ငြိမ်းချမ်းရေး ဆွေးနွေးပွဲ အစစ်အမှန် ဖြစ်ရန် KIA တောင်းဆို

ငြိမ်းချမ်းရေး အစစ်အမှန် ဖြစ်ရေး အတွက် အချက် (၃) ချက် ပါသော ငြိမ်းချမ်းရေး ဆွေးနွေးပွဲ အစီစဉ်ကို ကချင် လွတ်လပ်ရေး တပ်မတော် (KIA) က အစိုးရထံ အကြောင်း ပြန်ထားကြောင်း အမည်မဖေါ်လိုသော ကချင် လွတ်လပ်ရေး အဖွဲ့ ခေါင်းဆောင် တဦးက ပြောပါသည်။
“ ဦးအောင်မင်း တို့ကတော့ အောက်တိုဘာ (၁၀) ရက်နေ့မှာ ဆွေးနွေးပွဲအတွက် သူတို့ အရင် ကမ်းလှမ်းတယ်။ ကျနော် တို့ကလည်း (၁၁) ရက်နေ့မှာ သဘောထား ပြန်စာကို ပို့လိုက်တယ်။ တရားဝင် လမ်းကြောင်းကနေဘဲ ပို့လိုက်တာပါ။ ခက်တာက ငြိမ်းချမ်းရေး စကားကို အသုံးမချ စတမ်း ဖြစ်စေချင်တယ်။ ကျနော်တို့က တကယ့်ကို ငြိမ်းချမ်းရေး လိုချင် နေတာပါ။ ဒီတော့ ကျနော်တို့ရဲ့ တောင်းဆိုချက်က လက်တွေ့ဖြစ်နိုင်တဲ့ အရာကိုဘဲ တင်ပြ နေတာ ဖြစ်ပါတယ်” ဟု ဆိုပါသည်။
KIA ၏ ပြန်စာထဲမှ တောင်းဆိုချက်များမှာ--
(၁) KIA လိုင်ဇာ ဌာနချုပ် (တပ်မဟာ ၅) ဧရိယာကို ရောက်နေသော ရှမ်းပြည် မြောက်ပိုင်းရှိ အစိုးရ ဧည့်တပ်များ ဆုတ်ခွာပေးရန်။
အကြောင်းမှာ KIA ဌာနချုပ်အား တပ်အင်အား အလုံးအရင်းဖြင့် လည်းကောင်း၊ (၁၀၅)မမ အ ပါ၀င် အခြား လက် နက်ကြီးများနှင့် ပတ်ပတ်လည် နေရာယူ ချိန်ထားသည့် အခြေအနေမျိုး အောက်၌ အကြပ်ကိုင် ထားပြီးမှ တွေ့ဆုံဆွေး နွေးသည့် ဆွေးနွေးပွဲမျိုး မဖြစ်ရန် KIA မှ ရည်ရွယ်သည်ဟု ဆိုပါသည်။
(၂) နိုင်ငံရေး ပြသနာကို နိုင်ငံရေးအရ တွေ့ဆုံဆွေးနွေးရန်။
အကြောင်းမှာ (KIA) နှင့် ဖြစ်ပွားနေသော လက်နက်ကိုင် ပဋိပက္ခသည် တိုင်းရင်းသား အခွင့်အရေးနှင့် ပတ်သက်သော နိုင်ငံရေး ပြသနာ ဖြစ်သည့် အတွက် နိုင်ငံရေး အရ ဖြေရှင်းမှ တကယ့်ငြိမ်းချမ်းရေးကို တည်ဆောက်နိုင်မည် ဖြစ်သော ကြောင့်ဟု ဆိုပါသည်။
(၃) နိုင်ငံတကာ ရှေ့မှောက်တွင် တရားဝင် အပစ်အခတ် ရပ်စဲရေး လက်မှတ်ထိုးရန်။
