အပစ်အခတ် ရပ်စဲရေး၏ အနှစ်သာရကို KNU ရင်ဆိုင်ရ

ကရင် အမျိုးသား အစည်းအရုံး (KNU) ၏ ထိပ်တန်း ခေါင်းဆောင် (၃) ဦးအား တာဝန်မှ ရပ်စဲ လိုက်ရခြင်းသည် KNU နှင့် အစိုးရ တို့၏ အပစ်ခတ် ရပ်စဲရေး အနှစ် သာရကို စတင် ခံစားလိုက်ရပြီး ဖြစ်သည်ဟု ဗဟို ကော်ဝင်လည်းဖြစ် ခရိုင် အတွင်း ရေးမှူး တဦး ဖြစ်သူက ဆိုပါသည်။
“ ဒါကမ ဖြစ်သင့် တာကို လုပ်လိုက်တာပါ။ KNU ဗဟို အထွေထွေ အတွင်း ရေးမှူးမှာ တာဝန် ရှိပါတယ်။ ဒီလို လုပ်လိုက်ရင် ဘယ်လိုဖြစ်သွား မလဲ ဆိုတာ စဉ်းစား မတတ်လို့သာ ဖြစ်တာပါ။ ဒါဟာ KNU အစိတ်စိတ် အမွှာမွှာ ဖြစ်အောင် လုပ်လိုက်တဲ့ သဘော ပါဘဲ။ ကျနော် သိသလောက် ဆိုရင် အများ ဆန္ဒနဲ့ ဆုံးဖြတ်တာ မဟုတ်ဘူး။ မလုပ်တတ်ရင်ကွဲ မထိုင်တတ်ရင်ပြဲ ဆိုသလိုပါဘဲ” ဟု ဆိုပါသည်။
ယခုကဲ့သို့ အရေး ယူရခြင်းသည် ဗိုလ်ချုပ်ကြီး မူတူးဆေးဖိုး ဦးဆောင်ပြီး KNU ၏ ဖါးအံ ဆက်ဆံရေး ဖွင့်ပွဲ အစီစဉ် ကို ဗဟိုက မသိသဖြင့် အရေးယူ ရခြင်း ဖြစ်ဖွယ် ရှိကြောင်း ထုတ်ပြန်ကြေညာချက် အရ သိရပါသည်။ http://www.phophtaw.org/burmese/index.php/news/local-news/2173------knla-.html

 KNU မှ ထုတ်ပယ် လိုက်သည့် ခေါင်းဆောင်များမှာ KNU ၏ စစ်ဦးစီးချုပ်၊ ဗိုလ်ချုပ်ကြီး မူတူးဆေးဖိုး၊ ဗဟို တရားရေး ဥက္ကဌ နှင့် အတွင်းရေးမှူး (၂) ဖြစ်သူ ပဒိုဒေးဗစ်ထောနှင့် လူမှုဝန်ထမ်းနှင့် ကယ်ဆယ်ရေး ဌာန တာဝန်ခံ ပဒို ရောဂျာခင်တို့ ဖြစ်ပါသည်။ ဤနေရာကို အစားထိုးမည့် သူများမှာ စစ်ဦးစီးချုပ် နေရာ၌ တပ်မဟာမှူး (၅) တပ်မဟာမှူး ဗိုလ်မှူးချုပ် ဘောကျော်ဟဲဖြစ်ပြီး ပဒိုစောရော်ဂျာခင် နေရာတွင် ဗဒို အယ်ကလူရွှေဦးအား ခန့်အပ်မည် ဖြစ်သည်ဟု KNU ခရိုင် အတွင်း ရေးမှူး တဦးက ဆိုပါသည်။

