နိုင်ငံရေး တွေ့ဆုံဆွေးနွေးရန် အဆင်သင့်ရှိဟု KIO က ပြော

ချင်းမိုင်(မဇ္စျိမ)။     ။ အစိုးရတပ်နှင့် ကချင်လွတ်လပ်ရေးအဖွဲ့တို့ တိုက်ပွဲများဖြစ်ပွားနေစဉ် ဝန်ကြီး ဦးအောင်မင်း ဦးဆောင်သည့် ပြည်ထောင်စု ငြိမ်းချမ်းရေး လုပ်ငန်းဖော်ဆောင်ရေး ကော်မတီနှင့် နိုင်ငံရေးတွေ့ဆုံ ဆွေးနွေးရန် အဆင်သင့်ရှိသည်ဟု KIO ၏ ပြောရေးဆိုခွင့်ရှိသူ ဦးလနန်က ပြောသည်။

“အခု ဘယ်တော့ ပြန်တွေ့ကြမယ်ဆိုတဲ့အပိုင်းမှာ ဦးအောင်မင်း သူ အစည်းအဝေးမှာ ပြောတဲ့အပိုင်းဘဲ ရှိတယ်။ အခု ပြန်တွေ့ဖို့က တကယ်လို့များ ဦးအောင်မင်းဘက်က ပြန်ပြီးတွေ့ရအောင်ဆိုရင်တော့ တွေ့ဖို့ အဆင်သင့်ပါ”ဟု သူက ပြောသည်။

ပြီးခဲ့သည့် အောက်တိုဘာလ ၃၀ ရက်နေ့က တရုတ်နိုင်ငံ ရွှေလီမြို့တွင် တွေ့ဆုံစဉ် KIO နိုင်ငံရေး တွေ့ဆုံဆွေးနွေးမှု
ပြုလုပ်ရန် တင်သွင်းပြီးနောက် ပြည်ထောင်စုဝန်ကြီး ဦးအောင်မင်းက တစ်လအတွင်း ပြန်လည်တွေ့ဆုံရန် ပြောဆိုခဲ့
သည်ဟုလည်း ဦးလနန်က မဇ္စျိမကို ပြောသည်။

“ကျနော်တို့ဘက်က ကန့်သတ်တဲ့ ဘောင်မရှိတဲ့ နိုင်ငံရေး တွေ့ဆုံဆွေးနွေးပွဲကို အဲဒီနေ့မှာ စတင်ရအောင်ဆိုပြီး အဆိုတင်သွင်းခဲ့တယ်။ ပြောဆိုရမဲ့ အပိုင်းတွေ အားလုံး ကျနော်တို့ ပြင်ဆင်သွားခဲ့တယ်။ ဒါပေမဲ့ ကျနော်တို့ အဆိုတင်သွင်းတာကို သိတာနဲ့ သူက နောက်တခါဆွေးနွေးပွဲ ဘယ်လို လုပ်ကြမယ်ဆိုပြီး ပြောတော့ သူက နိုင်ငံရေး
ဆွေးနွေးမှု ပြန်အချိန်ဆွဲလိုက်တဲ့ ပုံစံဖြစ်သွားတယ်”ဟု သူက ဆက်ပြောသည်။

ဝန်ကြီး ဦးအောင်မင်းနှင့် KIO တို့ ပြန်လည်တွေ့မည့်အစီအစဉ်ကို ကချင်ငြိမ်းချမ်းရေး အကျိုးဆောင်များက ဆက်သွယ်ခဲ့သော်လည်း နှစ်ဘက်လုံးက တရားဝင် အကြောင်းကြားလာခြင်း မရှိသေးဟု ငြိမ်းချမ်းရေး အကျိုးဆောင်
ဦးလမိုင်ဂွမ်ဂျာက ပြောသည်။

“သူတို့(အစိုးရ)က ကေအိုင်အိုတွေဘက်က ဘယ်တော့ တွေ့မယ်ဆိုတာကို စောင့်နေတယ်လို့ ပြောတယ်။
 ကေအိုင်အိုတွေဘက်မှာလည်း ရှေ့တန်းမှာ တိုက်ပွဲတွေက ဖြစ်ပွားနေတယ်ဆိုတော့ ဘာမှ မပြောလာသေးဘူး။ တိုက်ပွဲတွေ ဆက်တိုက် ဖြစ်လာတယ်ဆိုတော့ ပြန်တွေ့ဖို့ကတော့ ဘယ်တော့လည်းဆိုတာ မပြောတတ်တော့ဘူး”ဟု သူက မဇ္စျိမကို ပြောသည်။

