အပစ်ရပ် တိုင်းရင်းသား ဒေသများကို မူ (၅) ရပ်ဖြင့် နော်ဝေး ကူညီနေ

မြန်မာ အစိုးရ၏ အပစ်အခတ် ရပ်စဲရေး လုပ်ငန်းစဉ်၌ နော်ဝေးနိုင်ငံမှ လက်တွေ့ အကူအညီ ပေးနေသော အစီစဉ်များကို ကိုယ်စားလှယ် တဦးဖြစ် သူ Mr. Ashley South က ထိုင်းနိုင်ငံ စံခဘူရီမြို့သို့ ရောက်ရှိစဉ် ယနေ့ထုတ်ဖေါ် ပြောကြားခဲ့ပါသည်။ ၄င်းတို့သည် Myanmar Peace Support Initiative (MPSI) အဖွဲ့ကို ဖွဲ့စည်းပြီး လိုက်လံ အကူအညီပေးနေခြင်း ဖြစ်ပါသည်။
“ကျနော်တို့က ကဏ္ဍ (၅) ရပ်နဲ့ ကူညီသွားမှာပါ။ ပေးတဲ့နေရာမှာလည်း ပတ်သက်တဲ့ အဖွဲ့ကို တိုက်ရိုက်ပေးပါတယ်။ ပြီးတော့ အစိုးရနဲ့ အပစ်ရပ် အဖွဲ့အစည်းတွေကြား သဘောတူထားတဲ့ အချက်အပေါ်မှာ မူတည်ပြီးတော့ ကျနော်တို့က အကူအညီပေးနေတဲ့ အတွက် အစိုးရ ဖက်ကလည်း ကျေနပ်မှာပါ”ဟု  Mr. Ashley South က ပြောပါသည်။
 အကူအညီ ပေးမည့် ကဏ္ဍ (၅) ရပ်မှာ  (၁) အပစ်ရပ် အဖွဲ့အစည်းများ၏ ဆက်ဆံရေးရုံး ထားရှိရေး (၂) အပစ်ရပ် အဖွဲ့အစည်းများ၏ လူထု ရှင်းလင်းပွဲများ ကျင်းပနိုင်ရေး (၃) အစိုးရနှင့် အပစ်ရပ်အဖွဲ့များ၏ သဘော တူညီချက်အပေါ် စောင့်ကြည့်ရေး၌ ကူညီရေး(၄) ရှမ်းပြည်နယ်ရှိ ဘိန်းပြသနာ ပညာပေးရေးနှင့် (၅) အပစ်ရပ်ဒေသ ပြန်လည်ထူထောင်ရေး လုပ်ငန်းစဉ်များ၌ ကူညီသွားမည်ဖြစ်ပါသည်။

“ပဲခူးတိုင်း ကျောက်ကြီးနဲ့ ထားဝယ် ဒေသက ကရင် ဒုက္ခသည်တွေကို နိုင်ငံသား မှတ်ပုံတင်တွေပေးရေးနဲ့  ပြန်လည် နေရာချထားရေးမှာ  ကျနော်တို့ MPSI က ကွင်းဆင်း လေ့လာနေပါတယ်”ဟု Ashley က ဆိုပါသည်။
MPSI အဖွဲ့ကို ပြီးခဲ့သည့် ဇန္နာဝါရီလတွင် နော်ဝေးနိုင်ငံ ခြားဝန်ကြီး၏ မြန်မာနိုင်ငံ ခရီးစဉ်အပြီး၌ ဖွဲ့စည်းခဲ့ပါသည်။ ၄င်းအဖွဲ့ကို Mr. Ashley South နှင့် မစ္စတာ ချာလ်းပက်ထရီ တို့ကို ဦးဆောင်စေပြီး  အပစ်အခတ် ရပ်စဲသော တိုင်းရင်းသား ဒေသများ ပိုမို ဖွံ့ဖြိုး တိုးတက်စေရန် အခြေခံ အုတ်မြစ်များ ချမှတ်ပေးရေး၌ အကူအညီပေးရန် ရည်ရွယ်ထားပါသည်။

http://www.phophtaw.org/burmese/index.php/news/internation-news/1939-2012-07-27-13-24-57.html

Posted in: နိုင်ငံတကာသဘောထား