ရှမ်းမြောက်ပိုင်း အစိုးရတပ် လတ်တလော လူ့အခွင့်အရေး ချိုးဖောက်မှုများ ထုတ်ဖော်

စံခလပူရီ (မဇ္စျိမ)။   ။ သင်္ကြန်ကာလအတွင်း ရေကစားထွက်သည့် လူငယ်များကို ဖမ်းဆီးကာ လူသားဒိုင်းအဖြစ် အစိုးရတပ်က အသုံးပြုခဲ့ကြောင်း ရှမ်း လူ့အခွင့်အရေး မဏ္ဍိုင် (SHRF) က ဆိုသည်။

ရှမ်းပြည်နယ် မြောက်ပိုင်း တန့်ယန်းမြို့နယ်၊ မိုင်းကောင် မှ နမ့်ပန်ချောင်းကျေးရွာသို့ မော်တော်ဆိုင်ကယ်ဖြင့်
ရေကစားထွက်သည့် အမျိုးသမီး/သား လူငယ် ၅၀ ခန့်ကို ထိုဒေသတွင် လှုပ်ရှားနေသည့် စစ်ကြောင်းက ဖမ်းဆီးကာ ၎င်းတို့၏ လုံခြုံရေးအတွက် ဝမ့်မူးဆေး မှ နမ့်လောင်း ကျေးရွာထိ စစ်ကြောင်း ရှေ့ နောက်တွင် လျှောက်စေကာ လူသားဒိုင်းအဖြစ် အသုံးပြုခဲ့သည်ဟု ဆိုသည်။

“ရေကစားဖို့ ဆိုပြီးတော့ ဆိုင်ကယ်လေးတွေနဲ့ သွားကြတာပေါ့ဗျာ။ အဲဒီမှာ စစ်ကြောင်း တကြောင်းက အဲဒီသွားတဲ့ လူငယ်တွေကို ရပ်ပြီးတော့မှ သူတို့ဆိုင်ကယ်ကို လမ်းဘေးရပ်ခိုင်းပြီး ဖမ်းထားတာပေါ့။ လူပေါင်း ငါးဆယ်လောက် ရတဲ့အခါကျမှ သူတို့ သွားလိုတဲ့နေရာကို သူတို့နဲ့အတူ လမ်းလျှောက်ခိုင်းပြီး သွားတာ။ ရှမ်းတပ်က သူတို့ကို ဝင်မပစ်အောင်ပေါ့ဗျာ။ သွားချင်တဲ့နေရာ ရောက်ပြီး ဆိုတဲ့အခါကျမှ ပြန်လာပြီးမှ အဲဒီလူငယ်တွေကို ဖမ်းတဲ့နေရာမှာပဲ
ပြန်လွှတ်တယ်” ဟု SHRF မှ ဦးခမ်းဟန်ဖ က ပြောသည်။

သင်္ကြန်အကြတ်နှင့် အတက်နေ့ (ဧပြီလ ၁၅ နှင့် ၁၆ ရက်နေ့) များတွင် ရှမ်းပြည် တပ်မတော် မြောက်ပိုင်း (SSA/SSPP) နှင့် အစိုးရတပ်ကြား တန့်ယန်းမြို့နယ်အတွင်း မိနစ်ပိုင်းမျှ ကြာသည့် တိုက်ပွဲများ သုံးကြိမ်ထက်မနည်း
ဖြစ်ပွားခဲ့ပြီးနောက် အစိုးရတပ်ဘက်က လက်နက်ကြီးများဖြင့် ပစ်ခတ်ရာမှ ကလေး နှစ်ဦး ဒဏ်ရာ ရရှိခဲ့ကာ စာသင်ကျောင်းနှင့် လူနေအချို့လည်း ပျက်စီးခဲ့သည်ဟု SHRF က တနင်္လာနေ့တွင် ထုတ်ပြန်ကြေညာသည်။

၎င်းပြင် ကလေးငယ်အချို့ ပါဝင်သည့် ရွာပေါင်း ၉ ရွာမှ လူထုများအား ဖမ်းဆီးရိုက်နှက်မှုကြောင့် ဒဏ်ရာပြင်းထန်စွာ ရရှိခဲ့ကြပြီး ရွာသားများ ထွက်ပြေးရန် အသုံးပြုသည့် ယာဉ်များကို အစိုးရတပ်မှ မီးရှို့ဖျက်ဆီးကာ တိုက်ပွဲ
ဖြစ်ပွားရာအနီးရှိ ကျေးရွာများကိုလည်း မီးရှို့ဖျက်ဆီးမည် ဖြစ်ကြောင်း ခြိမ်းခြောက်ခဲ့သည်ဟု ကြေညာချက်က ဆိုသည်။

“တချို့ရွာသားတွေက ထွက်ပြေးဖို့ ရွာကနေ ထွက်ကြတော့ စစ်ကြောင်းနဲ့ တွေ့ပြီးတော့ ဘယ်သွားဖို့လဲ ဘာညာ
မေးတော့ ကြောက်လို့ တခြားနေရာကို ထွက်ပြေးမယ် ပြောတော့ မသွားရဘူး ဆိုပြီးတော့မှ သူတို့ရဲ့ ဆိုင်ကယ်၊ သူတို့ရဲ့ ယာဉ်တွေကို ယူပြီးတော့မှ မီးရှို့ပစ်တယ်” ဟု ဦးခမ်းဟန်ဖ က ပြောသည်။

မတ်လ နှောင်းပိုင်းတွင် ရှမ်းပြည်နယ် မြောက်ပိုင်း၊ တန့်ယန်းမြို့နယ်ရှိ လွယ်လန်းနှင့် လွယ်စေး ဒေသ တဝိုက်တွင် တိုက်ပွဲများ ဖြစ်ပွားခဲ့ရာ ရွာပေါင်း ၁၆ ရွာမှ လူဦးရေ ၁,၀၀၀ ကျော် တန့်ယန်းမြို့ပေါ်သို့ ထွက်ပြေး ခိုလှုံခဲ့ကြရာမှ သင်္ကြန်ကာလ နောက်ပိုင်းတွင် တိမ်းရှောင်သူပေါင်း ခန့်မှန်းခြေ ၂,၀၀၀ ခန့် ရှိလာခဲ့သည်ဟု SHRF မှ မယိင်းဟာန်ဖ က ပြောသည်။

“အစတုန်းက တထောင်ကျော်ကျော်ပဲ ရှိတယ်ရှင့်။ နောက်တော့ သင်္ကြန်အချိန်မှာ တိုက်ပွဲ ထပ်ဖြစ်လို့ ထပ်ပြေးလာ
ကြတော့ နှစ်ထောင်လောက် ရှိပြီရှင့်” ဟု မဇ္စျိမကို ပြောသည်။

မြို့နယ် အုပ်ချူပ်ရေးအဖွဲ့၏ စီစဉ်မှုဖြင့် ဧပြီလ ၁၁ ရက်နေ့တွင် ဒုက္ခသည် ၃၀ ခန့် နေရပ် ပြန်သွားကြသော်လည်း တိုက်ပွဲများ ဆက်လက် ဖြစ်ပွားနေခြင်းကြောင့် တန့်ယန်းမြို့သို့ ဒုက္ခသည်များ ထပ်မံရောက်ရှိလာကြကာ ပြန်သွားသည့် ဒုက္ခသည်အချို့လည်း ပြန်လည် ရောက်ရှိလာကြသည်ဟု ကယ်ဆယ်ရေးစခန်း ကော်မတီဝင် ကိုစိုင်းလူ က ပြောသည်။

ဒုက္ခသည်များ၏ စားဝတ်နေရေးအတွက် လားရှိုးနှင့် တန့်ယန်းမြို့နယ်အတွင်းရှိ သံဃာတော်များ၊ လူငယ် အဖွဲ့အစည်းများ၊ လူမှု ကူညီရေးအသင်းများ၊ နိုင်ငံရေး ပါတီများနှင့် မြို့နယ် အာဏာပိုင် အဖွဲ့အစည်းများက အကူအညီများ ပေးလျက် ရှိသည်ဟု ဆိုသည်။

ဧပြီလ ၃ ရက်နေ့က အရှေ့မြောက်ပိုင်းတိုင်း စစ်ဌာနချုပ် (ရမခ) ရှိ ရွှေလီ ရိပ်သာတွင် အစိုးရ လျှပ်စစ်ဝန်ကြီး ဦးခင်မောင်စိုး၊ စီးပွားရေးနှင့် ကူးသန်းရောင်းဝယ်ရေး ဝန်ကြီး ဦးဝင်းမြင့်တို့နှင့် တွေ့ဆုံစဉ် ဒုက္ခသည်များအား
နေရပ်တွင် ပြန်လည်နေထိုင် လုပ်ကိုင်စားသောက်နိုင်ရန်အတွက် တိုက်ပွဲများ ထပ်မံမဖြစ်ပွားရန် SSA/SSPP ဘက်က တောင်းဆိုတင်ပြထားသော်လည်း တိုက်ပွဲများ ဆက်လက် ဖြစ်ပွားခဲ့ကာ၊ ယနေ့တွင်လည်း တန့်ယန်းမြို့နယ်၊ လွယ်ကျေး ကျေးရွာဘက်တွင် တိုက်ပွဲငယ် ဖြစ်ပွားခဲ့သည်ဟု SSA/SSPP မှ ဗိုလ်မှူးကြီး ဖိန်ဖ က ပြောသည်။

