Tuesday, January 22, 2013
မြန်မာ့ငြိမ်းချမ်းရေးလေ့လာစောင့်ကြည့်မှု
သမ္မတ ဦးသိန်းစိန် ညွန်ကြားခဲ့ပြီးနောက် ယမန်နေ့ထိ တိုက်ပွဲဖြစ်ပွားခြင်းမရှိသော်လည်း ယနေ့ နံနက်ပိုင်းတွင် ဖားကန့်မြို့နယ် ဂင်စီကျေးရွာ အရှေ့ဘက်မှာ KIA တပ်ရင်း ၆ တပ်ဖွဲ့များနှင့် အစိုးရတပ်ဖွဲ့များအကြား တနာရီကြာ တိုက်ပွဲဖြစ်ပွားခဲ့ခြင်းဖြစ်သည်။
“ဂင်စီရွာနဲ့အနီးမှာ မနက် ၈ နာရီမှ ၉ နာရီမှာ ဖြစ်တယ်။ အစိုးရဘက်က တပ်ရင်း ၂၄၂ က အင်အား ရ၀ လောက်ရှိမယ်။ သူတို့က ကျနော်တို့နေတဲ့နေရာကို ထိုးစစ်လာပြီး လိုက်တိုက်နေတာပါ။ အကျအဆုံးတော့ မရှိဘူး”ဟု တပ်ရင်း ၆ တပ်ရင်းမှူး ဒု-ဗိုလ်မှူးကြီး ဇော်ဒွဲက မဇ္စျိမကို ပြောသည်။
တိုက်ပွဲများကြောင့် ယခုနှစ် ဇန်နဝါရီလဆန်ပိုင်းမှ စတင်၍ ဖားကန့်၊ ဂင်စီ၊ လုံးခင်း၊ ဆိုင်းတောင်ရှိ ဘုန်းကြီးကျောင်းနှင့် ခရစ်ယာန်ဘုရားကျောင်းများသို့ ကျေးရွာ ၁၆ ရွာတို့မှ စာရင်းရရှိသော စစ်ပြေးဒုက္ခသည်ပေါင်း ၈,၀၀၀ ကျော်ရှိနေပြီး အခြားစာရင်းမရရှိသော စစ်ပြေးဒုက္ခသည် ဦးရေ ၄ သောင်းကျော်ရှိနေပြီဖြစ်ကြောင်း သူက မဇ္စျိမကို ပြောသည်။
အလားတူ အောင်ရာကျေးရွာမှ ၂ မိုင်အကွာရှိ လောတ်ဂျာကျေးရွာအနီးတွင် ယနေ့ ၁၀ နာရီကျော်ချိန်မှ မွန်းလွဲ တနာရီချိန်ထိ နှစ်ဘက်စစ်တပ်များ တိုက်ပွဲဖြစ်ပွားခဲ့သဖြင့် ဒုက္ခသည်ဦးရေ ၃၀၀ ကျော်သည် အောင်ရာကျေးရွာမှ ဘုန်းကြီးကျောင်းများ၊ ခရစ်ယာန်ဘုရားကျောင်းများသို့ ခိုလှုံနေရသည်ဟု NDF ပါတီမှ ကချင်ပြည်နယ် တာဝန်ခံ ဒေါ်ဘောက်ဂျာက ပြောသည်။
“သမ္မတဆီက အပစ်ရပ်လိုက်တယ်ဆိုလို့ ကျမတို့ကလည်း ငြိမ်သွားမယ်လို့ အောက်မေ့တာ ခုတိုက်ပွဲက ပိုဆိုးလာတယ်။ ကျမတို့ပတ်ဝန်းကျင်မှာ နေ့တိုင်းကြားရတယ်။ အခု ဒီနေ့ကျတော့ ရွာနဲ့ သိပ်မဝေးတဲ့ လောတ်ဂျာရွာမှာ တိုက်ပွဲဖြစ်တယ်။ ရွာသူရွာသားတွေက မနေ့ကတည်းက ထွက်ပြေးနေတာ ဒီနေ့ ခုချိန်ထိ ထွက်ပြေးနေတုန်းဘဲ” ဟု သူက ဆက်ပြောသည်။