အကြောင်းမှာ အစိုးရနှင့် KIA သည် ၁၉၉၄ ခုနှစ်တွင်လည်း အပစ်အခတ် ရပ်စဲခဲ့ဘူးပါသည်။ နောက်ဆုံး၌ နယ်ခြား စောင့်တပ် BGF ကိုလုပ်ခိုင်းခဲ့သဖြင့် လက်မခံနိုင်သည့် အခြေအနေကို အသုံးချပြီး အပစ်အခတ် ရပ်စဲမှုကို အစိုးရ ဖက်မှ ပယ်ဖျက် ခဲ့ဘူးပါသည်။ ထို့အတူ ယခု အစိုးရသစ်၏ အပစ်အခတ် ရပ်စဲရေး လုပ်ရပ်မျိုး၌လည်း တကယ့် အပစ်ရပ်ရေး လုပ်ချင်စိတ်ထက် အသုံးချနေသည့် ပွဲမျိုးသာ ဖြစ်နေသဖြင့် အပစ်အခတ် ရပ်စဲရေးသည် နိုင်ငံတကာ ရှေ့မှောက်၌ လက်မှတ် ထိုးမှသာ ထိရောက်မည်ဖြစ်သည်ဟု ရည်ရွယ်ထားသည်ဟု ဆိုပါသည်။
KIA ၏ အထက်ပါ တောင်းဆိုချက်ကို ဦးအောင်မင်း ဦးဆောင်သော ပြည်ထောင်စု ငြိမ်းချမ်းရေး အဖွဲ့သို့ ပေးပို့ထားပါ သည်။ သို့သော် ယနေ့အထိ အကြောင်းပြန်ကြားခြင်း မရှိသေးပေ။
ဤကဲ့သို့ အစိုးရမှ KIA အား တရားဝင် အကြောင်း မကြားသေးသော်လည်း နေပြည်တော် စစ်အရာရှိကြီးများသည်၊ KIA နှင့် တွေ့ဆုံဖြစ်ခဲ့လျှင် စစ်ရေး ကိစ္စသာ ဆွေးနွေးဖြစ်သည်ဟု မြန်မာ တိုင်းဂျာနယ်အား ပြောဆိုခဲ့ပြီးဖြစ်ပါသည်။
http://www.myanmar.mmtimes.com/index.php/national-news/1736-2012-10-18-05-14-52.html
လက်ရှိ အခြေအနေ၌ အစိုးရ တပ်ဖွဲ့များသည် အင်အားပေါင်း တသောင်းခွဲခန့်နှင့် KIA အား စစ်ဆင်နေပါသည်။ ဤ မျှ များပြားသော တပ်အင်အားဖြင့် စစ်ဆင်နေသည့် ကိစ္စနှင့် သိန်းဂဏန်းဖြစ်သော စစ်ပြေး ဒုက္ခသည် ကိစ္စကို သမ္မတ အပါ၀င် ကာကွယ်ရေး ၀န်ကြီး ဌာနနှင့် အစိုးရ ၀န်ကြီးများက လွှတ်တော်သို့ အခြေအနေမှန်အား မတင်ပြခဲ့ပေ။ ထို့အတူ နိုင်ငံ တကာကိုလည်း ကချင် လွတ်လပ်ရေး အဖွဲ့နှင့် ငြိမ်းချမ်းရေး တည်ဆောက်နေပါသည်ဟု တွင်တွင် ပြောကြား နေခဲ့ပါ သည်။
ဤသို့ကြောင့် အခြေအနေ မှန်ကို နိုင်ငံတကာမှ သိရှိပြီး ပါ၀င် ဆောင်ရွက်နိုင်ပါမှ အမြတ်ထုတ် နေမှုနှင့် မမှန်မကန်မှုများ ဖေါ်ထုတ်နိုင်မည် ဖြစ်သဖြင့် KIA မှ နိုင်ငံတကာ အဖွဲ့ရှေ့မှောက်၌ လက်မှတ် ရေးထိုးလိုခြင်း ဖြစ်သည်ဟု စစ်ရေး အကဲခတ်များက သုံးသပ်ပါသည်။

http://www.phophtaw.org/burmese/index.php/news/local-news/2265--kia-.html

Posted in: ကချင်,ကချင်တွေ့ဆုံဆွေးနွေးမှု,တွေ့ဆုံဆွေးနွေးမှု,သတင်း