ဆက်သွယ်ရေး အခက်အခဲကြောင့် မည်သည့်တပ်ရင်းနှင့် ဖြစ်ပွားခဲ့ခြင်းနှင့် ထိခိုက်မှု အခြေအနေကို မသိရှိရ
သေးကြောင်း သူက ပြောသည်။

ရှမ်းပြည် တပ်မတော် မြောက်ပိုင်း (SSA/SSPP) သည် ၂၀၁၂ ခုနှစ်၊ ဇန်နဝါရီလတွင် အစိုးရနှင့် အပစ်အခတ် ရပ်စဲရေး သဘောတူညီချက် ရရှိခဲ့ပြီးနောက် အစိုးရတပ်နှင့် အကြိမ် ၁၀၀ ထက် မနည်း တိုက်ပွဲများ ဖြစ်ပွားခဲ့သည်ဟု ဗိုလ်မှူးကြီး ဖိန်ဖ က ပြောသည်။

http://www.mizzimaburmese.com/news/inside-burma/11386-2013-04-22-14-43-24.html

အပြည့်အစုံသို့... »

ရှမ်းပြည်အတွင်း အစိုးရတပ်များ လူ့အခွင့်အရေး ချိုးဖောက်ဆဲဟု SWAN ပြော

ချင်းမိုင်(မဇ္စျိမ) ။      ။ ရှမ်းအမျိုးသမီးရေးရာ ဆက်သွယ်လှုပ်ရှား ဆောင်ရွက်ရေးအသင်း (SWAN) ၏ ပထမဆုံး အကြိမ် မြန်မာနိုင်ငံသို့ သွားရောက်ခဲ့သော ခရီးစဉ်စဉ်တွင် ရှမ်းပြည်နယ်အတွင်း မြန်မာအစိုးရ စစ်တပ်ဘက်မှ လူ့အခွင့်အရေးများ ဆက်လက် ချိုးဖောက်နေကြောင်း တွေ့ရှိရသည်ဟု ဗုဒ္ဓဟူးနေ့မှာ ထိုင်းနိုင်ငံ၊ ချင်းမိုင်မြို့၌ သတင်းစာရှင်းလင်းပွဲ ပြုလုပ်၍ ပြောဆိုလိုက်သည်။

မြန်မာအစိုးရက ငြိမ်းချမ်းရေး လုပ်ဆောင်ခြင်း မရှိဘဲ ပြည်ပ ရင်းနှီးမြှုပ်နှံမှုများသာ ဦးစားပေး လုပ်ဆောင်နေသဖြင့် စစ်မှန်သည့် ငြိမ်းချမ်းရေးအတွက် ရှမ်းပြည်နယ်အတွင်း တိုးမြှင့်ချထားသော အစိုးရစစ်တပ်များ ဆုတ်ခွာပေးရန်နှင့်
နိုင်ငံရေး တွေ့ဆုံဆွေးနွေးမှုများ လုပ်ဆောင်ရန် တိုက်တွန်းလိုက်သည်။

နိုဝင်ဘာလကုန်ပိုင်းမှ ဒီဇင်ဘာလ ၁၈ ရက်နေ့ထိ သီတင်းသုံးပတ်ကြာ SWAN ခရီးစဉ်အတွင်း ရှမ်းပြည်နယ်
တောင်ကြီး၊ နောင်ချို၊ ကျောက်မဲ၊ သီပေါ၊ လာရှိုး၊ သိန္နီ၊ ကွတ်ခိုင်၊ နမ့်ခမ်း၊ မူဆယ်နှင့် ကျိုင်းတုံမြို့နယ် ၁ဝ ခု တို့တွင် ရှမ်းလူမှုအသိုင်းအဝိုင်းများနှင့် ရှမ်းပြည်သူလူထုတို့နှင့် တွေ့ဆုံဆွေးနွေးနိုင်ခဲ့သည်။

“ငြိမ်းချမ်းရေး လုပ်ပြီးတော့ တိုက်ပွဲတွေ ဆက်ဖြစ်နေတယ်။ ပြည်သူတွေ တောတောင်တွေမှာ ထွက်ပြေးနေရတယ်။ ခုချိန် လယ်ယာလည်း မရိပ်နိုင်ဘဲ ပစ်ထားရတယ်။ ရွာသားတွေ လူ့အခွင့်အရေး ချိုးဖောက်ခံရတယ်။ သူပုန်နဲ့ ဆက်သွယ်တယ် ဆိုပြီး ဖမ်းဆီး၊ ရိုက်နှက်တာတွေ ရှိနေတယ်။ လနဲ့ချီပြီး ချုပ်ထားတယ်။ တဖက်မှာလည်း လယ်မြေ သိမ်းတဲ့ ကိစ္စတွေ ရှိနေတယ်” ဟု SWAN မှ ပြောရေးဆိုခွင့်ရှိသူ ယိင်းဟန်ဖက မဇ္စျိမကို ပြောသည်။

မိုင်းရှုးမြို့နယ်မှ အမျိုးသမီးများ လိင်ပိုင်းဆိုင်ရာ အကြမ်းဖက်မှု လေးခု ကြားသိခဲ့ရပြီး ကျူးလွန်သူများမှာ အစိုးရ စစ်တပ်ဘက်မှ ကျူးလွန်ခြင်း ဖြစ်သော်လည်း အသေးစိတ် အချက်အလက်ကို ထုတ်ဖော်ပြောဆိုရန် မသင့်သေး
ကြောင်း မဇ္စျိမကို ပြောသည်။

ရှမ်းပြည်နယ် ၅၅ မြို့နယ်တွင် ယခင်က တမြို့နယ်လျှင် တပ်ရင်း တရင်းသာ ရှိခဲ့ရာမှ ယခုနောက်ပိုင်း ၁၈ဝ ရင်းထိ ရှိလာသဖြင့် လူ့အခွင့်အရေး ချိုးဖောက်မှုများ ပိုမိုဖြစ်လာမည်ကို ဒေသခံများ စိုးရိမ်နေသည်ဟု ပြီးခဲ့သည့် ဇွန်လဆန်းပိုင်းက ရှမ်းလူမှုအခြေပြုအဖွဲ့များက ပြောဆိုခဲ့သည်။

သီပေါမြို့နယ်၊ ဘော်ကြိုကျေးရွာမှ ၅ မိုင်အကွာတွင် ဖြတ်သန်းသွားသော တရုတ်ပိုင် ရေနံနှင့်သဘောဝ ဓါတ်ငွေ့ ပိုက်လိုင်းသည် ဆားဓါတ်ကြောင့် ပေါက်ကွဲစေနိုင်၍ ဒေသခံများ စိုးရိမ်သဖြင့် ရပ်တန့်ပေးရန် ဒေသခံများ တောင်းဆို
နေသည်ဟု ယိင်းဟန်ဖ က ပြောသည်။

“မီးတိုင်တောင် တနှစ် မခံဘူး။ ၅ လ၊ ၆ လောက်ဆိုရင် ဓါတ်တိုင် လဲတာ။ ခု ပိုက်လိုင်းကို ဆားဓါတ်စားပြီး သံချေး တက်လာပြီးတော့ ပေါက်ကွဲသွားရင် ဘယ်လိုလုပ်မှာလဲ။ တချို့ ပိုက်လိုင်းတွေ ဆိုရင် မတည့်ဘူး။ ကောက်နေတယ်။ ဖာထားတာလည်း ရှိတယ်။ အဲဒါကြောင့် ဒီ ဂက်စ်ပိုက်လိုင်းက တကယ့်ကို အန္တရာယ် ကြီးနေပြီ၊ ပေါက်ကွဲသွားရင်
ပြည်သူတွေရဲ့ လုံခြုံရေးကို ဘယ်သူတာဝန်ယူမလဲ”ဟု သူက မဇ္စျိမကို ပြောသည်။

ထိုဂက်စ်ပိုင်းလိုင်း စီမံကိန်း ရပ်ဆိုင်းရေးအား ရှမ်းပြည်သူများက လွှတ်တော် ကိုယ်စားလှယ်များမှ တဆင့် တင်ပြခဲ့သော်လည်း မည်သို့မျှ တုံ့ပြန်ခြင်း မရှိသေးဟု ဆိုသည်။

ထိုစီမံကိန်းကို တရုတ် အမျိုသား ရေနံကော်ပိုရေးရှင်း CNPC က လုပ်ဆောင်နေပြီး ပိုက်လိုင်းကို ရခိုင်ပြည်နယ်၊ ရမ်းဗြဲ ကျွန်းမှတဆင့် မန္တလေးတိုင်း၊ မေမြို့မှ ရှမ်းပြည်နယ် မြောက်ပိုင်း သီပေါ၊ နောင်ချို၊ မူဆယ်၊ နမ္မတူ၊ ကျောက်မဲ
နှင့် နမ့်ခမ်းမြို့များမှ တရုတ်နိုင်ငံထိ ဖြတ်သန်း ဖောက်လုပ်မည် ဖြစ်သည်။ ထိုပိုက်လိုင်းအတွက် နမ့်ခမ်းမြို့နယ် အတွင်း လယ်ယာမြေ ဧကပေါင်း ၁၅,ဝဝဝ သိမ်းပိုက်ခံနေရသည်ဟု ရှမ်းသဘာဝ ပတ်ဝန်းကျင်ထိန်းသိမ်းရေးအဖွဲ့က မဇ္စျိမကို ပြောဆိုခဲ့ဖူးသည်။