နှစ်ဘက် တိုက်ပွဲ ဖြစ်ပွားမှု အခြေအနေနှင့် ပတ်သက်၍ ကချင်ပြည်နယ် ပန်ဝါမြို့နယ် တရုတ်-မြန်မာ နယ်ခြားမှတ်တိုင် ၆ နယ်မြေအတွင်း နှစ်ဖက် တိုက်ပွဲများ  ဖြစ်ပွားနေကာ အစိုးရ၏ စစ်အင်အား စစ်ရဟတ်ယဉ်ဖြင့် ထပ်မံ ဖြည့်တင်းထားမှုများ ရှိနေသည်ဟု ဦးလနန်က ပြောသည်။

ယမန်နေ့က အစိုးရ၏ တပ်မ ၈၈ လက်အေက်ခံ ခြေမြန်တပ်ရင် တပ်ရင်း ခမရ ၁၃ တပ်ဖွဲ့များအား မြစ်ကြီးနားမြို့မှ ပန်ဝါဒေသဘက် အမြောက်လက်နက်ကြီးများ သယ်ဆောင်လာ၍ ယနေ့ နံနက် ၁၀ နာရီချိန်မှစ၍ လက်နက်ကြီး
များဖြင့် KIO ၏ရှေ့တန်းစခန်းများရှိရာသို့ ပစ်ခတ်မှုများ ရှိနေသည်ဟု ဦးလနန်က ပြောသည်။

“မနေ့က ဟတ်စကီ ခေါက်တုံ့ခေါက်ပြန်ဆို ရ စင်းလောက်ရှိတယ်။ ကျနော်တို့စခန်းရှိတဲ့ ဘက်မှာ ရှေ့တန်းစခန်းရုံး
တွေ ဖွင့်ပြီးမှ အခြေပြုနေကြတယ်။ သူတို့ဘက်က လက်နက်ကြီးနဲ့ ပစ်တော့ ကျနော်တို့ဘက်က ပြန်ပစ်ဖို့ လက်လှမ်း
မမီဘူး”ဟု ပြောသည်။

လက်နက်ကြီးများဖြင့် ပစ်ခတ်ပြီးနောက် အစုုိးရ၏ ခြေမြန်တပ်ဖွဲ့များ အင်အားတိုးမြင့်ချလာမှု ရှိလာမှ ခုခံ တိုက်ခံရန် စောင့်ကြည့်နေသည်ဟု သူက ဆိုသည်။ ထိုဒေသတွင် ယခု ဒီဇင်ဘာလ ၁ ရက်နေ့မှစတင် တိုက်ပွဲများ
နေ့စဉ် ဖြစ်ပွားနေရာမှ ယနေ့ ကြာသာပတေးနေ့တွင် လက်နက်ကြီးများဖြင့် ပစ်ခတ်နေသည်ဟု သူက မဇ္စျိမကို ပြောသည်။

 “မနေ့တနေ့က ပို့ပေးတာက ခမရ ၂၆၀ ပို့ပေးတယ်။ မနေ့ကတော့ ခမရ ၁၃ ပို့ပေးတယ်။ ခုဒီနေ့ တပ်မ ၈၈ တပ်မမှူး ပန်ဝါဘက်ကို လေကြောင်းဖြင့် တက်ပြီး စစ်ဆင်ရေးကွပ်ကဲဖို့ အဆင်သင့်လုပ်နေကြတယ်”ဟု ဆက်ပြော
သည်။

အလားတူ ယခုလ ၃ ရက်နေ့က ဖားကန့်မြို့နယ်  တနိုင်းကားမလမ်းမပေါ်ရှိ စစ်ကြောင်း တက်လာသဖြင့် ရှရုဇွပ်ကျေးရွာအနီး  အစိုးရဘက်မှ လက်နက်ဖြင့် ပစ်ခတ်ခြင်းကြောင့် ဒေသခံ ရွာသားသုံးဦး ကျည်ဆံထိမှန်ကာ တဦးသေဆုံးသွားပြီး နှစ်ဦးမှာ မြစ်ကြီးနားမြို့ ပြည်သူ့ဆေးရုံတွင် ဆေးကုသမှု ခံယူနေသည်ဟု အမျိုးသားဒီမိုကရေစီ အင်အားစု NDF ပါတီမှ ကချင်ပြည်နယ် တာဝန်ခံ ဒေါ်ဘောက်ဂျာက ပြောသည်။

နမ္မတီး သို့မဟုတ် မြစ်ကြီးနားဘက်မှ အစိုးရ၏ စစ်ယဉ်တန်းများလည်း ထပ်မံ တက်လာမည်ဟု ဆိုကာ တနိုင်းကားလမ်းတလျှောက် လုံခြုံရေး တပ်များ စောင့်ကြပ်မှု ရှိနေသည်ဟု သူက မဇ္စျိမကို ပြောသည်။

http://www.mizzimaburmese.com/news/inside-burma/10538--kio-.html

Posted in: ကချင်,ကချင်တွေ့ဆုံဆွေးနွေးမှု,တွေ့ဆုံဆွေးနွေးမှု,သတင်း