အိန္ဒိယ - မြန်မာ အစိုးရအရာရှိများ နယ်စပ်ရေးရာဆွေးနွေး

အိန္ဒိယ မြန်မာ စစ်ဘက်နှင့် အရပ်ဘက် အရာရှိကြီးများ ပါဝင်သည့် အိန္ဒိယ-မြန်မာ နယ်စပ်ရေးရာ ကော်မတီ အစည်းအဝေးကို ဒီဇင်ဘာလ ၅ ရက်နေ့တွင် စတင်ခဲ့ပြီး ဆွေးနွေးမှုကို ဒီဇင်ဘာ ရ ရက်နေ့အထိ ပြုလုပ်သွားရန်ရှိ
သည်ဟု အိန္ဒိယ မဏိပူ ပြည်နယ်ထုတ် Imphal Free Press သတင်းစာတွင် ဖေါ်ပြထားသည်။

နှစ်နိုင်ငံနယ်စပ်ဒေသ လုံခြုံရေးနှင့် ပါတ်သက်သည့် ကိစ္စရပ်များအပေါ် အမြင်များ ဖလှယ်ကြမည်ဖြစ်ပြီး နှစ်နိုင်ငံ စစ်ဘက်၊ အရပ်ဘက် ကိုယ်စားလှယ်များ တက်ရောက်သည့် အရေးပါသည့် အစည်းအဝေး တရပ်အဖြစ် အသိအမှတ်ပြုရသည့် အစည်းအဝေးလည်းဖြစ်သလို နှစ်နိုင်ငံစလုံး၏ လက်နက်ကိုင်သူပုန် ကိစ္စရပ်များ ထိန်းချုပ်ထားနိုင်မှုကို အကဲဖြတ်သည့် အစည်းအဝေးလည်းဖြစ်သည်ဟု သတင်းစာက ရေးသည်။

ကိုယ်စားလှယ်များအား နှစ်နိုင်ငံအကြား ပူးပေါင်းဆောင်ရွက်မှုများနှင့် မိတ်ဖက်အသွင်ဆောင်သည့် ချစ်ကြည်ရင်းနှီးမှုများ တိုးတက်ခိုင်မာလာစေရေး နှစ်ဘက် အကူအညီများ၊ အမြင်များ ကိုဖလှယ်နိုင်သည့် အခွင့်အလမ်းများ ရရှိစေသည့် ဆွေးနွေးပွဲလည်း ဖြစ်သည်ဟု ဖော်ပြပါရှိသည်။

အစည်းအဝေးနှင့်အတူ မြန်မာအတွက် စက်ပစ္စည်းများ အမှတ်တရ လက်ဆောင်အဖြစ် အိန္ဒိယက ပေးအပ်မည်ဟု သိရသည်။ အိန္ဒိယနိုင်ငံက ဖြေတူးစက် ၁၂ စီး အပါအဝင် မြေညှိစက် လေးစီးကိုလည်း မြန်မာ၏ အခြေခံ အဆောက်အအုံများ ဖွံ့ဖြိုးတိုးတက်ရေးအကူအညီအဖြစ် နယ်စပ်မြို့ဖြစ်သည့် မိုးရေးမြို့တွင် ပေးအပ်မည်ဖြစ်သည်
ဟုလည်း ဖော်ပြထားသည်။

ထိုစက်ပစ္စည်းများအား မြန်မာကိုယ်စားလှယ် အဖွဲ့အကြီးအကဲ အနောက်မြောက်တိုင်း စစ်ဌာနချုပ် တိုင်းမှူး ဗိုလ်ချုပ်စိုးလွင် မှ လက်ခံရယူမည်ဖြစ်သည်။ အမှတ်တရ စက်ပစ္စည်းများ လက်ဆောင်ပေးပွဲကို နှစ်နိုင်ငံစလုံးမှ ကိုယ်စားလှယ်များ တက်ရောက်ကြပြီး အိန္ဒိယ ဘက်မှ ဒုဗိုလ်ချုပ်  Lt Gen AK Sahni ဦးဆောင်တက်ရောက်သည်။

http://www.mizzimaburmese.com/news/inside-burma/10539-2012-12-06-11-11-07.html

Posted in: နယ်စပ်ရေးရာ,သတင်း