အစိုးရနှင့် KIO တို့ ဆွေးနွေးနိုင်ရေး ကြန့်ကြာနေ

အစိုးရငြိမ်းချမ်းရေးအဖွဲ့နှင့် ကချင်လွတ်လပ်ရေးအဖွဲ့ (KIO) တို့ နှစ်ဘက် တွေ့ဆုံ ဆွေးနွေး နိုင်ရေးအတွက် သမ္မတ ဦးသိန်းစိန်၏ ညွှန်ကြားချက်မှတဆင့် ငြိမ်းချမ်းရေးအဖွဲ့က အစိုးရရုံးစိုက်ရာ နေပြည်တော်သို့ ကမ်းလှမ်း ထားသော်လည်း အဆင်မပြေ ဖြစ်ခဲ့ကြောင်း သိရသည်။
KIO က ၎င်းတို့နယ်မြေအတွင်း အစိုးရတပ်များဘက်က အင်အားတိုးချနေသည့် အပြင် စစ်ရေး ပြင်ဆင်မှုများ ရှိနေကြောင်း၊ ထိုကဲ့သို့သော အခြေအနေများက နှစ်ဘက်တပ်များအပေါ် ယုံကြည်မှု ကင်းမဲ့နိုင်သောကြောင့် နောက်ဆုံးအကြိမ် ကမ်းလှမ်းချက် ဖြစ်သည့် နေပြည်တော်တွင် ဆွေးနွေးရန်ကိစ္စ မဖြစ်နိုင်ကြောင်း ယခင်လ ၁၇ နှစ်ရက်နေ့က အကြောင်း ပြန်ထားသည်ဟု KIO ဘက်က ပြောသည်။
“အခုဆို ကျနော်တို့ ဗဟိုဌာနချုပ်နဲ့ အနီးဆုံးနေရာတွေကို သူတို့က အမြှောက်တပ်တွေချပြီး ပြင်ဆင်နေကြတယ်။ ဒီလိုမျိုး လုပ်နေတဲ့ အချိန်မှာ အစိုးရ ထိန်းချုပ်ထားတဲ့ မြို့တော်သွားပြီး တွေ့ဆုံဖို့ ဆိုတာကတော့ မဖြစ်နိုင်သေးဘူးဆိုတာ ဦးအောင်မင်းကို စာပို့ပြီးသားပါ။ သူတို့ဘာမှ အကြောင်း ပြန်မလာသေးဘူး” ဟု KIO ပြောရေးဆိုခွင့်ရှိသူ ဦးလနန်က ဧရာဝတီသို့ ပြောသည်။
KIO ဘက်က မြန်မာအစိုးရနှင့် တွေ့ဆုံရန် ကချင်ပြည်နယ် လွယ်ဂျယ်မြို့နယ် သို့မဟုတ် ရှမ်းပြည်နယ် မြောက်ပိုင်း မူဆယ် မြို့နယ်တို့ကို အဆိုပြုထားချက်အပေါ် အစိုးရဘက်က သဘောတူချက် မပေးနိုင်သကဲ့သို့ အစိုးရဘက်က ဗန်းမော်မြို့နှင့် ယခု နေပြည်တော်သို့ ကမ်းလှမ်းချက်များကိုလည်း နှစ်ဘက် ယုံကြည်မှု မပေးနိုင်သေးသော အခြေအနေများအရ ဟုဆိုကာ KIO ဘက်က ငြင်းဆိုလိုက်ခြင်း ဖြစ်သည်။
အစိုးရသစ်အနေဖြင့် တိုင်းရင်းသားလက်နက်ကိုင် ၁၀ ဖွဲ့နှင့် ငြိမ်းချမ်းရေး ဖော်ဆောင်နိုင်သည့် အနေအထားကို ရောက်ရှိနေပြီ ဖြစ်ကြောင်း၊ ကျန်ရှိနေသော ကချင်လွတ်မြောက်ရေး တပ်မတော် (KIA) နှင့်လည်း မကြာမီ အဆင်ပြေသွားနိုင်ကြောင်း ဘီဘီစီ မြန်မာပိုင်း အစီအစဉ်သို့ သမ္မတ ဦးသိန်းစိန်က ၎င်း၏ အမေရိကန် ခရီးစဉ်အတွင်း ပြောဆိုသွားသည်။
