ဒုတိယ အကြော့ PNLO နှင့် အစိုးရ တရားဝင် ဆွေးနွေးပွဲ

ပအို့ဝ် အမျိုးသား လွတ်မြောက်ရေး အဖွဲ့ချုပ် (PNLO) အဖွဲ့နှင့် ငြိမ်းချမ်းရေး ဖေါ်ဆောင်မှုလုပ်ငန်း ကော်မီတီ ဒုဥက္ကဌ ဦးအောင်မင်းအဖွဲ့တို့သည် အပစ်အခတ် ရပ်စဲရေး ကိစ္စအတွက် ယခုအပတ်ထဲ၌ တောင်ကြီးမြို့၌ ဆွေးနွေးရန် ရက်သတ်မှတ် ပြီးဖြစ်သည်ဟု  PNLO ဥက္ကဌ ဖြစ်သူ ခွန်ဥက္ကာက ဆိုပါသည်။
“ရက်အတိအကျတော့ ချိန်းလိုက်ပြီးပြီး။ လုံခြုံရေး အခြေအနေကြောင့် ရက်ကို မပြောတော့ဘူး။ ပထမ တစ်ခေါက်တုန်း ကတော့ (၇) ယောက် သွားပါတယ်။ အဲဒီအခေါက်မှာ အပစ်အခတ် ရပ်စဲရေးကိစ္စ ဆွေးနွေးဖို့အတွက် အဆင်မပြေခဲ့ပါ ဘူး။ ဦးအောင်မင်း မအားလို့ဆိုပြီး။ အခုတပတ်မှာတော့ ရုံးအဖွဲ့တွေက ပိုလာတဲ့အတွက် ကိုယ်စားလှယ် ဦးရေက (၁၀) ယောက်ဖြစ်သွားတယ်။ ဆွေးနွေးမဲ့ ကိစ္စတွေကတော့ ဘန်ကောက်မှာ သဘောတူထားတဲ့ အချက် (၆) ချက်ရယ် ပြီး တော့ နယ်မြေ ကိစ္စတခုပါ ထပ်မံ တင်ပြဖို့ ဖြစ်လာတော့ ပေါင်း (၇) ချက်နဲ့  ဆွေးနွေးပွဲမှာ အဓိကထား ဆွေးနွေးသွား မယ်”ဟု ဆိုပါသည်။
 PNLO နှင့် အစိုးရ အကြား ကြိုတင်ညှိနှိုင်းခဲ့သော အချက် (၆)ချက်မှာ-
၁) ပအိုဝ်အမျိုးသား လွတ်မြောက်ရေးအဖွဲ့ချုပ်နှင့် ပြည်ထောင်စု အစိုးရအကြား အပစ်ခတ် ရပ်စဲရေး လက်မှတ်ထိုး ရန်ကိစ္စ။
၂) နှစ်ဖက် သဘောတူနိုင်မည့်နေရာ၊ သင့်တော်သည့်နေရာတွင် ဆက်ဆံရေးရုံး ဖွင့်လှစ်ရန်ကိစ္စ။
၃) ပအိုဝ် PNLOအဖွဲ့ဝင်နှင့်  PNLA တပ်ဖွဲ့ဝင် အားလုံးက  လက်နက် မပါပဲ မြန်မာပြည်အနှံ့လွတ်လပ်စွာ သွားလာ ခွင့်ရရန်ကိစ္စ။
၄) ပဏာမ သဘောတူညီချက်ရပြီးပါက ပြည်တွင်းရှိ ပအိုဝ်နိုင်ငံရေး ပါတီများ၊ ပအိုဝ်အမျိုးသား ခေါင်းဆောင်များ၊ ပအိုဝ် ရဟန်း သံဃာတော်များ၊ ပြည်သူလူထုများနှင့် တွေ့ဆုံခွင့်ရရန် ကိစ္စ။
၅) ပအိုဝ်နယ်ထဲတွင်ရှိသည့် မူးယစ်ဆေးဝါးပြသနာ ၀ိုင်းဝန်း တိုက်ဖျက်ရန် ကိစ္စနှင့်
၆) ငြိမ်းချမ်းရေး တွေ့ဆုံဆွေးနွေးရေးဖြစ်စဉ် အားလုံး၌ ပွင့်လင်းမြင်သာမှု ရှိစေရန် မီဒီယာများနှင့် လွတ်လွတ် လပ်လပ် ဖေါ်ထုတ်ခွင့်ပြုရန်တို့ဖြစ်ပါသည်။

