မြန်မာအစိုးရအရာရှိအားSSPP/SSA လွှတ်ပေးပြီး၊ ဒေသခံလူထုအားအစိုးရတပ်လွှတ်မပေး ၁၇-၁ ဖြင့်တရားစွဲ

ပြန်ပေးဆွဲထားရသည့် မြန်မာအစိုးရအရာရှိအား တနင်္လာနေ့က SSPP/SSA ကလွှတ်ပေးပြီးဖြစ်သော်လည်း အစိုးရစစ်တပ် ထိန်းသိမ်းထားသည့် ဒေသခံရွာသားများကိုမူ ပြန်လွှတ်မပေး သည့်အပြင် လေးယောက်အနက် တချို့အား လားရှိုးပို့၍ ပုဒ်မ ၁၇-၁ ဖြင့်ထပ်မံအမှုဖွင့်ထားကြောင်း ဒေသတွင်းသတင်းရပ်ကွက်ကဆိုပါသည်။

“ ကျန်တဲ့ လေးယောက် ပြန်လွှတ်ပြီလို့ သူတို့သတင်းလွှင့်နေပေမယ့်တကယ်တမ်းကျတော့ ပြန်မလွှတ်သေးဘူး။ တချို့ကလဲ ခမရ ၃၂၄ ထဲမှာရှိတယ်။ တချို့ကလဲ နမ္မတူရဲစခန်းမှာရှိတယ်။ စိုင်းကျော်အေးကတော့ အခု လားရှိုး ရဲစခန်းရောက်နေတယ်။ သူ့ကို မြန်မာစစ်တပ်က အမှုဖွင့်အရေးယူထားတယ်။ ၁၇-၁ နဲ့” ဟု နမ္မတူဒေသခံ စိုင်းခမ်းကပြောသည်။

ဩဂတ်စ်လ ၂၃ ရက်က သျှမ်းပြည်မြောက်ပိုင်း နမ္မတူမြို့၌ စတင်အဖမ်းခံရသော စိုင်းကျော်အေး၏ လက်ကိုင် ဖုန်းထဲ၌ သျှမ်းပြည်တပ်မတော်မှ အရာရှိတချို့၏ ဖုန်းနံပတ်ပါနေသဖြင့် မတရားအသင်း၊ သူပုန်နှင့်ဆက်သွယ် ထောက်ပံ့သူဟု မြန်မာစစ်တပ်က ဖမ်းဆီးစွပ်စွဲကာ ယခုချိန်အထိ ပြန်မလွှတ်ပေးဘဲ လားရှိုးမြို့ ခလရ ၄၁ သို့ ပို့ဆောင်ချုပ်နှောင်၍ အမှတ် ၁ ရဲစခန်း၌ အမှုဖွင့်တရားစွဲထားသည်ဟု မိသားစုဝင်များကပြောသည်။

နမ္မတူမြို့နယ် မန်စံအုပ်စုဒေသ၌ အဖမ်းခံရသည့်ရွာသား ၁၀ ဦးအနက် ပိန်းထောန်ရွာသား စိုင်းကျော်အေး၊ နောင်အော့ရွာသားစိုင်းကမ်၊ ပိန်းလုံရွာသား စိုင်းလ၊ နားကေးရွာ သားစိုင်းအိုက်တင်း တို့လေးယောက် ဆက်လက် အဖမ်းခံနေရဆဲဖြစ်ကာ စိုင်းလ နှင့် စိုင်းအိုက်တင်းမှာမူ ဩဂတ်စ်လ ၃၁ ရက်ကတည်းက သေဆုံးဖွယ်ရှိကြောင်း၊ သို့သော် မိသားစုဝင်အနေဖြင့်လည်း မည်သည့်သတင်းမျှထပ်မံမကြားသိရကြောင်း နားကေးရွာ ဒေသခံတဦး ကလည်း သျှမ်းသံတော်ဆင့်အားပြောပြသည်။