သမ္မတ၏ ပြောဆိုမှုနှင့် ပတ်သက်၍ ဦးလနန်က “သမ္မတ ပြောဆိုချက်က ပေါ့ဆလွန်းတယ်၊ နိုင်ငံရေးနည်းနဲ့ ဖြေရှင်းတဲ့နည်း မဟုတ်ဘဲနဲ့ ကျနော်တို့ တပ်တွေလည်း မပစ်တော့ဘူး။ KIA လည်း မပစ်တော့ဘူး ဆိုရင်တော့ ငြိမ်းချမ်းရေးရသွားမယ်ဆိုတဲ့ အလွယ်နည်း၊ ပြဿနာကို ရှောင်တဲ့ နည်းလမ်းကို သုံးတယ်၊ ဘယ်လိုဖြေရှင်းမယ်ဆိုတာမျိုးမဟုတ်ဘဲနဲ့ အဖြစ်မှန်ကို ဖုံးကွယ်ပြီး နိုင်ငံရေးအမြတ်ထုတ်ပြောဆိုသွားတယ်” ဟု ပြောသည်။
KIA နှင့် အစိုးရတပ်များ အကြား ကချင်ပြည်နယ်အတွင်း တိုက်ပွဲများဖြစ်ပွားနေခြင်းကို တပ်မတော်ဘက်မှ တိုက်ခိုက်မှုများ မပြုလုပ်ရန် သမ္မတက အမိန့်ထုတ်ခဲ့သော်လည်း KIA ဘက်က ယင်းသို့ အမိန့်ထုတ်ပြန်မှုများ ပြုလုပ်ခြင်းမရှိကြောင်း ဦးသိန်းစိန်က ပြောဆိုခဲ့သည်။
“ကျနော်တို့ ဘက်ကတော့ ကိုယ့်ကိုယ်ကိုယ် ခုခံ ကာကွယ်ဖို့အတွက် ကိုယ့်ကို ပစ်လာရင် ကိုယ်ကလည်း ပြန်ပြီးတော့ ပစ်ရမှာပဲ။ အဲဒီတော့ ဒီအမိန့်ကို မနာခံတာ တပ်မဟုတ်ပါဘူး၊ တပ်ကတော့ ကျနော်တို့ပေးထားတဲ့ အမိန့်အတိုင်းပဲ လိုက်နာဆောင်ရွက် ပါတယ်။ တဘက်က ပစ်လာတယ်ဆိုတော့ ပစ်ရ၊ ခတ်ရ၊ တိုက်ရတဲ့ သဘောပါ၊ တပ်က အမိန့် မနာခံဘူးဆိုတာ မရှိပါဘူး” ဟု ဦးသိန်းစိန်က ဆိုသည်။
ထို့အပြင် အတိုက်အခံ ခေါင်းဆောင် ဒေါ်အောင်ဆန်းစုကြည် အနေဖြင့် ငြိမ်းချမ်းရေး လုပ်ငန်းစဉ်တွင် ကိုယ်တိုင် ပါဝင် ဆောင်ရွက် နိုင်ခြင်း မရှိသေးသော်လည်း ထိုလုပ်ငန်းစဉ်အတွက် ဝန်ကြီးများက ဒေါ်အောင်ဆန်းစုကြည်ထံမှ အကြံဉာဏ်များ ရယူခဲ့ရကြောင်း ၎င်းက ဆက်ပြောထားသည်။
ယခုနှစ် နှစ်ဆန်းပိုင်းက KIA ကို တိုက်ခိုက်မှုများ မပြုလုပ်ရန် သမ္မတ ညွှန်ကြားချက်များ ကြားသိရပြီးနောက် KIA ကလည်း အောက်ခြေ တပ်အဆင့်ဆင့်ကို ပစ်ခတ်မှုများ မလုပ်ရန် လျှို့ဝှက်ညွှန်ကြားထားကြောင်း၊ သို့သော်လည်း ထိုအခြေအနေကို အစိုးရတပ်များက အခွင့်ကောင်းယူကာ လက်နက်ခဲယမ်းများနှင့် စစ်သည်အင်အားများ ဆက်တိုက် ဖြည့်တင်းလာမှုကြောင့် တိုက်ပွဲများ အရှိန်မြင့်လာခဲ့ရကြောင်း KIO ဘက်ကပြောသည်။
