ငြိမ်းချမ်းရေး၊ အမျိုးသားပြန်လည်သင့်မြတ်ရေးအတွက် စီအဲန်အက်ဖ် နှင့် နအဖ စကားပြောမည်

မတ်လ ၁၂ ရက်၊ ၂၀၀၇ ခုနှစ်။

စစ်မှန်သည့် ငြိမ်းချမ်းရေးနှင့် အမျိုးသားပြန်လည်သင့်မြတ်ရေး ပေါ်ထွန်းရန်အတွက် ချင်းအမျိုးသားတပ်ဦးက ယခုလ ၁၅ ရက် နေ့တွင် ချင်းပြည်နယ် တနေရာ၌ နအဖ စစ်အစိုးရနှင့် တွေ့ဆုံဆွေးနွေးမည်ဟု ချင်းအမျိုးသားတပ်ဦး (စီအန်အက်ဖ်) က ထုတ် ပြန် ကြေညာလိုက်သည်။

အဖွဲ့ဝင် ၁၀ ဦးပါရှိသည့် ချင်းအမျိုးသားတပ်ဦးအဖွဲ့ကို ဒေါက်တာ ရွှေခါးရ် နှင့် ဒုတိယ အဖွဲ့ခေါင်းဆောင် ပူးပေါလ်စမစ် တို့က အ ဖွဲ့ခေါင်းဆောင် အဖြစ် ဦးဆောင်မည်ဖြစ်ပြီး ယင်းတွေ့ဆုံပွဲသည် နအဖနှင့် စီအဲန်အက်ဖ် အကြား ပထမဦးဆုံး တွေ့ဆုံ ဆွေးနွေး ပွဲဖြစ်သည်။

တွေ့ဆုံဆွေးနွေးပွဲ အစီအစဉ်နှင့် ပတ်သက်၍ ကိုယ်စားလှယ်အဖွဲ့ခေါင်းဆောင် ချင်းအမျိုးသား တပ်ဦး၏ တွဲဖက်အထွေထွေ အတွင်းရေးမှူး ဒေါက်တာ ရွှေခါးရ် က ယခုလို ပြောသည်။

“ဒီနိုင်ငံရေးပြဿနာက တွေ့ဆုံဆွေးနွေးမှုနဲ့ဘဲ အဖြေရှာနိုင်မယ်လို့ ကျနော်တို့ခံယူထားတယ်။ ဒီလိုခံယူထားတာနဲ့အညီ ကျနော် တို့ ဒီတွေ့ဆုံပွဲကို သွားရခြင်းဖြစ်တာပေါ့နော်။ ဆိုတော့ စစ်မှန်တဲ့ ငြိမ်းချမ်းရေး ပေါ်ထွန်းလာဖို့ ရှေ့ရှုပြီးတော့ တကယ့်အမျိုးသား ပြန်လည် သင့်မြတ်ရေး ဖြစ်ဖို့အတွက်ကို ကျနော်တို့အဓိက ထားပြီးတော့ ဆွေးနွေးမှာ ဖြစ်ပါတယ်။”

၁၉၉၆ ခုနှစ် ဇူလိုင် ၂၃ ရက်နေ့တွင် ဖွဲ့စည်းခဲ့သည့် ချင်းငြိမ်းချမ်းရေး အကျိုးတော် ဆောင်အဖွဲ့၏ ကြားဝင်စေ့စပ် ကြိုးပမ်း ဆောင်ရွက်မှုကြောင့် ယခုတွေ့ဆုံဆွေးနွေးပွဲ ပေါ်ပေါက်လာရခြင်းဖြစ်သည်ဟု ကြေညာချက်တွင် ရေးသား ထားသည်။

ယခုတွေ့ဆုံဆွေးနွေးပွဲသည် နှစ်ဦးနှစ်ဖက် ယုံကြည်မှုတည်ဆောက်သည့် လမ်းစဖြစ်ကြောင်း အဖွဲ့ခေါင်းဆောင် ဒေါက်တာ ရွှေခါးရ် က ပြောသည်။

“ကျနော်တို့ ကြိုတင်ပဏမာ ညှိနှိုင်းတဲ့ အဆင့်သဘောဘဲဆိုတော့ အဓိက ကတော့ ကျနော် တို့ နောက်တခါ ဘာတွေ ဆွေးနွေး ရင်ကောင်းမလဲ ဆိုတဲ့ agenda  (လုပ်ငန်းအစီအစဉ်) ချမှတ်တဲ့ အဆင့်မှာပဲ ရှိပါမယ်။ ပြီးတော့ ဒုတိယ အနေနဲ့ကတော့ ဒီပထမဆုံး တွေ့ဆုံဆွေးနွေး ရတာဖြစ်သလို ယုံကြည်မှု တည်ဆောက်မှုအပိုင်းကို ပိုပြီးတော့ ဖြစ်ပါလိမ့်မယ်။”

ယခု ဆွေးပွဲတွင် နအဖနှင့် အပစ်အခတ်ရပ်စဲရန်မဟုတ်ဘဲ လက်ရှိကျင့်သုံးနေသည့် စီအန်အက်ဖ်၏ ဗျူဟာများထက် ပိုမိုပြီး ကောင်းမွန်သည့် နည်းလမ်းများကို ရှာဖွေချဉ်းကပ် ရခြင်းဖြစ်သည်ဟု ဒေါက်တာရွှေခါးရ် က ပြောသည်။

တွေ့ဆုံဆွေးနွေးပွဲတွင် ချင်းအမျိုးသားတပ်ဦးနှင့် လက်တွဲလုပ်ဆောင်နေသည့် ချင်းနိုင်ငံ ရေးပါတီများ၊ လူငယ်နှင့် အမျိုးသမီး များ၊ အခြားလူထုအခြေပြု အဖွဲ့အစည်းနှင့် ချင်းပြည်သူ လူထု၏ ဆန္ဒသဘောထား၊ ရပ်တည်ချက်များကို အလေးထား၍ ဆွေး နွေး သွားမည်ဟု ယနေ့ထုတ်ပြန်ကြေညာချက်တွင် ဖေါ်ပြထားသည်။

ထို့အပြင် ချင်းအမျိုးသားတပ်ဦးအနေနှင့် အခြားတိုင်းရင်းသားလူမျိုးများနှင့် မဟာမိတ် အင်အားစုများ၏ အကျိုးစီးပွားများကို ရှေ့ရှုပြီး အမျိုးသားပြန်လည် သင့်မြတ်ရေးအတွက် ဆွေးနွေးသွားမည်ဖြစ်သည်ဟု ထုတ်ပြန်ထားသည်။

ချင်းအမျိုးသားတပ်ဦးသည် ဒီမိုကရေစီနှင့် လွတ်လပ်ရေးကို အခြေခံသည့် ဖက်ဒရယ် ပြည်ထောင်စု တည်ဆောက်ရန် နှင့် ချင်းလူမျိုး တို့၏ ကိုယ်ပိုင်ပြဌာန်းခွင့်ရရှိရန်ကို ရည်ရွယ်ပြီး  ၁၉၈၈ မတ်လ ၂၀ ရက်နေ့ တွင် စတင်တည်ထောင်ခဲ့သည်။

http://www.nmg-news.com/nmg/news120307b.html

Posted in: ချင်း,တွေ့ဆုံဆွေးနွေးမှု