ဒေါ်အောင်ဆန်းစုကြည်ကို ယုံကြည်ကြောင်း ဒု ဗိုလ်ချုပ်ကြီး ယွက်စစ် ပြော

လွှတ်တော်တွင်းဝင်ရောက်ပြီး အစိုးရနှင့် လက်တွဲလုပ်ဆောင်နေသည့် ဒေါ်အောင်ဆန်းစုကြည် ကို ယုံကြည်ကြောင်း ရှမ်းတိုင်းရင်း သား လက်နက်ကိုင်အဖွဲ့ ခေါင်းဆောင်တဦးဖြစ်သည့် ဒု ဗိုလ်ချုပ်ကြီး ယွက်စစ် က လွိုင်တိုင်းလျန်း ဌာနချုပ်၌ ဧရာဝတီ နှင့် မကြာ သေးခင်က သီးသန့် တွေ့ဆုံစဉ် ပြောဆိုလိုက်သည်။
ဒေါ်အောင်ဆန်းစုကြည် သည် ပြည်ထောင်စုကြီးအတွင်း ဒီမိုကရေစီ တံခါးကို ဖွင့်ပေးခဲ့သူဖြစ်ကြောင်း ထို့အတူ သူ၏ ဖခင်ဖြစ်သူ ဗိုလ်ချုပ် အောင်ဆန်း ပြုလုပ်ခဲ့သော “ပင်လုံ စာချုပ်” သဘောတူညီချက်အတိုင်း ပြုစုပျိုးထောင်ပြီး လုပ်ဆောင်သွားမည် ဆိုသည့် အချက်အပေါ်လည်း RCSS/SSA အနေဖြင့် ယုံကြည်ကြောင်း ဖေဖော်ဝါရီ ၈ ရက်နေ့က သွားရောက်သည့် ၆၆ နှစ်မြောက် ရှမ်းပြည် အမျိုးသားနေ့ ခရီးစဉ်၌ တွေ့ဆုံရာတွင် သူက ပြောဆိုခြင်း ဖြစ်သည်။
“ဒေါ်အောင်ဆန်းစုကြည်ကို ကျနော်တို့အနေနဲ့လည်း ယုံကြည်တယ်၊ ဘာဖြစ်လို့လဲဆိုတော့ ဒီပြည်ထောင်စုထဲမှာ ဒီမိုကရေစီကို လမ်းစ တံခါးလာဖွင့်ပေးတာလည်း ဒေါ်အောင်ဆန်းစုကြည်ပဲဖြစ်တယ်၊ ဒေါ်အောင်ဆန်းစုကြည်က ကြေညာ ထားတာတော့ ရှိတာပေါ့နော်၊ သူ့ရဲ့ဖခင် ဗိုလ်ချုပ်အောင်ဆန်းလုပ်သွားတဲ့ ပင်လုံစာချုပ် သဘောတူညီချက်အတိုင်း သူပြန်လာပြီးတော့ ပြုစု ပျိုးထောင်ပြီးတော့ လုပ်သွားမယ်ဆိုတဲ့ အချက်ကိုလည်း ကျနော်တို့အနေဲ့ ယုံကြည်ထားပါတယ်”ဟု ရှမ်းပြည် ပြန်လည်ထူထောင်ရေး ကောင်စီ (RCSS) ၏ ဥက္ကဋ္ဌ ဒု ဗိုလ်ချုပ်ကြီး ယွက်စစ် က ပြောသည်။
ဒေါ်အောင်ဆန်းစုကြည် နေအိမ်အကျယ်ချုပ်က လွတ်မြောက်လာပြီးနောက် အမျိုးသားပြန်လည် ရင်ကြားစေ့ရေးနှင့် ဒုတိယ ပင်လုံညီလာခံ (သို့မဟုတ်) ၂၁ ရာစု ပင်လုံညီလာခံ ဖြစ်မြောက်ရန် ကူညီဆောင်ရွက် သွားမည်ဖြစ်ကြောင်း သဘောထား ထုတ်ပြန်ထားသည်။
ဒုတိယ ပင်လုံညီလာခံ ဖြစ်မြောက် လာရေးအတွက် ရှမ်းလက်နက်ကိုင် ခေါင်းဆောင်များကဲ့သို့ပင် အခြားသော တိုင်းရင်းသား လက်နက်ကိုင် ခေါင်းဆောင်များနှင့် နိုင်ငံရေး ခေါင်းဆောင် အများစုကလည်း ကြိုးပမ်းမှုများ ရှိနေသကဲ့သို့ မျှော်လင့်မှု များလည်းရှိနေ ကြသည်။