ထို့နောက် အစိုးရတပ်များက KIA ၏ တပ်စခန်းများကို သိမ်းပိုက်နိုင်ရေးအတွက် စခန်းသိမ်းတိုက်ပွဲများအတွက် ၁၂၀ မမ အမြှောက်ကြီးများကိုပင် အသုံးပြု၍ ထိုးစစ်ဆင်နေကြောင်း၊ ယခုအခါတွင် KIO ဗဟိုဌာနချုပ်အနီးသို့ပင် ရောက်ရှိနေပြီဖြစ် ကြောင်းနှင့် စက်တင်ဘာလ အတွင်း၌ပင် တိုက်ပွဲပေါင်း ၁၀၅ ပွဲ ဖြစ်ပွားခဲ့ကြောင်း ဦးလနန်က ပြောသည်။
“အဆင်ပြေဖို့ကတော့ လက်ရှိ အစိုးရက တိုင်းရင်းသား ပြဿနာနဲ့ ပတ်သက်ပြီးတော့ နိုင်ငံရေး နည်းလမ်းနဲ့ ဖြေရှင်းကြမယ်၊ အဲဒီနိုင်ငံရေး နည်းလမ်းကလည်း စစ်မှန်တဲ့ ဖက်ဒရယ် ပြည်ထောင်စု မူအတိုင်းသွားတဲ့ နိုင်ငံရေး နည်းလမ်း ဖြစ်မယ် ဆိုတဲ့ ကိစ္စကို သူအမှန်တကယ်ပဲ ထုတ်ဖော် ပြောဆိုလိုက်မယ်ဆိုရင်တော့ ပြည်တွင်းမှာ ဖြစ်ပွားနေတဲ့ စစ်ပွဲတွေက အတိုင်းအတာ တခုအထိ ပြေလျော့သွားဖို့ ရှိတယ်” ဟု သူက ဆိုသည်။
ရှမ်းပြည်နယ် မြောက်ပိုင်း ကွတ်ခိုင်မြို့နယ်နှင့် နမ့်ဆန် မြို့နယ်တို့တွင်လည်း KIA၊ ပလောင် လွတ်လပ်ရေး တပ်မတော် (TNLA) ပူးပေါင်းတပ်များနှင့် အစိုးရတပ်များ အကြား ယမန်နေ့နှင့် ယနေ့မနက်ပိုင်းများတွင် တိုက်ပွဲများ ဆက်တိုက် ဖြစ်ပွားလျက် ရှိကြောင်း TNLA ၏ အတွင်းရေးမှူး မိုင်းဖုန်းကျော်က ဧရာဝတီသို့ပြောသည်။
KIO နှင့် အစိုးရတပ်များအကြား ၂၀၁၁ ခုနှစ် ဇွန်လပိုင်းမှ စတင်ကာ ကချင်ပြည်နယ်အတွင်း တိုက်ပွဲများ ဖြစ်ပွားလျက်ရှိရာ သောင်းနှင့်ချီသော ဒေသခံများမှာ အိုးအိမ်၊ တောင်ယာများကို စွန့်ခွာ၍ တရုတ် – မြန်မာနယ်စပ် ဒုက္ခသည် စခန်းများ၊ ပြည်တွင်းစစ်ဖြစ်ရာ ဒေသအနီးရှိ မြို့ပေါ်များနှင့် တောတောင်များထဲတွင် ထွက်ပြေးခိုလှုံနေကြရပြီး နေရပ်ရင်းသို့ မပြန်နိုင်ကြသေးပေ။

http://burma.irrawaddy.org/archives/21813

Posted in: ကချင်တွေ့ဆုံဆွေးနွေးမှု,တွေ့ဆုံဆွေးနွေးမှု,သတင်း