ထိုကိစ္စကို ရှမ်းနိုင်ငံရေးပါတီများ၊ လက်နက်ကိုင် အဖွဲ့အစည်းများ၊ လူမှုအခြေပြု အဖွဲ့အစည်းများနှင့် လွှတ်တော် ကိုယ်စားလှယ်များနှင့် ပူးပေါင်း၍ ရှမ်းပြည်သူလူထုများ၏ အခက်အခဲ အသေးစိတ်ကို ကောက်ခံပြီး လွှတ်တော် ကိုယ်စားလှယ်များမှတဆင့် ဗဟိုအစိုးရထံ တင်ပြသွားရန် စီစဉ်ထားသည်ဟု ယိင်းဟန်ဖ က ပြောသည်။

ယင်း SWAN အမျိုးသမီးအဖွဲ့များ သွားရောက်သည့် ခရီးစဉ်အတွင်း အစိုးရ၏ ထောက်လှမ်းရေးများ၏ စောင့်ကြည့်မှု များနှင့် စစ်ဆေးမေးမြန်းမှု အမျိုးမျိုးကြံုတွေ့ခဲ့ရသည်ဟုလည်း ယိင်းဟန်ဖ က ပြောသည်။

နိုဝင်ဘာလ ၂၆ ရက်နေ့မှ ၂၈ ရက်နေ့ထိ ရန်ကုန်မြို့တွင် SWAN အပါအဝင် ရှမ်းအမျိုးသား ဒီမိုကရေစီ အဖွဲ့ချုပ်၊ ရှမ်းတိုင်းရင်းသားများ ဒီမိုကရက်တစ် ပါတီ၊ ရှမ်းလူမှု အခြေပြု အဖွဲ့အစည်းများ၊ ရှမ်းလက်နက်ကိုင် အဖွဲ့အစည်းများ
နှင့် ရှမ်းစာပေယဉ်ကျေးမှု အသင်းများ ပါဝင်သော 'ငြိမ်းချမ်းရေးအတွက် ယုံကြည်မှု တည်ဆောက်ခြင်း' ဆွေးနွေးပွဲ ကျင်းပခြင်းအားဖြင့် ရှမ်းလူမျိုးများ ညီညွတ်ကြရန် သဘော တူညီခဲ့ခြင်းမှာ ငြိမ်းချမ်းရေး တည်ဆောက်စဉ် ကာလ အတွင်း ကောင်းကျိုးတခုအဖြစ် ရှုမြင်သည်ဟု ဆက်ပြောသည်။

http://www.mizzimaburmese.com/news/inside-burma/10614-----swan-.html

အပြည့်အစုံသို့... »

၁၇/၁ ဖြင့် လူထုအားဖမ်းဆီးပါက ဦးအောင်မင်းကိုပါ ဖမ်းဆီးရမည်ဟု RCSS/SSA ပြော

မြန်မာစစ်တပ်က ပြည်သူလူထုအား မတရားအသင်းနှင့်ဆက်သွယ်သည့်ပုဒ်မ ၁၇/၁ နှင့် ဖမ်းဆီးပါက ပြည်ထောင်စု ငြိမ်းချမ်းရေး ဖော်ဆောင်ရေး လုပ်ငန်းကော်မတီ ဒု-ဥက္ကဋ္ဌ ဦးအောင်မင်းကိုလည်း ဖမ်းဆီးရမည်ဟု RCSS/SSA က ပြောကြားလိုက်သည်။

ကျိုင်းတုံ သျှမ်းနှစ်သစ်ကူး အထူးပွဲတော်၌ တွေ့ရသည့် ဗိုလ်မှူးချုပ် ပေါင်ခေး (Photo : Kawli Media)

“သျှမ်းစာပေနဲ့ အမျိုးသားရေး ဟောပြောပွဲမှာ RCSS က စဝ်ပေါင်ခေးက ပြောတာ။ တကယ်လို့ ဗမာ စစ်တပ်က လူထုတွေကို သူပုန်နဲ့ ဆက်သွယ်တယ်ဆိုပြီး ပုဒ်မ ၁၇/၁ နဲ့ ဖမ်းဆီးရင် ဦးအောင်မင်း ကို လည်း ဖမ်းရမယ်။ ဦးအောင်မင်းကလည်း သူပုန်နဲ့ဆက်သွယ်တယ်ပေါ့” - ဟု ကျိုင်းတုံ သျှမ်းနှစ်သစ် ကူးပွဲ တက်ရောက်သူတစ်ဦးက ပြောပါသည်။

တပ်မတော်၏ အခန်းမှာ တိုင်းပြည်နှင့် လူထုကို ကာကွယ်ပေးရန် ဖြစ်ကြောင်း၊ လူထုက ညှင်းပန်း နှိပ်စက်ခံရခြင်း၊ စစ်ဆေးခံရခြင်း၊ ဖမ်းဆီးခံရခြင်း ရှိပါက RCSS/SSA ၏ ဆက်ဆံရေးရုံးသို့မဟုတ် ပြန်ကြားရေးရုံးသို့ လာရောက်တိုင်ကြားနိုင်ကြောင်း၊ လူထု၏ ကြုံတွေ့နေရသည့် ပြဿနာများကို ကူညီဖြေရှင်းပေးမည်ဖြစ်ကြောင်း RCSS/SSA ငြိမ်းချမ်းရေးဖေါ်အောင်ရေးအဖွဲ့ခေါင်းဆောင် ဗိုလ်မှူးချုပ်ပေါင်ခေး က ပြောဆိုခဲ့သည်ဟု ဆို၏။

ဤကိစ္စနှင့် စပ်လျဉ်း၍ ဦးအောင်မင်း ကိုယ်တိုင်က သျှမ်းတိုင်းရင်းသားများ ဒီမိုကရေစီအဖွဲ့ချုပ် SNLD ခေါင်းဆောင် ခွန်ထွန်းဦး အား “ခွန်ထွန်းဦး သူပုန်နှင့်ဆက်သွယ်၍ အဖမ်းခံရလျှင် ကိုယ်တိုင်လာ ရောက် အာမခံ လွှတ်ပေးမည်။ မလွှတ်ပေးနိုင်ပါက ကိုယ်တိုင် ခွန်ထွန်းဦးနှင့်အတူ အကျဉ်းကျခံမည်” ဟု ဂျူလိုင် ၂၂ ရက်နေ့က ပြောခဲ့သည်။

“ကိုယ်စားလှယ်ရုံးထားရှိရာမြို့တွေ မှာ RCSS/SSA ပြန်ကြားရေးရုံးတွေလဲ ဆက်တိုက်ဖွင့်သွားမယ်လို့ ပြောတယ်။ လူထုရဲ့ မကျေနပ်ချက်တွေကို တိုင်ြကားဖို့လို့ပြောတာဘဲ။ ဘယ်အဆင့်အထိ လုပ်ပေး နိုင်မလဲဆိုတာတော့ စောင့်ြကည့်ရမှာပေါ့” - ဟု ကျိုင်းတုံပွဲတော်ရောက် ချင်းမိုင်မှ စိုင်းဆိုင် က ပြောပါသည်။

လူထုအနေဖြင့် မေလ ၁၉ ရက်နေ့ သဘောတူညီချက်အရ RCSS/SSA နှင့် ငြိမ်းချမ်းရေးအတွက် ပူးပေါင်းဆောင်ရွက်ခွင့် ရထားသော်လည်း ယခုတိုင် ပုဒ်မ ၁၇/၁ ကြောင့် စိတ်ပူမှုရှိနေကြကြောင်း သတင်းအရင်းအမြစ်များက ဆိုပါသည်။

ဒီဇင်ဘာ ၁၂ ရက် မွန်းလွဲ ၁ နာရီမှ ညနေ ၅ နာရီထိ တိုင်းရင်းသားစာပေဆိုင်ရာ ဟောပြောပွဲကျင်းပ ရာ အားဂျန်နန်သန်းက ကျိုင်းတုံမြို့သမိုင်းကြောင်း၊ ဆရာစိုင်းအောင်ထွန်းက သျှမ်းလူမျိုးများ၏ သမိုင်းကြောင်း၊ စိုင်းဆမ်တစ် ခေမရဌ်က သျှမ်းလူမျိုး၏ ယုံကြည်ကိုးကွယ်မှု၊ ခံယူမှုအကြောင်း၊ ဗိုလ်မှူးချုပ်ပေါင်ခေးက သျှမ်းအမျိုးသားရေးအကြောင်း၊ စိုင်းပင်ခမ်းက သျှမ်းနှစ်သစ်ကူးအကြောင်းကို ဟောပြောခဲ့ကြသည်။
http://www.burmese.panglong.org/news/85-2008-08-01-03-14-40/3730------rcssssa-.html

အပြည့်အစုံသို့... »

ထိုင်းနယ်စပ် ပလောင်ရွာသားအား မြန်မာစစ်တပ်ကပစ်ခတ် ချင်းမိုင်ဆေးရုံသို့ပို့ရ

သျှမ်းပြည်တောင်ပိုင်း ထိုင်းနယ်စပ်၌ လှုပ်ရှားနေသော မြန်မာအစိုးရစစ်တပ်တခု၏ စစ်ကြောင်းတကြောင်း က ထိုင်းဘက် ခြမ်းနေ ပလောင်ရွာသားအား ပစ်ခတ်သဖြင့် ထိုင်းနိုင်ငံချင်းမိုင်မြို့ ဆွန်ဒေါက်ဆေးရုံ၌ ဆေးကုသမှုခံယူနေကြောင်း လူနာနှင့်နီးစပ်သူများပြောပြချက်အရသိရသည်။

