာ တကြိမ် ညနေပိုင်းမှာ တကြိမ် ပြန်လာပစ်ပေးတယ်။” ဟု ဆိုပါသည်။
အစိုးရ၏ အမြောက်တပ် ပစ်ကူများနှင့် လေယာဉ်ဗုံးကျဲမှုများသည် ထိရောက်မှုမရှိသလို ကြည်းတပ်များသည်လည်း တိုက်ခိုက်ရေးစွမ်းရည်ထက် အင်အားအဆမတန် သုံးပြီး ဖိအားပေးသည့် နည်းကို အသုံးပြုနေရသည်ဟု စစ်ရေးအကဲခတ်များက ဆိုပါသည်။ သို့သော် ဖိအားပေးသလောက် မထိရောက်သဖြင့် နောက်ထပ်စစ်ကူများ ပို့ပေးနေရခြင်းဖြစ် ဖွယ်ရှိပါသည်။

ဤသို့ကြောင့် လိုင်ဇာစစ်ဆင်ရေး တခုထဲမှာတင် စစ်အင်အား (၄၀၀၀) နီးပါး အသုံးပြု နေရသည့်အပြင် တိုက် လေ ယာဉ် (၄) စင်းအပါ၀င် စစ်ရဟတ်ယာဉ်များနှင့် လက်နက်ကြီးများ အဆမတန် အသုံးပြုနေရခြင်း ဖြစ်ပါသည်။

ထို့အပြင် စိတ်ဓါတ်စစ်ဆင်ရေးအတွက် မြစ်ကြီးနား မြို့နယ်ရှိ ဧရာဝတီ မြစ်ကမ်းတလျှောက်တွင် ညနေ ၆ နာရီမှ နံနက် ၆ နာရီထိ သွားလာခွင့်မပြုရန် အမိန့်ထုတ်ထားခဲ့ပါသည်။ ဖြတ်သန်းသွားလာသူများကို သေနတ်ဖြင့် ပစ်ခတ်မည်ဟု ခြိမ်းခြောက်ထားပြီး ရက်အကန့်အသတ်မရှိ ပိတ်ပင်ထားမည်ဟု ဆိုပါသည်။

လိုင်ဇာ စစ်ဆင်ရေး၏ အဆုံးအဖြတ်တိုက်ပွဲ စတင်သည့် ဒုတိယမြောက်နေ့သို့ ရောက်ရှိလာပြီး ဖြစ်သော်လည်း အစိုးရ တပ်ဖွဲ့များသည် ရှေ့မတိုးနိုင်သေးဘဲရှိ နေပါသည်။ ဤသို့ကြောင့် အစိုးရသည် လေကြောင်းတိုက်ပွဲကို ပိုမိုတိုးမြှင့် လာ ဖွယ်ရှိသည်ဟု စစ်ရေးအကဲခတ်များက ဆိုပါသည်။ 

http://www.phophtaw.org/burmese/index.php/news/local-news/2565-2012-12-29-13-01-34.html

Posted in: ကချင်,ကချင်စစ်ဆင်ရေး,စစ်ဆင်ရေး,သတင်း