အစိုးရနှင့် အပစ်အခတ် ရပ်စဲရေး ကိစ္စသည် KNU ကို ဤအဖြစ်သို့ တွန်းပို့ စေခဲ့ပါသည်။ ၂၀၁၂ ခုနှစ် ဧပြီလက ဖါးအံမြို့၌ စတင် ဆွေးနွေးစဉ် ကပင်၊ ဗိုလ်ချုပ်ကြီး မူးတူးဆေးဖိုးက ဦးဆောင်ခဲ့ပါသည်။ ထိုအချိန် ကတည်းက အပစ်အခတ် ရပ်စဲရေးအတွက် မူအားဖြင့်သဘောတူ လက်မှတ်ထိုး ခဲ့သည့်ကို KNU ဗဟိုက လက်မခံခဲ့ပေ။ ဤကိစ္စ၌လည်း အတော်ပင် ညှိနှိုင်းခဲ့ရ သည်ဟု ဗဟို ကော်မီတီဝင် တဦးက ဆိုပါသည်။
KNU အထွေအထွေ အတွင်းရေးမှူး ဦးဆောင်ကာ အစိုးရနှင့် (၃) ကြိမ်တိုင် ဆွေးနွေး ခဲ့ပြီး ဖြစ်သော်လည်း တပ်နေရာ ချရေး ကိစ္စကို ယနေ့အထိ မဆောင်ရွက်နိုင်သေးပေ။ ဆက်ဆံရေးရုံး ဖွင့်လှစ်ရေးသည်လည်း အစိုးရနှင့် စတင် ဆွေးနွေး ကတည်းက သဘောတူ ထားခဲ့သည့် ကိစ္စဖြစ်ပါသည်။ ပဲခူးတိုင်း၊ ကျောက်ကြီးမြို့နှင့် တနင်္သာရီတိုင်း ထားဝယ်မြို့ ဆက်ဆံရေး ရုံးကို အထွေထွေ အတွင်းရေးမှူး အဖွဲ့က ဦးဆောင် ဖွင့်လှစ် ခဲ့ပြီး၊ ဘုရားသုံးဆူမြို့ ၊ မြဝတီနှင့် ဖါးအံမြို့ ဆက်ဆံရေး ရုံးကိုမူ ဗိုလ်ချုပ်ကြီး မူတူးဆေးဖိုးက ဦးဆောင် ဖွင့်လှစ်ခဲ့ပါသည်။
ဆက်ဆံရေးရုံး ဖွင့်လှစ်ရေး ကိစ္စတခုကြောင့် ဗိုလ်ချုပ်ကြီး မူတူးဆေးဖိုးတို့ကို အရေးယူခြင်း မဟုတ်ဟု ဗဟို ကော်မီတီဝင် တဦးက ဆိုပါသည်။ ဤပြသနာသည် ၂၀၁၀ ခုနှစ် ဒီဇင်ဘာလ၌ ကျင်းပသော (14) ကြိမ်မြောက် KNU ကွန်ဂရက်က စတင်ခဲ့ သည်ဟု ဆိုရပေမည်။ ကွန်ဂရက်ကျင်းပရာ၌ ကိုယ်စားလှယ်များ ရွေးချယ်ခြင်း၊ ၄င်းကိုယ်စားလှယ်များဖြင့် ရွေးကောက်ပွဲကို တဖက်သတ် အနိုင်ယူသည့် ကိစ္စများ ရှိခဲ့ရာက မကြေမနပ် ဖြစ်ပွား လာခဲ့သည်ဟု ညီလာခံ တက်ရောက် ခဲ့သူ တဦးက ဆိုပါသည်။

KNU အထွေထွေ အတွင်းရေးမှူး နော်စီဖိုးရာစိန်၏ ပြည်တွင်း ငြိမ်းချမ်းရေး ခရီးစဉ် တခု

ဤသို့ကြောင့် ၂၀၁၂ ခုနှစ်ဆန်းပိုင်းတွင် အထွေထွေ အတွင်းရေးမှူးတို့က အရေးပေါ် ဗဟို ကော်မီတီ ကျင်းပရေးကို ၂ ကြိမ်တိုင် ခေါ်ယူလိုသော်လည်း KNLA တပ်ဖွဲ့များနှင့် ခရိုင် တာဝန်ခံများက သပိတ်မှောက် သဖြင့် မကျင်းပနိုင်ခဲ့ပေ။ ဤသို့ ဖြစ်လာ ခဲ့ခြင်းကြောင့် KNU အထွေထွေ အတွင်းရေးမှူးတို့ အုပ်စုသည် KNU ခရိုင် အုပ်ချုပ်ရေး အဖွဲ့တွင်းနှင့် KNLA တပ်ဖွဲ့ အတွင်းသို့ သူ့လူငါ့လူ အစားထိုးရေး ဖြစ်လာခဲ့ရာက တဖက်နှင့် တဖက် မကြေနပ်မှုများ တိုးပြီး ဖြစ်လာခဲ့သည်ဟု ဆိုပါသည်။
ဤသို့သော အခြေအနေမှ စတင်ပြီး ယခုလို ပေါက်ကွဲ လာခြင်း ဖြစ်သည်ဟု KNU ဗဟို ကော်မီတီဝင် တဦးက ဆိုပါသည်။ KNU သည် အစိုးရနှင့် အပစ်အခတ် ရပ်စဲထားပါသည်။ ဤအတွင်းရေး အခြေအနေကိုလည်း  အစိုးရမှ သိရှိထားသဖြင့် ထိုအားနည်းချက်ကို သုံးပြီး KNU အား ထိုးခွဲလိုက်ခြင်း ဖြစ်သည်ဟု အောက်ခြေ တပ်မှူးများက ယူဆနေပါသည်။
ဤသို့ကြောင့် ယခု အရေးကိစ္စ၌ လက်ရှိ KNU ခေါင်းဆောင်များတွင် တာဝန်ရှိပြီး ဤကိစ္စ ဖြေရှင်းပေးရန် အနီးဆုံး ဗဟို ကော်မီတီ အစည်းအဝေး တခုခု အမြန် ခေါ်ယူကျင်းပရန် လိုအပ်ကြောင်း အောက်ခြေ တပ်မှူးများက တောင်းဆို နေကြပါသည်။

http://www.phophtaw.org/burmese/index.php/news/local-news/2191--knu-.html

Posted in: ကရင်,ကရင်တွေ့ဆုံဆွေးနွေးမှု,တွေ့ဆုံဆွေးနွေးမှု,ပဋိပက္ခ,သတင်း