“ ထိုင်းဘက်ခြမ်း နောလဲရွာမှာနေတဲ့ စိုင်းအောင်နဲ့အဖွဲ့ လမ်းကူးပြီး သျှမ်းပြည်ဘက်ခြမ်းမှာရှိတဲ့ လွယ်ဟိုနုတ်တောင်မှာ  ယာလုပ်ဖို့သွားတာ။ အဲဒါကို ကင်းလှည့်ဗမာစစ်သားတွေက ပေးမသွားဘူး။ စိုင်းအောင်က သူ့မှာပါဘာတဲ့ ရေပုံးကို ယာတဲမှာ သွားထားပြီးပြန်ထွက်အလာမှာ ဗမာစစ်သားက ပစ်လိုက်တာ။ သူ့ဗိုက်ထဲ ကျည်ဆံဝင်သွားတယ်။ အဲဒါကြောင့် ချင်းမိုင်ဆေးရုံကို ပို့လိုက်ရတယ်။ အခုဆွန်ဒေါက်ဆေးရုံမှာ” - ဟု စိုင်းအောင်နှင့်ခင်မင်ရင်းနှီးသည့် လုပ်ငန်းဖော်တဦးက သျှမ်းသံတော်ဆင့်အား ပြောပြသည်။

ယခုလ ၂ ရက်နေ့ မနက်ပိုင်း ၁၀ နာရီအချိန်တွင် ယာခင်းသွားသည့် ထိုင်းနိုင်ငံ ချင်းမိုင်ခရိုင် ဖှန်မြို့နယ် မယ့်ငေါန်းအုပ်စုရှိ လွယ်အန်ခန် ဘုရင့်စိုက်ပျိုးရေးစီမံကိန်း အနီး နောလဲရွာတွင်နေထိုင်သော ပလောင်အမျိုးသား စိုင်းအောင် ၂၃ နှစ်အား မြန်မာစစ်ကြောင်းက ပစ်ခတ်ခြင်းဖြစ်သည်။

“သူတို့အဖွဲ့ကို စိုင်းအောင်ကနေ အကြမ်းဖက်မှာစိုးလို့ ပစ်လိုက်တာလို့ပြောတယ်။  ဗိုက်ထဲ ကို ကျည်ဆံဝင်သွားတဲ့  စိုင်းအောင်ကို  ရွာသူကြီးနဲ့ ဒေသခံတွေ နယ်စပ်လုံခြုံရေးထိုင်းစစ်သားတွေ ဆွေမျိုး တွေ ကဘဲ ဖှန်ဆေးရုံကိုပို့တယ်။ အဲတာ ထုတ်ဖို့ ဖှန်ဆေးရုံက ချင်းမိုင်ဆေးရုံကို လွှဲပြောင်းပေးလိုက်တယ်။ ထုတ်ရခက်တယ် လို့ဆေးရုံကပြောတယ်။ ဒီကိစ္စနဲ့ပတ်သက်ပြီး နှစ်ဘက်နိုင်ငံ နယ်ခြားတာဝန်ခံတွေက ပြောဆိုဆွေးနွေးတာ မတွေ့ရဘူး။ ဘယ်လိုဆက်ဖြစ်လာမလဲ စောင့်ကြည့်ရတာပေါ့” ဟု လွယ်အန်ခန်တွင် အလုပ်လုပ်နေသည့် သျှမ်းပြည်သားအလုပ်သမား စိုင်းရွှေက ပြောပြသည်။ 

အဆိုပါမြန်မာစစ်တပ်မှာ သျှမ်းပြည်အရှေ့ပိုင်း မိုင်းတုံမြို့နယ်အခြေစိုက် ခလရ ၂၂၅ ၏ ပါခီးတပ်စခန်းမှ ဖြစ်ကြောင်း သိရသည်။ ဤစခန်းကို ၂၀၀၁ ခုနှစ်က SSA တောင်ပိုင်းက သိမ်းပိုက်ဖူးသည်။

လွယ်အန်ခန်အနီး နောလဲရွာသည် ထိုင်းနယ်အတွင်း ရှိပြီး ထိုင်း-မြန်မာနယ်စပ်မျဉ်းနှင့် ၃ ကီလိုမီတာတွင် ကွာဝေးသည်။ ပုံပါကျင်သို့ ခြေကျင်သွားပါက ၃ နာရီသာကြာကြောင်း စိုင်းရွှေက ဆက်ပြောပြသည်။ နယ်စပ်မျဉ်းတလျှောက် လူသွားလမ်း ခြားထားရာ လမ်း၏လက်ယာေမှာထိုင်းနယ်မြေဖြစ်ပြီး လမ်း၏လက်ဝဲဘက်မှာ သျှမ်းပြည်နယ်မြေဖြစ်သည်ဟုဆိုသည်။

http://www.burmese.panglong.org/news/90-2008-08-03-06-47-55/3711-2012-12-06-12-24-32.html

အပြည့်အစုံသို့... »

အပစ်ရပ်ပြီးနောက် အဓမ္မပြုကျင့်မှုလျော့သွားသော်လည်း ညှင်းပမ်းမှုပိုမိုများပြားလာ

တိုင်းရင်းသားလက်နက်ကိုင်တပ်ဖွဲ့များနှင့် အစိုးရစစ်တပ်ကြား အပစ်ရပ်ကာ ငြိမ်းချမ်းရေးဆွေးနွေးပြီးနောက်ပိုင်းကျေး လက်ဒေသ၌ အဓမ္မပြုကျင့်ခံရမှု အနည်းငယ်လျော့သွားသည်ဟုဆိုသော်ငြားလည်း စစ်ပွဲများဖြစ်ပွါးရာဒေသတို့၌ ညှင်းပမ်းမှု ပိုမိုများပြားလာသည်ကို တွေ့ရသည်ဟု သျှမ်းလူ့အခွင့်အရေးဖောင်ဒေးရှင်း၏ နိုဝင်ဘာလထုတ် အစီရင်ခံစာတွင်ဖော်ပြထား သည်။

ဒေသခံ အမျိုးသမီးများအပေါ် အဓမ္မပြုကျင့်မှု၊ အမျိုးသားများအား ပေါ်တာဆွဲ သတ်ဖြတ်မှုတို့မှာ သိသိသာသာ ကျဆင်း သွားသည်ကိုတွေ့ရသော်လည်း ကျေးလက်လူထု၏ ပိုင်ဆိုင်မှုများကို ဓါးပြတိုက် လုယက်စားသောက်မှု၊ အိမ်မွေးတိရစ္ဆာန် များအား ဖမ်းဆီးသတ်ဖြတ်ယူငင်မှု စသည်တို့မှာလျော့ကျမသွားသည့်ပြင် စစ်ပွဲဖြစ်ပွါးရာဒေသတို့၌ ပိုမိုဖြစ်ပွါးလာသည် ကိုတွေ့ရကြောင်း အဆိုပါအစီရင်ခံစာ၌ ဖော်ပြထားသည်။

ယခင်က သေနတ်ဖြင့် ပစ်ခတ်သတ်ဖြတ်သည့်နည်းအစား ထိုးနှက်ရိုက်ပုတ်ခြင်း၊ လူထုပိုင်ပစ္စည်းဥစ္စာ ခိုးယူခြင်း၊ လူထု အားအဓမ္မခိုင်းစေခြင်း စသည်ဖြင့် နည်းလမ်းပြောင်းလဲလာကြောင်း၊ အဆိုပါ ဖြစ်ရပ်များအား သျှမ်းပြည်တောင်ပိုင်း ကွန်ဟိန်းမြို့နယ်၊ လဲချား၊ မိုင်းကိုင်၊ မိုးနဲနှင့်မိုင်းတုံမြို့နယ်တို့တွင် အများအပြားဖြစ်ပွါးနေသည်ကိုတွေ့ရကြောင်း ဆိုပါသည်။

ယမန်နှစ် ဒီဇင်ဘာလ ၂ ရက်က အပစ်ရပ်ရေးသဘောတူကြပြီးနောက်ပိုင်း မြန်မာစစ်တပ်ဘက်မှ စတင်တိုက်ခိုက်နေသည် သာမက လက်နက်ကြီးများသုံးသဖြင့် ဒေသခံလူထုတို့ ဆုံးရှုံးမှု ဒဏ်ရာရရှိမှုလည်း ပိုမိုများပြားကြောင်း ဆိုပါသည်။

အဆိုပါ တိုက်ပွဲဖြစ်ပွါးမှု၊ လယ်ယာမြေသိမ်းယူမှု စသည့် ဖြစ်ရပ်များကြောင့် ထိုင်းနိုင်ငံသို့ ထွက်ပြေးတိမ်းရှောင်သူများ လည်း များပြားနေလျက်ရှိရာ နယ်စပ်ပေါက်များဖြစ်သော မယ်ဟောင်ဆောင်ခရိုင်၊ ချင်းမိုင်၊ ချင်းရိုင်းခရိုင်တို့၌ လစဉ်လ တိုင်း ပျှမ်းမျှတလ ၁ ထောင်ခန့် ဝင်ရောက်နေကြောင်း နယ်စပ်နေ ဒုက္ခသည်များအရေးကူညီဆောင်ရွက် ပေးသည့်အဖွဲ့က ပြောပါသည်။