ဒေါ်ဘောက်ဂျာသည် အစိုးရစစ်တပ်မှ ထိုးစစ်ဆင်လာမှုအား ကိုယ်တိုင် တွေ့ရှိပြီး တိုက်ပွဲကြောင့် ထွက်ပြေးလာသူ လူဦးရေ ၁၀၀ ခန့်ကို သူ့၏ နေအိမ်တွင် ခိုလှုံခွင့်ပြုထားသည်ဟု သူက မဇ္စျိမကို ပြောသည်။
“ဒီမနက် ၄ နာရီလောက်မှာ ခွေးတအားဟောင်လို့ ကျမ ထကြည့်တော့ ကျမတို့ ကားလမ်းမကနေ အဲဒီဘက်ခြမ်းကို သွားနေတာ တွေ့ရတယ်။ အင်အားက ၃၀၊ ၄၀ လောက်ရှိမယ် ထင်တယ်။ ဘယ်ဘက်ကို သွားမှန်း မသိဘူး။ ဒီမနက် ၁၀ နာရီလောက်မှာ သေနတ်သံတွေ ကြားရတယ်။ အဲဒီအခါကျတော့ အဲဒီအနားမှာရှိတဲ့ ရွာသားတွေ ထွက်ပြေးလာကြတယ်” ဟု ဒေါ်ဘောက်ဂျာက ဆက်ပြောသည်။
ဒေသခံများ၏ အပြောအရ အစိုးရစစ်တပ်ဘက်မှ ထိုလောတ်ဂျာကျေးရွာမှတဆင့် အစိုးရစစ်တပ်များ လာရောက်မည်ဖြစ်၍ KIA တပ်များအား ရှောင်ပေးရန် ပြောဆိုသည်ဆိုသည့် သတင်းများ ကြားရသဖြင့် ယမန်နေ့မှ စတင်၍ ရွာသားများ စတင်တိမ်းရှောင်ခဲ့သည်ဟု ဆိုသည်။
အစိုးရစစ်တပ်ဘက်မှ ထိုးစစ်ဆင်လာမှုကြောင့် ယခုကဲ့သို့ တိုက်ပွဲများ ဆက်လက်ဖြစ်ပွားနေခြင်းဖြစ်ပြီး သမ္မတ ဦးသိန်းစိန်အနေဖြင့် လဂျားယန်ဒေသအား ထိုးစစ်မဆင်ရန် ကြေငြာရုံမက ကချင်ပြည်နယ်အတွင်းမှာ ရောက်ရှိနေသော အစိုးရစစ်ကြောင်းများအား ဆုတ်ပေးရန် ကြေငြာပေးရန် လိုအပ်သည်ဟု ဒေါ်ဘောက်ဂျာက တိုက်တွန်းလိုက်သည်။
“အစိုးရဘက်က ထိုးစစ်ဆင်တယ်ဆိုတာ ကျမတို့ကိုယ်တိုင် မြင်နေရတယ်။ သူတို့ ထိုးစစ်မဆင်လာဘူးဆိုရင် စစ်ပွဲဖြစ်စရာ မလိုဘူး။ သမ္မတက အပစ်ရပ်မယ်လို့ အကြိမ်ကြိမ် ပြောခဲ့့တယ်။ ဒါပေမဲ့ တခါမှ ကတိမတည်ဘူး။ သမ္မတအနေနဲ့ ဒီလိုလုပ်ဆောင်နေတာဟာ အင်မတန်မှ ရှက်ဖွယ်ကောင်းတယ်” ဟု သူက မဇ္စျိမကို ပြောသည်။
လက်ရှိ အောင်ဂျာကျေးရွာအတွင်း စစ်ပြေးဒုက္ခသည် ၃၀၀ ကျော်ရောက်ရှိနေပြီး ဖားကန့်မြို့ပေါ်တွင်လည်း စစ်ပြေးဒုက္ခသည် အနည်းဆုံး ၄ သောင်းကျော် ရှိနေပြီဟု သိရကြောင်း သူက ပြောသည်။