ဒု ဗိုလ်ချုပ်ကြီး ယွက်စစ် က လက်ရှိအစိုးရ၏ ဒီမိုကရေစီ ပြုပြင်ပြောင်းလဲရေး လုပ်ဆောင်မှုများသည် တံခါးဖွင့်သည့် အဆင့်၌ သာ ရှိပြီး ထဲထဲဝင်ဝင် လုပ်ဆောင်ခြင်း မရှိသေးကြောင်း တိုင်းရင်းသား လက်နက်ကိုင် အဖွဲ့များနှင့် ပဏာမ အပစ်အခတ်ရပ်စဲမှု လုပ်ဆောင်နိုင်သည့် အစိုးရ ဖြစ်သော်လည်း ယခု အချိန်အထိ လက်တွေ့ အကောင်အထည် ဖော်ဆောင်မှုများကို သေသေချာချာ တွေ့မြင်ရခြင်း မရှိသေးကြောင်း ပြောသည်။
ထို့အတူ လက်ရှိ အစိုးရစစ်တပ်သည်လည်း ဒေါ်အောင်ဆန်းစုကြည်၏ ဖခင် ဗိုလ်ချုပ်အောင်ဆန်း တည်ထောင်ခဲ့သော တပ်မတော် မဟုတ်တော့ကြောင်း ဗိုလ်ချုပ်အောင်ဆန်း တည်ထောင်ခဲ့သော တပ်မတော်သည် အတိတ်ကာလတွင် ပြိုကွဲပျက်စီး သွားခဲ့ပြီ ဖြစ်ကြောင်း ပြောသည်။
“ဗိုလ်ချုပ်အောင်ဆန်း တည်ထောင်ထားတဲ့ တပ်မတော်က ၁၉၆၂ ခုနှစ် ဦးနေဝင်း အာဏာသိမ်းလိုက်ကတည်းက ဒီတပ်တွေ အကုန်လုံး ပျက်သွားပြီ၊ အဲဒီနောက်ပိုင်း တပ်မတော် ဆိုတာက ဗိုလ်ချုပ်အောင််ဆန်း တည်ထောင်လာခဲ့တဲ့ တပ်မတော် မဟုတ် တော့ဘူး၊ ဒီလို ကျနော်တို့ ယုံကြည်ထားတယ်” ဟု ဒု ဗိုလ်ချုပ်ကြီး ယွက်စစ် က ပြောသည်။
RCSS/SSA နှင့် အစိုးရတို့ ပဏာမ အပစ်အခတ်ရပ်စဲရေး သဘောတူညီမှုများ ပြုလုပ်ထားသော်လည်း အစိုးရ စစ်တပ်ဘက်က ချိုးဖောက်မှုတွေရှိနေပြီး သဘောတူညီမှုရရှိပြီးနောက် နှစ်ဘက် တိုက်ပွဲပေါင်း ၄၀ ကျော်ဖြစ်ပွားခဲ့ကြောင်း၊ သို့သော် RCSS/SSA အနေဖြင့် ငြိမ်းချမ်းရေးလမ်းစဉ်ပေါ်တွင် ရပ်တည်ကာ ပြဿနာများကို ဖြေရှင်းသွားမည် ဖြစ်ကြောင်းလည်း ၎င်းက ပြောဆိုသည်။
RCSS/SSA အနေဖြင့် နိုင်ငံရေး ပါတီတရပ်အသွင်ဖြင့် ၂၀၁၅ ရွေးကောက်ပွဲ ဝင်ရန်ရှိမရှိ သတင်းထောက်များက မေးမြန်းရာတွင် ၎င်းတို့အနေဖြင့် ရွေးကောက်ပွဲ စနစ်ကိုလက်ခံကြောင်း ရွေးကောက်ပွဲဝင်ရောက်ရေး အခြေအနေမှာ အစိုးရနှင့် ဆက်လက် ဆွေးနွေး ရမည့် ဆွေးနွေးပွဲ ရလဒ်များအပေါ်တွင်မူတည်ကြောင်း ဒု ဗိုလ်ချုပ်ကြီး ယွက်စစ် က ရှင်းပြသည်။

http://burma.irrawaddy.org/archives/33901

Posted in: RCSS/SSA,သတင်း