၁၉၉၆-၉၈ က သျှမ်းပြည်အလယ်ပိုင်း ၁၁ မြို့နယ် ရွာပေါင်း ၁၅၀၀ မှ လူဦးရေ ၃ သိန်းဝန်းကျင်မှာ အဓမ္မပြောင်းရွှေ့ ခိုင်းခြင်းခံရသဖြင့် ထိုစဉ်က ထိုင်းနယ်စပ်နှင့် ထိုင်းနိုင်ငံအတွင်း အများအပြားဝင်ရောက်ခိုလှုံခဲ့ကြသည်။ အချို့မှာ ထိုင်းနိုင်ငံသားကဒ်ရရှိသွားသော်လည်း အများအားဖြင့် ထိုင်းအစိုးရမှ ထုတ်ပေးသည့် တိုင်းပြည်မဲ့ကဒ်ပြားများ၊ ရွေ့ပြောင်းအလုပ်သမားကဒ်များဖြင့် ထိုင်းနိုင်ငံအတွင်း၌ ခိုလှုံနေကြရသည်။

http://www.shanhumanrights.org/index.php?option=com_content&view=article&id=349:november-2012&catid=76:2012&Itemid=77

http://www.burmese.panglong.org/news/90-2008-08-03-06-47-55/3709-2012-12-06-12-18-24.html

အပြည့်အစုံသို့... »

သျှမ်း၊ မြောက် အကြိမ်ကြိမ်ဗုံးပေါက်ကွဲမှုကြောင့် ကျားဖြူပါတီမှ လူထုနှင့်တွေ့ဆုံရှင်းလင်းရေးလုပ်ရန်စီစဉ်

ယခု လ အတွင်း သျှမ်းပြည်မြောက်ပိုင်း ကျောက်မဲမြို့နယ်အတွင်း အကြိမ်ကြိမ်ဗုံးပေါက်ကွဲမှုဖြစ်ပွါးရာ ဒေသခံပြည်သူလူထု တို့ ဓါးစာခံဖြစ်နေရသည့်ကိစ္စနှင့်ပတ်သက်၍ ကျားဖြူပါတီလွှတ်တော်အမတ်များက လူထုနှင့်တွေ့ဆုံရှင်းလင်းရေးပြုလုပ် သွားရန်စီစဉ်နေကြောင်း ကျားဖြူအမတ်များသတင်းရပ်ကွက်ကဆိုပါသည်။

၁၉ ရက်မနက်က ဗုံးနင်းမိသော ပကာကျေးရွာသူ နန်းအေးဌေး (ဓါတ်ပုံ-သျှမ်းသံတော်ဆင့်)

“ အခုလိုအကြိမ်ကြိမ် ဗုံးပေါက်ကွဲနေတာကြောင့် ဒေသခံလူထု အဖမ်းခံရတယ်။ ရိုက်နှက်ခံရတယ်။ အိမ်တွေပျက်စီးတယ်။ အဲလိုလုပ်နေတဲ့အပေါ် ကျနော်တို့ ကျားဖြူပါတီရဲ့ ပြည်သူ့လွှတ်တော် အမျိုးသားလွှတ်တော် အမတ်တွေကနေ လူထုနဲ့တွေ့ ဆုံပြီး ရှင်းလင်းပွဲလုပ်မယ်။ အစိုးရရဲ့ အုပ်ချုပ်ရေးပိုင်းက ဌာနဆိုင်ရာတွေ နဲ့အတူပေါ့နော်။ လာမယ့်အပတ်ထဲမှာ လုပ်ဖို့ စီစဉ်ထားတယ်” ဟု ကျားဖြူပါတီလွှတ်တော်အမတ် စိုင်းသန်းမောင်က သျှမ်းသံတော်ဆင့်အားပြောပြသည်။

သျှမ်းပြည်မြောက်ပိုင်း ကျောက်မဲခရိုင် မိုင်းငေါ့မြို့နယ်ခွဲ ၌ အမည်မသိလက်နက်ကိုင် အဖွဲ့က ဝမ့်တာ့လုံရွာထဲသို့ ယခုလ ၉ ရက်နေ့ မနက် ၃ နာရီတွင်တကြိမ်၊ ဝမ့်ပေါက်ရွာတွင် တကြိမ် (ရက်နှင့်အချိန်မသိရ)၊ ၁၄ ရက်နေ့ ဝမ့်လုံရွာတွင်တကြိမ် လက်နက်ကြီးပစ်ခတ်ခံရပြီး ၁၉ ရက် ကျောက်မဲမြို့နယ် ပိန္နဲကုန်းကျေးရွာအုပ်စု ပကာကျေးရွာတွင် ရွာသူတဦး ဗုံးနင်းမိ သဖြင့် ဆေးရုံ၌ ဆေးကုသမှုခံယူနေရသည်ဟု ဒေသတွင်း သတင်းရပ်ကွက်များက ဆိုပါသည်။

ရွာထဲသို့  လက်နက်ကြီးပစ်ခတ်မှုများကြောင့် ဒေသခံများ၏ နေအိမ်များ ထိခိုက်ပျက်စီးခဲ့ရပြီး ရွာအုပ်ချုပ်ရေးမှူးနှင့် ဒေသခံ လူထုတို့လည်း အစိုးရ၏ ရဲတပ်ဖွဲ့များဖမ်းဆီးခြင်းကို ခံကြရကြောင်း ဆိုပါသည်။

“ မိုင်းငေါ့မြို့နယ်ခွဲတဝိုက်မှာ ပြင်ပ လက်နက်ကိုင်တပ်ဖွဲ့တွေမရှိဘူး။ မြန်မာအစိုးရစစ်တပ်ဘဲရှိတယ်။ လက်နက်ကြီး ဒဏ်တွေကြောင့် ဝမ့်ပေါက်ရွာ သူကြီးဆိုရင် ခု မန္တလေးဆေးရုံမှာ ဆေးကုနေရတုန်းဘဲလို့ကြားရတယ်။ ပစ်ခတ်မှုတွေ ဗုံးကွဲမှုတွေဖြစ်ပြီးနောက်ပိုင်းမှာလဲ မိုင်းငေါ့အုပ်စု ဝမ့်ကောင်းရွာက ဥက္ကဌဟောင်း စိုင်းစံညွန့်နဲ့ ပြည်သူ့စစ် လုံးဂန္ဓမာ တို့ ၂ ယောက်ကို ပြီးခဲ့တဲ့ စနေနေ့က ရဲက လာဖမ်းတယ်။ စိုင်းစံညွန့် ကိုတော့ ဖမ်းတဲ့နေ့ မှာဘဲ ပြန်လွှတ်ပေးတယ်။ ကျန်တဲ့တယောက်ကိုတော့ မနေ့ညနေကမှပြန်လွှတ်တယ်။ ရွာသားတွေ သွားပြီးထောက်ခံလို့ ပြန်လွှတ်ပေးတာ” ဟု ကျောက်မဲမြို့ရောက် မိုင်းငေါ့ဒေသခံ နန်းလီ ကပြောသည်။

အဆိုပါ ဗုံးပေါက်ကွဲ ကြောင့် သျှမ်းပြည်တပ်မတော် သျှမ်းပြည်တိုးတက်ရေးပါတီ ဒုအတွင်းရေးမှူး ဗိုလ်မှူးကြီးစိုင်းထူးက မိမိတို့လက်ချက်မဟုတ်ကြောင်း၊ မိုင်းငေါ့ဘက်လှုပ်ရှားသည့်အစိုးရစစ်ကြောင်းနှင့် ရဲစခန်းရှိရဲများ ပူးပေါင်းကြံစည်ခြင်း သာဖြစ်ကြောင်းပြောသကဲ့သို့ ဒေသခံရွာသားများနှင့် ကျားဖြူပါတီလွှတ်တော်အမတ်များကလည်း ထိုတဝိုက်တွင် မြန်မာ စစ်တပ်သာလှုပ်ရှားကြောင်းပြောဆိုသည်။

သို့သော် ဒေသအတွင်းလှုပ်ရှားသည့် အစိုးရစစ်ကြောင်းနှင့် မိုင်းငေါ့ရဲစခန်းတို့ပူးပေါင်းပြီး လူထုအားခေါ်ယူကာ ဗုံးပေါက် ကွဲမှုမှာ ၎င်းတို့လုပ်ရပ်မဟုတ် SSPP/SSA တို့၏ လုပ်ရပ်သာဖြစ်ကြောင်း သောကြာနေ့က ရှင်းလင်းပြောကြား ခဲ့သည် ဟုဆို၏။

ယမန်နေ့ ဗုံးနင်းမိသည့် နန်းအေးဌေး၏ သတင်းနှင့်ပတ်သက်၍ မြ၀တီ သတင်းဌာနက  “ အကြမ်းဖက် သောင်းကျန်းသူ များ၏ မိုင်းထောင် ဖောက်ခွဲမှုကြောင့် အပြစ်မဲ့ပြည်သူတစ်ဦး ထိခိုက်ဒဏ်ရာရရှိ” ဟူ၍ သတင်းများ ရေးသားဖော်ပြ ထား သည်။
http://www.burmese.panglong.org/news/90-2008-08-03-06-47-55/3668-2012-11-20-11-00-41.html

အပြည့်အစုံသို့... »

တောင်ပိုင်း ဝ တပ်ဖွဲ့က သျှမ်း/အရှေ့ ဒေသခံ လယ်ယာမြေများအားနည်းအမျိုးမျိုးဖြင့်သိမ်းယူ

သျှမ်းပြည်အရှေ့ပိုင်း မိုင်းတုံမြို့နယ်အတွင်း ဝ တပ်ဖွဲ့က လူထုလယ်မြေများအား အဓမ္မသိမ်းယူမှု၊ အဓမ္မ ဝယ်ယူမှု အပေါ်ဒေသခံများ မကျေမနပ်ဖြစ်နေသည်ဟု ဒေသတွင်းသတင်းရပ်ကွက်ကဆိုပါသည်။

(photo: Nong Seng Naw facebook)