ပြည်တွင်းစစ်ဒဏ်ရဲ့ သားကောင်များ

ပအိုဝ့် အမျိုးသား လွတ်မြောက်ရေး အဖွဲ့ချုပ် (PNLO) သည် အပစ်အခတ် ရပ်စဲရန် ပြီးခဲ့သည့် ဇူလိုင် (၂၃) ရက်နေ့တွင် တောင်ကြီးမြို့သို့ ရောက်ရှိခဲ့သော်လည်း  ငြိမ်းချမ်းရေး ဖေါ်ဆောင်မှု လုပ်ငန်း ကော်မီတီ ဒုဥက္ကဌ ဦးအောင်မင်းသည် အချိန်မပေးနိုင်သေးသဖြင့် ယခုအပတ်ကို ရက်ရွေ့ဆိုင်းလိုက်ခြင်း ဖြစ်ပါသည်။
ဤသို့ကြောင့် PNLO ကိုယ်စားလှယ်များသည် ပအိုဝ့် အမျိုးသားအဖွဲ့ (PNO) ဥက္ကဌ ဦးအောင်ခမ်းထီး အပါ၀င် ပအိုဝ် နိုင်ငံရေးခေါင်းဆောင်များ၊  ပအို့ပါတီခေါင်းဆောင်များ၊ ပအိုဝ်ရဟန်း သံဃာတော်များနှင့် ပအိုဝ့် တက္ကသိုလ်ကျောင်း သားများနှင့်သာ တွေ့ဆုံပြီး ဆွေးနွေးအကြံပြုချက်များ ရယူသည့် ဆွေးနွေးပွဲသာ ကျင်းပခဲ့ရပါသည်။
PNLO သည် ပအိုဝ့်ပြည်သူ များ၏ အကြံပြုချက်များကို ဆွေးနွေးရန်၄င်း၊ နိုင်ငံတော် အစိုးရနှင့် အပစ်ခတ်ရပ်စဲရေး အတွက် ပြင်ဆင်မှုကို၄င်း၊ ရှေ့လုပ်ငန်းစဉ်များ အတွက်၄င်း၊ ဆွေးနွေးရန် ပြီးခဲ့သည့် သြဂုတ်လ ၁၆ ရက်နေ့၌ ထိုင်းနိုင်ငံ မယ်ဟောင်ဆောင် နယ်စပ် တနေရာတွင် အရေးပေါ် ဗဟိုကော်မီတီ အစည်းဝေး ကျင်းပခဲ့ပါသည်။
ထို့အပြင် ရန်ပုံငွေ (ဘဏ္ဍာငွေ) ရရှိရေး၊ ထိုင်းနိုင်ငံအတွင်း ခရီးသွားလာရေး အခက်အခဲနှင့် တပ်နေရာချထားရေး ကိစ္စ များကိုလည်း အထူးဆွေးနွေး ခဲ့သည်ဟု ဆိုပါသည်။
အစိုးရသည် အပစ်ရပ်စဲ ထားပြီးဖြစ်သော တိုင်းရင်းသားအဖွဲ့များကို ပြန်လည်ရန်စခြင်း၊ KIA တို့လိုအဖွဲ့မျိုးကို လုံးဝချေ မှုန်းခြင်း၊ KNU နှင့် တခြားအပစ်ရပ် အဖွဲ့တချို့အား ကောင်းမွန်ချောမွေ့သော ဆက်ဆံရေး ထားရှိခြင်း၊ ရခိုင်၊ ပအို့ (PNLO) စသော အဖွဲ့များလို အုပ်စု အလတ်စား အဖွဲ့များကို အပစ်အခတ်ရပ်ရေး ဆွေးနွေးပွဲများကျင်းပနေခြင်းနှင့် ပလောင်၊ ကယန်းပြည်သစ်ပါတီ တို့လို တိုင်းရင်းသား အဖွဲ့ငယ်များကိုမူ လျှစ်လျူရှုသည့် ပေါ်လစီဟူ၍ ခွဲခြားပြီး ဆက် ဆံနေသည့်ပေါ်လစီသာ ဖြစ်ပေလိမ့်မည်ဟု အကဲခတ်များက ဆိုပါသည်။

http://www.phophtaw.org/burmese/index.php/news/local-news/2034---pnlo----.html

Posted in: တွေ့ဆုံဆွေးနွေးမှု,ပအိုဝ်း,သတင်း,အခြား