ထို့အပြင် ယခုလဆန်းပိုင်းကလည်း မန်စံအုပ်စု နားဟုတ်ရွာသူကြီးအားဖမ်းဆီးရိုက်ခဲ့သေး၏။ ကြက်မွေးမြူ ရေး ခြံမှ ကြက်များသေရာ ရွာခံအချို့နှင့်ကလေးအချို့ အဆိုပါကြက်သေများအား တယောက် ၂ ကောင် ၃ ကောင် ဆွဲလာသည်ကိုမြင်သည့် မြန်မာစစ်ကြောင်းက သူပုန်များအား ထောက်ပံ့ ကျွေးမွေးရန်အတွက်ဟု စွပ်စွဲကာ နားဟုတ်ရွာသူကြီးကို ခေါ်ယူဖမ်းချုပ်၍ ဘုန်းကြီးကျောင်း ဇရပ်၌ ညလုံးပေါက် ရိုက်နက်၏။ မိုးလင်းသော် မိုးထဲ လေထဲပစ်ထား ထဲ့ပြီး နိုင်ငံရေးပါတီများအား တိုင်ကြားလျှင် လာရောက်ပစ်သတ်မည်ဟုလည်း  ခြိမ်းခြောက်ခဲ့ သေး ကြောင်း မန်စံဒေသခံတဦးက ပြောသည်။

“ရွာသူကြီးကို ရွာရဲ့ဇရပ်မှာ တညလုံးရိုက်နှက်စစ်ဆေးတယ်။ ပူကျယ်က မဟုတ်ပါဘူး လို့ပြောတာကို ဝန်မခံချင် ဦး ဆိုပြီး မြန်မာစစ်သားတွေက တညလုံးရိုက်တာလေ။ ပြီးတော့ မနက်ရောက်တော့ ပူကျယ်ကို မိုးရွာ ထဲမှာ ပစ်ထားတယ်။ ပိုက်ဆံ တစ်သောင်းကျပ် ပစ်ထားပေးပြီး   ၁- နမ္မတူက ကျားဖြူအမတ် နန်းခမ်းအေး ကိုသွား မတိုင်ရဘူး။ ၂- ဆေးရုံမှာ ဆေးသွားမကုရဘူး- လို့အမိန့်ပေး ခြိမ်းခြောက်ထားတယ်တဲ့။ ဆေးရုံတော့သွားမတင် ရဲဘူး” ဟု အဆိုပါ မန်စံဒေသခံ  လူငယ်ကဆက်လက်ပြောပြသည်။

အဖမ်းခံရသော ရွာသားများနှင့်လဲလှယ်ရန် ယခုလဩဂတ်စ်လ ၃၁ ရက်နေ့က မြန်မာစစ်တပ်၏  ခမရ ၃၂၂ က ဗိုလ်ကြီးသက်စိုးနှင့်နောက်လိုက်တပည့်တဦးအား သျှမ်းပြည်တပ်မတော် SSPP/SSA ကဖမ်းဆီးရာ ယမန်နေ့က ပြန်လည်လွှတ်ပေးလိုက်ပြီဖြစ်ကြောင်း SSPP/SSA အရာရှိတဦးကပြောသည်။ သို့သော် မြန်မာစစ်တပ် က ဒေသခံရွာသားများအား ယခုတိုင် ပြန်မလွှတ်ပေးသည့်အပြင် ၁၇-၁ ဖြင့်ပင်အမှုဖွင့်အရေးယူနေခြင်း ဖြစ်သည်။

တိုင်းရင်းသားလက်နက်ကိုင်တပ်ဖွဲ့များက မြန်မာအစိုးရ၏ ငြိမ်းချမ်းရေးဖော်ဆောင်ရေးကိုယုံကြည်ကာ ပြည် ထောင်စုအဆင့်အထိ တွေ့ဆုံဆွေးနွေးကာ အပစ်ရပ်ရေးလက်မှတ်ရေးထိုးခဲ့ကြသည်အထိရှိသော်လည်း မြန်မာ အစိုးရ၏ စစ်တပ်မှာ အဆိုပါငြိမ်းချမ်းရေးကို အလေးမထားဘဲ တိုင်းရင်းသားတပ်ဖွဲ့များအပေါ်  သူပုန်ဟု သတ် မှတ်နေသေးသည်ကို ၁၇-၁ အမှုဖွင့်အရေးယူပုံဖြင့် သိနိုင်ကြောင်း နိုင်ငံရေးပါတီဝင် သျှမ်းအမတ်များကပြောဆို သုံးသပ်ပါသည်။

http://www.burmese.panglong.org/news/90-2008-08-03-06-47-55/3482-ssppssa-----.html

Posted in: SSPP/SSA,စစ်ဆင်ရေး,သတင်း,သျှမ်း