“ဂျူလိုင်လကတည်းက နိုင်ငံရေးပါတီတွေဆီတင်ထားတယ်။ ဝ တပ်ဖွဲ့က ကျမတို့ရဲ့လယ်မြေတွေကို အဓမ္မ ဝယ်ယူ တယ်။ အဓမ္မသိမ်းယူတာလဲရှိတယ်။ အခုဆက်တိုက်ဖြစ်နေသေးတယ်။ ပါတီအမတ်ကနေ တင်ပြပေးဖို့လဲပြောထားတယ်။ ဘာမှတော့မသိရသေးဘူး” ဟု ပုံပါကျင်ဒေသခံ နန်းခမ်းကပြောသည်။

မိုင်းတုံမြို့နယ် ပုံပါကျင်မြို့နယ်ခွဲအတွင်း ဝ တပ်ဖွဲ့များ သျှမ်းပြည်အရှေ့တောင်ပိုင်းသို့ စတင်ရောက်ရှိလာချိန်မှစ၍ ဒေသခံများ၏ လယ်ယာမြေများအား နည်းအမျိုးမျိုးဖြင့်  သိမ်းယူခဲ့ကြောင်း၊ စတင်ရောက်ရှိစဉ်က ဗိုလ်ချုပ်ခင်ညွန့် အမည်ဖြင့်သိမ်းပိုက်ကြောင်း၊ ထို့နောက်ပိုင်း ချောင်းအထက်ပိုင်းရှိလယ်မြေများအား အဓမ္မဝယ်ယူ၍ တခြားအောက်ပိုင်းရှိ လယ်သမားများအတွက် ရေမျှမပေး၊ နောက်ပိုင်းဈေးနှိမ်ဝယ်ခဲ့ကြောင်း လယ်ယာခြံ ပိုင်ရှင်များက ပြောပြပါသည်။

“ဒီလယ်မြေအသိမ်းခံရတဲ့ ကျနော်တို့ ပုံပါကျင်ရပ်ကွက် ၅ က လယ်သမား ၃ ယောက်စလုံး သူတို့မှာ ပုံစံ ၁၀၅ ရှိတယ်။ အဲဒီ ၁၀၅ မိတ္တူရယ် တင်ပြလာတဲ့စာတွေရယ် ကျနော့ရဲ့မေးခွန်းတွေရယ် တောင်ကြီးနဲ့ နေပြည်တော်ကိုပို့တယ်။ အဲဒီအသိမ်း ပိုက်ခံရတဲ့ လယ်ယာမြေတွေကို မြေစာရင်းတွေက ကွင်းဆင်းစစ်ဆေးတော့မယ်လို့ကြားထားတယ်။ ဘယ်တော့လာမလဲ တော့မသိဘူး ” ကျားဖြူ ပြည်နယ်လွှတ်တော်အမတ် စိုင်းဝင်းမြတ်ဦးက ပြောပါသည်။

ဂျူလိုင်လဆန်းပိုင်းက ပုံပါကျင်မြို့နယ်ခွဲ လယ်သမား နန်းခမ်းစိန်၊ စိုင်းလျဲန်း၊ နန်းမတ် တို့၏ လယ် ၅ ဧက အား ၀ တပ်ဖွဲ့က သိမ်းယူခဲ့ကြောင်း၊ လယ်ပြန်ရရေးအတွက် ရပ်ရွာအုပ်ချုပ်ရေးမှူးနှင့်အတူ စရဖများအားခေါ်ယူ၍ ၀ တပ်ဖွဲ့ များနှင့် သွားရောက်ဆွေးနွေးတော်လည်း အောင်မြင်မှုမရှိကြောင်း လယ်ယာဆုံးရှုံးသူများက ပြောပါသည်။

“လယ်ပိုင်ရှင်တွေက ရပ်ကွက်အကြီးအကဲတွေကို ရပ်မိရပ်ဖတွေ၊ စရဖနဲ့ ထွေအုပ်တွေပါ ခေါ်ပြီး ဝ တပ်ဖွဲ့အကြီးအကဲ တာ့ကန်း နဲ့ တာ့ပေါဝ်း ဆိုသူ ၂ ယောက်ကိုသွားတွေ့တယ်။ သူတို့က အစိုးရ အရာရှိရှေ့မှာဘဲ လယ်ရှင်တွေကို ကြိမ်း မောင်းတယ်။ ခင်ဗျားတို့ အသက်တိုချင်လား သက်တမ်းစေ့မနေချင်လို့လား စတာတွေဘဲ။ အာဏာပိုင်တွေလဲ ဘာမှမ တတ်နိုင်ဘူး” ဟု လယ်သိမ်းခံရသူတဦးက မကျေမနပ်ဖြင့် သျှမ်းသံတော်ဆင့်အားပြောပြသည်။

တောင်ပိုင်းသို့ ရောက်ရှိစဉ်ကတည်းက အဆိုပါ ၀တပ်ဖွဲ့တို့သည် အစိုးရ (ထိုစဉ်က ဦးခင်ညွန့်) ၊ ငြိမ်းချမ်းရေး နာမည်သုံး၍ ဒေသခံလူထု၏ ဝါးရုံ၊ ထင်းတောများအား ခုတ်ယူသုံးစွဲခြင်း၊ ခြံစည်းရိုးများပါမကျန် ဆွဲနုတ်ကာ ထင်းအဖြစ်အသုံးပြုခြင်း၊ ထိုနောက်ပိုင်း ဒေသံလူထု၏ လယ်ယာမြေများအား အဓမ္မဝယ်ယူခြင်း၊ ဈေးနှိမ်ဝယ်ခြင်း၊ အခမဲ့သိမ်းယူခြင်းများ ပြုလုပ်ခဲ့ ကြောင်း၊ မကျေနပ်ပြီး ပြန်ပြောပါက ‘ငြိမ်းချမ်းရေးဖျက်ဆီးသူဖြစ်ချင်လား’ စသဖြင့် ခြိမ်းခြောက်ခဲ့ကြောင်း၊ နိုင်ငံရေးပြောင်း လဲစပြုလာသောကြောင့် ယခုကဲသို့ ပြန်လည်တိုင်တန်းခြင်းဖြစ်ကြောင်း ပုံပါကျင်ဒေသခံများက ပြောသည်။

အသိမ်းခံရသည့်လယ်ယာမြေများမှာ ပုံပါကျင် အရှေ့ဘက်ရှိ ရပ်ကွက် ၅ နှင့် ၀ (ရွာသစ်) ပါတေရွာ အကြား လယ်မြေ များဖြစ် သည်ဟုသိရပါသည်။ အလားတူ မိုင်းတော့ မိုင်းထား မှ ၀  တပ်ဖွဲ့ထိန်းချုပ်နယ်မြေ ဟိုမိန်းမြို့နယ်ခွဲအထိလည်း ထိုကဲ့သို့ လယ်ယာမြေအသိမ်းခံရခြင်းများရှိခဲ့ကြောင်း ဟိုမိန်းဒေသခံများပြောပြချက်အရသိရသည်။
http://www.burmese.panglong.org/news/90-2008-08-03-06-47-55/3646-2012-11-13-10-18-23.html

အပြည့်အစုံသို့... »

ပြောင်းခြံလုပ်သားအား အစိုးစစ်ကြောင်းပစ်ခတ် ဆေးရုံတင်ထားရ

သျှမ်းပြည်မြောက်ပိုင်း  နမ္မတူမြို့တွင်မူ ပြောင်းဖူးကောက်နေသောရွာသားများအား မြန်မာစစ်ကြောင်း က ပစ်ခတ်သဖြင့် ရွာသားတဦးဆေးရုံတင်ထားရကြောင်း နိုင်ငံရေးပါတီဝင်လူငယ် တဦး ကပြောသည်။

ပြောင်းခြံလုပ်သားအား အစိုးစစ်ကြောင်းပစ်ခတ် ဆေးရုံတင်ထားရ

“မိုင်းယင်အုပ်စု ဟော်နားရွာဘက်ကို မြန်မာစစ်ကြောင်း ရောက်တယ်။ ပြောင်းဖူးကောက်တဲ့ခြံ ဘေး ဖြတ်လာတော့ စိုင်းအောင်ဆိုတဲ့ပြောင်းခြံလုပ်သားက ပေါ် တာ ဆွဲမှာကိုကြောက်ပြီး ထွက်ပြေးဖို့လုပ် တော့ သေနတ်ပစ်ထဲ့လိုက်တော့တာဘဲ” - ဟု နမ္မတူမြို့ပေါ် ရောက် မိုင်းယင်် ရွာသားတဦးကပြောပါ သည်။

နိုဝင်ဘာ ၆ ရက် နေ့ နမ္မတူမြို့နယ် မိုင်းယင် ကျေးရွာအုပ်စုဘက် နမ့်လန် အခြေစိုက်အစိုးရတပ် ခလရ ၂၄၃ က သွားရောက်လှုပ်ရှားကြောင်း၊ အသက် ၃၅ နှစ်အရွယ် ပြောင်းခြံလုပ်သား စိုင်းအောင်က မြန်မာစစ်သားအားကြောက်ရွံ့သောကြောင့် တိမ်းရှောင်ရန် ကြိုးစားစဉ်အစိုးရတပ်က ပစ်ခတ်သော ကြောင့် ရင်ဘတ်၊ လက်၊ ပေါင်တို့ ၌ ဒဏ်ရာရရှိကြောင်း၊ ၄ နှစ်အရွယ်၎င်း၏ကလေးလဲ နှဖူး၌ ကျည်စထိမှန် ကြောင်း၊ လက်ရှိစိုင်းအောင်ဆိုသူသည် နမ္မတူဆေးရုံသို့ ရောက်ရှိနေကြောင်း ကြားသိရပါသည်။