KIO ၏ လိုင်ဇာဌာနချုပ်အနီး ယနေ့ နံနက် ၁၀ နာရီကျော်ခန့် မှစတင်၍ မြို့၏ အထက်ပိုင်း ၅ မိုင်အကွာရှိ အလန်းဘွမ်၊ ၄င်း၏ တဖက်တောင်တန်းများ၊နှင့် KIO ၏ တပ်မဟာ ၅ လက်အောက်ခံ တပ်ရင်း ၂၃ စခန်း ခါရာဘွမ်တောင်ခြေအနီးတဝိုက်တို့ကို အစိုးရစစ်တပ်က လက်နက်ကြီးများဖြင့် ပစ်ခတ်မှုများ ဆက်လက်ရှိနေသည်ဟု ကျောင်းသားတပ်မတော် (မြောက်ပိုင်း) ABSDF ပြန်ကြာရေးတာဝန်ခံ ဗိုလ်မှူးမင်းဌေးက ပြောသည်။
“ဒီမနက်ပိုင်းတော့ ငြိမ်နေပြီးတော့ အခု ၁၀ နာရီ ၁၅ လောက်မှာ အလန်းဘွမ်နဲ့ ခရာဘွမ်ဘက်ကို စပစ်နေပြီ။ မနေ့ကလည်း ညနေပိုင်းထိ ခရာဘက် တိုက်ပွဲဖြစ်တယ်။ သူတို့ တက်ထိုးနေတဲ့ လိုင်ဇာအထက်က အလန်းဘွမ်နဲ့ ခရာဘွမ်ကို လက်နက်ကြီးနဲ့ လှမ်းပစ်နေတယ်”ဟု သူက မဇ္စျိမကို ပြောသည်။
KIO ၏ ခရာဘွမ်တောင်ခြေတွင် အစိုးရဘက်မှ ထိုးစစ်ဆင်တိုက်ခိုက်မှုမှာ ရက်သတ္တပတ်ကြာမြင့်ပြီဖြစ်ပြီး ထိုစခန်းအား သိမ်းယူရန် ရည်ရွယ်၍ ယနေ့ နံနက်ပိုင်းတွင် အစိုးရစစ်တပ်များ ချဉ်းကပ်တိုက်ခိုက်နေခြင်းဖြစ်သည်ဟု သူက ဆက်ပြောသည်။
လိုင်ဇာကို သိမ်းယူမည်မဟုတ်ကြောင်း ပြောဆိုနေသော်လည်း လိုင်ဇာမြို့ အထက်ပိုင်းရှိ အလန်းဘွမ်နှင့် ခရာဘွမ်အား သိမ်းယူရန် ကြိုးစားနေသည်ဟု ဗိုလ်မှူးမင်းဌေးက ပြောသည်။
သမ္မတ ဦးသိန်းစိန်က KIO ထိန်းချုပ်ရာ လဂျားယန်ဒေသသို့ ထိုးစစ်ဆင်မှုများ စနေနေ့မှ စတင်ရပ်တန့်မည်ဟု ညွန်ကြားခဲ့သော်လည်း ထိုနေ့တွင်လည်း တိုက်ပွဲများဖြစ်ပွား၍ အစိုးရဘက်မှ လက်နက်ငယ် ၃၀ ကျော် သိမ်းယူခဲ့သဖြင့် အစိုးရဘက်မှ ကျဆုံးမှုများမည်ဟု ခန့်မှန်းရသည်ဟု ဆိုသည်။
http://drlunswe.blogspot.com/2013/01/blog-post_4503.html
Posted in: ကချင်,ကချင်စစ်ပြေးဒုက္ခသည်,စစ်ပြေးဒုက္ခသည်,သတင်း