“ဟုတ်တယ်။ ကျမလဲ လူလွတ်ပြီးသတင်းသွားမေးခိုင်းထားတယ်။ ကျားဖြူပါတီကို တိုက်ရိုက်လာတိုင် တာတော့မရှိသေးဘူး”- ဟု ပြည်နယ်လွှတ်တော်အမတ်နန်းခမ်းအေးက ပြောပါသည်။

သေနတ်ပစ်ခံရသူ စိုင်းအောင်သည်  ဇနီး ၊ ၄ နှစ်သားအရွယ် သားတဦးနှင့်အတူ ပြောင်းဖူးကောက် နေစဉ် ယခုကဲ့သို့ ကြုံတွေ့ခဲ့ရခြင်းဖြစ်ကြောင်း - နီးစပ်သူတဦးကပြောပါသည်။
http://www.burmese.panglong.org/news/90-2008-08-03-06-47-55/3637-2012-11-09-09-46-32.html

အပြည့်အစုံသို့... »

အစိုးရစစ်သားများ ကလေးမိခင်တစ်ဦးအား အဓ္ဓမပြုကျင့်၍ သတ်ရန်ကြိုးစား

ရှမ်းမြောက် ကွတ်ခိုင်မြို့ အနီးတွင် လုံခြုံရေးယူနေသော မြန်မာစစ်သား တစ်ဦး။

 

ရှမ်းပြည်နယ်မြောက်ပိုင်း KIA တပ်မဟာ (၄) လက်အောက် တပ်ရင်း (၈) နယ်မြေ အောင်နန်းကျေးရွာမှ အသက် (၂၉) နှစ်အရွယ် ကလေးမိခင်တစ်ဦးကို မြန်မာအစိုးရစစ်သားများသည် နေအိမ်သို့ဝင်ရောက်ကာ အဓ္ဓမပြုကျင့်၍ သတ်ဖြတ်ရန်ကြံစည်ခဲ့ကြောင်း ဒေသခံများပြောသည်။
အဆိုပါကလေး ၃ယောက် မိခင်ဖြစ်သော ရှမ်းအမျိုးသမီးသည် နေအိမ်တွင်း အဝတ်လျှော်နေစဉ် အစိုးရစစ်သား ၃ ဦး ၀င်ရောက်လာခဲ့ခြင်းဖြစ်ပြီး သတ်ရန်ကြိုးစားနေချိန် ၄င်း၏အမျိုးသား ပြန်လာသောကြောင့် အသက်လွှတ်သွားခဲ့ရကြောင်း ဒေသခံတစ်ဦးပြောသည်။
“အဲဒီမိန်းကလေးက ကလေးမွေးတာ ၁ လကျော်ပဲရှိသေးတယ်။ သူကအိမ်နောက်ဖက်မှာ ကလေးအနှီး လျှော်နေတယ်တဲ့။ အဲဒီမှာပဲ အဓ္ဓမပြုကျင့်ပြီးတော့ လေပင်းညစ်သတ်နေတဲ့အချိန် သူ့ယောကျင်္ားပြန်လာတာနဲ့ တွေ့တော့ ပြန်ထွက်ပြေးသွားကြတယ်တဲ့။”
ထိုသို့ဝင်ရောက်လာသော အစိုးရစစ်သား ၃ ဦးသည် ဗိုလ်ကြီး ထွန်းထွန်းနိုင် ဦးဆောင်သော နမ္မတူ (Namtu) အခြေစိုက် ခလရ (၂၄၇)မှ စစ်သားများဖြစ်ကြောင်း ဒေသခံများပြောသည်။
ယခုအချိန် အဆိုပါအမျိုးသမီးသည် ဂယောင်ချောက်ချား ကြောက်ရွံ့ထိတ်လန့်မှုဖြစ်ပြီး ၄ ရက်ခန့် ဆေးကုသမှုခံယူနေကြောင်း နီးစပ်သော ဒေသခံများက KNG ကချင်သတင်းဌာနသို့ ပြောသည်။ 

 

http://kachinnews.com/burmese/news/962-%E1%80%A1%E1%80%85%E1%80%AD%E1%80%AF%E1%80%B8%E1%80%9B%E1%80%85%E1%80%85%E1%80%B9%E1%80%9E%E1%80%AC%E1%80%B8%E1%80%99%E1%80%BA%E1%80%AC%E1%80%B8-%E1%80%80%E1%80%B1%E1%80%9C%E1%80%B8%E1%80%99%E1%80%AD%E1%80%81%E1%80%84%E1%80%B9%E1%80%90%E1%80%85%E1%80%B9%E1%80%A5%E1%80%AE%E1%80%B8%E1%80%A1%E1%80%AC%E1%80%B8-%E1%80%A1%E1%80%93%E1%81%B6%E1%80%99%E1%80%BB%E1%80%95%E1%80%B3%E1%80%80%E1%80%BA%E1%80%84%E1%80%B9%E1%80%B7%E1%81%8D-%E1%80%9E%E1%80%90%E1%80%B9%E1%80%9B%E1%80%94%E1%80%B9%E1%81%BE%E1%80%80%E1%80%AD%E1%80%B3%E1%80%B8%E1%80%85%E1%80%AC%E1%80%B8.html

အပြည့်အစုံသို့... »

အစိုးရတပ်စစ်ကြောင်းလှည့်စဉ် ဗုံးကွဲ လူထုအပါအဝင်သုံးဦးသေ

တနင်္လာနေ့က သျှမ်းပြည်မြောက်ပိုင်း နမ္မတူမြို့နယ် ဒေသခံ တပ်ရင်းတရင်းက စစ်ကြောင်းလှည့်စဉ် ဗုံးတ လုံးကျကွဲသော ကြောင့် ချောဆွဲခံရသည့် ဒေသခံလူထုတဦးပါအဝင် သုံးဦး သေဆုံးပြီး ၅ ဦးဒဏ်ရာရရှိ သည်ဟု ဆိုသည်။

မြန်မာစစ်တပ်နှင့်အတူ လိုက်ပါရသော သျှမ်းပြည်အလယ်ပိုင်းမှ ဒေသခံရွာသားတဦး(ဓါတ်ပုံ-သျှမ်းသံတော်ဆင့်)

“ခမရ ၃၂၄ က နမ္မတူကနေ ကျနော်တို့ ဆိုင်းခေါဝ်ဘက် စစ်ကြောင်းလှည့်တယ်။ ကျနော်တို့ဒေသအတွင်း သျှမ်းသူပုန်လုံး၀ သွားလာတာမရှိအောင်ရှင်းလင်းတာတဲ့၊  ပန်ဝိုးရွာမရောက်ခင် ပြောင်းဖူးခြံတခု နားမှာ အဲဒီစစ်ကြောင်း နားကြ တယ်၊ အဲချိန်မှာ သူတို့ရဲ့ လက်ပစ်ဗုံးတလုံးကွဲသွားတယ်၊ ချောဆွဲခံရသူတဦးလဲ ပွဲချင်းပြီး သေသွားဘဲ” - ဟု အမည်မဖေါ်လိုသူ နမ္မတူရောက်ဒေသခံတဦးကပြောပါသည်။

စက်တင်္ဘာ ၂၄ နံနက် ၈ နာရီခန့် နယ်လှည့်သည့် အစိုးရတပ် ခမရ ၃၂၄ ရွာအတွင်း ဆိုင်းခေါဝ် ကျေးရွာ အုပ်စု ပန်ဝိုးကျေးရွာအတွင်းဝင်ကာ ကျေးရွာသားတဦးအား ပေါ်တာလမ်းပြအဖြစ်ခေါ်ဆောင်သွားကြောင်း၊ နံနက်ဆယ်နာရီအချိန် ပန်ဝိုးနှင့် ကောင်းမော့ခန် ရွာအကြား ပြောင်းဖူးခြံအတခုအနီး ခရီးတထောက်နား စဉ် ဗုံးတလုံးကျကွဲခဲ့ကြောင်း၊ ဗုံးကွဲမှုကြောင့် ဗုံးကိုင်သူတပ်သားတဦးနှင့် လမ်းပြရွာသား စိုင်းပီး အသက် ၅၀ ပွဲချင်းပြီးသေဆုံးကြောင်း၊ နမ္မတူဆေးရုံ၌ တဦးထပ်မံသေဆုံးပြီး ကျန်ရှိဒဏ်ရာရလူနာ ၂ ဦးအား နမ္မတူလူမှု ကူညီရေးအသင်းကားဖြင့် ယမန်နေ့က လားရှိုးစစ်ဆေးရုံသို့ပို့ဆောင်ကုသနေကြာင်း တပ်မိသားစုနှင့် နီးစပ်သူ တဦးက ပြောပါသည်။

အတည်မပြုနိုင်သေးသည့် သတင်းအရ ပေါက်ကွဲသော ဗုံးသည် သျှမ်းပြည်တပ်မတော်မှ ထောင်ထားသော မိုင်းဗုံးဖြစ်ကြောင်း ဒေသခံများကပြောကြသည်။

“ရွာထဲဝင်လာတော့ ရွာသားတွေ အကုန် ထွက်ပြေးကြတယ်။ ရွာအရှေ့ကနေဝင်လာရင် ရွာအနောက်ဘက်ကို တိမ်းရှောင်ကြတယ်။ တွေ့တဲ့သူကို လမ်းပြ ခေါ်သွားတာလေ။ သုံးလေးယောက်ပါသွားတယ်။ သေဆုံးတဲ့ စိုင်းပီးကို အဲဒီမှာဘဲမြှုပ်လိုက်တာ်။ တပ်က ထောက်ပံ့ကြေးလာပေးမယ်ပြောတာဘဲ။ အခုထက်ထိ ဆွမ်းသွတ် တရားနာလဲမလုပ်ပေးရသေးဘူး။” - ဟု အမည်မဖေါ်လိုသည့် ဒေသခံနောက်တဦးကပြောပါသည်။

ဗုံးပေါက်ကွဲစဉ် ၎င်းတို့နားနေသည့် နေရာအနီး ပြောင်းဖူးခြံ၌ အလုပ်လုပ်နေသော ရွာသား စိုင်းနောင့်ယိုင် အသက် ၁၈ နှင့် စိုင်းနောင့်အွန် အသက် ၁၆ (ညီအစ်ကို)က ဗုံးသံလန့်၍ ထွက်ပြေးသဖြင့် အစိုးရတပ်က သေနတ် ပစ် ခြိမ်းခြောက်ကာ ၎င်းနှစ်ဦးအား SSPP/SSA တပ်အဆက်အသွယ်ဟူ၍ ဖမ်းဆီးလိုက်ကြောင်း၊    ၎င်းတို့ညီအစ်ကိုနှစ်ဦးအား လက်ပြန်ကြိုးတုတ်ပြီး  ၎င်းတို့တပ်ကုန်းသို့ ခေါ်ဆောင်သွားခဲ့ကြောင်း မျက်မြင် များက ပြောပါသည်။
http://www.burmese.panglong.org/news/86-2008-08-01-03-20-45/3526-2012-09-26-10-24-51.html

အပြည့်အစုံသို့... »

တပ်သားသစ်ကောက်ယူစုဆောင်းမှုကြောင့် ဒေသခံများအခက်တွေ့

သျှမ်းပြည်မြောက်ပိုင်း သီပေါမြို့အခြေစိုက် ဌာနေပြည်သူ့စစ် အမှတ် ၂ တပ်ဖွဲ့က တပ်သားသစ်စု ဆောင်းနေပြီး မပေး နိုင်သူများ ပိုက်ဆံသိန်းပေါင်းဆယ်ချီကောက်ယူနေကြောင်း ဒေသတွင်း သတင်း ရပ်ကွက်ကဆိုပါသည်။

မြန်မာအစိုးရစစ်တပ်တွင်းမှကလေးစစ်သားများ (နစ်နေမန်းဘလောက်မှ)

“ မိန်းခေး ပြည်သူ့စစ် စဝ်လှမြင့်တို့တပ်ဖွဲ့လေ။ တပ်သားသစ်စုဆောင်းတယ်။ နာမည်ပါလို့ မသွား နိုင်ရင် ၂၅ သိန်းပေးရ တယ်။ ဒီစစ်သားကောက်နေတဲ့ လုပ်ရပ်တွေ ဒီနေ့ သမ္မတသစ်ခေတ်မှာ မရှိစေ ချင်တော့ဘူး။ ဘယ်တော့များ ကင်းလွှတ်နိုင် မလဲနော်” သီပေါဒေသခံတဦးကပြောသည်။

၂၀၁၀ ဧပြီလက ပြည်သူ့စစ်အသွင်ပြောင်းသွားသော ယခင် မြောက်ပိုင်း SSA (ဥက္ကဌဟောင်း)  ဗိုလ်ချုပ် လွယ်မောင်း နှင့်  (ဒုဥက္ကဌ ဟောင်း) ဗိုလ်ချုပ်ကိုင်ဖှတို့၏ စိန်ကျော့ဌာနချုပ်ကို ဌာနေပြည်သူ့စစ် အမှတ် ၁ ၊ သီပေါမြို့နယ် မိန်းခေး အခြေစိုက် ယခင်တပ် မဟာ ၃ ကို ဦးလှမြင့်ဦးဆောင်သည့် ဌာနေပြည်သူ့စစ် အမှတ် ၂ ၊  ကွန်ဟိန်းမြို့နယ် ကာလိ အခြေစိုက် ယခင်တပ်မဟာ ၇ ကို ဦးလောင်ကွန်း ဦးဆောင်သည့် ဌာနေပြည်သူစစ်အမှတ် ၃ စသဖြင့် အသီးသီးပြောင်းလဲ သတ်မှတ်ခဲ့သည်။

ယခုနှစ် မေလ ၂၄ ရက်  က လဲချားမြို့နယ် ဝမ့်ပန်ဌာနေပြည်သူ့စစ်ခေါင်းဆောင် စိုင်းတ တို့အား တောင်ကြီး ကျားဖြူရုံးခန်း ၌ ဦးစိုင်းအိုက်ပေါင်းက တွေ့ဆုံခဲ့စဉ် တပ်သားစုဆောင်းမှုရပ်တန့်ရန်အတွက် တိုက်တွန်းမှုပြုခဲ့သေးသည်။ ထိုနောက်ပိုင်း တပ်သားသစ်စုဆောင်းသည်မဟု မကြားရသော်လည်း အဓမ္မလုပ်အားပေးခိုင်းစေမှုကိုမူ ယနေ့တိုင်ကြားနေရဆဲဖြစ်သည်။

သျှမ်းပြည်မြောက်ပိုင်း နမ္မတူမြို့တွင်လည်း အလားတူ ယခုနှစ်ဆန်းပိုင်းက အမည်မသိလက်နက်ကိုင်တစုက ကလေး တပ်သားစုဆောင်းနေသည့်အပေါ်တွင်လည်း ရှုပ်ချကြောင်း ကျားဖြူပါတီလွှတ်တော်အမတ် တဦးက သျှမ်းသံတော်ဆင့် အားပြောပြဖူးသည်။ ပညာသင်သည့်အရွယ်တွင် ပညာအပြည့်အ၀ သင်ယူခွင့်ရရှိရန်အတွက် အဆိုပါ ကလေးငယ်များအား တပ်သားစုဆောင်းခြင်းမပြုရန် အကာအကွယ်ပေးရမည်ဟု ၎င်းကပြောဆိုခဲ့ပါသည်။

အလားတူသျှမ်းပြည်မြောက်ပိုင်း မန့်ပန်အခြေစိုက် ဗိုလ်မွန်းဦးဆောင်သည့် ဌာနေပြည်သူ့စစ်ကလည်း ၎င်းထိန်းချုပ်ရာ လားရှိုးမြို့ အရှေ့မြောက်ဖက် ပန်စုံရွာ၊ ကုန်းဆာအုပ်စု၊ မတ်ချိနူအုပ်စု ၊  မန့်မွန်းရွာ၊ ခွန်နို့အုပ်စု၊ မန့်ပိန်းအုပ်စု၊ မိန်းပါးရွာ၊ တာယောဝ်၊ မိုင်းယန်း မှ မိုင်းယော်တိုက်နယ်၊ မိုင်းဟက်အုပ်စု ဒေသအထိ နှစ်စဉ်နှစ်တိုင်း တပ်သားသစ် လေးငါးရာထက် မနည်းကောက်ယူစုဆောင်းခဲ့ သည်။

၎င်းနှင့်ပတ်သက်၍ မိုင်းယော်တိုက်နယ်သားတဦးက“ တပ်သားသစ်ကောက်ပြီး စစ်ရေးလေ့ကျင့်ပေးတာ မရှိဘူး။ ကောက် ယူရရှိတဲ့ တပ်သားသစ်တွေတဝက်ကို သူတို့အတွက်သုံးတယ်။ ကျန်တဝက်ကို မြန်မာစစ်တပ်ကိုပို့တယ်။ မြန်မာစစ်တပ် မှာက အများအားဖြင့် ကေအိုင်အေတွေ သျှမ်းတွေကို တိုက်ရာမှာ တပ်သားသစ်တွေကိုသုံးတယ်။ သူတို့အတွက်အသေခံ သုံးနေတဲ့အတွက် လူတွေက သူတို့တပ်ထဲမဝင်ချင်ဘူး။ သျှမ်းတပ်ထဲဝင်ရင်တောင် ကောင်းသေးဆိုတဲ့လူတွေများတယ်။ အများအားဖြင့်တော့ နယ်စပ်ဘက်ထွက်ပြေးကြတယ်” ဟု ဆို၏။

ယခုနှစ်အတွက်မူ ဗိုလ်မွန်းသည် နှစ်ဆန်းပိုင်းက တပ်သားသစ်ကောက်ယူစုဆောင်းခဲ့ပြီးဖြစ်သည်။ တပ်သားသစ်စု ဆောင်း မှု အတွက် ဒေသတွင်း ကျားဖြူပါတီက ကူညီဖြေရှင်းပေးရာတွင် တချို့တဝက်ကို လွှတ်မြောက်အောင် ဖြေရှင်းပေးခဲ့သည် လည်းရှိကြောင်း ပါတီဝင်အသိုင်းအဝိုင်းက ပြောပါသည်။

အပစ်ရပ်စဉ်က တပ်သားသစ်မစုဆောင်းတော့ဟု ကြေငြာဖူးသည့် လက်နက်ကိုင်တပ်ဖွဲ့တချို့ကလည်း လူသစ်စုဆောင်းမှု ရှိနေသောကြောင့် ထိုင်းသို့ ထွက်ပြေးတိမ်းရှောင်ရခြင်းဖြစ်ကြောင်း ထိုင်းရောက် စစ်ဘေးရှောင်သူများက ပြောပါသည်။

http://www.burmese.panglong.org/news/90-2008-08-03-06-47-55/3506-2012-09-18-08-50-29.html

အပြည့်အစုံသို့... »